رواية البر التاني الفصل الرابع والسبعون 74 بقلم لولو محمد
رواية البر التاني الجزء الرابع والسبعون
رواية البر التاني البارت الرابع والسبعون
رواية البر التاني الحلقة الرابعة والسبعون
فى ارض
مختار ساند على عربيه و جنبه عباده و مغاورى
مغاورى / بص انا مقدر والله بس هى يعني حبكت
مختار / هو بمزاجى دا كلام الكبير
عباده / و ماله و دى بقي هتامنها ازاى ان شاء الله
مغاورى / انت تطلع بالعربيه المصفحه بتاعتى فاميه و ما حدش هيشوف اللى جواها
مختار / حلوه
عباده / انت ما تطلعش بالعربيه بتاعته انت تطلع فى عربيه عاديه خالص اقولك انت مش هتطلع خالص
مختار يبص لعباده
مغاورى / سيبك منه دا متخلف
مختار / تصدق فكره
عباده / عجبتك صح
مغاورى / هى ايه دى
مختار / جباره تصدق ما تطلعش الا من تعلب زيك
مغاورى / و لما ارقدكوا تزعلوا ما تنطق يا طور منك ليه ايه الفكره
مختار / هقولك بس فتح مخك معايا عشان انا هقولها مره واحده
مغاورى / قول يا اذكة اخواتك اشجيني
مختار / احنا هنطلع كلنا فى عربيتك الحلوه الغاليه دى و بعدين …….
………………
فى اوضه هند
هند و فاطمه عاملين ماسكات و فاطمه فى ايدها طبق شرايح خيار بتاكل فيه
فاطمه / لا بس الدكتور ده شاطر دا ما حصلش كل الناس شكرت فيه
هند / ما انا و مختار فعلا قررنا نسافر هو بس مستنى نتيجه التحاليل و ان شاء الله خير
فاطمه / خلاص هحجزلك على يوم السبت باذن الله
هند / افرضي نتيجه التحاليل ما كانتش طلعت
فاطمه / ان شاء الله تكون طلعت و لا عنها ما طلعت دا انا جايبه واسطه عليوى اوى عشان احجزلك دا دكتور كبير اوى
هند/ خلاص ربنا يسهل
ام داوود / لا مؤاخذه يا ست هند يعني انا عارفه انك مصراويه و ما تفهميش فى الحاجات دى الا هو حد دخل عليكي و انتى عروسه يعني واحده تكون لا مؤاخذه يعني
هند / قصدك اتكبست ههههههههههههه لا ما تقلقيش انا كان عندى حراسه جامده اوى مش كدا يا بطه
فاطمه / شوفى يا ام داوود كلمه امانه يعني البت دى ما تطاقش
هند / هههههههههههههههههه
فاطمه / بس تقولى ايه بحبها
هند / انتى اللى سكر يا بطه … الا هو الخيار ده مش لوشنا
فاطمه / لا دا لزوم النقنقه هيلث فود
هند / والله
فاطمه / امال اكل شيبسي و لب و سودانى و اطخن هى الواحده ليها ايه غير وزنها
هند / هههههههههه و ربنا انتى عسل
فاطمه / امانه عليكي يا ام داوود تدعى للبت الغلبانه اليتيمه دى بالخلف الصالح و ادعى للبت سماح يتيمه برضه و انتى يا هند ادعيلها و خلى الكل يدعيلها نفسي اشيل عوضها اوى
هند/ ان شاء الله تفرحى بيها قريب بس على الله دعوتنا دى ما تاثرش على الامتحانات بتاعتها
فاطمه / تندعق الامتحانات هى هتاكلها و لا هتشربها الامتحانات دى دا احنا بنعلمها فضا
هند / يارب هههههههههههههههه مش قادره
فاطمه / خليكي كدا اضحكى و انا هاكل الخيار جعانه … ما تدعى يا وليه الله
ام داوود / ربنا يكرمهم يارب و يبارك فيهم و يرزقهم بالذريه الصالحه قادر يا كريم
فاطمه / امين
…………………..
المسجد صلاه الجمعه
المسجد مليان على اخره رجاله و ستات و عيال صغيره بيصلوا و بعد الصلاه الناس تتفرق
مغاورى / العربيه
مختار / تسلم
مغاورى/ ترجعوا بالسلامه
مختار يبتسم و ياخد مفتاح العربيه و يركب هو و عباده ناصر يركب ورا الاتنين يبصوله
ناصر / كبرتوا عليا امتى يا ولاد الزيني ان كنتوا كبرتوا انا ما كبرتش
مختار / هشرحلك
ناصر / اطلع على السرايا
مختار / ايوه يا كبير بس
ناصر/ بقولك اطلع على السرايا
مختار يهز راسه و يسوق و هو بيبص لعباده
ناصر / انت بقى لميت شويه العيال و فكرتوا و خططتوا و قررتوا لوحدكوا و من غير علمى و قولت ماشي انما كنت انك تفكر انك هتنفذ من غير علمى كمان
مختار / يعني انت كنت هتوافق
ناصر / ابعتوا حد غيركوا و باقي الخطه ماشي
عباده / ما ينفعش تبان سهله اوى كدا دا رشيد يا كبير و هيعمل اللى هيقدر عليه
ناصر / و انت بقي اللى هتقدر عليه
مختار/ هى عوزانى انا و هى عايشين و العربيه مصفحه يعني ان شاء الله هتعدى
ناصر / و ان ما عدتش
عباده/ هتعدى يا كبير ان شاء الله احنا عملنا حسابنا فى كل حاجه و بعدين ما اكيد اللى بلغك قالك على كل حاجه
ناصر / خدتوا معاكوا سلاح كفايا
مختار / خدنا
ناصر / متوضيين
عباده / احنا لسه خارجين من المسجد يا كبير
ناصر يبص من الشباك و يتنهد
ناصر / تروحوا و ترجعوا بالسلامه انا كلمت امين و الرجاله هيبقوا جاهزين بالدعم على رنه اى رنه هيركبوا الطريق
عباده / و مين قال ان العركه هتحصل على طريقنا يا كبير
ناصر / عيسي و الرجاله مستنينكوا الناحيه التانيه على رنه برده ما تقلقوش
مختار / المهم انها تحصل على الطريق
ناصر / انت مش عامل حسابك على خطه تانيه و لا ايه
مختار / عامل بس ما يمنعش انى قلقان
ناصر / قول خايف مش عيب الخوف فى الحالات دى ضرورى
مختار / بيرفع الادرينالين و يزود التركيز و يسرع ردات الفعل
ناصر / لسه بيزاكر هههههههههههههههههه
عباده توصله رساله يفتحها و يبص على مختار و يوريها لناصر
ناصر / على بركه الله
………………….
فى فيلا فيرا
رشيد قاعد متابع كاميرات و قدامه اجهزه كتير فيرا تدخل
فيرا / مش قادره اصدق انك مش هتروح معاهم
رشيد / انا مش لاقى عمرى مهما حصل لازم اكون بعيد عن الصوره
فيرا / ليه و انت ناوى تفشل
رشيد / انا طالع برجالتك و اجهزتك و تحرياتك
فيرا / و خطتك انت اللى حددت الرجاله و وزعتهم و سلحتهم و كل حاجه فى الخطه دى اتعملت زى ما طلبت بالظبط ما عدلتش فيها حرف يعني لو فشلت
ادواردو يدخل
ادواردو / ذا درونز ار ريدى ( الكاميرات الطائره جاهزه )
رشيد / ما انا زارع كاميرات كفايا
فيرا / مش هيخسروا
رشيد ينفخ و يبص فى الجهاز عربيه مختار تعدى وراها عربيه مغاورى
فيرا / كبر الصوره
رشيد يكبر الصوره
فيرا / فين هند
رشيد / مش فى العربيه دى
فيرا / يوز ثيرمال ايمدجينج اون ذا سيكوند كار ( استخدم التصوير الحرارى على العربيه التانيه )
ادواردو يبص فى تابلت فى ايده
ادواردو / فور بيبول اون ذا كار ( اربع افراد فى العربيه )
فيرا / اكيد طبعا هيركبها فى العربيه المصفحه عرفت بقي ايه لزمه الدرون يا رشيد ههههههههههههههه
رشيد / تمام كدا لازم تختارى افجر انهى عربيه بما ان مختار فى واحده و هند فى التانيه
فيرا / فجر هند
رشيد يبصلها
فيرا/ العربيه مصفحه اخرها هتتعور
رشيد باصصلها و فجاه يبص للشاشه
فيرا/ اضرب يا رشيد
رشيد يتابع على الكاميرات اول ما عربيه مختار تعدى يدوس زرار فى جهاز قنبله تفرقع و عربيه مغاورى تتقلب
………..
على الطريق
عربيه مختار تلف و ترجع و تركن جنبها و ينزلوا الاربعه من الناحيه اللى فى النص و يساعدوا اتنين يطلعوا من العربيه التانيه وسط تبادل نار شديد عباده يطلع الموبايل و يرن على امين مختار تجيله رصاصه فى صدره يقع فى الارض واحد يجرى عليه يشق قميصه لابس قميص واقى الراجل يخبط على صدر مختار نايم فى الارض بيتالم عباده يصرخ فيه
عباده / انت هتعمل ميت قوم فز هى اول مره هنموت
الراجل يقوم مختار
مختار / ناولنى الرشاش
راجل تانى يدى لمختار الرشاش
مختار / عوزانى حيي تعالى خديني
مختار يطلع فوق العربيه و يصيدهم بسهوله
…………………
عند فيرا
فيرا / خليهم يضربوه فى رجله
رشيد / متاكده
فيرا / ما بحبش اكرر كلامى عجزوه
رشيد يمسك اللاسيلكى و يتك على الزرار
رشيد / دروب هيم داون شوت ذا ليجز ( وقعوه اضربوا فى الرجلين )
مختار يقع على الشاشه عباده يشده لتحت ادواردو باصص فى الشاشه اللى معاه
ادواردو / اى كانت سى ذا جيرل
فيرا / ماى بى شي ستيل ات ذا كار
ادواردو / نو وان ان ذا كير اونلى ايت مين اوت
فيرا / كبرى الصور دى عاوزه صوره اوضح
رشيد يبدا يزوم
فيرا / هى فين
رشيد / و انا اش عرفنى
فيرا / اكيد فى طريق تانى لعبوا بينا و خرجوها من طريق تانى شوفلى كل الطرق شوفلى
رشيد / مفيش طريق تانى لو مش معاهم تبقي ياما ما خرجتش من البلد يا خرجت من زمان
فيرا / يعني ايه
رشيد / و انا اش عرفنى مش انتى اللى قولتى انها هتخرج بالطريقه دى و التوقيت ده
انفجار شديد على الشاشه الكل ينتبه رشيد يحاول يبدل بين الكاميرات عشان صوره اوضح
صوت فى اللاسيلكى
صوت / رشيد … رشيد
رشيد يدوس الزرار
رشيد / معاك اتكلم
صوت / العربيات فاضيه و فى عربيات خدتهم ترجعهم البلد نطاردهم
رشيد يبص لفيرا
فيرا / ارجعوا
رشيد / نضف مكانك و ارجع … فجر العربيات
فيرا تبصله يبصلها
رشيد / هو ان ما كانش موت ما يبقاش خراب ديار
فيرا / هيبقي يا رشيد هيبقي موت و خراب ديار
رشيد / طب بما انهم لعبوا بيكي الكوره
فيرا / اللعبه ما خلصتش لو هند خرجت من البلد فمختار ما قدرش يحصلها و قدامها حل من اتنين يا تفضل مستخبيه فى مصر يا … فين ايلين … ايلين
بنت شقره تدخل
فيرا / لينا مين فى شركات الاتصالات عاوزاهم يحددوا مكان هند من موبايلها حالا
البنت تهز راسها و تمشي و رشيد باصص لفيرا
فيرا / ادعى انها تكون خرجت
……………………
فى المستشفى
مختار نايم على السرير و الدكتور بيطلعله الرصاصه من رجله و واضح انه بيتالم و عباده و امين واقفين مغاورى يدخل
مغاورى / خير ماله
مختار / بخير بخير
عباده / حقك علينا فى العربيه ليك عندى واحده
مغاورى/ فداكوا هى خارجه و عارف انها مش راجعه حد تانى اتصاب
مختار / انا بس
عباده / ما حلتناش مجنون غيره وقف فوق العربيه و كان مكشوف الحمد لله انها جت على قد كدا دا انا لولا شديته كان كمل
مختار / بس وقعت منهم كتير ما تنكرش
عباده / كانوا بيقعوا زى الرز الطلقه براجل
امين / الجرح خطير يا دكتور
الدكتور / لحسن الحظ لا بس طبعا مش هتقدر تمشي عليها طبيعي لفتره لحد ما الجرح يلم
مختار / لا بوس ايدك يا دكتور انا لازم اسافر مصر حالا شوفلى اى مسكن عندك و ابقي ارقد هناك
عباده / انا ممكن اروح بدالك
مختار / لا لو شافتك من غيرى هتتجن و ما حدش هيعرف يسيطر عليها لازم اروح
مغاورى / هو مش الاصابه امان و الجرح بس هو اللى مشكله يا دكتور
الدكتور / هو مش هيقدر يدوس على رجله من الوجع الجرح كبير
مختار / انا اساسا مش عاوز امشي اكتبلى بس مسكن عشان لو شدت عليا و انا هتصرف
الدكتور يهز راسه
عباده / مش هنوصيك يا دكتور
الدكتور / هى اول مره يا سي عباده
عباده/ تسلم و تعيش
الدكتور يروح يجيب لمختار علبه من رف الادويه مختار يبتسم و يتسند على امين و عباده
مغاورى / على فين كدا
مختار / السرايا الاول اغير هدمتى و هطلع على الطريق
عباده / مختار تسمعنى لو اقولك بلاش
مختار / لا
عباده / انت ما تضمنش الطريق و مش هتقدر تسوق لوحدك برجلك دى
مختار / ربك هيسترها ما انا ما ينفعش اسيب هند لوحدها فى مصر و افضل قاعد هنا يا ترى هترجع و لا لا
عباده / مهياش لوحدها معاها امى و دى انت عارفها زى ما انت عارف هند هيرجعوا و هناك هم مش لوحدهم
ناصر يقابلهم
ناصر / سلامتك يا ابن ابويا جيت جرى اول ما سمعت الخبر
مختار / اوعوا تكونوا كلمتوا هند
ناصر / ما تخافش و نبهت على الكل
امين يفتح باب العربيه و يركب مختار ناصر يمسك الباب
ناصر / انت مش هتروح الرجاله هناك هيرجعوا هند زى ما راحت هترجع
مختار / اذا اردت ان تطاع
ناصر / طول ما انت هنا هيفتكروها هنا هيعرفوا انه كان كمين ليهم ما تخافش هترجع قبل ما حد ياخد باله
مختار / بتطلب منى المستحيل
عباده / انت متصاب حتى لو روحت مش هتقدر تساعدهم هتعطلهم
ناصر / هترجع ما تخافش
ناصر يقفل الباب و الكل يركب و مختار يحط ايديه فى جيوبه يدور على الموبايل
مختار / موبايلي فين
عباده راكب قدام يناولهوله
عباده / بلاش تكلمها دلوقت استنى اما هى تكلمك ما تضمنش مين حواليها و سامعها
مختار يبص فى الارض و يهز راسه امين يسوق و يمشي
……………………..
فى محطه مصر
قطر يقف و الناس تبدا تنزل ينزل اتنين ستات منتقبات واحده منهم شايله سبت كبير على راسها يقابلهم راجل بجلبيه
الراجل / حمد الله على السلامه انا جهزتلكوا كل حاجه اتفضلوا معايا …عنك يا ست الكل
فاطمه/ سيبها مش تعبانى
الراجل يتحرك و فاطمه و هند وراه
………………….
فى فيلا فيرا
فيرا رايحه جايه
رشيد / ما تشوفيلك حته خيلتيني يخربيت توترك
فيرا / اما لو اللى فى دماغى طلع صح … شوف كدا حد منهم اتحرك
رشيد / الكاميرات قدامك من ساعه ما دخلوا السرايا ما حدش خرج
فيرا / ازاى
رشيد / و انا اش عرفنى
ايلين تدخل و فى ايدها ورقه فيرا تجرى عليها رشيد ينتبه
فيرا / هى فين عرفتى مكانها
ايلين / ايوه
ايلين تدى لفيرا ورقه تبص فيها و تبص لرشيد بيحاول يتمالك نفسه
…………………….
فى سرايا الجوارحه
مختار ممدد على السرير و حواليه العيله تليفونه يرن يتعدل بسرعه و يرد شيرى تقوم تقعد جنبه
مختار / هند
هند / ازيك انت فين انا وصلت الشقه حلوه اوى
مختار / انا مش هقدر اجى انا كويس بس الطريق اتقفل
هند / و القطر ؟
مختار / تقدرى تشوفى الدكتور و ترجعى ؟
هند / لوحدى ؟
مختار/ انا اسف انا
هند / انا عارفه انه اكيد غصب عنك …تمام على العموم ام عباده معايا و الشقه حلوه و فيها كل حاجه تليفزيون و اكل و حتى لبس
مختار / ما تتكلميش مع اى حد … هند
هند / ما تخافش حتى رجالتك نفسهم ما سمعوش صوتى
مختار / ما تخافيش تمام
هند / ما تخافش انت انت سايب هنا رجاله
صوت بطه / دكر و بطايه
هند / ههههههههههههه سمعت
مختار/ امى عوزاكى
مختار يدى التليفون لشيري
شيري / ازيك يا هند كدا يا بنت الجزمه ما تقوليليش انك ما عكيش تليفون
هند / هههههههههه والله خدوه منى فى المسجد و انا بغير هدومى و ادونى واحد تانى قديم و صغير من اللى اخره يتصل بس و كان الطريق طويل ما سلانيش فيه غير المصحف حتى ما فتحتش بقى بحرف مع بطه طول الطريق بنتكلم بالاشاره ده لو اتكلمنا
شيري / المهم انك وصلتى بالسلامة
هند/ ايوه يا ماما كويسه ما تقلقيش
شيرى تبص لانتصار
شيري / حد عاوز يكلمها
انتصار / خليها ترتاح الحمد لله اطمنا عليها تاكل لقمه و تبقي تكلمنا
شيري / بصي كلى و نامى شويه و كلمينا فى السهره تمام
هند / تمام اديني مختار صحيح
شيري تدى لمختار التليفون
هند / هو انا ينفع اخد الموبايل الجديد ده اللى لقيته فى الشقه بعد العمليه عاجبنى اوى احدث من بتاعى و كبير و الكاميره بتاعتك جااااامده
مختار / هههههههههههههههههه ارجعى بالسلامه و انا اجبلك الاحدث منه
هند / كلام رجاله ؟
مختار / انتى بتسالي و لا ايه
هند / لا و انا اقدر بقولك ايه احنا ميتين من التعب هنام شويه و لما اصحى هكلمك
مختار / تمام تصبحى على خير
هند / و انت من أهله
مختار يقفل
عبد الله / طب تسيب الموبايل بتاعها هنا و فهمناها انما تبدل بتاع القطر ليه
مختار / تليفونك كانك شايل جهاز جى بى اس فى جيبك لو فتحت الفايس الواتس اى موقع و دخلت بياناتك عشان كدا هند مكلمانى على النت دلوقت من اكونت ماسنجر فايك متسجل على الموبايل
عبد الله / موساد
ناصر / لما تتعامل مع واحده زى بوز الاخص دى لازم تفكر زيها بس على الله نعرف نجيبها
شيري / و انتوا منبهين على هند ما تفتحش اى اكونت من بتوعها و لا تتصل بحد
مختار / قولتلها
شيري / على الله ما تنساش حكم الفايس بوك ده ادمان
انتصار / دا لو فاضيه انما دى يادوب هتحط راسها دلوقت تروح فى النوم و معادهم مع الدكتور الصبح فى العياده و بعدين هيركبوا القطر و يرجعوا علاطول ان شاء الله مش كدا يا كبير
ناصر / كدا مع انى شايف انهم يقعدوا شويه لحد ما الدنيا هنا تهدى اللى ما فلحوش فيه فى الروحه اكيد هيظبطوه فى الرجعه
مختار / عمليه الهاء تانيه
ناصر / يا خويا خليك فى خيبتك دى قبل ما مراتك ترجع و تقلبها مناحه انا رايح انام الحمد لله اطمنا عليهم نرتاح شويه عشان نقدر نكمل
شيري / هم امان هناك يا كبير انا خايفه على البت اوى
ناصر / ما تخافيش يا ام عبد الله دى بنتى هنام و بنتى مش فى امان
شيري / ربنا يحفظك و يسلمك
ناصر يهز راسه و يمشي
مختار / و انتى كمان يا امى روحى ارتاحى
شيري / و لا هشوفها لحد ما هند ترجع … هسيبك ترتاح
مختار/ حضرتك مش تعبانى انا عليكي انتى والله
شيري تبتسم و تمشي
عبد الله / و انا كمان مش مرتاح
مختار / ان شاء الله خير
عبد الله يهز راسه و يمشي و مختار ممدد و بيفكر
…………………….
فى فيلا فيرا
فيرا عماله تقلب فى ورق
رشيد / ما قالولك فى السرايا فى البلد تاعبه نفسك من الصبح ليه
فيرا / دليل مكالماتها بيقول ان مامتها اتصلت بيها سبع مرات ميسد كولز
رشيد / السرايا كبيره مش هيفضلوا يدوروا على بعض يعني
فيرا / ورا بعض ؟
رشيد / نايمه
فيرا / و هى بتنام فى حته غير اوضتها مثلا مردتش من تانى او تالت مره تروحلها او تبعتها حد
رشيد / ايه يعني تقصدى ايه
فيرا / زى ما بنفكر اكيد هم بيفكروا و سهل تغير موبايلها
رشيد / بس مختار فى السرايا كلهم فى السرايا
فيرا / هند اصلا من مصر دا ملعبها و مستحيل تضيع كشف الدكتور بكره
رشيد / ما نركز على طريق الرجوع
فيرا / هيبقي بلان بى انا ما اضمنش ترجع بكره انا عاوزه كل عناوين و ارقام تليفونات كل دكاتره و مراكز التوليد فى مصر
رشيد / مش عاوزه المستشفيات كمان انتى عارفه فى كام دكتور نسا و توليد هناك مليون
فيرا / قدامكوا الليل كلوا تحاولوا تعرفولى هند هتكون عند انهى دكتور و اه انت بتقول ان مفيش طريق تانى للخروج من البلد غير العربيه ؟
رشيد / لو بالعربيه مفيش طريق تانى
فيرا / طب لو قطر
رشيد / وصلت
فيرا / حبيبي يا رشيد بليز اصحى بكره على اخبار حلوه تصبح على خير
فيرا تسيب رشيد و تمشي رشيد يغمض و يكتم جواه
……………………………….
فى اوضه هند
فاطمه و هند نايمين جنب بعض هند تصحى و تبص على فاطمه نايمه تتحرك بشويش و تقوم تدخل الحمام تغسل وشها و تتوضي و تلبس الاسدال و تفرش السجاده و تصلى فاطمه تطلع من الاوضه بتجرى اول ما تشوفها تقف و تحط ايدها على صدرها
فاطمه / انتى بتصلى ايه يا لهوى ليكون الفجر
فاطمه تجرى تبص فى الموبايل
فاطمه / يعني ادعى عليكي يعني … مش وقته احنا على طريق لما نروح … هعمل اكل تاكلى انا جعانه
فاطمه تطلع تانى هند ساجده
فاطمه / هعمل على ما تخلصى
فاطمه تدخل المطبخ و تفتح التلاجه و تبص فيها و تطلع الجبن و توديها على السفره فى الصاله
فاطمه / اقلى البيض و لا اسلقه
هند / الله اكبر
هند تركع
فاطمه / على رايك السليق هياخد وقت احنا لسه هنستنى
فاطمه تدخل المطبخ و تطلع طاسه و تحط سمنه كتير و تقلى البيض
فاطمه / شامه يا بت
فاطمه تفتح الفريزر و تطلع كيس و تروح تقعد على السفره هند بتقول التحيات
فاطمه / طب بتصلى ايه اصلى معاكى محسسانى بالذنب انى هاكل من غيرك
هند تسلم
هند / حرام عليكي يا شيخه عماله تضحكيني و انا ماسكه نفسي بالعافيه
فاطمه / اضحكى يا اختى كنتى شوفى منظرى لما اتقلبت و ما لقيتكيش جنبى كنت هموت
هند تقوم تقعد قدام فاطمه و تطلع بتاو من الكيس و تحطه فوق طاسه البيض
هند / بعد الشر عنك يا احلى بطه فى الدنيا بس انا زعلانه منك
فاطمه / ليه ياختى و انا كنت كلمتك
هند / كل دى سمنه انتى لو قاصده ما اكلش مش هتعملى كدا احنا بالليل
فاطمه / اول هام هتاكليها و رجلك فوق رقبتك اوعى يا بت تكونى فاكره عشان بتقوليلى يا بطه كدا خلاص انا الكبيره هنا يا بت فاهمه
هند تضحك
هند / مع ان اللى يشوفك يقول اختى الصغيره
فاطمه / عارفه انه ما يبانش عليا بس نقول ايه انا مخلفه قدك
هند / خلاص يا كبيره كلامك نافذ انا كدا كدا جعانه مش مهم اما نبوظ يوم يعني
فاطمه / الف هنا كلى انتى ما كلتيش من الصبح كنتى بتصلى ايه
هند / ركعتين لله عشان بكره يعدى على خير
فاطمه / هيبقي يوم طويل بس هيعدى اعتبريها مغامره تحكيها لعيالك
هند تبتسم و تاكل
فاطمه/ هو البيض ان ما كانش غرقان فى السمنه البلدى يبقي بيض الا ما فى حتى حته بسطرمه
هند تبص لفاطمه و تبتسم
فاطمه / و يا ترى بقي دعيتيلى معاكى و لا زى عادتك
هند / طب والله بدعيلك
فاطمه / ناكل و نقوم نصلى ركعتين كمان مش باينلها نوم
هند / ناكل و اقوم اعملك فنجان قهوه من بتوعى تظبطى الجمجمه و نشوفلنا فيلم و لا حاجه و نتسهر عليه لحد ما نروح فى النوم
فاطمه تطبطب على كتفها و تقوم
هند / على فين
فاطمه / هجيب طمطمايه كلى كلى
…………….
فى اوضه مختار
مختار ممدد على السرير ناصر يفتح الباب بالراحه مختار يتعدل
ناصر / زى ما انت كنت جاى اطمن اشوف ايه الاخبار
مختار / مش عارف انام و لا حتى اغفل
ناصر/ و لا انا كلمتك
مختار / لا تفتكر لسه نايمه انا خايف اقلقها
ناصر / كلمت حد من الرجاله تطمن على الدنيا
مختار / كلمت الدنيا هاديه و كلهم صاحيين
ناصر / كلها كام ساعه و عباده هيركب القطر و هيطلع على بنى سويف
مختار / اشمعن
ناصر / هم كمان هينزلوا بنى سويف عباده هيبقي مستنيهم هناك هو والرجاله و يرجعوا بالعربيه
مختار / بلاش هيبقوا مستنينه
ناصر / ايوه ما انا معتمد على كدا
مختار / بلاش يا كبير انا مش موجود
ناصر / و انت كنت تميمه الحظ يا خى بص لروحك يا ابن ابويا انت الوحيد اللى راجع متشال
مختار/ كنت عارف انك مش هتعديها
ناصر / دا انت لو ما كانش فيك اللى مكفيك كنت اللى طلعت اللى فيا فيك و انا معبى
مختار / هههههههههههههههههه ليه بس دا انا حبيبك
ناصر / ياض انا بخاف عليك انت ابنى البكرى يا وله لما يكلمونى و يقولولى مختار اتصاب و اعرف ان كان فى واحده تانيه فى صدرك انت لو عاوز تقتلنى مش هتعمل فى روحك كدا
مختار / لكل اجل كتاب
ناصر / و انا هقدر عليك تيجي هند بالسلامه و هى تتصرف
مختار / هههههههههههههههههههههه
ناصر / اضحك اضحك بقولك ايه البتاعه دى فيها قهوه
مختار / اعملى معاك ادعيلك هموت على بق
ناصر / هعملك … عشان انا الكبير بس
مختار يبتسم و ناصر يقوم يفتح التقفيل و يدور على الحاجه
………………..
فى فيلا فيرا
فيرا قاعده بتلعب يوجا ايلين تدخل
ايلين / مفيش اى مكالمات مع نمر غريبه كلهم اهل البلد او بينهم و بين بعض بس عباده حجز تذكره قطر للقاهره هيطلع كمان ساعه
فيرا تبص لايلين
فيرا / تذكره واحده بس
ايلين تهز راسها فيرا تفكر
فيرا / معاكى قايمه بنمر رجاله مختار فى مصر عوزاكى تشوفيلى اذا كان حد منهم تواصل مع اى حد من السرايا او البلد
ايلين / مفيش ما قولت لحضرتك مفيش مكالمات غريبه للسرايا
فيرا / طب بينهم و بين بعض اكيد مجى هند لمصر ربكهم اكيد حركتهم كانت غريبه اكيد فى مكان متجمعين فيه او على الاقل بيروحوا و يجوا عليه كل اللى مطلوب منك تضيقي بس دايره البحث شويه تقدرى ؟
ايلين / تمام حضرتك
ايلين تطلع و رشيد يدخل فيرا تقوم تقف
رشيد / مفيش كشف نسا فى القاهره لا باسم هند الزيني و لا هند الجمل
فيرا / جربت باقي اسامى العيله
رشيد / جربت مفيش زيني خالص اقولك و لا حتى جارحى الا ملك الجارحى و دى متابعه مش كشف
فيرا / تابع مع ايلين و ساعدها هى هتصغرلك دايره البحث
رشيد / مهى اكيد راجعه
فيرا / و انت عارف هى طلعت ازاى عشان تستناها و هى راجعه
رشيد / طلعت بالقطر زى ما عباده هيطلع فيه كمان شويه
فيرا / انتوا عرفتوا منين ان عباده هيطلع بالقطر صحيح
رشيد / حجزها بالكريدت كارد بتاعته و اه راجعت كل حجوزات القطورات اللى طلعت و كل الكريدت كارد بتاعه باقى العيله ما حدش فيهم عمل اى حاجه لو حجزوا حجزوا كاش
فيرا / مفيش هند مفيش ولد
رشيد يمسكها من رقبتها و يوقعها فى الارض فيرا مش بتقاوم
رشيد / مفيش ولد مفيش فيرا قولتلك بلاش تختبرى صبرى
فيرا / دا اقوى ما عندك؟
رشيد يبصلها باستغراب و يسيبها فيرا تقعد
فيرا / انا مقدره و مستوعبه ردود فعلك و مش هحاسبك على اللى عملته عشان بحبك بس انت عارف ان فى شغلانتنا ما ينفعش تهدد حد بالقتل لاننا بنموت يوم ما بنشتغلها المفروض انك عارف ده … ما تهددش اقتل
رشيد / ما تقولى لنفسك مش انتى اللى هددتى مختار و نمتى على كدا
فيرا / انتظار الموت اصعب من الموت نفسه بقولك ايه شكلك تعبان خلى غيرك يكمل و انت اطلع ارتاح بكره قدامك يوم طويل
رشيد / بلاش يا فيرا لمصلحتك
فيرا تبتسم
فيرا / انا كمان هطلع انام تحب تيجي توصلنى
رشيد / انا هكمل شغل
فيرا / مش هقول لسمر
رشيد / فيرا
فيرا / تصبح على خير
فيرا تقوم و تمشي و رشيد قاعد ماسك دماغه يقوم هو كمان
……………….
عند الدكتور
الدكتور يكشف على هند لابسه النقاب يخلص و يقوم يبص فى الورق
فاطمه / خير يا دكتور
الدكتور / والله كل حاجه تمام مش شايف اى مشكله
هند / امال ليه ما فيش حمل انا اخدت كميه منشطات رهيبه و اللتزمت بالعلاج اللى قدام حضرتك
الدكتور / انا شخصيا مفيش قدامى اى سبب يمنع سواء منك او منه
فاطمه / نخش فى الموضوع نقدر نعمل العمليه امتى
الدكتور / انا هحدد معاد تيجي فيه مع زوجك
هند تبص لفاطمه
هند / هو احنا لازم احنا اللى نيجي حضرتك ما ينفعش اللى تيجي
فاطمه / ما تقلقش خالص من الفلوس يا دكتور هنراضيكي و لما ربنا يفرحنا ليك مننا حلاوه كبيره اوى
الدكتور / المركز برده فيه التجهيزات الكامله
فاطمه / بص يا دكتور احنا جايين تشوف العروسه و تشوف ايه ناقص للعمليه نكمله انما احنا بنيجي مشوار طويل و هى مش هتستحمل السفر بعد العمليه حضرتك تنورنا تعاين المستشفى اللى عندنا و الجهاز اللى هتقول عليه هنجيبه المهم مجهوداتك
الدكتور / انا مش عارف اقول ايه انا اول مره حد يطلب منى حاجه زى دى
هند / حضرتك ممكن تفكر براحتك و تكلمنا فى اى وقت
فاطمه/ يا دكتور لو طلبت مليون جنيه هديك اتنين مليون هديك بس ربنا يجعل فى ايديك الشفا و نفرح بالواد
الدكتور / هو الموضوع مش موضوع فلوس والله انا بس … على العموم سيبوها لله انا بس سيبولى رقم اتواصل معاه هرتب مواعيدى و اجى البلد و اشوف الدنيا و اشوف الفريق اللى معايا و باذن الله خير
فاطمه / و طمن الفريق اللى معاك حلاوتهم عندى يلا يا بنتى يلا … تعبناك معلش
الدكتور / تعبكوا راحوا ما تقوليش كدا دا شغلى
فاطمه / هستنى اتصالك
الدكتور / قريب باذن الله
فاطمه تطلع هى و هند الدكتور يعدل فى البيانات اللى قدامه
الدكتور / هند محمد الجمل … حفظ
الدكتور يدوس انتر
……………….
فى فيلا فيرا
فيرا بتعوم فى حمام السباحه رشيد يدخل
رشيد / هند كانت بتكشف عند دكتور نسا فى التجمع عدل بيانتها على السيستم
فيرا / خلصت كشف و لا لسه هناك
رشيد / و انا اش عرفنى
فيرا / اللى بلغك ان هند بتكشف يقولك مشيت و لا لا
رشيد / اذكى اخواتك و انا فى اربعه و عشرين ساعه حلقت الاقى ناس اشتريهم فى كل عيادات النسا انا هكرت السيستمز بتاعتهم ربنا يخليلنا التكنولوجيا
فيرا / ما علينا شوفلى اقرب قطر راجع الصعيد امتى هم عليه
رشيد / و بعدين
فيرا / هو انا كل حاجه هقولهالك مش كنت اذكى اخواتى يا هتبقي على القطر يا هترجع بالعربيه أخبار عباده ايه
رشيد / لسه فى القطر
فيرا / خليكوا وراه
رشيد / تمام
……………….
فى القطر
هند و فاطمه راكبين عربيه و منتقبات
هند / انا جعانه اوى
فاطمه / اتحايلت عليكي تاكلى
هند/ كنت متوتره و بطنى تعبانى
فاطمه / مفيش مشكله لسه شويه على ما القطر يتحرك تعالى ننزل نشترى اى حاجه بسرعه الطريق طويل اوى
هند / تمام
فاطمه و هند يسيبوا المشنه و ينزلوا فى وسط الزحمه يروحوا يقفوا قدام كشك يلموا حاجات منه فجاه اتنين يتخانقوا مع بعض جامد و الناس تتلم و تحوش فاطمه تشد هند بعيد
………………..
فى بنى سويف
عباده ينزل يقابل واحد يبدلوا الموبايلات و التانى يركب القطر قبل ما يمشي عباده يتصل ما حدش بيرد يتصل تانى ما حدش بيرد يتصل بحد
عباده / ايه الاخبار يا ابنى
راجل / نزلوا من القطر قبل ما يتحرك يا سي عباده و ما ركبوش تانى
عباده / و انت كنت فين يا بجم ما نزلتش وراهم ليه
الراجل / مهو كل حاجه حصلت فجاه كانوا بيشتروا حاجه من الكشك و فجاه الخناقه و فجاه اختفوا افتكرتهم ركبوا القطر طلعت وراهم تانى كان القطر اتحرك قلبت عليهم القطر ما لقيتهمش حاجتهم هنا بس هم لا
عباده / يومك اسود من شعر راسك بس اما الكبير يعرف
عباده يقفل السكه و هو بيضرب كف على كف
………………….
فى سرايا الزنايته
الرجاله كلهم بيركبوا العربيات
انتصار / و انتوا هتدوروا عليهم فين بس
ناصر / فى كل حته لحد ما نلاقيهم
انتصار / طب استنى يمكن يوصلوا لتليفون تانى يكلموكوا و لا يركبوا القطر اللى بعده و لا يرجعوا الشقه
مختار يركب
انتصار / و انت رايح فين انت كمان
ناصر / كل واحد عرف طريقه مش عاوز غلطه يلا الكل يتحرك
انتصار / جيب العواقب سليمه يارب
انتصار تبص وراها تلاقى شيرى واقفه بتابع اللى بيحصل و هى بتعيط من غير صوت
………………..
فى موقف
هند و فاطمه ياخدوا الكنبه الورانيه فى عربيه و شايلين اكياس كتير على رجليهم هند توشوش فاطمه و العربيه فاضيه
هند / مش كنا كلمناهم فى تليفون و لا اى حاجه بدل ما زمانهم قلقانين علينا
فاطمه / ما تقلقيش انا هتصرف بس اما نتحرك المهم تثبتى و تهدى لحد ما نوصل
هند تهز راسها
………………..
على الطريق
ناصر / ما تقلقش ام عباده هتعرف تتصرف و مستحيل يكونوا وصلولهم دول لو مخاويين مش هيعرفوا
مختار / ربنا يستر
ناصر / و بعدين هيعرفوهم بالنقاب ازاى
مختار / انت عارف اننا مش هنلحقهم بالعربيه صح
ناصر / هنعمل اللى علينا و عباده كمان مش ساكت لا هو و لا الرجاله هناك و ان شاء الله يوصلنا خبر فى اسرع وقت
مختار / رشيد
ناصر / اوعى
مختار / بس هو الوحيد اللى يقدر يقولى ان كانوا وصلولها و لا لا
ناصر / ما وصلولهاش هى سايبه و لا ايه مفيش خبر عن تبادل نار و لا سقوط جرحى لا هند و لا ام عباده هيقعوا بالساهل امال انا بعت ام عباده ليه
مختار / ان شاء الله … هو مش وقته بس انا اللى بعت ام عباده
ناصر / و لما اضربك طلقه فى رجلك التانيه انت فى ايه و لا فى ايه مراتك مش لاقينها
مختار يضحك و يكتمها
مختار / صحيح شر البليه ما يضحك
ناصر يكمل سواقه و يعدى و تطلع على الطريق عربيه شرطه تنصب كمين و تبدا توقف العربيات و تفتشها
………………….
فى عربيه فاطمه
فاطمه بتعمل بتدور على حاجه
فاطمه / الموبايل فين مش لاقيه الموبايل شوفيه معاكى كدا
هند تبصلها فاطمه تزغرلها تعمل بتدور
هند / مش لقياه
الاتنين يعملوا بيدوروا
فاطمه / ما حدش يا اخوانا معاه موبايل بعد اذنكوا يرنلنا عليه
واحد من الركاب فى الكنبه اللى قدامهم يطلع موبايل و يفتحه و يديهولهم فاطمه تتصل برقم بيرن و ما حدش بيرد و كل الركاب متابعينها باهتمام
…………………..
فى سرايا فيرا
رشيد قاعد على جهاز و بيتابع كاميرات المراقبه
رشيد / الزنايته كلهم بره البلد
فيرا / رايحين يجيبوها
رشيد / اشيل الكماين من الطريق ؟
فيرا / لا ممكن يكون تمويه
رشيد / عوزانى اعمل ايه
فيرا / عباده سبقهم ليه و مختار نزل و هو مصاب ليه فى حاجه غلط … ايلين
ايلين تدخل
فيرا / تابعيلي كل الاتصالات و خطوط السير للموبايلا لكل رجاله الزنايته
ايلين تهز راسها و تمشي
رشيد / حلوه ايلين مع انها جديده
فيرا / رشيد !!! حد يقول لسمر
رشيد / انتى فهمتى ايه بتكلم عن شغلها
فيرا / لما المسدس يبقي متوجه على راسك الكل بيعمل احسن ما عنده
رشيد / فى ناس بتتوتر و تبوظ الدنيا
فيرا / الناس دول طيبين يا رشيد و الطيبين مكانهم مش فى الدنيا الوحشه دى مكانهم فوق عند ربنا
رشيد / اما نشوف اخرتها
رشيد يبص فى الشاشه و فيرا تتابعه
……………………
فى عربيه ناصر
موبايل ناصر يرن فتوح
ناصر / ايوه يا فتوح طمنى
فتوح / حد اتصل من نمره غريبه و ادى الاشاره لما تابعت النمره لقيتها بتتحرك
ناصر / على انهى طريق
فتوح / هبعتلك اللوكايشن على الموبايل
ناصر يكلم مختار
ناصر / مش قولتلك ام عباده هتتصرف جابت نمره غريبه و ادت الاشاره على تليفون الطوارء و فتوح عرف مكانهم شكلهم فى عربيه على الطريق خد شوفلى اللوكايشن اللى بيقول عليه ده عشان نروحلهم نطمن عليهم
مختار ياخد الموبايل و يبص فيه
مختار / ما احنا كدا هنبقي بنكشف مكانهم انا بقول نرجع
ناصر / هنرجع بس مش دلوقت لازم نبقي على الاقل قريبين منهم عشان لو حصل حاجه تابعلى بس مكانهم
مختار / لسه بدرى اصلا الطريق طويل و انت عارف
ناصر / سبها على الله و هى تقصر
مختار / و نعم بالله
……………………
فى القسم
مغاورى يدخل
مغاورى/ سلام عليكم
عسكرى / و عليكم السلام يا سي مغاورى اؤمر
مغاورى/ ما يؤمرش عليك ظالم زياد بيه موجود
العسكرى / ايوه جوه ثانيه واحده ابلغه ان سعادتك عاوزه
مغاورى / خد وقتك
العسكرى يدخل و مغاورى واقف
……………………
فى سرايا الجوارحه
كوثر / البلد كلها مقلوبه من امبارح بسبب الست هند دى لو بنت وزير مش هيعملوا عشناها كل ده
ام مغاورى / و احنا من امتى بنخرج حريمنا من غير ما نامنهم
كوثر / و نخرجهم ليه اصلا و بعدين انا مش فاهمه يعني الوليه دى سابت حريم البلد و حطت عينها على هند ليه
ام مغاورى / نصيبها هنعمل ايه
كوثر / اقطع دراعى من هنا ان ما كانش الموضوع فيه ان
ست / ان ازاى يعني
ام مغاورى/ حتى انتى يا نعمات هتعومى على عومها
نعمات / ما انا برده مش فاهمه البت دى من يوم ما سمعنا عنها و هى وراها مشاكل و بيقطعوا بعض عليها
كوثر/ و ياريتا عدله و لا حتى … يلا دى كلها ارزاق احنا مالنا
ام مغاورى/ والله انتى ما هتجيبيها لبر
نعمات / صحيح كان فى حاجه حصلت و مش عارفه عرفتوها و لا لا … بخصوص سماح
كوثر / خير فى ايه … داهيه لتكون حملت
ام مغاورى/ الصبر من عندك يا رب اقولك ايه بس اقولك انا قايمه انا مش ناقصه
ام مغاورى تقوم
كوثر / قومى يا ختى … انا عارفه البت دى سحرابها و لا ايه ما بتطيقش عليها الهوى… قولى ياختى مالها مقصوفه الرقبه
نعمات/ الحريم فى البلد ما لهمش سيره غير ان مغاورى بيضرب سماح و مبهدلها
كوثر/ تلاقيها مقصوفه الرقبه اللى نقلت الكلام عشان تقلبها جنازه و تشبع فيها لطم
نعمات / ربنا يستر و الله انا حاولت اكدب الموضوع و اسكت اللى بيتكلموا بس شكلها مش هتعدى على خير
كوثر / بكره نقعد جنب الحيطه و نسمع الزيطه
نعمات / بس دا مش وقته
كوثر / يتلهوا فى اللى هم فيه دا حتى حريمهم مش عارفين يحموهم من غيرنا
نعمات/ ربنا يستر
……………………..
على الطريق
الطريق واقف و عربيه عربيه بتتفتش فى الكمين و فاضل على عربيه هند تلت عربيات هند و فاطمه يتوشوشو
هند / انا هموت و انام خلاص
فاطمه / هانت فاضل حاجه بسيطه و نوصل اهو
هند / بالشكل ده مش هنوصل و بعدين اشمعن الجنب ده اللى بيتفتش و الناحيه التانيه سالكه
فاطمه / يعني مش عارفه بيدوروا على ايه يعني
هند / انتى بتقولى كدا و خلاص صح
فاطمه / هو الاكل اللى معانا خلص و لا لسه فى حاجه باقيه
هند تمد ايدها و تطلع كيس مليان بسكوتات و تديه لفاطمه تاخد واحده تفتحها و تاكلها و هند بتبص حواليها عربيات واقفه فى كل حته
………………..
عند الكمين
بوكس يعدى الناحيه التانيه يركن و ينزل زياد و يعدى يسلم على الظابط و يديله الكارنيه بتاعه
زياد / مساء الخير الرائد زياد النمر
ظابط / اهلا يا باشا خير
زياد / جاتلنا بلاغات كتير ان الطريق واقف و كنت فاكرها حادثه ما كانش عندى علم ان فى كمين هنا خير يا باشا فى حاجه و لا ايه
ظابط / لا احنا كنا
زياد / انا اسف جدا جدا على المقاطعه بس هو الباشا مش هيعرفنى بنفسه و لا ايه
الظابط / هههههههههه لا طبعا ازاى معاك الرائد عمر حباشي
زياد / اهلا و سهلا ممكن اشوف اثبات الشخصيه لو سمحت
عمر / افندم !!!
زياد / بطاقتك يا روح امك بطاقتك ياله
عمر / طب و ليه الغلط ده على العموم تحت امرك يا باشا
عمر يمد ايده فى الجيب اللى ورا و هو بيبص على رجالته فجاه الرجاله كلها تيجي تطلع السلاح زياد يسبق هو و كل الرجاله اللى واقفه
زياد / لا دا كدا الشيله تقلت اوى تحب تزود تهم تانيه
عمر يبص للرجاله و يرموا السلاح فى الارض فجاه البوكس ينفجر و الكل يتنطر على الارض و الناس تنزل من العربيات و تجرى على الناس اللى وقعت و عمر يقوم يجرى تجيله طلقه فى رجله توقعه زياد يقوم و الناس بتسنده يلاقةى مغاورى جاى يجرى من الناحيه التانيه و يشد عمر من قفاه يرميه تحت رجل زياد
مغاورى/ احنا فى خدمه الحكومه يا زياد باشا … سليمه ان شاء الله
زياد / سليمه يا مغاورى
مغاورى / استاذنك نفتح الطريق الناس دى بقالها كتير محبوسه و اكيد معاهم عيال صغيره
زياد / افتح الطريق يا ابنى
العربيات تعدى و فاطمه عينها على مغاورى لحد ما تعديه
…………………..
فى سرايا الزنايته
انتصار قاعده بتتفرج على التليفزيون
المذيع / هذا و قد تم القبض على كامل افراد التنظيم و جارى التحقيق معهم
المذيعه / اللى انا مش فهماه ايه اللى يخلى حد ينتحل صفه ضباط امن ما دام الموضوع لا كان غرضه سرقه و لا اى حاجه بما انهم ما كانش فى فى حوزتهم اى حاجه
المذيع / الله اعلم بما ان العربيه انفجرت بس اكيد لما التحقيق يخلص هنعرف هم كانوا هناك بيعملوا ايه
المذيعه / اى كان اللى بيعملوا انتحال صفه ظباط شرطه دى فى حد ذاتها جريمه
المذيع / و مقاومه الاعتقال دى جريمه تانيه
مختار و ناصر و الرجاله يدخلوا انتصار تطفى و تقوم تجرى عليهم
انتصار / حمد الله على السلامه
مختار/ الله يسلمك امال هند فين
انتصار / جت تعبانه خالص يا حبه عيني قالت هتطالع تتشطف و تغير فتحت عليها لقيتها نايمه على السرير بهدومها صعبت عليا ما رضيتش اصحيها قولت لما تبقي انت تيجي تبقي تصحيها بقي
مختار يبتسم و يطلع فوق
امين يسنده
امين / اساعدك يا خالى
مختار / ما اتحرمش
انتصار / الحمد لله عدت على خير
ناصر / الحمد لله طمنيني عملوا ايه عند الدكتور
انتصار / اتفقوا معاه هيجي هنا يعملها العمليه و ياخد اللى عاوزه هيظبط مواعيده و يكلمهم
ناصر / يعني مفيش مشاكل الحمد لله
انتصار / البت زى الفل زى ما كل الدكاتره قالوا
ناصر / على خير الحمد لله هطلع انا كمان اريح شويه عشان رايح اقعد مع الحاج شاهين بعد العشا
انتصار / اجبلك لقمه
ناصر / تسلم ايدك مش جعان لما اجوع هقولك
ناصر يطلع فوق و انتصار تطلع وراه
………………….
فى اوضه هند
هند نايمه مختار يدخل بيتسند على عكاز يقفل الباب بالراحه و يقعد على اقرب كرسي يقلع الجزمه و يروح يقعد على السرير جنبها و ياخد حبايه من المسكن و يشرب شويه مايه و يقرب بالراحه و يحضن هند تفوق مفزوعه
مختار / ششششش انا انا جيت نامى ارتاحى
هند تقرب و تحضنه و تكمل نوم
مختار يبعد شعرها عن وشها و يبوس راسها
هند / الطريق كان طويل اوى كانه مش هيخلص
مختار / حمد الله على السلامه
هند / احنا تقريبا وقفنا فى كل الاستراحات اللى خلقها ربنا و بعدين فى الاخر الكمين و البوليس و
مختار / عملتى ايه عند الدكتور
هند / زى كل الدكاتره مفيش جديد بس ام عباده اتفقت معاه هيجي هنا يشوف المستوصف و الاجهزه عشان يعملى العمليه
مختار / تمام
هند / على فكره انا مش خارجه من البلد تانى مصر زحمه و خنقه و حاجه اخر استغفر الله العظيم
مختار / ههههههههههه يا شيخه اول مره تروحيها و لا ايه
هند / تصدق كانى كدا فعلا
هند تقوم تقعد
هند / كانى نسيت الشوارع و نسيت المبانى و دخان العربيات كان عيني ما عادتش شايفه غير الخضره و الشجر و النيل و الهوا النضيف حتى اللبس بقولك الطريق كان طويل جدا ان كان فى القطر و لا العربيه حتى الليل كان طويل جدا فى الشقه لحد الصبح
مختار / مش هتتكرر تانى حاضر
هند / دا غير بقي التوتر و كميه التعليمات
مختار / خلاص قولت مش هتتكرر تانى
هند / و لا لما القطر فاتنى انا كنت هموت حرفيا مش عارفه اعمل ايه بس بطه ايه اسد قلبي بطه دى يلاهوى قوم ايه فى ثانيه تسال واحد عن الموقف و تاخدنى و تجرى و تنقى العربيه و هاديه بصراحه عشره على عشره انا لو لوحدى كنت قعدت جنب اى حيطه اعيط لحد ما تيجي تاخدنى
مختار / مين دى انتى !!! طب قولى كلام تانى يمكن اصدقك
هند / والله … انت ما شوفتنيش انا حرفيا كنت بمشي و انا ساكته و مش فاهمه اى حاجه و ام عباده هى اللى كانت بتقولى اعمل ايه و ما اعملش ايه
مختار / الحمد لله عدى على خير
هند / احكيلى بقي عملت ايه من غيرى طبعا نمت و برطعت فى السرير دا كلو لوحدك
مختار / مين ده طب اسالي الكبير كدا لما دخل عليا فجاه فى نص الليل لقانى صاحى ازاى
هند / انا هقوم اعمل فنجانين قهوه و اج
مختار / قهوه ايه انا ما نمتش من امبارح انتى بس تعالى فى حضنى كدا و خلينا
هند / طب مش هتغير هدومك طيب هقوم اغير هدومى و ادخل الحمام و لا تحب تدخل انت الاول
مختار / لا خدى راحتك
هند تقوم تبوسه من خده و تدخل الحمام و هو مبتسم اول ما تدخل و تقفل الباب مختار يفتح الدرج و يبص على باب الحمام و يطلع الشاش و القطن و البيتادين و يقلع البنطلون بالراحه و باين عليه الوجع و يبدا يفك الشاش و هو بيتالم فجاه هند تطلع
هند / السخان مليان لو … ايه ده مالك
مختار / جرح بسيط
هند تروح تقعد جنبه
هند / دى من امبارح صح عشان كدا ما جيتش صح طب ما قولتليش ليه … حد تانى اتعور
مختار / دى حاجه بسيطه مش حاجه يعني بدليل انى سافرت النهرده اهو و ركبت طريق رايح جاى اهو
هند / فى تعاوير تانيه فى اى حته تاني
مختار / لا
هند ترفع قميصه و تدور
مختار / والله ما فى هكدب عليكي يعني هخبى عنك
هند/ طب اساعدك ازاى … بتوجعك ؟
مختار / عادى يعني بسيطه هغير عليها بس و يومين تلاته و تروح خالص
هند / يارب
هند تساعده و هى واضح عليها الزعل و التعاطف
هند / تمام كدا ؟
مختار / تسلم ايدك
هند / طب مش تشوف دكتور يبصلك عليها
مختار / مهو شافها امبارح و هو اللى كاتبلى الادويه دى
هند / تمام
هند تاخد الشاش و القطن القديم و ترميهم فى الزباله
هند / هجبلك بجامه تنام فيها
هند تفتح الدولاب و تطلع بنطلون تانى و تساعد مختار يلبسه
هند / انا بجد مضايقه اوى
مختار / مضايقه عشان الخربوش ده طب كنتى شوفى جوزك و هو بيجريهم قصاده زى الفراخ
هند / طب ادفيلك كبايه لبن
مختار / انام ممكن ؟
هند تهز راسها و تاخد هدومه تحطها فى الحمام و ترجع تطفى النور و تروح تنام فى حضنه مختار يقوم يقعد فجاه
هند / فى ايه
مختار / عاوز اعمل حاجه عيالى بس هموت عليها
هند / هههههههه ايه دى
مختار / ايدى النور
هند تقوم تقيد النور و تبصله و هو باصصلها بابتسامه خبث
…………………
فى فيلا فيرا
فيرا بتجرى على تريدميل رشيد يدخل
فيرا / هتكلمنى عن الولد
رشيد يفتح الموبايل و يوريها بوست على الفايس صوره مختار و هند جنب بعض
فيرا تنزل و تاخد الموبايل
فيرا / سالمه يا سلامه روحنا و جينا بالسلامه و لا عذاء للحاقدين ههههههههههه بيكلمك … ايه ده دى حفله بص بص عباده بيقوله ايه … العروسه للعريس و الجرى للمتاعيس بيكلمك برده ههههههههههه
فيرا تديله الموبايل
رشيد / قولتلك مش هتبقي سهله
فيرا / قولتلى خرجيها بره البلد و خرجتهالك قولى طلبت منى ايه و انا قصرت فيه طب دا انا جاذفت بكل حاجه عشان خاطرك خليتهم يضربوا مختار حصل و لا لا
رشيد / و انا ما قصرتش و كلو كان على يدك
فيرا / على العموم ما تقلقش ده مش هياثر على اللى بينا
رشيد / يعني ايه
فيرا / انتوا مش بتقولوا لو عاوز تخلص شغلك اعمله بنفسك انا هجيبها بنفسي ما تشغلش انت بالك
رشيد / هتعملى ايه يعني
فيرا / قولتلك ما تشغلش انت بالك
رشيد / ماشي اريح ايه المطلوب منى تانى عشان اخد الواد و اخلص
فيرا / وصلتنى معلومات ان الزنايته هيدخلو شغل كبير و دافعين فيه ملايين و طبعا انت عارف انهم هيحاربونى بالسلاح ده
رشيد / و المطلوب
فيرا / تفاصيل اكتر هيدخل منين معاد التسليم الحاجات البسيطه دى
رشيد / سهله
فيرا / رشيد … انا بزهق من الفشل و مش عشان بحبك هستحملك كتير ياريت ترجع ثقتى فيك لانها بدات تتهز
فيرا تسيب رشيد و تمشي رشيد يبص فى موبايله على صوره مختار و هند و يبتسم و يفتكر
////////////
رشيد قاعد على كبوت عربيه فى الصحراء و مختار بيولع نار
مختار / ما اعتمدش عليك فى حاجه ابدا و تنصفنى
رشيد / يا عم ما تولعها بالبيره
مختار يبصله و يرفع حاجبه
رشيد / انت مش عاوز سبرتوا للنار الجيش قالك اتصرف
مختار / دخلت الجيش انت اوى
رشيد / و انت يعنى اللى دخلته وسع وسع و لا هتولع فى سنتها دى
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات