رواية من وراء الكواليس الفصل الثاني 2 بقلم شيماء محمد
رواية من وراء الكواليس الجزء الثاني
رواية من وراء الكواليس البارت الثاني
رواية من وراء الكواليس الحلقة الثانية
_ خلاويص؟
_ لسه.
_ أجيب البوليس؟
_ لسه
_ طب خلاويص؟
_..
_خلاويص؟ أنا جاي خلاص.
_ أخيراً قفشتك يا سليم.
_ أنت بتتكلم مع مين يا يونس؟
_ هاا مفيش يا ماما حاجة.
_ لسة بردوا بتشوفه؟
_ بتتكلمي عن إيه!
_ بتشوفه يا يونس ولا لأ رد عليا؟
_ بشوفه يا ماما بشوفه ارتحتِ كده؟
_ وهتفضل ساكت كل ده لحد أمتى؟ لازم تروح ل..
_ اروح لمين؟ أوعى يكون قصدك..!
_ايوه وعلشان خاطري اسمع كلامي و..
_ماما ينفع تسبيني لوحدي.
_ بس أنا..
_ ماما أرجوك عاوز ابقى لوحدي شوية اذا سمحتي.
عيوني وقعت على اليافطة وركزت فيها أوي وسرحت لبعيد، مكنتش متخيل في يوم من الأيام إني ممكن أكون هنا مكنتش متخيل اني أروح في يوم لدكتور نفساني! ماحدش مصدق إن كل اللي بشوفه حقيقة مش وهم! هما المجانين مش أنا
_ فوق بقى اخوك مات اخوك مات مات.
_ انتِ بتقولي إيه سليم عايش مماتش سليم قدامك أهو يا ماما رد عليها عرفها إنك عايش.
_ أخوك مات حرام عليك ليه بتعمل في نفسك كده فوق بقى الله لا يسيئك ما تتعبش قلبي معاك.
_ إنتَ ما بتردش عليا ليه رد بقى سمعها صوتك قولها انك عايش!
_ هيرد عليك ازاي وهو مبقاش موجود ؟ ليه بتوجع قلبي عليك ليه!
_ أنا مش مجنون يا ماما زي ما بيقولوا صدقيني سليم عايش هو موجود بس ماحدش بيشوفه غيري هو قالي كده صدقيني يا ماما.
_فوق بقى يا ابني فوق ده مجرد وهم في خيالك انتَ اخوك مات من سنتين فوق بقى .
_ وبدأت تشوفه أمتى ؟ بعد وفاته على طول؟
_ هو مماتش هو لسه عايش لسه موجود ريحته لسه موجودة ضحكته لسه بسمعها خناقنا لسه فاكرة حتى لو مبقاش حد يشوفه لكني بشوفه ولو مش موجود في حياتهم فهو موجود في حياتي ، بعد ما قالوا أنه اتوفى سنة ونص ، سنة ونص مبقتش أشوفه وحياتي كانت بتتدمر في غيابه ، الكل كان فاكر إني مصدق أنه مات واني خلاص تخطيت الموضوع ، لحد ما ظهر فجأة من شهور بقى يجيلي بقي يظهر تاني في حياتي واشوفه سليم طلع عايش مماتش!
_ بيظهرلك امتى؟
_ مش فاهم قصدك ؟
_ قصدي بتشوفه أمتى وأنت فرحان ولا زعلان أمتى بيظهرلك بالظبط ؟
_ بيظهر لما..
دموعي بتنزل بالتدريج وأنا شايف أن الأمر وصل بيا إني ماسك سكين علشان أقتل بيه نفسي كل الأفكار السودة بقت تتوغل في راسي مبقتش قادر أقاومها مبقتش قادر أسكت الشيطان اللي بيوسوسلي مبقتش قادر أمنعه انه يبطل والله ما بقيت قادر.
_ يارب أنا مبقتش قادر أستحمل وجودي هنا ، الدنيا بقت جاية عليا أوي ، وجود سليم كان قادر يخليني أستحمل أي حاجة ، بس هو مبقاش موجود قلبي بقى مليان ندوب وموجوع أوي من غيره، سامحني يارب سامحني بس والله ما بقيت قادر.
_ أستنى أنت بتعمل إيه ؟ هو ده يونس اللي أعرفه ؟ اللي بيقابل كل حاجة بتفائل.
_ إنت..إنت.. إزاي..إنت عايش إزاي! قولي إني مش بحلم قولي إن ده حقيقة مش مجرد حلم!
_ أنا موجود دايما حواليك يا يونس بس إنت اللي مش شايف دا أنا عمري ما فارقتك لحظة أنا موجود جواك وقت ما هتحتاجني هتلاقيني جنبك.
_ يا ماما سليم عايش يا ماما.
_ في إيه يا حبيبي بتنادي ليه؟
_ ماما سليم لسه عايش.
_ عايش! فين ده يا بني!
_ أهو يا ماما!
_ ما تحولش لأن ماحدش هيشوفني غيرك أنت ،أنت وبس.
_ وبعدين؟
_ هو أنا مجنون يا دكتور زي ما بيقولوا؟
_ مين اللي بيقول؟
_ الناس ، بسمعهم ، بسمع كلامهم اللي قادر يقتلني! إني مجنون وبشوف تهيؤات مجرد تهيؤات سخيفة من عقلي الباطن بس ماحدش مصدقني ماحدش راضي يصدقني!
_ وأنت يهمك كلام الناس؟
_ مش عارف بس بشوف حزن كبير أوي في عيون أمي بسببهم بسبب كلامهم المسموم أني ضعت من إيدها خلاص وبقيت مجنون ، أنت مصدقني يا دكتور؟ مصدقني أني بشوفه وإني مش مجنون؟
_ أنا هنا علشان أصدقك.
_ أخيرا جيت اتأخرت ليه أنا مستنيك من بدري أوي ومجهز التسالي عشان نسهر مع بعض زي أيام زمان ، فاكر ؟
_ فاكر كانت احلى أيام.
_ شكراً لأنك هنا.
_ دايماً هكون موجود علشانك.
_ يونس أنت بتتكلم مع نفسك تاني!
_ ماما!
_ أنت لازم تروح للدكتور وتفوق بقى لحياتك أنا مش هفضل موجوده دايماً.
_ أنا مش مجنون يا ماما أنا مش مجنون ليه مش قادرة تصدقيني إني بقول الحقيقة!
_ أنت مش مجنون يا حبيبي انت أعقل واحد في الدنيا بس إنت محتاج تروح للدكتور لأنك تعبان مش أكثر .
_ ماما!
_ علشان خاطري ريحني يا إبني ريح قلبي بقى اللي بيتقطع عليك!
_ حاضر يا ماما حاضر.
_ مالك قالب وشك كده؟
_ ماليش.
_ عليا أنا الكلام دا.
_ مفيش بجد يا سليم.
_ انا أكثر حد فاهمك يا يونس فقول ولخص وأنا هجيب حقك من اللي مزعلك.
_ يا عم أتنيل هو حد بيشوفك أصلاً غيري!
_ تصدق نسيت ، بس يلا قول بسرعه إيه اللي مزعلك وبلاش تحوير علشان أنا أكثر حد عارفك كويس يا يونس هاا؟
_ مفيش إترفدت بس.
_ يا بجاحتك يا شيخ ، بقى الزعل ده كله وقالب بوزك علينا علشان بس إترفدت على اساس يعني إن دي اول مرة مثلاً.
_ اممم تقريبا المرة دي الرابعة؟
_ يمكن المرة الخامسة تتعدل معاك وما تترفدش خليك يا عم متفائل.
_ أكثر من كده تفائل؟
_ يعني سليم بيظهر ليك لما الدنيا تضيق بيك أوي صح؟
_ مش عارف بس هو بييجي في الوقت اللي بحتاج فيه لوجوده تقريباً.
_ امم إيه رايك تحاول لمدة أسبوع على قد ما تقدر انك ما تحتاجش لوجوده وتكون بخير من غيره؟
_ مش عارف مش عارف.
_ نحاول علشان والدتك ينفع؟
_ هحاول بس موعدكش؟
_ ويكفيني محاولتك.
أسبوع كامل مبقتش أشوفه حاسس إني تايه من غيره نفس الأفكار السودة بقت تيجي في عقلي إني أتخلص من نفسي! وجوده كان ليه تأثير غريب عليا أوي كان قادر يخليني أحب الدنيا واتفائل حتى لو كل حاجة متشقلبة وحياتي مليانة مشاكل بس كنت بحس بسعادة لوجوده جنبي انا مبقتش قادر مبقتش قادر.
_دكتور انا مبقتش أشوف سليم مبقاش يظهر ليا حتى بعد ما بقيت بحتاجه مبقاش يظهر ؟ قولي إزاي أخليه يرجع تاني؟ أنا..محتاجة ..محتاج لوجوده جنبي ..ساعدني أرجوك يا دكتور.
_ أسف يا يونس بس سليم عمره ما كان موجود سليم مات وانت لازم تصدق ده ده مجرد وهم في خيالك إنت ،إنت وبس.
_ إنت بتقول إيه سليم .. أنا .. بشوفه .. أو كنت بشوفه .. كله بسببك بسببك إنت مبقتش أشوفه بسبب إني سمعت كلامك السخيف خليته يبعد عني تاني .
_ يونس لازم تفهم بقى إن سليم اللي كان بيظهرلك ده كان من عقلك الباطن اللي بيوحيلك إن سليم لسه موجود لكن هتفضل الحقيقة الوحيدة اللي لازم تصدقها إن سليم مات من سنتين في حادثة عربية والسبب انه كان بيحاول ينقذك منها و بسبب إحساسك بالذنب بقيت بتدمر حياتك بالبطئ على شئ انت ملكش ذنب فيه.
_انا..انت…
_تيجي نعمل سباق مع بعض ونشوف مين هيوصل البيت الأول؟
_ يونس بلاش جنان أنا عاوز أرجع البيت سليم يا بابا.
_ خواف من يومك
_ أنا هوريك الخواف ده هيغلبك إزاي.
_ لما نشوف، إنت أصلا بوء على الفاضي.
_ ماشي أنا هوريك يلا نبدأ ١ ،٢ ،٣.
_ يونس خلي بالك في عربية جاية قدامك بص قدامك بسرعه.
_ امم عاوز تخليني اوقف وكده عشان تغلبني ده بعدك.
_ حااسب!
_ سليم سليم لاا
_ أنت اللي قت..لته هو مكانش عاوز يلعب بس انت اللي اجبرته بسبب غبائك و اهمالك هو اللي مات بسببك إنت مات انت شيطان لازم تموت.
الصوت لسه بسمعه بيتردد في وداني من يوم ما غاب سليم وجوده كان قادر يوقف الصوت انا مبقتش قادر استحمله.
_ أنا السبب أنا اللي قت..لته المفروض أنا اللي أكون مكانه المفروض انا اللي مُت مش هو؟ اسكت ، اسكت مش عاوز اسمع صوتك أبعد عني بقى حرام عليك.
_ أقدر اقول انك خلاص
بقيت كويس يا يونس وان دي آخر مقابلة لينا ان شاء الله بيني وبينك كدكتور ومريضة لكن احنا هنفضل صحاب!
_ أكيد يا دكتور وشكرا ليك وحقيقي انا ممتن لحضرتك اني بقيت أخيرا بخير.
_ العفو المهم انك بقيت بخير .
كنت قاعد في ركني المفضل قدام البحر والهوا كان لطيف بشكل!
حسيت بحد بيقعد جنبي ببص لقيته!
_ كل ده تأخير إنت عارف أنا استنيتك قد إيه؟
_ مكنوش ساعتين اللي اتأخرتهم يا عم أنت!
_ يا برودك يا أخي.
_ من بعض ما عندكم.
سكتنا لدقايق واحنا بنشوف ألطف منظر انا هو بنحبه وهو البحر.
_ شكراً لأنك دايماً موجود.
_ انا وعدتك اني هفضل دايماً جنبك طول ما أنت محتاجني.
_عارف؟
_ حابب أعرف.
_ الكل فاهم اني كنت مجنون لأني بشوفك لكن ماحدش راضي يفهم إني بشوفك بقلبي ذكرياتك لسه بتحوم حوليا جايز تكون مُت بالنسبالهم لكنك لسه عايش بالنسبالي ، لسه عايش جوايا ، عايش هنا♡
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية من وراء الكواليس)
تعليق واحد