رواية عشق مخيف الحلقة الثامنة عشر 18 بقلم ندى
 |
| رواية عشق مخيف الحلقة الثامنة عشر 18 بقلم ندى |
رواية عشق مخيف الحلقة الثامنة عشر 18 بقلم ندى
سلمي بانهيار : حرام عليكوا انتوا سيبوني براحتي بقي ، انا حرة ده قراري لوحدي
حسام فضل ساكت ساكت وفجأة وقف قدامها وبصلها اوي : كفاية اللي بتعمليه برغم انا مش فاهم مالك بس لو رفضاني اوعدك عمري ما هطلب ده تاني ، انا اخدت وقت كبير عشان اجي لانه صعب عليا شوية واكيد انتي فاهمه ده ، اللي شجعني مشاعري ناحيتك ، انا محبتش اخبي ده اكتر بس انا بهتم بيكي جدا ، بس لو رفضاني عالاقل قولي بسبب مقنع عشان اقنع نفسي بيه
مامتها : يابنتي اهدي اهو هو قالك بنفسه انه جاي بمزاجه يعني متخافيش من حاجة ، انا هسيبكوا لوحدكوا تتتكلموا شوية ، يلا جنة تعالي معايا
جنة بصت ل سلمي بدموع: سلمي بلاش تدمري نفسك اديله فرصة ووقت ، وادي لنفسك فرصة
بعد دخول جنة و مامت سلمي الاوضة
حسام قرب من سلمي ومسك ايديها : قوليلي مالك والله مش هضايقك
سلمي شهقاتها زادت ودموعها نزلت : مش حابة اقول السبب
حسام بحنية : سلمي انا مش هضايق بجد ولا هخليكي تقولي حاجة غصب عنك بس محتاج افهم رفضك
سكتت سلمي
حسام: طب انتي بترفضي اي حد ولا انا بس
سلمي : اي حد
حسام ابتسم علي طفولتها : طب ليه
سلمي : عشان انا مش هعرف أسعد حد
حسام بهزار : اكيد مش بتعرفي تطبخي
سلمي ضحكت وسط دموعها : ياريت عالاقل ده هتعلمه مع الوقت
حسام بحيرة: طب قولي عشان انا خايف افكر في حاجة تانية
سلمي : انا … لا مش هقول .. هقولك وخلاص بس توعدني مش هتوافق شفقة ابدا
حسام : شفقة !
سلمي : ايوة انت ممكن توافق عليا شفقة ، انا عمري ما هعرف اا عمري ما هعرف ابقي ام
حسام بعدم فهم : مش فاهم يعني ايه وضحي طيب
سلمي تشجعت وباصة في الارض وقالت : يعني انا مش بخلف
حسام اتصدم جدا مع انه مش حابب يخلف تاني بس حاجة جواه كانت بتقول انه نفسه في طفل منها هي ، بس هي هبلة جدا يعني هل ده سبب يبعدني عنها ؟!
سلمي اتوترت مع صمته : انا عارفة انك متضايق بس الموضوع اساسا رفضت من الاول يعني ف متتحرجش انك تقول مش موافق لان ده حقك
سلمي دموعها زادت مع سكوته ولفت تدخل اوضتها ، مسكها حسام بسرعة : اصبري اسمعيني سلمي ..انا بحبك
سلمي : قولتلك بلاش شفقة مش بحبها مش معني قولتلك كدة تقولي انك بتحبني علي اساس هفرح وهمشي يعني
حسام : اسمعيني انا عمري في حياتي بعد موت مراتي دخلت اي بنت حتي بيتي واسيبها تلعب مع فهد كمان انتي متخيلة .. تفتكري بقي بنت حسيت بمشاعر ناحيتها ممكن اسيبها عشان سبب زي ده ؟
سلمي برغم انها فرحت اوي وقلبها دق بعنف بس حاسه بحزن : يعني ايه
حسام : يعني انا هتجوزك والله العظيم لو رفضتي هخطفك واتجوزك غصب هو احنا اقل من بيجاد واللي عمله في جنة ولا ايه ، احنا جامدين جدا
ضحكت سلمي : طب عمرك ما هتزعل من ده
حسام ابتسم : عمري
سلمي : هتستحمل هرموناتي طيب
حسام: هستحملها ، كفاية دموع بقي انا عايز سلمي المفجوعة تظهر
سلمي : انا مفجوعة
حسام : احلي مفجوعة في الدنيا .. ها موافقة بقي صح
سلمي بخجل : موافقة
حسام : اخيرا ..
دخلت سلمي اوضتها في سعادة وقلبها ضرباته متوترة : يالهوي انا هتجوز القمر ده يعني هبقي معاه في بيت واحد عادي كدة كل يوم اشوفه ، انا هاروح انتحر احسن
جنة دخلتها في سعادة : مبروك يا قمر
سلمي : جنة انا مش مصدقة بجد . الموضوع مش فارق معاه عادي
جنة : قولتلك هو بيحبك بجد يعني مش هيفضل متمسك بيكي
سلمي : انا مبسوطة اوي
جنة : يارب دايما تبقي مبسوطة كدة يا سلمي يابنت ام سلمي .. انا هنزل بقي عشان اتأخرت علي بيجاد
سلمي : اوك يا حببتي في رعاية الله
نزلت جنة وركبت عربية بيجاد : الموضوع خلص الحمدلله
بيجاد : ما حسام قالي
جنة : مالك ، انت زعلت مني
بيجاد : لا مقدرش يا اغلي حاجة في حياتي ، بس حسيت انك قسيتي عليها ، وبعدين ايه السبب حسام مقاليش
جنة : هقدر اقولك دلوقتي وانا مرتاحة ، سلمي عملت حادثة من كذا سنة وحصلها نزيف وحالتها كانت صعبة ف الرحم اتضطروا يستأصلوه
بيجاد بحزن : ربنا معاها بجد حاجة صعبة عليها خصوصا لو هي نفسها تبقي ام
جنة بحزن ودموعها نزلت : متضايقة اوي عشانها هي فعلا نفسها تبقي ام ، انت متخيل رفضت كام واحد عشان السبب ده ، ربنا يسعدها يارب
بيجاد حضن جنة : حببتي متعيطيش، اكيد ده احسن ليها طالما ربنا اختارلها كدة
جنة : اكيد
بيجاد بمشاكسة : انتي حلوة كدة ماتيجي نرجع البيت
جنة بخجل : لا انا عايزة اتفسح بقي
بيجاد : البيت احلي والله
جنة بخجل : بس بقي طب عايزة اشتري حاجة وبعدها نرجع البيت طيب
بيجاد غمزلها : هتشتري ايه
جنة بتوتر : بعدين هقولك بقي ، نزلني بس انت قدام المحل اللي علي اخر الشارع
بيجاد : ماشي يا مزة اللي انتي عايزاه
حسام في عربيته مع فهد وجاد وبسنت
بسنت : يعني خلاص كدة وافقت صح
حسام بارتياح: ايون والفرح اتفقت مع مامتها الاسبوع الجاي يعني بعد اربع ايام
جاد : ايه ياعم الحلو انت مش ناسي حاجة
حسام ابتسم وبص ل بسنت : ردي
بسنت : ارد علي ايه
جاد : موافقة عليا ولا ارمي نفسي من هنا
بسنت سكتت بخجل
جاد : طب السكوت علامة الرضا… ولا مش عايزاني
فتح جاد باب العربية بتمثيل : والله احدف نفسي لو مردتيش
خرج رجله من الباب والعربية ماشية
بسنت بتوتر وخوف : موافقة ، موافقة اقفل الباب بقي
جاد ابتسم جدا : اخيرا ده انتي طلعتي عيني يا شيخة بس القمر يعمل اللي عايزه بردو
حسام : انا موجود علفكرة
جاد : عارف علفكرة
حسام : هضربك علفكرة
جاد : ضرب الحبيب زي اكل الزبيب
فهد ضحك : انتوا مجانين
حسام : قوله يا فهد
فهد : ما تعلموا فرحكوا مع بابا هيبقي اتنين فرح مع بعض
حسام : فكرة حلوة
جاد : انا جاهز وموافق
بسنت : بس ده بسرعة اوي
حسام : انتي قدامك كذا يوم تجيبي اللي عايزاه براحتك ومعاكي سلمي واكيد مدام جنة مش هتمانع تساعدك واحنا معاكي كلنا
بسنت بتوتر : لا بس عايزاه يتأجل اسبوع كمان يعني يبقي بعد عالاقل اسبوع مثلا
حسام : اشمعني يعني فرق يومين
بسنت خجلت جدا وفي تفكيرها يعني يوم ما اجهز ل فرحي اكون تعبانة.. لازم يعني في المعاد ده ما الشهر كله قدامهم يعني اوف .. قالت بتوتر : معلش خليه كمان اسبوع
لاحظ جاد توترها جدا بس مش فاهم السبب : تمام خليه كمان اسبوع عادي الدنيا مش هتطير يا حسام واهو يكون معاهم وقت اكبر .
حسام : طب تمام هبقي اقول ل سلمي بقي
بسنت فرحت جدا : تمام
جنة وصلت للمحل كان لملابس بنات وكدة
بيجاد : انتي عايزة تشتري ايه من هنا
جنة : بعدين يا بيجاد هقولك بس هدخل لوحدي عشان مفيش رجالة بتدخل هنا
بيجاد : طيب هستناكي متتأخريش
جنة : طيب
دخلت جنة تدور علي فستان جديد لفت نظرها فستان احمر طويل مفتوح من الجانب من فوق الركبة لحد الأرض بدون اكمام وضيق من فوق .. فرحت جدا لانها تخيلت نفسها لابساه وحلو بسرعة اشترته وأشترت ميك اب وخرجت
بيجاد بفضول : ايه اللي في الشنطة دي
جنة : هتعرف بعدين بقي بطل تسأل كل شوية يا بيجاد
بيجاد : يارب صبرني ،هعرف يعني هعرف ، انا عايز اعرف كل حاجة يا جنة مش قصدي اضايقك بس حابب بتفكري في ايه وبتحبي ايه وكدة
جنة : يا حبيبي انا عارفة بس الصبر حلو ، متزعلش مني بقي ، يلا نرجع البيت
بيجاد : مش هعرف اقعد معاكي ، حسام كلمني عشان الشغل
جنة فرحت انه هيمشي وهتقدر تعمله مفاجأة : ربنا معاك يا حبيبي ، بس وانت جاي ابقي رن عليا عشان اجهز الاكل
بيجاد : ماشي يا قلبي
جنة : بيجاد هو عندي سؤال ..اخوك جاد ليه مش بيجي الشقة يعني بيقعد فين
بيجاد : قاعد في الشقة اللي في وشي ياختي
جنة: ايه ده بجد
بيجاد ضحك : ايوة ، اشتريناها من فترة ، هو كدة كدة عايز شقة عشان يتجوز فيها ف اشتري الشقة اللي قدامنا
جنة : ريحت قلبي والله انا كنت خايفة يكون زعل مثلا انه بقي لوحده كدة وخصوصا انك مش بتقوله يجي يقعد معانا
بيجاد : هو حابب كدة يعني اساسا هو طول اليوم في الشغل بس دايما بكلمه وبشوفه وانا جاي
جنة : ربنا يبارك فيك دايما يارب
بيجاد وصل جنة للبيت وراح شغله
دخلت جنة بسرعة تطبخ اكلات جديدة ،وعملت كيك بالشوكلاته وبدأت تجهز الاكل وفكرت انها تحطه في اوضتهم بعد ما كوت الفستان طبعا
:انا فرحانه اوي يعني الحمدلله يارب ان نظري رجع تاني انا كان نفسي من زمان اعمل ل بيجاد الحاجات اللي بيحبها بنفسي .
سلمي : الو ،ازيك يا بسنت
بسنت بسرعة : سلمي انا وافقت علي جاد
سلمي : مبروك يا قمر، نعمل فرحنا سوا بقي
بسنت : ايوة بس ممكن بتأجل اسبوع يعني بدل اربع ايام
سلمي بقلق : حصل حاجة ، حسام غير رأيه طيب
بسنت ضحكت بشدة : غير رايه .. ده انا كنت قتلته ، بس انا الأيام دي يعني بطني وجعاني ومتعطله اساسا مش هعرف اركز في حاجة ف يومين هبقي كويسه واقدر اجهز بقي للفرح
سلمي بتفاهم وضحك : ايوة ياحببتي احنا براحتنا اساسا ، احنا نعمل اللي عايزينه
بسنت بضحك: انا مبسوطة اوي يا سلمي اخيرا حسام هيتجوز
سلمي بمشاكسة : مبسوطة عشان حسام بردو
بسنت ضحكت : ايوة ياختي عشان حسام ، يلا بقي هقفل وبكرة هبقي اجيلك نشوف هنعمل ايه وهنجيب ايه
سلمي : تمام يا قمر سلام
———-☆
حسام بضحك مع جاد : اخوك ده اتشقلب حاله بعد الجواز
جاد : بقي بيحب البيت اكتر مني
بيجاد دخل وسمعهم : بكرة تقولوا نفس الكلمتين لنفسكوا
حسام : هنعمل فرحين سوا تعالي معانا انت كمان
بيجاد بتفكير : هشوف جنة الاول بس يعني هي فكرة حلوة بردو نبقي احنا التلاته سوا مرة واحدة
حسام : تمام جدا
جاد بهزار : مبروك لينا احنا التلاته ????????
بيجاد : الله يبارك فيك ياخويا
رجع جاد بالليل ل شقته مبسوط ان بسنت وافقت عليه واخيرا هيشوف اللي عينيها جننته دي وبدأ يفكر هيعمل ايه الفترة الجاية وهيغير ايه في الشقة دي
عند جنة لبست الفستان و استشورت شعرها وفردته علي جانب ولبست كعب عالي شوية نفس لون الفستان
رن بيجاد
جنة بلهفة : بيجاد وحشتني
بيجاد : وانتي وحشاني دايما ، انا جاي بقي مش قادر اقعد.اكتر من كدة في الشغل قربت اوصل اهو
جنة بدلع : طيب مستنياك يا حبيبي
بيجاد : مش مطمن علفكرة
جنة بدلع : ليه ، كل ده عشان بقولك حبيبي ، انت روحي ، حبيبي ، دنيتي بحالها
بيجاد : اقفلي يا جنة عشان سايق العربية مش عايز اتهور
جنة : سوق علي مهلك بس تعالي بسرعة
بيجاد: ودي اعملها ازاي .. امشي يابت
جنة قفلت معاه وبصت علي نفسها بصة اخيره في المراية وقعدت في توتر تستناه
بعد شوية دخل جاد لقي الدنيا ضلمة .. ولع النور وابتسم
لقي ورد في اتجاه الاوضة بتاعتهم وقف خبط
جنة : بيجاد
بيجاد ابتسم : عيونه
جنة : غمض عينيك
بيجاد بسعادة غمض : غمضت اهو
جنة بخجل : احلف طيب
بيجاد ضحك: والله مغمض
جنة فتحت الباب ومسكت ايد بيجاد ودخلته الاوضة
قلعته الجاكت وفكت الكرافت بتاعته وخليته يقلع الجزمة و شدته دخلته الحمام
بيجاد : انتي بتقلعيني وانا مغمض بتستغليني
جنة بضحك: اصبر بقي .. بص انت في الحمام دلوقتي ، خد دش كدة عشان حاسه انك تعبان اوي ، والبس الهدوم اللي جوة اتفقنا
بيجاد : تعبان ايه بس انا هموت منك
جنة ضحكت اوي : طب انا هخرج وبعدها انت تفتح ها ، لما تخلص قولي وتغمض تاني
بيجاد : ايه الليلة اللي كلها غمض عينك دي .. ماشي يا جنة الصبر بس
خرجت جنة وبعد شوية خبط بيجاد عالباب
جنة : خلصت
بيجاد : ايوة ومغمض اهو انجزي بقي
جنة فتحت و شدته كان شكله جميل جدا بشعره المبلول ده فضلت تتأمله شوية
بيجاد : ها
جنة قربت منه تقريبا ده زيادة في هرموناتها اللي باظت دي وباسته من خده وهمست : بيجاد النهاردة عيد ميلادي ، انا مش زعلانه انك متعرفش بس انا حبيت أحتفل بيه معاك لوحدنا و تبقي ليلة خاصة وكدة ، انا بس عايزة اقولك انك احلي حاجة شوفتها في حياتي ، ربنا عوضني بيك ، اتمني كل السنين الجاية نفضل سوا في سعادة واقدر اساعدك دايما ، كنت بحس بالحزن لما كنت مش شايفة مكنتش عارفة اعملك حاجة كأي زوجه بس حاليا انا مساعدة اعملك اي حاجة تطلبها مهما تكون ، مش عايزة اشوفك غير سعيد معايا وبس .. تقدر تفتح بقي
بيجاد فتح عيونه وانبهر بجمالها ورقتها وكسوفها ونظراتها ليه العاشقة و فستانها وشفايفها اللي باللون الاحمر اللي مجنناه
بيجاد وقف فترة باصصلها
جنة بقلق بصت الفستان : بيجاد هو فيه حاجة غلط
بيجاد شدها وباسها ب عشق ، شوق ، حب ، حياة
قضوا ليلتهم في سعادة وجنة فرحت اوي باليوم وان مفاجاتها نجحت
يتبع..
لقراءة الحلقة التاسعة عشر : اضغط هنا
لقراءة باقي حلقات الرواية : اضغط هنا
نرشح لك أيضاً رواية وحدة شغف للكاتبة ندى.
