رواية الجريمة الغامضة الفصل السابع 7 بقلم عادل عبدالله

رواية الجريمة الغامضة الجزء السابع

رواية الجريمة الغامضة البارت السابع

رواية الجريمة الغامضة الحلقة السابعة

الضابط هشام : يبقي كده القاتل اما من عيلة حمدان او من عيلة عبد الوهاب او المعلم نفسه او تكون مشاجرة قتلوا بعض كلهم فيها .
الضابط سليمان بيه : احتمالية انها تكون مشاجرة بينهم دي مرفوضة لأن لو كانت مشاجرة بينهم كان علي الاقل هيكون في واحد في النهاية لسه عايش !!
: يا فندم وبردو صعب يكون المعلم قتل عيلته كلها وبعدها انتحر !!
: صعب ليه يا هشام ؟
: ايه الدافع ان رجل زي ده يعمل كده ؟؟!!!
: اكيد هيكون دافع قوي ، ممكن يكون مثلا اكتشف ان في علاقة بين مديحة وابنه سيد زي ما اتقال في اقوال بعض الشهود .
: ودي هنعرفها ازاي يا فندم ؟ وعلي افتراض انه اكتشف كده هيقتل العيلة كلها ليه ؟؟ كان ممكن اقصي حاجة هيقتل مراته مديحة وابنه سيد مثلا او حد منهم ، انما هيقتل العيلة كلها ليه وكمان في الاخر ينتحر !!!
: احنا عاوزين نستجوب هيما تاني ونعرف منه كل حاجة عن سيد ؟
: لكن هيما ظهرت برائته يا فندم ؟
: ايوه احنا هناخد شهادته بس بخصوص سيد لأن هيما كان اقرب واحد من العيلة دي ويعرف تفاصيل كتير عنهم وبعدها هيمشي . هاته ناخد اقواله .
: تمام يا فندم .
وبعد دقايق وقف هيما امام الضابط سليمان .
: اقعد يا هيما مبروك ظهرت برائتك .
: الحمد لله ، مش انا قولت لسيادتك !!
: عاوزك تحكيلي بقي كل حاجة عن سيد ابن المعلم عطية .
: وهمشي بعدها يا بيه ؟
: ايوه طبعا بس الاول تحكيلي كل حاجة تعرفها عن سيد .
: سيادتك عاوز تعرف ايه عن المعلم سيد ؟
: عاوز اعرف علاقتك به كانت ايه وعلاقته بأبوه وامه ومرات ابوه واخواته ؟ ، مين اصحابه ؟ كان بيعمل ايه في حياته ؟ اي حاجة تعرفها عنه قولها .
: المعلم سيد كان عصبي اوي وايده سابقاه ، كان دايما بيغلط في اي حد ومش بيعمل حساب لحد كبير او صغير ، مفيش الا امه وابوه اللي كان بيعملهم حساب .
: وعلاقته بمديحة مرات ابوه كان شكلها ايه ؟
: كان تقريبا مش له علاقة بيها ، يعني الكلام بينهم علي خفيف .
: يعني مثلا كان بيكرهها علشان مرات ابوه ؟ ولا بيحبها زي امه ؟
: المعلم عطية لما اتجوز مديحة كان سيد لسه صغير وكان زعلان علي زعل امه ، و انا لما اشتغلت عندهم كان سيد عنده لسه حوالي ١٥ سنة وكان لسه واخد منها موقف لكن لما سيد كبر و فهم الدنيا وقرب من ابوه اكتر بدأ يتكلم مع مديحة ويتعامل معاها بشكل عادي لكن في اضيق الحدود .
: كان معروف عن سيد انه بتاع ستات ؟
: ايوه يا بيه ده كان مش بيعتق كبيرة ولا صغيرة ، اللي كانت بتعجبه كان بيفضل وراها لحد ما يمشي معاها .
: اكيد حاجة زي كده كانت بتعمله مشاكل كتير ؟
: ايوه هو كان الله يرحمه مشاكله كتير سواء علشان الستات او علشان عصبيته مع الناس .
: وازاي واحد زي سيد مشاكله وخناقاته كتيرة مفيش ولا محضر ولا قضية ضده ؟!!
: كانت كل مشكلة بتخلص قبل ما توصل للشرطة ولو وصلت للشرطة كاتت بتخلص بالصلح .
: طيب يا هيما تفتكر انه كان ممكن يبص لمرات ابوه وخصوصا انها كانت ست جميلة و سلوكها مش مظبوط ؟؟
: بيتهيألي صعب لكن مفيش حاجة صعبة علي المعلم سيد .
: وانت تفتكر ممكن مديحة كانت تعمل كده مع سيد ؟
: لأ يا بيه .
: اشمعني هي عملت كده معاك انت كده ومش تعمل كده مع سيد ؟
: علشان سيد ابن جوزها وهوتخاف يفضحها .
: انت تعرف اصحاب سيد ؟
: ايوه يا بيه .
: عاوز اعرف اقرب اصحابه له اللي ممكن يفضفض معاهم وميخبيش عنهم حاجة ويقولهم كل اسراره .
: مفتكرش يا بيه ان المعلم سيد يقول اسراره لحد ، ده كان حويط وبحره غريق متعرفش تجيب اخره .
: طيب قولي اقرب اصحابه له ؟ بقلمي/ عادل عبد الله
: اقرب اصحابه كانوا اتنين عبد المنعم اللي شغال في المدبح و حمدي صاحب السنترال اللي جنب المحل .
: طيب يا هيما انت هتمشي دلوقتي لكن لو احتجنالك تاني في التحقيقات هنبعتلك .
بعد انصراف هيما من امام الضابط سليمان جلس الضابط هشام شارد الذهن يفكر ، فسأله الضابط سليمان : بتفكر في ايه يا حضرة الظابط ؟
: بفكر سعادتك اذا كان هيما صبي المعلم برئ وفتحي بتاع المخدرات كمان مش هو اللي قتل وحمدان الصعيدي كمان مش هو القاتل ولا ولاد ام عماد اللي عوكل عاكس اختهم ولا كمان المهندس اللي المعلم رفض يجوزه بنته اومال مين القاتل ؟
: لسه حمدان مش متأكد من براءته لكن بعد ما اتأكد من حاجة الاول ؟
: حاجة ايه سيادتك ؟
: انا فرضية ان اللي قام بالجريمة دي المعلم عطية نفسه بدأت تزيد عندي .
: قصد سعادتك ان سيد ابنه كان ماشي مع مراته مديحة وهو عرف وعلشان كده قام بالجريمة وانتحر ؟
: بالظبط كده يا هشام .
: طيب يا فندم ممكن لو اكتشف كده يقتل سيد ومديحة انما هيقتل باقي العيلة ليه ؟
: احنا منعرفش هو اكتشف كده ازاي ولا ايه اللي حصل لما اكتشف كده ، كل الملابسات دي ممكن تتعرف لو اتأكدنا من ان ده هو سبب الجريمة .
: سعادتك واحنا هنتأكد ازاي ؟
: لو اتأكدنا من ان كان في علاقة بين سيد ومديحة يبقي كل الملابسات بتقول ان المعلم هو اللي قام بالجريمة وانتحر .
: وهنتأكد ازاي يا فندم ؟
: اكيد سيد ممكن يقع بكلمة مع واحد صاحبه حتي لو فلتة لسان .
: قصد حضرتك اصحابه عبد المنعم وحمدي ؟
: ايوه عاوزك تجيبهم هما الاتنين فورا علشان ناخد اقوالهم . بقلمي/ عادل عبد الله
: حاضر يا فندم .
وبعد اقل من ساعة كان حمدي قدام الضابط سليمان .
: اسمك وسنك وعملك ؟
: اسمي حمدي ٣٢ سنة صاحب محل سنترال .
: تعرف ايه عن سيد ابن المعلم عطية الجزار ؟ انا عرفت انه صاحبك .
: ايوه يا فندم سيد الله يرحمه كان صاحبي واعرف عنه كل خير .
: عاوزك تقولي كل حاجة عن سيد ؟
: بخصوص ايه يا فندم ؟
: يعني كان يعرف ستات ولا لأ ، كان عنده شغل تاني غير محل ابوه ولا لأ ؟ يعني يا حمدي اي حاجة عن سيد محدش ممكن يعرفها غير واحد يكون صاحبه زيك .
:سيد يا بيه كان صاحبي اه لكن كان مش بيقول سره لحد ، دايما سره مع نفسه سواء بخصوص الشغل او الحريم .
: واكيد كنت تعرف انه له شغل تاني غير محل ابوه ؟
: ايوه اعرف انه كان مشارك عبد المنعم جزار المدبح في شغل تاني .
: تبقي اكيد انت كنت تعرف انه كان بيعرف ستات ؟
: ايوه طبعا يا فندم ، ده كل الناس كانت عارفة عنه كده ؟
: واكيد تعرف يا حمدي انه ماشي مع مين ؟
: لا يا فندم معرفش ، اللي كان صاحبه اكتر مني و الوحيد اللي ممكن يعرف سر من اسراره عبد المنعم الجزار بتاع المدبح .
طيب يا حمدي اتفضل انت امشي .
بعدها دخل عبد المنعم ووقف قدام الضابط سليمان .
: اسمك وسنك وعملك ؟
: اسمي عبد المنعم ٣١ سنة جزار في المدبح .
: تعرف سيد ابن المعلم عطية الجزار ؟
: ايوه يا بيه ده سيد الله يرحمه كان صاحبي .
: تعرف عنه ايه ؟
: اعرف انه كان راجل جدع وصاحب صاحبه .
: سيد كان مشاركك في شغل ؟
: ايوه يا بيه كنا متشاركين في لاموأخدة مواشي كنا بنربيها ونبيعها لحسابنا بعيد عن شغل ابوه وشغلي في المدبح .
: يبقي اكيد كنت تعرف ان سيد بيمشي مع ستات ؟
: ايوه يا بيه .
: كان ماشي مع مين بقي ؟
: لأ يا بيه انا اعرف انه بيمشي مع حريم اه انما مين معرفش .
: ازاي بقي !! ازاي صاحبك ومشاركك في شغل ومعاك كل اسراره ومتعرفش بيمشي مع مين !!!
: لا يا بيه ، سيد كان سره في الحريم مع نفسه مش بيقوله لحد .
: اومال عرفت منين انه بيمشي مع ستات ؟
: من التليفونات الكتير اللي كانت بتجيله وكان مأجر شقة بيقابل فيها الحريم اللي يعرفهم اكتر من كده معرفش .
: تعرف مكان الشقة دي فين ؟
: لا يا بيه .
: طيب يا عبد المنعم اتفضل امشي .
بعد انصراف عبد المنعم وجه الضابط هشام للضابط سليمان سؤاله : وبعدين يا فندم ؟ استجواب اصحاب سيد الاتنين مش فادنا في القضية ابدا ، هنعمل ايه دلوقتي ؟
: انا عاوز اشوف تقرير الطب الشرعي تاني من فضلك .
: حاضر يا فندم دقايق يكون عندك .
وبعد دقائق فتح الضابط سليمان التقرير وبدأ قرائته وبعد دقائق معدودة ضحك ضحكة عالية ثم قال للضابط هشام خلاص يا هشام ببه القضية خلصت واللغز انكشف .
: سيادتك عرف القاتل ؟؟
: ايوه .
: مين ؟