رواية للحب طرق أخرى الفصل الرابع 4 بقلم شيماء سعيد

رواية للحب طرق أخرى الجزء الرابع

رواية للحب طرق أخرى البارت الرابع

رواية للحب طرق أخرى الحلقة الرابعة

اه يا زين لو طلعت انت فعلا اللى عملت فيه كده ، ساعتها مش هرحمك وهخليك تندم على اليوم اللى اتولدت فيه .
قالت الكلام ده شروق وهى بتفكر فى الخطة اللى هتعملها على جوز صاحبتها زين بعد ما اتأكدت أن خلاص حماها مش هو السبب فى الحمل وأنها شاكة اكتر فى جوز صاحبتها عن المندوب وقالت تبدء بيه الأول .
وبالفعل بعتتله رسالة على الواتس بتقول فيها
( مش عارفة إزاى طوعت نفسى ودخلت أكلمك يا زين بس حسيت فجأة انى محتاجة أكلمك وأطمن عليك وأعتذرلك عن أسلوبى معاك بس عشان عاملة خاطر لصاحبة عمرى ، فمتزعلش منى ) .
شاف زين الرسالة وضيق عينيه باستغراب لدرجة أنه قرئها اكتر من مرة ومش مصدق أنها من شروق حبيبة القلب اللى غلبته سنين وراها وعمرها ما حنت ليه بكلمة .
فكلم زين نفسه ( معقول يا شروق اللى انا شايفه ده !
معقول بتتطمنى عليه وتكلمينى وبتعتذرى كمان ، انا مش مصدق نفسى وحاسس زى ما يكون بحلم ، ومش فاهم ده ايه ، بداية محبة ولا إحساس بالذنب ناحيتى ، بس مش مهم المهم انها أخيرا عطتنى ريق حلو ، لما أرد عليها بقا ، فكتب وقال
( شروق معقول أنتِ اللى بعتى الرسالة دى وبتكلمينى انا ، متصوريش فرحت قد ايه ، وبتعتذرى عن ايه بس .
انا عمرى ما زعلت منك ، ما أنتِ عارفة مكانتك فى قلبى قد ايه .
وأنتِ تكلمينى اى وقت وميهمكيش حد ، المهم أنتِ عندى يا شروق ) .
شافت شروق رسالته وابتسمت لنجاح خطتها وردت عليه وقالت ( انا عارفة يا زين وخلاص مبقتش قادرة أمثل انك مش بتهمنى ، لانى خلاص حسيت فى الفترة الأخيرة دى قد ايه انا محتجالك ، ومحتاجة اشوفك ضرورى )
قرء زين الرسالة وقلبه بيرقص من الفرحة ومش قادر يسيطر على مشاعره وقعد يكلم نفسه ويقول ( معقول شروق بتحبنى زى ما بحبها ، انا قلبى هيوقف من الفرحة والله ، ده أسعد يوم فى حياتى وكتبت ليها بسرعة
(يااااه يا قلب زين ، اخيرا حسيتى بيه وبحبى ، ده انا اللى محتاجلك اوى يا نبض قلبى ، ونفسى أشوفك حالا ، بصى انا هسيب الشغل حالا واقابلك فى كافيه السلاملك ماشى .
شروق …هكون فى انتظارك.
جرى زين على المكان وهو فى قمة سعادته وحس أن خلاص جه اليوم اللى هيحقق فيه حلمه اخيرا من أنه يرتبط بحب عمره ونسى فى اللحظة دى مراته وعياله ومفتكرش غير نفسه وبس .
وشروق جهزت نفسها على أكمل وجه ورسمت على وشها ابتسامة شيطانية ونزلت وهى متوعدة زين .
أتقابل الاتنين فى الكافيه وحاول زين يلمس ايديها بشوق ولهفة لكن هى بعدتها بسرعة وقالت : وبعدين معاك ادينى فرصة حتى الأول اكلم .
زين بحب : مفيش وقت الكلام ، احنا ضيعنا من عمرنا سنين يا شروق ، ومصدقت انك اخيرا حسيتى بيه وحبتينى زى ما بحبك .
انا من فرحتى مستعد أكتب عليكى دلوقتى يا روح قلبي.
اتنفست شروق بهدوء وقالت : تجوزنى ،طيب وسمية صاحبة عمرى ، هتقول عليه ايه ، سرقت جوزها .
دى أخرة العشرة برده .
زين : شروق أرجوكى بطلة تفكرى فى سمية ، وخلينا نعيش لنفسنا شوية وكفاية العمر اللى ضاع من بين أيدينا .
ويا ستى متخافيش عليها انا برده مش هظلمها عشان خاطر الولاد .
المهم انا وأنتِ دلوقتى .
بصتله شروق بنظره كره وقالت فى نفسها ( واطى يا زين طول عمرك ).
وكلمته وقالت ( يعنى بتحبنى اوى كده يا زين )
زين : ياااه لسه بتسئلى يا حبيبتى ، ده انا فتحت عيونى على حبك وكان نفسى اكون انا جوزك لكن للأسف خالد سرقك منى واتجوزت سمية مخصوص عشان اكون جانبك واشوفك عن طريقها ديما .
شروق بمكر …وانا موافقة على الجواز عشان ابنك اللى فى بطنى يا زين ، يخرج للنور وهو بين اب وام ومحدش يقول عليه ابن حرام .
اتصدم زين من اللى سمعه واتهز جسمه وطلع الكلام منه مهزوز وبيقطع زى طفل صغير لسه بيتعلم الكلام : ابنى اللى فى بطنك .
أنتِ بتهزرى صح يا شروق مش كده !
بس هزار بايخ لانك عارفة انك عمرى ما ادتتينى ريق حلو عشان حتى أعبر ليكى عن مشاعرى، مش توصل انى أقرب منك .
ده امتى وإزاى ؟
شروق بإنفعال : ايه يا زين مش عارف ولا عامل نفسك عبيط .
فى اليوم اللى حضرتك دخلت عليه وانا نايمة عندكم وصحيت على صوت حاجة بتوقع ولقيتك قصادى .
اكيد شممتنى حاجة وعملت عملتك وقومت لكن صوت الحاجة اللى وقعت فوقتنى وقومت عشان أشوفك واعرف عملتك السودة اللى نتج عنها انى حاااامل يا استاذ يا محترم .
فوقف زين وقال بعصبية …انتِ عايزة تلبسينى مصيبة يا شروق ولا ايه !
انا أصلا مكنتش أعرف انك بايتة وكنت داخل اطمن على ولادى واشوفهم لما رجعت بدرى من مأمورية الشغل اللى كنت فيها ويدوبك دخلت اتكعبلت فوقعت الفازة ، اتفجئت بيكى وربنا شاهد على الكلام اللى بقوله ده .
شروق بعصبية ..كداااب ، انت ندل وحقير.
زين : اناااا , يعنى افهم من كده انك عملة تمثلية الحب دى عليه ، عشان ألبس فى العيل اللى شوفى نفسك جبتيه منين ؟
لااا يا حب ، انا بحبك اه لكن مش درجة اكون دلدول واغطى على غلط غيرى يا ماما ، فوقى لنفسك .
وعلى كده خلاص انسى الكلام اللى قولته وانا راجع لمراتى الطاهرة الشريفة أحسن وبلا حب بلا وجع قلب .
فوقفت شروق ومسكته من قميصه وقالت بعصبية …عايزنى اصدقك تعمل تحليل Dna .
زين بثقة …ومالو أعمله عشان تريحى نفوخك منى خالص .
وبالفعل عمل التحليل وبعد ظهور نتيجته اللى أثبتت أنه مش هو اللى عمل كده .
وساعتها زين بصلها نظرة عتاب وقال : يا خسارة حب السنين يا شروق .
خدعتينى واتخدعت فيكى للأسف .
ومشى زين وبكت شروق بمرارة وكلمت نفسها : يعنى ايه كده ، امال اللى بطنى ده ابن مين ؟
وفجأة قالت : يبقى مفيش غيره المندوب .
ده انا هطين عشته وهفضحه عشان محدش يشغله تانى عنده .
ونست شروق ان بإنفعالها ده هتكون سبب فى فضيحتها هى الأول لأن للأسف فى مجتمعنا الشرقى الملام الاول هى الست لكن الراجل يفعل ما يشاء تحت مسمى أنه رجل وينسون أننا أمام الله سواء .
جريت شروق على محل صديقتها خديجة اللى لما شافتها قامت جريت عليها ورحبت بيها وقالت : ده ايه النور ده .
معقول القمر ده زرنى النهاردة !
لكن خديجة اتفاجئت بدموع شروق اللى صرخت وقالت : فين الزفت المندوب بتاعك يا خديجة ؟
خديجة بإندهاش : ماله يا شروق ومالك فيه ايه ، حصل ايه ؟
بتعيطى ليه كده ؟
انهارت شروق وحكت ليها بالتفصيل كل اللى حصل .
فبكت خديجة لبكاؤها وقالت : لا حول ولا قوة الا بالله.
ازاى ده ، منه لله اللى عمل كده .
بس حسين ( المندوب ) ميعملهاش وميقدرش أصلا يعملها .
شروق …ازاى ده ، مش راجل زى اى راجل ؟
خديجة : لا بس ان شاء الله يكون راجل بعد العملية اللى هيعملها قريب إن شاء الله.
شروق : انا مش فاهمة حاجة.
خديجة : حسين ده ابن عمتى يا شروق ، وهو لما اتولد قالوا بنت وعاش سنين طويلة على كده ، لكن لما كبر ومظهرتش عليها صفات البنت والبلوغ .
خدته عمتى وكشفت وعملت أشعة فظهر أنه ولد واتصنف غلط وأنه محتاج عمليه كبيرة عشان يكون راجل بجد وعلاج لفترة كبيرة عشان يزود عنده هرومانات الذكورة.
ومع العلاج اتغير فعلا شكله لراجل زى اى راجل لكن لسه العملية عشان يقدر يعيش حياته ويتجوز.
فهمتى ؟
فضربت شروق على صدرها مرددة : لا حول ولا قوة الا بالله.
يعنى طلع مش هو !
امال مين ، مين مين ؟
انا قربت أتجنن .
……..
فى مكالمة تليفونية بين اتنين
الطرف الأول : ايه الأخبار ابنى اخيرا هيشرف للنور بعد سنين الحرمان دى كلها .
الطرف التانى : اه بس ربنا يستر ويكمل الحمل ، لانى كنت فاكر أنها متجوزة بعد طلعت أرملة وممكن تتخلص من الحمل فى اى وقت
؟؟؟؟؟؟؟
يارب تكون عجبتكم حلقة اليوم ومتنسوش الصلاة على النبي محمد
وياريت الاقى تفاعل وتقدير لمجهودى ؟.
ويا ترى مين السبب فى حمل شروق بعد ما اتأكدنا أن التلاتة اللى شكت فيهم مظلومين ؟
ويا ترى مين اللى بيكلم فى التليفون .