رواية عشر خطوات للجحيم الفصل الثالث 3 بقلم روزان مصطفى
رواية عشر خطوات للجحيم الجزء الثالث
رواية عشر خطوات للجحيم البارت الثالث
رواية عشر خطوات للجحيم الحلقة الثالثة
صحيت تاني يوم ولقيت كام كوباية في الحوض مركونين ، خرجت علبة العصير من الثلاجة وأنا ببص على المواعين بطرف عيني كدا
لقيت نفسي بلبس المريلة وبقف على الحوض وبخلص المواعين
والدتي بتصحى في الوقت دا عشان تجهز الفطار لأبويا وليا
لقتني بخلص المواعين حسيت وشها نور كدا وورد وهي بتقول : الله ! دا حلم ولا علم يا ناس ؟ رشا بذات نفسها واقفة بتغسل المواعين ومش خايفة على إيديها ؟
قولت بملل : صباح الخير يا ماما
ماما بإنبهار : صباحك جميل ، إيه اللي غير أحوالك !
رشا بضيق : يعني لا كدا عاجب ولا كدا عاجب ؟
والدتها : خلاص خلاص ، أديكي بتعملي حاجة غير النوم والفرجة
خلصت المواعين لقيت إيدي رجعت حلوة زي الأول ، إتصدمت وخوفت طبعاً ومش فاهمة إيه اللي بيحصل
دخلت أوضتي وفضلت أشغل نفسي بكام حاجة لحد ما ييجي الليل وأشوف رد فعل الراجل على إني تنازلت وغسلت المواعين
نمت على نفسي وأنا مستنية ، صحيت على صوت خبطه على الإزاز كالعادة
قومت وشيلت اللحاف عن نفسي وأنا ببصله مستنياه يتكلم
قال فجأة بنبرته الغريبة : تعرفي يا رشا مشكلتك إيه ؟ بتحبي المدح أكتر من الناس اللي حواليكي ، عاوزة تباني الصح وكله يسقفلك وينبهر بأعمالك اللي هي واجبات من نفسك المفروض تعمليها
بدأ الغضب يتسلل ما بين لحمي وجلدي ، وقولتله : إنت عاوز إيه بالظبط ! عاتبتني على أمي وقفت غسلتلها المواعين
فضل واقف زي التمثال كعادته وفجأة قال : ما دا اللي بقوله ، أنتي مستنية مني كلمة حلوة على اللي عملتيه بعد كدا هورجع أمك توقف على رجليها تاني ، أنتي عملتيه عشان خايفة على شكل إيدك ، معملتيهوش عشان بتحبي أمك وتريحيها ، من جواكي مش كويسة وحقودة ومدلعة
كتفت إيدي وقولت بغيظ : يا سلااام !!! يعني إنت سيبت كل البشر دول وجاي تعاتبني أنا ! مش شايف غلطاتهم اللي أفظع مني بكتير
هو بتناحة : ليه متفكريش إنك محظوظة لقيتي حد ينبهك ويخليكي أحسن ؟ مش حاسة بأي تمييز إني بجيلك إنتي عشان أصفي السواد اللي جواكي ! شوفتي إنك بتحبي النفاق والكلام المتزوق مبتحبيش الحقيقة !
رشا بإستعاذة : أعوذ بالله من الشيطان الرجيم ، أعوذ بالله من الشيطان الرجيم
ضحك هو وقال : أقرأي سورة الكرسي هتحميكي
رشا بغضب : لما إنت مش شيطان هتاخدني للجحيم إزاي ! شوفت أنا وقعتك إزاي
هو بملل : إنتي فاكرة إن الشياطين بس هما اللي في الجحيم ! وفاكرة إني لو خدتك وسحبتك للجحيم هروح معاكي ؟ أنا في يوم من الأيام كنت بني أدم زيي زيك ، بعرفك أخطائك عشان لما جلدك يتحرق في جهنم تعرفي إيه وداكي هناك ، فاضلك ٨ خطوات للجحيم بعد ما إستهلكتي إتنين ، من حظك الحلو معملتيش شيء إنهاردة ، بس واثق أنك هتعملي قريب .. وخطواتك هتقل
بلعت ريقي وأنا ببصله ، كان بني أدم زيي في يوم من الأيام ؟؟؟ يعني هو ميت !!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية عشر خطوات للجحيم)
تعليق واحد