رواية جمانة الفصل الثاني 2 بقلم هوس ريجا

رواية جمانة البارت الثاني

رواية جمانة الجزء الثاني

رواية جمانة الحلقة الثانية

كل يوم نستناه يجي وماجاش فقدت الامل وفقدت معاه صحتي مرضت وحكمت الفراش من سبيطار لسبسطار وجا عندي وكنت حابة نشوفو بصح ماما وجدة مخلاونيش حرموني عليه ماما باه تنسيني فيه كانت عارفة بلي نحبو داتني معاها لتونس انا عندي الجنسية التونسية من ناحية الام لانو جداة ماما تونسية ومشات هذيك الجنسية التونسية علينا انا وماما وخواتاتي وعندي واحد من خوالي عايش في تونس رحنا عندو كنا نوايين نعيشو ثم بصح تفاجأنا كي لقينا عمي اب حمزة وحمزة جاو لينا لدار واهدرو مع ماما حابة تعيشي في تونس عيشي وحدك بصح بنتنا راح تعيش معانا وسط عمومها رجعنا معاهم لدزاير عرفت من بنت عمي بلي حمزة كي سمع بلي رحلنا لتونس دار ما دار وتقابض مع جداتي كيفاه تخليها تروح لتونس من وقتاه بناتنا يخرجو يعيشو بعيد علينا بعد هذا الشي قلت ضك ترجع علاقتنا لكن انقطعت نهائيا وصارت بيناتنا حدود كبيرة حالو حال الغريب ممنوع نخرج عندو ممنوع نقعد معاه وحدنا ممنوع نخرج بلا حجاب عندو ووو الشي لي كان مسموح ليا معاه صار مستحيل لكن متحكم بيا وبكل اموري باعتبار هو اكثر واحد يصرف عليا ويهتم لاموري ممنوع ندير حاجة بلا ما ناخذ رايو دايرلي قوانين كون نتعداه تصرا كبيرة كان هذا الشي يضايقني بصح على جالو وجالو حبو متقبلة حبو كبر معايا حاولت قد ما نقدر نخفي مشاعري من جيهتو لكن عينيا يفضحوني كي يجي هنا رجعت على صوت جدة هيا ازربي شوية العصر اذن وانتي مزلتي حطيت الفروطوار ودخلت توضيت صليت وفت الكوزينة درت الطابلية غطيت شعري بالفولارة وقعدت نصنف ونحط للمغرب عيطتلي جدة من شمبرتها رحت عندها _وجد العشا ،ايه وجد _خلاص ملا رواحي وجدي الطابلة هنا راه قريب يوصل درتلها براسي ايه وخرجت من الباب سمعت الباب تاع الحوش طبطب رحت حليت لقيتو هو توترت وقلبي رجف من شوفتو ممكن سمع دقات قلبي كي زادت دخل وغلق الباب السلام عليكم ،وع السلام _جدة هنا ،ايه هنا فات عليا دخل عند جداتي بقيت نشوف معاه واش بدلو عليا هكذا ولينا كالغرباء حتى في وجهي ما يشوفش علاه انا نرجف على شوفتو وهو ولا على بالو ماشي عندو وحدة في حياتو شحال وانا نسمع بلي راح يتزوج كنت ننقهر ونشبع موت فت للكوزينة قعدت نوجد فالطابلة دخلت ماما جا حمزة ،ايه جا _هاتي انا ندي العشا وانتي مكلاه تدخلي ،لاه تخنزرت فيا سكت دات العشا وراحت وانا قعدت فالكوزينة وليت خرجت للحوش قدمت من الباب باه نسمع واش يهدرو نسمع في جدة تهدر علاه ماترجعوش هنا ال طاج تاعكم الفوق فرغان وتسكنو هنا واذا باباك ماحبش ارجع انت اتزوج وجيب مرتك وعيش هنا وسط عمومك وولادهم لا بقيتو مغربين لهيه تمنيت يقبل ويرجع بصح رفض اواه جدة ماتصلحش شغلنا وخدمتنا ڨاع لهيه واش يرجعنا هنا بقاو يهدرو حتى سمعت اسمي في وسط كلامهم وماما لي تهدر جاني خطاب لجمانة وراني حابة نمدها قبل ما نسقسو عليه مليح نطق هو واشبيكم مقلقين على زواجها خليها تكمل قرايتها وساهل الحال _كيما علبالك حنا عندنا المراة كي تفوتو25 يولو يقولو عليها عانس ويولو بخطبو فيها غير الكبار والمتزوجين وجمانة كثرو عليها الخطابة راح نمدها مدام يجيها مكتوب مليح _وقرايتها كيفاه ،بقالها هذ العام برك وتتخرج راني نخمم نمدها هذاك هو تكمل عامها وتدخل_ماتلصقيها في حتى واحد راح جيب عام وهي مخطوبة؟ لالا لازم تتخطب شهر شهرين تدخل ماعندناش هذ العقلية تاع خطبة عام وعامين نطقت جداتي ايه هذاك هو الصح خلي تكمل قرايتها ولي حاب يستنى يستناها حتى تكمل قرايتها نزلو دموعي هو يخطط لزواجي وانا هنا ميتة عليه نضت خرجت لشمبرة غطيت راسي وقعدت نبكي زعما ماعلبالوش بلي نحبو مراهش شايف حبي ليه مراهش حاس بيا مستحيل متاكدة علبالو بلي نحبو ماعلباليش شحال فات الوقت دخلت ماما راني جبتلك لماعين نوضي اغسليهم نحيت الغطا شافت معايا واشبيك ،والو _شوفي هنا لي في راسك تنحيه وحمزة تنحيه من راسك خرجت خليتها رحت للكوزينة غسلت الماعين وسيقتها سمعت جدة تعيط عليا خرجت للباب جيبي فرشي لحمزة راح يبات هنا وانا فرشيلي ثم معاكم رحت جبتلو مطرح ودرا زاورة جبت مخدة رشيت فيها شوية من البارفا تاعي ياريتني مخدة ورقدت في حظني هزيت الفراش حظنتو وديتو لشمبرت جداتي فرشتلو طفيت الكليماتيزو فتحت التواقي باه تخرج ريحة الدخان وخرجت

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية جمانة)