رواية نعمة (العالم الآخر) الفصل الأول 1 بقلم حمادة زهران

رواية نعمة (العالم الآخر) الحلقة الأولى

انا اسمي حماده زهران في ناس كثيره هنا تعرفني انا مؤلف قصص رعب بس المره دي قصه حقيقيه هنشرها خلال شهر رمضان يومياً….
كنت كاتب قصه بعنوان أبن الجن…..
لفت نظري تعليق من وحده مختلف عن باقي التعليقات بتقول حصل معاه حاجات اسوء من اللي انا كاتبه في القصه بتاعتي…..
بصراحه تعليق شدني فقررت ادخل عندها في الخاص واسال عن حكايتها فضولي شدني ودفعني اني اتواصل معاها وعرفت القصه…
القصه علي مسؤلية صاحبتها ولك أن تصدق أو لا تصدق….
بناءً على طلب الاخت الفاضله تم تغيير الإسم….
“البدايه”
كان عندي 7 سنين كنت بحلم اني قاعده على سطح البيت بتاعنا وبصه للسما وبشوف باب كبير قوي وسلم كبير طالع عليه بنات وشباب في سن العشرينات و طالعين علي السلم وفي ريحه حلوه قوي وعمري ما شمتها قبل كده…..
وكنت بقوم من النوم وانا مبسوطه لحد ما في يوم بابا صحي من النوم ما لقينيش في الشقه…..
كنا عايشين في بيت عيله كبير البيت من 6 أدوار بابا فضل يدور عليا في الشقه ما لقينيش والغريبه ان باب الشقه كان مقفول من جوه……
بابا فتح الباب ونزل عند جدتي ودور عليا عند عمامي والبيت كله اتقلب لحد ما بابا طلع على السطح اللي جاني قاعده في نص السطح والمكان اللي كنت قاعده فيه نضيف جدا رغم ان أمي وجدتي وحريم عمامي مربين طيور فوق سطح البيت…..
وفي ضوء نازل عليا من السما……
وكنت ببص للسما والضوء متسلط عليا انا بس ومش سامعه اي حاجه بمجرد ما بابا هزني فقدت الوعي….
ولما فوقت بابا وكل البيت متجمعين فوق راسي سألت هو في ايه هو انا كويسه….
“بابا بخوف عليا”
حبيبتي انتي خرجت من الشقه ازاي….
ضحكت وقولت ازاي…..
“جدتي بعصبية”
كنتي بتعمل ايه على السطح يا بنت انتي….
قولت لا والله يا بابا انا بس كنت بحلم….
“وبدأت اتوتر واخاف”
بابا قال خلاص يا جماعه هي كويسه…..
ومشاهم وقعد جنبي على السرير وخدني في حضنه وامي واقفه بتترعش وانا مش فاهمه اي حاجه بابا طلب من امي أنها تخرج وطلب مني احكي حلمت ايه…..
حكيتله الحلم،الحلم اللي انا كنت بشوفه مرتين في الأسبوع وطلب مني اني ما احكيش لاي حد…..
جدتي كانت تاجرة كان عندها معارف كتير ست كانت شديده “زي شخصية فاطمة تعلبة بتاعت مسلسل الوتد”
تاني يوم بابا طلع من عند جدتي وطلب مني ألبس فرحت وقولت هخرج معاك قال لي ايوه….
بسرعه لبست ونزلت معاه لقيت جدتي مستنيانا ومشينا مع بعض وأنا مش عارفه رايحين فين…..
رحنا عند واحد اسمه ابراهيم بابا قعدني قدامه وبابا بدأ يحكي….
وانا ما كنتش متضايقه ولا خايفه….
ابراهيم سألني وقال لي هو انت بتشوفي ايه احكيلي……
قولتله زي ما بابا قالك هو انى كنت بشوف بنات وشباب دخلين فى السماء من باب كبير وكان لبسهم ابيض وشكلهم حلو ورحتهم حلوه جدا جدا …..
ابراهيم فضل يبص في عينيا وانا كنت ببص في عينيه بفضول كأني بقرأ حاجه جوه عينه….
سألني انتي عايزه تقولي ايه….
قولت له انت عندك كتاب….
قالي كتاب ايه…..
قولتله انت لازم تسمعني كويس….
طبطب عليا وقال لي اتكلمي يا نعمه أنا سامعك….
قولتله انت عندك كتاب بتستعمله وبتعالج بيه صح….
قال لي صح…..
قولت له المفروض ده سرك ومحدش يعرف صح….
قالي صح…..
قولتله خلي بالك هتموت بسبب الكتاب ده….
قالي طب والحل ايه…..
هزيت راسي وقولتله ما اعرفش….
طبطب عليا وقال لبابا خلي بالك من نعمه اكثر من نفسك انت معاك كنز…..
بابا بصله وقاله يعني ايه….
قال والله العظيم لو حد عرف قدرت بنتك هيستغلها….
بابا خاف قوي عليا وخدني ومشينا….
وجدتي كانت مصدومه وساكته….
لما رجعنا البيت بابا طلب من امي ان ما حدش يتكلم في الموضوع ده تاني….
وفعلاً محدش فتح معايا كلام بخصوص اللي حصل وفجأة بعد ثلاث ايام عم ابراهيم مات محروق….
اتحرق هو والكتاب بتاعه…..
ومن هنا بدأت الأمور تزيد وخوف بابا وجدتي عليا يزيد….
كنت بحلم واحكي الحلم لجدتي والحلم بيتحقق….
احلم بناس حاجات بتحصل ليهم وتاني يوم الحلم بيتحقق بيحصلهم نفس اللي بشوفه في الحلم…..
جدتي كان عندها فضول تعرف اكتر تسال اكتر وانا كنت دائما احكيلها…..
وفي مره عربيه جدي عملت عمره وما كانش فيه فلوس….
كنت قاعده مع جدتي قولتلها عارفه يا ستي انتي عايزه 1000 جنيه صح…..
قالتلي ايوه قلتلها ام فتحي صاحبتك هتيجي هتديك الفلوس….
بصيتلي وضحكت وقالت لا والله….
قولتلها والله زي ما بقولك كده …..
قالتلي طيب انتي عرفتي من فين…..
قولتلها سمعت في ودني كده بس انا هاخذ منك 10 جنيه…. الباب خبط بصيتلي بأستغراب لما سمعت صوت ام فتحي فتحت الباب ودخلت وستي من استغرابها مش عارفه تقولها اتفضلي……
ام فتحي قالت ايه يا ام احمد هو انا كنت بايته في حضنك يا اختي…..
ستي قالت لا والله بس لسه كنتي على بالي….
أم فتحي قالت طيب بصي يا ام احمد الجمعيه بتاعتك المفروض امتى تقبضيها….
ستي قالت الشهر اللي جاي…..
ام فتحي قالت انا هديهالك دلوقتي يلا ابسطي…..
ستي تنحت وأخدت منها الفلوس وهي على وشها ملامح الاستغراب……
ولما ام فتحي مشيت طلبت منها ال 10 جنيه بس ستي كانت متفاجاه مني عشان دي كانت اول مره اسمع حاجه واقولها كل اللي كنت بشوفه كان في الحلم وبس…..
فضل الحال زي ما هو لحد ما وصل سني 11 سنه….
لحد ما حصلت حاجه اغرب من الخيال…..