رواية هو مين دا الفصل الرابع والعشرون 24 بقلم أسماء الطبلاوي

رواية هو مين دا الجزء الرابع والعشرون

رواية هو مين دا البارت الرابع والعشرون

رواية هو مين دا الحلقة الرابعة والعشرون

(عدى يومين على كل اللي حصل مع نسمه في المستشفى ورجعت بيتها بعد ما خفت ووقفت على رجليها من تاني والكل كان منتظر منها تفسير عن خطوبتها المفاجاه دي لكن هي كانت في دنيا تانيه خالص بسبب زعلها مع راكان لحد ما طلعت لها ام فاروق خبطت عليها وفتحت لها الباب ودخلت.
ام فاروق: ايه يا نسمه لسه مش عاوزه تنزلي تفتحي دكانك كده كتير يا بنتي قعدتك في الشقه لوحدك طالت وانا قلقانه عليك.
نسمه: ما تخافيش عليا يا خالتي انا كويسه قوي معلش ازمه وتعدي
ام فاروق: الازمه دي باين عليها مطوله وانا مش عاوزاكي تبقي قاعده لوحدك طيب خليني اطلع اقعد معاكي الفتره دي لحد ما يجيلك نفس انك تنزلي.
نسمه: معلش يا خالتي انا عاوزه ابقى لوحدي.
ام فاروق: طيب مش هتحكيلي ايه موضوع خطيبك ده.
نسمه: خطيب ايه يا خالتي ده الامير راكان اللي حكيتلك عنه بس هو عمل التمثيليه دي يعني علشان يدبسني قدامكم.
ام فاروق:ههههه طيب ما انا عارفه يا بت هو انا عبيطه اصلا من ساعه ما فاروق جه حكالي اللي حصل وهما بيحاولوا يخرجوكي من المكان اللي سمير خطفك فيه وانا عارفه ان اللي اخدك واختفى ده يبقى هو الامير ده بس انتى مالك مش مبسوطه يعني وانتى بتتكلمي عنه زي الاول.
نسمه: علشان مقهوره منه يا خالتي وده اللي انا قلتهوله ومش عاوزه اسامحه.
ام فاروق: يا لهوي انتى بتهزري يا بنتي كل واحد بعذره هتوقفي الدنيا وتوقفي حياتك علشان اتاخر عنك شويه.
نسمه: هو لما جه المستشفى قالي انه كان متاخر كل ده علشان بيرتب كل حاجه تحت لانه قرر انه يفضل معايا على طول هنا.
ام فاروق: ايه ده من نفسه كده من غير ما تكلميه طيب والله كويس يعني خايف عليك اهو وعاوز مصلحتك انتى بقى عامله كل الهليله دي ليه.
نسمه: علشان انا تعبت يا خالتي انا عاوزه حد يبقى في حياتي ما يمشيش حد وقت ما احتاجله الاقيه واقف جنبي مش عاوزه احس ان ضهري عريان ومكشوف للهواء وكل من هب ودب يقطع فيا شويه عاوزه امان يا خالتي عارفه يعني ايه امان.
ام فاروق: عارفه يا اختي هو في واحده في الدنيا ما هيش عاوزه امان اساليني انا.
نسمه: علشان كده يا خالتي انا مش هسامحه.
ام فاروق: والنبي الكلام ده كله من ورا قلبك يوم والثاني وهتنسي كل الكلام ده.
نسمه: ما اظنش يا خالتي خصوصا اني قلتله الكلام ده.
ام فاروق: طيب شويه وتقولي خالتي قالت المهم احنا رايحين انا وفاروق دلوقتي عند المعلم شعبان علشان نطلب ايد ناديه بنته ما تيجي معانا.
نسمه: ما شاء الله هى ناديه رجعت وكمان هتتجوز فاروق ما قلتليش يعني.
ام فاروق: ما انتى كنتى تعبانه واحنا لسه قاعدين مع بعض اهو ها هتيجي معايا ولا لا.
نسمه: معلش يا خالتي خلينا على راحتي ان شاء الله في الفرح هبقى موجوده اكيد.
ام فاروق: زي ما تحبي يا بنتي ربنا يروق بالك.
( قامت ام فاروق ونزلت وسابت نسمه قاعده لوحدها زعلانه فطلعت تليفونها ورنت على هيام وردت.
نسمه: الو ازيك يا هيام اخص عليكى يعني من يوم ما جيتيلي المستشفى مره واحده ما تجيليش ثاني ولا اشوفك.
هيام: حقك عليا يا حبيبتي ما تزعليش والله ملبوخه في تحضيرات الفرح وبعدين اصلا انا كده كده كنت هكلمك علشان عاوزاكي فى حاجه مهمه.
نسمه: ما تتكلميش في حاجه انا هقوم البس وجايالك اقعد معاكي شويه ولو محتاجه حاجه اعملها معاكي ولما اجيلك ابقي احكيلي.
هيام: والله فكره حلوه خلاص انا مستنياك.
(قامت نسمه لبست وخرجت وراحت لهيام و تحت الارض عند الملك شهبير كان لسه متحفظ على سمير في مكان فوق الارض ومعين عليه حراس جداد ومستني عوده الاميره راكان علشان يقول هيعمل فيه ايه.
شهبير: قولي يا وزير الانسي اللي احنا ماسكينه متاكد ان الحرس اللي حواليه كويسين لو هرب الامير راكان هيزعل جدا وهيغضب على الكل.
( ازاد ما تقلقش عظمتك الحراس اللي واقفين حوالين الانسي من اقوى الحراس عندنا يعني عمره ما هيقدر يخرج من هناك ابدا مهما حصل ومهما حاول.
شهبير: كويس جدا انا استدعيت الامير راكان وزمانه جاي.
( في الوقت ده راكان حضر قدامهم فجاه.
راكان: انا حضرت يا والدي فين الانسي.
شهبير: موجود بس انا عاوز اعرف هتعمل فيه ايه الاول.
راكان: الموضوع ده يخصني وانا بس اللي هقرر هعمل فيه ايه.
شهبير: من رأيي القصاص ما يبقاش كده.. صاحب الحق هو اللي يحكم عاوز يحصل ايه في اللي اذاه.
راكان: تقصد ايه عظمتك.
شهبير: اقصد ان الانسيه نسمه هي اللي لازم تقول يتعمل ايه في الانسى التاني ده لان هي اللي ليها حق عنده وكمان لو سيبنا الامر متروك في ايدك انت الموضوع هيخرج عن السيطره.
ازاد: انا اسف يا امير لو اتدخلت في الكلام ولكن انا رأى من رأي جلاله الملك الانسيه هي اللي تقول القصاص العادل بالنسبه ليها يبقى ايه.
راكان: هحاول اتكلم معاها علشان اشوف هي ناويه تعمل معاه ايه ولو رفضت انها تحكم في امره انا هتصرف.
شهبير: هي لسه زعلانه منك ورافضه تتكلم معاك.
راكان: زعلانه جدا يا عظمتك ومش عاوزه تديني اي فرصه حتى اني ابرر موقفي قدامها
شهبير: معلش انت بتحبها وانا واثق انها بتحبك شويه وهتهدى وكل حاجه هتتغير والامور هترجع زي ما كانت واحسن..
راكان: اتمنى يا عظمتك عن اذنك انا لازم امشي دلوقتي.
شهبير: ابقى طمني عليك يا امير وما تقلقش قوتك معاك انا قررت اسيبهالك.
راكان: ده لطف كبير من عظمتك ومتشكر جدا ليه.
(ختم راكان كلامه وخد بعضه ومشى في الوقت ده كانت ام فاروق هي وفاروق والمعلم جابر قاعدين في بيت المعلم شعبان بقالهم شويه.
شعبان: ده انتم نورتونا والله يا الف خطوه عزيزه.
فاروق: البيت منور باصحابه يا حاج شعبان.
ام فاروق: بص يا معلم انت عارف ان انا ما بعرفش ازوق الكلام ولا الف ولا ادور وانا وابني ناس دوغري وانت عارفنا.
سنيه: طبعا يا ست ام فاروق ده انتى ست الناس كلهم وابنك ما شاء الله عليه زينة شباب الحاره.
فاروق: الله يخليكى يا حاجه.
ام فاروق: علشان كده يا حاج شعبان انا جايه اخذ زينه بنات الحاره لزينة شباب الحاره لو يعني وافقت على طلبنا.
شعبان: ده انا اتشرف يا حاجه ربنا يتمم بخير.
ام فاروق: امال فين العروسه عاوزين نشوفها ونباركلها.
سنيه: حالا يا حبيبتي تدخل يا ناديه هاتي الشربات وتعالي يا حبيبتي.
( دخلت ناديه وكانت بنت جميله جدا وقدمت الشربات وقعدت جنب امها بكسوف.
ام فاروق: طيب يا حاج شعبان مش بردو المفروض نسيب العرسان لوحدهم شويه علشان يتكلموا واحنا نقعد في اي مكان تاني نتفق مع بعض على كل حاجه.
شعبان: هااا زي ما تحبي يا حاجه اتفضلي ومش هنختلف ان شاء الله ما تقلقيش.
(قام شعبان واخد معاه سنيه وام فاروق ودخلوا اوضه الصالون وسابوا فاروق وناديه لوحدهم في الصاله.
فاروق: حمد لله على السلامه انا عرفت انك لسه راجعه من السفر
ناديه: ايوه فعلا انا لسه واصله قريب الله يسلمك يا فاروق
فاروق: بصي يا ناديه انا كنت عاوز اكلمك كلمتين لوحدنا علشان كده قلت لامي انها تخليهم يسيبونا لوحدنا شويه.
ناديه: مفيش مشكله قولي اللي انت عاوزه.
فاروق: طبعا انتى عارفه ظروفي ومش محتاجه ان انا احكيلك عليها انا لسه ما عنديش شقه وبحاول اقف على رجلي بس شغال الحمد لله علشان كده عايزكم تصبروا عليا شويه في الجهاز يعني وكده.
ناديه: خد وقتك احنا مش مستعجلين وبعدين يا فاروق انا ما بدورش على حاجه اللي انت تقدر تجيبه هاته واللي ما تقدرش تجيبه نجيبه احنا.
فاروق: مش قصدي كده والله انا لو عليا اجيبلك الدنيا كلها وانتى عارفاني كويس انا بتكلم يعني علشان ابوكي ما يفكرش ان انا رامي الحمل عليه
ناديه: ما تقلقش بابا هيعمل اللي انا عاوزاه وبس واللي شايف ان انا هفرح بيه.
فاروق: وانتى بقى فرحانه بيا
ناديه: بص يا فاروق انا ما بعرفش اكذب ولا الف ولا ادور انا هاجيلك دغري زي ما اتعودت… ما تفكرش ان بلاد بره غيرتني وكمان في حاجه عاوزه اكلمك فيها انا متاكده انك هتكلمني فيها.
فاروق: حاجه ايه دي اللي انتى متاكده ان انا هتكلم فيها قبل ما اتكلم فيها.
ناديه: هتقولي مش عاوزك تحسسيني ان انا اقل منك علشان انا يعني متعلمه وانت ما كملتش علامك.
فاروق: والله فعلا انا كنت هقول كده وانا مش شايف انها حاجه تعيبني بس بردو قلت اوضح النقط قبل اي حاجه.
ناديه: عاوزاك تطمن انا عمري ما هقولك انا متعلمه وانت لا ولا عمري هفتح بؤي بالكلام ده اصلا ولو انت مش عاوزني اشتغل مش مهم انا اهم حاجه عندي انت يا فاروق بصراحه ومن غير كذب انا بحبك من قبل ما اروح في اي حته ولا اسافر ولا اخرج من هنا ولا حتى اكمل تعليمي لكن ما كنتش شايفه ان انت بتحبني زي ما انا بحبك علشان كده ما اتكلمتش تفتكر يا فاروق هتعرف تحبني زي ما انا بحبك ولا مش هتقدر.
(ضحك فاروق وكان مبسوط جدا انه سمع الكلام ده منها وحس ان هو مهم في حياه حد.
فاروق: انتى ما تتخيليش انا مبسوط قد ايه بكلامك ده وارتحت علشان قلتلي كل اللي في قلبك وانا والله على قد ما اقدر هحبك وهحترمك واعيشك العيشه اللي انتى نفسك فيها.
ناديه: وانا مش نفسي في حاجه خالص غيرك انت وبس.
فاروق: يبقى على بركه الله انا عارف ان دي بركه دعاء امي ليا
( خرجت ام فاروق وشعبان وسنيه بعد شويه لاقوهم بيضحكوا.
شعبان: الحمد لله بيضحكوا يبقى اتفقوا واحنا كمان اتفقنا ان شاء الله شهرين من دلوقتي ونعمل الفرح ونكتب الكتاب.
فاروق: بس انا يا حاج شعبان..!!!
( قطعتهم ام فاروق ودخلت في الكلام.
ام فاروق: اسكت انت يا فاروق انا اتكلمت معاهم في كل حاجه ما تقلقش ولما نروح ابقى احكيلك مش يلا بقى ولا القاعده هنا عجبتك.
فاروق: الصراحه هي عجبتني بس يلا بقى يا بخت من زار وخف
شعبان: لا والله يا ابني انتم منورين شويه.
(نزل فاروق وامه روحوا وفي الوقت ده كانت هيام قاعده مع نسمه بيتكلموا ونسمه بتعيط.
هيام: يا بنتي حرام عليكى عينيك نشفت من كتر العياط انا مش شايفه ان حصل حاجه علشان كل ده بصراحه.
نسمه: هو انا لوحدي بس اللي شايفه ان الموضوع يزعل انتم مالكم مستقلين بزعلي قوي ليه كده.
هيام: انا ما اقصدش كده على فكره انا اقصد ان كل بني ادم او جن كمان بيبقى له اعذار وهو اكيد كان عنده عذره وانتى زي ما بتقولي دلوقتي انه كان بيرتب الدنيا عشان يقدر يطلع فوق الارض وما ينزلش ثاني ويفضل جنبك على طول يبقى لازمتها ايه بقى اللي انتى عاملاه ده كله.
نسمه: علشان خفت.
هيام: خفتى من ايه.
نسمه: خفت يسيبني ويمشي بعد ما حبيته انا مفيش حد دخل حياتي وفضل فيها كل اللي حواليا بيسيبوني ويمشوا انا مش عاوزاه يمشي هو بالذات مش عاوزاه يمشي حتى لو قلتله 60 مره سيبني وامشي وملكش دعوه بيه المفروض ما يمشيش ويفضل.
هيام: هههههه يعني انتى عاوزه تقوليله امشي ما تورينيش وشك ثاني وهو يفضل يتلزق فيكى.
نسمه: اللي بيحب حد بيبقى عارف ان زعله صعب شويه خصوصا لما يبقى زعلان منه هو المفروض كان عرف كده وانا بحبه ومش عايزاه يبعد عني.
( اصلا من اول ما هيام اتكلمت مع نسمه وراكان كان موجود وبيسمع كل الكلام لحد ما سمعها وهي بتقول انها بتحبه فضل يسمع بقيه الكلام علشان يتاكد من حبها ليه وطبعا ده كله بعلم هيام.
هيام: يعني انتى عاوزه تفهميني انك بتحبيه لدرجه انك تزعلي منه الزعل ده كله علشان غاب عليك شويه.
نسمه: والله يا هيام ما تعرفي انا بحبه ازاي يمكن اكثر كمان ما انتى بتحبي هادي انا عاوزاه في حياتي على طول ومش عاوزاه يمشي.
(ظهر راكان في الوقت ده ونسمه اتخضت.
راكان: طيب لما انتى بتحبيني كل الحب ده وانا بحبك كل الحب ده لازمتها ايه البهدله دي ما تسامحيني وخلاص انا كل ده صابر ومستني وفي الاخر لما تحبيني تستخسري انك تفرحيني وتعرفيني.
نسمه بتوتر: لا على فكره انا مش بحبك ولا حاجه انا كنت بهزر مع هيام.
هيام: ههههه ما خلاص بقى كفايه مكابره كل شيء انكشف وبان.
راكان: حتى لو هيام ما كانتش وقعتك بالكلام علشان تقولي انك بتحبيني انا كنت حاسس وعارف ومتاكد كمان وما كانش عندي ذره شك في حبك ليا.
نسمه: ايه الثقه المبالغ فيها دي ما يمكن كنت بستعبط ولا بقول كلام وخلاص هو انا كل حاجه اقولها تصدقها.
راكان: ايوه كل حاجه هتقوليها هصدقها علشان انا مليش غيرك وبعدين انا اتخليت عن كل حاجه تحت عشان خاطرك علشان افضل موجود معاكي على طول وما سبكيش ولا لحظه انا كمان بقالي هويه بشريه اسمي بقى زين الرفاعي رجل اعمال معروف وليا اسم في البلد علشان لما اجي اتقدملك اعملك الفرح اللي نفسك فيه والناس كلها تبقى شايفاني مش انتى بس.
نسمه: بجد يا راكان.
راكان: بجد يا قلب راكان وبعد كده اسمي زين بس دلوقتي بقى فاضل حاجه واحده لازم نعملها.
نسمه: حاجه ايه مش فاهمه
راكان: لازم تاخدي حقك من سمير ابن عمك وانا لما اتكلمت مع والدي اتفقنا اننا نسيبك انتى تقرري هتعملي فيه ايه واللي انتى هتقوليه انا هنفذه.
نسمه: يعني انت عاوزني اعمل ايه.
راكان: هاخدك معايا دلوقتي وهنروح المكان اللي هو فيه واللي هتقولي يتحكم عليه بيه هو اللي هيحصل يلا بينا..