رواية تائهة بين جدران عشقه الفصل الثالث بقلم دعاء الكروان

فى الملهى الليلى ….

مازالت السهرة مستمرة بين علي و سهام ، فقد قصت له حكاية زينة قائلة: 

ـــ كان زمان فى بت اسمها هدى كانت بتشتغل عندنا هنا ف الكباريه جرسونة ، بتخدم ع الزباين و تنزلهم مشاريب و كدا يعنى ، بس البت هدى دى كانت بت مزة ، كان زباين كتير بيطلوبوها بس مكانتش بترضى أبدا و كانت علطول مصدرة الوش الخشب للزباين ، دا حتى أبويا الله يرحمه كرشها كذا مرة ، بس كانت بتصعب عليه و يرجعها تانى ، كان بيقول غلبانة ملهاش حد ، أنا أبويا آه قرنى بس كان قلبه طيب قوى .

أثارت عبارتها الأخيرة سخريته فضحك مردفا باستهزاء : 

ـــ اه انتى هتقوليلى ، الله يرحمه عم سيد ابوكى كان بيصعب عليه البنات الغلابة ؛ فيقوم جايبهم عشان يشغلهم هنا أهو يكسب فيهم ثواب ..

أومأت بالايجاب مؤيدة حديثه الساخر :

اومال يا باشا ؛ اهو يكلو لقمتهم من عرق جبينه

أردف بنبرة أكثر سخرية : 

ـــ من عرق جبينهم و ﻻ من هز وسطهم ؟!

أجابته بحنق من جداله العقيم من وجهة نظرها :

ـــ مش أحسن ما يمدو ايدهم للى يسوا و اللى ميسواش ؟! 

أومأ لها بعدم اقتناع لينهى الجدال فى هذه النقطة قائلا :

ـــ مش موضوعنا .. كملى 

استرسلت بحماس : 

ـــ المهم يا باشا ضحك عليها شاب حليوة أوى من اللى كانو بييجو هنا ، كان غنى أوى بس مكنش بييجى كتير ، المهم البت هدى حبته و سلمت نفسها ليه ، يمكن دى الغلطة الوحيدة اللى غلطتها هدى ، ﻻ غلطت قبلها و ﻻ بعدها ، المهم قعدت تتحايل عليه عشان يتجوزها ، و هو يقولها على اخر الزمن اتجوز ريكﻻم ؟

لما مارضيش يتجوزها سلمت أمرها لله و رجعت كملت شغل جرسونة برضو ، لحد ما ف يوم عرفت انها حامل ، كانت هتموت نفسها بس انا قولتلها روحيله عرفيه يمكن قلبه يرق و يرضى يكتب عليكى عشان خاطر الواد حتى !!

ـــ راحتله يا باشا و قالتله ع الحمل ، فصعبت عليه و فهمها بالهداوة كدا إن أبوه راجل شديد اوى و ﻻ يمكن هيوافق ع الجوازة دى ، و يمكن يأذيها كمان لو عرف ، فقالها أحسن حل إنها تنزل الجنين و هو هيفتحلها حساب ف البنك باسمها و يحولها عليه فلوس تصرف منها و تسيب الشغل ف الكباريه لحد ما يشوف صرفة مع أبوه .

تسائل على بفصول: 

ـــ و الشاب دا اتجوزها فعلا ؟! 

قبضت على رسغه تحثه على الانصات مردفة : 

ـــ ما انا جايالك ف الكلام اهو يا باشا ؛ هى قالتلى طالما ما نكرش الجنين يبقى اكيد هيتجوزها بعد ما يتصرف مع أبوه ، و مرضيتش تنزل الحمل و كملته ، مع إنى قولتها يا بنتى نزليه ؛ إفرض خلى بيكى و مرضيش يتجوزك ؟ قالتلى مش مهم هصرف عليه من الفلوس اللى هيحولهالى على حسابى ، بعدها ييجى بشهر كدا بعتلها مرسال انه ابوه هيسفره برة البلد و تنساه خالص و تعيش حياتها ، المهم أبويا عرفها على راجل كبير ف السن كان حاطط عينه عليها و عايز يتجوزها ، ابويا كان حاكيله على كل حاجة و هو وافق يتجوزها و يكتب المولود باسمه ، البت هدى ماكانتش موافقة ، بس انا قولتلها اهو هيسترك و يبقى البت بنتك ليها أب حتى لو ع الورق بس ، اهو حتى تعرف تدخلها المدرسة من غير مشاكل ، المهم وافقت يا باشا عشان خاطر البت زوزة و عاشت معاه و اشتغلتله خدامة و ممرضة لحد ما مات بعد سنتين من الجواز ، و رجعتلنا تانى بالبت بنتها و اشتغلت جرسونة برضو لحد ما جالها المرض الخبيث و ماتت و البت زينة كان عندها خمس سنين .

سكت قليلا يستوعب هذه القصة ثم سألها بفضول : ـــ كدا عرفنا حكاية زينة و أمها .. إيه بقى حكايتها مع جلال ؟ 

أجابته: 

ـــ ماهو يا باشا هدى رجعتلنا و زينة كان عندها سنتين و الواد جلال كان عنده ييجى عشر سنين كدا ، ما كانش فى قدامه اﻻ هى ، فبقى هو اللى بيخلى باله منها على ما امها تخلص شغل و كانت بتكبر قدام عينيه و هو بيكبر معاها ، ماكانش بيروح ف حته أﻻ ما ياخدها معاه ، و كان بيوديها المدرسة و يجيبها ، ابويا قالى سيبيها تتربى معاه ، مسيرها هتكبر و تبقى مزة حلوة و هتنفعنا ف شغل الكباريه ، بينى و بينك يا باشا كلام أبويا جه على هوايا ، و البت لما كبرت كدا و ادورت و احلوت ، بقى الزباين هيموتو عليها ، قولت يلا اهو جه وقتها بقى و نسترزق من وراها نظير تربيتنا ليها..

سكتت تحرك شفتيها المضمومتين يمينا و يسارا بحسرة و أسف ثم أردفت:

ـــ قام ايه يا باشا؟!

أجابها مكملا بدﻻ منها بتخمين :

ـــ قام جلال واقفلك و مرضاش يشغلها ضمن البنات اللى ف الكباريه ؟

أجابته مؤيدة لتخمينه: 

ـــ لله ينور عليك يا باشا ، و من ساعتها و هو محرّج عليها تنزل من قوضتها من غير إذنه و ﻻ حتى تنزل الصالة ؟ 

سألها باستخفاف: 

ـــ و انتى يعنى بجبروتك و قوتك دى مش عارفة تمشّى كلامك على حتة عيل زى جلال ؟ 

أجابته بحنق من استهانته بولدها:

ـــ عيل مين يا باشا؟!… دا جلال عنده ييجى 33 سنة ، دا غير كدا ما بيهموش حد اياكشى يكون مين حتى !! دا ممكن يقتل القتيل و يمشى ف جنازته و بالذات بقى لو حد هوب ناحية زينة ؟

ضيقت عينيها متعجبة من جهله بهذا الأمر :

ـــ يعنى انت يا باشا مكنتش بتشوف خناقاته كل يوم و التانى مع الشباب اللى بيعاكسو زينة هنا ؟ 

مط شفتيه و هز كتفيه لأعلى بجهل: 

ـــ انا كنت فاكره بيتخانق عشانها باعتبار ان هى اخته  مش أكتر، متوقعتش ابدا انه يكون بيحبها. 

أخرج سيجارة من علبة سجائره المعدنية و أشعلها و اكمل حديثه مضيقا عينيه بتركيز :

ـــ أﻻ قوليلى يا سوسو ، زوزة عندها كام سنة دلوقتى ؟ 

سهام :

ـــ ييجى 25 سنة .

رفع حاجبيه متفاجئا مما سمع :

معقول ؟! .. دا انا كنت فاكرها اصغر من كدا بكتير .

أشاحت بكفها مردفة بغيرة لم تستطع إخفائها : 

ـــ ماهى المزغودة مش باين عليها سن .

انعزل عما حوله بفكره يبحر بمستنقع شره من جديد، يلتقط فكرة قاحلة ملطخة بوحل حقده و غله، و هو يدخن سجائره بشراهة مضيقا عينيه بتركيز شديد، 

راقبته سهام بتوجس  و فهمت ما يدور برأسه، فحاولت أن تثنيه عما يفكر به : 

ـــ يا باشا اللي انت بتفكر فيه دا مش هينفع ؟ .. 

ثم أردفت برجاء: 

ـــ الله ﻻ يسيئك يا باشا ابعد عن زينة و اتقى شر جلال .

لم يُلقِ لرجائها بالا فقد أخذ قراره و حسم أمره و قال بحزم و هو ينفث دخان سجائره : 

ـــ بقولك ايه ، انا هاجى بكرة أقعد مع زينة و أنا هعرف ازاى اقنعها و اخليها توافق .. 

اردف و عينيه زائغتين فى اللاشيئ مضيقا جفنيه بتفكير : 

ـــ أما جلال بقى سيبيهولى انا هتصرف معاه .

اضطربت سهام من نية علي لولدها و جحظت عيناها هلعا من أن يلحق به أذى فى سبيل تنفيذ انتقامه فضربت صدرها بكف يدها مستنكرة : 

ـــ يالهوى !! .. انت ناسى ان جلال دا يبقى ابنى اللى محلتيش غيره ف الدنيا و ﻻ ايه ؟.. انت ناويله على ايه بالظبط يا باشا…سألته بشيئ من الحدة و العصبية . 

أجابها سريعا مصححا ظنها بحدة:

ـــ انتى اتهبلتى و ﻻ ايه يا سهام ؟! .. بقى انا هأذى ابنك برضو ؟ ..

ثم اردف بنبرة لعوب مقربا وجهه من أذنها : 

ـــ دا انتى عِشرة عمر يا سوسو و بير أسرارى .. 

أشاح بوجهه عنها متصنعا الحزن: 

ـــ ﻻﻻﻻ يا سوسو ماكانش العشم تبقى هى دى فكرتك عنى ..

سرعان ما هدأت بعدما وصلها حسن نيته و أردفت باعتذار :

ـــ مش القصد يا باشا بس أصل كلامك برجلنى و مخى حدف شمال علطول.

اقتربت منه مردفة بغنج و هى تبتسم بدلال : 

ـــ متزعلش منى بقى يا باشا، قلبك أبيض ..

لم يرد، فتحولت ملامحها للجدية مستفسرة:

فهمنى بس هتعمل معاه ايه  ؟  بس من غير أذية .. أه .. دا مهما كان ابنى سندى و عكازى .

ضحك من هيئتها و هى تتحدث مردفا :

ـــ ماشى يا سوسو هفهمك …..

عند يحيى فى لندن …

كان جالسا فى أحد المقاهى التابعة لعربى مغترب و التى تعرف عن طريقها على صديقه السورى عمار .

عمار شاب سورى يبلغ من العمر 29 عام ، أتى إلى لندن للحصول على عمل لكى يحسن من مستواه المادى و المعيشى و يستطيع الانفاق على ذويه، حاله كحال أكثر الشباب العرب المغتربين فى بلاد الغرب ، عمار حاصل على بكالوريوس هندسة ، لكنه لم يجد من يقبله للعمل فى مجال دراسته فى لندن لقلة خبرته، فاضطر الى العمل كنادل فى هذا المقهى و فيه تعرف على يحيى و أصبحا أصدقاء ، يفضفضان بما يجول بخواطرهما، كلٌ يبوح بمكنوناته للآخر، ليَرميا بعضا من أثقال همومهما القابعة على كواهلهما كلما أتيحت لهما الفرصة لذلك .

عودة ليحيى و عمار ..

أدار عمار دفة الحديث قائلا بأسف :

ـــ راح كون مشغول كتير بالفترة الجاية يا زلمة ، و ما بعرف إذا بقدر حاكيك بهالوقت ..

قطب جبينه بتعجب متسائلا : 

ـــ ليه ؟.. خير… فى حاجة ؟! 

مط شفتيه بضيق:

ـــ ما فى شِى .. بس صفوت بيك صاحب الكافيه راح يسافر لبلده و راح ياخد علاء زميلى اللى عم بيناوب مَعى ؛ لحتى يزور عيلته ف الضيعة.

أخذ رشفة من قدح القهوة خاصته ثم أردف بتساؤل : ـــ صفوت بيه دا منين ؟ 

عمار :

ـــ هِنّا التنتين من فلسطين .

أوماء بتفهم : 

ـــ امممم .. قال ياخده معاه بالمرة يعنى يزور اهله و يرجع تانى معاه .. مش كدا برضو ؟ 

أومأ بالايجاب مردفا:

ـــ ايه .. هيك بده .

يحيى :

ـــ اوكى ، ربنا يعينك . . بس هاجى برضو أشرب القهوة بتاعتى و أسلم عليك .

أومأ برأسه بتأكيد : 

ـــ ايه طبعا يا زلمة .. 

أطبق عليهما صمت مؤقت قطعه عمار مباغتا يحيى بسؤاله: 

ـــ فى شِى چديد بموضوعك مع بِنِت عمك ؟ 

طَالعه بوجه متجهم و ملامح أرهقها الشجن مجيبا: 

ـــ مفيش جديد.. يبقى الوضع كما هو عليه .

تألم صديقه ﻷجله و سأله بعتاب:

ـــ ﻻيميت راح تتحمل هيك وَضِع يا يحيى ؟؟.. و لَوين راح تُهرُب تانى ؟؟ .. شكلا ما راح تكون من نصيبك . 

أومأ مؤيدا بشجن : 

ـــ هى فعلا عمرها ما هتكون من نصيبى .. ﻻن حتى لو هى وافقت فى يوم من اﻻيام تتجوزنى ؛ فأنا ﻻ يمكن هوافق أبدا 

قطب جبينه باستنكار مردفا: 

ـــ شو ها اللغز هاد ؟؟

اعتدل بجلسته يشرح له وجهة نظره بعقلانية و اقناع: 

ـــ طهتجوزها إزاى يا عمار و أنا عارف إن هى كانت بتحب أخويا و هتموت و تتجوزه ؟ .. الشك و الغيرة هيموتو أى ذرة حب جوايا ليها .. و مش بعيد كمان أخسر أخويا بسببها ، و دا اللى ﻻ يمكن أسمح بيه أبدا .

تعجب من منطقه و أردف :

ـــ لَكان ليش عم بتعذب حالك ابحبها ؟

أجابه و نِصال الهوى تُغرَس فى قلبهِ تُقطعه إرباً : 

ـــ مش بإيدى .. نفسي اتخلص من حبها اللى عامل زى المرض المستعصى اللى بيجرى ف دمى و مالوش علاج إلا الموت.

أومأ له متفهما حالته و ما يمر به من أزمة حب من طرف واحد دفعه للهروب بعيدا عله يشفى من متلازمة حب أزهقت روحه و أرهقت جسده.

فى فيلا راشد سليمان. ..

أنهت العائلة وجبة العشاء و أكملوا سهرتهم في مشاهدة التلفاز ، جلست سهيلة فى مقعد مقابل لمقعد يوسف و جلس والدها فى اﻻريكة التى تتوسطهم ، كان يوسف يشاهد التلفاز بتركيز شديد، حيث كان يتابع النشرة الإخبارية ، بينما عمه راشد كان يتململ فى جلسته يشعر بصداع يكاد يفتك برأسه ، وعلى الجهة اﻻخرى تجلس سهيلة شاردة فى نصيحة صديقتها لينا فى كيفية جذب انتباه يوسف لها كأنثى إلى أن هتف راشد بارهاق : 

أنا طالع أريح شوية ف قوضتى يا حبايبى ، مش عايزين حاجة ؟ 

التفت له يوسف و سأله بقلق :

ـــ مالك يا عمى شكلك مش مظبوط كدا ؟ 

أومأ بابتسامة يطمئنه:

ـــ متقلقش يا حبيبى دا شوية صداع بس كدا ، يظهر ضغطى عالى شوية .

نهض عمه من مقعده ينوى الصعود لغرفته فأسرع إليه يوسف يسنده:

ـــ طيب تعالى اوصلك للاوضة.

أضافت سهيلة :

ـــ خليك انت يا يوسف ، هوصله انا عشان اقيسله ضغطه و اديله الدوا .

استوقفهم معترضا بحزم: 

ـــ ﻻ .. ﻻ انت و ﻻ هى ، انا مش عيل صغير عشان تديلى الدوا و تسندونى و …

قاطعته سهيلة بأدب : 

يا بابا مش قصدى طبعا ا…

قاطعها والدها بحدة : 

ـــ خلاص يا سهيلة …تصبحو على خير .. ومن ثم تركهم و سار على مَهَل  الى أن وصل الى غرفته .

نظر كل منهما للآخر بارتياب و حيرة، ثم انتقلت سهيلة من مقعدها لتجلس على طرف اﻻريكة المجاورة لمقعد يوسف حتى تكون قريبة منه و قالت:

ـــ بابا اخد كلامنا بحساسية زيادة عن اللزوم .

زم شفتيه بعدم فهم :

ـــ مش عارف ، يمكن فى حاجة مضايقاه و احنا زودنا عليه.

هزت كتفيها لأعلى مردفة :

ـــ يمكن ..

استكمل هو مشاهدة التلفاز بينما هى اخذت تدقق فى ملامحه بعشق جارف شاردة فى كل تفصيلة من تفاصيل وجهه المحبب لقلبها، هائمةً ببحر وسامته و جدية تعابير وجههِ التى أغرقتها و أطاحت أمواجه العاتية بعقلها فأصبحت متيمةً به ، و بينما هى فى خِضْم تأملها له ؛ شعر بأنه مُحاصر بنظراتها ، فتجاهلها حتى تحيد ببصرها عنه و لكنها لم تفعل.

خطر بباله ان يسايرها حتى يفهم ما يجول بخلدها ،فانقلب الحال و أصبحت هى تحت حصار نظراته المحدقة بعينيها،  فلم تحيد عينيها عنه أيضا، فرأى انعكاس صورته فيهما و كأنها طبعت بهما، فلم تعد ترى غيره، يعلم ذلك تمام العلم، و لكنه لا يستطيع أن يراها كما تراه.

راح يتلاعب بمشاعرها حتى تكف عن تأمله و لا تَأْمل بحبه، فقال و هو ينظر فى عينيها عن قرب :

ـــ تصدقى انا اول مرة اركز فى لون عنيكى ؟! .. ثم ابتسم ابتسامة جميلة و لكنها ماكرة : 

ـــ لونهم حلو اوى .

اتسعت ابتسامتها و كادت ان تفقد وعيها من هذه الكلمات القليلة ؛ فهى لم تعتد على سماعها من يوسف ابدا ؛ يحيى فقط هو من كان يتغزل بعينيها ، و لكن ياللعجب ؛ لم تتأثر يوما و لم تسعد ساعة بهذه الكلمات من فم يحيى بقدر سعادتها اﻻن و هى تسمعها من فم معشوقها ..

تمادى يوسف بلعبته مردفا: 

ـــ نفس لون عين عمى راشد .

أومأت بتأييد و ما زالت تلك اﻻبتسامة البلهاء تشق وجهها : 

ـــ أه .. ما أنا وارثاهم من بابا .

استرسل بخبث : 

ايوة طبعا. . انا علطول بقول لعمى لما اتجوز و اخلف بنت ؛ نفسى يبقى لون عنيها زى لون عين عمتها .

تجهم وجهها بغتة و قطبت جبينها باستنكار مردفة : 

ـــ عمتها ؟؟!

أجابها متصنعا البراءة : 

ـــ طبعا يا سولى ؛ ما انا هخليها تقولك يا عمتو ..

زمت شفتيها بغيظ شديد و أردفت: 

ـــ اممم. . ان شاءالله ..

نهضت من مقعدها و هى تقول باحباط و خيبة أمل: 

ـــ تصبح على خير

كبت ضحكته و أردف متسائلا ببراءة مصطنعة: 

ـــ راحة فين ؟ 

أجابته و هى تسير باتجاه غرفتها :

ـــ رايحة انام .

أجابها برجاء صادق :

ـــ لسة بدرى ، خليكى قاعدة شوية .

لم ترد عليه و انما توجهت نحو الدرج لتصعد لغرفتها و و هى تتمتم ببعض الكلمات الغاضبة بحسرة و خيبة أمل: 

ـــ منك لله يا يوسف ، بقى انا عمتو ؟! .. عمتو يا يوسف ؟!  ..حسبى الله …

ظلت تهمهم بهذه الكلمات الى ان دخلت غرفتها.

سمع همهماتها و رغم أنه لم يفهم منها شيئا،إلا أنه استطاع أن يُخَمن كلماتها التى تنم عن خيبة أملها فيه،

فشعر بغصة بحلقه آلمته و حَزِن ﻻجلها.

كم تمنى ان يبادلها الحب و لكن قلبه ليس بيده ، كم حاول ان يفكر بها كزوجة و حبيبة و لكنه ابدا لم يستطع أن يراها إﻻ كأختٍ له ، أخذ يدعو لها من كل قلبه : 

ـــ ربنا يهديكى يا سهيلة و يخرج حبك ليا من قلبك ..

فى الملهى الليلى …

ذهب على الرفاعى فى اليوم التالى الى سهام كما اتفق معها ، و لكنه ذهب نهارا حيث يكون الملهى خالٍ إﻻ من بعض الزبائن القلائل، حتى يتثنّى له الحديث مع زينة بحرية أكثر و دون ان يُلفِت إليه اﻷنظار . 

إستقبلته سهام بترحاب و أجلسته على منضدة بعيدة ومعزولة عن الصخب و أنظار الزبائن .

سهام بترحيب :

ـــ يا أهلا و سهلا يا باشا ، منورنى .

أومأ محييا :

ـــ منورة بيكى يا سوسو ..

إقترب منها قائلا بهمس:

ـــ ها كلمتيلى زوزة و ﻻ لسة ؟!

سهام : 

ـــ أنا هجيبهالك انت تكلمها يا باشا ، أنا مش عارفة أقولها ايه اساسا ، ثم أنا خايفة ﻻ جلال يحس بحاجة و يقعد يقرر فيا .. ربنا يستر و ميجييش دلوقتى .

أجابها بثقة و كأنه على يقين من عبارته: 

ـــ ﻻ متخافيش مش هييجى دلوقتى .

قطبت جبينها باستغراب متسائلة :

ـــ و انت ايش عرفك يا باشا… 

ظنت لوهلة أنه قد ألحق الأذى بولدها فصاحت بقلق بالغ: 

ـــ إنت عملت فيه ايه ؟ وديت الواد فين ؟ اوعى تكون لفقتله تهمة تدخله بيها اللومان ؟ ..يا نصيبتى يا نصيبتى يا لهوى … رددت هذه الكلمات و هى تضرب بكف يدها على صدرها ظنا منها أن علي قد أصاب ابنها بسوء ؛ حتى صاح بها يهديئ من روعها:

ـــ يا بت اتهدى الله يخرب بيتك .. هو انا مش قايلك مش هأذيه..

أردف بخفوت ماكر: 

ـــ دا انتى لو عرفتى انا عملت معاه ايه ؛ هتدعيلى .

سألته متلهفة لسماع بشارته:

ـــ عملت ايه يا باشا طمنى الله ﻻ يسيئك ..

أردف بجدية :

ـــ كلمت واحد حبيبى صاحب شركة كبيرة اوى يشغله عنده سكيوريتى .

ضيقت احدى عينيها متسائلة بجهل:

ـــ سيك ايه يا باشا ﻻمؤاخذة ؟؟

أجابها بنفاذ صبر :

ـــ أمن يعنى يا سهام .. أمن.. 

استطرد حديثه يرغبها أكثر فى عرضه: 

ـــ شغلانة مكانش يحلم بيها بدل قعدته ف الكباريه ﻻ شغلة و ﻻ مشغلة … 

عاد بظهره يستند على ظهر المقعد بكل أريحية مردفا بثقة و غرور: 

ـــ زمانه دلوقتى قاعد مع مدير أمن الشركةعشان يفهمه نظام الشغل.

أجابته بسعادة بالغة و نبرة حالمة: 

ـــ ياريت يا باشا ، خليه ينضف شوية بقى و يبعد عن شوية البلطجية اللى ماشيلى معاهم و عاملينه الفتوة بتاعهم .

أردف بثقة :

ـــ هو من حيث هينضف ؛ فهو هينضف أوى ، و هيلبس بدلة محترمة و تعامله كله هيبقى مع ناس محترمة و رجال اعمال كبار اوى .

ردت عليه بسعادة عارمة بعد سماعها لتلك العبارات :

 ـــ زيك كدا يا باشا ؟؟!

علي بابتسامة سمجة : 

طبعا .. مش بقولك هتدعيلى .

أردفت بامتنان حقيقى و هى ترفع ناظريها و كفيها للسماء: 

ـــ روح يا علي بيه الهى ينصرك على عدوينك يا قادر يا كريم .

ضحك كثيرا من ردة فعلها و أردف بنبرة مازحة : 

ـــ أيوة كدا يا سوسو .. اصحى معايا كدا يا قلبى .

أطلقت ضحكة ركيعة وقالت بفرحة عارمة :

ـــ عيونى يا روح سوسو .

قلب ملامحه و صوته للجدية مردفا : 

ـــ إحنا هنقضيها رغى و ﻻ ايه ؟! .. روحى يلا ناديلى زينة.

أجابته بحماس و سعادة فى آن واحد : 

ـــ دا انت تؤمر يا باشا… و غادرته الى حيث غرفة زينة.

يتبع…..