رواية خطوبه الندامه الفصل الرابع 4 بقلم إيمان شلبي

رواية خطوبه الندامه الفصل الرابع 4 بقلم إيمان شلبي

رواية خطوبه الندامه البارت الرابع

رواية خطوبه الندامه الجزء الرابع

رواية خطوبه الندامه الحلقة الرابعة

-تاليا بنتي حبيبتي
فتحت عيوني ببطئ لقيت نفسي نايمه علي السرير والكل حوليا
ماما ،بابا ،عمو محسن جارنا ،الشخص الغريب اللي اقتحم بيتنا من غير استأذن !
بس الجميل في الموضوع أن “خالد ” مكانش معاهم
اعتقد وقتها اني لو كنت شوفته كنت ممكن انهار اكتر ما انا منهاره
كنت حاسه احساس بشع اوي
احساس الخذلان من اقرب شخص لقلبك مش هين علي الاطلاق
قلبي كان مفتور
وكأن خالد وهايدي جابوا خنجر مسموم وغرزوه في قلبي بكل قس*وه
انا بس كل اللي مزعلني اني مأذتش خالد عشان يعمل كده
بالعكس أنا كنت مستحمله وراضيه بحاجات مكانش ينفع ارضي بيها عشان حبيبته
حتي هايدي اللي بتكرهني مفتكرتش في يوم اني آذيتها
قعدت ماما جنبي ومسكت ايدي وهي بتطبطب علي راسي :
-متزعليش نفسك ياحبيبتي ميستاهلش ولا دمعه منك ده ح*قير وو-اطي

رفعت عيني في عينيها وانا بضغط علي ايديها وبرد بصوت مبحوح :
-انا اسفه
-علي ايه ياحبيبتي ؟
-اسفه اني مسمعتش كلامك ،اسفه اني فضلت مكمله في الخطوبه ديه بالرغم من كل الحاجات الغلط اللي كانت بتحصل
ابتسمت بحنان وهي بتمسح دموعي :
-متتأسفيش انا مش زعلانه منك
انا سيبتك تجربي وتشوفي بنفسك عشان مترجعيش تندمي
-بس انا ندمت واوي كمان وقلبي أتكسر
-لا عاش ولا كان اللي يكسر قلبك طول مانا علي وش الدنيا
-احم طب عن اذنكم احنا بقي وحمد لله علي سلامتك يا انسه تاليا
رفعت راسي وانا ببصله بتعب :
-الله يسلمك شكرا
ماما بأمتنان:
-مش عارفين نقولك ايه يابني علي اللي انت عملته معانا

رد بأحترم :
-انا معملتش حاجه يا امي ده واجبي
-هو ايه اللي حصل
ماما بلهفه:
-مسك خالد اداله علق-ه محترمه وطرده من البيت وقاله لو اتعرضتلها تاني هسجنك اصل النبي حارصه وصاينه ظابط في الجيش
رديت بحزن :
-شكرا
هز رأسه بابتسامه خفيفه وخرج من الأوضه
محسن بحب:
-حمد لله علي سلامتك ياحبيبتي
-الله يسلمك ياعمو شكرا
ــــــــــــــــــــــــــــــــــــــــــــــــــــــــــــــــــــــــــــــــــــــــــ
إلي أن تتعلم النساء الوقوع في حب الرجل المناسب ،الي أن تتعلم ماهو معني الحب الحقيقي ،الي أن تتعلم أن من يحب يفعل المستحيل ،إلي أن تتعلم أن كلمه “احبك” ليست مجرد كلمه وانما فعل إلي أن تتعلم اختيار شريكها بدقه وشروط خاصه بها ،ستظل كل القصص ذات نهايات حزينه

-انتي هتفضلي كده كتير يابنتي
رفعت راسي من علي الفون ورديت بصوت هادي:
-انا كويسه ياماما متقلقيش
قربت مني وقعدت علي طرف السرير وردت بحزن :
-مقلقش ازاي بس وانتي بقالك اسبوع مش بتخرجي من اوضتك ،خلاص بقي ياتاليا انسي ياحبيتي مش نهايه الدنيا ،انتي مش اول واحده تسيب خطيبها ،ياما بنات اتخطبت اكتر من مره وفركشت
اتنهدت وانا ببصلها بوش بهتان :
-بس انا ظروفي تختلف
-حبيبتي اللي يشوف بلاوي الناس تهون عليه بلوته
كل واحد ليه ظروف مختلفه ،يابنتي ده ياما بنات متجوزين اكتشفوا أن جوزهم بيخونهم
احمدي ربنا انتي لسه علي البر واكتشفتي خيانته
رديت بضيق :
-عايزاني أعمل ايه يعني ياماما ؟
-عايزاكي تفوقي ياتاليا ،اخرجي من الحزن اللي انتي فيه ده ،انزلي روحي كليتك واخرجي مع اصحابك واهتمي بنفسك زي الاول واشتغلي واخرجي من قوقعه الحزن ده
مش نهايه العالم يابنتي ياما هتشوفي في حياتك صدمات

رديت بلامبالاه:
-ماشي حاضر
-وعد
هزيت راسي من غير ما ابصلها:
-وعد
-تاليا ….
قاطعتها بضيق :
-خلاص ياماما لو سمحتي متضغطيش عليا
اتنهدت وهي بتهزر رأسها بيأس وحزن :
-ربنا ينتقم من اللي كان السبب يارب حسبي الله ونعم الوكيل فيهم
خرجت من الاوضه وانا فضلت اعيط كالعاده لحد ما عيوني ورمت من كتر العياط
بليل علي الساعه ١٢
خرجت شويه اقف في البلكونه لاني كنت حاسه اني مخنوقه
-يعني ايه الكلام ده !
رفعت راسي علي مصدر الصوت لقيت قريب محسن جارنا واقف بيتكلم في الفون ومتعصب ..
-طب مش هتتجوزه ياماما علي جثتي انها تتجوز البني آدم ده

سكت لحظه يسمع كلام الطرف التاني وبعدها رد بأنفعال :
-حب ايه وزفت ايه ده تاجر مخ*درات عايزاني اجوز اختي تاجر مخ-درات ليه هو احنا جايبنها من الشارع !!
سكت يسمع كلامها وبعدها رد بصدمه :
-يعني ايه الكلام ده ؟
يعني انا مش فارق معاكم
اتنهدت ورد بحزن:
-تمام ياماما اعملوا اللي انتوا عايزينه بس مترجعوش تعيطولي في الآخر سلام
قفل الفون ونزل رأسه شافني واقفه بسمع الحوار بفضول
اول ما عيوني اتقابلت مع عيونه اتوترت ونزلت راسي ودخلت اوضتي جري
-بس بس يا انسه تاليا يا انسه بس بس اطلعي هقولك حاجه
بس بس هو انا قطه؟؟
احنا بنتعرض للعبط الندائي
خرجت مره تانيه وانا برفع راسي برفعه حاجب !
-نعم ؟
-هو ليه الإنسان ممكن يحب تاجر م*خد*رات

-نعم وانا ايش عرفني
-ايش عرفك ازاي بس يا انسه هو انتي مش كنتي مخطوبه لعيل ص*ايع وبتحبيه
-ص*ايع
-ايوه انا عايز افهم بقي ايه سبب أن البنت تحب واحد مش زيها بما انك خبره
اتعصبت وفضلت ادور علي حاجه عشان اهبدها في دماغه بس ملقتش
-بتدوري علي حاجه يا انسه
رديت بعصبيه:
-اه بدور علي حاجة اهبد دماغك بيها
-الاه طب ليه ؟
-عشان انت بني آدم دبش
حط ايده علي صدره وهو بيشكرني ببرود :
-اشكرك
بصيتله بعيظ وعيوني بتطلع شرار وكنت لسه هدخل بس هو وقفني

-لو سمحتي بعد اذنك جاوبيني انا اختي بتضيع مني
رفعت راسي وانا ببصله لقيت نظره كلها توسل في عيونه
وفي الحقيقه حسيته صعب عليا جدا
هو اه بني آدم دبش ويستاهل اخبطه بحاجه في دماغه بس لما نشوف عايز ايه
يخربيت قلبي ده طيب زياده مني لله اصلا
اتنهدت وانا بسند ايدي علي سور البلكونه وبرد بحيره :
-عايز ايه
-عايز أعرف ليه ممكن بنت تحب شخص بالرغم أنه مش كويس وفيه العبر
رفعت راسي ورديت بنبره حزينه:
-عشان في أشخاص تقدر تمثل انها ملاك بالرغم انهم شويه شياطين عايشين وسطنا
-طب بس ده الناس كلها عارفاه وعارفه أنه تاجر مخدرات ومش كويس
-تعامله مع اختك عامل ازاي ؟
-معرفش
-اكيد قادر يخدعها
-تفتكري ؟
-طبعا
-طب والحل ،انا خايف عليها وللأسف هي وماما مقتنعين أنه كويس

-سيبها تجرب
رد بلهفه:
-اسيبها تجرب ازاي لا طبعا
اتنهدت تنهيده طويله :
-سيبها تجرب لانها مش هتقتنع إلا لو جربت تقرب منه يا استاذ …
-سالم
هزيت راسي ورديت بعقلانيه:
-متجبرهاش علي حاجه عشان متفضلش طول عمرها ندمانه وعايشه حياتها مش سعيده
-طب ما وجودها معاه هيخليها طول الوقت حزينه ده كل يومين المباحث عنده وبيتسجن بالشهور
-واختك عارفه كل ده
-للاسف
رديت بحيره :
-والله انا مش عارف اقولك ايه بس….
-تسمحيلي أسألك سؤال شخصي ؟
-اتفضل

-انتي كنتي بتحبي خطيبك
بصيت قدامي وعيوني بتلمع بالدموع مع نسمه الهواء اللي بتخبط في وشي
-للاسف
رد بحيره :
-طب ليه ؟
-هو ايه اللي ليه هو الحب ليه اسباب؟
-طبعا ،يعني مثلا في شخص ممكن يحب شخص تاني عشان شكله ،ممكن عشان حنين ،ممكن عشان بيهتم بيه ،ممكن عشان بيسمعه في كل وقت من غير ما يزهق ،ممكن عشان متقبله في كل الأحوال
انتي بقي لما حبيتي خالد ده حبتيه ليه
-عشان كان في كل الصفات ديه
-بس كانت مزيفه في البدايه مش كده ؟
-بالظبط
-بدأتي تكتشفي انه مش كده ازاي

-لما اتخطبنا ،بدأت تصرفاته كلها تتغير ،كان بيهتم بنفسه ولبسه في البدايه مبقاش يعمل كده ،مكانش بيخليني ادفع جنيه في أي حاجه بقي يخليني احاسب في الكافيه والاوبر ويطلب مني هدايا بكل بحاجه وغاليه ،كان شخص راقي وعمره ما قال لفظ خارج بقي يشتمني بأقذر الألفاظ ،كان بيهتم بكل تفاصيل حياتي بقي يهمل فيا وممكن يفضل بالايام ميتكلمش وكأني اباجوره في حياته !
-وانتي ايه اللي كان جابرك تكملي بالرغم من كل العيوب ديه
ابتسمت بسخرية:
-مرايه الحب عاميه بعيد عنك
-زعلانه
-اكيد بس مش عليه
-علي نفسك
-صعبان عليا نفسي فوق ما تتخيل
-ربنا يعوضك خير يارب
-يارب عن اذنك
-تصبحي علي خير
ابتسمت برقه :
-وانت من أهل الخير
ــــــــــــــــــــــــــــــــــــــــــــــــــــــــــــــــــــــــــــــــــــــــــ

بعد مرور تلت شهور
واقول خفيت ومش هرجع لأحزاني، اشوفك بس بتعدي يدبدب قلبي من تاني … أكيد في حد ف العالم دعى مره عليا بقلب وقال يارب بالأيام تسيب نفسك لوجع الحب وكانت ساعه فيها جواب عن الدعوه اللي تأذيني
-لا يعني لا مش عايزه اتخطب تاني مش عايزه حد مش عايزه بقي كفااايه حرام عليكي
ماما وهي بتمسكني من دراعي وبتهزني جامد :
-لااااا ده انتي زودتيها اوي بقي هو في ايه بقالك تلت شهور علي الحال ده ،عماله تضيعي منك فرص متتعوضش عشان لسه بتفكري في البيه اللي باعك وخانك مع اعز صحابك
لسه بتحبيه وبتفكري فيه ليه انتي مفيش عندك كرامه ليه؟؟
كفايه انتي بقي تعبتيني معاكي كفااااايه حرام عليكي هتفضلي ترفضي لحد أمتي لحد ما تعنسي جنبي وقتها سيى زفت مش هينفعك مش هيرجعلك ولا هترجعيله بعد اللي هببه ،يقطع الحب وسنينه يابعيده
بقولك ايه اعملي حسابك النهارده بليل جهزي نفسك عشان هتقابلي العريس برضاكي أو غصب عنك
الظاهر أن انا وابوكي دلعناكي كتير اوي قولتي اما اسوق فيها
قالت كلامها بكل قس*وه وخرجت من الاوضه ..

قعدت علي السرير وفضلت أعيط جامد ،مكنتش عارفه اتصرف ازاي
انا مش هقدر ادخل تجارب تاني ،مش هقدر احب حد تاني واهدر مشاعري معاه واكتشف في الآخر أنه ميستاهلش حبي واسيبه
ف ارجع لنقطه الصفر بعد ما كنت بدأت اتعافي !
لا لا انا مبدأتش اتعافي أنا لسه زي مانا ،لسه مكاني ،لسه قلبي واجعني
في جروح مش ممكن تتداوي مهما مر الوقت ،بتفضل معلمه جوانا وللأبد
-بس بس
مسحت دموعي وخرجت البلكونه رفعت راسي وانا برد بصوت مبحوح
-نعم ياسالم
-ايه ده مالك ؟
-مفيش
-مفيش ازاي يعني هو انا معرفكيش ده احنا عشره شهرين ياجدع
عيطت وانا لتحت :
-في عريس متقدملي
رد بهدوء :
-وانتي زعلانه ليه؟
رفعت وشي وانابسأله بذهول :
-معقوله بتسأل
رد بأنفعال:
-ايه لسه بتحبي خالد

رديت باستغراب :
-انت بتتكلم كده ليه ياسالم
-عشان انا متضايق عشانك ،انتي بتضيعي فرص من ايدك ياتاليا كل ده عشان ايه !
-انا مش بحبه والله مبقتش بحبه بس بس ….
-انتي مقهوره من اللي عمله
-بالظبط كده ،وخايفه احب حد تاني يطلع اسوء منه انا قلبي مش حمل خبطات تاني ياسالم
رد بنبره حزينه وغريبه :
-بس انا مش زيه
رديت باستغراب :
-مش فاهمه وانت ايه علاقتك بالموضوع
اتنهد وبص قدامه ورد بهدوء :
– عشان انا اللي متقدملك
رديت بذهول وانا ببلع ريقي :
-ا انت
نزل رأسه وبص في عيوني :
-ايوه انا
صدقيني انا مش هو ،انا هحبك زي ما بتتمني ،عمري ما هزهق منك ولا من تقلباتك المزاجيه ،عمري ما هبطل اهتم بيكي ،عمري ما هخذلك ولا هسمح لنفسي اني انيمك زعلانه في يوم
تاليا انتي تشبهي الورد ،رقيقه ،وجميله ،طول ما بتتروي حب وحنان بتطلع احسن ما عندها ،وانا هعتبرك ورده في بستاني وهفضل ارويكي طول الوقت عشان متنطفيش ولا تدبلي

اديني فرصه واوعدك قلبك في يوم هيدوب جوا قلبي
اتنهدت وانا بمسح دموعي وبرد بهدوء :
-مش كنت تقول من البدايه انك العريس
-يعني ايه
رفعت وشي وانا ببصله وبقوله بأمان :
-عشان انا من زمان مستنيه اللحظه ديه ياسالم ،مستنيه تيجي تنتشلني من قوقعه الحزن اللي انا عايشه فيها
ابتسم بفرحه وقالي بلهفه :
-انا جاي
-جاي فين استهدي بالله
-جاي اتقدملك
-بالبجامه والساعه ١٢ الظهر !!
غمزلي بمشاكسه:
-اصل انا بحب ابقي مميز
ضحكت علي كلامه وهو ضحك وبصينا لبعض بصه طويله كلها حب وارتياح وامان
وبليل جه هو ومحسن ومامته واخته اللي قدر يقنعها انها متتجوزش الشخص اللي بتحبه واللي كان اختيار غلط بكل المقاييس
“ولا الضالين امييين”
-يلا ياحبيبي لبس عروستك الدبله
قرب مني وقعد جنبي علي الكنبه ومسك ايدي ولبسني الدبله وهو بيبص في عيوني بحب
باس ايدي برقه :

-اوعدك عمرك ما هتندمي في يوم انك وثقتي فيا
الدموع لمعت في عيني وانا برد بأمان:
-وانا واثقه فيك ياسالم
ابتسم وانا كمان ابتسمت برقه وشبكت صوابعي في صوابعه وانا يتنهد بكل راحه وبفتكر كلام خلود صاحبتي عن العوض
يراكَ تحب ما يؤذيك؛ فيمنعه عنك، فتسيء الظن به، فيُريكَ حكمته، ثم يحوِّل حيرة قلبك وعقلك لمنتهى الرضا بقضاءه واختياره لك، فيرتاح قلبك وعقلك
وفي الحقيقه ربنا ليه حكمه في كل حاجه في حياتنا ،ليه حكمه في اننا نشوف اشخاص معينه ويدخلوا حياتنا ويعلمونا درس عمرنا ما ننساه ،ليه حكمه اننا نشوف شخص ما صدفه نحكيله عن تجارب مرت كنوع من أنواع الفضفضه فيسمعنا ويفهمنا ويقدر خوفنا ومع كل ده يحبنا بالرغم من كل العيوب والكركبه اللي جوانا ،ليه حكمه يجمعنا بناس مكانوش علي البال ولا علي النيه فيعيشوا معانا العمر كله ويبقوا جزء من روحنا ”
يجوز الصدفة تجمعنا.. بناس بتحب تسمعنا
فـ يداوا الحزن ف عنينا.. اكيد الجاي خير لينا 🖤
تمت

لقراءة الرواية كاملة اضغط على : (رواية خطوبه الندامه)