رواية غرام العاشق الفصل السابع 7 بقلم ميرو أحمد
 |
| رواية غرام العاشق الفصل السابع 7 بقلم ميرو أحمد |
رواية غرام العاشق الفصل السابع 7 بقلم ميرو أحمد
في الصبح عند الشباب في المستشفى طبعا مش كلهم قعدو
قعد انس و ايهاب الباقي روح سهرو امع الشباب بعدها روحو
حمادي سمع بمصطفى اصلا هوا الي جاب هله في اليل مالقي الشباب روح قال الصبح نمشيلهم في المستشفى
المهم حمادي جاء للمستشفى سال علي مصطفى قالوله ممنوع الزياره لانه في العنايه
حمادي شاف انس خاش في ايده قهوه ليه ولي ايهاب
انس بعد شاف حمادي عصب ???? مزال موضوع اخته مش ناسيه ليه قدم بعصبيه
انس ????????: شن ادير انت هنا
حمادي: جيت نطمن علي مصطفى ونسلم عليكم
انس حامق: مانبوه سلامك مصطفى مادخلكش فيه
حمادي: عيب ياراجل تصرفك غلط مهما صار بينا ماتخلط موضيع في بعضها يا انس وانت مش فاهم الموضوع
انس: توا انت بتعلمني صح من الغلط تي انت الغلط راكبك ركب ماتخليني انفلم في الكلام من الصبح
حمادي ماعدل عليه: علي كل حال انا مش جايك انت جاي لي ايهاب وينه
انس ايشوفله بحقد: فوق
حمادي ما عدل عليه ومشا فوق وانس وراء ايشوفله بحقد كان ينقز عليه يقتله غير قاعدين في المستشفى
حمادي ايسلم علي ايهاب بالخد
حمادي: الحمدلله علي سلامته يابرو
ايهاب: الله ايسلمك
حمادي: شن قالولكم الدكاتره عليه
ايهاب: والله مزال حطينه في المراقبه
حمادي: ربي اينوضه ليكم بخير ويشفيه
ايهاب: امين يارب
حمادي: امبارح جيت غادي لبيتكم القيت جدي وبوك وعمامك قاعدين ما حصلتكم
ايهاب: اي الشباب كانو هنا
حمادي: باهي كيف صار الحادث
ايهاب وحمادي قعدو ايهدرزو وانس واقف ايشوفله بغل
حمادي لاحظ هل الشي
حمادي وقف: تمام انا نستاذن عندي شغل توا انرد عليكم وقت تاني
ايهاب: تمام مانعطلك خود راحتك
حمادي شبح انس: انس ترا لحضه نبيك
انس مشا امعا وقفو في نهاية المامر
انس: نعم
حمادي: عارفك رافع حقد وغل عليا بسبب الي صار
انس: اكويس مادمك عارف
حمادي: ماتبي تعرف شنو السبب
انس: غير توا مش فاضيلك مش ناسيك احسابك امعايا احني عطيناك اختي عشان اتحافظ عليها نحسابوك ولد ناس بس طلعت حقير
حمادي :ماحبيتها منك بكل يا انس
انس عصب: شنو تبي ناخد بالحضان وانت ز استغفرالله
حمادي: انا حنقولك كل شي صار وانت احكم بعدها
انس: شن بتقول يعني واضح يا محمد مافيها تبرير
حمادي: خلينا ننزلو تحت نحكو براحه احسن
انس هز راسه ونزل امعا كان قلبه محروق علي اخته وحاس بيها
انس: ها احكي
حمادي: نحكي لكن ما اتقطاعني لين انكمل
انس: رخص هيا نسمع فيك
حمادي: بدا يحكيله علي الزرده واتصال هشام الي اصر عليه ايروح ويبيه علي موضوع خلاص روحت بسرعه وتلاقيت انا وياه في القهوه الي اقريبه من شقتي بعدها طلعت انا وياه لشقتي بما انها فاضيه وقعدنا نحكو علي البضاعه مشتركين فيها لانه من زمان نتعاملو انا وياه قالي عطشان كنك ماضيفتني انا اعتذرت منه وطلعت للمطبخ وصبيت كاستين عصير واميه وحطيت امعاهن شكلاطه وبسكويت الي حصلته ????المهم ندكر جاني اتصال من عهود طلعت كلمتها وخليته ابروحه وبعدها رجعت القيته يبتسم ابروحه ماعدلت عليه طلع الكلب حاطلي الحبوب في العصير امتاعي المهم حسيت راسي اشوي اشوي بدا يتقل انهدرز امعاه ونضحك
بعدها معاش مدكر شي لين الصبح بعد نضت القيت جنبي بنت
انصدمت قلتها من انتي وشن جابك عصبت وبديت انسب ونلعن بعد شفتها هي ماحكت شي بعد هددتها قتلي هشام جابني هنا وانت امبارح رقدت امعايا ???? عصبت ولزيتها وخشيت في عقل مش عقلي مش مدكر شي من بعد مكالمتي لعهود لين بعد شربت العصير من بعدها معاش ندكر وصلتي رساله من هشام “”شن رايك في المفاجاء الحلوه “” عرفته هوا وراها الكلب عرفت عاطيني حاجه عشان كنت فاقد مش مدكر شي دورت عليه واجد مالقيته بنفهم ليش دار هكي ولا فوقها طلع امصورني وقصدا خلا الممري في الدار عشان اتشوفها عهود
انس يسمع فيه مصدوم لانه كان عارف حمادي ما ايدير هكي
حمادي: وهدا الي صار كله وربي قتلك بالحرف لو مش امصدق هدي ترجعلك بس انا ماعندي عليش نكدب لو فعلا نبي الجو هدا ره ماكثر ربي غير الحرام نقدر انديره في اي مكان لكن انخششه لي بيتي مستحيل هدي
انس: امصدقك يامحمد حتي انا انصدمت بعد عرفت بالقصه وعهود بعد جتنا تبكي وحالتها حاله بعد شفنا الصور حتي نحنا صدقتنا زيها ما توقعنها منك شخص المحترم يطلع منه هكي فوقها في بيته لكن توا بعد حكيتلي وضحتلي كل شي
واضح في ملعوب في القصه واصلا حتي الصور وقصتهن مقصوده واضح في موصوع كبير بينك وبين هشام ليش دار هكي وشن قصدا بالحركه الحقيره هذي وليش يبي ايخرب حياتك
حمادي: وهذ الي نبي نعرفه ربي بننجن من جيهه عهود الي مانبيش تفهمني ولا عطتني فرصه انوضحلها وتبي تطلق و من جيهه هشام ليش دار هكي وشن مصلحته من الي داره المشكله مافي مشاكل بينا
انس: قصة عهود خليها توا علي راحتها لين تهدا بعدها تحكيلها كل شي
حمادي تنهد بحزن: عارفها مابتسمعني ولا بتصدقني هي مصره ع الطلاق
انس خبط عل كتفه: مزال قدامك فرصه انت دور الولد حاول تعرف كل شي وجيب دليل عشان عهود اتصدقك انه كانو قاصدين ايخربو حياتكم بعدها
حمادي: المشكله مافيش ولا دليل يا انس الولد مختفي
انس: مش مشكله خليه كل شي علي ربي توا ايحلها امع الوقت
حمادي: كيف حالها ????
انس: مانكدبش عليك حابسه روحها في الدار ماتطلعش امكملتها كله بكي
حمادي تنهد بوجع: لو نحساب بيصير هكي فتت ام الزرده ولا مشيت هي من البدايه قالت مش متريحه لمشيتي وانا ما اسمعتها مشيت اهي طاحت علي راسي واخسرتها ????
انس: ربك كريم يامحمد سيورها تفرج
حمادي: ونعم بالله
هدرزو اشويا ومشا حمادي وانس هش المستشفى
.
.
.
.
.
.
.
.
عند ايهاب بعد طلعو انس وحمادي قعد يشرب في قهوته وسرحان وتعبان لانه مش راقد
طلع الدكتور من عند مصطفى
الدكتور: صباح الخير
ايهاب: صباح النور شنو يا دكتور طمني تحسن خوي
الدكتور: الحمدلله تحسن وضعه طبيعي بس مزلنا حطينا في الملاحظه لانه جسمه مزال ضعيف
ايهاب افرح: باهي امتى اينوض نقدر انشوفه
الدكتور: هو واخد نسبه كبيره من المخدر ومنوم مستحيل اينوض اليوم الا بكرا تقدرو بكرا اتشوفوه اليوم ممنوع
ايهاب: مافيهاش كيف نبي نطمن عليه انشوفه حتي من بعيد
الدكتور: والله سامحني ممنوع اندخلك للعنايه
ايهاب: لا عادي
الدكتور: والله لو في يدي عادي انخدلك بس هدي قوانين المستشفى
ايهاب: لالا فاهمك
حكي ايهاب اشويا امع الدكتور علي حاله ايهاب وبعدها مشاء علي جيت انس
انس: كنه الدكتور شن قالك
ايهاب قعد يحكيله كل شي
جو الشباب كسدو امعاهم
ايهاب طلع وقالهم بنروح نرقدلي ساعتين ولاثلاثه عشان يتريح وحتي انس قالهم بنروح نرقد
ايهاب وانس روحو امع بعضهم
انس: هيا تصبح ع خير في القايله ???????? انحق فيها الدنيا كلهم نووم
ايهاب ضحك: عدي ارقد انا بنخش انسلم عليهم ونمشي نرقد في بيتي
انس: تمام نتلاقو اليل في المستشفى
ايهاب: تمام
فات ايهاب لبيت جده لانه عارف الكل غادي اما انس مشا لبيتهم طول رقد
ايهاب خش من باب الخلفي للمطبخ عشان كان بيخش داخل سمع صوت صبايا عرف في حد غريب
كنت انا وريهام و نمارق في المطبخ
ايهاب: السلام عليكم
انا عرفته من صوته التفت
انا والبنات: وعليكم السلام
ريهام: شنجو ايهاب
ايهاب: تمام شن اخبارك انتي وين هيثم
ريهام: الحمدلله هيثم قاعد امع جدي في المربوعه
ايهاب :اها
انا ساكته انشوفله مره مره يرفع في اعيونه فيا
نمارق: ايهاب شن قالولكم علي مصطفى
ايهاب: صحة اكويسه طمنا عليه الدكتور غير مزال تحت الملاحظه
نمارق :الحمدلله والله قريب متنا عليه عاد قعدولي راس اوخين ماعندي غيرهم ???? وراسكم معاش اتقطعولنا اقلوبنا عليكم ساد الي عشنا ????
ايهاب ضحك وضربها علي راسها: قاعدين علي قلبك ما عندك وين تهربي منا ????
نمارق حضناته وتبكي: ربي ما يحرمني منكم ????
ايهاب بعدها عنه:خلاص يا بكايا امشي ناديلي امي
نمارق تمسح في دموعها: به عادي اتشيلنا بعدين لمصطفى
ايهاب: اليوم مافيش ازياره حتي انا مادخلوني بكرا نرفعك
نمارق:وعد
ايهاب: اييي علينا بري نادي امي مستعجل بنمشي
نمارق طلعت اتكلم اعميمه وريهام كملت السفره الضيافه الي في يدها وطلعت
انا: ايهاب لوين ماشي
ايهاب:امروح لي البيت بنرقد تعبان
انا: ليش ماتقعد هنا
ايهاب:لالا هنا دوشه نمشي لي البيت اريح
انا: باهي اقعد تغذاء وامشي
ايهاب: انتي تبي تقعدي ولا اتروحي امعايا
انا: قاعده انساعد في البنات وعميمه
ايهاب مش عارف ليش نبيها اتروح امعايا: قاعدات البنت ايساعدوهن روحي بعدين انجيبك
خشت عميمه ونمارق ماقدرت انتكلم
ايهاب هدرز علي امه اشويا
ايهاب: غرام هيا كان بتروحي
عميمه:ليش العفو يا اوليدي اتعب روحك اهوني بيتنا فاضي امشي ارقد غادي
ايهاب:لالا يا امي نبي انروح بعدين دبشي كله غادي
عميمه: تمام لكن غرام خليها تقعد
ايهاب طول شبحلي بنضره مش مفهومه
انا: توا انجي بعدين عميمه ايهاب يبي غذاء وانا اصلا مش جايبه امعايا اغيار
عميمه مش عاجبها
انا طلعت لبست عباتي رجعت لمطبخ مالقيت حد طلعت من الباب الخلفي القيت ايهاب واقف وانزل راسه
انا: شكلها عميمه زعلت
ايهاب رفع راسه طول ابتسم: لالا
انا : لو قعدت مش احسن توا تزعل مني
ايهاب ضحك: علي اساس مش تبي اتروحي انتي
انا: والله لو عليا انا عادي بس انت قتلي روحي
ايهاب ابتسم وهز راسه: هيا قدامي والله تالف بنطيح ع وجهي
انا: اها واضح عليك التعب بكل
ايهاب: بكل
طلعت انا ويا وركبنا السياره مره مره ايهدرز ويسكت لين وصلنا خدا غذاء جاهز ???????????? مافهمت علاش قالي روحي امعايا
خش ايهاب ايدوش انا وتيت الغذاء طلع ايهاب تغدينا امع بعض كان يحكيلي ع المستشفى بعدها ناض ايهاب ضميت السفره وغسلتها وخشيت الدار طلعت استريش اسود وفنيليه صوف خشيت الحمام ” حشاكم” دوشت
درت كريم ترطيب ولبست لفيت المنشف علي شعري وطلعت
وقفت علي المرايا انجفف في شعري خش ايهاب ماسك راسه
ايهاب واقف ايشوفلي : انحصل عندك بندول
انا: اي عندي دقيقه
فتحت الدرج اندور فيه
ايهاب قعمز علي السرير وماسك راسه يوجع فيه
اانا القيته وعطيته ليا
ايهاب طلع حبتين خداهم
انا: لا ماتخدهم هكي استنا انجيبلك اميه
ايهاب هز راسه
انا طلعت بسرعه وجبتله اميه خداها
انا: شكله راسك بكل
ايهاب: اي من الصبح هكي
انا بتردد: عادي انديرلك مساج توا ايخليك
ايهاب: تعرفي اديريه
انا :اي ديما اندير فيه لبابا
ايهاب ابتسم وطلع تليفونه وحط علي جنب ورقد علي السرير: توا انشوفو تعرفي ولا كلام بس
انا: هههه يعني شاك في قدراتي
ايهاب: والله مزلت ما جربت بعد انجرب انقولك
انا قعمزت علي السرير بس حتي رقدتك غلط اصبر
قعمزت في نص السرير
ايهاب: باهي كيف نرقد
انا: ارقد علي رجليا
ايهاب ابتسم وميل راسه وحطه علي رجليا وايشوفلي
ايهاب ????: امرك شن تاني
انا مديت ادي وغمضت اعيونه: غمض اعيونك ماتشوفلي
ايهاب ضحك: باهي نبي انشوفك كيف بديرلي
انا ????: لو فتحتهم مش دايرتلك مساج اقعد
ايهاب ابتسم: خلاص
انا: تسكت ما اتكلم
ايهاب: ???????????? باهي
انا: باهي توا خود نفس وتنفس براحه
ايهاب دار الي قتله عليه
انا بديت انديرله في مساج وايهاب مسترخي ومبتسم
حسيت بيه ارتخا القيته رقد ابتسمت انشوفله كيف راقد اكان ايجنن ❤️ ونحيت راسه بالشويا وحطيته ع المخده وجيت بنمشي ايهاب مسك ايدي وردها علي راسه انا انصدمت في حركته
ايهاب بصوت ناعس: خليك غرام
انا اجمدت ف مكاني وحسيت بي ايدي تخدرت
ايهاب: غرام
انا: نعم
ايهاب مارد
انا ابتسمت انشوف في ملامحه وجه وانتامل فيه وانمشي في ايدي علي شعره وانفكر فيه ليش بديت انحب نتقرب منه ليش نفرح بعد نقعد امعا حسيت روحي نعست لين رقدت جنبه
ايهاب بعد ما تغديت خشيت علي اساس بنرقد قعد راسي يوجع في قعدت انتقلب ماباش يمشي كل اشويا ايزيد طلعت لغرام ناخد منها بنادول اول ماخشيت شفتها ما قدرت انزل عيني منها شكلها ملفت ???? طلبت منها بنادول قالت عندي قعمزت السرير لانه الالم كلما ايزيد عطتني الشريط خديت حبتين قتلي انجيبلك اميه هزيت راسي وجابلتي اميه خديتها اشويا قتلي انديرلك مساج ضحكت عليها قتلها تعرفي اديريه وقلتي اي مش عارف ليش افرحت ولا لانه محتاج هل المساج يمكن ايخفف الالم قتلي ارقد علي رجليا مش عارف ليش ابتسمت ورقدت علي رجليها وقعد انشوفلها بعدها طلبت مني انسكر اعيوني ماكنت نبي انسكر اعيوني كان خاطري انشوفها اول ما حطت ايديها وسكرتلي اعيوني حسيت كانه كهرباء ضرب جسمي كان مسلمس ايديه ناعم وايديها باردات بعدها طلبت مني نسكت مانتكلم سكتت بديت انفذ في التقولي فيه مجرد ما بدت اديرلي مساج حسيت براحه وجسمي ارتخا ومشاء الوجع والالم مجرد ما حطت يدها ابتسمت مسترخي وتمنيت انه ماترفعش ايديها بكل حسيت النوم تسلل في اعيوني حسيت بيها بعد رفعت راسي وحطاته ع المخده حسيتها بتمشي واتخليني مسك ايديها وحطيتها علي اشعري نبيها اتكمل كنت نعسان في اعيوني النوم مش قادر نتكلم قلتها خليك قعدت تلعبلي في اشعري لين رقد ممكن اول مره في حياتي نرقد مرتاح هكي
❤️
.
.
.
.
.
.
حسيت بهز حاجه ع السرير رفعت راسي القيت هاتف ايهاب يضوي وايهز مديت يدي التانيه ورفعته القيت دنيتي تتصل بيك مش عارفه ليش اضايقت ???? حطيت التليفون صامت و رديته في مكانه انفكر يعني هدي البنت الي يبيها مستعد ايطلقني عشانها هدي البنت الي ايحبها ويبيها باهي انا شن موقعي في حياته ???? ليش بديت نتعلق فيه
سحبت روحي بشويا طلعت وسكرت الباب
نزلو دموعي وصورة ايهاب هو راقد بين اعيوني مش عارفه ليش قلبي وجعني واضايقت بعد شبحت الاتصال ادكرت امس كيف حضتنه اول ما خش ❤️و ضحكه وهدرزته امعايا بعدها ادكرت كلامه امس هو رهف بعد قالها لين ايجي العرس
توا كيف ركزت في الكلمه ???? انهرت نبكي يعني امحدد حتي عرسه يعني كلها ايام وايقولي يا غرام انتي طالق وينتهي كل ???????? ليش مانبي ينتهي ليش بس ???????? ليش بس انا حظي هكي
سمعت صوت الباب انفتح مسحت دموعي ع السريع بخوف
ايهاب ايحك في اعيونه قعمز جنبي
انا نزلت وجهي مانبي ايشوفني نبكي
ايهاب: حسيت بحركتك نضت ان شاء الله ما ازعجتك في النومه سامحيني
انا بصوت هافت: لالا عادي
ايهاب حس نبرة صوتي في شي : شكرا علي المساج والله اول مره نرقد متريح هك شكلي ديما بنجيك اديريه ليا ❤️
انا ???? : ولو درت واجبي بس ادلل عادي ????
ايهاب مد يده ولف وجهي انصدم فيا كانو اعيون وانفي واخدودي حمر من البكي ايهاب انخلع
ايهاب: كنك تبكي
انا نزلت يده: شي
ايهاب: غرام شن في كنك تبكي
انا خنقتني العبره حتي انا مش عارفه روحي ليش نبكي كيف انجاوبك ????: مافيش شي مهم
ايهاب : باهي شن تفسير ابكاك هدا
انا نزلو دموعي خط: مضايقه بس
ايهاب : من شنو
انا: قتلك مافيش شي مهم والله مش عارفه روحي ليش نبكي حسيت روحي خاطري نبكي بس والله
ايهاب: هدا بس
انا مسحت دموعي: وراسك
ايهاب قرصلي خشمي: مطرشقه في حد يبكي بلا سبب
انا ضحكت: اي ????
ايهاب سرح في ضحكتي الي كانت ممزوجه بي ابكا كيف انفي واخدودي ورديات و اعيوني الي امعبات ادموع
انا سكتت بعد القيته ايشوفلي
انا توترت من شبحاته نزلت راسي متحشمه من نضراته
ايهاب ابتسم مسك ايدي وباسها ❤️
انا انصدمت رفعت اعيوني فيه طول تلاقو اعيونا في بعض
ايهاب بصوت هادي: حبيت نشكر الايدين السماح الي تعبو عشاني امبدري
انا قلبي يرجف وتوترت : اها لا تعبك راحه
ايهاب قعد امركز في اعيوني حس بيا متوتره قرب مني
انا اشويا واغمى عليا ????
ايهاب مسك وجهي بيدا ومرر صبعه علي خدي نزل بصبعه علي شفايفي ايمرر في صبعه ببطء بلع ريقه ايشوفلي برغبه
انا غمضت اعيوني مستسلمه ❤️ ايهاب نزل اعيونه علي شفايفي طبع بوسه طويله علي شفايفي ???????? اختلطو انفسنا امع بعض ماكانت تفصل بينا شعره
انا مجرد ما ادكرت عرسه بعدت بسرعه وقفت نجري لدار
ايهاب انفجع من حركتي كانه صحاته من الي ايدير فيه
غمض اعيونه ورجع فتحهم ايحاول يستوعب الي صار
كيف مش قادر ايسيطر علي روحه قدامها ابتسم ونزل راسه يدكر كيف كان شكلها مغري برغم كانت تبكي لكن ايهاب ضعف قدام اعيونها الي ركز فيهم وضاع فيه من غير لا ايفكر قرب منها وكانت انوثتها طاغيه عشان ايهاب يضعف قدامها
لكن بسرعه ما اختفت ابتسامته بعد ادكر رهف وانه خاطبها وحتي امحدد العرس ????
تنهد بضيق وخش لداره
انا قعمزت علي السرير ونتنفس بالقوه ونبكي ودموعي خط واحد بوسة ايهاب قلبت حاجات واجد فيا ???? طحت علي السرير نبكي ????????????
كان ايهاب ناسي تليفونه قاعد في مكانه رفعته كانت رهف مزال تتصل قلبت التليفون نبكي ????????????
سمعت دقات ع الباب مارديت ايهاب خش
ايهاب بعد سمعني نبكي زاد اضايق قدم رفع تليفونه الي كان قدام وجهي
انا قعمزت نمسح في دموعي
ايهاب ????: ليش تبكي لاني قربت منك وبستك بس
انا سكتت ????????
ايهاب: اسف ان شاءالله معاش اتكرر تاني
انا: ايهاب اتحبها صح
ايهاب: من ؟
انا بحزن ????: دنيتي هي صح البنت الي تبيها
ايهاب نزل راسه ولع تليفونه من جنب وشاف المكالمات ع الشاشه من رهف عرفني شفت المكالمات
انا : امتى عرسكم ????????
ايهاب رفع راسه بصدمه: شنو
انا نتكلم دموعي ينزلو ???? : اسمعتك مره تحكي معاها ع العرس حددتوه صح
ايهاب حس بشعور مش حلو انه هوا سبب دموع غرام وعارف روحه جرحها ????????
انا: ماتبيش اتقول
ايهاب تنهد بقلة حيله: بعد شهرين ونص
انا حسيت كانه سكاكين انغرسو في قلبي مش عارفه احساسي وشعوري وقتها مش فاهمه روحي انحبه ولا مانحباش
انا مسحت دمعتي الي نزلت: الف مبروك بس خلينا علي اتفاقنا اطلقني قبل ما تتزوجو
ايهاب مش عارف كني بعد سمعت كلمة طلقني مزقت قلبي ????
ايهاب: غرام الموضوع هدا نتفاهمو فيه مره تانيه بس طلاق مانقدر انطلقك تمام توا وتي روحك بنمشي لمصطفى تاخرت عليه ماطوليش عشان انحطك ونمشي لمستشفى وطلع قلبه موجوع عليا ????????
.
.
.
.
.
.
رهف: مايرد يا ريان من امبكري ننتصل
ريان: انتي خليك اترني لين ايرد عليك اكيد مزال حامق منك من امس انتي عارفتيه عصبي واجد
رهف: اوووف والله خايفه ايديرها معاش ايكلمني
ريان: ايهاب مايقدرش بلاك توا يومين ويتصل ابروحه
رهف ????: بس ايهاب الي قبل غير عن ايهاب توا تغير قبل مايرضا ليله ايخليني زعلانه منه توا من ازوج معاش دورني نزعل ولا نطربق ايعصب ايسكر عليا نتصل قريب الف مره ما ايرد
ريان: انا قتلك مشيه بطريقتك بس انتي غبيه اتخليني نطلع و اديري كارثه هكي كبرها
رهف: كلكم ماتفهمو فيا و ربي محروقه فكرة انه قاعد امع بنت غيري تقتل فيا مفروض انا جنبه توا كله من الشيباني النحس جده عطيه موت ان شاءالله كان هدا ره هي ازوجت الي جي خطبها و انا خديت ايهاب
ريان ضحكت: ????????????عنجد تدعي علي جده
رهف: تي هوا اساس المشكله
ريان رجعت تتصل بي مصطفى اتحصل فيه مقفل: ماتقولي هدا ليش فاقل تليفونه
رهف:من
ريان: مصطفي الي حكيتلك عليه من امس نتصل بيه مقفل
رهف: علي اساس بنحفظه انتي كل اشويا اتكلمي واحد
ريان ضحكت: هههههههه لكن تعرفي هدا طرف بكل ايهبل شخصيته حلوه وحي حي لو تسمعي كلامه ادوبي ???????????????? بجديات الفرخ طرف من لاخير كبدت عليه نبي انجيبه انجيبه
رهف ضحكت علي اختها:هههههه انتي اتكبدي من الشكل طول
ريان:اي
قعدو ايهدرزو
.
.
.
.
.
.
انا غمضت اعيوني انحاول نمسك دموعي خديت نفس: ليش نبكي انا ماهو من الاول كنت عارفه بياخدها ليش نبكي وانا عارفه من البدايه هوا مش ليا انا متاكده انه ما انحبه بس شن سبب دموعي وليش مش متقبله بنت تانيه في حياته ???? خلاص كلها شهرين ونص يتزوج و وانا نطلع من حياته ولا كانه كنت موجوده هو اكيد بيكون فرحان ???????? اوووف
نضت نمسح في ادموعي طلت لبسه لبستها شبحت وجهي في المرايا كيف منتفخ درت ميك اب خفيف عشان نخفي اثار البكي لبست وشاحي وطلعت القيته ايراجي فيا نطلع
ركبنا في السياره وكان الصمت سيد الموقف مافي حد فينا تكلم ايهاب كان امركز في الطريق وساكت وانا كنت مره مره انشوفله بسرقه وصلنا نزلت طول
ايهاب تنهد ايشوفلي لين خشيت حط راسه ع الستيرسو وتنهد بتعب معاس عارف شن يبي بي قلبه مضايق وحاير في تصرفاته الي بدو يتغيرو
وقطع تفكيره رنة تليفونه كانت رهف تنهد بحيره وحدف التليفون علي جنب ولع السياره وطلع شور المستشفى
.
.
.
.
.
.
.
انا اول ماخشيت لحظت عميمه مش علي بعضها اتكشخ مره مره ماعدلت عليها
قعدت امع البنات وانا عقلي مش امعايا بكل
ريهام: إيلاف بري جيبلي اغيار لي هيثم وسخ دبشه
إيلاف: اووووف إيلاف امشي إيلاف تعالي إيلاف ديري إيلاف جيبي تي اتعبت كنكم قالولكم عشان اصغر وحده انزلو عليا ????????
نمارق ضحكت:صغير القوم خادمكم ???????????? امشي الله غالب عليك
ريهام ????????: عليك نور اهي جبتيها
إيلاف: وانتي الي اتفلفسي راك اكبر مني بي 40 يوم نوضي انتي حتي هيثم ولد خوك انتي مش ولد اختي ابروحها نوضي حركيلي روحك
نمارق: والله مش متحركه باهي
ريهام: إيلاف نوضي بلا سهوكه
إيلاف: وكنك ماتنوضلي ابروحك ???????? انا مش طالعه برا صقع
ريهام: ما اتخليني انقول لي امي علي الزه الابله انك محرومه من الحصص اسبوع
إيلاف وقفت: خزي حقيره وربي معاش قايتلك حاجه باهي
وطلعت
ريهام والبنات يضحكو عليها انا ماكنت امركزه امعاهن
.
.
.
.
.
.
.
إيلاف طلعت تضحك علي تهديد ريهام تلاقت هي وأنس
إيلاف: لا اليوم احمار من بيموت
أنس ضحك: كنك
إيلاف:ما خبطت فيا ????????????
أنس ضحك: لو تبي عادي توا نخبط فيك ????????
إيلاف: زاهيتلك ماشاءالله ????????
أنس: كنها ما تزهالي ابنادم اينوض علي مكالمه امسقمه
إيلاف برفعت حاجب: دوم زهيتلك ان شاء الله
انس ضحك: ان شاءالله وين ماشيه انتي
إيلاف: ماتشوفش فيا ماشيه لبيتنا
انس: اها
إيلاف ساكته تمشي وجنبها أنس
أنس: هييي انت
إيلاف:ها
انس: عصا تبطحك قولي نعم
إيلاف: شنو
أنس ضحك: استغفر الله عليك بنت امطرشقه ماتفهمش ????????????????
إيلاف: زيد استغفر بلكي ربي يمسح ذنوبك
أنس ضحكت : من قالك عندي ذنوب
إيلاف: بلكي يمسح ذنوب المكالمه الي خلاتك رايق هكي ????????
أنس ضحك: ???????????? تفهمي علي الطاير انتي
إيلاف وقفت قدام بيتهم: رخص شن تبي
أنس يضحك: استني دقيقه بس ومشا لسيارته فتحتها وطلع كيس منها ورجع
إيلاف اتشوف فيه من بعيد
أنس وصل فيها : طولت عليك
إيلاف: اي ????????
أنس مدلها الكيس
إيلاف: شن فيه
أنس ابتسم : افتحيه
إيلاف فتحاته وكان امعبي شكلاطه و زوز فازوات نوتيلا اعيونها تحولو اقلوب اقلوب ???????????????? حي هدا ليا انا
أنس: اي ليك بس رد بالك تسمني ????????????
إيلاف بعفويه: لالا ماتخافش ناكلك حتي انت مانسمن ????????
أنس ضحك: اسملا عليا ????????
إيلاف ضحكت: شكرا انوسه البخيل قصدي الحلو ????????
انس ضحك: جيبيه جيبيه اخساره فيك
إيلاف لفت الكيس وراها تضحك: وربي انبصر احلا انس في الدنيا ههههه قتلك في حمار حد بيموت انا
انس: عشان اول مره ما انتعاركو
إيلاف: اي ???????? ولا فوقها جايبلي شكلايط رسمي
أنس: والله من يوما جبتهم ليك بعد قلتي تبي بس انتي السانك متبري منك مكرت فيك ماعطيتهم ليك
إيلاف: تافه وربي ???????????? يما من الخبث ????????
أنس ????????: مش اخبث منك
إيلاف: كنك شن ريت مني
أنس ????: لالا ماريت منك شي وان شاءالله مانشوف ????????
هيا ماتبي شي انا طالع
إيلاف: لالا من بعد الكيس هدا انتحشم نفتح فمي ????????
أنس ضحك: ماتحشمي قولي
إيلاف: انبصر والله شكرا انس ربي ايخليك ليا ❤️
أنس اكتفاء بي ابتسامه
إيلاف خشت لبيتهم وانس طلع يتبسم ويضحك زي المجنون ركب في سيارته ومشاء لمستشفى
ايلاف دست الشكلاطه ورفعت دبش هيثم وطلعت لبيت جدها
خشت ع البنات
ريهام: وينك طولتي هدا كله ماشيه غصبن عنك
إيلاف: ماهو تبي دبش ولدك جبتيه ليك
ريهام: وساعه بيش اتجيبه
إيلاف: زمري هي كيف تفهم هدي خشيت لحمام تبي انقولك شن درت
ريهام: كم مره قتلك الفاظ هذي ماتقوليها
انا: خلاص انتي وياها
إيلاف: ما قلت شي انا ابروحها
انا: فوتيها خلاص
ريهام: وانتي التانيه كبري براسها
إيلاف: اسمعي توا
انا غمزت لي إيلاف تسكت واتفوتها
إيلاف خشت لمطبخ انا لحقتها خليت البنات البنات كل وحده لاهيه
انا: ماتعدليش إيفا غير طايرتلها اشويا
إيلاف: كنها
انا: بعد طلعتي عميمه جت هزبتها علي خاطر هيثم
إيلاف: ليش
انا: هيثم املبز دبشه ومتبهدل نزلت فيها اتهزب
إيلاف: استغفرالله ليش اتهزب هي عارفته ولد شيطان
انا:هدا هو
إيلاف: وانتي كنك من جيتي مش عاجبتني وجهك دابل
انا: لالا عادي مافي شي
إيلاف: واللهي في كنك شن صاير امعاك انتي وايهاب من تزوجتي تغيرتي عليا معاش بديتي تحكيلي زي قبل
انا ضحكت بوجع: شن تبيني نحكيلك مافيش شي مهم
إيلاف شبحتلي بشك: في واجد بتحكيلي عليه
انا: هههههه ما اتشوفيلي هكي مافي شي نحكيه
إيلاف: بايته صح
انا: مش عارفه لكن اكيد ايهاب بايت في المستشفى
إيلاف: معناها اليوم تحكيلي كل شي
انا: قتلك مافي ش نحكيه كنك انتي
إيلاف: وراك وراك لين تحكي تحسابني ما نفهم فيك
انا ابتسمت بمجامله ماكنت نبي نحكيلها الي صاير امعايا ???? وخاصة ايهاب نبه عليا مانحكي لحد من العيله
حطو البنات العشاء ليهم ولي الرجاله بعد العشاء قسمو اروحهن مجموعه ع المطبخ مجموعه ع البيت كملنا خدمه
كسدنا انهدرزو
.
.
.
.
.
.
.
.
ايهاب كان ايهدرز هو الشباب تحت لانه ممنوع تجمعات قدام العنايه ???????????? لزوهم برا اشويا وجاهم انس هدرزو
اشويا روحو الشباب قعدو ايهاب وانس
انس التفت علي ايهاب: قعدت انا وياك زي امس
ايهاب ماكان امركز امعا ايدخن
انس خبطه علي كتفه: اووووي نحكي امعاك انا
ايهاب انتبه: كنك
أنس: كمل وين اوصلت رايفتلها وشن تاني
ايهاب: شن اتخرف انت
انس ضحك: ماهو توا قتلي رايفتلها ونبي نمشيلها
ايهاب رفع حاجه: مش وقت ابصارتك عارف ماقلت شي
انس: ههههه به في شنو سارح
ايهاب: ماشورك
انس: تافه اقعد فيها انا راقي فوق
ايهاب: ان شاء الله ايلزوك باهي
أنس: تي انا انس من يقدر ايلزني
ايهاب وقف ماعدل عليه: انا بنقعد في سيارتي اشويا وانخش
انس: تمام انا خاش بنطمن عليه بنقد داخل اعظامي تلجو من هل السميطري ????????
ايهاب مشا وخلا يتكلم ابروحه
انس: رسمي فيه شي هدا
وخش
ايهاب ركب في سيارته وسند راسه ونزل كرسي السياره هو مهموم ايفكر وعقله املخبط
.
.
.
.
.
.
روحت انا والبنات عشان الكل رقد
طبعا كلهم في اليل كل واحد ايروح يرقد في بيته
خليت ريهام اترقد في ولدها وخشيت لي داري انا وإيلاف قبل الي توا قعدت دار إيلاف ابروحها
القيت إيلاف راقده رقدت علي سريري انبحت لسقف وانفكر في حياتي اسمعت صوت رساله علي تليفوني
فتحتها كانت من ايهاب
((……………….)
.
.
.
.
.
.
.
الحاج خليفه: ……………….
ايهاب:……………
يتبع ..
لقراءة الفصل الثامن : اضغط هنا
لقراءة باقي فصول الرواية : اضغط هنا
نرشح لك أيضاً رواية عائلات راقية بفسادها للكاتبة أروى طاهر المسلاتي
