رواية رحلة معرفة الحقيقة الفصل السادس 6 بقلم زينب مجدي
رواية رحلة معرفة الحقيقة الجزء السادس
رواية رحلة معرفة الحقيقة البارت السادس
رواية رحلة معرفة الحقيقة الحلقة السادسة
أيه…. يعني إيه الكلام ده يا تيته….بتخطبوني وعايزين تجوزوني من غير ما أعرف
الجده….في إيه لما تتخطبي لإبن عمك
أيه…. أنا طبعاً مش موافقة
أميره….مش وقت الكلام ده يا أيه
الجده…بمزاح…..مش تستني لما تشوفيه…ده ماشاء الله عليه طول بعرض واحلي منك يا معصعصه إنتي… إياك هو يوافق بيكي
ميلت أميره علي ودن أيه وقالت….ستك بتحب الهزار بتبقي مش قاصده الكلام إللي بتقوله
أيه….ما أنا فاهمه يا ماما إنها بتهزر
اتي جدها واعمامها وسلمو عليها بحراره شديدة
الجد….. أخيراً شوفتك يا بنت الغالي دوختينا عليكي
شوقي….وحشتيني يا عروسة إبني
أيه بسرعه… على فكره أنا مخطوبه….كنت خلاص هتجوز…يعني مينفعش أكون مخطوبه لاتنين
جدها…..متخافيش إحنا محدش هيغصبك على حاجه وعايزين نشوف خطيبك ده
أثناء حديثهم دخل احمد وفي عينيه نظرة حزن وقال….ازيك يا أيه الحمد لله على سلامتك
قال الجد…..ده احمد إبن عمك شوقي
أيه لنفسها…..يا نهار ابيض هو ده أحمد.. ينفع أغير رأيي واقولهم إني موافقه…دا طلع أحلي مني بجد
ميل الجد على اذن أيه وقال…. على فكره عادي ممكن تغيري رأيك
وضعت أيه يدها على فمها وقالت…. إيه ده أنا مقولتش حاجه
ضحك الجد وقال….ما أنا عارف إنك مقولتيش حاجه
اتكلم الجد بصوت عالي….جهزو الأكل يا بنات… وإنتي يا أم أيه اطلعي افتحي شقتك علشان تباتي فيها إنتي وبنتك
اميره…..ما إنت عارف يا حاج أمي قاعدة لوحدها ومش هينفع اسيبها
الجد…….ليه المحروس أخوك إللي بيخطف بنات الناس مجاش معاها ولا ايه
اميره….. أيه جت لوحدها
احمد بتهور…..جت لوحدها إزاي…وهو عايش فين أصلا…دا إحنا قلبنا الدنيا عليه… وازاي يسيبها تيجي لوحدها…
شوقي….. إحنا لازم نعرف مكانه فين مش بعد ما خطف بنتنا وحرق قلبنا عليها…هنسيبه كده
علي…..عندك حق يا شوقي…دا إحنا كنا بنلف حوالين نفسنا
أيه بدموع….. بالله عليكم ما تأذوه….كان بيعاملني أحسن من بناته….عمري ما شوفت منه حاجه وحشه….عوضني عن حنان أبويا
علي…..طيب خطفك ليه اصلا….المصيبه إن إحنا مش عارفين ليه يخطفك…ويحرق قلبنا وقلب أخته عليكي
أيه….. أنا أسفه…. أنا استحالة أقول على مكانه
ونظرت أيه في وجه اعمامها وهي تقول لنفسها…..يا تري مين فيكم إللي خبط خالي ورجله اتقطعت بسببه
…………………. …………………
في منزل حسن
حسن…..مالك يا جوجو من ساعة ما جيت من بره وأنا حاسس إنك متغيره… إنتي في حاجه مزعلاكي
جيهان…… أنا عايزة أعرف حاجه واحده…. إنت ليه بتكره صحابي….ليه بتعاملهم وحش… غاده عملتلك إيه علشان تعاملها كده
حسن….. وأنا المفروض اعاملها إزاي غاده دي إن شاء الله
جيهان…..تكلمها حلو تقعد معانا وتهزر وتضحك..ولا هما لازم يقولو عليك قفل
انفعل حسن وقال…. أنا ميهمنيش صحابك يقولو عليا إيه… المهم إنتي اقتنعتي بكلامهم ؟
كل ما ييجو صحابك هما يمشو وابص الاقيكي اتغيرتي من ناحيتي وأنا أقعد احايل فيكي واصالحك.. رغم إني معملتش حاجه
واقول اتقي فيها…دا الرسول موصي عليها.. دا ربنا يغضب عليك لو زعلتها…. وتبقى دي النتيجه يا جيهان…صحابك يوقعو بينا….
إنتي شايفاني وحش معاكي علشان كل ما أصحابك ييجو تقتنعي بكلامهم..وتتغيري من ناحيتي
جيهان…..ما هو علشان أنا بسمع كلامك إنت ومش بقول غير حاضر ونعم..لازم تبقى حلو معايا… إنما لو قولت لأ على حاجه هتوريني وشك التاني
حسن وهو يهدأ نفسه….لا حول ولا قوة إلا بالله…..وشي التاني إللي هو إيه يا جيهان
جيهان…وشك التاني إللي ورتهولي يوم فرحنا وكسفتني قدام اصحابي…بدل ما تسيبني أفرح زي كل البنات
علشان بس اخترت على زوقي. ودلوقتي علشان بقولك عامل صحابي كويس عمال تزعق وتعلي صوتك…. فعلاً غاده عندها حق لما قالت عايز تعمل سي السيد عليا
حسن…..ااااااه قولتيلي غاده…..مش غاده قالتلك إني عايز أعمل سي السيد. ….طيب غاده دي بقي ما تدخلش البيت تاني..ماشي
جيهان.. بصوت عالي….. لأ طبعاً مش ماشي.. إنت فعلاً ظهرت على حقيقتك
حسن وهو يكتم غضبه….. أنا خارج علشان الشيطان ميدخلش بينا اكتر من كده….ولما ارجع وتكوني هديتي يبقي نتكلم
خرج حسن وظلت جيهان تبكي وقامت جمعت ملابسها في شنطه وذهبت إلى منزل والدها
كان حسن داخل المسجد يصلي ويدعو الله أن يهدي زوجته ويصرف ذلك الشيطان الذي دخل بينهم
حتي رن عليه والد جيهان
والد جيهان…..مزعل مراتك ليه يا حسن
حسن…..هي رنت على حضرتك تشتكيلك
والد جيهان…. هي مرنتش هي جابت هدومها وسابت البيت ومشيت تعالى علشان أفهم في إيه
………………. …………………
في منزل والد جيهان
حكت جيهان كل شئ أمام والدها ووالدتها وهي تبكي
والدة جيهان…… إنتي متخلفه يا بت…. إنتي بتسمعي كلام صحابك ليه….كويس كده دلوقتي لما سيبتي بيتك وجيتي غضبانه.وانتي لسه عروسه…… وبعدين إنتي بتحكي إللي بيحصل في بيتك لأصحابك ليه…كل شقة مقفوله على اتنين يبقي مفيش حد تالت يعرف إيه إللي بيحصل بينهم ….وبتقوليلهم ليه إن جوزك بيساعدك في شغل البيت…بتقوليلهم إنه بيخرجك كل يوم…مش لاقيه لنفسك داهيه تودي نفسك فيها…. أهي عينهم جابتك الأرض وزعلتك من جوزك
جيهان….. المفروض يا ماما إنك تكوني في صفي
والدتها….. أكون في صفك لما يكون هو غلطان…. إنما الراجل ونعم الأدب والاحترام وبيعاملك أحس معامله
جيهان……ونسيتي إللي عمله يوم فرحي ونسيتي إنتي كنتي عامله إزاي…. وبعدين هو مش طايق أصحابي ليه
والد جيهان…… في إيه يا بنتي الراجل عايز يقعد في بيته براحته مع مراته….دا لسه عريس مكملش شهرين جواز…. أصحابك ييجو بيتك تلاته أربع مرات في الأسبوع ليه
جيهان…..في إيه يا بابا….. إنت كمان بتقول كده
والدها……بصي يا بنتي… أنا هقولك على حاجه…. إنتي طيبه بزيادة وشخصيتك ضعيفة….. علشان كده اصحابك مستغلين ده وبيوقعو بينك وبين زوجك….. قوليلي ايه إللي حصل بعد ما سمعتي كلامهم
كنتي كل يوم بتشاركي جوزك في يومك وهو بيشاركك في يومه وتنامو مبسوطين ومفيش زعل بينكم…. وبعد ما سمعتي كلامهم….اديكي أهو قاعدة زعلانه وبتعيطي…وخليتي جوزك يخرج ويسيبك بالليل وهو مدايق……وعايز أقولك لو جوزك اتعود على الخروج والقاعدة في الكافيهات…هترجعي تشتكي إن جوزك بيخرج.ومش بيقعد في البيت
يا بنتي أي حد يقولك أي كلمه تمرريها على عقلك الأول وشوفي الكلام ده في مصلحتك ولا لأ…حتي لو أنا أو أمك تفكري في الكلام الأول….ومش من أي مشكله تسيبي بيتك وتمشي…حتي لو المشكله كبيرة… تصفي كل حاجه بينك وبين زوجك ومتدخلش طرف تالت حتي لو أنا أو أمك
اتي حسن وخرج له والد جيهان وجلست والدة جيهان معها
وقالت……عمرك شوفتي ابوكي دخل المطبخ وعمل فيه حاجه
جيهان….. لأ
والدتها… طيب عمرك شوفتيه بيساعدني في حاجه حتي لو أنا تعبانه
جيهان…… لأ
والدتها…..يبقي تحمدي ربنا إن عندك زوج بيحبك ويساعدك وبيحس بيكي من غير ما تتكلمي….متحكيش لحد عن جوزك…. علشان معظم الرجاله زي ابوكي مفيش واحد بيساعد مراته وأقل كلمه بيقولهلها إنتي بتعملي إيه طول النهار…..الناس عينها وحشه ومحدش هيتمنالك الخير
أنا أمك هقول يارب أسعدها وهتمنالك الخير والسعادة.. إنما أصحابك اذوك فعلاً….. زعلانه علشان يوم الفرح..
كنتي هتبقي فرحانه وهو جوزك ..بيفرج الرجاله على جسم مراته العريان….كنتي هتبقي فرحانه وإنتي بترقصي وسط الرجاله وجوزك واقف يسقف ومبسوط
إنتي تعرفي إنه كبر في نظري أوي بعد إللي عمله… عرفت إنه هيحافظ عليك…. مكانش همه الفرح ولا المعازيم كان همه بس إنه يستر مراته
كنتي هتبقي فرحانه وهو جوزك مش بيغير عليكي يا جيهان….دا يوم الفرح المفروض يفضل في ذاكرتك إنه افضل يوم في حياتك علشان عرفتي إن ليكي سند وضهر وراجل بيحبك ويغير عليكي
عند والد جيهان…..
والد جيهان….. أنا عارف إن جيهان غلطانه…بس إنت خدها على قد عقلها يا ابني لسه عروسه جديده وبتدلع عليك
حسن……..يا عمي والله لما لقيت الشيطان بدأ يتدخل بينا خرجت علشان لا أنا اغلط ولا هي تغلط ويحصل زعل بجد
والدها….طيب إنت عايز تمنع صحابها إنهم ييجو البيت عندها….ودا صعب عليها يا أبني جيهان روحها في أصحابها
حسن…….يا عمي أنا مقولتش كل أصحابها أنا قولت غاده بس… بعد ما بتمشي من عندنا بلاقي جيهان اتغيرت
والدها…..معلهش يا ابني علشان خاطري متحرمهاش إن صحبتها تيجي تزورها
حسن……طيب أنا هوريك حاجه يا عمي وبعدين إنت تحكم تدخل بيتي ولا لأ
أخرج حسن الهاتف وبدأ يتفحصه وقال بص يا عمي
ده رقم غاده صحبتها.. بعد ما اتجوزنا بفتره صغيره..لقيتها بترن عليا..وانت عامل إيه وممكن نبقى اصحاب والكلام ده كله … طبعاً كنت بصدها…. وبعدين شوف الرسايل دي
دي رساله بتقولي لو مراتك نامت أنا صاحيه لو حابب نتكلم شويه..
بعد الرسالة دي عملت حظر لرقمها….لو إنت بعد إللي شوفته ده حابب إنها تدخل بيت بنتك وتخربه أنا معنديش مانع
………… ……….
في منزل جد أيه
كانت أيه تجلس وسط عائلتها وهي تشعر بالسعادة الشديدة فالجميع هنا يظهر لها الحب والود
رن هاتفها
وجدت رقم غريب… أعطت الهاتف لعمها وقالت رقم غريب ممكن ترد
رد عمها على الهاتف وقال لها واحد بيقول إنه إسمه ياسر…كان خطيبك
أيه بتوتر….خطيبي آه هات أرد عليه
ياسر….. إيه بعد ما عرفت حقيقتكم طفشتو إنتي وخالك وسرقتو الدهب بتاع الشبكه
تحججت أيه بأن شبكه الهاتف لاتجمع وخرجت خارج المنزل
أيه…. إنت تخرص خالص كل الكلام اللي أنته قولته كدب أبويا مات موته طبيعيه وأمي عايشه وأنا دلوقتي معاها وعايشه وسط أهلي… وبعدين مين إللي قالك على التخاريف دي
ياسر…. جوز رنا بنت خالك كانت سمعت كانت سمعت خالك وهو بيقول لمراته وهي حكت لجوزها وجوزها قالي
المهم دلوقتي أنا عايز الشبكه بتاعتي
أيه….. الشبكه بتاعتك مع خالي وكل حاجه تخصك معاه
ياسر…..خالك ساب البلد وطفش معاكي المهم لو مجبتيش الشبكه بتاعتي هتلاقيني جيتلك وهفضحك في المكان إللي إنتي فيه علي العموم من رقمك أنا عرفت إنتي قاعدة فين دلوقتي وجاي بكره علشان أخد حاجتي منك.يا إما هفضحك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية رحلة معرفة الحقيقة)
تعليق واحد