رواية غدر وشقاء الفصل الثالث 3 بقلم محمود التركي

رواية غدر وشقاء البارت الثالث

رواية غدر وشقاء الجزء الثالث

رواية غدر وشقاء الحلقة الثالثة

وخبط على صاحب البيت لقيته بيقوله انت مش كنت عايز الشقه قاله اه ولسه عايزها قاله حضر فلوسك وانا هتنازلك عنها لما تبقى جاهز كلمنى ومشى
بعد ما مشى جريت على صاحب البيت قولتله انتى فعلا هتعمل اللى بيقولك عليه ده
لقيته بيقولى يا بنتى انا عارف انك مظلومه معاه بس انا كمان غصب عنى انا ابنى متبهدل فالايجار الجديد ومبيقدرش يدفعه لما تجينى فرصه زى دى عشان اريحه اضيعها مقدرش وانا هستنى عليكى لحد ما تلاقى مكان مش هرميكى فالشارع زى ما قالى بس دورى بسرعه عشان الحق اوضب الشقه انتى شايفه الشقه خرابه كل حاجه فيها عايزه تعديل سامحينى يا بنتى غصب عنى
سمعت الكلام ومشيت بس حمدت ربنا انى اشتريت بيت ابويا كان زمانى فعلا اترميت فالشارع انا وولادى وبعد اسبوع مشيت ورحت اقعدت فبيتنا من غير ما اوضبه لانى ممعايش واللى كان عندى من عفش سريرين ودولاب وبوتجاز وغساله عاديه والتلاجه كانت بايزه وبعناها لبتاع الروبابيكيا لانها مش نافعه
المهم اشتغلت على فلوس ايجار المحلات كنت بعيش بيهم انا والعيال وادفع الجمعيه اللى خلصت بيها اختى بس كانو ولادى محرومين من حاجات كتير اوى بس كنت بصبرهم واقولهم اهم حاجه تعلميكم عشان تبقى حياتكم احسن وعدى الوقت وولادى ياسين وياسر دخلو الثانويه وهما فى سنه تالته ويسرا كانت فى سنه اولى ثانوى مصاريفهم تقلت اوى واللى جاى على اد اللى رايح فيوم كنت نازله رايحه الشغل اتكعبلت على السلم ووقعت الحمد لله ما اتكسرتش بس ضهرى اتاذى والدكتور قالى لازم تنامى على ضهرك ومتعمليش حاجه وتعملى علاج طبيعى مايقلش عن شهر
طيب احنا هناكل ونشرب منين وفلوس الدروس العيال فالثانويه ودى سنه مهمه وانا بكلم نفسى بليل وبعيط ابنى ياسين سمعنى من غير ما يقولى راح لابوه المحل يحكيله على اللى حصل
بابا ادينا فلوس على الاقل على ما ماما ماتقدر ترجع تشتغل تانى شتمنى وزعقلى قدام الناس وطردنى
الولد من اللى عمله فيه خرج من المحل مسك طوب وقعد يكسر المحل خلى الناس تمسكه وضربوه واخده وداه القسم عشان يحبسه ابنى اتصل بيا من تليفون واحد غريب وقالى انى فالقسم جريت وانا تعبانه روحت للظابط عشان اسال على ابنى لقيته بيقولى مربيه بلطجى وحرامى رايح يسرق ويكسر كمان
قعدت اعيط وانا بقوله حضرتك ابنى كويس عمره ما مد ايده مضيعش مستقبله ابوس ايدك دا امتحانات الثانويه قربت
وبعدين دا ابوه هيسرق ابوه
لقيت الظابط استغرب أن اللى جابه ماقلش انه ابنه وسالنى انتم بينكم مشاكل حكتله انه سايبنا ميعرفش حاجه عننا من سنين ولا بيصرف علينا الظابط اتعاطف معايا وجابلى ابنى عشان اشوفه قلبى اتقطع على ابنى لما لقيته وشه ازرق من الضرب حضنته وانا مش قادره اقف على رجلى وقعت الناس فوقونى وجابولى مياه
الظابط جاب جوزى وبطريقته قدر يخليه يتنازل وميعملش محضر ومشينا بعد ماروحنا ابنى لقيته بيقولى انا مش هدخل الامتحان انا هشتغل عشان اصرف عليكى انتى واخواتى
قولتله يبقى هتموتنى يوم ماتعمل كده انا هموت لانك ضيعت شقايا كله على الارض انا عارفه انك اتذليت بس لو عملت كده هتفضل مذلول العمر كله لاكن لو اتعلمت وبقيت حاجه كبيره ابوك هو اللى هيتذل لانه هيحتاجلك فيوم من الايام وانت. كبير وساعتها اللى ورهولك هو هيشوفه وانتى كمان هتشوفه وهو مذلول
الحمد لله الولد اقتنع وعدينا المرحله دى على خير وانا استلفت فلوس على ما ارجع الشغل وعدينا الازمه دى بس لما رجعت الشغل لقيت نفسى مش زى الاول مش قادره اقعد على المكنه فبقيت اغيب كتير بسبب ضهرى وطبعا الدخل اقل كلمت صاحب المشغل وطلبت منه اخد منه عبايات بالاجل وابيع واسدد الراجل بصراحه وافق لانه انا معاه من سنين وعارف ظروفى وساعدنى كتير بدات ابيع العبايات والموضوع مشى معايا لدرجه انى فضيت محل وماليته بضاعه وقلت ابيع ومعدتش اروح المشغل لأن ضهرى معدتش بيستحمل
لقيت ياسين ابنى بيقولى هو انتى ليه ياماما لحد دلوقتى ما اطلقتيش من الراجل ده لحد دلوقتى
انا كنت خايفه اطلق ياخدكم منى وعشان كمان الفلوس اللى كان بيبعتها خفت يقطعها
ماهو قطعها من سنين
جروب روايات واتس بنات فقط https://chat.whatsapp.com/KZVkdpy5MBmFu0fpWyhA8Y
وانا ماعيش فلوس أجرى على محامين ومحاكم كنت بقول لنفسى انتم قولا بكل قرش وبعدين الطلاق الرسمى هيفدنى بايه اللى بتجرى على الطلاق دى عشان هتتجوز
بس لازم تطلقى منه
سمعت كلامه ورفعت قضيه طلاق
وولادى خلصو امتحانات ونجحو ياسين دخل هندسه معماريه وياسر دخل صيدله وهما ف أواخر السنه الاولى من الكليه اتحكملى بالطلاق للضرر واخدت حقوقى منه بس المحامى اخد نصهم لان ده كان اتفاقنا لانى ماكنتش قادره اديله أتعاب اكتر واحد فرح بموضوع الطلاق ياسين ويسرا
وفيوم وانا فالمحل لقيته داخل عليه
اول ماشفته اتخضيت قولتله امشى قبل ما اصوت والم عليك الدنيا قالى ماتخفيش مش هعملك حاجه انا جاى اشوف منين دا كله اللى انتى فيه ده
اشتريت البيت ومحل مليان بضاعه ياترى بتبيعى ايه كمان فالمحل غير العبايات
من طريقه كلامه فهمت انه بيقولى انى ماشيه شمال وفلوسى دى من الطريق ده
شتمته وقولتله انت انسان قذر عشان كده فاكر ان الناس كلها زيك انا نضيفه وبميت راجل من عينتك حافظت على نفسى وعلى عيالى ورغبتهم وكبرتهم وعلمتهم لوحدى واحد مهندس والتانى دكتور والبنت باذن الله هتدخل حاجه تشرف بس هيستعرو منك انت يابناع الكشرى
امشى من هنا قبل ماجد منهم يجى يمسح بكرامتك الارض
خرج وهو بيبصلى بصه غباء ويقولى الفلوس اللى اخدتيها بالمحكمه دى مش هسبهالك لها وقتها واخدك منك
ومشى وعدت الايام وولادى الاتنين اتخرجو وبنتى كمان اتخرجت من كليه التربيه وابنى عشان كان من المتفوقين فكليه الهندسه جاله عرض شغل من شركه محترمه يشتغل فيها اول ما اتخرج وفيوم جالى اتصال ان ياسين وقع فالشغل وهو فالمستشفى دلوقتى