رواية كيد النساء وقهر الرجال الفصل الثامن 8 بقلم منى محمود

رواية كيد النساء وقهر الرجال الجزء الثامن

رواية كيد النساء وقهر الرجال البارت الثامن

رواية كيد النساء وقهر الرجال الحلقة الثامنة

لا تبالغوا بالحب
ولا تبالغوا بالاهتمام والاشتياق
فخلف كل مبالغه صفعه خذلان
جبران خليل جبران
❈-❈-❈
بعد مرور خمس أيام حصل فيهم حاجات كتير ..
امير كان في بيت نوال بعد ما منار واهلها اتنازلو عن المحضر مقابل شروط كتير اضطر امير أنه يوافق عليها كلها وكان الوسيط بين امير وأهل منار هو شريف ال قطع إجازتة ونزل اول ما عرف اللي حصل لاخوة
نوال بحزن :
_ ايه يا حبيبي هتفضل حابس نفسك كدة في الاوضه
امير بصوت مخنوق :
_ معلش يا ماما عايز افضل لوحدي شويه لو سمحتي
نوال :
_ واخرة ما اسيبك لوحدك يعني لا يا أمير مش هخرج وبعدين انا عايزة اعرف انت هترجع شغلك امتي ؟
امير ضحك بوجع :
_ هه شغلي وانتي متخيلة اني هقدر ارجع الشغل تاني بعد اللي حصلي انا خلاص حياتي انتهت كدة حتي بنتي انحرمت منها
نوال بقوة :
_ بقولك ايه انا مبحبش اسمع الكلام دا انا مخلفه رجاله شديدة عفيه مفيش حاجة تقدر تكسرهم ولا تهدهم انت تقوم دلوقتي حالا تدخل كدة تاخد شاور وتحلق دقنك دي ع ما تخلص هيكون شريف وجودي جم عشان بيقولو أنهم عايزينك
امير :
_ عايزين اي انا مش قادر اقابل حد يا ماما
قاطعتة نوال :
_ دول مش حدول اخواتك يا امير يلا قوم اعمل ال طلبته منك متزعلنيش بقا عشان خاطري يا حبيبي يلا
هز امير رأسه وقام عمل كل اللي نوال طلبته منه وخرج الصاله لاقي شريف وجودي قاعدين منتظرينه
❈-❈-❈
شريف وهو بيحضنة :
_ ازيك يا حبيبي عامل ايه
امير بصوت ضعيف :
_ الحمد لله
جودي اكتفت أنها ابتسمت ل امير ومتكلمتش كانت عارفه أنها لو اتكلمت كلمة واحدة هتعيط هتنهار نت العياط وتترمي في حضنة وهي مفروض تكون دلوقتي داعم له تسندة مش تحسسه بضعفه
قعد امير وسطهم ومستني يعرف هما عايزين ايه
شريف :
_ طبعا ماما عرفتك أننا عايزين نتكلم معاك
امير :
_ اه قالتلي خير ؟ ف حاجة تاني حصلت انا معرفهاش ؟
شريف :
_ انت عارف ايه هي الشروط ال طلبوها عشان يتنازلو عن المحضر والطلاق يتم بهدوء وبدون محاكم ؟
امير بتذكر :
_ ا اه اه فاكر انك قلتلي أن اكتبلها الشقه باسمها وتاخدها باللي فيها كله دا غير أن أدفع المؤخر كامل ونفقه للبنت شهريا قابلة للزيادة ورؤيه ل بنتي مرة كل شهر ساعه واحدة في المكان اللي هما يحددوه وكل دا كان في عقود قانونيه وانا مضيت عليها قبل ما اخرج صح كدة ؟
شريف :
_ اه زيادة عليهم انهم لهفو كاش وقتها عشر الاف جنيه قال ايه مصاريف مستشفي وعلاج ل بنتهم .. مش مهم ال
قاطعه امير :
_ عشر الاف علاج !! مين دفعهم ؟ ومحدش قالي ليه ؟
شريف :
_ عشان مكنش وقتها في حاجة اهم من خروجك من الحبس يا أمير
امير بإصرار ؛
_ مين دفعهم ؟
شريف :
_ ما علينا بقا انا مش بقولك عشان تقولي مين دفعهم أنا بعرفك كل تفاصيل ال حصلت في الموضوع عشان اقولك ع اللي جاي اصلا عشانة
امير :
_ هتقول وهسمعك بس اعرف مين دفعهم ؟ ( بص ل جودي ) جلال ال دفعهم مش كدة ؟
شريف بدهشه :
_ جلال !! يعني كل ال جة في دماغك أن جلال اللي دفع ؟ وانا مجتش ف بالك خالص ؟ هو مين تقربلك عشان يقفلك ف حاجة زي كدة ؟
امير بحرج:
_ مش قصدي اكيد يا شريف بس يعني ا يعني بصراحة العلاقه بينا مش كدة
شريف :
_ مش كدة ال هو ايه يا امير فهمني
جودي اخيرا نطقت :
_ هو مش قصده حاجة يا شريف بس انت كنت ف إجازة وكدة وممكن ميكنش كان معاك المبلغ دا كاش يعني دا قصدة صح يا أمير ؟
شريف بحزن :
_ لا مش دا قصدة يا جودي
امير بتعب :
_ شريف الله يخليك انا مش حمل عتاب دلوقتي انا كل قصدي اني متخيلتش انك تدفعلي مبلغ كدة وانت مسافر واكيد صرفت كتير ف السفريه بس مش اكتر
شريف قام وقف وشد امير وقفه وخدة في حضنة جامد اوي واتكلم بصوت مخنوق
_ انت بتقول ايه … انت متعرفش انت عندي ايه هه انت اخويا يا امير انت اول حضن يضمني ويسندني من بعد ما ابونا مات فداك الفلوس فداك اي حاجة يا حبيبي المهم انك وسطنا ومعانا
جودي قربت منهم :
_ ايه دا وأنا مليش من الحب جانب ولا ايه
ضمها امير بايد وشريف بايد ودموعه نازله
شريف بعد ومسح دموعه :
_ بقولك ايه كفايه نكد بقا احنا عايزينك في حاجة اهم من كل دا
امير :
_ حاجة ايه ؟
جودي ببتسامة :
_ المشروع بتاعي
امير باستغراب :
_ ماله ؟ مش قلتي هتأجليه عشان العمليه ؟
جودي :
_ اه قلت بس علي اساس اني كنت هكون فيه لوحدي لكن دلوقتي انا معايا شركاء يبقي يبدؤ هما كل الشغل الإداري والحسابات وانا اكمل معاهم لما اعمل العمليه أن شاء الله
امير :
_ شركاء مين ؟ مش جلال قال إنه هيساعدك فيه وهتعمليه لوحدك لانه حلم عمرك ؟ هو في ايه أنا مش فاهم حاجة ؟
شريف :
_ انا وانت الشركاء يا سيدي انا بجزء من الفلوس وانت بالمجهود والإدارة كلها عليك حسابات وإداريات هتشيل الليله كلها يعني ها ايه رايك
كملت جودي بسعادة :
_ انا مفروض عجلت ب معاد العمليه هيبقي كمان خمس ايام الفتره اللي هكون ممنوعه فيها من الحركة دي اللي انت وشريف هتدورو فيها علي المكان وتخلصو فيه وتبدؤ اجراءاته القانونيه والعماله والديكور والكلام دا كله وان شاء الله ع معاد الافتتاح اكون بقيت معاكم ايه رايك في المفاجأة التحفه دي ؟
امير بدهشه :
_ ايه اللي بتقولو دا مشروع اي ال نتشارك فيه دا مشروعك يا جودي حلمك وبعدين يا شريف انت لسه دفعلي مبلغ اد كدة غير فلوس المحامي فلوس ايه ال تشارك بيها في حاجة لا مجالك ولا عمرك فكرت فيها … ( خد نفس وكمل ) انا فاهم انكم عايزين تساعدوني لانكم واثقين اني مش هرجع شغلي تاني بعد اللي حصل … بس مش بالطريقه دي انا مش موافق لا طبعا
جودي كشرت :
_ ليه بس يا أمير ؟ احنا ظبطنا كل حاجة مع بعض المشروع دا هيقربنا من بعض احنا التلاته تاني انا محتاجكم جمبي
امير بعدم اقتناع :
_ احنا جمبك من غير حاجة وقلتلك من الاول انا هقف معاكي فيه ولو ع الشغل انا هنزل وهدور علي شغل متقلقوش عليا انا تمام
شريف بتفكير :
_ طيب ما نكبر المشروع بحيث يكون مشروعنا فعلا كلنا مش حلم جودي وبس
جودي :
_ ازاي يا شريف ؟
شريف بحماس :
_ يعني امير مشكلتة أنه مشروعك وحلمك احنا بقا نكبره ويبقي بدل ما هو محل حلويات كبير كافيه كبير في مكان مميز بيقدم مشروبات بارده وسخن و حلويات شرقيه وغربية وسناكس ويكون في مثلا جزء منه انترنت كافيه وجزء عائلات وجزء مرح كدة مجنون للأصدقاء بصو انا الفكرة لسه بظبطها في دماغي بس فعلا هيكون مشروع كبير ويكون مشروعنا كلنا يا امير ها كدة ملكش حجة بقا
امير بص ل جودي وقبل ما يتكلم قالت هي ببتسامة :
_ انا موافقه جدا جدا جدا مشروع كبير مع اخواتي حبايبي هحتاج ايه تاني بس
امير :
_ طيب سبوني اعمل دراسه جدوى واشوف نصيب كل واحد ف الفلوس ايه
شريف بجديه :
_ بص يا امير هتكلم معاك بلغه البيزنس مان طالما لغه الاخوات مش نافعه معاك تمام .. دا بيزنس كبير كافيه متقسم لكزا جزء اكل وشرب وعماله ودعايه وموردين وليله كبيرة كل ال يخص جودي فيها المطبخ والي يخصني متابعه ومشاركة ب نسبه مقابل نسبه من الأرباح لكن تلت اربع الشغل كله هيكون عليك انت لوحدك ف متنشفش دماغك دي معانا لأن حقيقي انا متحمس بس مش هعرف اعمل اي حاجه وياسيدي ليك عليا بعد شويه وقت لو كنت مساعد معاكم في اي مجهود نبقي نقعد مع بعض تاني ونغير بنود العقد بينا ها ايه رايك كدة ؟
جودي بحنان :
_ امير .. انا عارفه انت بتفكر في ايه بس يا حبيبي انت لازم توقف تفكير في اللي حصل وازاي ولية وانا عملت ايه وأثبت حقي ازاي و و و الحرب اللي جوة دماغك دي لازم تقف مبقلش تسيب حقك ولا تسيب بنتك مع ناس زي دول بس طول ما انت حاسس بالضعف كدة مش هتقدر لا ترجع حقك ولا ترجع بنتك يا حبيبي لازم تقف ع رجلك لازم تقوي وتنجح و دماغك تشتغل من تاني بس وانت قوي وقتها أن شاء الله هنلاقي اكتر من طريقه عشان نرجع حقك وبنتك لينا تاني صدقني
شريف ابتسم :
_ ايه دا البت دي كبرت كدة امتي !
امير بحب :
_ طول عمرها كبيرة وواخده حنيه ماما وعقل بابا كمان
نوال :
_ مؤتمر القمة دا خلص ولا ايه ؟ البطة هتبرد
شريف :
_ انتي اي تجمع تعملي بط يا ماما الفراخ قصرت معاكي في حاجة
نوال :
_ امير بيحب البط وبعدين في ورك فرخة بقالو يومين جوة مش عايز بط ادخل هاته من التلاجة متقرفناش
شريف بصدمة :
_ مقرفكوش !! و ورك فرخة ف التلاجة بقالو يومين !! اي يا حبيبتي انا ابنك بردو زي زيه بالظبط علي فكرة
امير :
_ ما انت لو بطلت كلام وبصيت علي السفرة هتلاقي فرخة صغننه متحمرة اهي ومحطوطة قدامك
شريف بحب :
_ حبيبتي يا نونا انا بهزر والله ابقي ارتاحي بقا بلاس كل مرة نيجي تعملي كل الوليمة دي عشان خاطري
نوال :
_ انا مرتاحة ومبسوطة طول ما انتم معايا وقصاد عيني كدة ربنا يخليكو ليا وتفضلو العمر كله سند وضهر لبعض يارب ويوقفلكم ولاد الحلال ويسهلكم كل صعب يارب يا حبايبي
كلهم بحب :
_ اللهم امين يارب
❈-❈-❈
في المستشفى ياسين بقالو خمس ايام في العنايه المركزه وحالتة مش مستقرة جلطة في المخ شديدة ولحد دلوقتي هو في غيبوبه والدكاترة داخلين خارجين عليه
قدام باب العنايه كانت واقفه هناء وجلال زي عادتهم طول الخمس ايام اللي فاتو مبيتحركوش الا ساعه ولا اتنين يروحو يغيروا هدومهم ويرجعو تاني بسرعه وكان واحد يمشي يكون التاني واقف
هناء بخوف :
_ وبعدين يا جلال هنعمل ايه هنفضل ساكتين كدة وياسين بيروح مننا ؟
جلال بصوت مخنوق :
_ بس بس يا هناء بطلي تقولي كدة بقا بالله عليكي انا مش مستحمل هيبقي كويس والله هيبقي كويس وهتشوفي
الدكتور جه ناحيتهم
دكتور مصطفي :
_ صباح الخير
هناء بلهفه :
_ صباح النور .. ايه يا دكتور مفيش اي جديد
جلال بخوف :
_ هو طبيعي أنه يقعد كل دا مش فايق ؟ ارجوك صارحنا
مصطفي :
_ والله ما في حاجة مخبيها عليكم … ممكن بس ادخل ابص عليه واشوف ايه الاخبار ولما اطلع من عندة نتكلم عن ازنكم
هناء بإحباط :
_ اتفضل
الدكتور غاب في اوضة ياسين ربع ساعه كانو هناء وجلال علي اعصابهم برة خرج مصطفي وهما جريو عليه
مصطفي قبل ما هما يتكلمو قاطعهم وهو مبتسم :
_ ياسين فاق والحمد لله هو زي الفل شويه بس شد في العضلات هيروح مع الحركة بانتظام والادويه
هناء بفرحة :
_ فاق ! فاق بجد ! الحمد لله الحمد لله يارب
جلال :
_ بس ثواني هو فاق امتي احنا قاعدين هنا من الصبح ولا هو فاق لما انت دخلتله دلوقتي ولا ايه ؟
مصطفي :
_ بصراحة أنا دخلت لاقيته فايق بس كان سرحان جدا ومحسش بوجودي لدرجة اني شكيت أن في حاجة غلط او لا قدر الله مضاعفات الجلطة تكون شديدة بس لما قربت منه وكشفت عليه واتكلمت معاه اطمنت أن كل حاجة تمام هو واضح أن نفسيته مش تمام ودا اللي مأثر عليه بالشكل دا
هناء بدموع :
_ طب احنا ينفع نشوفو ؟
مصطفي :
_ اكيد طبعا الممرضين هيجيو دلوقتي ينقلوه لاوضه عاديه تقدرو تنتظروه فيها لحد ما يتنقل واطمنو هو الحمد لله بخير زي ما قلتلكم الموضوع نفسي ياريت تهتمو بالأمر حتي لو هتعرضوه علي دكتور نفسي عن ازنكم
جلال :
_ اتفضل يا دكتور
الدكتور مشي وهناء وجلال عرفو رقم الاوضه الي هيتنقل فيها ياسين وسبقوه علي هناك
بعد ربع ساعه كمان كانو قاعدين جمبه وهو سرحان وعينيه مدمعه
جلال بصوت حاول يخليه طبيعي:
_ حبيبي الف سلامة عليك
هناء دموعها نازله وماسكة ايديه ومش عارفه تتكلم
جلال :
_ ياسين اتكلم قول اي حاجة بلاش السكوت دا احنا هنموت من الخوف عليك والله
ياسين بص ل جلال ودموعه لمعت حاول يمسك نفسه ويطمن اخواته بأي كلمة بس مقدرش مجرد ما حاول بس أنه يتكلم انفجر في العياط وكانه كان ساكن عشان عارف أنه هينهار في اي لحظة
جلال جري عليه ودفن وش ياسين في كتفه وفضل يطبطب علي ضهره وهو بيضمه بقوة لحضنه
اما هناء فضلت تعيط وحسه أن قلبها وجعها وهي مش عارفه تعمل لاخوها حاجة تخفف بيها عنه اللي حاسس بيه
فضل ياسين يعيط حوالي نص ساعه
نص ساعه وهو بس منهار في حضن اخوة وجلال بيطبطب عليه بدون كلل أو ملل لحد ما ياسين خرج كل الشحنة اللي جواه وبدء يهدي وقتها جلال خرجة من حضنه وطلع مناديل مسحله وشه كله
جلال بحب :
_ انا سيبتك تطلع كل الشحنة اللي مكتومة جواك عشان تعرف تتكلم معانا … ايه الاخبار بقيت احسن دلوقتي ؟
ياسين بصوت ضعيف :
_ الحمد لله
جلال :
_ هناء بطلي عياط انتي كمان مش كدة
هناء وهي بتسمح دموعها :
_ انا مش بعيط اصلا
جلال :
_ اصلا !!
ياسين :
_ قربي يا هناء تعالي جمبي هنا
هناء قربت من ياسين ال شدها بهدوء ل حضنه وهي فضلت تعيط تاني وياسين المرة دي دموعه نازله بصمت
جلال :
_ هناء وبعدين مينفعش كدة انتي داخله تتعبيه زيادة ولا ايه ؟
هناء بعدت :
_ لا لا خلاص والله مش هعيط تاني خلاص .. الف سلامة عليك يا حبيبي الف سلامة يا قلبي انت
ياسين :
_ الله يسلمك يا حبيبتي اهدي انا كويس والله … هناء فليتي فضيت صح لما أخرج من هنا مش هروح اشوف حاجة تضايقني من كدة
هناء وجلال فهمو أنه بيتكلم علي ياسمينا ومش عايز يقول اسمها
جلال رد :
_ الفيلا فاضيه وزي الفل ومتوضبه بس انت في الاول هتحتاج رعايه شويه ف يا تيجي عندي يا تروح عند هناء
هناء كشرت :
$ يجي عندك يعمل ايه جودي اصلا كلها كام يوم وداخله عمليات دا غير ظروف امير اخوها اللي اكيد واخدة من وقتها لكن حبيب أخته هيروح عندها وهتتفرغلو هو وبس
جلال كشر :
_ ما انا كمان كنت هتفرغلو والله
ياسين ابتسم :
_ خلصتو ؟ انا مش هطلع من هنا ع اي مكان الا بيتي ف ارجوكم متتعبونيش بقا
هناء :
_ يا حبيبي بلاش عند انت لسه تعبان و
قاطعها ياسين :
_ ومش هبقي كويس الا لما اروح بيتي ارجوكي يا هناء ريحيني لو سمحتي
هناء :
_ خلاص يا ياسين زي ما تحب بس هتروح بيتك هتروح اي مكان اعرف اني رجلي علي رجلك وهاجي اقعد معاك
ياسين كشر :
_ ياسلام وبيتك ؟ وجوزك اللي لسه راجع من كام يوم دا ؟
هناء :
_ معرفش بقا انت قلت ال عندك وانا قلت ال عندي خلاص كدة
جلال ابتسم وهمس ل هناء :
_ لا جدعه يا نونا ملعوبه
هناء خبطتة في بطنة وبصلته بعينيها أنه يسكت
ياسين كشر :
_ ماشي يا هناء هطلع ع عندك بس هما يومين تلاته بس تطمني عليا وهطلع ع بيتي اتفقنا ولا لا ؟
هناء ابتسمت :
_ اتفقنا يا حبيبي
❈-❈-❈
في فيلا شريف كانت احلام رايحة جايه في اوضتها والغضب ماليها تلفونها رن برقم اسماء ردت علي طول
احلام بغضب :
_ ايه يا اسماء كل دا ساااااااعه علي ما ترجعي تكلميني تاني
اسماء :
_ براحة يا احلام في ايه علي ما عرفت اكون لوحدي واتصل بالشيخ
احلام :
_ طب اخلصي خدتيلي معاد ولا ايه في يومنا الاسود دا
اسماء :
_ ياساتر عليكي خدتلك معاد بكرة أن شاء الله علي ساعه تسعه تكوني عندة هيستناكي
احلام :
_ نعم ! هيستناني ؟ انتي مش هتيجي معايا يا اسماء ؟؟
اسماء :
_ لا مش هينفع انا مبخرجش الايام دي من البيت الشيخ مندوه محذرني اتحرك من شقتي لحد اول الشهر عشان عرف أن حماتي بتعملي اعمال ومستنيه اني أخرج عشان هي ترشهالي في الشقه وانتي اكيد مش هترضيلي الاذيه يعني
احلام بضيق :
_ ماشي يا اسماء شكرا انا هروح لوحدي سلام
قفلت احلام ورمت التلفون ومن كتر غضبها مسكت ازازة برفان وضربتها في الحيطة وقعت واتكسرت في نفس وقت دخول شريف عليها الاوضه
شريف بخضه:
_ ايه دا في ايه ؟ انتي كويسه يا حبيبتي
احلام بدون وعي :
_ اخيرا شرفت انا عايزة اعرف حالا مشروع ايه دا اللي هتعمله مع اخوك هه هتضيع فلوسك علي واحد فاشل ومراته استغفلته وضحكت عليه ؟ مش كفايه دفعتله ٢٠ الف وانا سكت ومرضتش اتكلم كمان رايح ترمي فلوسك في مشروع ملكش فيه خالص ايييييه خلاص لما صدقو عشان يسحبوك وياخدوك في عبهم هه خلاص هيجروك وراهم من غير ما تفكر أن دي فلوسنا وشقانا وحقنا احنا وبس لا فوووووق انا متجوزة راجل مش دلودل لأهله أمه وأخواته اللي يمشوه مش هيحصل يا شريف مش هيحصل علي جثتي