رواية بن أسود الفصل السابع 7 بقلم رويدا القاضي

رواية بن أسود الجزء السابع

رواية بن أسود البارت السابع

رواية بن أسود الحلقة السابعة

بعد موت أمي تغيرت هلبا أموور في حياتي وليت قوية تخلصت من الإنسانة الضعيفة للي في داخلي…
حاتم: تعالي يامرام انت العاقلة والمتفهمة في الحوش جهزي روحك سلم بنتي وشوفي شن ناقص الحوش المرأة بتروح الأسبوع الجاي.
مرام: حاضر نبي وحدة تعاوني في التنظيف والأفضل كان تجيب حد يزوق الصالة.
حاتم: مع انه مش محتاجة لكن حاضر للي تشوفيه مناسب.
مروى: تقوليله بتنظفي وتزوقي كان عليا انا يزفوها في جهنم ان شاء الله كيف ترضي بيها نسيتي أمي بسرعة هكي.
مرام: بابا بياخد بجميع الأحوال والأفضل نكونوا معاه خير مانكونو ضده.
مروى:😏 ع اساس بديتي تفكري وتحسبي فيها صح .
مرام: انا بنكلم بابا ع موضوع معتصم ومدامه هو بيروح بمرته خلي نفس اليوم معتصم يقرأ فيه الفاتحة متعكم.
مروى: توا فهمت علاش واقفت ع زواج بابا هيا تفكر في حل لأكثر من موضوع في وقت واحد.
مرام: اتصليلي بعمتي خلي نكلمها.
مروى: مازال ماتبيش تفتحي تليفونك سنة عايشة بلا هاتف.
مرام: لو ماتخلصتش من الثلوث للي يسببه الهاتف للعقل طول السنة هاذي راني ماقدرتش نظف عقلي ونرتب افكاري .
مروى: ربي يقويك حملناك مسؤولية أكبر من عمرك .
مرام: انتم عيلتي مش بجميلي خديت الهاتف وكلمت عمتي باش تقنع بابا وفعلا صار للي خططتله جاء يوم الخميس الظهر عقد قران معتصم والعصر بابا رغم الفرحة للي خشت لحوشنا بعد سنة نحس في قلبي مازال مجروح من داخل ع فراق أمي تمت الزحمة طلبت من معتصم وكيان يرفعوني للمقبرة….
كيان: خالي عنده علم 🥺.
مرام: لا مانبيش نغص عليه فرحته هو ومروى وخصوصا انه حوشنا بعد مووت أمي كان أشبه بحوش الأشباح بلا روح بدون ألوان حياتنا روتين بس….
معتصم: ربي يعوظك ع الصبر للي صبرتيه خير ويعطيك ع قد نيتك.
“أحيانا الإنسان نفسه مسؤوليات فوق طاقته ويتعود ع التضحيات لعند ماتكون التضحيات للي يقدم فيها جزء من روحه معاش يقدر يتخلى عليها”
كيان: كانت طول الطريق سارحة وتفكر والحزن مرسوم ع وجهها وصلنا المقبرة.
معتصم: هيا انزلوا.
مرام: ياريت تخلوني ننزل بروحي وتتفهموا طلبي.
كيان: عادي ع راحتك هذا حقك ومشت قدامنا لين وصلت بوابة المقبرة قطع الصمت صوت معتصم.
معتصم:سبحان مغير الأحوال من يقول مرام للي الضحكة ماتفارقش وجها هكي تولي قداش الظروف تغير في طبيعة البشر .
كيان: وكأنه القدر يختبر في صبرها مش كافيها موت علي لين اتجيها الصاعقة الثانية موت امها….
معتصم: كله فيه حكمة من الله لولا الظروف القاسية للي مرت بيها راهو مستحيل يخلق منها انسانة قوية تتحمل مسؤولية بوها وخوتها.
كيان: تعرف ندمت ع كل غلط غلطته معاها وخصوصا يوم فكرت نصدق قيس.
معتصم: تضحك عليك سندس وانتي تهزي في رأسك زي الغبية….
كيان: ربي يسامحني وان شاء الله هيا تسامحني…
مرام: تمنيت يكون قبر علي في نفس المقبرة للي فيها قبر أمي بديت نقرأ في الأسماء لين وصلت قبرها قربت مسحت عليها وكأنه نمسح ع شعرها وتفكرت كل لحظة مع أمي ….
بديت نحكيلها وكأنها قدامي ” اشتقتلك نفيق كل صبح نستنى امتا تصير معجزة ونسمع صوتك يضبح عليا نرقد في الليل ع امل انك اتجيني حتى كان في الحلم قابلة ….مخلية مكانك كبير كنتي أم وأب والأخت للي تواسي فيا فاضل للي امنتيه عليا خان الأمانة اعطاني بظهره مجرد ماحطوك تحت التراب …..حياتنا ظلمت من بعدك تطلع الشمس كل الصبح لكن معاش نشوف في نورها …ربي يصبرني عليك نسيت قبل مانطلع عمتي بعد موتك رجعت كيف ماكانت اليوم عقد قران مروى كبرت كنتي تبي تزوجيني ع عينك انا زوجت مروى بعدك سامحيني ياغالية احنا مش ناسينك لكن نضجت لدرجة اني اقتنعت انه الحياة لازم ماتمشي وتستمر”
حبي ليها كان يمنعني اني نبكي ولا نزل دمعة ع قبرها طلعت بعد مافرغت للي في قلبي كله.
كيان: كيف حالك توا.
مرام: بخير والحمدلله.
معتصم: الله يغفرلها ويرحمها.
مرام:آميين.
مروى: وانا مقعمزة في وسط المجمع عمتي ويارا وأقاربنا وصلتني رسالة من مجهول “قولي لأختك مرام مزلتي جميلة وحتى وانتي بكامل حزنك وانتي طالعة من المقبرة”
يارا: خيرك مركزة في الهاتف .
مروى: صاحبتي باعثة تباركلي .
يارا:🙂 الفال ليها .
شوية وخشت مرام وكيان صبرت لين خشت باش تنحي عبايتها واستغليت الفرصة ولحقتها.
مرام: خيرك اليوم كله مفروض يفوت عليك وانت تضحكي.
مروى: كيف كانت زيارتك للمقبرة.
مرام:مستحيل معتصم وكيان تنبل في فمهم الفولة.
مروى: مش هما..
مرام:منا كيف عرفتي؟
مروى: شوفي وصلتني رسالة قبل شوية في حد يلحق فيكم .
مرام: فتحت الدولاب وطلعت تليفوني وحطيته في الشحن وسجلت الرقم ….شوية واتصلت بيه .
فاضل: اهلين مرام.
مرام: هو انا عرفت انك وقح لكن مش لدرجة انك تبعث رسالة لأختي وشن علاقتك بيا مش خاطب خليك مع خطيبتك.
فاضل: سامحيني يامرام انا مستعد نخليها لو انتي ترجعيلي .
مرام: 😏 عارفتك مستعد تخليها عادي عندك زي ماخليتني انا قبل .
فاضل: غلطة وربي نادم عليها.
مرام: معاش ينفع ندم الحمدلله ربي نجاني منك وعرفتك ع حقيقتك والله والله لو يربطوك في رجلي نقطعها وتم الكلام بينا.
فاضل: تمام ع راحتك.
وجاء الوقت للي نستنوا فيه كلنا …..
رحمة: انا رحمة بإذن الله مايجيش يوم ونقصر فيه معاكم انتم أمانة في رقبتي نتحاسب بيها قدام ربي.
مرام: انا مرام وهادي اختي مروى.
حاتم: مرام عمود الحوش ويما تحملت من ضيم الأيام رغم صغر سنها عندها حكمة في عقلها مش رح تلقيها عند للي عمره 60سنة.
مروى كانت قالبة وجهها ومش عاجبها شى لكن من اول اسبوع ماما رحمة خلتنا نحبوها سبحان الله قداش فيها من حن أمي ورجعنا عائلة تامة من جديد.
وفي يوم مقعمزة انا وماما رحمة نشربوا في القهوة.
رحمة: مرام علاش ماتمشيش تقري حبيبتي وتغيري جوك .
مرام: والحوش.
رحمة: انا موجودة امشي اقرى وانتي مطمنة .
مرام: والله ليا يومين نفكر فيها القرايا لكن شكلي توا بنديرها حق.
حاتم: توكلي ع الله وألهي بمستقبلك يابنتي مافيه حد دايملك.
مرام: ان شاء الله.
مروى: تبي تمشي تقري حق علاش قعدا .
مرام: في أسبوع حطيت ملفي ونظمت اموري وبديت نمشي مر ليا اسبوعين بدون مانعرف حد وبعدها بديت نخالط في الطالبات.
ملاك: اهلين كيف الحال.
مرام: الحمدلله .
ملاك: شكلك طالبة جديدة زي حالتي.
مرام: ههههه قصدك باين عليا.
ملاك: ايه لأنك هادئة ونشوف فيك من المحاضرة للباب ومن الباب للمحاضرة.
مرام: هههه تسلمي.
“ومن يومها بدينا صحبة لكن كانت معرفتي بيها سطحية تفاصيل حياتي حبيت نحتفظ بيهم لنفسي لعند يوم كان عندنا أستاذ يحاضر فينا كان ديما تقولي ملاك مركز معاي ولكن ماكنتش نعدل بكل”
مروى: غير فكينا من جو الراجل للي ادير فيه حتى كان في حد يفكر يرتبط بيك يبطل .
مرام: حاضر توا هو يشوف وانا نضحكله هكي تبي.
رحمة: اعطي روحك فرصة اتعيشي مرات يطلع ولد حلال.
مرام: طول بديتوا ترسموا انه معجب وولد حلال مرات يشوف هكي وخلاص.
فاتت ثلاثة أيام وكيف كمل المحاضرة وجاية بنطلع .
مهند: لو سمحتي ياطالبة ممكن لحظة.
مرام: في الأول مافهمتش من يقصد وبعدين عرفته عليا انا ارتبكت تفضل ياأستاذ.
ملاك: نستنى فيك قدام القاعة .
مهند: مانبيش نكثر عليك في الكلام واظح عليك بنت عيلة وناس نبي رقم بوك لو مش مخطوبة.
مرام: اه ماهو اصلا انا توا تليفوني مقفل شوية ورن تليفوني 🤷🏼‍♂️من الكذبة قعدت زي الكمشة قدامه.
مهند: مش مجبورة توافقي طول نستنى في ردك في نهاية الأسبوع.
مرام: اه وانا نتأتأ تما…م نستأذن وطلعت نجري.
ملاك: شن قلك .
مرام: اسكتي غير ناخد تفسي ونبرد وساهل.
ملاك: شكله عرض قوي .
مرام : مبردك قال يبي رقم بابا.
ملاك: شوية بس شفت مالقيت حد جنبنا رووووري .
مرام: اسكتي توا يقولو خيرهم مجنونات .
ملاك: اعطيته يادرويشة ولا مازال .
مرام: مازال نحس في نفسي مترددة .
ملاك: شن هاتي الهاتف طلعت الرقم ومشيت نجري وراه واعطيتهوله واظح عليه ولد حلال وشاريها.
مرام: حي ع الموقف البايخ للي حطيتيني فيه شن بيقول عليا توا.
ملاك: ريحي عمرك قتله انا خديته منها لانها تتحشم هلبا.
مرام:🙄 وربي لما يقول خفيفة وريشة.
ملاك: لايقول لا سوء نوضي روحي بوك وصل.
مرام: جيت بنركب وشاء القدر تكون سيارته طالعة ورانا قعد يلحق فينا لعند خشينا الزنقة متعنا.
رحمة: شن صار معاك اليوم تعالي احكيلنا
مرام: انا كيف بديت نحكيلهم رن تليفون بابا كنت متأكدة انه هوا…..
مروى: كملي .
مرام: ماليش لزمة اهو شكله هو يتصل بي بابا.
رحمة: خليكم ساكتين توا نمشي نعرف من يتصل
وان شاء الله يكون هوا.
خشيت لقيته يضحك من عيونه ….
حاتم:اتفضل ياولدي امتا يناسبك تشرفنا في اي وقت.
رحمة: الحمدلله الحمدلله كل ساعة وفرجها يامرام.
مروى:شن هاتي البشارة.
مرام:طلع هو للي متصل.
رحمة : ايه وبوك قله اتفضل في اي وقت.
“تم كل شئ بيني وبين مهند خلال أسبوع فاضنية وتلبيسة حسيت بدت الدنيا تنصف فيا شوية ع الظلم والقهر للي شفته قبل وحددنا العرس نهاية الشهر طبعا ملاك اسم ع مسمى كانت زي البلسم في حياتي ربي عوضني بيها ع كل صاحبة خسرتها في حياتي”
مروى: من يقول تنقرأ فاتحتي قبلك واديرها وتتزوجي قبلي ربي يهنيك.
ملاك: اه مانبيش نوصيك كان عندك سلف كويس راك تنسي صاحبتك .
مرام: اقرئ قرايتك مالك ومال الراجل.
ملاك: شفتوها انا نقرا وهيا تتزوج.
مرام: والله كان مش منك اعطيتيه الرقم راهو قاعد لعند توا يستنى.
رحمة: صار الحمدلله للي ملاك تصرفت بحكمة.
مرام:🤣🤣 قصدك بخفة قال كحمة قال قاعد لتوا وين يتفكرها يضحك.
ملاك: الله غالب هوا معروفة من يوم صارت الدنيا أسود رأس مافيش خير.
مروى: هههههه كولي ع راسك تستاهلي ياأم لسان.
مهند: قرؤ الفاتحة مبروك عليك وعليا .
مرام:رديت بصوت مليان خجل بارك فيك.
مهند: انا من يوم خطبتك لعند توا وليتي حلالي كنت محافظ عليك وتو من حقي نقولك نحبك …
نحبك بشرع الله وسنة رسوله نحبك حب الطفل لأمه نحبك حب بقد خوف الأب ع بناته…
مرام: للي نقدر عليه انه نصونك وعمري مانقصر معاك .
سكرت الخط وبكم كلمة حسيت روحيملكت الدنيا كلها مش غير قلبه وجت اللحظة للي طلعت فيها من حوش بوي لحوشه هو وكانوا أهله فرحانين بيا هلبا وخصوصا انه فارق العمر كان لابأس بيه بينا هوا م88 وانا م99
كانت حياتي معاه أشبه بالأفلام الرومنسية سنة بعد زواجنا عمرنا ماتعاركنا ولا جت بيناولا كلمة طبعا أول ماتزوجت وقفت القيد لانه حملت طول ومعاش عندي حيل للمشي والتعب .
كملت سيم ووقفت كل شئ جبت بنت تشبه القمر سميتها صالحة ع اسم أمي رغم انه الكل قالولي حرام عليك تكبري فيها بعد وصل عمر صالحة 40 يوم واحنا مقعمزين.
مهند: شن رأيك غدوا نطلعوا زردة احنا وأهلك وصالحة تقعد مع أمي وأخواتي شن قلتي.
مرام: شن خطر عليك الطلعة فجأة.
مهند: محبوسة ليك شهر قلت اهو تغيري جوك .
مرام: سلمه حبيبي الغالي للي حاس بيا.
مهند: خلاص اتصلي ورتبي كل شئ معاهم وبلغيني باش نجيب معاي للي ناقص كله.
مرام: سلمك جياب .
سكرت منه وكلمت ماما ومروى.
مروى: خلي نتصل بمعتصم هذا للي مشحطني معاه باش يمشي معانا ومنها نشوفه.
رحمة: قوليله تم بوك مستحيل يرفض توا نقوله ربطنا معاكم وقتها معنداش حل الا يوافق.
“اتصلت واكدت لمهند ع المشية وكانت الأحداث بعد المشية هاذي غيرت حياتي المستقرة 180° ”
معتصم: نزلي النقاب متعك احنا مش بروحنا الراجل مقابلك .
مروى: ايح علينا وع غيرتك هذا راجل اختي.
معتصم: ايوه معناها فاهمة انه هو مش محرم ليك لاهو خوك ولا بوك ولاولدك ولاراجلك .
مرام: معقولة تغار عليها من مهند يامعتصم راهي زي أخته خيره شفت منه حاجة.
معتصم: انا لو نشوف حاجة نقتله لكن الصح صح .
رحمة: باهي نوضوا انتم تمشوا جايين بتوسعوا خاطركم ولا تغموا ع قلوبكم بالمشاكل.
مروى: نضت نحب ولانكره باش مايبداش يعلي في صوته وايديرلي في العار.
حاتم: وين امشوا معتصم ومروى.
رحمة: يوسعوا خاطرهم.
حاتم: شوية وضبحوا عليهم الشواء قريب ايطيب.
مرام: حاضر.
بعد ربع ساعة رجعوا وكيف بابا ومهند نزل الشواء كان معروف فني في التطيب.
مروى: زي العسل الشواء واظح انه مش بابا للي مطيبه.
معتصم: لين حسيت روحي غصيت وانا نشوفلها باش تسكر فمها وتسكت وهيا شئ.
رحمة: مطيبه مهند ولكن بوك معاه.
مهند: كولي اختي صحة ع قلبك.
مرام: نعرف انه مش قاصد حاجة ولكن معتصم طول قلب وجهه من كلامها وكلام مهند.
حاتم: هيا المغرب قريب خلي نروحوا هو هذاك الوقت .
مرام: روحنا والطريق كلها ومهند يشكر ويحط ويمدح في مروى .
“فاتت أيام بعد الزردة فجأة قلت اتصالت مروى بيا معاش تسأل زي قبل نمشي غادي معاش تعدل لعند يوم كنت بايتة عندهم ونبي نتصل بي مهند خديت هاتفها وهيا راقدة باش بنتصل فجأة مجرد ماضغط اتصال لقيتها مسجلة رقمه”
(الغلطة).
خشيت باش نبعثله رسالة ونصدمت بالكم للي واصلها من الرسائل من مهند بديت نفتح ونقرأ في كلامه وفي رد اختي…
مهند
(هلا مروى انا مهند ….)
مروى
(اهلين تفضل)
مهند
(بصراحة حبيت نقولك ربي يحفظك ماشاء الله عليك)
هنيا بديت خايفة نشوف لحروف الرسالة للي تحتها..
مروى
(تسلم 😊هذا من ذوقك)
مهند
(تصدقي اشتقتلك)
وهلبا وهلبا من كلام الحب والغرام صح اختي ماتردش عليه بنفس اسلوبه ولكن مدامه سايرته في الكلام معناها هيا مساهمة في الغلط بل أساس فيه …
هيا راقدة صورت كل شئ وحطيت الهاتف ومشيت لعند ماما رحمة.
رحمة: معقولة مروى هكي ادير .
مرام:بنموت انا معاش نبيه خلاص نبي نطلق منه هذا واحد خاين ياريته خاني مع حد بعيد اختي.
رحمة: راك تفكري تفتحي الموضوع اهو حتى بينك وبين نفسك لانه لو بوك يسمع رح تنقلب الدنيا ومعتصم احتمال يطلقها .
مرام: طلع يعرف معتصم لما يقولها غطي وجهك وانا هازية عليه.
رحمة: نوضي جهزي روحك وروحي كأنه مافيك شئ.
مهند: كيف في حالها أميرتي .
مرام: الحمدلله .
مهند: صايرة معاك حاجة خيرك ساكتة متغيرة عليا.
مرام: تعبانة وبس .
مهند: نرفع نعاينك .
مرام: ياريته وجع في جسمي وجع في قلبي….
وقعدت انا وياه كلمة بكلمة لين وصلنا الحوش ماقدرتش نكمدها في قلبي قتله اني شفت كل شئ باعثه لأختي….
فاتت ايام جمدت العلاقة بيني وبينه هو في دار وانا في دار لعند قررت نقول لبابا لقيته يخون فيا لكن مش رح نقوله مع اختي…
حاتم: ماعنديش بنت تتطلق هذاك مكانك دبري راسك انتي وياه….
لعند هنيا تمت قصتي مع الوقت مهند يحاول يغير نظرتي باش نسامحه لكن ماقدرتش ….
مروى قاطعتها فترة وبعدين رجعت معاها لكن معاش فيه شئ بينا زي قبل.
ماما رحمة جابت ولدين وبنت فاضل صارله حادث قعد مقعد الفراش فرح تزوجت واحد متع سكرين ونكير ترقد ع طريحة تفيق ع طريحة ….
قررت نسايره ونمثل اني سامحته ورجعت جددت القيد وبديت نقرأ معاش جبت بعد صالحة لانه مازال الطلاق قراراي لكن بعد ناخد شهادة في يدي…..باش نقدر نعيش انا وبنتي….
ادعو لعلي اول وآخر حب بالرحمة وادعو لأمي بالمغفرة أكثر اثنين فقدهم دمرني …..
(نصيحة عمرك ماتعطي كل الحب والثقة لشخص ايجيك يوم وتنصدم فيه )
دائما خليك وسط في كل الأمور…
🖊 استودعتكم لله لعند رجعة أخرى