رواية متعة الحياة الفصل الأول 1 بقلم عادل عبدالله

رواية متعة الحياة البارت الأول

رواية متعة الحياة الجزء الأول

رواية متعة الحياة الحلقة الأولى

رجعت من الشغل وانا متضايق ومش عاوز ادخل البيت .
قعدت علي القهوة وطلبت شاي وطلعت سيجارة انفخ مع دخانها الهم والضيق اللي انا حاسس به .
شوية ولقيت ايوب صاحبي ماشي وبيسلم عليا .
ناديت عليه يقعد معايا افضفض معاه شوية يمكن اخفف من الهم اللي علي قلبي .
اول ما ايوب قعد قالي : مالك يا طارق شكلك مخنوق و متضايق اوي ؟
: اعمل ايه طيب يا ايوب !! مش عارف الواحد حظه كده ليه في الدنيا ؟!!
: يا عم طارق قول الحمد لله انت احسن من غيرك كتير .
: يا صحبي احسن من غيري في ايه بس انا مش عارف !! متجوز ومعايا زوجة ما يعلم بيها الا ربنا كل يوم خناق ومشاكل ومش بتبطل نكد ، كل ما تشوفني هات فلوس ..هات فلوس ، بقيت بهرب منها ومش عاوز اشوفها ولا اشوف البيت .
: معلش يا طارق كفاية اولادك ربنا يخلهوملك ، الضحكة من العيل في وشك بالدنيا كلها .
: عيال ايه يا عم ايوب !! العيال اللي مش عارف اصرف عليهم ولا اعلمهم كويس زي الناس ومطلعهم في عيشة كلها فقر !! بكره لما يكبروا هيلعنوني ويلعنوا اليوم اللي نزلوا فيه الدنيا .
: مالك يا طارق مسودها اوي كده ليه ؟ !! عيالك ما شاء الله متفوقين في دراستهم وابنك الكبير اهو في ثانوية عامة ومن الاوائل وبكره يبقي دكتور ولا مهندس ويفرح قلبك و البنت والولد الصغير في اعدادي ومتفوقين وبكره يحصلوا اخوهم وتشوفهم حاجة تفرح و تنسي كل تعب السنين .
: انت يا أيوب مش عارف اي حاجة !! ابني اللي في ثانوية عامة ده انا مش عارف ادخله دروس زي زمايله علشان يجيب مجموع كويس هيدخل طب ولا هندسة ازاي ؟!! وحتي لو جاب مجموع الكلية هصرف عليه في الكلية منين ؟! والاتنين اللي بعده مش عارف اجيب للعيل فيهم كتاب ولا ادفعله فلوس الدروس !!
: يعني انت كل مشاكلك في الفلوس وبس يا طارق ؟
: طبعا كل مشاكلي في الفلوس ، وهو في مشاكل تانية غير الفلوس ؟!!
: مش يمكن قلة الفلوس معاك نعمة انت مش حاسس بيها ؟
: انت مجنون يا ايوب. !! قلة الفلوس تبقي نعمة ازاي ؟؟ دي الفلوس اكبر نعمة في الدنيا !!
: يا صحبي الفلوس ممكن تبقي نعمة علي ناس وتبقي قلتها اكبر نعمة علي ناس تانية ، عموما ربنا يرزقك يا طارق ويوسع رزقك ويبقي معاك فلوس كتير زي ما انت عايز .
: وهتجيلي الفلوس الكتير منين بقي يا صاحبي ؟
: ربك لما يريد يا طرووق . يمكن تتنقل لشغل تاني بمرتب كبير او تورث ورث كبير .كل شيئ جايز .
: انا هلاقي شغل بمرتب كبير ازاي في السن ده !! انا عمري عدا الاربعين سنة ؟!! ولا هورث من مين يا حسرة ؟ ابويا مات وكان فقير ومفيش اخوات الا اختي اللي ماتت من سنتين وكانت فقيرة ومفيش اعمام ولا عمات لأن ابويا كان وحيد حتي جدي كمان كان فقير ومش لاقي ياكل بعد ما اخوه الوحيد نصب عليه وخد ورثهم كله لوحده . عيلة وارثة الفقر ابا عن جد !!!!!
: ياااه ده انت شايل اوي في قلبك يا جدع !! احمد ربك ، دا في ناس كتير بتحسدك علي حياتك اللي مش عجباك دي .
: هيحسدوني انا ؟؟ علي ايه ؟!! علي الفقر وقلة الحيلة ولا علي عيالي اللي مش عارف اصرف عليهم ولا مراتي اللي انا مش مكفي طلباتها و بتنكد عليا ليل ونهار !!
: لا يا طارق بيحسدوك علي استقرار حياتك مع زوجة محترمة وبنت ناس وكمان ربنا رزقك من الولاد والبنات ومتفوقين وعندك صحة ماشاء الله وفوق كل ده انت انسان محترم واخلاقك كويسة والناس كلها بتحترمك وبتقدرك ، مش باقي لك الا انك ترضي باللي ربنا قسمه لك وتجتهد علي قد ما تقدر .
: ده كلام قصص وافلام يا ايوب انا بكلمك وافضفض معاك علشان اخفف الحمل عن نفسي شوية ، بلاش بقي تضحك عليا بكلام ميأكلش عيش في الزمن ده علشان تصبرني .
: طيب قولي يا طارق لو معاك فلوس كتير هتعمل ايه ؟
: ياااه ، اول حاجة هجيب شقة حلوة بدل الشقة الصغيرة اللي قاعد فيها وبعدين اطلع احج او اعمل عمرة علشان أبدأ حياة جديدة علي نضافة ، واعمل لمراتي مصروف كبير للبيت واجيب لعيالي كل اللي نفسهم فيه و اجيبلهم مدرسين خصوصي في البيت لكل المواد واكمل تعليمهم لحد ما يبقوا دكاترة ومهندسين .
: بس كده يا طارق ؟
: لو فلوس كتير اوي بقي هبني جامع واشتري عربية غالية واعمل مشروع يكون بيكسب كويس اعيش منه بدل مصنع البلاستيك اللي انا شغال فيه ، وكل سنة اخد مراتي والعيال واسافر شهر نغير جو ونشوف الدنيا .
: ربنا يرزقك وتحقق احلامك يا صحبي .
: بص انا قايم اروح اكل وانام يمكن ارتاح من الهم اللي انا فيه .
قومنا من علي القهوة وسيبته وروحت البيت ، اول لما دخلت شوفت منظر مراتي والكأبة علي وشها استغفرت ربنا وقولتلها هاتيلي اتغدا في اوضتي علشان عاوز اكل وانام .
راحت من غير ولا كلمة وبوزها شبرين جابت صنية الاكل عليها رغيفين عيش وشوية بطاطس محمرة .
قولتلها : هو فين الغدا ؟
قالتلي : ما هو قدامك اهو .
: هتغدا بطاطس محمرة بس ؟
: ابعت اجيبلك فول ؟
: لا خلاص . انا زهقت من الفول .
: طيب تحب ابعت اجيبلك كباب وكفتة ولا جمبري وسبيط ؟
بصيت لها وانا عارف انها بتتريق و قولتلها : طيب اعمليلي كوباية شاي .
وقعدت أكل وانا مخنوق ، شوية ودخل زياد ابني الصغير يوريني درجته في الامتحان ، كان جايب الدرجة النهائية ! قولتله ماشاء الله يا زيزو شاطر يا حبيبي انت كمان عاوز تدخل كلية طب وتبقي دكتور ؟؟ قالي : لا يا بابا انا عاوز ابقي مهندس ، هادي اخويا اللي عاوز يبقي دكتور .
ضحكت وقولتله مش هتفرق كتير دي عاوزة فلوس كتير والتانية زيها بالظبط . روح يا حبيبي ربنا يوفقكم .
بعد الاكل وانا بشرب الشاي دخلت ميادة بنتي الوسطانية بتوريني درجتها في الامتحان ، ماشاء الله بردو جايبة الدرجة النهائية قولتلها شاطرة يا ميودة يا حبيبتي ربنا يوفقك .
قالتلي هات يابابا فلوس الدرس علشان المستر قالي لو مش اخد فلوس الدرس الحصة الجاية مش هيخليني احضر الدرس !!
قولتلها حاضر الصبح ان شاء الله هسيب فلوس الدرس مع ماما قبل ما اروح الشغل .
خرجت البنت وبصيت في جيبي لقيت الفلوس اللي معايا يدوب علي قد الدرس .
نمت وانا متضايق وانا بدعي من جوايا ان ربنا يفرجها عليا لأني بجد تعبت .
صحيت الصبح واعطيت مراتي فلوس درس ميادة ونزلت روحت الشغل وانا بفكر ازاي اطلب سلفة من مديري في الشغل علشان اقدر اكمل الشهر .