رواية هلع الفصل الرابع عشر 14 بقلم آية
رواية هلع الجزء الرابع عشر
رواية هلع البارت الرابع عشر
رواية هلع الحلقة الرابعة عشر
وكنت واقفه عالمرايا نمشط في شعري ع طلعت رسلان من الحمام ، قرب مني وجا عند المرايا
سما >> انت مش طبيعي !
رسلان >> كنك 🙂
سما>> تي البس ماليتك 😪 ومعش تطلع من الحمام وانت مش لابس
وطلعت من جنبه ،لبس ماليته ولحقني وكان يمشط في شعره على مراية الصالة ويحكي
رسلان >>باهي عاد تيح خوك الثالث؟
سما >> كيف؟؟
رسلان >> مراد زي خويا و موسى زي خويا وتوا تهدرزي مع تيح خوك برضو؟
سما>> تيح رفيق موسى من زمان بكل وديما عندنا و شبه كان عايش معانا و ايام عزا بابا وقف مع موسى واجد ف طبيعي ح يقعد كيف خويا 🫢
رسلان >> عارفه انا سبب موتي حتكون جلطه يا اما من الحجاب يا من كلمة زي خويا يا من لبسك
ومش عارفه ليش لما جاب سيرة الموت غمضت عيوني وضغطت علي يدي
>> بعد عمر طويل فكني مالسيره هذي
رسلان برم عليا >>سما كنك ؟؟ مش قصدي راه
سما>> لا عادي | تعشيت؟
رسلان>>كليت مع اسير وانتي؟
سما>> حتى انا كليت مع البنات وكليت حلو واجد سد نيتي
رسلان >>خطرها ع اسير رد حكالي ع روان راه وقالي بيمشيلها لجامعه وهكي
سما>> عليش ماشي
رسلان>> خايف يحكي عالتلفون يتسرعو هما الاثنين فمافيش احسن من انهم يحكو عالواقع اسير صاحبي ونعرفه ف يمشيلها احسن ما يلبز عالتلفون
سما>> انا نعرف انهن توا بدن يمتحنن ف كل يوم عندها من ال ١٠ لل ١ وهنا يجن قبل بساعة ع طلعت احمد ولا عمو عاشور خليه يعدي ف اقرب وقت عشان خلاص ح يكملن
رسلان >>ماتقوليلهش اه ، خليه يمشي ويتفاهم معاها مرات تقوليلها اتحشم وتهرب منه
سما>> لالا انا بروحي نبيهم يحكو لو انت ضامن انه صاحبك جدّي خليه يتعرف عليها روان عندها عقدة مالموضوع هضا بلكي تفك
رسلان>>عقدة شنو
سما>>تو كان مشى الجو بينهم حنفهمك عشان تفهمه و ما يلباش معاها
رسلان >> لا هو كان لبز عارفني مش ح نسيبه 😂 المهم انا تالف بنرقد
سما>>بترقد هنا؟
رسلان>> داري راه وظهري اليوم مش حنقدر عالكنبة
سما >> ييييييه
رسلان>> ييه ولا اللي هوا ظهري تكسر
مارديتش عليه و برمت ورقدت عند حافة السرير ، ما قدرتش نرقد 🙄 قعدت متوتره من قعدته جنبي ، شويه هكي كان هو فسابع نومه خذيت غطايا وطلعت عالكنبه برا
//
رسلان
اليوم هضا رغم المناقرات بس بديت نكتشف فيها وكيف هي وحده هكي لطيفة ع قد ما انها تحاول تبان قويه ! كيف شايلة مسؤلية اختها وكيف تفكر في امها وكيف محروقه ع قضية باتها وخوها
طلعنا يومها بعد ما فترشت فالكلام معاها ، بس كانت مبسوطه بالطلعه ع قد ما كانت طلعه بسيطة ! وفوقها فرحت اكثر عشان شلتها عند حوش جدتها وشافت البنات ، مش عارف ليش لما سمعتها تبكي مع اختها قلبي وجعني عليها وحسيت انه معش نبيها تبكي بكل !
انجلطت من لبسها و من عنادها و من تهدريزها مع اي حد تحت اسم زي خويا 🙄 بس مش فاهم انا عليش حارق دمي يعني
بعد روحنا تناقرنا شوي كالعاده ورقدت وهي رقدت جنبي ، بس شويه هكي وحسيت بيها طلعت من حذايا قعدت نتقلب وصبيت عندها ، لقيتها على كنبة الصالة
رسلان>> سما سما صبي خشي جوا صقع هنا
بس كانت ف سابع نومه
قربت منها و حولت شعرها من ع وجها | فتحت عيونها وهي فوسط النومه >> بنرقد نعسانه ” وردت غمضت عيونها”
رسلان>> يا عليك عناد حتى فالرقده😪
كانت خاشه فبعضها ومش ناويه تنوض، توكلت على الله ورفعتها شلتها عند الدار ، طلعت ولعت دخان و شربت اميه وخشيت للدار جنبها ماهو مش نخششها ونطلع عاد عليك عرس هوا😒
//
//
عند البنات
في الصبح نازله سالمة من ع الدروج لحوش جدتها تجري وتلف في شعرها ، ع طلعت تيح من الدار
سالمة>> صباح الخير
تيح مابش يبحت دروحه متحشم عشان موسى>> صباح النور ، كنت بنطلع معلش معلش
سالمة>> لا عادي ، لاباس عليك كويس اليوم؟
تيح رفع عيونه>> الحمدلله بس خوك يحب يكبر الموضوع 😪
سالمة>> لا بجد لازم تهتم الروحك ، بعدين وين طالع ؟
تيح >> بنطلع انا وموسى قلت نرجاه برا
سالمة>> فطرتو باهي ؟
تيح ابتسم >> خشي عشان ما يطلعش موسى بس
سالمة فطنت الروحها وخشت ، كان موسى فالمطبخ قبل ماتخش سالمة
موسى>> صباح الخير
ميرا برمت عليه>> صباح النور
موسى>> عارفه اني رايفة عليكي ؟
ميرا>> تيح قاعد 😒
موسى ابتسم >> شن الهبال هضا 😂 بعدين شكلي تعودت انه مانرقدش الا وانتي حوليا
ميرا>> موسى راه فالمطبخ نحن قاعدين شنو هضا
موسى>> علي اساس برا المطبخ واخذ منك حاجه😂
ميرا>> والله حايخشو وخر شويه
موسى ابتسم >> انا ماشي شور الشركة بعد نكمل ح نتكي ناخذك بيش نروحو
ميرا>> خوذني توا بندوش ونغير دبشي مش خاطره عليا نبات وبنمشي بعدها انا وروان للامتحان بيشيلنا احميدا
موسى>> ما معايا تيح
ميرا>> وشن فيها تيح واحد منا بعدين ما يقعد معاك مرات لما تشيل حد من البنات
موسى>> البنات حاجه وانتي حاجه
ميرا>> كيف يعني ؟ 😒
موسى>> انتي محد يشوفك الا انا بس ❤️
وطلع ع خشت سالمة
سالمة>> قتلك صاحبك طلع راه نديرلكم فطور
ميرا>> صباح الخير دارتلهم عميمه من مبدري
سالمة>> انتي كنا وجك احمر بس ؟
موسى ابتسم وطلع 😂
ميرا>> خليني نغسل وجي شكله المطبخ ساخن بس 😩
طلعت ميرا وهي متوتره ومعش فاهمه شن في وحركات موسى الي اخر فتره قعدن بزياده
//
//
نضت ثاني يوم لقيت روحي فالدار جتني صدمه 😳
عشان اخر حاجه نذكرها اني طلعت من جنب رسلان ومشيت عالكنبه ورقدت على طول
صبيت لفيت شعري وطلعت لقيت رسلان مش قاعد وكانت الساعه ١١ الظهر ، خشيت للحمام وطلعت لبسه و غيرت دبشي ونسمع في صوت رسلان
رسلان>> سيمو نضتي ؟
قعدت متنحه هضا رسلان ولا شن فيه ؟
رسلان خش >> نضبحلك ما تسمعيش
سما >> لا كنت سرحانه بس ، صباح الخير
رسلان>> صباح النور
سما >> بنسألك انا رقدت برا امس صح؟
رسلان ضحك
سما >> عليش تضحك ؟😒
رسلان >> لا شي بس امس انتي جيتي بروحك قلتيلي مانقدرش نرقد بروحي “وضحك”
سما >> انا قلت هكي ؟ 😳 مستحيل
رسلان>> وعليش مستحيل الواحد وهوا نعسان مايفطنش 😂
سما >> رسلان نحكي جد انا درت هكي ؟ وبطل ضحك يا مستفز
رسلان >> سارة لوطا تسأل عليكي لو بتنزلي 😌
طلع رسلان و انا قعدت متنحه نربط فالاحداث
عشان هكي يقولي سيمو ازعمه ؟ 😭 ياربيييي وقعدت نعصر في دماغي بس ماذكرتش ابدااا وهوا كملها ضحك وما بش يعطيني جواب
//
//
في الجامعة طلعن روان و ميرا من الامتحان
روان>> كويس حلينا فيها
ميرا>> خلاص انا كبدي درهت من الامتحانات
روان>> رني ع موسى يجينا ولا نكلم احميدا
ميرا>> لا موسى اكيد مازال فالشركة خلي احمد يجينا
روان >> تو نكلمه
ميرا>> بنخش نجيب نسكافيه
خشت ميرا للكافتيريا وصبت روان برا كلمت احمد عشان يجيهن ، وقفها واحد معاهن فالدفعة يسأل فيها على امتحان اليوم
علي>> شن صار حليتي كويس؟
روان>> لا تمشي مادة اليوم الحمدلله
علي>> بس اسمعي في سؤال هكي تحسي مامرش عليا ” ووقف جنبها و طلع الشيت وقعد يوري فيها ”
وطبعا عشان حظها جميل كان اسير وقتها جاي للجامعة المفروض عشانها يعني وقف بمسافة هكي منهم
روان >> ايوه هكي حلها
علي>> تماااام فهمت عليكي تخيلي ما كنتش فاهمها هكي بكل
رفعت عيونها شافت الاسير مش عارفه ليش توترت وارتبكت ، مشى علي من جنبها وقربت شور اسير لا اراديا اللي كان واقف وماسك اعصابه
روان >> شن ادير هنا؟
اسير >> كيف جامعة بوك؟
روان>> شن الاسلوب هضا ياساتر
اسير >> كيف مفروض نجي جنبك و نتليس عشان يعجبك اسلوبي ؟
روان>> اوكي اسفه عشان سألت
ع طلعت ميرا من الكافتيريا بحتت فيهم وهي مش فاهمه قربت منهم
ميرا>> اهلين | رد احمد ؟
روان >> تعالي نخشو جوا راسي صدع بنشرب نسكافيه حتى انا 🙂
وبرمت بدون ما تعبر اسير 🙄
ميرا>> تي منو هضا
روان>> صاحب رسلان
ميرا>> تبصري هضا تيسير
روان ضحكت>> اسير اسير 😭😂😂
ميرا>> وين نندري مهم عليش جاي؟
روان>> مانندريش جاي قالب وجه يحسابها جامعة بوه 😪
ميرا>> بس الحق ينقال انقنه سمح 😂
روان>> شفتيه عسل بكل 😍
//
//
كنت لوطا عند هل رسلان
سارة >> يزن كمل وكالك
يزن >> مش جيعان
سما>> باه تعال نوكلك انا
يزن>> لا 🙄 بنطلع برا وين رسلان؟
سارة>> كمل وكالك بعدين اطلع | يا ماما قولييييله
سما >> 😂😂😂
سارة>> شفت لبزت دبشك
سما >> والنبي جيبي نغيرله انا😂
خذيت يزن ومشيت نمسحله في دبشه وغسلتله وجه و نضحك عليهم هوا وسارة
ع خشت رسلان >> كنك داير هرجه انت
يزن>> ماما تهزب ديما
سارة>> يزننن صكر فمك
سما>> خلاص عاد حتى انت ما تولعش بينهم😂
رسلان>> سكتت😂
غيرت اليزن و رسلان وترني وهو يبحت فيا
رسلان>> ماتبيش تلفي شعرك باه ؟ فوق انه بدون حجاب فوق ما انه مشرتع هكي
سما >> لا نعرف 😒 ” فكيت المساكه ورديت سقمت شعري من جديد” | متبيش تقولي ؟
رسلان>> شن نقول ؟
سما >> ع رقدت امس
رسلان ضحك >> مازال شاغل عقلك😂 طلعت لقيتك صقعانه نضت وشلتك جوا
سما >> شلتني !وانت وين رقدت ؟
رسلان>> ع الكنبة “شوية تأنيب ضمير”| هيا يا خالو تطلع معايا
يزن >> لا بتجي لولي بنقعد
رسلان>> ياراجل شن تبي فيها 😒
ع خشت سارة >> لولي هذي بنت خو مالك الكبير يعني بنت ولد عمي
سما >> في عمر يزن
سارة>> لالا فجامعة بس ديما تلعب فيه عشان هكي ينسجم معاها | مكسده بروحها قتلها تعالي اتعرف عليكي الحوش خطوتين تو تجي بعدين
رسلان>> طالع انا خلوكم مع لولي
سما >> وين ماشي ؟
حسيته بيقول شن دخلك | بس فنصت فيه امه 💁🏻♀️ ناس تخاف ما تحشمش
رسلان>> بيخطم عليا اسير
طلع رسلان وقعدنا نهدرزو انا وسارة
زينب >> ما تبطلن من هالدوا
سما >> انا متعوده عشان البنات ف ديما نهدرزو😂
سارة>> وانا ما صدقت لقيت حد نهدرز معاه ماما كل شويه تقولي خلاص خطيني
زينب >> هدرزن هدرزن نبصر معاكن😂
//
//
رسلان
طلعت ع جيت اسير الي كان فاصل
رسلان>> جاي عشان بتقلب وجك ولا شنو؟
اسير >> يارا اقطع مشيي حتى انا ياريتني ما مشيت
رسلان>> قصدك عديت للجامعة اليوم؟ مسرع😂
اسير >> بعدها تقولي كنك ما تحكيش 😒
رسلان>> قول قول سكتت😂
اسير >> مهم لقيتها واقفه مع حد لاصق فيها ويوري فيها فحاجات فالكتاب ولا ورقة انظر شنو
رسلان>> باهي بلكي زميل يعني
اسير>> زميل يوقف بعيد وعليش يسأل فيها هي من الدفعه كلها واضح في حاجه بينهم
رسلان>> مرات يقعد حد عادي عليش تفكر هكي
اسير >> وليش توترت بعد شافتني باه 😒
رسلان>> تو كان في حاجه بينهم را سما قالت لي
اسير>> اكيد سما مش ح تحكي ع بنت عمتها يعني
رسلان>> معش تقول اسمها انا نقوله بس 😒
اسير>> مش وقت مسلسل تركي بكل
رسلان>> مهم تو نسألها بس منظنيش راه
اسير >> خلاص فوت الموضوع اصلا معش نبي بكل
رسلان>> يا عليك قصة وخلاص نلعبو نحن
اسير >> رسلان ولا حرف 🙂
طلع اسير و خش رسلان
//
//
بعد العصر هكي خشت لولي | مشالها يزن يجري
لولي >> حبيبي ” وطبست رفعاته”
سارة >> هذي مرات رسلان | وهذي لولي بنت ولد عمي
بحتت فيا ومدت يدها >> شفتها فالعرس
مديت يدي >> انا ما كنتش فاطنه الحد بكل يومها
لولي >> كنتي متوتره انظر كنك في حد ياخذ رسلان ويتوتر
سارة >> لولي شربتي قهوة ولا نديرو 😪
لولي >> لا لا ماشربتش | وين زينوبه ؟
سارة>> جوا خشي
خشيت مع سارة وانا حاسه البنت مش طايقتني 😐
حطينا سفرة القهوة و قعدت لي اسمها لولي تهدرز و طروح ياشريني راه حافظة العيله ، ويزن يبرم حذانا ويلعب
ع نزلت رسلان
سما >> كنت راقد ؟
رسلان>> اه ، في قهوة
سما >> تو نصبي نديرلك
لولي>> لا مافيش داعي خوذ فنجاني ما نبيش انا ” وصبت مدتله الفنجان ”
سارة بحتت فيا وحستني اضايقت | درت روحي ما عدلتش وقعدت ماسكه يزن ودروحي نوري فيه في لعبة فالتلفون وانا بجد مش مدوره
لولي >> شنجوك ؟
رسلان >> الحمدلله بخير “وخذا الفنجان”
يزن كر مني التلفون ومشى يوري فيه اللولي
يزن>> نبي نفس اللعبه هذي
رفعاته لولي فوق
سارة>> عيب رد التلفون ” وخذاته منه مداته ليا”
سما>> عادي خليه
لولي ماعبرتنيش وبحتت في يزن >> حاضر تو انزلها نلعبو بيها بعدين
رسلان>> تطلع معايا برا ؟
يزن مد يده شور رسلان ، طبس ع لولي و خذاه منها وهي تبحت فيه💁🏻♀️ وكأنه مسلسل تركي الله يبارك ناقص المشهد كبايتين عصير ليمون
انا هنا حسيت مكاني غلط بكل انسحبت من حذاهم وركبت فوق ومش عارفه ليش اضايقت بس كانن حركاتها اوڤر انا الي اسمي مراته ما عطيتش فنجاني يشرب منه 😒 ولا هما قريبين من بعضهم نفس علاقتنا نحن ببنات وشباب العيله ولا هما هكي جوهم معش فهمت بس الي نعرفه انه البنت مش معبرتني بكل
خشيت للجناح و قعدت دروحي نرتب فيه هكي و ولعت التلفزون
شوي هكي ع رنت مراد
سما >> الو
مراد>> ايوه لو ما نرنش ما تسأليش؟😒
سما>> والله في بالي نبي نجيكم
مراد>> في اي وقت رني عليا نجيبك عادي
سما >> باهي | شنجوك انت ؟
مراد >> بخير والله قلت نشوفك بلكي تبي حاجه
سما >> لالا سلامتك بس
مراد >> سيمو كنه صوتك ؟
سما>> لا والله غير كنت مكسده بس
مراد>> راجلك وين مسيبك بروحك😒
سما >> لا كنا مع بعضنا عند هله بس انا حسيت راسي صدع ركبت
مراد >> لاباس لاباس ، تبي حاجه ؟ نجيبلك حاجه
سما >> لالا ماتشوف باس كويسه والله انت ما تبي شي
مراد >> سلامتك خلاص تريحي
وانا نحكي طبعا خش رسلان عطاني نظرة منو| حطيت التلفون وعليت صوت التلفزون
سما >> مراد
رفع حاجبه >> كنه شن مريح عندك
سما >> يسأل قالي امتي حا تجينا
رسلان>> وشن يبي فيك؟
سما >> كيف هذي حوش خالي عادي يعني
رسلان>> هو مراد ما عندش حاجه غير انه يسأل عليك ؟
صبيت من حذاه خشيت للدار>> زي ما لولي ماعندهش حاجه غير انها تعطيك فنجانها تشرب منه
رسلان>> شن دخل هذي في هذي ؟
سما >> اهو عاد وانت ما صدقت طبعا
رسلان>> تي في شنو تحكي ما صدقت شن
سما >> خذيته وشربت منه ! 🙄
رسلان>> تهويل المواضيع كلها فنجان قهوة راه
سما >> خلاص معناها حتى انا كلها ولد خالي ويرن يسأل عليا
رسلان >> هذي كنها
سما >> اطلع بنغير دبشي !
رسلان>>كنت بنقولك سارة تبيك لوطا
سما >> نغير وننزل 😒
وماكنتش عارفه عليش رديت عليه هكي بس كنت بنرفزه زي ما نرفزني
رسلان>> اللهم طولك ياروح
//
//
عند ميرا ، روحت للحوش مع موسى بعد ما جا خذاها وخشت للمطبخ
ميرا>> موسى
موسى >> نعم
ميرا>> جيعانه بكل وتحشمت ناخذ غدا من حوش امي
موسى>> وليش ما خذيتي
ميرا>> ماه عميمة كانت فالمطبخ 😪 قالت لي نحطلك او بالاصح قالت نحط الموسى قتلها لالا بنديرله انا
موسى مسك ضحكته>> باهي وخشي ديريلي معناها
ميرا>> موسى ماتضحكش عاد مانك عارف 😐
موسى>> طالما هكي عليش باهي ما بيتش تاخذي الغذا
ميرا>> عشان حتعطيني الغدا وتسمعني معاهن كلمتين ، اسملا علي وليدي ومكملها مطاعم وما ياكل في وكلة مسقمه وانا بصراحه قاعده في فترة امتحانات وضغط مش حابه نسمع شي
موسى>> انقنه اسملا عليا فعلا 😪 مشكله ماتعرفيش تقلي حتى دحي معقوله
ميرا>> تو انا منعرفش ندير شي ؟ مش درتلك سندوتش كم مره 💁🏻♀️ ونديرلك في قهوة هضا كله شنو
موسى >> يا عليك اكل دسم الله يبارك
ميرا >> معش نبي ناكل 😒 ” وصبت من حذاه”
لحقها موسى >> ح نطلبلك حاضر 😂
ميرا>> مانبيش اطلب لكي بس
موسى>> بلا عناد نطلب وناكلو مع بعضنا
سكتت عشان كانت جيعانه بكل 😂
موسى>> افردي وجك
ميرا>> مفرود
موسى>> نجيك راه
ميرا>> بلا سماطه 😪 اطلبلي اثنين اه جيعانه
موسى >> لعل وعسى تسمني شويه
ميرا>> منبيش نسمن
موسى>> بس انا نبي 😍😂
ميرا >> انت تبي تربايه 🙄 “وطلعت من جنبه بعد ما وترها ” 😂
شوية هكي ووصل الاكل
موسى >> تعالي كولي ، وشن قايلك على شعرك المبلول انا
ميرا >> بنموت جوع والله خليني ناكل و حنصبي انشفه ” وجت قعمزت جنبه”
موسى >> لبستك خفيفة
ميرا بحتت فيه ومسكت السندوتش>> وانت كنك مركز
موسى قرب شوي >> انتي عارفه انه حافظ شكلك حفظ ؟ لدرجة لو يغمضو عيوني ويقولولي ارسمها نرسمك بدون ولا غلطة
ميرا مدتله السندوتش و غطت كتف الماليه لي لابستها >> ماتبيش تاكل
موسى مسك السندوتش و ضحك >> عارفه انه عقلك حمار بكل 😂 ويفكر في حاجات غبية بكل بعدين تجي وتقوليلي ” يا موسى عاد انت قليل ادب”
وخرت راسها و قعدت تاكل بدون ما ترد 🙊
//
//
عند احمد ، اللي كان فالشغل ماسك ملف قضية خوه عبدالرازق اللي قعدت في اخر سنتين شغله الشاغل القضية هذي بس
ع رنت تلفونه وكانت ضحى ، ابتسم لا شعوريا لما شاف اسمها من يوم الفاتحه معش شافها ولا حاول يحكي معاها
ضحى >> كيف حالك
احمد >> يا اهلا بخير وانتي
ضحى>> تمام | مانبيش نعطلك بس بنقولك عالسريع
احمد>> بالعكس مش معطلتيني خليتيني نفصل من الشغل
ضحى >> ربي يعاون ، المهم سهام طلبت تشوف البنات ميرا و سما
احمد انصدم>> كيف والله جد ؟
ضحى >> كلمتني الممرضه لي ماسكه حالتها عشان تعرف انه في تواصل مع هل المريضه وقالت لي قوليلهم يجو بكرا ع موعد الزيارة
احمد>> يعني حالتها تحسنت؟
ضحى>> حالتها مستقره ع نفس الوضع
احمد >> ان شاء الله خير
ضحى>> انا مش حنكون غادي بكرا ف رن عليا عشان نوصي عليها
احمد>> ماتقدريش تجي ؟
ضحى>> تبي حاجه
احمد>> لالا 🫢 بنسلم عليكي بس
ضحى ضحكت >> حنشوف
احمد >> انتي امورك تمام
ضحى>> تمام فالشغل مافيش جديد، شنداير في شغلك
احمد >> غارق فيه والله بس الحاجه الكويسه اني سمعت صوتك
ضحى ابتسمت>> المهم كيف ما قتلك شوف البنات و قولي
احمد >> من عيوني
ضحكت وصكرت منه
احمد >> نعليا عليك ضحكه 😪
ع خشت ربيع >> ان شاء الله خير تحكي مع روحك
مسك الملف >> القضية هذي تخلي حد عاقل
ربيع >> في جديد ؟
احمد >> نفس الكلام ونفس كل شي
ربيع >> ما قتلك ع الفاضي
احمد>> نفكر نمشي للمنطقه غادي بلكي حد اذكر حاجه او نلقو حاجه
ربيع>> خوذ اذن باه
احمد>> بدون اذن مفتاح الحوش معايه وانا خو المرحوم مش مستحق تصريح
ربيع >> دورني باه قبل ما تمشي
احمد >> تم
ربيع >> نعدو بروحنا بدون دورية؟
احمد >> لالا خلينا نبدو بروحنا انا وياك بس ولو وصلنا الحاجه نقولو للرئيس
ربيع >> خلاص انت ابدا وانا معاك ف اي شي
احمد >> تمام ياباشا
//
//
نزلت عند سارة لوطا والحمدلله لقيت لولي مش قاعده
سارة>> حسيتك تضايقتي مبدري من لولي
سما >> لا عادي بس قلت تاخذو راحتكم بس
سارة >> تي واضح والله حتى يزن قالي سيمو وين 😂
سما >> نجك ليا 😂 باه عادي يعني نسأل ؟
سارة >> احكي
سما >> هكي حسيت مكاني غلط كأنه كان في بينهم حاجه ولا هكي هما ديما
سارة>> لولي و رسلان؟ لا طبعا ما في شي بينهم بس هي لولي هكي راه ماتعدليش عليها
سما>> حسيتها مش طايقتني ما فهمتش
سارة>> انتي خليك في رسلان بس و افهميه راه والله مافيش اطيب منه
سما >> سارة انتي معش قعدتي برانية ف انا ورسلان ما خذينش بعضنا عن حب وهكي و ثاني حاجه مانعرفش عليه شي بكل ! خاطي انه يشتغل في الشركة مانعرفش 😕 ماعرفتش انه عنده اخت لعند ما جيتينا فالحوش
سارة>> والغلط من منو ؟ منك صح عشان ما سألتيش ، سيمو انا فاهمه عليكي انا واخذه مالك عن حب ولما اجوزت كانت اول سنه صعبه بكل عليا معاه مش كيف الحب كيف الخطبة كيف الزواج | يا ستي هكي اجمل اصلا اتعرفو علي بعضكم من جديد خلاص هضا قعد حد في حياتك لازم تسأليه وتفهمي منه كل شي في بالك
قعدت سارة تحكيلي ونهدرزو هكي ، عند ما جا مالك راجلها و جا رسلان
سارة>> هذي مرات رسلان
مالك>> مشاءالله مشاءالله طلع عنده ذوق 😂
رسلان>> امالا شنو 🫢😂
يزن >> بابا عندها لعبه في تلفونها
مالك >> خلاص هكي انتي وياه حتقعدو بست فرند😂
سارة>> سحن البنت اليوم كل شويه ماسك تلفونها
سما>> لا عادي خلوه بيني وبينه 😂❤️
مالك>> لا وذوق اخرى 😂 عليك طيحه
رسلان>> مالك😪
سارة>> مالك اطلع ماتوترش البنت | ماتعدليش عليه هكي بصارته
ابتسمت كانو عسل مع بعضهم | ولقيت رسلان يبحت فيا ونظرته المستفزه ما فهمتش المره هذي شن درت يعني عشان حكيت مع مالك؟ 😒
طلعو مالك و سارة و سيبت عميمه وعمي يتعشو وركبت فوق ، لحقني رسلان
خشيت للدار بنغير نلبس توتة نرقد بيها ، ورسلان جا وقف عند الباب
سما >> شن تبي تقول ؟
رسلان>> يعني عارفه بنحكي
سما >> من ونحن لوطا تبحت فيا ب استفزاز | شن درت راجل اختك سلم و سلمت عليه شن نتبكش يعني ؟ 😒
رسلان>> ايوه راجل اختي يعني لاهو مراد ولاهو موسى عشان تقولي زي خويا
سما>> باه ماقلتش هكي انا “صرفقت باب الدولاب”
رسلان>> يعني تسلمي عليه وانتي مش لابسه حجاب
سما >> عارف ؟ معش عرفت كيف نتفاهم معاك والله
رسلان >> البسي الخرا علي راسك اقل مافيها قدام مالك
سما >> وانت تمسك الفنجان وتشرب من ستي لولي عادي ؟
رسلان>> تي شن قصة لولي اليوم 😪
سما >> اسأل روحك | حول بنغير دبشي
رسلان>> احكي كويس
كنت على اخري منه ومن حركاته قعدن عيوني يدمعن ونمسك فيهم ما نبيش نبكي ، بحتت جنب ومارديتش
رسلان>> خلاص خلاص بتبكي يعني عشان بتطلعي من الدار
سما >> لا عشان انت مستفز
رسلان>> طلعت 😪
صكرت باب الدار و قعدت نتنفس عشان مانبيكش ، هديت شويه خشيت صليت ورقدت ونسمع في رسلان فالصالة يتفرج عالتلفزون
وكنت مخنوقه بكل مش عارف ليش نحن الاثنين نعاندو في بعضنا ومختلفين بس في حاجه تخلي فينا نحكو مع بعضنا ، حتى عرايكنا ومناقرتنا ما يطولنش يدوبك نتعاركو شويه بعد خمس دقايق يحكيلي ولا نحكيله حاجه و ينتهي الموضوع
//
//
نضت ثاني يوم على رنت تلفوني وكان احمد
سما >> صباح الخير
احمد>> تي راقده
سما >> كيف نضت
احمد>> باه قتلك راجلك قاعد؟
سما>> احميدا شن فيه
احمد>> كلمتني ضحى امس قالت لي امك تبي تشوفكم انتي وميرا
توترت صبيت من السرير و طلعت ما لقيتش رسلان فالصاله
سما >> نمشي توا يعني ولا شن ندير
احمد>> اه خلي رسلان يجيبك تعرفيها المستشفي و توا موسى جايب ميرا تلقيني غادي
سما >>خلاص تمام
احمد>> اهدي ما في شي
صكرت من احمد و قعدت ندور على رسلان ، نزلت لوطه لقيت عميمه وقالت لي انه طلع من نص ساعه
مسكت تلفوني رنيت عليه ماردش عليا !
حطيت على رقم مراد رنيت عليه
سما >> مراد تقدر تجيني
مراد>> كنك شن فيه ؟
سما >> تعال تو نفهمك بس ماطولش
مراد>> حاضر حاضر
في خمس دقايق كنت لابسه كريت اي بلوزة وبنطلون لبستهن و خذيت ايشرب و مراد رن قالي انه لوطا مافكرتش في شي لحظتها غير ماما ، نزلت وقلت العمتي اني ماشية زيارة الماما استغربت بس ماكانش عقلي معايا عشان نفهمها
مراد >> سيمو فجعتيني ماتخيليش كيف وصلت شن فيك
سما>> رن احمد قالي ماما بتشوفنا
مراد>> فجعتيني والله قلبي طاح
سما >> حتى انا قلبي طايح شيلني بس
مراد>> باهي اهدي بس اهدي مافيش حاجه
مشينا شور المستشفي اول ما وصلت تلاقيت مع ميرا عند الباب ومن كثر التوتر ما بحتنش في بعضنا خشينا
لقينا ضحى واقفه مع احمد وماخلوش مراد وموسى يركبو معانا قعدو فالاستقبال لوطا ونحن ركبنا
احمد >> اهن جن
ضحى>> ح نفتح الباب وتخشن و حتكون الممرضه معاكن وانا برا اي حاجه نادن عليا
هزيت براسي و فتحتلنا الباب وخشينا انا وميرا ومعانا الممرضة وخلو باب الدار مفتوح
ضحى >> ماتخافش شوفتها ح تفيدهن ومرات تفيدها مش ح تضر حد والمره هذي حالتها احسن يعني فتحنالهن الدار مش من ورا الباب
احمد ابتسم >> شكرا على كل شي
ضحى >> مادرتش حاجه شغلي هضا
احمد>> مازالت تقول شغلي
ضحى >> خلاص ماتفضحنش اني دايرتلك واسطه 😂
//
//
اول ما خشيت كانت ماما عالكرسي ، بحتت فينا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية هلع)
