رواية عذاب الحب الفصل الثالث 3 بقلم إيمان شلبي
رواية عذاب الحب البارت الثالث
رواية عذاب الحب الجزء الثالث
رواية عذاب الحب الحلقة الثالثة
يامصيبتشي اتطلقتي ليه
اخدت نفس عميق وانا بحاول معيطش :
-مش قادرين نفهم بعض ياعمتي
شهقت شهقه كلها سخريه :
-مش قادرين ايه ياعنيا تفهموا بعض ؟
بعد سنه جواز جايه تقوليلي مش قادرين نفهم بعض
-ايوه ياعمتي ،حصل مشاكل كتير ما بينا واتطلقنا
بصتلي بسخريه :
-امممم وبعدين ياروح عمتك
-وبعدين ايه
-يعني ياحبيبتشي انتي شايفه أن انا وعمك منصور جوزي علي قد حالنا وبنقضي اليوم بيومه و….
قاطعتها بضيق :
-متقلقيش ياعمتي مش هكون حمل عليكم انا هنزل اشتغل واصرف علي نفسي وعلي اللي في بطني
-وانتي حامل ؟
دموعي خانتني ورديت بصوت مبحوح :
-مضطره بقي
-طيب ربنا يقويكي
كانت لسه هتخرج بس انا وقفتها بسؤال جه في بالي
-عمتي
-نعم
-هو ه هو يعني ا انا مش كان ليا ورث من بابا وماما الله يرحمهم و …
قاطعتني بعصبيه :
-ورث ايه ياحبيبتي ،هو انتي لسه فاكره ده احنا صرفناه علي تعليمك وجوازك وحطينا زياده من معانا عليهم قال ورث قال !
-ايوه ياعمتي بس انا ورثي كان كبير معقوله كلهم خلصوا علي جوازي وتعليمي
لقيتها اتوترت وبصت في كل مكان إلا عيوني :
-اه طبعا هو انا هاكله عليكي ولا ايه
-لا ياعمتو مش قصدي تصبحي علي خير
-وانتي من أهله ياحبيبه عمتك
خرجت من الاوضه وانا دفست راسي في المخده وفضلت أعيط بحرقه وصوت مكتوم لحد ما روحت في النوم
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-آدم انت كويس ؟
هز رأسه بحزن وهو حاطط وشه بين ايديه:
-لا
-بتحبها؟
-فوق ما تتخيلي
-طب ليه طلقتها
-مش قادره تستحمل وجودك يازينب
-حقها أنا لو مكانها استحاله اوافق أن في واحده تانيه تشاركني في جوزي !
-بس هي اكتر حد عارف انا قد اي موجوع
-وانت كمان عارف قد اي هي موجوعه واستحملت عشان بتحبك ،انت حرفياً بتضغط عليها
-هو للدرجادي الانتقام عامي قلبي ؟
-الانتقام عامي قلوبنا احنا الاتنين لدرجه خسرنا ناس كتير بسببه
-تفتكري ممكن ريم تسامحني
-استحاله ،انت فرطت فيها وخليت الانتقام هو أولوياتك ومفرقش معاك مشاعرها
سكت لحظه وبعدها بص لزينب وهو بيتنهد بتعب
-والحل!
-الحل انه كفايه
-كفايه
-ايوه كفايه اوي لحد كده ،انا مش هتجوزك ياآدم
-انتي بتقولي ايه
-زي ما سمعت ،انا مش هتجوزك انا خلاص صرفت فكره الانتقام دي من دماغي ،وسيبت كل حاجه علي ربنا ،انتقام ربنا أعظم من اي انتقام في الدنيا
كفايه يا آدم ،ورجع ريم وعوضها عن اللي فات
ـــــــــــــــــــــــــــــــــــــــــــــــــــــــــــــــــــــــــــــــــــــــ
في بيت عمتي
كنت قاعده في اوضتي كالعاده مبعملش حاجه غير اني بعيط علي حالي وبفكر في مستقبلي ومستقبل ابني
بفتكر آدم اللي بالرغم من كل اللي عمله إلا أني عمري ما كرهته ولا هقدر أكرهه
اوقات بحس أنه معذور ومعاه حق في اللي عمله
وأوقات تانيه بحس أنه اقسي بني آدم انا شوفته في حياتي لانه اتخلي عني وعن ابنه في وقت انا محتاجه لوجوده فيه !
كان في صراع بين قلبي وعقلي مبينتهيش كل دقيقه وكل ثانيه
فوقت من شرودي علي صوت الباب اللي كان بيخبط
مسحت دموعي بسرعه وسمحت للي برا يدخل :
-اتفضل
دخلت عمتي وعلي وشها ابتسامه من الودن للودن
-عمك منصور شافلك شغلانه انما اييييه تكسب دهب
-شغلانه ايه
-خدامه عند ناس انما ايييه اغنياء اوي اوي
اتنفضت من مكاني بصدمه :
-خدامه؟
ردت بسخريه :
-اه ياختي خدامه مالك في ايه
-علي اخر الزمن هشتغل خدامه ليه ياعمتي
-ومالهم الخدامين ياختي مش بني ادمين زينا !
-علي راسي انا مقولتش حاجه بس انا معايا شهاده ممكن اشتغل اي شغلانه تانيه
عوجت بوقها بسخريه اكبر :
-الشغل مقطع بعضه اوي ياختي ،انتي عارفه أنه عشان تلاقي شغلانه في الزمن ده هتاخدي وقت قد ايه ،بقولك ايه يابت انا بقالي اسبوع مستحملاكي ،بتاكلي وبتشربي وبغسلك هدوم وشغاله خدامه عندك ،لحد هنا وكفايه اوي كده ،اشتغلي بلقمتك ياحبيبتي احنا مش قاعدين علي بنك
دموعي نزلت علي خدي وانا برد بحسره:
-حاضر هنزل ادور علي شغل النهارده
قعدت جنبي وهي بتبصلي بخبث :
-مش لو كنتي وافقتي علي العريس اللي متقدملك كان زمانك دلوقتي عايشه هانم
رديت بعصبيه:
-عريس ايه ياعمتي انا لسه مخلصتش شهور العده
-ياختي اتخطبوا لحد ما شهور العده تخلص وبعدين اعملوا فرح
-لا ياعمتي اول مش عايزه اتجوز ارجوكي متضغطيش عليا اكتر من كده بقي
اتنهدت بضيق وخرجت من الاوضه وهي بترزع الباب وراها بعد ما حرقلتي دمي للمره المليون في الاسبوع ده
-هتفصلي وش فقر طول عمرك كتك نيله
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-بت ياريم آدم جه برا وعايز يقابلك
اتنفضت من مكاني بتوتر ودقات قلبي بقت سريعه اول ما سمعت أنه هنا
-لا ا انا مش عايزه اقابل حد
لقيته بيفتح الباب وبيدخل وهو لابس بدله وماسك بوكيه ورد كبير احمر ومليان شوكلت
-وحشتيني
قومت وقفت علي السرير وانا بشاورله بعصبيه :
-اطلع برا
-ريم انا …
-انت مش من حقك تدخل عليا اوضتي لاني مش مراتك دلوقتي
-ريم لو سمحتي اسمعيني
-لا مش هسمعك ولو مخرجتش دلوقتي هكلم خطيبي يجي يتصرف معااك
لقيته رمي البوكيه علي الارض وهو بيزعق بصوت هز الاوضه
-نعممممم خطيبك
بصيت لعمتي وانا ببلع ريقي بتوتر :
-ا اه ا انا اتخطبت ايه انت فاكر اني هفضل عايشه علي ذكراك ولا ايه لا يابابا فوق انا انا….
ابتسم ابتسامه صفراء وهو بيقرب من السرير وفجأه شالني علي كتفه زي شوال البطاطس
-انتي عايزه تتربي ياروحي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
افتح الباب ونزلني يا آدم بدل ما اصوت والم عليك الناس
قولتها بعصبيه ودموع وهو قاعد قدامي ومربع أيده وبيبصلي بهدوء
-ممكن تهدي وتسمعيني؟
اخدت نفس طويل وانا بضغط علي ايدي بكل قوتي وبهز راسي بنفي
-مش عايزه اسمعك ،مش عايزه اشوفك ،مش عايزه اي حاجه ،عايزاك تسيبني في حالي ارجوك
مسك ايدي وضغط عليها وهو بيبص في عيوني بتحذير وغيره :
-انا حالك
بصيت في عيونه بتحدي وكبرياء :
-كنت حالي وكل دنيتي لما كنت جوزي ،انما دلوقتي انت ولا حاجه بالنسبالي
بصلي بعتاب:
-للدرجادي
بصيت قدامي وانا بحاول ارد بثبات :
-افتح الباب خليني انزل لو سمحت
-حتي لو قولتلك اني صرفت نظر عن فكره الانتقام واني طلقت زينب
سكتت لحظه افكر في كلامه وبعدها لفيت وشي وانا برد بقسوه مكنتش عارفه جيباها منين !
-في النهايه انت اتخليت عني في وقت انا كنت محتجالك فيه
نبره صوتي اتخنقت بالدموع وانا بفتكر اللحظه اللي طلقني فيها وطردني من قلبه بكل قسوه
-مش قادره انسي اللحظه اللي طلقتني فيها بكل سهوله عشان واحده تانيه
-انتي عارفه كويس اوي اني مبحبش زينب
-بس في النهايه طلقتني وانا مش تحت امرك ياآدم
-يعني ايه ياريم
-يعني مش هرجع
-ده آخر كلام عندك !
-ايوه
-تمام
اتنهدت وبصيتله بحزن:
-لو سمحت بقي افتحلي الباب و…. ايه ده ايه ده انت بتعمل ايه يابني آدم وقف العربيه
ابتسم ابتسامه صفراء وهو بيبصلي :
-تحبي تتعشي ايه ياقلبي
جزيت علي اسناني بغيظ :
-آدم بطل جنان ووقف العربيه بقولك
-اوكي يبقي بيتزا
-آدم بقولك بطل جنان ووقف العربيه
رد ببرود :
-امممممم اجبلك بيبسي دايت مع البيتزا بما انك بتعملي رجيم وكده
رديت بشراسه:
-رجيم ايه انا حامل !
-خلاص يبقي اجبلك وجبتين
-ليه شايفني ديناصور
-لا ياقلبي متقوليش كده علي نفسك انتي بقره صغننه
عيوني طلعت شرار وغمضت عيني وانا بحاول اسيطر علي اعصابي
-نزلني بدل ما اتعصب عليك
ابتسم ببرود :
-نفسي اشوفك وانتي متعصبه اوي
حطيت ايدي علي بطني وانا بغمض عيني بتعب :
-ل لو سمحت يا آدم متضغطش عليا ارجوك
وقف العربيه علي جنب واتنهد وهو بيسند رأسه علي الدريكسيون
-طب اعمل ايه عشان تسامحيني
-متعملش حاجه انا مش هسامحك اصلا
رد بحزن مصطنع:
-معقوله انتي بالقسوه ديه
-ايوه
-مش متعود منك غير علي الطيبه والرقه والتسامح
-ربنا يكفيك شر الطيب لما يقفل من حد ،مبيقدرش يرجع زي الاول مهما حصل
-ريم عشان خاطري سامحيني والله العظيم انا صرفت نظر عن الموضوع عشانك
ضحكت بسخرية :
-عشاني …ليه هو انت بتحبي
-ايوه طبعا بحبك
-انت مبتحبش غير نفسك
-ريم…
قاطعته بضيق :
-متحاولش تستعطفني لان انا فعلا قفلت منك
-قفلتي مني!!!
-اوقات بنعدي ونسامح بدل المره الف لكن بيجي علينا وقت بنقفل ومهما الطرف التاني حاول يعتذر عن غلطه مش بيفيد الاعتذار تعرف أنا مره قرأت جمله حلوه اوي
“إعتذاراتك جميلة..
لكنها مُتأخرة جدًا وكأنك تضع زهورًا على قبري”
واهو ده بالظبط نفس اللي انت عملته ،اعتذرت متأخر اوي
-يعني مفيش امل ترحميني وترحمي نفسك وتسامحيني
-ولا في عمر حتي شطبنا
طبل علي الدريكسيون بمرح وهو بيغني:
-شطبنا قفلنا بابنا علي اللي اختار عذابنا
بصيتله بغيظ:
-انت بتستظرف؟
-عايزه الحق ولا الحق
رديت بتلقائيه:
-وايه الفرق
-ولا حاجه اصل الاتنين إجابتهم واحده وهي ان اوفكورس بستظرف
-دمك يلطش
-مقبوله منك ياروحي
-رجعني بيت عمتي يا آدم لو سمحت
-عمتك اللي مش بتحبك ؟؟
عيوني لمعت بالدموع ولفيت وشي النحيه التانيه وانا برد بصوت مبحوح
-معرفش غيرها للاسف
-خلاص هوديكي علي بيتنا
-بيتنا ده ازاي يعني احنا متطلقين
رد بهدوء :
-عيشي فيه وانا هعيش في الشقه التانيه بتاعتنا
-اللي جنب شقتنا بالظبط
-ايوه
-لا شكرا مش محتاجه مساعده من حد
رد بصرامه :
-انا مش حد انا جوزك
-مش جوزي مش جوزززي انت طلقتني
-خلاص طليقك مش حوار يعني وبعدين ده حقك انتي وابني اللي في بطنك
اخدت نفس طويل وبصيت قدامي من غير ما انطق حرف وهو اتحرك بالعربيه نحيه البيت
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-اااااه ااااه
كنت قاعده في البيت وبتفرج علي التلفزيون وسمعت صوت حد بيتوجع
سيبت طبق البطيخ اللي كنت باكل منه وقومت وقفت وانا ببلع ريقي بتوتر
-د ده صوت آدم
قربت من الباب وحطيت ودني عليه يمكن اقدر اسمع اكتر
سمعت صوت آدم وهو بيتوجع قدام الباب بتاع شقتي
بدون وعي وبكل لهفه فتحت الباب لقيته قاعد علي الارض
-آدم
رفع رأسه بتعب :
-آااااه
جريت نحيته وقعدت علي ركبتي وانا بحاوط وشه بخوف
-آدم مالك فيه ايه
بلع ريقه ورد بصعوبه :
-ت تعبان م مش قادر بمووت
عيطت بخوف وانا بهز راسي بهستريه :
-لا متقولش كده بعد الشر
مسك ايدي وبلع ريقه بصعوبه :
-ا انا اسف س سامحيني ا ارجوكي قوليلي انك مسامحاني ع عايز اسمعها منك قبل ما اموت
هزيت راسي بدموع :
-مسامحاك والله مسامحاك من زمان بس ارجوك متقولش كده انت هتعيش ،ع عشان خاطري متسبنيش يا آدم انا مليش غيرك والله ،انا من غيرك ولا حاجه ،ل لما كنت بقولك عمري ما هسامحك كان من ورا قلبي ،ا انا ا انا بس كنت بقول كده من زعلي وقهرتي منك ،ب بس انا مسامحاك والله مسامحاك من كل قلبي عشان خاطري متعملش فيا كده متسبنيش لوحدي انا بحبك يا آدم و…..
قام وقف بلهفه وكأنه مكانش تعبان من ثواني !
-بجد يعني انتي مسامحاني
قومت وقفت وانا ببصله بصدمه وذهول
-ا انت ا انت مش تعبان
هز رأسه بنفي :
-لا انا كويس بصراحه يعني ده كان مقلب
جزيت علي اسناني بغيظ ودموعي علي خدي :
-ا انت ا انت ا انت حقير انا بكرهك انت حقيرر
كنت لسه هدخل البيت بس هو مسك ايدي ووقف قدامي وقالي بندم
-انا اسف بس مكانش قدامي حل غير ده عشان تسامحيني
ضربت علي صدره وانا بعيط بحرقه :
-انت عارف انا حسيت بأيه ،ا انا حسيت اني تايهه و و و انا ا انا قلبي كان هيقف من كتر الرعب ا انت
شدني لحضنه :
-هششش اهدي خلاص اهدي انا بخير
مسكت في قميصه جامد وانا بضم نفسي لصدره:
-وقتها حسيت اني هبقي لوحدي من تاني
ضمني جامد وهو بيهمس بحب:
-انتي مش لوحدك انا معاكي
سندت راسي علي صدره وانا بغمض عيني براحه :
-وحشتني اوي
-وانتي كمان وحشتيني اوي ،حقك عليا
ازعلي مني
اغضبي ثوري
اثبتي موقف
اهتفي بصيلي وواجهيني
انما تختفي من أيامي
يامرور الدم ف شراييني
يبقى اسمه كلام ؟
حقك على عيني يانور عيني
يارفيقة مشواري الدايمه
حقك يانجومي اللي بشوفها
يامراكبي اللي بحِسك عايمه
بتأسفلك وانتي لوحدك اللي انا ف الدنيا اتاسفله
تمت
لقراءة الرواية كاملة اضغط على : (رواية عذاب الحب)
