رواية مكاني في قلبك الفصل السابع 7 بقلم سولييه نصار
رواية مكاني في قلبك الجزء السابع
رواية مكاني في قلبك البارت السابع
رواية مكاني في قلبك الحلقة السابعة
الخاتمة(بوجودك كل شئ بخير)
-ايه شوفت عفر.يت ؟!
قالتها نيرمين بصوت بيبكي وهي بتمسح مناخيرها وكان باين عليها أن عندها زكام …
هز رائد رأسه وقال:
-اه أنتِ فعلا شكلك زي اللي طالع من فيلم رعب وشكلك زي العفاريت …
ضر.بته علي كتفه وقالت:
-عفر.يت أما يأكلك …لم نفسك يا رائد أنا مش ناقصاك …عايز ايه دلوقتي وليه جاي احنا مش فركشنا مع بعض خلاص بقا سيبني اشوف حياتي مع غيرك ….
-تقصدي مراد صح ؟!
فعلها بغيرة وهو بيقرب منها …هزت كتفها وقالت :
-احتمال …
اتغاظ وهو بيشدها ليه وقال بتملك:
-انتِ مش هتتجوزي غيري …ومش هتحبي غيري فاهمة ولا لا ؟!!؟
احمر وشها بغضب وقالت:
-ايه ايه اللي انت بتقوله ده ؟!هو أنا من ممتلكاتك!!!
ابتسم بشر وقال:
-ايوة انتِ ملكي وبس …
-انا لا ملكك ولا حاجة …انت خلاص سيبتني ولا نسيت …سيبني بقا اشوف حالي …
دفن ايده في شعرها وقال:
-أنا بحبك …
بهتت هي فكمل:
-معرفش ازاي اكتشفت ده …بس انا عرفت حاجة مهمة اني حبيتك من زمان …حبيت وجودك ..مرحك …بحبك وبحبك بكل حالاتك …بحبك لما تكوني فرحانة وبحبك لما تكوني زعلانة …لما تكوني هادية وبعشقك لما تكوني مجنو.نة ..لما جيت افكر في الإنسانة اللي هقضي معاها باقية حياتي …الإنسانة اللي بعد تلاتين سنة كده هنكون أنا وهي قاعدين علي البلكونة بتاعتنا بنشرب نيسكافية وبنتكلم …مشوفتش غيرك …أنا عايز اقضي بقية حياتي معاكي …عايز ابقي معاكي في وقت سعادتك وحزنك وعايزك تبقي معايا في وقت فرحي وانكسا.راتي …أنا عايزك يا نيرمين …
الدموع نزلت من عينيها وهي بتبصله بصدمة …كان صادق في كل كلمة قالها …
فجأة ركع علي رجله ومسك ايديها وقال:
-اعذريني انا نسيت الخاتم في البيت …بس هعرض عليكي الجواز دلوقتي وأنتِ هتقبلي والفرح بعد أسبوع اتفقنا ؟!
رفعت حاجبها وهي بتبصله وتفكر أنه شخص مغرور …
ابتسم رائد بثقة وقال:
-تقبلي تتجوزيني يا برينسس ؟!
-لا انت كروتني ايه عرض الجواز ده ؟!
قام رائد ورفع حاجبه اليمين وقال:
-انا كروتك؟!
هزت رأسها وهي بتربع ايديها وقالت:
-ايوة كروتني …انت جاي الفجر تطلب مني الجواز …وانت لابس الكروكس بتاعك الاسود والقميص البرتقالي اللي أنا بكر هه وانا شعري منكوش ولابسة بلوزة من بيجامة وبنطلون من بيجامة تانية خالص وعينيا حمرا بسبب العياط وعندي زكام ومناخيري بتنزل حاجات لا داعي لذكرها عشان متقر.فش ..
وبعدين حطت المنديل علي مناخيرها وبدأت تنف ..بصلها رائد بقر.ف فبعدين كملت وهي بتشاور علي نفسها:
-وعاملة زي اللي خارجة من فيلم ر.عب …بالله عليك لما نخلف بكرة نقول لأولادنا ايه ؟!!لا يا رائد مينفعنيش الكلام …أما تعرض عليا بطريقة رومانسية أو خلاص نفضها سيرة وكمان تقولي انك بتحبني ١٥٠مرة ..ده شرطي!!!
-ايه الاستغلا.ل ده ؟!أنتِ بتدلعي عشان بحبك يعني ولا ايه ؟!
هزت كتفها وقالت:
-حقي يا حبيبي ولا ايه ؟!
ابتسم وقال :
-طبعا حقك يا برينسس أنا هعملك عرض جواز ميترفضش أنا عندي كام برينسس …
-هي واحدة بس ومش هيكون فيه تاني !!
قالتها وهي بتبصله بتحدي فقال بإبتسامة :
-ولا حتي اقولها لبنتنا اللي هتيجي ..
-تؤ متقولهاش لغيري ..
-غريبة يعني مع انك مكنتيش بتحبيها …
ابتسمت بحب وقالت:
-دلوقتي عشقتها ..
هز رأسه وهو بيبصلها بحب وبعدين قرب منها وباس رأسها وقال:
-استعدي ليوم تكوني أنتِ فيه البرينسس الوحيدة ♡
وبعدين سابها ومشي …
قفلت نيرمين الباب وهي بتصرخ بسعادة وبتتنطنط زي الفشار وبتقول:
-بيحبني …بيحبني …بيحبني …
……….
تاني يوم ….
كانت نيرمين خلصت كل الحالات بتاعتنا وروحت …
كانت لسه هتطلع علي شقتها لما راجل أمن العمارة اداها صندوق كبير وقالها بإبتسامة:
-رائد بيه جه وسابلك ده هنا ..
ضحكت نيرمين واخدت منه الصندوق…رائد قدر يتصاحب علي رجل الأمن بسرعة لأن لو واحد غير رائد جه في نفس المواعيد الغريبة اللي بيجي فيها كان اكيد اتحـ.بس …بس رائد ليه طريقة تخليه يدخل اي مكان …
…
طلعت الشقة وفتحت الصندوق الكبير…شهقة كبيرة خرجت من شفايفها وهي بتأخد الفستان البنفسجي وبتتأمله بذهول…عيونها دمعت وهي بتفتكر ان ده كان فستان احلامها …بصت ولقيت علبة تانية قطيفة ..سندت الفستان علي السرير بلطف ومسكت العلبة وفتحتها …عيونها اتوسعت بصدمة وهي شايفة طقم فيه عقد فيه أربع الماسات بنفسجية وحلق …
بصت في الصندوق تاني لقيت شال فرو بنفسجي ومشبك شعر لونه بنفسجي برضه وصندل بكعب …وبعدين ورقة . مسكت الورقة اللي كانت من رائد وكاتب فيه…
-قولتيلي ان اللون البنفسجي …عشان كده هخلي اللون ده النهاردة مسيطر علي ليلتنا …وفي فستانك ده انتِ هتكوني البرينسس الوحيدة في قلبي …يالا يا برينسس اجهزي أنا مستنيك علي نار عشان اوريكي يعني ايه رائد الشناوي يحبك .
ضحكت نيرمين بسعادة وبعدين حطت علي حاجة علي السرير وقررت تأخد شاور وتبقي بأحلي هيئتها النهاردة….
……
بعد ساعة تقريبا ….
كانت بتحط اللمسات الأخيرة في مكياجها وبعدين مسكت العقد ولبسته …ولبست الحلق كمان ..رجعت شوية وبصت علي نفسها بذهول …حست فعلا انها أميرة خارجة من قصص ديزني ….الفستان كانت بحمالات ضيق من الخصر ونازل متدرج بطبقات وطبقاته متغطية بالنجوم …فضلت تلف حوالين نفسها بسعادة …هديت شوية ومسكت مشبك الشعر ولفت شعرها في تسريحة بسيطة لكن جميلة وبعدين اخدت الشال وغطت بيه كتفها وبصت علي نفسها برضا وبعدين خرجت وهي بتمشي براحة بسبب الكعب …
طلعت من العمارة ولقت سواق رائد واقف قدام العمارة وفاتح باب العربية راحت ناحية العربية وركبتها بهدوء …
……
بعد ربع ساعة تقريبا …
كان السواق وصلها مطعم كبير …نزلت هي من العربية فقالها السواق :
-رائد بيه مستنيكي جوا يا هانم …
ابتسمت هي وهزت رأسها وبعدين راحت ناحية المطعم…دخلت المطعم الكبير اللي كان ضلمة وكانت كل خطوة بتمشيها فيه نور بنفسجي. يظهر …ابتسمت بسعادة لحد ما الاضاءة بقت اقوي ولقت رائد واقف قدامها وجمبه ترابيزة كبيرة عليها ورود بلون البنفسج…بصت علي الأرضية ولقت ورود في كل مكان …مد رائد ايده فقربت منه وحطت ايديها في ايده شدها ناحيته وبدأ يرقص معاها واشتغلت أغنية أمير عيد
اتقابلنا مرة واحدة
وكل مرة بستنى صدفة حلوة تجمعنا
يمكن تطير الوحدة
مواضيع كتير حضرتها
وسيناريوهات من غير عدد
إزاي اقرب منه
وتشوفني يوم
ضهر و سند
أكون لها طبعا أمير
راجل خطير في الجدعنه
تهرب في حضني بالساعات
من ذكرياتها المحزنة
هاشوفها تاني ولا الوقت فات
خايف أحلامي تمو.ت من سكات
هاشوفها تاني ولا الوقت فات
خايف أحلامي تمو.ت من سكات
أكون لها طبعا أمير
كان بيغني وهو بيرقص معاها…خلصت الأغنية فركع علي رجله وطلع خاتم فيه ألماسة بنفسجي وقال:
-تسمحيلي أكون أميرك يا برينسس …تسمحيلي أحبك الباقي من عمري…وتحبيني الباقي من عمرك .
دموعها نزلت وضحكت وقالت:
-موافقة طبعا !!!
………..
بعد أسبوعين …
حفلة كبيرة في فيلا رائد …كل حاجة مثالية …اللون البنفسجي مسيطر علي المكان بطلب من رائد شخصيا …
كان رائد حاضن مراته اللي لابسة فستان فرح بسيط بس جميل زيها وواقف مع عمار ومراته …
-انا عايزة ازغرط النهاردة لمدة أسبوع لان أخيرا رائد اتجوز وهيحل عن جوزي شوية …
قالتها تمارا وهي بتضحك فضحك الكل وباس رائد رأس نيرمين وقال :
-لحسن الحظ خلاص أنا هسيب جوزك في حاله…
بص لنيرمين وكمل:
-أصل من كتر ما أنا بتصل بعمار وبطلب اني اشوفه تمارا شكت أننا متجوزين …
ضحك الكل بصوت عالي فقال عمار :
-تمارا مبتقولش علي رائد الا انه ضرتها …بس الحمدلله شاف حد تاني اهو وهيسيبني لمراتي …
ابتسمت نيرمين وحطت رأسها علي كتف رائد ..بصلها رائد وقال :
-فيه وعد لازم أحققه ليكي ..
بصتله بحيرة فبعد عنها وراح لبتاع الدي جي واخد المايك وطلب منه يشغل موسيقي معينة …قرب من نيرمين اللي قلبها بيدق جامد
مسك رائد ايديها وشدها ليه وهو بيحط ايد علي خصرها وايده التانية ماسك بيها المايك وبيغني وبيرقص معاها بهدوء …بيغني الاغنية اللي وعدها يغنيهالها قبل كده
أنا وهي عايشين في فيلم سيما
الصورة ريترو والألوان جميلة
متمردين ع الفاضي بدون قضية
بندوس بنزين جامد، جامد، جامد
عشان نهرب من الدنيا ديه
أنا وهي جينا في وقت غير الوقت
وعشان كده مقضينها سوى شد وخبط
بنهرب من نفسنا بنجري ولسه بنخاف
وفي حياة جوانا لسه معشنهاش
معاكي بنسى أنا مين
بحس إن أنا جيمس دين
عربية كابريوليه موديل ستين
وإيديكي مرفوعة في الهواء
وشعرك بيطير
……
انتهي الفرح …
وقفت نيرمين في نص الاوضة وهي متوترة …بتبتسم بكسوف بس التوتر جواها كبير …دخل رائد وكان غير هدومه ولقاها لسه بالفستان فقال:
-ليه مغيرتيش عشان نصلي..
اتوترت وقالت:
-انا ..أنا ..بصراحة أنا مكسوفة منك !!
رفع حواجبه وقال :
-مكسوفة وانتِ ؟!سبحانه مكنتش أعرف أن الكلمة دي في قاموسك …
وشها.أحمر من الغضب وقالت:
-قصدك ايه ؟!!قول يالا قصدك ايه !!ما حضرتك مش قادر تستوعب اني أول مرة اتجوز ..
ابتسم بحنان وقرب منها وقربها منه وقال:
-انا بهزر معاكي يا برينسس …
اخدها للبلكونة ووقفها ووقف وراها وهو بيحضنها وبيقول:
-مفيش داعي تتكسفي مني أنا مش مستعجل علي أي حاجة …يكفي أننا في بيت واحد مع بعض ..
كفاية أنك.ملكي..
-وانت ملكي صح ؟!
قالتها بلهفة.
باس خدها وقال :
-انا ملكك كمان .
فضلوا شوية كده ساكتين …كانت حاسة نيرمين بسعادة محستهاش قبل كده…بعدت فجأة وقالت:
-ممكن تساعدني اقلع الفستان عشان نصلي ..
ابتسم وقال :
-أكيد …
….
بعد نص ساعة كانوا خلصوا الصلاة ولبست نيرمين قميص ابيض عليه روب طويل وقعدت علي السرير وهي بتهز رجليها بتوتر ….ابتسم رائد وقرب منها وشبك ايده بإيديها وبعدين باس ايدها وقال:
-متخافيش يا برينسس .
وقرب منها بس فجأة تليفونه رن …مسك التليفون لقي انه عمار بيتصل
-خير يا عمار …
قالها رائد بحيرة وهو بيرد …فقال عمار :
-الحق يا رائد أنا في مصـ.يبة …
قام رائد بفز.ع وقال:
-عمار فيه ايه !!!
ضحك عمار وقال:
-صباع رجلي الصغير خبط في الباب …
غمض رائد عينيه فقال عمار:
-اومال انت فاكر هخليك تتهني في ليلة زي دي..
أنت ياما ضر.بت ليا ليالي يا باشا وكنت هتخر.ب بيتي …
قفل رائد السكة في وشه وقفل التليفون خالص وهو بيقول :
-ده انت عيل غلس ياض …
بص علي نيرمين اللي كانت بتضحك وابتسم وقرب منها بس فجأة سمع صفير تحت البلكونة….
خرج رائد وبص من البلكونة لقي عمار تحت البلكونة …ضحك عمار بإستفزاز وقال:
-بفكر اغنيلك حبيبتي افتحي شباكك أنا جيت انا واقف تحت البيت ..
-وانا بفكر ابلغ عنك البو.ليس وأكب عليك مائة …انت يا عم عايز مني ايه !!
-بهزر معاك يا حبيب قلبي …
-عمار لو نزلتلك هضر.بك فعلا روح لمراتك والا والله اضر.بلك صور فيك وانت حاضن واحدة وأديهم لمراتك تطين عيشتك ..
-وعلي ايه يا عم الطيب احسن ..أنا ماشي …ارفع راسنا بقا ..
-امشي انت بس ومتقلقش ..
ضحك عمار ومشي..فقال رائد:
-ده انت بارد …
دخل رائد الاوضة لقي نيرمين خرجت من الحمام ووشها احمر …
قربت منه وقالت:
-تعرف انت الضيوف الر.خمة اللي بتيجي من غير معاد دي يا رائد …
-زي عمار مثلا ايوه عارفها…
بصتله بتوتر وقالت:
-وانا جاتلي ضيفة ر.خمة …ظرف مكنتش اتوقعه …
فهم رائد أخيرا وقال:
-عمار ده بركة شكله …روحي نامي يا حبيبتي هي الليلة با.ظت خلاص ..نامي!!
……….
بعد شوية …
كانت نيرمين نايمة جمب رائد وهي ماسكه دراعه وقالت:
-حبيبي ..
-نعم …
بلعت ريقها وقالت:
-انا كد.بت عليك معنديش ظروف ولا حاجة أنا كنت بس مكسوفة منك.
بصلها رائد وقال:
-عارف …وقولتلك يا نيرمين مفيش داعي تتكسفي مني..أنا مش هعمل حاجة غصب عنك فاهمة …
ابتسمت ليه فابتسم وهو بيقرب منها…
……..
بعد سنتين …
كانت نيرمين نايمة علي السرير بتعب وشايفة جوزها بينوم مرام بنتهم …من أول ما ولدت التوأم من شهرين وهي فعلا تعبانة بس رائد بيساعد علي قد ما يقدر حتي انه جاب واحدة تساعدها وهو بيقسم الورديات معاها…رغم شغله وجلساته مع دكتور عادل اللي قلت خالص لانه شبه اتعافي الا انه بيساعد …بصراحة تيم كان هادي عن مرام يدوب يأخد رضعته وينام لكن مرام هي اللي مشاغبة لازم تسهرهم كده كل يوم …
كان رائد بيغني لمرام بصوت واطي لحد من البنت نامت …حطها في سريرها وبعدين غطاها وباس راسها وقرب من نيرمين اللي مدت ايديها …شدها رائد ليه وحضنها وقال وهو بيبوس رأسها:
-بحبك يا برينسس ♡
-وانا كمان بحبك يا رائد …بحبك اووي يا أميري ♡
غمضت نيرمين عينيها براحة …كانت دايما بتدور علي مكان ليها في قلب رائد بس دلوقتي هي متأكدة انها معاها قلبه كله …قلب رائد معاها هي وبس ♡
تمت
لقراءة الرواية كاملة اضغط على : (رواية مكاني في قلبك)
