رواية موعد مع الليث الفصل الثالث 3 بقلم منى مرزوق
رواية موعد مع الليث الجزء الثالث
رواية موعد مع الليث البارت الثالث
رواية موعد مع الليث الحلقة الثالثة
منى بصدمه : ليث!!
ليث : ايوه ياستي ليث
منى : ط… طب ازاي؟ انا شوفتك وانت بت…..
بيقاطعها ليث : ايوه انتي شوفتي اللي انا كنت عايزك تشوفيه مش اكتر
منى : يعني ايه؟ طب و الشيخ مهدي؟
ليث بضحكه عاليه : ههههههههههه شيخ؟ على اي اساس بقى؟ عشان الشويتين اللي عملهم قدامكم؟
منى : هو خلاك تحضر و كمان هو حرقك
ليث : خلاني احضر؟ لا يا حبيبتي انا كنت معاكي من اول ما نزلتي من البيت و كنت حاضر كده كده لكن انا ظهرت له عشان كنت عايزك تشوفي كل ده بنفسك
منى : مستحيل مش ممكن، ده قرأ قرٱن وانت…
ليث : منى انا ٱسف يعني هو انتي غبيه؟
منى : نعم! انت هتغلط؟
ليث : لا اصل شغلي دماغك شويه قومتي من النوم لاقيتيني ماسك المصحف و بقرأ قرٱن يبقى ايه؟
منى : ايه؟
ليث و هو بيحط ايده على وشه : يبقى انا مسلم يا منى، مش محتاجه يعني
منى : و عشان كده رجعت تاني و خرجت من النار؟
ليث : للتوضيح بس مكنش فيه نار اصلا وانا اللي عملت كده بس عشان تصدقي
منى : طب وانت بتعمل كل ده ليه؟ و ليه عايزني اصدق؟
ليث و هو بيقرب منها : عشان كنت عايز اشوف نظرة الحب و الخوف عليا اللي شوفتهم ف عينيكي
منى بتوتر بعد ما وشها احمر من الخجل : ا انت ايه اللي انت بتقوله ده؟ حب ايه و خوف ايه ؟
ليث بإبتسامه : مش هجادلك انا بس حبيت ٱجي اطمنك اني كويس واني مش هسيبك يا.. (بغمزه)معشوقتي
منى : معشوقتك؟
ليث : ههههههه انا همشي دلوقتي و هجيلك بكره يا ست البنات
منى سكتت و اكتفت بإنها هزت راسها بالموافقة
*بعد ما مشي ليث قعدت منى وهي بتكلم نفسها: هو انا سكتت و كنت هاديه ليه؟ اص… اصل هو قالي معشوقتي؟
بس طب وفيها ايه يعني ما هو زيه زي اي شاب عايز يشقط اي واحده، لكن شاب ايه ده واحد من الجن يعني دماغ تانيه، تؤ بس هما الرجاله واحد في كل حته يعني وبعدين انا شاغله بالي ليه انا هتخمد احسن
___________________________________________
منى : انا نازله يا ماما عشان الانترفيو
سميه : ماشي يا حبيبتي ربنا معاكي
منى : يا رب يا ست الكل، يلا سلام
___________________________________________
*في شركة كبيرة للإستيراد و التصدير*
منى : لو سمحتي انا كان عندي ميعاد انترفيو النهارده
السكرتيره : اه حضرتك اسمك منى؟
منى : ايوه
السكرتيره : تمام استاذ ابراهيم في انتظارك، اتفضلي
*بتدخل منى المكتب بتلاقي راجل باين عليه الوقار و شكله في الستينات من عمره*
ابراهيم بإبتسامه : اهلا وسهلا اتفضلي
منى : اهلا بحضرتك
ابراهيم : انتي اسمك منى مش كده
منى : ايوه يا افندم
ابراهيم : تمام،انا شوفت ال CV بتاعك يا منى و عجبني جدا و من الواضح فيه انك انسانه متعلمه و مثقفه و شغوفه للعمل
منى : ميرسي جدا يا افندم ده من ذوق حضرتك
ابراهيم : طب انتي عرفتي طبيعة شغلك في الشركة هتكون ايه؟
منى في سرها : يالهوي عليا، انت كمان هتقولي طبيعة شغل و هتطلع راجل بطال؟
ابراهيم : بتقولي حاجه؟
منى بتفوق : ها! لا لا مفيش معلش بس سرحت شويه
ابراهيم : طيب انا كنت بقولك انتي عرفتي طبيعة شغلك في الشركه هتكون ايه؟
منى : احم ايوه المفروض اني في السكرتارية، يعني بعمل لحضرتك جدول بالمواعيد و بستقبل العملاء و ادخلهم حسب دورهم
ابراهيم : لا و في حاجة كمان
منى بتبلع ريقها : خير هي ايه؟
ابراهيم : انتي مسئولة عن مراجعة و حفظ الملفات اللي بتدخل و اللي بتخرج من مكتبي
منى : يعني هو ده بس المطلوب مني
ابراهيم : ايوه يا ستي، تحبي تسألي عن حاجة؟
منى بفرحه : ايوه، انا هبدأ شغل من امتى
ابراهيم بإبتسامه : من بكره بإذن الله تيجي تستلمي شغلك
منى : تمام اووي، احم شكرا لحضرتك
ابراهيم : العفو، يلا اشوفك بكره بإذن الله
___________________________________________
منى : ماماا يا ماماااااااا
سميه : ايه يا بت في ايه؟ ايه الغاره دي؟
منى : باركيلي ياماما باركييلي
سميه بفرحه : جالك عريس
منى : يااا ربي هو مفيش في دماغك غير العرسان يا ماما، يا ستي الحياة فيها امور تانيه مهمه زي مثلا الوظيفه
سميه : لا متقولييش، اشتغلتي؟
منى بضحك و هي ماسكه ايد مامتها و بتلف بيها: ايوه يا ماما يا احلى ماما في كل الدنيا انا اشتغلت اخيرا الحمدلله
سميه : الحمدلله يا ربي، الف الف مبروك يا حبيبتي، ده انا النهارده لازم هعمل رز بلبن حلاوة الخبر الجميل ده
منى : ههههههههه ايوه كده دلعيني و يا سلام لو صينية مكرونه بالبشاميل عالغدا ياااه
سميه : لا اهدي ياختي مش كله ورا بعضه كده انتي ما صدقتي ولا ايه
منى : صراحه اه ، هو انا بشتغل كل يوم ولا ايه
سميه بإبتسامه : ماشي ياختي بكره بإذن الله هعملهالك
منى : تسلميلي يا رب يا سمسمه، يلا انا هدخل اريح شويه
___________________________________________
بتدخل منى اوضتها و بتقف بفرحه قدام المرايه وهي بتكلم نفسها : الحمدلله اخيرا يا ربي بقيت شخصية عامله و هبقى سترونج اندبندد وومن ادد الدنيا
*صوت ضحكه جنبها* قولي كيوت وومن قولي صغنن وومن بس مش سترونج خالص يا شيخه
منى و هي بتحط ايديها في وسطها : لا ياخويا سترونج و جدا كمان والدليل اهه قاعده بتكلم مع عفريت…احم سوري اقصد جن و مش خايفه ولا بصرخ ولا حاجة
ليث بإبتسامه و هو بيقرب منها : ده اعتبره قوه ولا…
منى : ولا ايه؟
ليث : احم ولا نقول مبروك عالوظيفه الجديده احسن دلوقتي
منى بفرحه : الله يبارك فيك
ليث : انا مبسوط عشانك طبعا لكن مبسوط اكتر عشان اخيرا اختارتي شركة مديرها محترم و مش بصباص ، اصلي مش معقول هفضل كل يوم والتاني اوقع نجفه فوق دماغ واحد شكل
منى : ايه؟! هو انت اللي وق…
بيقاطعها ليث : ايوه انا، هو معقول يعني كنت هشوف الحيوان ده وهو بيحاول يتهجم عليكي و هسكت
منى بصدمه : بس…. انا مش عارفه ارد اقول ايه انا حاسه اني مصدومه، حاسه كأني في فيلم
ليث : لا يا منى مش فيلم ده واقع وانتي لازم تتعودي عليه
منى : اتعود على ايه؟ على اني هكون سبب في اذى الناس حواليا؟
ليث : لا على اني هكون معاكي دايما عشان امنع اذى الناس اللي حواليكي
منى : بس انا مكنتش عايزه حد يتأذي بسببي ابدا
ليث : كان لازم يتأذي لانه كان عايز يأذيكي، بطلي بقى تكوني سلبيه و ساذجة يا منى
منى بغضب : انا سلبيه و ساذجة؟ لا بقى يا حبيبي انا عمري ما كنت كده، انا كل الموضوع اني بكره الاذى و مش بحب اضر اي انسان
ليث بيقرب منها و بيمسح بإيده على شعرها : انا ٱسف انا مكنش قصدي اضايقك، انا بس كل الحكايه خايف عليكي و مش عايزك تفترضي في الناس حسن النيه وبس
منى بتبلع ريقها : ماهو… ماهو دي شخصيتي يعني هعمل ايه في نفسي بقى
ليث : متعمليش حاجة… انا هاخد بالي منك
منى : ميرسي بس انا مش صغيره و اقدر ٱخد بالي من نفسي كويس
ليث : هههههههههههه طب يا ستي، نامي انتى بس دلوقتي عشان تصحي الصبح فايقه للشغل
منى : تمام معاك حق، يلا تصبح على خير
ليث بإبتسامه : و انتي من اهلي
*بيمشي ليث و بتفضل منى في سريرها بتفكر فيه و هي بتلمس شعرها وابتسامه عريضة مرسومه على وشها لحد ما بتروح في النوم*
___________________________________________
*تاني يوم في الشغل*
منى لنفسها : هو ده الشغل؟ هو ده اللي كنت دايخه عشانه؟ يا رب سامحني والله انا عيل صغير مكنتش اعرف اني هشيل الهم ده كله فوق راسي
– هههههههههه يااه للدرجه دي الشغل صعب؟
*بتبص منى جنبها على مصدر الصوت بتلاقي شاب تبارك الله زي القمر، طويل و جسمه زي ما قال الكتاب و عيونه خضرا و شعره بني*
– بتبلع منى ريقها و بترد : الش.. الشغل اه هو *بهيام* هو جميل اوي و *بتهز راسها عشان تفوق* احم اقصد ايوه هو صعب بس هنعمل ايه بقى اكل عيشنا يا كابتن
*بيضحك بصوت عالي* انتي اسمك ايه؟
منى : انا اسمي منى، وانت اسمك ايه بقى؟
– اسمي محمد
منى : عاشت الاسامي، بتشتغل ايه هنا بقى؟
محمد : مفيش يا ستي انا شغال ابن صاحب الشركه
منى بصدمه : ايه؟ اب.. ابنه؟ احم سوري والله يا استاذ محمد اللي ما يعرفك يجهلك
محمد : لا يا ستي محصلش حاجه وبعدين بلاش تكوني رسميه اوي كده، خليكي على طبيعتك.. بتبقي احلى
*بيمشي محمد و بتقعد منى متنحه شويه وبعدين بتقول لنفسها*: وبعدين بقى هو انا هلاقيها منين ولا منين بس، اللهم لا تحير مسلما يا رب
___________________________________________
منى : السلام عليكم يا سمسمه
سميه : وعليكم السلام يا حبيبتي، ها طمنيني عملتي ايه؟
منى : الحمدلله اكلت كل سندوتشاتي و حليت صح و الميس ادتني عشره على عشره و نجمه
سميه و هي بتقلع الشبشب اللي في رجليها : طب لما احدفك بيه دلوقتي هتتكلمي عِدِل؟
منى و هي بتضحك : خلاص يا سمسمه بنضحكو معاكي، يا ستي الحمدلله اليوم كان كويس بس انا اتنفخت نفخه محترمه والله
سميه : ياختي ما تتنفخي عشان تعرفي بكره ان شاءالله تشيلي مسئولية بيت و جوز و عيال
منى وهي بترفع حاجبها : ده على اساس اني هراجع ملفات لجوزي و هظبط جدول مواعيد لعيالي؟
سميه: اهه اي مسئولية و خلاص المهم تدربي
منى بتمثيل : ماشي يا مرات ابويا ماشي
سميه : اجري يلا يابت غيري هدومك و تعالي جهزي معايا السفره
منى : كمان؟ والله العظيم ده زولم *ظلم*
___________________________________________
منى : خلينا متفقين ان مفيش اتنين في البلد يعرفوا يعملوا صينية المكرونه بالبشاميل اللي بتعمليها يا حب
سميه : يا بت؟ يعني ايه رأيك بذمتك؟
منى : ياستي وربنا تحفه، اقوم اجيب المصحف احلف؟
سميه بسعاده : طيب انا هقوم اعمل شاي بقى
منى : لا بالهنا عليكي انتي لكن متعمليش حسابي عشان انا هموت و انام
سميه : طيب يا حبيبتي ادخلي انتي ريحي
منى و هي بتبوس ايد مامتها : تصبحي على خير يا ست الكل يا قشطايه
سميه : هههههههههههه وانتي من اهله يا بكاشه
___________________________________________
منى : اه يا عضمك يا رضا، والله انا كنت حاسه ان الست ملهاش الا بيتها و جوزها بردو بلا شغل بلا وجع قلب
*بتبص منى حواليها و بعدين بتبتسم و هي بتقول* :
ولا انت ايه رأيك يا استاذ ليث؟…. تؤ هو في ايه؟ ايه الصمت ده لا مش عوايدك دي انا كده اقلق عليك
ليث : لا يا شيخه، تقلقي عليا انا؟ ليه هو انتي فاضيه ليا ولا لأي حد اصلا؟
منى بإستغراب : يعني ايه؟
ليث : يعني مستر محمد ابن المدير كفايه عليكي
منى : اااااه هههههههههه يا جدع حرام عليك ده راجل غلبان و محترم وبعدين انا يعني لما هحلم اكيد مش هحلم بإبن المدير، انا احلم بحد من توبي كده
ليث : ايوه زي ما حلمتي بيا كده مثلا
منى : يعني حاجة زي كده
ليث : طب الحمدلله ربنا يجعلنا عند حسن ظن سيادتك
منى : يوه وانت هتفضل ضارب بوز في وشي كده؟
ليث : تحبي امشي و اجيبلك استاذ محمد عشان بوزه احلى من بوزي؟
منى : هههههههههه لا لا كده كتير، انتي بتغيري يا بيضا
ليث : اغير من مين؟ من الواد ده؟
منى : ايوه من الواد ده
ليث بضحكه عاليه : معذوره، ما انتي اصلك متعرفيش مين ليث
منى و هي بتبص يمين و شمال : اممم خليني اخمن، انت واخد ملك جمال الجن السنه اللي فاتت؟
ليث : لا يا خفه، انا الفارس الاول لمملكة الجن
منى : ياه هو انتو لسه عندكم موضوع الفرسان و الاحصنه ده؟ يا راجل ده انتهى عندنا من ييجي 300 سنه
ليث : لا الفارس هنا مش مقصود بيه كده، كلمة فارس عندنا ترجمتها محارب عندكم
منى : اووه واو يعني انت ظابط جيش يعني؟ ايوه ياعم ومش بعيد كمان ابوك يكون لواء عندكم
ليث : هههههههههه لا هو حاجة شبه كده شويه
منى : ايه وكيل وزارة؟
ليث : لا زعيم القبيلة
منى : انا قولت من الاول ان شكلك ابن ناس كده و متربي
ليث : شكرا الله يكرم اصلك
منى : طب بقولك ايه يا رب ابوك يحج
ليث : هممم عايزه ايه قولي
منى : مينفعش تجبيلي كارت توصيه من عندكم عشان يرقوني في ام الشركه اللي اشتغلت فيها دي؟
ليث : يرقوكي من تاني يوم شغل ليكي؟
منى : اه انشالله يباركلك عشان انا ضهري اتقطم من الشغل النهارده
ليث : كان على عيني والله بس احنا معندناش الواسطه و الكلام ده، وبعدين ما كله يهون عشان عيون استاذ محمد
منى : ياختاااااي ياعم والله انت كرهتني في الراجل من قبل ما اكمل اسبوع شغل معاه
ليث : احسن بردو
منى : طب خلاص مش هتكلم معاه تاني ولو هو جه يكلمني هرد عليه ب الاشاره يمكن ميفهمش
ليث :…..
منى : طب، طب انا اعمل ايه طيب؟
ليث : لو متعرفيش يبقى ممكن انا اللي اعمل
منى : لاااا اوعى يا ليث تعمله حاجه وحياتي عندك
ليث : للدرجه دي خايفه عليه؟
منى : يا ليث هو معملش حاجه هو مجرد واحد طيب و محترم و……و قمر و حلويات
ليث : ولما اجيبك من شعرك دلوقتي؟
منى : هههههههههه بهزر معاك يولا
*بيقرب منها ليث و بيبص في عينيها* و بيقول : قوليلي اعمل فيكي ايه؟ احميكي من عيونهم ازاي؟
*بترفع منى كتافها بمعنى مش عارفه*
ليث : ياريت كنت اقدر اخبيكي جوه قلبي عشان محدش يشوفك ولا يشم شذاكي غيري
*منى وهي هيمانه في كلامه و عينيه* : للدرجة دي؟!
ليث : واكتر من الدرجة دي بكتير، انتي مش عارفه يعني ايه يعشقك جن و انا مش اي جن.. انا الليث
منى : على ادد ما الجملة مخيفه على ادد ماهي حلوه
ليث بإبتسامه : انا مش عايزك تخافي من حاجه طول ما انا معاكي يا منى *و لأول مره مسك ايديها*
ساعتها منى حست كأن جسمها كله اتكهرب او زي اللي اخد مخدر، معملتش اي حاجه غير انها ابتسمت و فضلت بصه في عينيه و بعدها اتكلمت : هو انا ممكن اطلب منك طلب؟
ليث : اؤمريني
منى : هو انت ينفع تفضل موجود لحد ما انام
ليث بيبلع ريقه و بيرد بفرحه : اكيد جداا
*بتروح منى لسريرها عشان تنام و بيقعد ليث على طرف السرير جنبها و هو ماسك ايدها لحد ما بتروح ف النوم*
___________________________________________
منى : يا صباح الفل و العسل و الشهد المكرر على عيونك يا احلى سمسمه في كوكب الارض و الكواكب المجاوره
سميه : ده ايه ده؟ انتي كويسه يا بت ولا انتي سخنه ولا فيكي ايه؟
منى : مفيش حاجه والله انا تمام جدا
سميه : اومال ايه طقم التثبيت اللي نزلتي بيه عليا عالصبح ده؟
منى : يوه بدلعك يا ست الكل بتغزل في جمالك يا وحش الكون
سميه : و ايه المناسبة ياختي؟ عايزه ايه؟
منى : تؤ تصدقي انا غلطانه يعني انا جايه اعبرلك عن حبي كده عالريق تقومي تتهميني بالاتهامات الصادمه دي؟ لا لا مكنش العشم ابدا والله
سميه : ششش خلاص ايه كل الرغي ده افصلي و يلا قومي اغسلي وشك و تعالي افطري عشان تلحقي تنزلي شغلك
منى : اااه ليه بتفكريني؟
سميه بتعوج بوقها : خير احنا لحقنا نندب من يوم واحد؟
منى : ماهو اصل الشغل كتير و انا كتكوت صغنطوت مش واخد عالشقا ده والله
سميه : ياختي انتي لسه شوفتي شقا اومال لما تتجوزي و تخلفي و يبقى في رقبتك دستة عيال و ابوهم هتعملي ايه ساعتها؟
منى : هو مبدئيا انا مش هخلف دستة عيال عشان مفيش حد في القرن الواحد و العشرين بيخلف 12 طفل، انا هخلف طفل او اتنين بالكتير، ثم اني معاكي في ان ولادي هيبقوا في رقبتي ده عادي لكن ابوهم هيبقى في رقبتي ليه؟ هو انا هتجوزه ولا هتبناه؟
سميه : لا يا قلب امك ده هيبقى اول عيل عندك من غير ما تخلفيه، كل الرجالة كده يا حبيبتي بكره تشوفي
منى : هممم واضح ان النقاش هيطول وانا مش حابه اترفد، انا احب استقيل بنفسي لكن اترفد لااا كرامتي الرقيقة مش هتتحمل والله
سميه : كرامتك؟! هي فين كرامتك دي؟
منى : اهيه اللي واقعه عالارض هناك دي
سميه : طب يلا يا رغايه اجري انجزي نفسك بقى عشان تفطري و تخفي من وشي
منى : اخفي؟! حاضر يا نبع الحنان، عينيا يا مرات ابويا
___________________________________________
ابراهيم : خلصتي مراجعة ملفات الشحنه الجديدة؟
منى : خلصتها يا افندم و عملت بيان لحضرتك بكل المبالغ الثانوية الخاصه بالشحن و التفريغ
ابراهيم : ماشاء الله، ده انتي طلعتي فعلا شاطره يا منى
منى : ربنا يخلي حضرتك يا افندم ده واجبي والله
ابراهيم : لااا انتي فعلا ابهرتيني مش بس بالسرعه اللي اتعلمتي بيها الشغل لا و كمان بإجتهادك فيه
منى : والله يا افندم كلام حضرتك ده شرف ليا
ابراهيم : طب خليكي كده على نفس مستواكي في الشغل عشان ان شاء الله ٱخر الشهر ليكي مكافأة كويسه
منى : انا بجد مش عارفه اقول ايه انا متشكرة لحضرتك جدا اوي والله
ابراهيم : طب يلا روحي كملي شغلك و ربنا يوفقك
منى : تمام يا افندم بعد اذن حضرتك
*بعد ما بتخرج منى من المكتب بيرن موبايلها*
منى : الو..ايوه يا ماما
سميه : ايوه يا حبيبتي، بقولك ايه
منى : قولي يا ماما
سميه : انا رايحه عند خالك دلوقتي و احتمال ابات عنده النهارده
منى : ليه؟ خير حصل حاجه؟
سميه : عيان اوي و كان عند الدكتور من شويه
منى : الف سلامه عليه، طب تستني يا ماما لما ارجع من الشغل و نروحله سوا؟
سميه : لا يا حبيبتي هما كده كده عارفين انك اشتغلتي وانك صعب تسيبي شغلك او تغيبي عنه، انتي اهم حاجه بس خلي بالك من نفسك و كلي كويس لحد ما ارجع
منى : حاضر يا حبيبتي بلاش تشغلي بالك انتي بس و ابقي طمنيني عليكي لما توصلي و قولي لخالو الف سلامه
سميه : الله يسلمك يا حبيبتي، يلا لا إله إلا الله
منى : سيدنا محمد رسول الله
___________________________________________
*في عالم ٱخر في مملكة الظلام*
وصطاف : يا جلالة الملك انا من واجبي اني ابلغ جلالتك بأي حاجه غلط او بتنتهك قوانين مملكتنا
الملك : يعني انت متأكد من اللي بتقوله ده؟
وصطاف : طبعا جلالتك و في شهود تانيين عالموضوع
الملك : استدعيلي ليث حالا
وصطاف : اوامر جلالتك
*بيخرج وصطاف من عند الملك*
ايسر : ها عملت ايه؟
وصطاف بإبتسامه : عيب عليك الملك استدعاه ييجيله دلوقتي
ايسر : بس لو انكر ممكن….
بيقاطعه وصطاف : ماهو اكيد هينكر لكن احنا الشهود
ايسر : فهمت
وصطاف : يلا انا هروح استدعيه زي ما طلب جلالة الملك
___________________________________________
ليث : تحت امر جلالتك
الملك : صحيح اللي عرفته ده يا ليث؟
ليث بإستغراب : هو ايه اللي عرفته يا مولاي؟
الملك : انك بتعشق واحده من بني البشر و عايز تجيبها لمملكتنا هنا
ليث : مين اللي قال كده؟
الملك : ده مش شغلك، المهم تجاوب على سؤالي
ليث بعد ما بص على وصطاف و ايسر : ايوه يا مولاي انا بحب انسيه من بني البشر، بس صدقني مكنتش هجيبها هنا غير لما تتم العهود و تبقى زوجتي
الملك : حتى لو هي رافضه؟
ليث : يعني ايه؟
الملك : يعني هي اصلا رافضه وجودك في حياتها و حواليها يبقى ازاي هتتجوزك؟
ليث : يا مولاي انا عارف ده لكن انا…..
بيقاطعه الملك : مفيش لكن، انت من النهارده هتفضل هنا مش هتخرج لعالم البشر ابدا لحد ما تعقل وتعرف ايه هي حدودك واللي متاح ليك او لا
ليث بسخط : امر جلالتك
*بيخرج ليث من عند الملك و بيشوف وسطاف و ايسر واقفين يبصوا له بإبتسامة كلها شماته فبيقرب عليهم ليث و بغضب*بيقولهم : انا مش عارف ايه غرضكم او نيتكم من ورا اللي انتو عملتوه ده لكن صدقوني هعرف و ساعتها هخليكم تندموا ندم عمركم
___________________________________________
منى : الو.. ايوه يا ماما عامله ايه؟
سميه : تمام الحمدلله يا حبيبتي انتي عامله ايه ؟ اتغديتي يا منى؟ خلي بالك اوعي تنسي تقفلي الباب بالمفتاح قبل ما تنامي
منى : ايه كل ده يا ماما هههههه متخافيش يا حبيبتي انا كويسه و هقفل الباب بالمفتاح و القفل كمان ياستي
سميه : ايوه شاطره عشان اكون مطمنه عليكي
منى : طب طمنيني الاول خالو عامل ايه؟
سميه : الحمدلله يا حبيبتي بقى احسن كتير
منى : طب الحمدلله سلميلي عليه و على كل اللي عندك
سميه : الله يسلمك يوصل بإذن الله
منى : ماشي يا ست الكل يلا اسيبك انا بقى
سميه : ماشي يا حبيبتي يلا تصبحي على خير، سلام
منى : وانتي من اهله، سلام
*بعد ما بتقفل منى الخط بتقوم تدخل الحمام تغسل وشها و اثناء ما كانت واقفه قدام المرايه لاحظت ان شكل وشها غريب ف افتكرت ان المرايه محتاجه تتنضف ف مسحتها و بصت تاني لقت لسه شكلها متغير زي ماهو و ابتدا شكلها يتغير اكتر و اكتر و هي في اللحظه دي ابتدت تحس برعب و ترجع بضهرها لورا، و اذ فجأة شكلها في المرايه اختفى تماما و اتكون مكانه كيان اسود مفيش ملامح ليه و فجأة الكيان ده صرخ صرخه شديده خلت منى بدورها تصرخ هي كمان و طلعت تجري بره الحمام و الشقه كلها و نزلت جري عالسلم و اثناء ما كانت نازله لاقت قدامها على درجات السلم نفس الكيان الاسود اللي شافته في المرايه بيظهر تاني والمره دي ملامحه ابتدت تظهر منها عيونه واللي كانت عباره عن شرطتين لونهم احمر و بوقه اللي كان ظاهر منه اسنان حاده مخيفه و بيبتسم لها ابتسامه مرعبه و كان حاطط صوباعه على بوقه في اشاره ل منى بالسكوت 🤫 و كان خارج منه صوت واحد وهو : شششششش*
صرخت منى بقوه اكبر و وقعت على السلم مغمى عليها
___________________________________________
– صحيح اللي عرفته ده يا ليث؟
ليث بتنهيدة : ايوه صحيح، ايه حضرتك كمان هتسمعني محاضره زي الملك؟
الياس : و دي ايه اللهجة الجديدة اللي بتكلمني بيها دي كمان؟
ليث : انا ٱسف مش قصدي انا بس…. *بيسكت ليث و بيبص بعيد بحزن*
الياس : انا فاهم يا ليث و حاسس بللي جواك فعلا لكن ده يا ابني شئ استحاله يحصل بكل المقاييس
ليث : ليه؟ ليه استحالة يحصل؟ ليه مينفعش علاقتنا بالبشر تكون اكتر من مس او عشق جسد و تلبية رغبات وخلاص
الياس : واحنا مش من القبائل اللي بتمس البشر و تعشق اجسادهم ولا نقدر نأذيهم لاننا مسلمين و ده حرام
ليث : وانا مش عاشق جسد ولا عمري اقدر افكر في اي اذى ليها، انا بحبها هي، بعشقها هي بكل ما فيها
الياس بتنهيده : وهي يا ليث؟ هي بتعشقك كده بردو؟ هي عايزه تسيب اهلها والعالم بتاعها و تيجي معاك هنا؟
ليث : انا متأكد ان قلبها في مشاعر ليا
الياس : في مشاعر حاجه وانها تقرر قرار زي ده فهو حاجه تانيه يا ليث، ده شئ لازم يكون نتيجة عشق حقيقي و ده مش سهل زي ما انت متخيل
ليث : لو خدت فرصتي معاها انا متأكد انه هيحصل
الياس بيغمض عينيه و بعدين بيرد : مش كل حاجه بتحصل زي ما بنتمناها يا ليث… ساعات بيكون عندنا امل كبير و اعتقاد ان اللي في خيالنا هيحصل لكن بنفوق في الٱخر على واقع مختلف تماما… واقع بيجرح و بيوجع
ليث : مش منى.. صدقني منى مش كده ابدا منى دي اقرب ما يكون للملايكه، انا عمري ما صادفت حد كده لا في الانس ولا في الجن
الياس بغضب : قولتلك بس بقى و كفايه تفكير في حاجات فارغه هتضيع عمرك فيها عالفاضي، محدش مختلف كلهم زي بعض منى زي وتين كلهم صنف واحد
ليث بإستغراب : وتين؟ مين وتين؟
الياس بعد ما فاق لنفسه رد ب تلعثم : اااا د…دي واحده من البشر كان ليها قصه بردو مع واحد من الجن و كان عايش في نفس الوهم اللي انت عايش فيه لحد ما فاق في يوم على اكبر صفعه اخدها في حياته
ليث : ازاي؟ ايه اللي حصل؟
الياس : مش مهم اللي حصل، المهم تعرف انه كان زيك بالظبط فاهم ان دي اللي كان بيدور عليها من سنين وان مفيش مخلوق في الكون هيسعد قلبه غيرها .. لان مفيش في الكون كله حد زيها، بس زي ما قولتلك الخيال غير الواقع وهي كانت الوجع اللي عاش بيه عمره كله ومقدرش يتخطاه
ليث : بس هو اكيد اختار الشخص الغلط وهي محبتوش فعلا لان اللي بيعشق مش بيشوف في كل الدنيا غير معشوقه وبس
الياس بحزن : معاك حق… هي عمرها ما عشقته ولا حبته بس للأسف هو فاق متأخر بعد ما بقت جزء منه و دمها و كيانها اختلط بدمه و نسله و كيانه
ليث : يعني ايه؟
الياس : يعني خلف منها
ليث : بجد؟ يعني تمموا العهود؟
الياس : لا الطفل جه لكن هي رفضت تتمم العهود و اعتبرت الطفل ده جزء منه لوحده و انها مش هتقدر تعيش بيه
ليث : يااه للدرجه دي؟ هو في ام ممكن تعمل كده؟
الياس وهو بيحرك راسه بالايجاب : ايوه في امهات بتعمل كده للأسف و الضحيه بيكون شخص عايش يتيم و امه عايشه على قيد الحياة
ليث : طب و هو و ابنه فين دلوقتي؟
الياس : هما.. هما هاجروا بعيد عن القبيله و اختفوا عن الانظار، هو محبش يعيش وسط قبيلته بالوجع ده
ليث : لو كنت قابلته كنت هقوله ان هو من اكتر المخلوقات اخلاصا و انها متستاهلش ابدا يتوجع عليها يوم وان ربنا اكيد هيجعل عوضه في ابنه
الياس بإبتسامه : هو فعلا ربنا عوضه بإبنه و خلاه يحس ان كل الوجع اللي مر بيه كان ولا حاجه مقابل انه يشوفه بيكبر قدامه و بيتحول ل شخص بيفتخر انه اب ليه
ليث : وانت عرفت ده منين؟
الياس : ها.. ماهو اصل انا قابلت شخص كان عايش معاه فتره في المكان اللي هاجر ليه و حكى لي
ليث : الحمدلله هو اكيد يستحق ده…. بس بردو يا بابا انا لسه عند موقفي و شايف ان منى لا يمكن تكون وتين و انها انسانه صافيه و قلبها جميل
الياس : يووه بقى بقولك ايه، الكلام خلص في الموضوع ده و اديك شوفت نتيجة عمايلك خلت الملك يمنعك عن زيارة عالم البشر كله، ف ياريت تعقل بقى و تشوف حياتك
*بيسيبه الياس و بيخرج*
ليث لنفسه : معاك حق… انا فعلا لازم اشوف حياتي
___________________________________________
بتفوق منى و بتعب بتقول : انا.. انا فين؟
سميه بدموع : انتي في البيت يا قلب امك، طمنيني عليكي حاسه ب ايه؟
منى : انا كويسه الحمدلله يا ماما بس.. بس هو ايه اللي حصل؟
سميه : الجيران يابنتي سمعوا صوت صرختك خرجوا لاقوكي مغمى عليكي
بتبدأ منى تفتكر اللي حصل و بتوتر بترد : ايوه افتكرت
سميه : افتكرتي ايه يا حبيبتي؟ ايه اللي حصل و كنتي بتصرخي ليه؟
منى : اصل.. اصلي شوفت فار عالسلم وانتي عارفه اني بترعب منهم
سميه : بقى فار يخليكي تصوتي لدرجة ان الجيران تتلم و كمان يغمى عليكي؟
منى : ااا.. اه اصله كان فار كبير وانا كنت لوحدي عالسلم ف يعني خوفت اوي بقى
سميه : طب الحمدلله يا حبيبتي انها جت على ادد كده عموما خليكي مرتاحه وانا هقوم اجهزلك الغدا
منى : ماشي يا ماما تسلميلي
بتبدأ منى تسرح وتكلم نفسها، طب هو ايه ومين اللي انا شوفته ده؟ و ليث… فين ليث؟
___________________________________________
وصطاف : ها طمني عملت ايه؟
عشتار بإبتسامة شر : جبتهالك ع الارض
وصطاف بفرحه : يعني اترعبت؟
عشتار : طبعاا و زمانها كرهت ليث و كل بني الجن
وصطاف : يبقى خلاص كده احنا وصلنا للمطلوب
– لا موصلتوش ولا عمركم هتوصلوا
عشتار بصدمه : ليث!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية موعد مع الليث)
