رواية البر التاني الفصل الحادي والثمانون 81 بقلم لولو محمد
رواية البر التاني الجزء الحادي والثمانون
رواية البر التاني البارت الحادي والثمانون
رواية البر التاني الحلقة الحادية والثمانون
مغاورى يحط هند و امين يحط الولد و يجروا النار مغطيه الميه مش شايفين حاجه امين يجرى يجيب خرطوم الميه بتاع الجنينه و مغاورى يجيب مشمع تغطيه حمام السباحه
مغاورى/ امين امين ساعدني
امين يمسك طرف و مغاورى يمسك طرف و كل واحد واقف على جنب و يعدوا على وش الميه بالراحه النار تتكتم لحد ما يغطوا الحمام كله و يسحبوا المشمع لاخر الحمام اول المايه تبان النار مطفيه امين ينط فى الميه يطلع عباده و يبدا يضغط على صدره واحد اتنين تلاته و لسه هينفخ فى بقه عباده يفتح
امين / عباده
عباده / انت كنت هتعمل ايه
مغاورى / انتوا هتحكوا لازم نلحق هند على المستشفي
مغاورى يقوم يجرى يشيل هند من على الارض و يجرى امين يقوم عباده
امين / كويس قادر
عباده / انا مش حاسس باى حاجه اساسا امشوا انتوا انا هستنى هنا
امين / ليه
عباده / لازم اتاكد انها ماتت
امين و عباده يروحوا ناحيه حمام السباحه و يضربوا نار ناحيه الجثه امين يطلع ولاعه من جيبه و يولعها و يرميها فى الميه النار تمسك فى الحمام
امين / لو لسه عايشه بعد كل ده يبقي تضربنى انا بالنار ارحم
عباده يبتسم و يطلع الموبايل و يتصل بحد
عباده / لقيناها
مختار / فيرا
عباده / شبعت موت
مختار / اخلى
عباده / انا الكبير و انا اللى اقول اخلى … اخلى
امين ماسك نفسه من الضحك عباده يبصله
عباده / ايه ؟
امين / اقولك ايه بس يا كبير
امين يجرى يشيل الولد
امين / محتاج يروح المستشفي
امين و عباده يتحركوا
……………….
فى المستشفى
قلق و زحمه كبيره جدا زياد يدخل يقابل عباده قاعد و ممرضه بتعالجله الحرق فى كتفه و دكتور بيطلع الطلقه من كتفه التانى و هو قاعد مش حاسس باى حاجه
زياد / ممكن افهم ايه اللى حصل ده
عباده / مبروك الترقيه يا زياد باشا
زياد / نعم
عباده / انت ما وصلتلكش البشاره و لا ما بتشوفش الاخبار
زياد يبص على التليفزيون مكان ما عباده مشاور و يقرب
المذيعه / كما تمكنت الشرطه المصريه من اللقاء القبض على عشرين فردا من افراد التنظيم بعد اشتباكات عنيفه و كان بحوزتهم كميات من البى كاى و جارى التحقيق معهم و معانا معالى المحافظ فى مداخله هاتفيه نستفسر منه عن العمليه الو معالى الوزير المحافظ
زياد يبص على عباده عباده مبتسم
………………………
قدام اوضه العمليات
الكل واقف متجمع و بيقرا قران و فاطمه ماسكه الخاتم فى ايدها و بتبصله ممرضه تطلع من جوه الكل يجرى عليها
مختار / ايه الاخبار
الممرضه / بقت احسن بس ربنا يعوض عليكوا فى الجنين بقي
مختار / فداها المهم تقوم بالسلامه
الممرضه تبتسم و تمشي و عبد الله يسجد فى الارض و شيري تعيط من الفرحة انتصار تاخدها فى حضنها ثوانى و هند تطلع على ترولى و هى فاقده الوعى فاطمه تجرى جنبها و تلبسها الخاتم تانى و تطبطب على ايدها و تبتسم
……………………
فى اوضه تانيه
امين قاعد جنب الولد عباده يفتح الباب امين يقف
عباده / كلمتوا امه
امين / النهرده باذن الله هنوصلها عملت ايه فى رشيد و سمر
عباده / وعدت مختار اننا هندفنهم فى المقابر بتاعتنا يتغسلوا و نطلع طلعه واحده
مغاورى يدخل
مغاورى / السلام عليكم
عباده / طمنى على المصابين بتوعنا
مغاورى / مش قليلين و فيهم اصابات حرجه و فى ناس ما لحقناهاش للاسف
عباده الحزن يبان على وشه
مغاورى / بس بيقولوا هند فاقت و هينقلوها البيت مش فاهم ليه السربعه مش كانت استنت لما نطمن عليها
عباده / هند واخده بى كاى زيي
مغاورى / يا ليله مطينه بطين
عباده / مغاورى … كلم سماح و شوف ان كانت تحب تروح معاك
مغاورى يبتسم
عباده / خد بالك منها المرادى
مغاورى / فى عيني
عباده يهز راسه
………………
على الطريق فى البلد
خليفه و مراته و عياله بيعبوا عفشهم على عربيه نص نقل عربيات الزنايته تعدى خليفه يبص مختار يفتح الشباك و يبصله باحتقار و يقفل الشباك تانى و خليفه باصص فى الارض
عباده / انت هتعدى اللى عمله بالساهل
امين / دا يستاهل الدبح
مختار / اكراما للميتين كان غالي عليهم
هند / كان غصب عنه
مختار / كان قالنا ما كناش اديناله ضهرنا
عباده/ سالته بدل المره الف كان بيكدب عليا فى وشي
مختار / واهو عمل الصح و مشي قبل ما الناس تعرف اللى عمله سوق سوق خلينا نروح
امين يكمل سواقه و الكل مضايق
……………….
فى المستشفى
محمود نايم فى السرير و امل و ممدوح واقفين بيتكلموا مع دكتور
امل / بس معقول كل ده فى يوم و ليله
الدكتور / واضح ان بقاله فتره طويله بيتعرض لضغوطات نفسيه قويه و واضح انه كان بيكتمها جواه بدليل انكوا ما تعرفوش عنها حاجه اهو و دا اكيد ضاعف من تاثيرها على صحته النفسيه
امل / بس هو علاطول نايم كدا
الدكتور / دا تأثير المهدئات اللى بياخدها
ممدوح / طب هو لما بيفوق وضعه بيبقي عامل ازاى
الدكتور / احيانا تايه و احيانا عنيف
امل / عنيف !!
الدكتور / حضرتك دا مريض نفسي يعنى فاقد للاهليه يعني تتوقعى منه اى حاجه
امل تبص لممدوح بحزن
ممدوح/ احنا اسفين جدا على ازعاج حضرتك
الدكتور / ابدا بالعكس انا رايي ان وجودكوا و متابعتكوا للحاله اكيد هتفرق معاه جدا
ممدوح / اكيد
الدكتور / عن اذنكوا عشان عندى مرور على المرضي
ممدوح/ طبعا اتفضل و اسفين مره تانيه
الدكتور يمشي امل تمسك ممدوح من دراعه
امل / ما فيش مستشفي اعفن من دى نحط فيها ابويا و بعدين انا مش مرتاحه خالص الدكتور ده و مش فاهمه منه اى حاجه
ممدوح / و لا انا
امل / طب ما نسال عن دكتور شاطر يبص عليه حتى لو على حسابنا
ممدوح / انا ما اعرفش حد بس اللى يسأل ما يتوهش تعالى اروحك بقي و اللحق الشغل و نبقي نشوف الموضوع ده لما ارجع بالليل بقي
امل / تمام
امل تمشي و هى زعلانه و ممدوح جنبها
…………………
فى اوضه هند
مختار شايل هند يحطها على السرير و الكل حواليها هند تبص لفاطمه
هند / خاتم انقذنى يا بطه
فاطمه / ما كدبتش لما قولت هتطلعى عنيهم
مختار / بقولكوا ايه يا جماعه انتوا منورين و كل حاجه بس انا مطبق و محتاج ارتاح ساعتين
انتصار / حقكوا … لو احتاجتوا اى حاجه نادونى انا فى اوضتى
هند تبتسم و الكل يطلع بره و شيرى واقفه مختار باصصلها تبتسم و تمشي
هند / ليه كدا يا مختار
مختار / محتاج اتكلم معاكى
هند / انا عارفه هتقول ايه انا عارفه انى واخده البى كاى و عارفه انا داخله على ايه
مختار / انا عارف انك قدها اللى خلاكى تعدى من كل ده عارف انك هتقدرى ان شاء الله تعدى من دى كمان
هند / ان كان وجعى فى البى كاى فكل اللى فى السرايا موجوعين و كل واحد و وجعه كل واحد واقف عشان يسند التانى مع انه محتاج لاى حد يسنده ام فاتن و اختك كل واحده خسرت اخوها و جوزها فى يوم واحد امين اللى خسر ابوه و خاله مريم و انت و عباده و كلكوا
مختار / كل دول غيرك كل دول عايشين فى الهم ده من يوم ما وعيوا على الدنيا بس انتى شوفتى عباده
هند / هتبقي جنبى صح
مختار / اكيد
هند / يبقي هنعديها ان شاء الله
مختار / حاولى ترتاحى شويه تمام
هند تهز راسها و تفرد نفسها و مختار ياخدها فى حضنه و نظرات الحزن ماليه عنيها
……………….
فى اوضه مريم
انتصار تدخل تلاقي مريم قاعده على السرير بتزاكر
انتصار / هعطلك ؟
مريم / ابدا تعالى اتفضلي .. انا بس كنت بحاول … يعني اشغل نفسي بحاجه مفيده
انتصار / خير ما عملتى
انتصار تقعد جنب مريم و باصه فى الارض و مريم بصالها
انتصار / انتى عامله ايه
مريم / حاسه ان فى حاجه كبيره اوى نقصانى
انتصار / خدنا بتاره و بردنا ناره
مريم / بس ابويا ما رجعش ما حدش من اللى راحوا رجعوا
انتصار / هند رجعت
مريم تبص لانتصار
انتصار / ابوكى كان بيحبك اوى يا مريم اخر العنقود سكر معقود كان مامنى لو ربنا ما كانش كاتبله يحضر فرحك تتعملك ليله و لا الف ليله
مريم / و دى هتبقي ليله من غيره ياما
انتصار عنيها تتملى دموع مريم تعيط
مريم/ انا مش مصبرنى على فراقه غير انى متاكده انه ان شاء الله فى مكان احسن
انتصار / ان شاء الله مش شهيد يا بنتى
انتصار تمسح دموع مريم
انتصار / ابوكى كان نفسه يشوفك احسن حاجه فى الدنيا و انتى قدها
مريم / انا بعمل كل اللى اقدر عليه
انتصار/ انا كنت حالفه انى ادبح لما هند قالتلى انها حامل هخليهم يدبحوا و ياكلوا رحمه و نور و كمان عشان سلامه هند و الرجاله و انتى زاكرى و اعرفى انك فى اى وقت تحتاجى تتكلمى فيه انا لسه باقي فى عمرى اسمعلك
مريم / ربنا يديكى الصحه و طوله العمر
انتصار تقوم تبوس راس مريم
انتصار / ركزى فى دروسك و ارفعى راسنا
انتصار تمشي و مريم متبعاها بحزن
…………………….
فى شقه هشام
هشام نايم البلطجى يدخل يتسحب و الدنيا ضلمه و فى ايده مسدس كاتم للصوت ينغز بيه هشام يصحى
هشام / ايه ده فى ايه مين انت مين
البلطجى / اصحالى كدا يا حيلتها بدل ما اصبغلك الملايه البيضه دى احمر
هشام / انت دخلت ازاى و عاوز منى ايه
البلطجى / فين الفلوس اللى سرقتها من وسام
هشام / وسام مين انا ما سرقتش حد
البلطجى ينغزه بالمسدس مرتين
البلطجى / ما تستهبلش ما تخلينيش ازعلك
هشام / يا عم الشقه عندك فتشها انت تاعبك قلبك معايا ليه
البلطجى / تصدق معاك حق
البلطجة يضرب هشام طلقه فى رجله هشام يصرخ البلطجى يشد مخده و يكتم نفسه بيها
البلطجى / فين الفلوس يا ابن الكلب انطق بدل ما اقتلك فين الفلوس
البلطجى يشيل المخده هشام مفتح عنيه و ما بيتحركش يهزه جامد اكتر من مره و يتخض و يفتح الدولاب ينزل الهدوم فى الارض و يفتش فى الشقه و يقلبها ما يلاقيش الفلوس يطلع يجرى
…………………………
فى شقه يوسف
امل و يوسف بيتخانقوا و اسراء و ممدوح و حمدى قاعدين بيتابعوا
يوسف/ و انتى نمتى قومتى اكتشفتى ان المستشفى دى مش مناسبه لبابا
امل / انا مش قادره اقتنع ان بابا فجاه كدا يدخل مستشفى المجانين
يوسف / مهو جهلك ده اللى جايبنا لورا
امل / انا اتكلمت مع تلت دكاتره النهرده
يوسف / افندم تلاته !! و عرفتيهم منين دول كنتى بتتعالجى من ورانا
امل / عشان ابويا اعمل اى حاجه
يوسف / بتتكلمى كانى مقصر
امل / طب ليه رافض الدكاتره دول يشوفوا بابا
يوسف / عشان دول نصابين ابوكى كشف عليه دكاتره المستشفي يبقي ايه لزمتها الفضايح
امل / فضايح ايه
يوسف / مهو لو مستشفي خاص كنت قولت حجزوه عشان يسحبوا مننا فلوس انما دى مستشفي حكومى هيستفيدوا ايه بس من كل ده
امل / يا يوسف نطمن و خلاص
اسراء / و فيها ايه اما تريح اختك و اهو زياده اطمئنان مش أكتر
يوسف / اعملوا اللى يريحكم انا طول النهار واقف فى المحل و راجع تعبان مش فايقلكوا
يوسف يدخل الاوضه و يرزع الباب وراه
……………….
قدام اوضه هند
الكل واقف عباده يدخل متسند على خديجه و باين عليه التعب فاطمه تشوفه تجرى عليه
فاطمه / حد عاقل يعمل كدا مش كفايا اللى جوه هتبقي خديجه كمان … رجع عباده اوضته يا امين
عباده / هى عامله ايه
باب الاوضه يتفتح و صوت صريخ شديد لهند يخرج معاه و يروح لما الدكتور يقفل الباب الكل باصص للدكتور
عباده / هى وضعها صعب للدرجادى
الدكتور/ انا مش هقدر اخبى عليكوا مدام هند خسرت دم كتير و جسمها ضعيف جدا
انتصار / مش فاهمه يعني ايه
الدكتور / يعني الحاله صعبه و احتمال انها تعدى منها قليل اوى
فاطمه / تف من بقك يا دكتور دى بت جبل بميت راجل هى بس اللى تبان من بره خرعه و ما لهاش فى حاجه
الدكتور / على العموم انا اديتها حقنه منوم هستاذنكوا اروح ارتاح شويه و ياريتك يا كبير انت كمان ترتاح
عباده / هرتاح تشكر يا دكتور
الدكتور يمشي فاطمه تفتح الباب و تدخل صمت شيرى تفتح الباب و تدخل تلاقى السرير فاضي
فاطمه / مختار … هند
مختار يرد من جوه الحمام
مختار / احنا فى الحمام سبونا لوحدنا
فاطمه / جايه اساعدك
مختار / تسلمى بس انا مش محتاج مساعده
شيرى تروح تحط ايدها على السرير تلاقيه مبلول و مبهدل ترجيع تشيل الملايه و تبدا تنضف فاطمه تجرى عليها و تساعدها شيرى بتعيط
فاطمه / بتعيطي ليه بس دلوقت
شيري / صغيره اوى على كل ده
فاطمه / والله انتى ما عارفه بنتك دى بت بمليون راجل و باذنك يارب هتعدى منها
شيري / يارب بقي يارب
فاطمه / خلصي بسرعه قبل ما يطلعوا
فاطمه تروح تخبط على باب الحمام
فاطمه / احنا بنضف السرير .. محتاج غيار ؟
مختار / معايا شكرا
فاطمه تروح تساعد شيرى
…………………
فى المستشفى تانى يوم
فى مكتب المدير الدكتور بيتخانق مع المدير
الدكتور / يا دكتور حضرتك لازم تبلغنى ان فى حد هيكشف على الحاله و بعدين ما دام هم مش شايفين اننا عارفين نشوف شغلنا بيجيبوه عندنا ليه
المدير / انا ما كنتش اعرف ان فى دكتور تانى هيشوف الحاله دول جم وقت الزياره و بعدين انا مش فاهم فين المشكله اصلا
الدكتور / يا دكتور المريض ده بتاعى
المدير / يا دكتور حضرتك دكتور شاطر و لازم تبقي واثق فى تشخيصك اكتر من كدا
الدكتور / حضرتك شايف كدا تمام عن اذنك
الدكتور يطلع بره و هو بيتكلم فى التليفون
الدكتور / بقولك ايه يا شكرى احنا ما اتفقناش على كدا .. ما اهداش .. الجدع بتاعك اللى جبتهولى … اه محمود الجمل … اهله مش ساكتين و انا مش ناقص روشه … اما نشوف
…………………..
فى شقه يوسف
العيله كلها مجتمعه
يوسف / و هو انا معترض ما ننقله فى احسن مستشفى بس للاسف الحكايه دى محتاجه فلوس و انا شخصيا لحد دلوقت لسه باخد مصروفى من امى
اسراء / ان كان على الفلوس امرها محلول
يوسف/ منين هى حكايه يوم و لا اتنين و بعدين المستشفيات الخاصه اليوم فيها بيقف بالشئ الفلانى يعني فتوحه ما لهاش اول من اخر
امل / نتصرف ناخد قرض نستلف نعمل اى حاجه
يوسف / والله انا شخصيا ما حلتيش اى حاجه ابيعها زى ما انتوا عارفين ابويا كان واخد اللى ورايا و اللى قدامى و حاطتهم فى المحل شوفى بقي جوز اختك لسه ابويا شاريله عربيه جديده و لا ايه يا معتز
معتز / ايوه بس انا كنت بدفعله اقساطها
بنت / معتز شغال ليل نهار عشان يدفع لبابا الاقساط دى
يوسف / و دهبكوا ايه هتستخسروه فى ابوكوا
شاب / و تبيع اخواتك دهبهم ليه ما الحج كان عنده فلوس تعالج بلد
يوسف / عنده بس ما نقدرش نتصرف فى جنيه منها
حامد / الا اذا
امل / الا اذا ايه
حامد / يوسف يحجر على ابوه
يوسف / انت بتقول ايه يا عمى ازاى يعني ما ينفعش طبعا
حامد / ده الحل الوحيد كدا تقدر تتصرف فى فلوس ابوك و تنقله احسن مستشفى و لما ربنا يشفيه ان شاء الله كل حاجه هترجع لطبيعتها
يوسف / بس انا ما اقدرش امشي فى حاجه زى دى لوحدى انا ما اعرفش اتصرف فى الحكايه دى
الشاب / يا سيدى نشوفلك محامى و نمشي معاك فيها
يوسف / انا على اخر الزمن هحجر على ابويا
حامد / غمه و تنزاح يا يوسف يا ابنى و بعدين مش الضرورات تبيح المحظورات
يوسف / انتوا شايفين كدا
يوسف يبصلهم ساكتين
يوسف / على بركه الله شوفلنا محامى يا عمى
حامد يهز راسه و يوسف يقعد على كرسي و يعمل متاثر
………………….
فى اوضه هند
هند بتصرخ و تتلوى و تعيط و مختار حاضنها
هند / ابوس ايدك مش قادره
مختار / انتى وعدتيني خلاص والله هانت
هند / ما بيقلش والله ما بيقل بيزيد مش قادره يا مش قادره
مختار / لو مش عشانى عشان امك و اخواتك عشان كل اللى بتحبيهم و يحبوكى و الله هتعدى
هند / بموت يا مختار مش قادره ارحمنى بقي ارحمنى ابوس ايدك ارحمنى و موتنى بقي
مختار / هتعدى يا هند الدكتور تلاقيه بس راح لعباده الاول المرادى معلش استحملى خمس دقايق بس
هند / بيريحكوا انتوا مش بيريحنى انا دكتوركوا بيرحيكوا منى بس وجعى ما بيروحش انا مش قادره والله ما قادره
مختار يحضنها اوى و الدموع ماليه عنيه
مختار / حقك عليا والله كان غصب عنى والله كان غصب عنى كنت فاكر انى هلحقه ما كنتش اعرف انى بسيبك لوحدك حقك عليا سامحيني سامحيني
الدموع تنزل من عنين مختار يبص على هند فاقده الوعى يجس نبضها الباب يتفتح و شيري تدخل
شيري/ الدكتور بره عباده ما كانوش عارفين يثبتوه و شرح دراعه بالابره لحد ما نيموه … هى مالها جرالها ايه
مختار صوابعه على رقبتها و مختار واضح عليه التعب
مختار / نايمه
شيري / نامت لوحدها من غير الحقنه ؟ طب امشي الدكتور و لا ادخله و لا اعمل ايه
مختار ساكت و هند فى حضنه
شيري / طب تروح ترتاح و انا افضل جنبها شويه
مختار يهز راسه لا
شيري / انت ما اكلتش حاجه و لا ارتحت
مختار / انا مرتاح هنا روحى حضرتك ارتاحى
شيري تبصلهم بحزن
شيري / اخليني جنبكوا
مختار / لا انا هنام جنبها شويه لما … لما تصحى هنادى حضرتك تقعدى معانا حبه
مختار يبص لشيري و يبص على هند شيري تبص فى الارض تطلع بره و تقفل الباب و تنهار من العياط انتصار تجرى عليها
انتصار/ فى ايه البت جرالها حاجه فى ايه
شيري تمسح دموعها
شيري / نيمها … معرفش ازاى بس نايمه فى حضنه جوه
شيري مش قادره تاخد نفسها
عبد الله / انتى كويسه يا ماما
شيري / بنتى بتروح منى يا عبد الله … بنتى … انا كويسه كويسه… عن اذنكوا هروح ارتاح شويه
عبد الله/ تعالى اوصلك اوضتك
شيري / لا يا حبيبي كتر خيرك خليك هنا جنب اختك يمكن اخوك يحتاجك فى حاجه عن اذنكوا
شيري تسيب المكان و تمشي
فاطمه / انا هخليني معاها
انتصار / على الهادى يا ام عباده
فاطمه تبصلها و تهز راسها و تمشي
………………….
فى اوضه عباده
عباده نايم و خديجه بتلزق بلاستر على ايديه هى بتعيط و سماح بتساعدها
سماح / مغاورى بيقول اننا فى عنق الزجاجه و ان لما هند و عباده يقوموا على رجليهم كل حاجه هترجع زى ما كانت فى البلد
خديجه / ما عدتش قادره يا سماح هو اللى واخد الحبايه و انا اللى بتوجع و لا قادره اخد لا منوم و لا مسكن بسبب اللى فى بطنى … حتى ابنه موجوع عليه بيخبط فى بطنى
سماح / بجد بدا يتحرك
خديجه / مش اول مره بس من ساعه ما عباده بقي فى اللى هو فيه و الخبط زاد
سماح / ما تروحى تكشفى يا خديجه بدل لا قدر الله اللى بيحصل حوالينا يكون اثر عليكي و لا حاجه
خديجه / هروح لما يقوم بالسلامه مش هقدر اسيبه لوحده موجوع مش هقدر ابعد عنه
سماح / مهو بيبقي نايم مش حاسس بحاجه
خديجه / سامعنى يا سماح بيبقي سامعنى بيحس بيا
خديجه تمسح دموعها
خديجه / يارب اشفيه و اشفي هند و كل الناس يارب ما لناش غيرك
خديجه تعيط سماح تاخدها فى حضنها
……………………
فى القسم
وسام / ايوه حضرتك انا الخلاف اللى بينى و بين هشام كان اخره القسم لكن انا لا دخلت بيته و لا ليا علاقه بموته
الظابط / تفتكرى كان ليه اعداء غيرك
وسام / يعني هو ما نصبش غير عليا ما اكيد له اعداء غيرى
الظابط / و انتى طبعا ما تعرفيش عنهم حاجه
وسام/ انا الضحيه هنا حضرتك انا اللى اتنصب عليا فهمنى انه ابن ناس و خد كل اللى ورايا و اللى قدامى و كل اللى عرفته عنه طلع كدب اهو
الظابط / ايوه بس حضرتك لازم تعرفى ان كل الناس اللى يعرفوه لما حققنا معاهم كلهم ادونا اوصافك انتى
وسام / حضرتك انا كنت فى البيت مع ماما و البواب و الجيران عندى يشهدوا و بعدين انا بنت حضرتك يعني لا هعرف اكسر باب الشقه و لا اقتل هشام بالبساطه دى هو برده راجل و مش هيتقتل بالساهل يعني و بعدين ما اكيد القاتل ده حد شافه كاميره جابته فى سلاح للجريمه اى كانت الطريقه اللى مات بيها بصمات فى المكان اكيد مش انا اللى هعرف حضرتك شغلك يعني
الظابط متابعها و حاط ايده على خده و رافع حجبه
الظابط / بس واضح انك بتفهمى فى شغلنا اهو
وسام / ما فيش اكتر من الافلام فى التليفزيون عربى و اجنبى يعني و دى بديهيات مش قانون يعني
الظابط يهز راسه و هو مبتسم
…………………………..
قدام المحكمه بعد فتره
امل / النهرده باذن الله هكلم المستشفى ننقل بابا خلاص المحكمه حكمت و ما عدش فى اى سبب اننا ناجل انا فعلا مش مبسوطه من المستشفى دى
اسراء / معاها حق يا يوسف كذا مره اروح فى مواعيد الزياره و يمنعونى و كل مره بحجه شكل و كمان الدكتور مش مريحنى خالص
يوسف / باذن الله النهرده هروح المكتب و اشوف الوضع المالى و انقله فى احسن مستشفى
حمدى / انا مجهزلك كل حاجه جرد لكل البضاعه اللى فى المحل و كمان لقيت مشترى بسعر كويس بسبب الظروف هو صحيح هياخدها بجملتها بس اهو نسيل اى حاجه
يوسف / حتى لو بخساره انا ما عنديش مشكله اهم حاجه عندى السرعه
حامد / ما تنسوش اتعاب المحامى يا جماعه الناس دى ما بتشتغلش لله و للوطن
يوسف / ما تقلقش يا عمى كل واحد حقه محفوظ … بقولك ايه يا معتز معلش توصلهم البيت عشان انا ورايا شغل كتير
معتز / عنيا
حامد / خدنى فى طريقك يا يوسف
يوسف يبص لحامد
حامد / اصل العربيه عملتها معايا تانى و دا وقت خروج موظفين و مش هلاقى لا مواصلات و لا توكسه
يوسف / على راسي يا عمى اتفضل
حامد و يوسف يمشوا فى اتجاه و الباقين يمشوا فى اتجاه تانى خالص
…………………….
فى اوضه هند
هند بتغسل وشها و مختار مسندها
مختار / تحبى اشغلك السخان تستحمى
هند تهز راسها لا
هند / شويه كدا فعلا مش قادره يا مختار
مختار / براحتك ما تضغيش على نفسك احنا كنا فين
هند / انا مش قادره اقف
مختار يسندها لحد ما يوصل للسرير الباب يخبط
مختار / ارتاحى انتى تلاقى ام فاتن جيبالك لقمه و لا حاجه
هند / ابوس ايدكوا تعبت معدتى مش قابله اى اكل يا مختار
مختار يفتح الباب و هو بيتكلم
مختار / مهو من كتر الترجيع لازم تاكلى عشان
مختار يلاقى عباده واقف بعيد الاتنين يبصوا لبعض و يبتسموا
مختار / ثوانى يا هند
مختار يطلع و يقفل الباب
عباده / نايمه و لا ايه
مختار / لا صاحيه الحمد لله فرحت اوى انى شوفتك عامل ايه
عباده / احسن كتير وجع خفيف اعبط حبايه مسكن تضيعه
مختار / هند لسه تعبانه شويه بس طبعا احسن كتير
عباده / ان شاء الله تخف خالص و ترجع احسن من الاول
مختار/ ان شاء الله
عباده / انا جيت اطمن عليها قبل ما انزل هتعوزوا حاجه اجبهالكوا و انا راجع
مختار / استنى شويه يا عباده ما ينفعش الناس تشوفك تعبان
عباده / و ما ينفعش الناس ما تشوفنيش كل ده و بعدين انا مش هتاخر لفه بالعربيه و راجع علاطول و ما تقلقش يا سيدى مش هطلع لوحدى و هبقى اخلى امين هو اللى يسوق مرتاح كدا
مختار / يا عم انا بتكلم من خوفى عليك بس انما انت اكيد عارف بتعمل ايه
عباده يخبط مختار على كتفه و هو مبتسم و يمشى مختار يدخل الاوضه تانى
……………………
على قهوه
يوسف / انت مستعجل على ايه انا لسه مسكت جنيه فى ايدى
حامد / مهو بعد العيد ما بيتفتش الكحك يا ابن اخويا
يوسف / يا عمى هو انا هروح منك فين بس و بعدين قدامك انا لسه قايل لعمى يبيع و يصفى البضاعه
حامد / ايوه بس البضاعه دى ما تجبش مقدم عربيتين و مصاريف علاج ابوك
يوسف/ علاج ابويا ايه هو ابويا كان عيان لا سمح الله
حامد / لا بس لازم يفضل باين عيان يعني اى كان المستشفى اللى هيتنقلها محتاجه رشه حلوه
يوسف / ما تقلقش محلوله ان شاء الله انت بس اهدى عليا انا قولتلك شهرين واهى الدنيا مشيت اسرع مما كنا حاسبين و الدنيا سالكه اهى مش هيبقي ما شوفوهمش و هم بيسرقوا شافوهم و هم بيتقاسموا يا عمى
حامد / ماشي هديك اسبوعين بحالهم محبه منى على ما العربيتين يوصلوا
يوسف / انا اتفقت انى هدفع مقدم عربيتين بس لا مؤاخذه لازم ابقي فى الصوره دى فى الاول و الاخر هتشتغل اوبر يعني مش عربيه المحافظ هى
حامد / دا كلام جديد ده
يوسف / ما انا مش اهبل انت مش ليك العربيات تكون موديل السنادى
حامد / تقوم تروح تجبلى عربيتين صيني
يوسف / و لا صيني بس حاجه فى المعقول اصلى من غير زعل عارفك تخصص ابو بلاش كتر منه
حامد / يبقي رجلى على رجلك
يوسف / ماشي بس زى ما اتفقنا ما شوفوهمش و هم بيسرقوا ما ينفعش يتخانقوا و هم بيتقاسموا تبوظ عليا و عليك
حامد يبص ليوسف يوسف يقوم يقف
يوسف/ عن اذنك انا بقي عشان اللحق المحل صحيح لو عندك مشترى للمخروبه دى بسعر كويس هات
حامد / انت هتبيع المحل
يوسف/ لو لقيت سعر حلو و كاش هبيع ما لقيتش هوضبه و اقلبه كافيه
حامد / بس انت كدا هتقلب الكل عليك
يوسف / من حكم فى ماله ما ظلم و المحاكم موجوده يلا سلام انا بقي
يوسف يمشي و حامد متابعه و بيفكر
………………………
فى سرايا الزنايته
فاطمه تدخل مسنده خديجه و مغاورى وراهم فاطمه تزرغط الكل يطلع
انتصار / خير يا ام عباده الدكتور قالكوا ايه فرحينا معاكى
فاطمه / بت زي القمر يسموها زى ما يسموها بس دلعها بطه انا بقول اهو
الكل يحضن خديجه
سماح / قولتى لعباده
مغاورى/ كلمته فى التليفون و جاى فى الطريق
مريم / الف مبروك يا خديجه ربنا يتملك على خير
خديجه / عقبالك
مغاورى / انا بقول بقي ما دام عباده قام بالسلامه و نزل يبقي نخلى الفرحه فرحتين و سماح تروح معايا و لا ايه يا ام عباده
فاطمه / هترجعها كدا كتيمي يا كبير الجوارحه
مغاورى/ و انا مش هردلك كلمه هفرشلها الطريق من هنا للبيت رمل
سماح / رمل !!!
مغاورى / ورد ؟ هفرشهالها ورد و هندبح حلاوه عباده و هند و سماح و اى ترضيه هتقولوا عليها هعملها بس خلاص بقي يا جماعه
فاطمه / ههههههههههههههههه و انا مش هكسر بخاطرك اتفق انت و مراتك و قول الكبير و شوف هيقولك ايه
عباده يدخل شايل شنطه من جواهرجى
عباده / يقولى على ايه
مغاورى / هروح سماح
عباده/ و ماله مصلحه
عباده يفتح الكيس و يطلع علبه قطيفه يفتحها جواها طقم دهب كبير يديه لخديجه و يبوس راسها
عباده / ربنا ما يقطع للكبير عاده … الف مبروك يا ست الستات ربنا يتملك على خير
خديجه / يخليك ليا
مختار ينزل و هو مسند هند و شيرى مسنداها من الناحيه التانيه فاطمه تشوفها تزرغط و انتصار تجرى تسندها معاهم
مريم / ايوه كدا طب والله لازرغط انا كمان
مريم تزرغط
عباده / عامله ايه
هند / والله مش هكدب تعبانه اوى بس اتخنقت من الاوضه
فاطمه / ايوه اخرجى اقعدى فى الجنينه شويه و سط الزرع و الخضره و خلى الشمس و الهوا يدخلوا جسمك و يردوا فيكي الروح كدا
انتصار / هسلقلك فرخه بلدى ترم عضمك لحسن دا انتى اتمقتى يا ضنايا
فاطمه / فرخه ايه اسلقي فردتين كوارع و اسقيها شوربتها خلى الدم يرد فى وشها شويه
هند / طلعنى تانى طلعنى
سماح / هو دخول الحمام زى خروجه و لا ايه خلاص
مريم / قومى قومى اما نروح نقعد فى الجنينه ورا شويه قومى
هند / انا نازله ابارك لخديجه و اطلع الف مبروك يا خوخه ربنا يتملك على خير
خديجه / يا حبيبتي كنت طلعتلك بنفسي
مختار / بس يا بنتى ما صدقنا خرجت من الاوضه
هند / ربنا ما يكتب عليك ابدا اللى انا فيه لا انت و لا اى حد
عباده / امين من كل قلبي
هند تبصله و تبتسم
عباده / قومى اقعدى فى الجنينه شويه جسمك محتاج الشمس هتفرق معاكى
هند تهز راسها و تبص لمختار الكل يتسابق على انه يسندها
…………………
فى القسم
وسام قاعده و البلطجى واقف قدامها
الظابط / انتى لسه هتنكرى احنا جبنا صوركوا سوا فى الكافيه اللى تم فيه الاتفاق و مكالمه التليفون
وسام / ما حصلش ما حصلش انا ما قولتلوش يقتله والله ما قولتله يقتله انا كل اللى كنت عوزاه انه يخليه يرجعلى فلوسي انا ما قتلتوش و لا كنت هستفيد حاجه من موته
الظابط / انصحك تشوفى محامى يمسكلك القضيه
وسام / محامى ايه انا ما ليش دعوه بكل ده انا بريئه انا عمرى ما دبحت فرخه هقتل ازاى بس
الظابط / خدوهم على الحجز
وسام تصرخ
وسام / ما قتلتوش بريئه و الله العظيم ما قتلته و الله ما ليا دعوه دا هو اللى نصب عليا ما قتلتوش و الله ما قتلته
العسكرى يشدها و يوديها الحجز و هى عماله تصرخ
وسام / والله ما قتلته اقسم بالله ما قتلته
ست تقوم من على البورش
الست / ايه الدوشه دى مش هنعرف ننام و لا ايه … جرا ايه يا بت مالك عامله بوليكه كدا ليه اترزعى هناك مش فيقالك
الست تشد وسام و تزقها فى جنب وسام تقعد ساكته و هى حاطه ايديها على بقها من الصدمه
…………………….
فى المضيفه
عبد الله قاعد بيزاكر باب المضيفه يتفتح و هند تدخل مسندينها عبد الله يقوم يجرى عليها و الفرحه مش سيعاه
عبد الله / الله الله الله ايه المفاجاه الحلوه دى يا قلبي
هند / عامل ايه فى المذاكرة
عبد الله / عندى امتحان الصبح
هند / على خير مش هعطلك انا بس حبيت اطمن عليك و اطمنك عليا
مختار / هنقعدها فى الجنينه الورانيه شويه تتهوى لو حبيت تريح حبه
عبد الله / احب جدا
هند / مش عاوزه اعطلك
عبد الله / ما جتش من عشر دقايق اشم هوا انا كمان
تعالى يا قلبي تعالى
عبد الله يسندها و يروح معاها الجنينه و سماح و مغاورى واقفين فى جنب تحت شجره
مغاورى / وحشتيني ايه بس طب قسما بالله سريرك نار و انتى مش فيه
سماح / على عيني والله بس خلاص ناكل لقمه و اجى معاك
مغاورى / طب و الورد
سماح / ابقي عوضنى بطريقتك بقي
مغاورى / عيني
سماح تبتسم
……………………
فى شقه يوسف بعد فتره
اسراء/ محل ايه اللى تبيعه يا يوسف امال ناكل منين
يوسف / يا امى انا صفيت كل الشغل اللى فى المحل هدفع مرتبات على ايه بقي فمشيت كل اللى كانو فيه و بعدين انا مش مقرر انى ابيع يعني الا لو جاب مبلغ محترم انما غير كدا هاجره او اغير النشاط
اسراء / ايوه بس المحل ده مش بتاعك لوحدك عشان تتصرف فيه لازم تلم اخواتك و تتكلم معاهم
يوسف / اخواتى مين يا ماما صلى على النبى اخواتى مش حاسين بحاجه دول عاوزين ينقلوا بابا فى مستشفى خاص من غير ما واحده فيهم تطلع جنيه من جيبها ما كل واحده عندها دهب يسد عين الشمس هو مين اللى جايبه مش بابا
اسراء / ايوه يا حبيبي بس انا مش عوزاك تدخل فى مشاكل معاهم
يوسف / ما تشغليش انتى بس بالك و انا ان شاء الله هعرف اتعامل معاهم كويس
اسراء / امرى لله هنعمل ايه بس
يوسف يبتسم و يبوس ايد مامته
…………………
فى سرايا الزنايته
الكل متجمع على الغدى
عبد الله / احنا نطلع نايل كروز كام يوم ننسي فيهم كل اللى عشناه و لا انتوا ناويين تضيعوا عليا اجازه نص السنه
هند / على فكره انا نفسي فيها اوى
فاطمه / ايوه بس خديجه و فاتن ما يستحملوش
فاتن / انا لا ما ينفعش انتوا خدوا العيال و انا سيبولى السرير اخد و ادى معاه فى موضوعاتنا الحيويه
خديجه / انا نفسي اعرف بتجيبيه منين النوم ده دا انا مش لاقيه وضع يوحد ربنا ارتاح عليه فاضلى تكه و انام واقفه زى الخيل
الكل يضحك
عباده / يا ستى هانت اولدى انتى بس و انا اخدك و نطلع نعمل عمره و لا حج احنا ما سافرناش شهر عسل
هند / لا بقي يا كبير انا عسلى ما يتحسبش و لا نسيتوا
فاطمه / انتى يا بنتى راشقه فى اى حاجه كدا مش كنتى لسه نفسك فى الكروز دى بتاعه عبد الله
مختار / ما ليها حق برده يا كبير احنا بقالنا كتير مضغوطين دا الواحد لسه مش مصدق انه فاق اقسم بالله
عباده / اتكلم عن نفسك و اسال امين احنا طالع روحنا ازاى و المجهود اللى بنعمله عشان بس نرجع البلد زى ما كانت ايام الكبير
مختار / و اسال امين ليه ما انا عايش معاكوا و شايف بس برده على الاقل بنام و نشبع نوم مش زى الاول يا اخى دا انا لسه امبارح هند مصحيانى مش عارفه تنام من شخير
الكل يضحك
هند / مش للدرجادى يعني
مختار / يا ستى سبيني افرح نمت و شخرت يا ناس دا انا كنت نسيت طعمه
عبد الله / رغى رغى و مفيش فايده ما تقول كلمتك يا كبير الاجازه عمرها قصير
عباده / يا سيدى هو انا قافل بوابه السرايا بالجنازير شوفوا مين عاوز يطلع و اتوكلوا على الله
عبد الله / استبينا طب بالنسبه لكتب الكتاب بقي
عباده / طب بالنسبه للمهر بقي
عبد الله / الاجازه الجايه يعني ماشي ما روحناش بعيد يعني
عباده / و الله الكبير الله يرحمه كان شارط التقدير
عبد الله / و انا اللى كنت فاكرك بتحبني
مختار / لو لا قدر الله الترم ده زنج منه نعمل اعتبار للظروف اللى مرينا بيها و نديله فرصه تانيه
انتصار / لا هيزنج و لا هيحتاج فرصه تانيه ان شاء الله و بعدين الدخله مش هتم غير بعد التخرج انما كتب الكتاب بشوقهم
عبد الله / حتى انتى يا ست الكل امال مين بيحبنى هنا يا جدعان
فاطمه / يا خويا كفايا عليك عروستك هتنهب
عبد الله / طب ما احنا بنحب بعض جوزونا بقي
الكل يضحك
عباده / يا اخى ارحمنى دا انت زنان و لا زن الحريم
عبد الله / ما ضاع حق ورائه مطالب
عباده / خلاص يا سيدى اخر كلام كتب الكتاب فى الاجازه الكبيره و الدخله لما تستلم الشهاده الكبيره و دا اخر كلام
عبد الله / ماشي كلامك يا كبيرنا
انتصار / اعمل حسابى معاك فى الكروز دى يا عبد الله محتاجه اغير جو انا كمان
عبد الله / دا الرحله دى طالعه عشانك انتى فى الاصل يا ست الكل
انتصار / الواد ده طالع بكاش لمين
الكل يضحك و يكملوا اكل
………………….
فى شقه يوسف
يوسف بيتخانق مع ممدوح
يوسف / و انت محموق كدا ليه انت مالك اصلا
ممدوح / يعني ايه انا مالى ما انا مش فاهمك انت بتقول كلام و تعمل حاجات تانيه خالص
يوسف / انت مالك برده اقول ايه و اعمل ايه انت حياله جوز اختى و ابن عمى انما المحل ده بتاعى انا و اخواتى
ممدوح / اديك قولتها بتاعك انت واخواتك و انا جوز اختك يبقي ليا فيه زى ما ليك بالظبط
يوسف / ليه هو ابويا مات و بتقسموا الورث
ممدوح / و ما دام انت لسه فاكر ان ابوك عايش بتضيع شقاه و تعبه ليه
يوسف / انا شورت امى و هى وافقت انت مالك بقي
ممدوح / انا مش موافق و اختك مش موافقه و لا هى و لا باقي اخواتك
يوسف / لموا بعض و تعالوا اعملوا اعتصام تحت البيت و اكتبوا شعارات على الحيطان و جرافيتي و انا ان شاء الله هشكل لجنه تدرس مشاكلكوا
ممدوح / انت بتهزر و لا بتستظرف و لا انت ايه حكايتك بالظبط
يوسف / بقولك ايه يا ممدوح انت كنت بتشتغل فى المحل و صفيت حسابك وانا يا سيدي مش هبيعه و لا هاجره انا هوضبه و افتحه كافيه ايه رايك تمسك معايا شيفت و هديك ضعف المرتب اللى كنت بتاخده فى المحل
ممدوح / شيفت ايه يا ابنى حرام عليك تعب ابوك طول السنين دى كلها ترميه و تبدا من الصفر
يوسف / بص انا تعبان و مصدع و مش قادر للكلام الكتير ده روح و اتكلم مع اختى و اجواز اخواتى و بالمره زى ما بتحاسبني بقي روح حاسب معتز على اللى عليه و لا هو حلال لناس و حرام لناس تانيه
ممدوح يبص ليوسف و يمشي
…………………….
فى اوضه هند بعد فتره
هند بتلبس الطرحه مختار يدخل الاوضه و فى ايده شنطه هدايا
هند / انت ايه اللى طلعك انا كنت هلبس الطرحه و انزل اهو
مختار/ يا بنتى براحتك انا اساس لسه هغير هدومى
هند / سماح كل شويه تكلمنى تستعجلنا
مختار / البنطلون اتوسخ من الطين فى الغيط و بعدين لسه ما جهزوش و بعدين ما تقعديش ترغى و تنسينى انا كنت جايبلك ايه
مختار يطلع طقم الماظ
هند / الله ايه الجمال ده
مختار / مش احلى منك تسمحيلى اللبسهولك
هند/ اكيد
هند تلف و مختار يلبسها و يبوسها من رقبتها تبتسم
مختار / حلاوه سلامتك كان المفروض اجيبه بدرى بس كنت مستني ابيع المحصول و اخد نصيبي عشان اجبلك حاجه عليها القيمه
هند تلف و تعلق ايديها حوالين رقبته
هند/ انا مش عاوزه غير وجودك جنبى هو ده اللى بيسعدنى و يفرق معايا
مختار / و ماله زياده الخير خيرين
هند / على العموم انا كمان جيبالك هديه
مختار / هديه ايه دى
هند / ثانيه واحده
هند تروح تفتح الدرج و تطلع منديل قماش جواه تيست حمل و تروح تحطه فى ايد مختار
مختار / ايه ده … الله اكبر .. الله اكبر بتتكلمى جد يا بت
هند / ههههههههههههه و هى الحاجات دى فيها هزار
مختار / يامنت كريم يارب طب انتى كدا لازم ترتاحى ما ينفعش ليكي تعب
هند / عارفه و هاخد بالى جدا من نفسي و كلمت الدكتوره و حجزت لبكره
مختار / و ليه بكره النهرده كان اولى
هند / ههههههههههههههه و هيفرق اليوم ده يعني
تليفون مختار يرن مختار يطلعه من جيبه يبص فيه
مختار / بيستعجلونا هغير بسرعه عشان نمشي …هند انتى قولتى لحد
هند / لا انت اول واحد
مختار / و اخر واحد لحد بكره و بعدين نبقي نقول على الضيق
هند/ انت من بتوع دارى على شمعتك تايد و لا ايه
مختار / انا من بتوع الحسد ادخل الرجل القبر يلا يلا عشان اللحق اغير
مختار يفتح الدولاب و يطلع بنطلون
………………..
فى المحل
يوسف واقف مع عمال بيوضبوا المحل اجواز اخواته يدخلوا
يوسف / اهلا اهلا اهلا … شاى يا ابنى … قولولى بقي ايه رايكوا فى الشغل
معتز / انا كلمت المستشفى اتابع حكايه السرير الفاضي اللى قولت عليها دى اكدولى ان فى مكان فاضي و انك ما اتصلتش اصلا لا تتابع و لا تسال
ممدوح / انت بتصرف فلوس علاج ابوك على التوضيب
يوسف / الدنيا فتحت منى اعمل ايه اديك شايف الدنيا و الاسعار و انا خلاص فتحت رجلى وادبست و كل يوم بيعدى بيخسر فيه الوفات احنا اولى بيها
معتز / انت بتقول ايه دا ابوك يا ابنى و لا كنوز الدنيا تعوضه و كل يوم حالته بتسوء عن اليوم اللى قبله
يوسف/ و ما دام انت حنين اوى كدا ما تدفع قسط العربيه المتاخر و انا اعالجه بيه و لا انت ما صدقت بابا دخل المستشفى تضرب على اللى عليك
معتز / ما تقلقش اخواتك البنات خدوا الفلوس و زمانهم بينقلوا ابوك دلوقت للمستشفى الخاص النضيفه
حامد يدخل
حامد / و ان شاء الله يخف و يرجعلنا بالف سلامه لحسن احنا اتبهدلنا اوى من بعده
ممدوح / ازيك يا عمى منور بقيت بشوفك هنا كتير
يوسف/ انت ما عرفتش
ممدوح / لا والله ما حدش قالى حاجه
يوسف / عمك فكه من حوار العربيات التعبان ده و شاركنى فى الكافيه ما تعملوا زيه
معتز / انا ماشي قبل ما اتجلط
ممدوح / انا جاى معاك يلا يا جماعه
الشباب يمشوا
يوسف / هينقلوا ابويا على حسابهم المستشفي الخاص
حامد / احنا فى السليم
يوسف/ بس العيال دى مش هتسكت و هينخوروا ورانا
حامد / يبقي نخلص منه
يوسف / نخلص من مين
حامد / هيكون مين يعني
يوسف يتعصب
يوسف/ انت اتجننت انت ازاى تفكر فى حاجه زى دى
حامد / اللى يخليك تحبسه فى مستشفي المجانين اكرمله تدفنه و تريحه من عذاب الكهربا و الحبسه
يوسف / تصدق انا غلطان انى بكلمك اصلا
حامد / سايبهالك يا خويا بلا هم يلا سلام
حامد يمشي و يوسف يقف متعصب
……………………
فى سرايا الجوارحه
مغاورى واقف فى الجنينه بيستقبل الزنايته
مغاورى / و الله لولا الملامه كنت بعتكوا و كلت ايه يا جدعان
عباده / يا عم والله كنت كلت و لا كان حد قالك تلت التلاته كام
مختار / طب هنفضل على الباب و لا ايه
مغاورى / يا عم البيت بيتك اتفضلوا اتفضلوا
الكل يتحرك لجوه فاطمه تقرب من مغاورى و توشوشه
فاطمه / سماح قالتلى عملالى مفاجاه و انت وشك منور على الله يكون اللى فى بالى
مغاورى / هو يا ست الكل … بس ما تقوليش انى قولت
فاطمه / ههههههههههههه سكتم بكتم الف مبروك ربنا يتملكوا على خير
مغاورى/ يارب يا امى يارب
الكل يدخل الجوارحه يستقبلوهم
سماح / كل ده تاخير الاكل برد
مغاورى / اتفضلوا اتفضلوا ناكل و بعدين نسلم و نتساير
الكل يضحك و يدخلوا يقعدوا على السفره
ام مغاورى / وحشتنا لمتنا دى اوى
انتصار / ربنا يبارك و يزيد
فتوح / صحيح يا كبير الجماعه الامريكان ردو
عباده / بعد الاكل نقعد و نتساير براحتنا
هند / برده
الكل يبص لهند مختار يغمزها تبص فى طبقها و تسكت
عباده / سبها حقك بعد كل اللى شفناه و انتى اولنا حقك … بس انا عاوز اطمنك احنا مش هنتاجر فيه يا هند احنا لازمنا سلاح قوى نتحامى فيه
مختار / اللى حصل قال للدنيا كلها اننا على الخريطه و لينا تقلنا ما ينفعش نختفى بين يوم و ليله
هند / انتوا ادرى طبعا
مغاورى / و بس عشان نبقي واضحين احنا مش عشان بنتاجر فى السلاح نبقي مجرمين
هند / بس لو ما كنتوش بتاجروا فيرا ما كانتش عرفتكوا و لا استقصدتكوا
التلاته يبصوا لبعض
مختار / و عشان كدا هنبطل بس لازم قبل ما نبطل يبقي عندنا سلاح كفايا لو لا قدر الله اى حاجه حصلت
هند تهز راسها
انتصار / طول ما انتوا قلبكوا على قلب بعض ما فيش حاجه فى الدنيا هتقف قصادكوا
مغاورى / يا ست الكل احنا اخوات و ان كان على شويه الشكل اللى بيحصل فمش ذنبى ان مختار رخم هههههههههه
مختار / الله
عباده / سيبك منه و كل الاكل طعمه حلو اوى تسلم ايديكوا
سماح تحط حمامايه قدام اخوها
سماح / الف هنا كل دى حشياها بايدي
عباده / تسلم ايدك
ست / و عرفتيها ازاى اللى حشياها بايدك من اللى غيرك حاشيها
سماح / دقالها تاتو ما خلاص يا عمتى بقي عديها
الكل يضحك
مغاورى / سماح عملالكوا مفاجاه
خديجه / خير يا سماح فرحينا
سماح / هنفرح ان شاء الله بس مش دلوقت كمان تمن شهور كدا
خديجه تقوم تحضنها و هند تحضنها
هند / الف مليون مبروك ربنا يتملك على خير و يعوضك بالخلف الصالح يارب
سماح/ عقبالك
هند تبتسم و تقعد جنب مختار و الباقي بيحضنوا و يبوسوا سماح
…………………..
فى مكتب المحامى
المحامى / انا ما ليش دعوه بكل ده انا علاقتى بالحوار ده خلصت من زمان
حامد / ايوه بس لو محمود اتنقل من المستشفي و راح مستشفي تانى
المحامى / الكلام ده تتكلمه مع الدكتور انما انا ما ليش فيه و ما اقدرش اساعدك بحاجه
حامد / بس انت ليك دلال عليه و تقدر تكلمه
المحامى / يا استاذ حامد انا محامى مش ولى امرك يعني مشاكلك دى انا مش مستفيد حاجه من انى اتحشر فيها و بيتهيألي انك عارف ليه كويس
حامد / دا انت قلبك اسود اوى يا جدع … بسيطه يا سيدى ادى متين جنيه اهو تمن كارت الشحن اللى هتعمل منه المكالمه
المحامى / كرت شحن ايه انت عليك ليا الف جنيه
حامد / ايه !!! الف جنيه !!! بتوع ايه
المحامى/ الله مش فى فوايد
حامد / لا بقي دى سرقه رسمي
المحامى / و بعدين بعيدا عن الالف جنيه بتاعتى ما لو على كرت الشحن ما تشحن موبايلك بتضيع وقتى ليه
حامد / كل ده عشان مكالمه تليفون
المحامى / لا عشان انا عارف كويس انك بتلف و تدور لما دخت و دوختنى عشان تفضل بعيد عن الصوره يبقي تدفع بقي
حامد / منين
المحامى / عليا انا برده امال لو ما كنتش المحامى بتاعك
حامد / يعني عاوز كام
المحامى / اربع تلاف غير الألف بتاعتى
حامد / انت بتهزر بقي
المحامى / انت خدت وقتك بزياده لو عاوز تدفع استشاره تانيه اهلا و سهلا مش عاوز هستاذنك عشان فى زباين بره
حامد يبص للمحامى و يعدل هدومه و يقوم
…………………
فى المستشفى
يوسف قاعد مع الدكتور
يوسف / يعني ما فيش اى خطر من انه يخف
الدكتور / هيحتاج مش اقل من ست شهور على ما حالته تبدا تتحسن حتى كميه الادويه و جلسات الكهربا اللى اتعرضلها كفيله انها تمسح مخه خالص و صدقنى لو سبته هنا شهر و لا اتنين كمان مش هيبقي فى امل فى علاجه
يوسف / للاسف اخواتى مش مديني فرصه
الدكتور / تمام
يوسف / طب معلش سؤال اخير
الدكتور / اتفضل
يوسف/ انت ما لكش سكه خالص مع الدكاتره فى المركز ده
الدكتور / واحد غيرى كان قالك ليا و اعرف و ظبطك فى قرشين بس انا مش هعمل كدا عشان انت راجل محترم و كلمتك معانا كانت واحده انا كمان هطلع محترم معاك و اقولك ما تضيعش وقتك المركز ده يمين اليمين من اكبر مدير لاصغر تمرجى
يوسف يهز راسه و يقوم يقف
يوسف / متشكر اوى و باقى حسابك هيوصل النهرده ان شاء الله
الدكتور / على بركه الله
…………………….
فى شقه يوسف
امل / انتى لازم تكلميه يا ماما اللى بيحصل ده ما يرضيش ربنا
اسراء / بس هو معاه حق ابوكى ما ماتش عشان تقسموا ورثه
بنت / ايوه بس بالطريقه دى يوسف ورثه بالحيا لوحده و حط ايده على المحل و ضيعه كمان
اسراء / اخوكى ما رضيش يدخل راجل غريب المحل عشان خاف تحصل مشاكل بعد كدا على الايجار و اجر منى المحل بسعر السوق
امل / و هو جاب تمن الايجار والتوضيب منين مش من البضاعه اللى كانت فى المحل
اسراء / لا منى انا ساعدته بقرشين امال يعني هيعمل ايه مهو برده كان صرف كل الفلوس بتاعه البضاعه على علاج ابوكوا
بنت ٢ / باماره ايه بابا محبوس فى مستشي حكومى معفنه و معتز قدامك هو اللى دفع فلوس المستشفي
اسراء / و هو كان دافعهم من جيبه مهو جايبهم من ابوكى و بعدين مالكوا جايين و سانين سكاكينكوا على اخوكوا كدا ليه
امل / يا ماما انتى ليه مش قادره تشوفى اللى يوسف بيعمله
اسراء / على الاقل هو بيعمل حاجه كل واحده فيكوا ملخومه فى بيتها و عيالها و يوسف اللى مفحوت فى كل حاجه
امل / دا باماره ايه
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
