رواية البر التاني الفصل التاسع والعشرون 29 بقلم لولو محمد

رواية البر التاني الفصل التاسع والعشرون 29 بقلم لولو محمد

رواية البر التاني الجزء التاسع والعشرون

رواية البر التاني البارت التاسع والعشرون

رواية البر التاني الحلقة التاسعة والعشرون

مختار / سبت ايه دا انت لاهف منى الاسبوع كله و ان كنت نسيت اللى جرا سيديهاتك معايا
عباده / دى اخرتها يا ابن عمى ماشي ماشي يلا بالاذن انا عشان ورايا شغل
مختار / نورت
مريم / هجيب حاجه التنضيف و اجى
مختار / ما تتاخريش عشان عاوز انام
مريم / انت مش لسه صاحى يا عمى
مختار / تعرفى تخليكي فى حالك ؟
مريم / استاذه و رئيسه قسم
مختار / احبك يلا بسرعه هاتى الحاجه
مريم تجرى مختار يبص لهند يلاقيها مبتسمه اوى
مختار / سمو الملكه ليها اى طلبات تانى
هند / انا بقول كدا حلو اوى
مختار / طب مش عاوزه مكنسه للسجاد
هند / لا هتزنق الاوضه على الفاضي انا بفكر اجيب حافظتين للسجاده ابدل فيهم يتحطوا فى الغساله و الحياه تبقي سهله
مختار / و ماله نقول لعباده يجيب
هند / هو عباده مسؤل المشتريات فى السرايا
مختار / لا عادى قولى لام فاتن و لا لمريم و لا لفاتن او اى حد
هند / مش عاوزين نتقل عليه
مختار / لا عباده جدع راجل بصحيح اطلبى منه بقلب جامد
هند / بحب علاقتكوا اوى
مختار / ههههههههههههههههههههه
هند / ايه !!
مختار / انتى عارفه توم و جيرى
هند / فى حد ما يعرفهمش
مختار / اهو انا و عباده اللعن منهم ناقر و نقير طول الوقت بس وقت الجد انا و ابن عمى على الغريب اخويا و ضهرى
هند / طب ما دا كويس
مختار / كويس طبعا بس لو ما لقيناش حد نتفق عليه بقي
هند / ااااااه فهمت
مختار / فاكره اول مره ركبتى معايا العربيه قولتلك انى نزلت مصر هربان من مشاكل العيله فاكره
هند / اه فاكره حاجه زى كدا
مختار / اهو انا اتعلمت فى مصر عشان ارتاح من عباده و ما كانش حاجه بتنغص عليا الاجازات الا عباده
هند / ما يبانش عليكوا خالص دا اللى يشوفه يقول بيحبك اوى و بيخاف عليك جدا
مختار / حقيقي
هند / علاقتكوا غريبه بس برده حلوه حتى لو بتتناقروا و تتنافسوا كفايا انك مطمن انه وقت الجد فى ضهرك و انه لا هيغدر بيك و لا ياذيك
مختار / ايوه بالظبط كدا
هند تبتسم
مختار / عارفه مين برده اللى علاقتهم كدا هتستغربي اوى
هند / مين
مختار / ام عباده و ام فاتن
هند / بتهزر
مختار / طول الوقت ام فاتن بتشد فى شعرها منها بس اول ما تعيا و ترقد تلاقى ام عباده سابت اللى وراها و اللى قدامها و قعدت تحت رجليها تخدمها
هند / و دا لله و للوطن اصل بصراحه كل ما اعاشرها اتقفل منها
مختار / و الله انا ما بدخلش فى النفوس النيات دى بتاعه ربنا بس العقل بيقول ايه حرس و لا تخونش
هند / صح
باب الاوضه يخبط هند تفتح مريم شايله فرشه و جاروف و جردل و شرشوبه و مقشه و محتاسه فيهم
مريم / جبتلك العده من تحت على ما نجيب جديد
هند / طب حاسبى حاسبي عند
مريم / هيكركبولك الحمام على الفاضي خليهم تحت و انا اطلعهملك لما تحتاجيهم
هند / لا خليهم عندى و انا هبقي اشوفلهم حته احطهم فيها
مريم / براحتك كدا كدا اوضتك و حمامك رتبيهم زى ما انتى عاوزه اوعى اما انضف عشان عمى عاوز ينام
مختار / اه والله ياريت تنجزوا
مريم / شايفه المعامله
هند / دا بيجر شكلك بس ما تاخديش فى بالك
هند تاخد الجاروف و الفرشه و توطى تلم التراب مطرح الخروم و مريم تروح تملا ميه من الحمام و تيجي تمسح الارض و مختار قاعد على كرسي التسريحه و حاطت ايده على خده
………………….
فى الشونه
عبد الله ماسك الدفتر و فى عربيه بتحمل شكاير من الشونه راجل يدخل
الراجل / سلام عليكوا
عبد الله / و عليكم السلام اتفضل
الراجل / يزيد فضلك امال فين عباس
عبد الله / انا هنا مكانه اؤمر
الراجل / كنت عاوز حصه السماد بتاعتى
عبد الله / ثوانى الرجاله تحمل العربيه دى و اشوفلك حصتك
الراجل / و انا لسه هستنى العربيه تحمل كدا اليوم يضيع منى يا ابن عمى خلصنى دول كام شكاره عمى
عبد الله / طب خش لجابر جوه يجهزهملك
الراجل / كتر خيرك
عبد الله / الهمه يا رجاله مش هنقعد اليوم كله
شاب بيحمل العربيه / هانت خلاص يا سى عبد الله
راجل ٢ يطلع من جوه يوشوش عبد الله
عبد الله / و انا المفروض اعمل ايه زى ما انتوا متعودين اشتغلوا بص انا هكلم عباده اساله
الراجل يطلع من جوه و عبد الله بيطلع التليفون من جيبه
الراجل / ما تخلصنى يا ابن عمى لسه ورايا مليون حاجه اعملها النهرده
راجل ٢ / مش لما نعرف ليك حصه و لا لا
الراجل / يعني ايه الكلام ده
راجل ٢ / يعني انت حسابك تقل اوى يا ابن عمى
الراجل / ما انا متفق مع سى عباده هدفع المتاخر كله لما ابيع المحصول ايه اللى جد
راجل ٢ / اللى جد انه ما بلغنيش انه اتفق معاك هنساله و نتاكد
الراجل / قصدك انى كداب و لا ايه
عبد الله / يا سيدى انت فوق راسنا هو ما يقصدش اقعد بس و استهدى بالله و اشرب كبايه شاى دى مكالمه تليفون و انت يا جابر معلش جهزله الحاجه عشان اول ما اقفل مع عباده يستلمها علاطول
الراجل / يا جدع انت جديد هنا ما تعرفنيش انا كلمتى واحده و اللى اقوله تصدقه علاطول
عبد الله / معلش مهو عشان انا جديد لازم فى الاول شويه لخبطه جت فيك معلش
الراجل / يا جدع انت اليوم هيطير منى عشان كام شكاره دا عباس كان بيبعت الحصه من نفسه انا عارف انا اصطبحت بوش مين النهرده
جابر / ما تلم الدور بقي يا حمدان احنا ساكتين من الصبح و بعدين لما تتكلم مع سى عبد الله اتكلم عدل
حمدان / مين سي عبد الله يعني
عبد الله / جهزله الحاجه يا جابر انتوا كدا اللى بتضيعوا الوقت فى الرغى خلصونا ناس كتير واقفين
الشاب / العربيه حملت يا سي عبد الله و الفلوس اهى كامله
عبد الله / ثوانى اعدهم و اعملك وصل
عبد الله يروح يقعد على المكتب و يطلع دفتر وصولات و يعد الفلوس حمدان يروحله
حمدان / مشيني الاول و بعدين عد براحتك انت هتلطعنى جنبك و لا ايه
عبد الله / مهو الراجل التانى جاى قبلك اللطعه عشانك ليه
حمدان / انت بتكلم مين كدا ياض انت
الرجاله تتلم
عبد الله / مش هرد عليك عشان انت قد والدى
جابر / بقولك ايه يا حمدان لم الدور سى عباده لو عرف باللى انت عملته مش هيحصل طيب
حمدان / يعني عاجبك اللى بيحصل ده ما عدش غير العيال اللى يوقفونا
عبد الله / انا ساكتلك ادب انما هتقل ادبك هقولك اقف فى الدور بعد ما كل العربيات دى تحمل
حمدان / انت شكلك ما تعرفش انت بتكلم مين
الشاب / انت اللى ما تعرفش انت بتكلم مين دا يبقي نسيب سى مختار اخو مراته
حمدان وشه يجيب الوان و يبص على الرجاله الملمومه
عبد الله / جهزله الحاجه يا جابر لحد ما اكلم عباده و اساله فى حوار الفلوس
حمدان يوطى على ايد عبد الله يحاول يبوسها عبد الله يسحب ايده بسرعه
حمدان / ابوس ايدك ما تجبله سيره باللى حصل اللى ما يعرفك يجهلك و انا غلبان و صاحب مرض
جابر / و ما دام عارف انك غلبان جاى نافش ريشك علينا على الصبح ليه
حمدان / خليك محضر خير يا جابر انت جاى تولعها
عبد الله / ما تخلص يا جابر و تجهز حاجته
جابر / مش اما تشوف سى عباده هيقول ايه الاول ما يمكن يقول ما لوش حصه
عبد الله يتكلم فى التليفون و حمدان عمال يبص على الرجاله و متوتر
عبد الله / ايوه يا عباده ازيك … لا كلو تمام بس كنت عاوز اسال عن حاجه
…………………..
فى مطبخ السرايا
فاطمه / و الاكل هيطلع فوق و لا هينزلوا ياكلوا معانا
مريم / والله ما سالتهم لما الاكل يجهز نكلمهم و نسالهم
فاتن / انا خلصت الحمد لله خدى يا مريم علقي على حله المحشي دى
فاتن / ضهرى اتقطم
فاطمه / ضهرك اتقطم من حله محشي الله يعينك على اللى انتى فيه
فاتن / والله تعبانه خالص النهرده من ساعه ما صحيت و انا رايحه جايه على الحمام
فاطمه / ليه مالك كلتى حاجه وحشه و لا ايه
فاتن / والله ابدا
فاطمه / ليكون برد فى معدتك اطلعى اتكلفتى فى السرير و انا هعملك حاجه سخنه تدفيهالك على ما الاكل يستوى لو كنتى قولتى من بدرى كنت خليتك ترتاحى
فاتن تغسل ايديها و تمشي
فاطمه / مش فاهمه ايه حكايه وجع البطن اللى مسكانا فى السرايا دى البت سماح كمان قافله على نفسها طول الوقت و كل ما اكلمها تقول بطنى عاليه بطنى عاليه
مريم / انا عملتلها ينسون و الله و سقيتهولها
فاطمه / عارفه شوفت الكبايه لما كنت بشقر عليها دى اكيد عين راشقه حد من معازيم الفرح النهرده ابخر البيت كله عينك على الاكل لحسن يشيط منك و انا هطلع اجيب البخور من فوق
مريم / ما فى بخور هنا
فاطمه / لا دا انا جايبه من النت بخور لاوسي اصلي من الغالى لسه عباده مستلمهولى النهرده الصبح اهو فرصه نجربه دا بيقولوا فيه شعر يا بت
مريم / تمام نجربه
فاطمه تبتسم و تطلع اوضتها و مريم تقف جنب الحلل الكتير اللى على البوتجاز
……………………
فى الشونه
الرجاله قاعده بتشري شاى
عباده / اوعى تكون زعلان من اللى حصل انا هشدلك ودنه
عبد الله / لا مش زعلان و لا حاجه الراجل اعتزر حصل خير
جابر / لا يا سي عباده بس برده ما كانش ياخد الحصه انا تعبت من الراجل ده لسانه طويل و كل مره يعمل مشكله
عباده / معلش يا جابر امسحها فيا انا
جابر / استغفر الله يا سي عباده دا انت على راسي
عباده / الراجل ده اصله غلبان ربنا ابتلاه و خد عياله الاتنين نوبه واحده
عبد الله / لا اله الا الله
عباده / مراته ما استحملتش رقدت و عياها بيكلفه فلوس ياما و هو بطوله بين خدمتها و خدمه الارض فتلاقيه علاطول عصبى و مستعجل كدا فبنصبر عليه
عبد الله / لا نصبر عليه طبعا الله يعينه ربنا ما يكتب اللى هو فيه على حد بس هو عياله ماتوا ازاى
عباده / تعددت الاسباب و الموت واحد يا عبد الله كلنا هنموت لما يجي معادنا … ما تصبلى كبايه شاى تانيه يا جابر ينوبك ثواب
جابر / تؤمر يا سي عباده
جابر يصب لعباده كبايه شاى و يديهاله عباده يشرب
عباده / تسلم ايدك
عبد الله / بالنسبه للفلوس اللى فى الخزنه هعمل فيها ايه
عباده / سبهم فى الخزنه للصبح و جابر و الرجاله هيودوهم الصبح للبنك
عبد الله / بس دى فلوس كتير هتسيبوهم كدا فى الشونه عادى
الرجاله تضحك
عباده / طب ما البضاعه بتتساب فى الشونه عادى و بعدين بلاش الكلام ده الرجاله دى تزعل
جابر / يا سي عبد الله دى شونه الزيني يعني مفيش حد يستجرى بس يفكر يسرق منها و لو حبه غله واحده
غفير / و لو فكر احنا برده ما بنلعبش يا سي عباده
عبد الله / لا مؤاخذه معلش جديد بقي
عباده / شكل ما فيش شغل تانى النهرده قفل يا عبد الله خلينا نروح ناكل لقمه و نريح شويه
عبد الله / الدنيا لسه نهار هستني شويه يمكن حد يجي روح انت لو عاوز
عباده / ما جابر و الرجاله موجودين ما تقلقش انت قوم يلا معايا
عبد الله / ما جاتش من ساعتين زمن
عباده / لا بقولك ايه انا ما بحبش اكرر كلامى ابو نسب مش ابو نسب اللى اقوله يتسمع قوم يلا اما نروح بيقولوا النهرده محشي و ما تقلقوش يا رجاله نصيبكوا محفوظ
غفير / يدوم العز يا سي عباده
عبد الله / لا ما دام محشي يبقي نقوم بقي
الرجاله تضحك عبد الله و عباده يركبوا العربيه و يمشوا
عبد الله / هو انتوا كل يوم بتبعتوا اكل للغفر امبارح بعتولهم برده
عباده / لقمه هنيه تكفى ميه يا عبد الله و الناس دى بتشقا عشانا و بعدين احنا مش الوحيدين اللى بنبعتلهم
عبد الله / و ما دام فى غيركوا بيبعت بتبعتوا ليه
عباده / الناس دى بتشقى و كلهم على قد حالهم بيجيلهم اكل من بيوتهم و بيفرشوا و ياكلوا سوا
عبد الله / بس دا تعب على الناس اللى فى البيت يعنى كل يوم يعملوا كميه الاكل دى للى فى البيت و الغفر اللى فى السرايا و كمان الغفر اللى فى الشونه
عباده / الغفر اللى فى البلد كلها يا عبد الله مش الشونه بس
عبد الله / بس دول كتير اوى
عباده / لسه بقولك لقمه هنيه تكفى ميه و الناس دى غلابه و بتشقي و اهو كله بثوابه
عبد الله / ايوه بس
عباده / الستات اللى فى البيت بيتعبوا فى الاكل انا عارف بس كلو بثوابه دا مفيش ثواب احلى من لقمه تحطها فى بق حد غلبان و خصوصا لو من اللى بتاكل منه حتى تطيب خاطره و تحسسه انه منك و ان قلبك عليه فيبقي قلبه عليك هو كمان
عبد الله / انا والله مش معترض انا بتكلم فى حاجه تانيه خالص
عباده / انا فاهمك هم بيرتبوا امورهم لو الاكل متعب و هيحتاج مجهود بيبعتوا يجيبوا ستات تساعدهم و هم بسم الله ما شاء الله كتير يعني و بعدين هم بيعملوا ايه تانى طول اليوم يعني
عبد الله / طب سالتهم قبل ما تقول بيعملوا ايه تانى طول اليوم ماما كانت بتتنرفز لوى لو حد قال الكلمه دى قدامها و تقول هو شغل البيت بيخلص
عباده / عشان الحجه عندكوا بطولها انما هنا ايد على ايد تساعد و بعدين هنا هم واخدين على كدا و السرايا الكبيره دى لو كل واحده نضفت متر فى متر خلصت و برده وقت التنضيفه الكبيره بيجيبوا ستات تشيل و تحط معاهم ما تقلقش … عبد الله هو انت حد كلمك فى حاجه
عبد الله / حاجه ايه
عباده / حد بيتعب حد اشتكى سمعت حد بيشتكى سواء ليك او للحجه .. هى الحجه اشتكت انها بتتعب
عبد الله / لا لا لا ابدا انا بتكلم عموما يعني .. من وجهه نظرى اقصد .. بناء على كميه الاكل اللى بتتعمل كل يوم و كدا .. اصل انا برده مش واخد على النظام لسه … بس هو جميل .. جميل فعلا ربنا يتقبل يارب
عباده / امين يارب امين
عبد الله يهرب بعنيه من عباده و يبص من الشباك و عباده سايق
………………
فى اوضه هند
مختار نايم على السرير هند تطلع من الحمام لابسه البرنص و لافه شعرها بفوطه تقعد على التسريحه مختار ينام على جنبه و يتفرج عليها و هى بتسرح شعرها و كل شويه يبصوا لبعض فى المرايه مبتسمين
هند / ايه !!
مختار / بيقولوا التامل فى جمال خلقه ربنا من اعظم العبادات سبحانه اللى خلق و صور
هند تبتسم بخجل و تبص فى الارض و تبص فى المرايه تانى تلاقيه متابعها و مبتسم تبص فى الارض تانى الباب يخبط هند و مختار يبصوا لبعض
مختار / مين
فاطمه / انا ام عباده
مختار / ثانيه يا ام عباده هفتحلك اهو
هند تقوم تجرى تاخد الاسدال و تدخل الحمام و مختار بيرتب ملايه السرير و اول ما هند تقفل باب الحمام مختار يروح يفتح الباب يلاقي فاطمه شايله بخور
فاطمه / صحيتكوا و لا ايه اصل انا ببخر البيت كلو فاتن و سماح تعبانين قولت دى اكيد عين قولت ابخركوا انتوا كمان
مختار / مالهم كفاهم الله الشر كانوا كويسين امبارح
فاطمه / معدتهم عاليه … امال فين هند
هند تفتح باب الحمام لابسه الاسدال فاطمه تدخل مختار يبص فى الارض
فاطمه / رقيتك و استرقيتك من عين كل من شافك و لا صلاش على النبي شكلك لسه مستحميه خدودك بتبوك حمار
هند تبص لمختار
فاطمه / انا مش هطول هبخر الاوضه و ابخركوا و امشي … دا بخور مستورد ما تلاقيهوش هنا جيباه من النت قولت لازم ابخركوا بيه … الاكل تحت جاهز اخليهم يطلعولكوا منابكوا هنا و لا تنزلوا تونسونا
مختار / لا هنتعبكوا تطلعوه
فاطمه عينها فى المكان خصوصا على هند تلم نفسها
فاطمه / اه طبعا امال مش عرسان يلا مش هعطلكوا اكتر من كدا هبخر بس الحمام و امشي
هند / لا ملوش لزوم الحمام انا هبقي ابخره
فاطمه / دا بخور مستورد ريحته ثابته مش زى التانى
هند / معلش مره تانيه
فاطمه / براحتك على العموم هبقي ابعتلك شويه بخور تخليهم عندك الواحده برده لازم تحافظ على ريحه اوضتها حلوه و نضيفه امال ايه بكره تتعلمى الحاجات دى .. فوتكوا بعافيه
مختار / الله يعافيكي
فاطمه تمشي و مختار يقفل الباب بالمفتاح
هند / هى تقصد ايه ببكره تتعلمى الحاجات دى يعني انا مش مخليه الاوضه نضيفه و ريحتها حلوه
مختار يقرب من هند و بالراحه يحرك ايديه لفوق و تحت على دراعتها
مختار / تفتكرى ربنا خلقلنا ودنين ليه
هند / ايه السؤال ده عشان نسمع بيهم طبعا
مختار / ممكن بس انا من وجهه نظرى اننا عشان ندخل من هنا و نطلع من هنا
مختار يزغزغ هند من رقبتها مره اليمين و بعدين الشمال و هى بتعوج رقبتها و تغير مع ايديه و مبتسمين
مختار / بس البخور ريحته حلوه ما ننكررش
هند / والله انا بفكر ابخر الاوضه من عنيها هى بجد صعبه اوى
مختار / ههههههههههههههههههه قولنا ايه دخلى من هنا و طلعى من هنا
مختار يكررها و هند تغير
هند / بس بقي بغير الله
………………..
فى شقه يوسف
يوسف يدخل يلاقي محمود قاعد
يوسف / السلام عليكم
محمود / و عليكم كنت فين ؟
يوسف / خير فى حاجه ؟
محمود / ما جتش المحل زى ما اتفقنا استنيتك و ما جتش و اتصلت بيك كتير و ما كنتش بترد
يوسف / كنت عامله صامت كنت محتاج اقعد مع نفسي شويه
محمود / حقك عشان تعرف تفكر و تاخد قرارات فى حياتك
يوسف / اخبار المحل ايه
محمود / النهرده شديت مع المهندس مقدملى ميزانيه كبيره جدا و بيقول محتاج تصليحات اكبر من اللى كان متوقعها
يوسف / شوف غيره تلاقيه نصاب و عاوز يعمل مصلحه على قفانا
محمود / تعرف حد كويس
يوسف / لا بس اشوفلك
محمود / ياريت
يوسف / اخبار خيلانى ايه
محمود / خيلانك ظروفهم غيرنا
يوسف / ليه ان شاء الله ما كلنا محلاتنا اتحرقت و كلنا اتنصب علينا
محمود / بس هم حظهم ارحم منا هم التامين هيعوضهم منهم لله ولاد الكلب اللى اتبلوا عليا
يوسف / انا بقول تشوفلك محامى شاطر عن اللى معاك اللى ضيعك ده و مش فالح غير يسحب فلوس و خلاص
محمود / تعرف حد كويس
يوسف / اشوفلك
محمود / امك كلمتنى امبارح فى حوار انك عاوز نسبه من المحلات
يوسف / دا حقى
محمود / و انا فين حقي يا يوسف
يوسف / حقك فى ايه
محمود / فى كل الخساير اللى خسرتها بسببك و بسبب حبى ليك و دفاعى عنك
يوسف / اسلوب رخيص اوى اسمع يا بابا انا
محمود / اسمع انت يا يوسف انا فكرت كتير فى كلامك ده فكرت فيك من يوم ما اتولدت لحد النهرده و لقيت انى دلعتك زياده عن اللزوم
يوسف / برده
محمود / انا خلاص اديت رسالتى ناحيتك كامله و اتخرجت الحمد لله جه دورك بقي تكمل
يوسف / ازاى يعني
محمود / كل العصافير بيجي يوم و تسيب العش
يوسف/ كان ممكن قبل ما تبيع شقتى
محمود / و همنع المصروف كمان عاوز فلوس اشتغل
يوسف / مش لما الشهاده تطلع اقدم
محمود / ماشي يا يوسف لحد ما الشهاده تطلع
يوسف / و انا هلاقي شغل فى يوميها انت بتعجزنى ليه انت ليه عاوز تحبطنى ليه مصمم تحسسني انى فاشل
محمود / ما حصلش
يوسف / امال تسمى اللى بتعمله ايه تقصقص جناحاتى و تقولى طير انا لو عدوك مش هتعمل فيا كدا انا ابنك الوحيد
محمود / مهو عشان كدا خايف عليك عاوزك تنشف و تسترجل و تنزل تشتغل معايا
يوسف / على اخر الزمن اشتغل بياع
محمود / و ماله البياع اقعد على الكاشير يا سيدى
يوسف / يا بابا انا مهندس زراعى مش محاسب
محمود / و المفروض انك لحد ما الشهاده تطلع و تدور و تتعين انا افضل اصرف عليك
يوسف / ما كل الابهات بتعمل كدا امال اشحت
محمود / اشتغل انت عارف ان ممدوح اشتغل على عربيته كريم
يوسف / هتنزل بيا لحد فين من بياع لسواق مش عاوزنى امسك خيشه و جردل و امسحلك السلالم و اغسل العربيات بالمره
محمود / الشغل مش عيب
يوسف / الناس كلها تروح بيتها ترتاح انا بروح اتخنق
محمود / الباب قدامك لو البيت مش مريحك امشي
يوسف / انت بتطردنى
محمود / مش انت اللى مش عاجبك عيشتنا مش انت اللى مش راضي تكبر يا ابنى انا كبرت
يوسف / هى ماما فين
محمود / انا اللى بكلمك هنا
يوسف / و انا مش فايق اسمع عن اذنك
يوسف يروح يفتح فى الاوض لحد ما يلاقي امه قاعده و عينها على الباب
يوسف / انتى هنا و سامعه الكلام ده و ساكته سيباه يبيع و يشترى فيا كدا
محمود / قولتلك كلامك معايا انا
يوسف / انا راجع تعبان و جعان و انت برده مش راضي تسيبنى فى حالى
محمود / انا عاوزك
يوسف / انت عاوز انت عاوز مش مهم انا عاوز ايه يعني
محمود / و احنا ضيعنا غير جريانا ورا اللى انت عاوزه حتى لو مش من حقك
يوسف / هتشيلنى الليله يعني ماشي ما دام ده اللى انت عاوزه ماشي انا سيبهالك دا الشارع ارحم
يوسف يمشي اسراء تيجي تحصله محمود يبرقلها
محمود / اسراء
اسراء / انت ايه اللى جرالك
محمود / عوزانى اعمل ايه عوزانى اصبر عليه لحد امتى
اسراء / مش من الدار للنار كدا كدا هتخسره
محمود / لو عندك حل تانى وريني نفسك انما انتى مش فالحه غير فى المداديه و الدلع
اسراء / انا تعبت منك
محمود / و انا تعبت من الدنيا باللى فيها
محمود يمشي و يرزع الباب وراه اسراء تبص فى الارض
………………..
فى المكتب
شاكر / انا شايف انه شاب محترم و ابن حلال
عباده / و لا محترم و لا نيله انا من الاول قولت نشوف مدرسه للبنات
ناصر / الجدع ما صدرش منه حاجه و داخل البيت من بابه
عباده / مش مرتاحله
ناصر / هو انت اللى هتتجوزه اسالوا البنت
شاكر / الراجل قالى انه عنده شقه جاهزه و بيقبض كويس و احنا قبل ما ندخله بيتنا كنا سالين عليه و عارفين اصله و فصله
عباده / برده مش مرتاحله
ناصر / انت فى حد معين فى دماغك لسماح
عباده / لا مش القصد بس
ناصر / بس ايه
عباده / مش عارف زى ما قولت مش مرتاح
الباب يخبط و مختار يدخل
مختار / متجمعين فى الحرم ان شاء الله
ناصر / اااااه جيت على الجرح
مختار / ليه ما احنا فيها خد ام فاتن و اطلعوا
ناصر / و انا مش هرد كلامك
عباده / عبد الله هينزل مصر الجمعه
مختار / لقيت حد ياجر الشقه
عباده / هههههههههههههههههه عيب عليك
مختار / خلى فاروق يتصل بيهم و يبلغهم
عباده / و لو موافقوش
مختار / ساعتها نبقي نفكر المهم كنتوا بتتكلموا فى ايه قافلين عليكوا بقالكوا فوق الساعه و زياده خير فى حاجه و لا ايه دا لو ليا اعرف يعني
شاكر / الاستاذ عصام المدرس طالب ايد سماح
مختار / راجل ابن حلال و سمعته حلوه
عباده / رفضت مغاورى و موافق على عصام مع ان البنتين قد بعض يعني
مختار / ايه الحكايه بتاعتكوا دى مريم اللى رفضت مريم اللى كانت هتتجوز و هى اللى رفضت انا لا قبلت و لا رفضت و لا ليا فيه اصلا
شاكر / نفس كلامى نسالها الاول
عباده / مش مرتاح يا جماعه
مختار / تلاقيك غيران عليها ان حد هياخدها من وسطينا
عباده / يا راجل قول كلام غير ده دا انا هكسر وراها زير مش قله
ناصر / اهو كلام
عباده / اللى تشوفوه اعملوه بس اقسم بالله ما مرتاح
الكل يبصوا لبعض و يبصوا لعباده
………………….
فى اوضه هند
هند بتعلق عبايه مختار و هو بيقلع الجزمه تاخدها و تحطها عند باب الاوضه
مختار / تسلمى
هند / بس انا مش فاهمه انت ازاى توافق البنت صغيره
مختار / فى بنات الجواز ليهم ستره مهما كان السن
هند / عيب يا مختار
مختار / سكت
هند / انا ما شوفتش منها حاجه وحشه ليه تقول عليها كدا
مختار / انا ما بقولش قلبي اللى بيقول و انا عمرى ما نظرتى فى حد طلعت غلط … انا ما بقولش انها بتغلط انا بس بضايق منها عنيها مكشوفه و جريئه زياده
هند / حرام عليك دى غلبانه
مختار / والله ما غلبان الا انتى
هند تبصله يفرد ضهره على السرير تروح تقعد جنبه
هند / هو انا كنت جريئه معاك زياده لما طلبت منك توصلنى و لا لما كنت بكلمك فى البلكونه
مختار يتعدلها
هند / عيب يا مختار دى برده بنت عمك
مختار / و عشان كدا خايف عليها و العريس اللى جالها راجل محترم و سمعته سبقاه انا مش هجوزها لاى حد و بعدين انا رايي لا هيقدم و لا ياخر الراى رايها هى
هند /مش عارفه ليه اضايقت
مختار / تصدقى لو قولتلك و انا كمان ما كانش المفروض اتكلم عنها كدا
هند تبصله بحب
مختار / ربنا يهديها و يعملها اللى فيه الخير
هند / ربنا يهدينا جميعا المهم انا بقي ما سكتش
مختار / على ايه
هند / قعدت انا و البنات نقلب فى الفايس لحد ما لقيت مكان حلو اوى هيعجبك جدا جدا جدا
هند تجيب الموبايل و تفتحه مختار يشدها فى حضنه تبصله و تبتسم و تفتح صفحه فايس و مختار متابع معاها و هى بتقلب فى الصور
هند / ايه رايك
مختار / حلو
هند / انا كمان كلمتهم و سالت على السعر و فى اوفرز هانيمون حلوه جدا و ياخت و حركات … انت ركبت يخت قبل كدا
مختار / ركبت مركب كتير
هند / على العموم انا عمرى ما ركبتها نفسي اركب
مختار / نركب
هند / يعني احجز
مختار / احجزى
هند / بجد !!
مختار / مش المكان عاجبك خلاص
هند / طب مش تعرف السعر طب احجز قد ايه
مختار / مش عارف بصي خليها اسبوع و نجدده ما حدش عارف يمكن ما يعجبناش
هند / ماشي
هند تكتب على الماسنجر
هند / كان نفسي اروح الجونه و الحتت دى بس بيقولوا حر اوى
مختار / فى الشتا نروح
هند / وعد
مختار / ان شاء الله لو ما جدش جديد هوديكي
هند / ربنا يخليك ليا
مختار / حاف كدا
هند تبصله
مختار / الواد قلبه بيوجعه و عاوز حد يدلعه
هند / سلامه قلبك ثوانى و اجيلك
مختار / ما تطوليش لحسن أنا مشتاقٌ وعنديَ لوعة ٌولكنَّ مثلي لا يذاعُ لهُ سرُّ!
هند / ههههههههههههههههههه حاضر
هند تقوم تدخل الحمام مختار يمسك موبايلها و يقلب فى الصور
……………………..
يوم الجمعه فى مصر
شيري بتسحب شنطه بره اوضتها عبد الله يروح يساعدها عبد الله / عنك انتى يا ماما
شيري / عبد الله
عبد الله يبصلها
شيري / صعبان عليا اسيب بيتي اوى
عبد الله / هناك هيبقي بيتنا برده و بعدين لينا مين هنا غير الحيطان
شيري / الحيطان دى ياما شافت يا ابنى
عبد الله / معاكى حق ياما شافت عشان كدا بقت تخنقنى
عبد الله يشيل الشنطه و يمشي و شيري تبصله بحزن عبد الله يفتح باب الشقه يلاقي فاروق طالع السلم معاه ست
فاروق / السلام عليكم ازيك يا سى عبد الله
عبد الله / و عليكم السلام ازيك يا فاروق
فاروق / الحمد لله الست امانى اللى كلمت الحجه عنها اللى عاوزه تاجر الشقه
عبد الله / اه اهلا و سهلا اتفضلى
امانى تدخل و عبد الله و فاروق وراها
عبد الله / ماما … فاروق هنا
شيري تطلع من جوه
فاروق / الست امانى اللى عاوزه تاجر الشقه
شيري / اهلا و سهلا اتفضلى
شيري و امانى يقعدوا
عبد الله / هستاذنكوا ثوانى انزل اجيب حاجه من تحت
عبد الله يمشي
شيري / ما تاخذيناش على الكركبه اصلها مقفوله بقالها حبه و احنه جينا ناخد حاجتنا اصل احنا نقلنا مكان تانى
امانى / لا كركبه ايه ما هى حلوه اوى بصراحه احلى مما توقعت
شيري تبص لفاروق و تبص للست و تبتسم
امانى / انا اصلي من اسكندريه و نازله اقعد هنا فتره عشان الماجستير بتاعى بدل ما انا رايحه جايه كل شويه
شيري / اه طبعا وقت و مصاريف انتى فى كليه ايه
امانى / هندسه و قبل ما تسالي ليه ما سجلتش فى اسكندريه كان عشان التقدير القسم بتاعى كان طالب تقدير اعلى و كنت هضطر اضيع سنتين فى الدبلومه عشان اقدر اسجل ماجستير فى التخصص اللى عوزاه
شيري / لا طبعا سنتين كتير اوى
امانى / هههههههه اصل انا اتسالت السؤال ده كتير اوى و برده قبل ما تسالى ليه ما اجرتش شقه جنب الكليه عشان للاسف الايجارات هناك عاليه اوى و فاروق قالى انك هتكرميني ان شاء الله
شيري / عيني بس انا بصراحه
فاروق / احنا اتفقنا على الفين كل شهر و الفين تامين
شيري تبص لفاروق
شيري / يناسبك يا بنتى
امانى / والله لو حبيتى تكرميني زياده من عندك اكيد مش هقول لا ههههههههههههه
شيري / انا اصلى عمرى ما اجرت الشقه دى لحد يعنى العفش ده ما حدش غريب نام عليه و لا استخدمه
امانى / انا مش محتاجه غير المطبخ و الحمام و اوضه بسرير تقدرى تلمى باقي الحاجات اللى خايفه عليها فى الاوضتين التانين و تقفلى عليهم
شيري / لا يا بنتى الشقه شقتك انا ده مش قصدى خالص
عبد الله يدخل شايل كيس فيه اربع كنزات يدى لامانى و لفاروق و مامته و ياخد
فاروق / عشت يا سي عبد الله
شيري / انتى هتحتاجى الشقه قد ايه يا بنتى
امانى / نسال الله التساهيل لحد ما اناقش ان شاء الله
شيري / ما تعرفيش قد ايه بالظبط يعني
امانى / للاسف لا بس مش اقل من سنه
فاروق / احنا نعمل العقد سنه و يجدد بزياده ١٠ % ايه رايك يا ست الكل
شيري / انا ما افهمش فى الحاجات دى و الله يا جماعه انا حتى نفسي اجاملك بس خايفه اظلمك او اظلم نفسي
امانى / يا ستى انتى بس اديني الشقه بسرعه و انتى كدا هتبقي عملتى معايا احلى واجب
شيري / محتاجاها امتى
امانى / انا مش معايا حاجتى لو بعد بكره تمام و انا جاييه معايا الفلوس
فاروق / و انا العقد جاهز و الست امانى قراته و كل تمام
عبد الله ياخد العقد يقراه و امانى تطلع فلوس و تديها لشيري
امانى / دول التمن تلاف اللى اتفقت عليهم مع الاستاذ فاروق شهرين مقدم و شهرين تامين
شيري تبص لعبد الله
عبد الله / العقد شكله كويس و فاروق ثقه و انا بصراحه مش بفهم فى الحاجات دى
شيري / خلاص على العموم احنا هنلم حاجتنا النهرده و هنسيب المفتاح مع فاروق تستلميها وقت ما تحبي و الشهر هيتحسب من يوم ما استلمتى
امانى تقوم تقف
امانى / الف شكر الف مليون شكر انا مش عارفه اقول لحضرتك ايه انا هحافظ على كل اشايه فيها هتستلميها زى ما سبتيها بالظبط
شيري / ربنا ينجحك و يوفقك يا بنتى
امانى / هستاذنك عشان القطر
شيري / توصلها يا فاروق لو سمحت
فاروق / طبعا يا ست الكل
فاروق و شيري يمشوا عبد الله ياخد الفلوس و يعدها
عبد الله / انا هدى الفلوس دى نقطه لهند
شيري / اللى انت عاوزه اعمله بس طلع حاجه منهم لفاروق هو اللى جابها و ده حقه
عبد الله / خمسميه كويس ؟
شيري / حلوين بس هو يرضي ياخدهم
عبد الله / مالك
شيري / مفيش لميت حاجتك
عبد الله / كلها و نزلتها العربيه كمان
شيري / يعني مش ناقص غير حاجه هند هدخل اللمها
عبد الله / لميتي فلوسك و دهبك ؟
شيري / لميتهم فى الشنطه الصغيره اللى جوه على السرير
عبد الله يطلع فلوس من جيبه و يحطها على فلوس امانى و يديهم لشيري
عبد الله / دى الفلوس اللى كنت محوشها خليها معاكى
شيري / خلى فلوسك معاك انت هتحتاج مصاريف
عبد الله / خليهم معاكى بدا ما يتصرفوا مش عاوزين نصرف الفلوس و نبقي لا قعدنا فى بيتنا و لا معانا ناجر بره
فاروق يدخل
فاروق / ركبتها التاكس كانت مبسوطه خالص الف مبروك عليكوا مش عاوزين منى اى حاجه تاني
شيري / انا هدخل اكمل لم الحاجه
عبد الله يعد فلوس و يديها لفاروق فاروق ما يرضاش ياخدها
فاروق / عيب يا سي عبد الله الكبير
عبد الله / دا حقك دا اقل من حقك كمان مش انت اللى جبتها
فاروق / انا حقى واصلنى و زياده
عبد الله / طب خدهم عشان احبك
فاروق / لا ما تزنقنيش انت بتحبنى من غير ما اخدهم
عبد الله / ما تتعبنيش بقي يا عبد الله والله مفرهد و تعبان على اخرى خدهم و الكبير و لا اى حد هيعرف حاجه
فاروق / والله انا حقى
عبد الله / بقولك تعبان يا فاروق ما تتعبنيش زياده بقي يا اخى
فاروق / خلاص يا سي عبد الله اللى تشوفه
فاروق ياخد الفلوس عبد الله يبتسم
فاروق / انا همشي عشان عيسي لوحده فى الدكان لما تخلصوا كلمونا نجيب الدفتر و الفلوس تاخدوها و انتوا مروحين
عبد الله / تمام ماشي
فاروق يمشي عبد الله يدخل اوضه هند يلاقي شيري قاعده على السرير بتعيط و الاوضه مبهدله جدا شيري اول ما تشوفه تمسح دموعها و تبص بعيد عبد الله يروح يجيب الشنطه من فوق الدولاب و يحطها على السرير و يفتحها
عبد الله / طلع عيني على ما اخد الفلوس
عبد الله يفتح الدولاب و يطلع الهدوم و يطبق و يحط فى الشنطه
عبد الله / مستحيل الشنطه دى هتاخد هدوم هند و ياسمينا انا بقول ناخد حاجه ياسو و اهو هند جالها كتير
شيري تبصله
عبد الله / خلاص خلاص نعبى و لو ما كفتش نبقي نشترى شنطه و لا اتنين مش مشكله
شيري تقوم و تطبق معاه
عبد الله / انتى بتعيطي عشان اللى حصل هنا اخر مره و لا عشان اجرتى الشقه
شيري / ما بعيطش يلا عشان نلحق نروح لسه عندك شغل الصبح
عبد الله / ماما
شيري تبصله عبد الله يحضنها
عبد الله / انا بحبك
شيري / و انا والله يا عبد الله بحبك و بحب اخواتك هو انا ليا غيركوا يا ابنى
عبد الله / و احنا ما لناش غيرك هند ما لهاش غيرنا خلينا جنبها
شيري / ما احنا هنروح جنبها اهو امال احنا بنعمل ايه هنا بس يلا يلا ما تضيعش وقت خلينا نخلص
عبد الله/ حاضر
عبد الله و شيري يطبقوا و يحطوا فى الشنطه
………………….
فى المكتب فى السرايا
عباده / انت بتهرج يا مختار و جاى تقول دلوقت
مختار / على ما تاكيد الحجز وصل
عباده / لا يا راجل
ناصر / مختار فوق لروحك ان كنت انت سبت السلاح فدا مش معناه ان السلاح هيسيبك
مختار / مش انت اللى خيرتنى
ناصر يزعق
ناصر / انت بتعند مع مين معايا و لا مع حياتك و حياتها هتنبسط لو جرالها حاجه يعني
عباده / اهدى يا كبير احنا لسه فيها محلوله ان شاء الله
عباده يسيب المكان و يمشي ناصر يقوم يقعد قدام مختار و مختار باصص فى الارض
ناصر / انا عارف ان موضوع السلاح ماثر فيك بس هى ما تعرفش حاجه
مختار / و المفروض تعرف ؟
ناصر / لا هند جبانه و قلبها خفيف مش هتفهم هتعيشك فى صداع بس دا مش معناه انك تسيب الدنيا عايمه اعقلها و توكل و لا ايه
مختار / تمام
ناصر / ما تزعلش انى اتعصبت عليك انت عارف انا بخاف عليك قد ايه
مختار / عارف و مش زعلان
ناصر / روح يلا شوف عروستك
صوت ضحك بره
ناصر / شكل الجماعه وصلوا بالسلامه تعال نطلع نسلم عليهم
ناصر و مختار يقوموا يطلعوا بره يلاقوا الكل بيحضن و يسلم على شيري
انتصار / طب والله اليوم ده فرق معانا
شيري / يلاهوى على لسانك الحلو ده اعمل فيه ايه
مختار / حمد الله على السلامه يا امى نورتى بيتك امال عبد الله فين ؟
شيري / خد شنطه وراح المضيفه عنده شغل الصبح و يادوب يريح شويه
مختار / طب عن اذنكوا انا مستنيه من بدرى اللحقه قبل ما ينام
مختار يسيب المكان و يمشي شيري تبص لهند
شيري / خير فى حاجه و لا ايه
ناصر / جرا ايه يا ست الكل و هو الاخ ما يتحوجش لاخوه غير فى شر و لا ايه
شيري / لا طبعا ازاى بس
انتصار / تلاقيكوا يا عينى جعانين قومى يا فاتن سخنى الاكل و ابعتى لعبد الله لقمه
فاتن تقوم و باين عليها التعب
مريم / خليكي هروح انا
انتصار / مالك يا بت فيكي ايه
فاتن / مش عارفه بقالى كام يوم مش مظبوطه
فاطمه / كانت معدتها قايمه عليها من كام يوم
انتصار / الله و ساكته على نفسك ليه يا بت ما قولتيش ليه كنا شيعنا للدكتوره و لا اى حاجه
فاتن / مفيش حاجه يا امى انا بس النوم كابس عليا و جسمى حالل شويه
انتصار / نوم ايه دا انتى طول النهار نايمه فيكي ايه يا بت
شاكر / انتوا لسه هتسالوها حد يبعت للدكتوره تيجي تبص عليها
فاتن / هقولها ايه يا عمى خملانه و عاوزه انام
شيري / انا اسفه انى بدخل بس ممكن تكونى حامل انا كنت كدا فى حملى بيجيلى من اول يوم بالنوم
فاتن / بس انا حملى مش كدا
انتصار / يا اختى و هو كل الحمل زى بعضه ياريته يطلع حمل طب والله ادبح و اكل الناس
فاطمه / طب يا اختى استنى اما تولد و ادبحى برحتك
شاكر / ندبح تانى العيال خير مش احسن ما تبقي عيانه الف مبروك يا فاتن امال جوزك فين نباركله
فاتن / لسه ما جاش بس هو فى ايه خلاص بقيت حامل خلاص ؟
ناصر / احنا فيها حد يبعت للدكتوره تيجي تتاكد و تدينا البشرى و ان ما كانش تعرف سبب التعب دا ايه و تطمنا احنا هنستنى ليه نقطع عرق و نسيح دمه
انتصار / صح يا اخويا كلامك صح حالا نبعتلها تطمنا
……………………….
فى المضيفه
عبد الله / هتفرق ايه ندور دلوقت و لما ترجع نبقي ننقى
مختار / يعني انت لو استنيت الكام يوم دول هيتعبوك اوى يعني
عبد الله / سبها لله استنى صحيح انا كنت عاوزك
عبد الله يروح يفتح شنطه و يطلع ظرف يفتحه يبص فيه فيه فلوس
عبد الله / متاخره بس معلش الف مبروك يا عريس
مختار / انت بتهرج و لا ايه انت هتنقطنى بايه انا مش قولتلك انا عاوز كارنيه الكليه
عبد الله / ان شاء الله اجيبه بس خد دول … عشان تبقي تردهملى فى فرحى
مختار / انت بس انوى و شوف انا هعمل فى فرحك ايه قولى صحيح ما روحتش الجيم تشقر على دينا
عبد الله / هههههههههههههههههههه
مختار / ضيعت انت تمرينتك النهرده
عبد الله / متعوضه ان شاء الله الاسبوع الجاى
مختار / ما تجيش على نفسك اوى فى الشغل
عبد الله / اجى على نفسي فى ايه بس دا الموضوع سهل جدا هو بس اكمنه وقت طويل و الواحد مش واخد على كدا بس تعرف اقسم بالله اللى شغالين معايا شويه رجاله دمهم زى العسل ما يتشبعش منهم بيهونوا على الواحد الدنيا
مختار / الحمد لله
عبد الله / ما تتوهش بقي و خد الفلوس
مختار / لا انت عاوز تضحك عليا
عبد الله / بجد يا مختار خدهم بقي مش هيبقي فاروق فى مصر و انت هنا … ياختاااااى
مختار / هههههههههههههههههههه ما تخافش قالى قالى
عبد الله / قالك
مختار / طبعا
عبد الله / هههههههههههههههههههه لا و انا فى كتم الاسرار ايه ما حصلتش
مختار / تبهر الصراحه
عبد الله / خدهم بقي
مختار / انت مش ناوى تمشي خليهم يمكن تحتاجوا حاجه
عبد الله / معايا غيرهم والله اصلنا كنا محوشين مبلغ و فى كمان حتتين دهب مع ماما
مختار / و انت ناوى تبيع امك دهبها و لا ايه
عبد الله / لا ما اقصدش بس لو اتحوجنا يعني
مختار / يادى الليله اللى مش فايته و تتحوج ليه يا ابنى ما خير ربنا كتير انت ليه عامل تكليف بينا ياض انا قصرت معاك فى ايه عشان ما تحسش انك اخويا الصغير
عبد الله / اخويا اه بس مش ابويا انا مش ملزم منك
مختار / بكره ربنا يكرمنى بعيل غلس زيك و اسميه عبد الله و اصبحه بعلقه و امسيه بعلقه و يسالنى بتعمل فيا كدا ليه اقوله بفش غلى من خالك
عبد الله / هههههههههههههههههه و يهون عليك خاله
مختار / لا ما يهونش دا حبيبي
مختار يحضن عبد الله
مختار / انا طالع انام لحسن انا صاحي من بدرى الناس النهرده من اذان العصر و هم مالين السرايا
عبد الله / ربنا يكتر حبايبك
مختار / امين يلا اسيبك ترتاح بقي
مختار يقوم عبد الله يقوم وراه يلحقه قبل ما يوصل للباب
عبد الله / استنى النقطه
مختار / دا انت غتت
عبد الله / خدها بقي
مختار / هات اياكش تتبط
مختار ياخد الفلوس و يحطها فى جيبه و يمشي عبد الله مبتسم و سعيد
………………..
فى اوضه مختار
هند واقفه بتعمل قهوه على البوتجاز مختار ممدد فى السرير
هند / و الدكتوره بعتت جابت تست حمل و عملته نور شرطه و التانيه خفيفه خالص و قالت انه ويكلى بوزيتيف و ادتها دوا و قالت هتكشف بالسونار بعد شهر عشان الحمل لسه فى اوله
مختار / بشره خير والله الواحد فرح
هند تصب القهوه و تروح تحط الفنجان جنب مختار يتعدل و ياخده منها
مختار / تسلم ايدك … تعالى جنبي بقي
هند / ثوانى
هند تروح تاخد الكنكه و المعلقه و تدخل الحمام تغسلهم مختار يقوم يحط ايده فى جيب الجلبيه و يطلع الفلوس و يروح لهند بتشطف الكنكه
مختار / اخوكى باعتلك النقطه بتاعتك
هند / هو لحق يقبض
مختار / دا ايجار الشقه شهرين مقدم و شهرين تامين تمن تلاف جنيه
هند / اتارى ماما زعلانه اوى انا قولت تعبانه من السفر رايح جاى فى نفس اليوم و لم الحاجه
مختار / انا قولتله يستنى اما نرجع و بعدين نشوف موضوع الشقه ده
هند / طب ليه ادونا الفلوس كلها
مختار / بيشرفك
هند / تافه اوى
هند ترمى الظرف على ترابيزه و تروح تحط الكنكه و المعلقه فى التقفيله و تمدد على السرير و هى مضايقه مختار متابعها يروح يمدد جنبها و يشرب من القهوه
مختار / انتى عارفه انى بحب عبد الله قوى
هند / عارفه
مختار / طب تعرفى ليه
هند بدلع
هند / عشان اخويا ؟
مختار / دايما تزنقيني كدا … طبعا يعني … بس هو فى سبب تانى
هند / هههههههههههههههه قول
مختار / عشان راجل واد عصب كدا وقت الجد تتسند عليه مع انه من بعيد يبان عيل طرى بس الحق هو مش كدا هو بس ما لقاش فرصه يثبت روحه
هند / و تفتكر الفرصه دى هتيجي امتى
مختار / ما احنا فيها اهو و فى كل يوم بيثبت نفسه اكتر من اليوم اللى قبله و لعلمك دا مش كلامى لوحدى كل اللى فى السرايا شايفين كدا
هند تبتسم
مختار / عبد الله بيحاول يشرفك و يرفع راسك و كل حاجه بيعملها بيعملها عشانك انتى يا هند مش عشان تافه
هند / انا ما قصدتش انا اقصد ان الفلوس مش هتفرق ميه من الف من تمانيه ما كل واحد بيجامل باللى يقدر عليه
مختار / انتى عارفه احنا لامين نقطه كام دلوقت
هند / انا معدتش بس واضح انهم كتير اوى دا كفايا الدهب اللى جالى
مختار / و اخوكى مش شايف ده يعنى ؟ بقولك ايه خلاصه الكلام عاوزين نشوف طريقه مزوقه نرجعلهم بيها الفلوس دى عشان انا غلب حمارى
هند / مش عارفه انا ممكن اديها لماما و اتكلم معاها
مختار / و هى دى مزوقه !!!
هند / ما اعرفش بقي زودله مرتبه فى الشونه
مختار / الا دى الحسابات مكشوفه و سهل يعرف انه بياخد اكتر من غيره و هتقلب نكد
هند / اديله شغل اضافى
مختار / زى ايه يعني ؟
هند / ما اعرفش بس اكيد هتلاقي حاجه
مختار يشرب من القهوه
مختار / بدعتى فى القهوه دى اقسم بالله
هند / الف هنا … مختار
مختار يبصلها
هند / هو انا ممكن اسالك فى حاجه ؟
مختار/ اكيد اسالي
هند / هو ناصر كان بيزعقلك فى المكتب ؟
مختار / اخويا الكبير و هو اللى مربيني هو الله يرحمه ما كانش بيزعقلك
هند / ساعات بس
مختار / هو بيحبنى و بيخاف عليا و ان قلع اللى فى رجله و ادانى بيه انا مش هفتح بقي بس هو مش هيعمل كدا
هند تبتسم
مختار / تحبى تعرفى كان بيزعقلى ليه ؟
هند / هتقولى لو سالت ؟
مختار / هقولك من غير ما تسالى مع ان المفروض ما تعرفيش
هند / خلاص ما تقوليش ما تقولش اى حاجه تضايقنا من بعض
مختار / لا لا مش كدا
هند تبصله مختار ياخد بق قهوه
مختار / انتى فاكره لما قولتلك انى محجزتش الشقه صدفه و انها الوحيده اللى لقيتها بالتشكيل اللى قولتلك عليه
هند تهز راسها
مختار / المفروض انى كنت اعمل كدا و انا بحجز الجناح
هند / يعني ايه
مختار / يعني كان لازم احجز اربع اوض مش اوضه واحده ولازم يبقوا بتشكيل امنى معين
هند ملامحها تتجهم
هند / انا مش فاهمه
مختار / يعنى انا ما بمشيش بره البلد من غير حراسه
هند / بس انت سبت السلاح
مختار / انا سبته بس الناس ما عرفوش انى سبته على الاقل مش كلهم
هند عنيها تتملى بالدموع
هند / يعني ايه ؟
مختار / حتى لو عرفوا احنا حتى عبد الرحمن ما كناش بنسيبه من غير حراسه الامان واجب و ولاد الحرام ما خلوش لولاد الحلال حاجه
هند/ مختار لو سمحت اتكلم بلغه افهمها
مختار يبصلها و يسكت هند تترمى فى حضنه
هند / هو انت ممكن يجرالك حاجه ؟ هو انا ممكن اخسرك ؟
مختار / هو انا بقولك كدا عشان اخوفك انتى كمان يا بت انا اكتر حاجه بتضايقنى انك تبقي خرعه كدا ما تجمدى قلبك ده بقي
هند / انت بتهرج هو انت لو عرفت ان ممكن يجرالى حاجه هتبقي عادى يعني
مختار / مش هيجرالك حاجه ما تخافيش و مش هيجرالى بس الاعمار بيد الله و الحذر لا يمنع القدر بقولك ايه يا بت انتى انا ما اتعودتش امشي جنب الحيط بفوت فى الحيط و اللى فى نصيبي هاخده
هند / يا سلام !!
مختار / و قسما بالله نصيبي كله خير حتى اهو
مختار يرفع شعر هند لورا بعيد عن وشها تبصله تلاقيه مبتسم
مختار / الا فين البت ام قلب ميت اللى ضربت العيال السيس فى الجيم
هند / معرفش هى بتطلع لوحدها
مختار / يعني هى موجوده يعني و وقت الجد هتطلع صح ؟
هند / انت بتخوفنى ليه ؟
مختار / مش بخوفك والله ما بخوفك انا عاوزك تجمدى و تنشفي انا عاوز حيطه اتسند عليها تعرفى تبقي حيطه و لا ايه ؟
هند تبصله
مختار / طب نوايه من اللى بيسندوا بيها الزير طيب ؟
هند تضحك و ما تقدرش تكتمها مختار يبتسم
مختار / الله اكبر ايوه كدا
هند / بجد خوفت
مختار / انا مراتى ما تخافش غير من اللى خلقها عشان اى حاجه تانيه فى الدنيا دى بايده هو بس
هند / و نعم بالله
مختار / و انا عارفك انا اكتر واحد فى الدنيا دى عارفك انا يمكن عارفك اكتر من امك اللى ولدتك انتى ما انتش ضعيفه و لا جبانه انتى وقت الجد بمليون راجل
هند تبص فى الارض مختار يمسكها من دقنها يخلى عنيها فى عنيه
مختار / انا واثق فيكي
هند تبصله
مختار / و انا المفروض اتكلم جد ازاى و انا ببص فى العيون الحلوه دى ما انا اكيد عقلى هيشرد منى فى حته تانيه خالص
هند ترتبك و تفوق و تبتسم
مختار / المهم انتى ناويه تقضيها رغى و لا هتيجي معايا فى الحته التانيه خالص دى
هند تبتسم اوى
هند / انت بتقول ايه ؟
مختار / ما تستاهبليش يا بت انتى فاهمه كل حاجه صحيح يتمنعن و هن الراغبات
هند / طب تصدق انك مجرم
هند تديله ضهرها يقرب اكتر و يلزق فيها و هم الاتنين مبتسمين و هند مبتسمه بخجل
مختار / هند .. هند .. هند
هند / نعم
مختار / ما تيجي نشغل التليفزيون و نعلى الصوت
هند تبتسم و تبص فى الارض
مختار / طب تعالى نلعب النمله
هند تبصله
هند / ايه النمله دى
مختار يحرك صوابعه على كتف هند كانها رجلين بتمشي لحد ما يوصل لرقبتها تغير
مختار / النمله النمله النمله النمله
هند / هههههههههههههههههههههههههههههههههه
مختار / لا دا احنا نعلى التليفزيون بقي
هند / ههههههههههههههههههههههه

هند تبتسم و تبص فى الارض
مختار / طب تعالى نلعب النمله
هند تبصله
هند / ايه النمله دى
مختار يحرك صوابعه على كتف هند كانها رجلين بتمشي لحد ما يوصل لرقبتها تغير
مختار / النمله النمله النمله النمله
هند / هههههههههههههههههههههههههههههههههه
مختار / لا دا احنا نعلى التليفزيون بقي
هند / ههههههههههههههههههههههه
……………………
فى اوضه فاطمه
صوت فيلم عالى و فاطمه بتتقلب فى السرير تقوم تقعد
فاطمه / والله ما ناقص غير انهم يجوا يتفرجوا على التليفزيون فى اوضتنا مهى مش عيشه دى كل يوم
شاكر / فى ايه بس يا فاطمه
فاطمه / مش سامع
شاكر / دلوقت يطفوه و يناموا
فاطمه / مهم مش تعبانين طول اليوم فى البيت و عاوزين يرتاحوا
……………………….
شاكر / حطى قطنه فى ودانك
فاطمه / يادى القطن اللى بحطه فى ودانى دا انا لو بنجد مخده مش هحط فيها القطن دا كله
شاكر / ههههههههههههههههههه و الله دمك خفيف
فاطمه / انا متعصبه الله
شاكر / ما عاش و لا كان اللى يعصبك
شاكر يقوم يقعد
فاطمه / روحله خليه يوطى التليفزيون ده قوله عاوزين ننام
شاكر / انا داخل الحمام
فاطمه / لو مروحتلوش انا هروحله
شاكر / فاطمه
فاطمه / انا ذنبي ايه اوضتي تبقي جنبهم
شاكر / يومين و هيسافروا و لما يرجعوا هيناموا بدرى عشان هيبقي وراه شغله و هى كمان هتبقي مهلوكه معاكوا فى البيت فما جتش من يومين يعدوا بالطول و لا بالعرض
فاطمه / كتر خيرك
فاطمه تدى لشاكر ضهرها يبص عليها
شاكر / بكره عباده يتجوز و ياخد الاوضه اللى جنبنا من الناحيه التانيه هتعملى كدا معاه هو كمان
فاطمه تقعد و تبصله
شاكر / ايه !!
فاطمه / انا عمرى ما فرقت بين عيالي فى المعامله طول عمرى زى ما بعمل لعباده بعمل لمختار بس واحد تمر فيه و التانى بيشوفني مراه ابوه
شاكر / يا فاطمه
فاطمه / انت فاكر ان ست الحسن بعد ما شهر العسل يخلص هتحط ايدها معانا ؟ و هى انتصار هتسيبها تحط ايدها معانا فى حاجه ؟
شاكر / انتى شاغله نفسك بالبت دى ليه دا امها شايله الدنيا و على يدك
فاطمه / ما حدش قالها تعمل حاجه و الكل بيعمل الل عليه و زياده عشان يريحها هى اللى ما بترضاش ترتاح
شاكر / كتر خيرها ايه اللى مضايقك انتى بقي ؟
فاطمه / انا مش مضايقه انا مش عارفه انام
شاكر / لا اله الا الله
فاطمه / يا سيدى يصبروا اليومين دول يروحوا الساحل و يعلوا الصوت براحتهم بس دا بيت و فيه ناس و الناس دى من حقها ترتاح
صوت التليفزيون ينطفى
شاكر/ اهو سكتوا اهو
فاطمه / كتر خيرهم المفروض نبعتلهم جواب شكر
فاطمه تدى لشاكر ضهرها و هو بيبص عليها و مضايق تبص تلاقيه باصصلها
فاطمه / انا الوحشه صح
شاكر / لا ما انتش وحشه بس ما انتش فاطمه اللى اعرفها
فاطمه عنيها تتملى دموع و تبص الناحيه التانيه
شاكر / اتكلمى يا فاطمه قولى ايه اللى جواكى
فاطمه / حاسه ان ماليش عازه محدش بيحبني
شاكر / مين قال كدا الكل بيحبك و ما حدش يقدر يستغنى عنك ما فيش مره تعبتى فيها الا اما اتنافسوا على خدمتك و السؤال عليكي
فاطمه / بيتاكدوا ان كنت تعبانه بجد و لا بتحجج و امثل
شاكر / دخلتى فى النفوس و النوايا كمان
فاطمه تبصله
شاكر / انتى مش مراتى بس انتى كمان بنتى انتى عندى يا فاطمه اغلى من عيالي وربنا الشاهد بس ما فيش حاجه بتوجع اكتر من انه يحس ان تعبه زى قلته
فاطمه / و انا اللى بخليك تحس بكدا
شاكر / بقالك فتره علاطول غضبانه و عصبيه و مهما اعمل ما فيش حاجه بترضيكي و لا تسعدك انتى الوحيده فى السرايا اللى سافرتى مصيف و فى الحته اللى اخترتيها حصل و لا لا
فاطمه / حصل
شاكر / ما طلبتيش منى حاجه و ما عملتهاش حصل و لا لا
فاطمه / ربنا يخليك ليا ايه لزمته الكلام ده ؟ انا عملت ايه ؟
شاكر / ما عملتيش بس علاطول زعلانه و مش عارف ابسطك مش عارف اعملك ايه اهو التلفزيون سكت و انتى برده لسه مضايقه و معصبه هم ناموا و احنا لسه صاحيين فى النكد
فاطمه تبصله
شاكر / لو مقصر معاكى فى حاجه قولى و انا هسمعك
فاطمه / انت ليه بتقول كدا انا عمرى ما قولت كدا و ان طلع منى حاجه قسما بالله ما اقصدها دا انت سيد الناس و تاج راسي دا الدنيا كلها فى كفه و انت فى كفه تانيه ليه بتقول كدا
شاكر / امال مالك
فاطمه / ماليش والله ما عارفه مالى
فاطمه تعيط شاكر يقوم يحضنها تحط راسها فى حضنه يطبطب عليها تبصله و تمسح دموعها
فاطمه / اقولك حاجه و ما تضحكش عليا ؟
شاكر / لا هضحك بس قولى
فاطمه / الله !!
شاكر / هههههههههههههههههههه بهزر معاكى قولى يا بت
فاطمه / بقول يعني لو قومت رقصت شويه هنطر الشيطان داهو و هفرفش قولت ايه ؟
شاكر / كنتى بتالسي على العيال دلوقت
فاطمه / الله .. هى جت عليا يعني
شاكر / لا ما جتش قومى يا فاطمه ارقصي و انطرى العفاريت اللى عليكي ما هى ما بينلهاش نومه الليله دى
فاطمه تقوم تجرى و هى مبسوطه تشغل الاغانى و تعلى الصوت على الاخر
شاكر / يا وليه وطى شويه
فاطمه تتحزم و ترقص بدلع
شاكر / يا وليه الناس تقول علينا ايه
فاطمه تروح تمسك شاكر من ايده تقومه يرقص معاها
شاكر / هههههههههههههههههههه يا فاطمه
فاطمه / قلب فاطمه من جوه
شاكر / اعمل فيكي ايه بس ؟!!
فاطمه / دلعنى … و ان ما كونتش عاوز تدلعنى سبني انا ادلعك
فاطمه ترقص فى حضن شاكر يرقص معاها و هما الاتنين بيضحكوا
…………………
فى اوضه مختار
مختار واخد هند فى حضنه و صوت التليفزيون عالى من اوضه شاكر هند تبص لمختار و الاتنين بيضحكوا
هند / ايه !!
مختار / ايه انتى ؟
هند / مفيش
مختار / و انا كمان مفيش
هند / امال بتضحك ليه
مختار / ما انتى بتضحكى انتى كمان
هند / انا بضحك عشان انت بتضحك
مختار / يا بت !!!
هند / ههههههههههههههههههههه
مختار / طب بتضحكى ليه دلوقت
هند / انت رخم كدا ليه
مختار / مش عارف يلا ربنا يهنيهم و يهنينا
هند / على فكره ممكن تكون اوضه مريم و لا سماح و لا حد من البنات انت اللى دماغك كارفه شمال
مختار / شمال ايه بس دا حلال اصلى مفيش فى البيت ده شمال و بعدين الصوت قريب مش بعيد
هند تتنفض و تقعد مختار يستغرب
هند / مختار .. هو احنا لما بنعلى التليفزيون كدا مش بنلفت الانتباه لينا احنا كمان دا لو كدا كاننا بنقول ياللى ما سمعتش تعال اسمع
مختار / ما فكرتش فيها كدا خالص
هند / خلاص مش هنعملها تانى
هند تقعد مضايقه مختار يشد موبايله و يفتح النت
مختار / ما فيش حاجه الا و ليها حل
هند تبص و تقرب تشوف بيعمل ايه
…………………..
فى الشونه بعد كام يوم
الرجاله قاعدين بيشربوا شاى و عبد الله قاعد لوحده بيلعب فى الموبايل جابر ياخد كبايه و يروح يديهاله
جابر / مالك يا سي عبد الله من صباحيه ربنا قاعد لوحدك و ما بتكلمش حد انت زعلان مننا فى حاجه
عبد الله / لا والله ابدا بس بيقولوا النتيجه هتبان النهرده
جابر / منصور باذن الله بس ما تنساناش فى الحلاوه
عبد الله / ما تقلقش ادخل طب بس و اللى انتوا عاوزينه
جابر / يا ما شاء الله طب حته واحده
عبد الله/ دا كان حلم ابويا الله يرحمه
جابر / لا ان شاء تنجح و تخش الطب و تبقي دكتور قد الدنيا
عبد الله / من بقك لباب السما
تليفون عبد الله يرن
عبد الله / عن اذنك
عبد الله يقوم يقف فى جنب يرد
عبد الله / الو السلام عليكم
هند / ازيك
عبد الله / الحمد لله بخير وصلتوا بالسلامه
هند / اه لسه داخلين الاوضه حالا بصراحه المكان حلو اوى المره الجايه تيجي معايا انت و ماما
عبد الله / دا بدل ما تقولى تيجي انت و عروستك
هند / ههههههههههههههههه مفيش اخبار عن النتيجه
عبد الله / الاوائل بانت احنا بالليل و انتى عارفه
هند / و ما انتش من الاوائل ليه يا استاذ
عبد الله / ياختى اتلهى بقولك ايه انا فى الشغل روحى يلا انبسطى و هبقي اكلمك لما النتيجه تبان
هند / تمام يلا حبيبي سلام
هند تقفل و عبد الله يرجع يقعد مع جابر يشربوا الشاى
……………….
فى السرايا
عباده واقف مع عمال بيركبوا حاجات زى بلاطات فى الحيطان فى اوضه هند فاطمه تدخل شايله صينيه شاى
عباده / الهمه يا رجاله عاوزين ننجز قبل ما الجماعه يرجعوا من السفر
فاطمه / الشاى … ثوانى يا عباده
عباده ياخد الشاى و يحطه على الترابيزه و يطلع بره لفاطمه
فاطمه / هو فى ايه
عباده / والله ما اعرف المهندس و العمال جم الصبح و مختار كلمنى و قالى اقف معاهم
فاطمه / و احنا مش هنخلص بقي من اوضتهم دى دا احنا لو بنينى بيت من الاول
عباده / تسلم ايدك على الشاى يا امى
فاطمه / و انت بقي صايع ان شاء الله ما وراكش شغل هو يتفسح و انت
عباده / بقولك ايه يا امى هو اخبار الغدى الاكل ايه
فاطمه / طب موراكش شغل روح كلم الحج شاهين شوف موضوعك ده اخرته ايه و لا كلم عروستك بدل ما تطفش منك
عباده / تسلمى على النصيحه يا امى اول حاجه هعملها لما تخلصي كلامك و تمشي انى هكلم الحج شاهين حاضر
فاطمه / خليك خايب كدا و وريني هتبقي الكبير ازاى
عباده يبص فى الارض و يسكت فاطمه تمشي عباده يبص عليها و يدخل يبص على العمال
…………………..

فى الساحل
هند و مختار قاعدين فى مطعم على حمام سباحه
هند / مش كنت سبتنى اغير و اللبس المايوه كان زمانى نطيت فى الميه دلوقت
مختار / و انتى عاوزه تنزلى الميه وسط كل دول
هند / عادى فى بدل الحمام سباحه ميه اهو نشوف واحد فاضى و ننزل فيه انا و انت
مختار / و تطلعى من الميه و المايوه مفصل جسمك و الكل يبص عليكي مش كدا
هند / افندم
مختار / لو كنا فى اسكندريه كنت نزلت وياكى الفجر
هند / انت بتقول ايه و بعدين هيسيبوا البكيني و المزز دى كلها و يبصولى انا
مختار / طب خدى لفه بعنيكي كدا الكل بيبص عليا انا و انتى
هند تبص بعنيها
مختار / المزز اللى بتقولى عليهم دول عارضين كل حاجه ما عندهمش جديد يقدموه فماحدش بيبص خلاص شاف و عينه شبعت فرجه ان عاز منها حاجه هيبقى اى حاجه تانيه غير الفرجه انما المستغطيه وسط العرى بتشد العين و بيبقى عاوز يشوف المدارى و المستخبى
هند / انت مصدق اللى انت بتقوله ده
مختار / و انا بهرتل و لا بقول اى كلام و لا ايه
هند / ابدا والله ما اقصش بس انت اول واحد يقول ان الحجاب وحش
مختار / استغفر الله يتقطع لسانى ان قولت كدا و لا حتى اقصدها انا بتكلم عن اللى بيبص على الحرام ليأتين على الناس زمان يعيّر المؤمن بإيمانه كما يعيّر اليوم الفاجر بفجوره يعنى الحجاب و الستر فرض و خير كبير بس وسط العرى دا كله يتنبذ و تتجاب من فوق لتحت كانها جربه تلاقيهم بيقولوا عليها فلاحه رجعيه متخلفه انما العريانه الرخيصه سيده مجتمع و تتشال على الكفوف عشان هم عاوزين الكل يبقى رخيص زيهم
هند / هو كلامك حلو جدا و بصراحه يا مختار انت كل ما بتتكلم بحس انك راجل عميق و اكبر من سنك و بحبك اكتر بس كل ده عشان انزل البحر و لا حتى حمام السباحه امال احنا جايين هنا ليه
مختار / عشان نبقى سوا نتفسح و نغير جو و نعيشلنا يومين نفرح و ننبسط طب اقولك حاجه
هند / اتفضل
مختار / تعرفى انتى لو سبتيلى نفسك الفسحه دى قسما بالله
مختار عينه تلقط فيرا نايمه على كرسى بحر الناحيه التانيه من حمام السباحه و لابسه روب قصير فوق مايوه بكينى اسود و عامله شعرها كحكه و بتقرا فى مجله و باصه عليه من الجنب عنيهم تيجي فى عنين بعض الابتسامه تروح من وش مختار فيرا تبتسم و تقوم تقلع الروب و تنزل المايه تعوم
هند / لو عاجباك ما تنزل وراها
مختار يبص لهند تسيبه و تقوم يقوم وراها يلحقها
هند / كنت بتقول المحجبه هى اللى بتلفت النظر
مختار / انتى مش فاهمه حاجه
هند / تمام انا تعبانه من السفر و هطلع الاوضه
هند تيجي تمشى مختار يمنعها
مختار / انا اعرفها
هند / اهلا و سهلا تقدر تروح تسلم عليها
فيرا تدخل رابطه البشكير على وسطها
فيرا / هاى هند
هند تبص وراها و تجيبها من فوق لتحت
فيرا / انا حضرت خطوبتك انتى مش فكرانى
هند / اه … ايوه
هند تبص لمختار
فيرا / فرصه سعيده اوى عاش من شافك
مختار بيبصلها بغل
فيرا / دا الهانيمون بتاعكوا صح
مختار / ايوه
فيرا / انجوى المكان هنا تحفه هتنبسطوا جدا خصوصا لما تشوفوا الشو بتاع الانيماشن تيم بجد خرافه صحيح يا مختار مش انا نقلت اقامتى فى مصر يعنى هنتقابل كتير
مختار يبص الناحيه التانيه و يحاول يكتم جواه فيرا تبص لهند
فيرا / انا مش هبقى عازول اكتر من كدا بس لازم نتقابل اهو على الاقل تتعرفى عليا اكتر انا متاكده ان مختار ما حكالكيش عنى و لا حكيتلها
هند / المفروض ان فى حاجه مهمه يعنى يحكيها
فيرا / امممم لا نهائى
هند / انا هستاذنك عشان احنا جايين مرهقين من السفر عن اذنك
فيرا / شور اتفضلوا
هند تمسك مختار من ايده و تشده و هو بيبص لفيرا بكره و هى مبتسمه باستفزاز تسيبه و ترجع تنزل المايه
………………………………
على قهوه
حامد / و ناوى تعمل ايه
يوسف / مش عارف بس كل يوم علاقتى بابويا بتبقى اسوء من اللى قبله مع انى عملت بنصيحتك و عملت كل اللى قولتلى عليه
حامد / يا ابنى انت لحقت قال على راى المثل لا تحمد و لا تشكر غير بعد سنه و ست اشهر
يوسف / و انا لسه هستنى سنه بحالها فى الهم ده طب دا لسه النهرده مصغرنى قدام المهندس قال ايه عشان بقوله التصميمات ساده اوى نشوف حاجه اقيم و اشيك
حامد / دا ما كانش تفكير ابوك زمان
يوسف / ايوه كان دايما يختار اغلى حاجه و اشيك حاجه دلوقت كل اللى همه انه يفتح المحل و خلاص و على اى وضع دا عنده استعداد يفرش فى السوق تصدق بيقولهالى لو اطول احط شويه بضاعه فى شنطه و انزل الف على المصالح الحكوميه بس ما عنديش صحه تخيل
حامد / دا بيغيظك بس
يوسف / ليه بقى ؟ ليه يغيظنى ؟ ليه يجر شكلى ؟ بيستفيد ايه ؟
حامد / ما اعرفش دا مقاطعنى انا شخصيا بسبب حوار العربيات ما انا كمان اتنصب عليا معاه و بقيت شغال شغلانتين و مش مكفى هطلع غلى فى العيال يعنى اهو الواحد بيفك عن نفسه باى شكل
يوسف / عملت ايه صحيح فى الديون اللى عليك
حامد / ادينى عمال بماطل مع الناس و اجدول و اشتغل و اسد اى حاجه منهم بس طبعا الناس مش صابره وصلت لمرحله انى بستلف من ده عشان اسد ده و استلف من ده عشان اسد ده و جمعيه و دايره بقى
يوسف / لا اله الا الله ياريت كان معايا حاجه كنت ساعدتك انما ابويا مقشطنى تخيل بيدينى يوميه دى ما بتكفيش مواصلاتى حتى يعنى تسحب منى العربيه و تديني مصروف ما يجبليش حتى وايت موكا شوكليت شيب فى ستار باكس مش نقول يغديني حتى
حامد يبصله يوسف يبصله حامد يبص فى الارض
يوسف / و انا يعني هروح هناك ليه انا كدا كدا ما عدليش حد
حامد / عيب يا يوسف امال انا روحت فين
يوسف / انا متاكد انه عاوز يكسرنى قدام نفسي و قدام اخواتى بيحملنى نتيجه كل اللى حصل طول الوقت عمال يقول نفسي فى ابن اتسند عليه اتسند عليه و لما تكسرنى و تزلنى هتنسند عليا ازاى
حامد / نقول ايه بس ربنا يهديه والله يا يوسف انا لو معايا ما اتاخرش عنك بس اديك شايف الحال بس ابوك معاه
يوسف يبصله
حامد / معاه فلوسك و شقتك و عربيتك و بعدين هو ما عندوش غيرك ملزم منه انما انا
يوسف يبص فى الارض و يهز راسه
حامد / طب انت لو معاك فلوس يا يوسف تعمل ايه
يوسف / هفتح مشروع و اشتغل و اشوف مكان كويس اعيش فيه و انفصل عنهم خالص و لا الحوجه للعيشه الزفت دى
حامد / و عندك فكره كويسه للمشروع ده
يوسف يفكر

يوسف / مفيش حاجه معينه فى دماغى بس ممكن يعنى كافتريا او مطعم الناس عمرها ما هتبطل تاكل و تخرج
حامد / معاك حق دا حته قهوه بلدى زى دى بتطلع شئ و شويات فى اليوم امال بقى لو كافتريا محترمه بقى
يوسف / دا كفايا الماطشات و ممكن كمان اجيب كام جهاز بلايستايشن و كام شاشه كبيره
حامد / اه بس دى كدا هتكلفك جامد اوى
يوسف / ما انت لو بدات صغير هتفضل طول عمرك صغير لازم تبدا كبير
حامد / تفتكر مشروع زى ده يتكلف كام
يوسف / مش اقل من اتنين مليون دا كفايا الفرش و الاجهزه
حامد / و انت هتجيب المبلغ ده كله منين دا انا ما افتكرش ان شقتك نفسها كانت تجيب المبلغ ده
يوسف / مهو باعها برخص التراب يلا ربنا يجازيه بقى
حامد / طب ما تدخل معاك شركاه
يوسف / لا لا لا يدخلوا فى كل حاجه و يقرفونى
حامد / لو نسبتك الاكبر اكيد انت اللى هتدير و اهو انت مش عاوز تبدا كبير
يوسف / ايوه بس هجيبهم منين الشركا دول
حامد / ما اعرفش ما لكش صحاب زمايل من ايام الكليه يكونوا مرتاحين شويه
يوسف / مرتاحين ايه انا كنت انضف واحد فيهم دا انا كنت بصرف عليهم
حامد / ما دى برده مشكله يا يوسف يا ابنى الواحد لازم ينقى صحاب يرفعوه و وقت الزنقه يسندوه دا انا كان ليا شويه صحاب بيتكلموا بالملايين بس قطعوا معايا ولاد الكلب بعد اللى حصل قال ايه انت اللى شورت علينا الشوره الهباب دى ما فاضلش منهم غير الكام واحد اللى عليا ليهم ديون … تاهت و لقيناها فاكر المحامى اللى عرفتك عليه
يوسف / دا زى قلته ما فادنيش بحاجه
حامد / ايوه يا يوسف بس اكيد يعرف ناس تقال يشاركوك
يوسف / حتى لو لقيت الناس دول ما انا اصلا ما عييش فلوس
حامد / اه صح قال و انا اللى عمال احلم انك تشوفلى شغلانه عندك بدل البهدله اللى انا فيها دى
يوسف / طب و العمل هنفضل نحلم كدا و خلاص و نفوق على القرف اللى احنا فيه ده
حامد / طب ما تتكلم مع ابوك و اعرض عليه المشروع
يوسف / ابويا ايه بس
حامد / عندى فكره بنت لذينه
يوسف / اللحقنى
حامد / بص احنا نطلع على المحامى و ندور على المكان و نجهز كل حاجه يبقى فاضل نحدد انت محتاج كام و نشوف قرض كويس
يوسف / قرض ايه بس هبدا بالدين و اقعد اشتغل عشان اسدد فى فوايد القرض انا طموحى اكبر من كدا
حامد / ابوك لو شافك شغال و بتكسب هيساعدك و يقف جنبك
يوسف / دا مش بعيد يقفلى فيها
حامد / طب اتكلم معاه و شوف
يوسف / لا طبعا مش هقوله على اى حاجه بقولك هيقفلى فيها
حامد / خلاص سيب الفلوس اخر حاجه و وريني شطارتك هتقدر تلاقى مكان كويس و عروض اسعار كويسه فى قد ايه و الباقى عليا
يوسف / هتعمل ايه يعنى
حامد / اعرف بس راسك من رجلك عشان ما نتغرسش و ساعتها يحلها الف حلال هو انا يعنى هغلب
يوسف يبصله
حامد / و بعدين هو انا يعنى هتاخر عن ابن اخويا دا انا لو اطول اقطع من لحمى و اديك ما اتاخرش و انت عارف
حامد يبص فى الساعه و يقوم بسرعه
حامد / ينهار ابيض اتاخرت على الشغل عن اذنك يا يوسف
حامد يمشى و يجرى و يوسف بيبص عليه و يكمل شرب الشاى و هو مضايق و بيفكر
………………………
فى اوضه هند فى الساحل
هند قاعده على كرسى و مغطيه وشها بايديها و سانده بكعوعها على ركبتها و مختار بيتكلم فى التليفون عند الشباك و فى اكتر من راجل عمالين يتحركوا فى الاوضه باجهزه
مختار / و انا اعرف منين … لا مش هرجع طبعا … تمام … تمام … سلام
راجل يروح لمختار و معاه جهاز
الراجل / مفيش اى حاجه يا سى مختار
مختار / متاكد
الراجل / برقبتى يا سى
مختار / تمام
الراجل / على العموم دا جهاز تشويش زى الفل و مضمون و متجرب خليه فى اى حته و شغله
مختار / تمام فتحوا عنيكوا بقى
الراجل / ما تقلقش
مختار يهز راسه الراجل يشاور لباقى الرجاله و يطلعوا بره و يقفلوا الباب وراهم مختار يحط الجهاز على ترابيزه و يشغله و يروح يقفل الباب بالمفتاح و يروح يقعد على ركبه تحت رجلين هند و يبصلها تشيل ايدها و تبصله عنيها كلها دموع
مختار / اسالى
هند / اسال فى ايه ما انا مش فاهمه حاجه مش دى اللى قولتلى عباده بيخلصلها ورق او باعتهالك تخلصلها انت الورق او حاجه كدا
مختار / مش بالظبط
مختار يتنهد
مختار / الموضوع بدء بعمليه سهله بس هم حاولوا ينصبوا علينا و انا اكتشفت الموضوع و رجعت الفلوس منهم و هم كانوا بيشتغلوا عندها و من يومها و هى قرفانا فى عيشتنا اتفقنا مع المحافظ نسلمها و كشفت الخطه و فلتت فى اخر لحظه بنت الكلب
هند / انا مش غبيه والله بس فعلا مش فاهمه اى حاجه
مختار / تقدرى تقولى عليها مجرمه كبيره دوليه
هند / دى !!!
مختار يهز راسه
هند / و دى عاوزه منك ايه ؟
مختار / اشتغل معاها
هند / يعنى ايه ؟
مختار / اعديلها حاجات من الحدود بس انا والله رفضت و حتى بوظتلها عمليه قبل كدا و خسرتها فلوس كتير انا ما ليش لا فى الحرام و لا الشمال و بقولك حاولت اوقعها و اخلى الحكومه تقبض عليها بس طلع ليها عيون فى الحكومه و فلتت
هند / انا بحاول افهم بحاول اجمع مختار هو انا المفروض اخاف صح
مختار/ لا ما تخافيش و لا منها و لا من اللى اتخن منها كمان
هند / امال ليه كل اللى حصل دلوقت ده ليه الرجاله دول كلهم كانوا هنا كانوا بيعملوا ايه
مختار / بيامنوا الاوضه بتاكد ان ما فيش ميكروفون هنا و لا كاميره هناك
هند / كاميره!!!
هند تبص على الحيطان مختار يمسك دقنها و يخلى عنيها فى عنيه
مختار / مفيش احنا اتاكدنا الموضوع كله زياده تامين بس دا مش معناه انها هتحاول تتجسس علينا
هند / مختار انت مش بطلت السلاح
مختار / بطلت بس هى ما تعرفش
هند / قولها قولها انك بطلت قولها تسيبك فى حالك
مختار / هههههههههههههههههههه انت بريئه اوى يا هند
هند / يعنى ايه ؟
مختار / بتثقى فيا ؟
هند / ايوه طبعا
مختار / خلاص انسى اى حاجه تانيه و خلينا نستمتع بالاجازه تمام
هند تبص حواليها مختار يمسك دقنها و يخلي عنيها فى عنيه
مختار/ بتثقى فيا ؟
هند تهز راسها
هند / هنعمل ايه دلوقت
مختار / انتى عاوزه تعملى ايه ؟
هند / انا خايفه و عاوزه اروح
مختار / ههههههههههههههههههههههههه يا بت انشفى كدا بقى السلعوه دى تخوفك كدا
هند / و هى السلعوه ما بتخوفش يا مختار
مختار يحط وشها بين كفوفه و وشها فى وشه
مختار / مش لما تبقي متجوزه اسد يا بت
هند تبتسم و تبص الناحيه التانيه و ترجع تبصله
هند / و انت يعنى مش خايف كل الحاجات اللى عملتوها دى و الناس دى و التليفون و الجهاز و مش خايفين يعنى
مختار / لا مش خوف دا احتراس زياده امان ما بنسيبش حاجه للظروف سميها زى ما تسميها
هند / طب و هنعمل ايه دلوقت
مختار / تحبى تعملى ايه ؟ دى فسحتك انتى … تعرفى كل البنات بتحب الشرا تيجى نروح المول تبعزقيلك قرشين
هند / انت بتهزر صح
مختار / هو احنا جايين هنا نتحبس من الاوضه يعنى ؟؟ والله فكره مش بطاله خالص حبسه الاوضه مش وحشه برضه
مختار يغمزلها
هند / نعم !!
مختار / نعم الله عليكي كلك نظر و عرسان و شهر عسل و كدا يعني
هند / والله انت فايق و رايق
مختار / و انا ايه اللى يعكر مزاجى بس … لا اله الا الله قومى معايا
هند / هنروح فين
مختار / ما اعرفش ننزل نتمشي على البحر شويه ناكل ايسكريم اجبلك ورده حمره
هند / مختار تعال نروح
مختار / لا اله الا الله يعني لا هننبسط فى الاوضه و لا ننبسط براها دا عين مين اللى رشقت فى شهر عسلى دى و لا هو اكمن امى ماتت قبل ما تدعيلى يعني
هند مبتسمه و مش قادره تكتمها مختار يقرب منها و هو مبتسم
مختار / طب والله مرزق ياض يا مختار
هند / احيانا الجهل بيكون نعمه مش كدا
مختار / احيانا بس فى حالتك دى لا انك تبقي عارفه انتى داخله على ايه يخليكي تاخدى بالك
هند / و ان ما كنتش قده
مختار / انا قده بس انتى مره فى عمرك ثقى فيا يا هند
هند / واثقه
مختار / امال ايه بقي
هند / هقوم اخش الحمام و اغير هدومى و ننزل
مختار / ماشي
هند تقوم و مختار يقوم هند تروح ناحيه الحمام و مختار يقعد على السرير و يمسك التليفون هند تطلع من الحمام
هند / مفيش كاميرات فى الحمام صح
مختار / ياغلبي يانا لا يا هند ما فيش خدى راحتك تحبى اجى معاكى
مختار يحط السماعه و يقوم يزقها على الحمام و هى تزقه بره
هند / خلاص خلاص
مختار / خلاص ايه بس تعالى نشوف الموضوع ده جوه
هند / انت بتهزر يا مختار وسع بقي
مختار / لا بصراحه بتلكك
هند / ههههههههههههههههه يعني الخروجه باظت يعني
مختار / الخروج مش هيطير خليكي حلوه بقي
هند تبتسم بخجل / ماشي
مختار يبتسم هند تدخل الحمام و مختار يدخل وراها و يقفل الباب
…………………
فى السرايا
الستات قاعدين فى دايره اللى بتنقي رز و اللى بتقطع فاصوليا و اللى بتقور محشي و اللى بتصبع كفته
فاطمه / يا سلام و دا من ايه ان شاء الله
انتصار / كل واحد حر
فاطمه / ما قولناش حاجه بس ليه يعني محسسيني اننا واقفين على الباب نتسنط عليهم و لا يكونش اللى بيحصل عندهم ما بيحصلش عند غيرهم
شيري تبص لفاطمه
فاطمه / دا كدا بيلفتوا النظر ليهم اكتر بيقولوا ياللى ما شوفتش تعال شوف
شيري / اصل ما يصحش برده يعلوا الاغانى و التليفزيون فى عز الليل ان كنا بنعديها فى الاجازه فالدراسه جايه و هيعملوا ازعاج للى حواليهم
انتصار / يا اختى و لا ازعاج و لا حاجه ما شوفتيش البنات و عمايلهم دول سهراتهم صباحى ان كانت صيف و لا شتا
فاطمه / على العموم على خير ان شاء الله و ياريت تعجبهم الاوضه كدا كنا قبل الفرح بنتحايل شوفوا لو حاجه ناقصه تقول حلوه حلوه و من يوم ما دخلوا و كل يوم طلبات طلبات
انتصار / لما عاشوا عرفوا اللى ناقصهم
فاطمه / ناقصهم ليه محسسينا انهم عايشين فى بيت لوحديهم و حطوا كل حاجه فى الاوضه و عزلوها اهو دا ناقص ينقلوها بيت تانى
شيري / عندنا فى مصر ما بيحبوش الجواز فى بيت العيله عشان التدخلات بتبقي كتير مع ان كل واحده عايشه فى شقه لوحدها هنا ما شاء الله هند عايشه فى اوضه و برده مش عاجبه
انتصار / لا يا اختى ما تقوليش كدا انتى فهمتى فاطمه غلط هى تقصد انها عاوزه هند تندمج وسطينا
شيري / لو لقت القاعده حلوه اكيد هتيجي تقعد وسطيكوا من نفسها انا خلصت … عن اذنكوا
شيري تسيب المكان و تقوم
فاطمه / حقك تقولى اكتر من كدا كمان
انتصار تقوم
انتصار / حقها الحق يتقال حقها
انتصار تجرى ورا شيري
فاطمه / اجرى وراها و امرعيها زياده قال يعني هم ناقصين
الكل باصص لفاطمه و ساكت
فاطمه / والله ما فاهمه ممروعين علينا كدا ليه و كل شويه تقول فى مصر فى مصر فى مصر ما كانت اتجوزت فى مصر حد حاشها
البنات يبصوا لبعض فاطمه تسيب المكان و تقوم
فاتن / الكلام ده ما اتقالش ما يتعادش و لا حتى مع روحكوا قدام المرايه ما تفتحوش علينا فاتوحه
كل واحده تركز فى اللى بتعمله
………………………….
فى اوضه هند
مختار نايم هند تقوم تبص فى الساعه فى الموبايل و تبص على مختار نايم
هند / مختار .. مختار .. اصحي هيفوتنا العشا
مختار / اطلبى الاكل فى الاوضه
هند / اصحي بقي
هند تنفخ فى ودنه
مختار / لو صحيت هقوملك
مختار يلفلها و يفتح بالعافيه يلاقيها مبتسمه يشدها فى حضنه
مختار / تصدقى صحيت تعالى بقي
هند تسيب حضنه و تقعد
هند / قوم بقي يا مختار هنقضي اليوم فى السرير و لا ايه
مختار / و هو السرير وحش هو السرير وحش يا هند
هند / على فكره انت ما كانش يبان عليك كدا ابدا ايه اللى جرالك
مختار يقوم يقعد و يبصلها
مختار / لا اله الا الله الاول كنت عازب يا ست هند دلوقت متجوز دا غير ده يا ست العرايس و لا تكونيش كنتى فاكره عيني اللى فى الارض قصر ديل لا سمح الله
مختار يقوم على ركبه
مختار/ لا دا احنا رجاله اوى رجاله اوى اوى يعني و ان ما كنتيش واخده بالك اثبتلك
مختار يحاول يحضن هند تعدى من تحت ايده و تقوم من على السرير و هو يقع على وشه على السرير هند تضحك
مختار / دى مش اخلاق فرسان على فكره
هند / بطل هزار بقي يا مختار قوم
مختار / ما انا قومت انتى اللى غاويه فرهده و نجرى ورا بعض ما الطيب احسن يا بنات الناس
هند / قوم نخرج
مختار / حاضر
مختار يقوم من على السرير
مختار / جهزيلى حاجه حلوه زيك كدا اللبسها على ما اطلع من الحمام
هند / حاضر
مختار يروح ناحيه الحمام و يرجع
مختار / ما تيجي معايا لحسن انا بخاف ادخل الحمام لوحدى
هند / ما خلاص بقي يا مختار الله
مختار / انا جاهز انتى اللى بتدلعى
هند / انا !!!!
مختار يسيبها و يدخل الحمام و يقفل الباب هند تروح ناحيه الدولاب مختار يفتح الباب
مختار / فضلت اقدم السبت اقدم السبت لا شوفنا حد و لا جمعه
هند تفتح بقها مختار يرزع الباب هند تضرب كف على كف و تطلع الهدوم من الدولاب
…………………
فى اسكندريه
وسام بتحط اكل على سفره و امها تيجي تقعد
الست / معاش ايه اللى اسويه يا وسام
وسام / فرقت فى ايه ما انتى كدا كدا ما عدتيش قادره تشتغلى
الست / و ناكل منين
وسام / نشوفلنا مشروع ناكل منه
الست / مشروع ايه يا وسام و احنا بنفهم فى مشاريع
وسام / و هو كل اللى فتحوا مشاريع بيفهموا فيها
الست / بس دى مجازفه و احنا مش معانا فلوس للكلام ده
وسام / انا طول عمرى نفسي اعيش فى اسكندريه اتخنقت من مصر و العربيات و الزحمه و التلوث
الست / عاوزه تقعدى اكتر من كدا نعزل هنا بقي عشان ترتاحى
وسام / و ماله و ناجر شقه مصر و لا حتى نبيعها لينا مين هناك يعني
الست / انا ماليش انتى كمان مالكيش ؟
وسام / ليا مين يعني ؟
الست / ما اعرفش ما انتى مش عاوزه تقوليلى الست اسراء كانت عاوزه منك ايه
وسام / مش عاوزين حاجه قال يعني اللى يوسف عمله فيا ما كانش كفايا بقولك ايه كلى يلا عشان ننزل نتمشي شويه على البحر
الست/ هننزل دلوقت
وسام / اهو ده جمال اسكندريه الناس صاحيه للفجر مش زى مصر بنام زى الفراخ من المغرب
……………………..
فى السرايا
انتصار و شيري قاعدين على المرجيحه فى الجنينه الورانيه و بيضحكوا
شيري / يااااه ياما شوفت زيها هتيجي ايه دى جنب اسراء سلفتى
انتصار / طب والله طيبه و غلبانه هى بس اللى لسانها فالت و ما بتفكرش فى الكلام قبل ما تقوله
شيري / ربنا يهديها لنفسها
انتصار / امين … تعرفى الكبير بيشكر فى عبد الله خالص بيقول انه مبدع فى الشغل
شيري / و هو شغله فيه حاجه يادوب بيسجل اللى داخل و اللى خارج
انتصار / و دى حاجه سهله برده دا لازم يبقي مفتح و عنيه وسط راسه
صوت ضرب نار شيري تصرخ انتصار تمسك ايدها
انتصار / اهدى اهدى اما نشوف فى ايه
شيري / دا قريب اوى استر يارب استر
شيري و انتصار يجروا يروحوا ناحيه ضرب النار يلاقوا امين و عباده بيضربوا نار و واقفين قدام عبد الله عبد الله يشوف مامته بتجرى عليه يجرى عليها
عبد الله / باركيلى يا ماما باركيلى نجحت و جبت تسعه و تسعين فى الميه
شيري / انت بتتكلم جد يا عبد الله
عبد الله / لسه شايفها على النت اهو و اخدتلها اسكرين شوت كمان حتى شوفى
انتصار تزرغط و عباده يضرب نار
عباده / والله و بقالنا فى العيله دكتور و هنكشف ببلاش يا بشر
عبد الله يضحك
انتصار / النهرده يا عباده تكلم الجزار و تاكد على عجلين كبار حلاوه الدكتور خلى الناس تاكل و تدعيله
عبد الله / ربنا يخليكي يارب هكلم هند افرحها
انتصار / كلمها كلمها لولولولولولولولولولولى
شيري / احمدك و اشكر فضلك يارب

…………………..
فى مول كبير
مختار و هند قاعدين فى الفود كورت هند بتاكل و مختار بيشرب شاى
هند / الاجازه دى هتبقي صعبه بالنسبالك بالشكل ده كل يا ابنى بلاش حسوكه
مختار / مش جعان والله
هند / براحتك اكل انا
مختار / الف هنا
تليفون هند يرن
هند / دا عبد الله … الو
عبد الله / البالطوا الابيض هياكل منى حته
هند / بانت ؟
مختار / بانت ؟
عبد الله / تسعه و تسعين فى الميه
هند / و الواحد فى الميه الباقي راح فين
عبد الله / ههههههههههههههههه شوفوا مين بتتكلم
هند / مختار عاوز يباركلك
مختار ياخد الموبايل من هند
مختار / اللى مشرفنا و رافع راسنا
عبد الله / حبيبي
مختار / قول يا سيد الكل نفسك فى ايه شاور على هديتك
عبد الله / مفيش حاجه معينه في دماغى هخليها وقت تانى اكون مخمختلك فى حاجه عليها القيمه
مختار / حقك
عبد الله / هسيبك بقي تكمل اللى كنت بتعمله و هروح احتفل مع الشباب هنا
مختار / اجدع حاجه ربنا يجعل كل ايامك انبساط
عبد الله / سلام
مختار يقفل و هو مبتسم يبص على هند هند بتبص على الناس بياكلوا عيالهم و سرحانه مع عيل مختار يبص مكان ما بتبص و يبتسم
مختار / اللى يسعدها زمانها تجيب بناتها قبل صبيانها
هند تبص لمختار و تبتسم و تكمل اكل
مختار / انا لو ربنا كرمنى ببنت هبقي اب وحش اوى على فكره
هند تبصله
هند / ليه بتقول كدا
مختار / هدلعها و مش هحرمها من حاجه مش هستحمل عليها الهوى تشاور بس و انا انفذ
هند / و دا وحش
مختار / كتر الدلع مفسده
هند / لو ما شافتش الدلع فى بيت ابوها هتشوفه فين
مختار يهز راسه و يبص على الناس هند تمسك ايده يبصلها
هند / يسعدها ربها بعريس زى ابوها يتقى ربنا فيها و يحبها و يسعدها
مختار يبتسم
هند / انا شبعت ايه رايك نتمشي شويه لحد ما الفيلم يبدا
مختار / تمام اللى تشوفيه
مختار و هند يقوموا يتمشوا
مختار / هو انتى عندك مايوه يا هند
هند / اه اسلامى ماما جابتهولى معاها و سط هدومى من مصر هو انت ما عندكش مايوه
مختار / عندى بس ما جبتوش معايا انتى جبتى معاكى
هند / اه جبته طبعا بس يا خساره مش هلبسه
هند تبص الناحيه التانيه
مختار / الشنطه دى حلوه اوى و هتليق على الطقم البنى بتاعك
هند / فين
مختار يشاور لهند على شنطه بنى شيك جدا
مختار / تيجي نبص عليها
هند تبتسم مختار و هند يدخلوا يبصوا فى المحل
……………………….
فى شقه يوسف
بوسف يدخل يلاقى محمود قاعد بيتفرج على التليفزيون اسراء تقوم
اسراء / اعملك حاجه تاكلها يا حبيبي
يوسف / شكرا مش جعان
يوسف يبص على ابوه مش مهتم يسيبهم و يدخل اوضته يفتح اللاب و يقعد اسراء تدخل وراه
اسراء / اخبارك ايه
يوسف يبصلها و يرجع يبص فى اللاب
اسراء / انت مخاصمنى و لا ايه
يوسف/ انا مش فاضي يا ماما
اسراء / طب شاركنى بتعمل ايه
يوسف / هتساعديني يعنى
اسراء / لو اقدر يا ابني مش هتاخر انت عارف
يوسف / والله يا ماما الفتره اللى فاتت ما عدتش عارف حاجه خالص
اسراء / اخص عليك يا يوسف انا برده اللى يتقالي الكلام ده
يوسف يبص للاب
اسراء / هقوم اغرفلك زمانك جعان
يوسف / ماما انا محتاج فلوس
اسراء / فلوس !! كام يعني
يوسف / فلوس كتير عاوز افتح مشروع و اشتغل لوحدى
اسراء / ايوه يا حبيبي بس الفتره دى الظروف صعبه شويه
يوسف / خلاص خلاص
اسراء / خد فواتير الدهب و روح ارفع قضيه على وسام و خد شبكتك من حباب عنيها الواطيه قليله الاصل دى تطلعلها بالشئ الفلانى
يوسف / لسه هرفع قضيه و محاكم و فضايح و قرف
اسراء / مش ارحم من رميتها انت اولى منها بالفلوس دى يا حبيبي
يوسف / ايوه بس
اسراء / ما بسش ما بسش دا انا كنت منقيهالها حته حته على الغالى
يوسف / مش عارف يا ماما بس انا قولتلها تاخدها ما ينفعش ارجع و اقولها هاتيها
اسراء / الظروف بتتغير و التاجر لما بيفلس بيدور فى دفاتره القديمه و احنا دفترنا ما عدش فيه غيرها
يوسف / انا هروح اتكلم معاها بالزوق الاول و بعد كدا افكر فى حوار المحكمه ده
اسراء / قولى بقي ايه المشروع الجديد بتاعك احكيلى
يوسف / هحكيلك بس يبقي سر بينا
اسراء / ماشي احكى
…………………
فى اوضه هند فى الساحل
باب الاوضه يتفتح و هند و مختار يدخلوا شايلين شنط محلات كتير جدا مختار يحطها على الترابيزه و يترمى على السرير و يرفع صابعه
مختار / احد احد … احد احد
هند / ايه الاوفر دا يا عم
مختار يقوم يقعد
مختار / انا قولت هندخل نشوف شنطه شنطه يتيمه ايه بقي اللى حصل هناك ده
هند / و انا كنت ضربتك على ايدك ما كلو كان بمزاجك و بعدين هى الحاجات دى عشانى ما كلها هدايا لاهلك
مختار يقوم يحضنها من ضهرها
مختار / و انا فين هديتي بقي
هند تبتسم و تبص فى الارض و مختار متابعها و مبتسم
هند / ما انت كل حاجه كانت قدامك ما نقتش اللى يعجبك ليه
مختار / ما اللى عاجبني فى حضنى اهو يا بت
هند / طب يعني عايز ايه دلوقت
مختار / كلك نظر
هند / هو انت ما بتشبعش
مختار / هو انتى يتشبع منك برده يا عسل انتى
مختار يبوسها من رقبتها تغير
هند / هدخل اخد دوش و اغير هدومى
مختار / ايوه بقي
هند تدخل الحمام مختار يبص عليها لحد ما تقفل الباب يستنى اما صوت المايه يشتغل و يروح يقعد على السرير و يمسك التليفون
مختار / السلام عليكم لو سمحت كنت عاوز احجز بكره ….
……………………
فى السرايا تانى يوم الصبح
سماح بتكلم عصام فى التليفون
سماح / و انا مالى بكل ده
عصام / يعني ايه و انتى مالك امال مين اللى كان بيتكلم معايا الفتره اللى فاتت دى كلها
سماح / قولتلك كنت بكلمك على انك استاذى انا عمرى قولتلك بحبك و لا حتى لمحتلك
عصام / و انتى بقى بتكلمى كل اساتذتك بالطريقه اللى كنتى بتكلميني بيها
سماح / و احنا مين دخل بيتنا غيرك
عصام / انا طول الليل امبارح بقلب فى المحادثات و اقول ازاى ما بتحبنيش امال كانت تقصد ايه بالكلام ده
سماح / و اخرتها يعني
عصام / ان ما اتكلمتيش انتى مع ابوكى هتكلم انا هقولهم على كل حاجه
سماح / هتقولهم ايه
عصام / هقولهم انك بتحبيني زى ما بحبك هقولهم انك عوزانى زى ما انا عاوزك
سماح / انت شارب حاجه و لا مسطول و لا ايه حكايتك يقتلوك يا اهبل
عصام / ما يهمنيش يقتلونى يا يجوزوكى ليا يا يقتلونى انما كدا دى ما تبقاش عيشه
سماح تقفل السكه يتصل تانى
سماح / مش هنخلص بقي من الوقعه الهباب دى

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية البر التاني)