رواية صدفة أم قدر الفصل السابع 7 بقلم سمية عبدالسلام

رواية صدفة أم قدر الجزء السابع

رواية صدفة أم قدر البارت السابع

رواية صدفة أم قدر الحلقة السابعة

اردفت الفتاة بغضب _انا معرفش ازاي واحدة زيك يدخلوها جامعة محترمة زي دي ،انا هقول لدكتور رحيم وهخليه يفصلك.
ندى بعصبية _ومين سـي زفت ده كمان؟
_انا.
نظرت خلفها وتوسعت حدقتا عينيها لتقول بسرعة دون تفكير _خروف العيد؟!!
احمرت اعين رحيم وقال بغضب دفين _قدامي على مكتب العميد.
لكن تدخلت سلمى حينما رأت ندى وقالت _انا بعتذر لحضرتك و اوعدك انها مش هتتكرر تاني.
رحيم وهو يرمق ندى بغضب _لأ دي واحدة لسانها طويل ولازم تتعلم تحترم نفسها وتتكلم ازاي مع الدكاترة.
ندى بهمس _انا لساني طويل يا ابو طويلة.
ضربتها سلمى بخفة في معدتها وقالت بنفس الهمس _اخرسي هتترفدي ياموكوسة.
ندى _وايه يعني ولا يتهزلي شعرة.
اقترب رحيم من ندى وقال بهدوء مخيف _انا اسمي رحيم بس ما بارحمش حد.
ادار وجه لناحية الاخرى استعداداً للرحيل.
فقالت ندى بسخرية _ياعم اتنيل عملي فيها ياسر جلال.
التفت رحيم لها فـ توسعت اعين سلمى وبدأت بالسعال ونظرت له ببتسامة لم يقف رحيم كثيراً وذهب وتركهم.
سلمى بعصبية _ممكن افهم ايه اللي عملتيه ده؟
ندى ببرود _عملت ايه ،دي واحدة مش محترمة بتغلط فيا وفي خماري.
سلمى _اولاً كان ممكن تاخدي حقك منها بطريقة احسن من كده ،انتِ بنت ياندى يعني لازم تكوني هادية ورقيقة عن كده ،وصوتك ميعلاش بالطريقة دي .
قالت ندى بملل_ وثانياً.
سلمى _وثانياً اللي بتكلمي معاه من شوية ده وناقصة تردحيله ،دكتور في الجامعة يعني غصب عنك تحترميه.
ندى بضيق _حاضر،حاضر.
لين بتسائل _مجربتيش تبقي عاقلة شوية ياندى؟
ندى بجدية _جربت ،بس سألوني مالك متغيرة ليه؟
نظرت سلمى لـ لين وقالت _سيبك منها ،ازيك انا سلمى وانتِ؟
لين وهي تسلم بيدها _وانا لين.
سلمى _انتِ من القاهرة حاسة لهجتك مختلفة شوية؟
لين _لأ انا من الفيوم ونقلت ورقي الترم ده.
ابتسمت سلمى لتقول مزاحاً _اكيد شباب الفيوم هيمو”توا عليكِ.
خجلت لين فقالت ندى _ليه ياختي ،سرفيس خط 11.
نظرت سلمى لها بضيق وقالت _متزعليش منها ،هي دبش كده.
لين _لأ ما انا اتعودت خلاص.
ندى _معلش هقطع عليكم جو التضحية ده.
ثم نظرت لـ سلمى وقالت _بت يا سلمى انتِ شوفتي البنت اللي خبطها ادهم؟
سلمى _لأ لسه مرحتش.
ندى _هبقا اعدي عليكِ ونروح نشوفها.
سلمى _تمام.
:::::::::::::::::::::::::::::::::::
علا بضحك _ايه يابنتي من وقت ما لبستي الخمار وانتِ واقفة مبتسمة للمرايا زي الهبلة.
قدر وهي تنظر في المرآة _ شكلي حلو اوي في الخمار.
علا _بس باين عليكِ انك مش مختمرة عشان كنتِ لابسة طرحة.
ذهب قدر وجلست بجوراها وقالت _ايه الفرق ما ده حجاب وده حجاب؟!
علا _لا طبعاً،الحجاب الصح واللي امرنا بيه ربنا والرسول عليه افضل الصلاة والسلام هو الخمار ،الخمار ده حاجة جميلة اوي تحسي وانتِ ماشية انك ملكة.
قدر بتأييد _فعلاً.
علا _طيب يلا غيري و..
قاطعتها وقالت _اغير ليه انا عايزة افضل بالخمار.
علا _يابنتي هتفضلي لابساه الجو حر وكده كده البيت مفيهوش رجالة ،انا كنت جايبة اسدالات ليا انا والبت سلمى لسه جديدة،بس طلعت من نصيبك ،وممكن لما تخفي شوية نبقا ننزل واشتري اللبس ال يعجبك لو مش بتحبي تلبسي لبس حد.
ابتسمت لتقول بأمتنان _بجد مش عارفة اقول ايه ،انتم لو تعرفوني من زمان مش هتعملوا معايا كده.
علا وهي تضع يدها على كتف قدر _مش لازم نكون نعرفك من زمان ،في ناس بتدخل القلب من غير استأذان.
:::::::::::::::::::::::::::::::
_رايحة فين ياوردة؟
رفعت وردة يدها من على مقبض الباب والتفتت لوالدتها واردفت _رايحة اشم شوية هوا.
نجلاء _يابنتي انتِ دلوقت يعني…
_مطلقة،مش ده اللي عايزة تقوليه ياماما.
_يابنتي مقصدش بس…
لم تكمل كلامها لتقول ابنتها بحسرة _عارفة ،عارفة كل اللي هتقليه ،عارفة اني مينفعش اخرج زي الاول عشان مطلقة ،عارفة كمان لو لبست وخرجت هيقولوا ما صدقت اطلقت عشان تدور على حل شعرها ،عارفة كمان لو وقفت مع اي شب حتى لو كان ابن خالتي هيقولوا عايزة تتجوزه ،حتى صحابي بيبعدو عني عشان مطلقة.
واكملت بسخرية _خايفين اخطف منهم رجالتهم.
ذهبت نجلاء إلى ابنتها واخذتها في حضنها واجهشت وردة في البكاء لتقول امها بحنان _اللي حصل ده نصيب ،متحمليش نفسك فوق طاقتها ياحبيبي.
وردة وهي تبكي _كلام الناس بيجرح اوي ياماما.
:::::::::::::::::::::::::::::::::
_لو سمحتِ ياحجة عايزة اقعد هنا.
السيدة _يابنتي خليك عاقلة واقعدي هنا وخلاص.
ندى وهي نصف واقفة _عاقلة وكبيرة بس هقعد جمب الشباك بردو.
زفرت السيدة بضيق وقالت وهي تقوم من مكانها _سيبالك الميكروباص كله اشبعي بيه.
جلست ندى بسترخاء فهي من عشاق الجالسين بجوار النافذة ،تذكرت سلمى وهي تخبرها بأن لديها العديد من المحاضرات التي لم تنتهي بعد وطلبت منها الذهاب فاقت من شرودها عندما انتبهت لقدم احدهم تلامس قدمها فقالت ندى وهي تنظر للرجل _رجلك ياحج.
الرجل بستعطاف _ده انا اد ابوك يابنتي.
ندى بسخرية منه _يقطعني ،تعالى اقعد على حجري ياحج.
:::::::::::::::::::::’::::
زفرت بضيق والقت بهاتفها على الفراش سمعت طرق على باب غرفتها فقالت وهي تحاول ان تجعل نبرة صوتها طبيعية _ادخل يا بابا.
دلف والدها للداخل وجلس بجوارها ليقول _لسه مش بيرد عليكِ.
نرجس _لسه يا بابا ،انا مش عارفة بيعمل كده ليه؟
_عشان غلطتي يانرجس.
_ما انا بحاول اتصل بيه واكلمه بس هو مش بيرد.
_سبيه وهو لما يهدى هيكلمك هو لوحده ،هو بس واخد على خاطره من كلامك معاه المرة الاخيرة.
تنهدت فأكمل هو حديثه _علا كلمتني وقالت انكِ ما بترديش عليها.
اردفت بحزن_مش قادرة اكلم حد.
_علا صحبتك ردي عليها.
_حاضر لو رنت هبقا ارد.
_على العموم هي قالت ان البنات هتتجمع عندها عشان يشوفوا البنت ال خبطها ادهم بعربيته وبتقلك تعالي.
_وانت رأيك ايه؟
_روحي دي حتى زيارة المريض صدقة.
نرجس بضيق _ان شاء الله.
وقف والدها ليخرج وقال _ربنا يهديك يابنتي.
::::::::””:::::::::::::::::::::::::
كانت منشغلة في تقطيع السلطة _البنات هييجو وهعرفك عليهم وهنضمك للشلة.
ابتسمت قدر الجالسة تشاهدها _انا متشوقة اشوفهم من كلامك عنهم ،ندى وسلمى ونرجس.
سمع الاثنين رنين الجرس فقالت علا _لو مش هتعبك ياقدر افتحي الباب عشان ايدي مش فاضية؟
التقطت قدر جزرة وقالت وهي تقضمها _تعب ايه ما انا زي القرد اهو.
اتجهت لفتح الباب فـ كانت ترتدي اسدالاً واسعاً عليها نظراً لصغر حجمها وتضع على رأسها طرحته بأهمال وايضا مع فمها الممتلئ بالجزر فتحت الباب ووقف فمها عن مضغ الجزر وجحظت أعينها عندما رأته يقف بطلته الجذابة .
نظر لها ادهم قليلاً ولكن تفاجأ عندما اغلقت الباب في وجهه.
::::::::::::::::::::::::::::::::
_انا تعبت من اللف يامرات عمي.
قالتها ندى بتذمر لريهام .
ريهام بحزن مصطنع _خلاص ياندى طالما بتتعبي ابقا اجاي لوحدي.
ندى _مش قصدي بس حضرتك كلمتيني اول ما رجعت من الكلية حتى مغيرتش هدومي ،مش عارفة لازمته ايه اللي بنعمله ده؟
ريهام _لازمته الثواب اللي بناخده من كل شخص ادناله ازازة ميه يشربها في الحر ده ،الناس اللي في السوق دي ياندى بيبقا هيمو”توا على شوية ميه يبلوا ريقهم بيه وكده كده دي ازايز فاضية مش محتاجاهم.
ندى بضحك_ايوة بس انا محتاجة رجليا.
ريهام بضيق _امشي يابت.
ندى _انا خايفة عليكِ من الشمس عشان…
لم تكمل ندى جملتها حتى سقطت ريهام أرضاً.
ندى وهي تصرخ _خاالتي؟!!!
::::::::::::::::::::::::::::
_بتعملي ايه؟
نطقت بها هبة وهي تنظر للسرنجة بيد الممرضة الاخرى فـ اجابتها _هديها الحقنة.
اقتربت منها هبة وقالت _دي مضاد حيوي عملتِ اختبار حساسية الاول؟
اخفضت رأسها واجابتها بالنفي.
اخذتها هبة بعيداً عن المريضة كي لا تسمع حديثهما _يامس المضاد الحيوي،دلوقت بقا خطر ولازم اختبار حساسية عشان تخلي مسؤليتك من اي حاجة ،لان لو الشخص طلع عنده حساسية من المضادي الحيوي ده لقدر الله ممكن يؤدي للوفاة.
اجابتها بخجل _انا عارفة بس مش بعرف اعمل اختبار حساسية وكنت بديها من غيره ومش بيحصل حاجة.
ابتسمت هبة وقالت _عشان ربنا بيستر بس الامر ما يسلمش لابد من الاختبار وانا هعلمك تعالي ورايا.
قامت هبة بعمل الاختبار للسيدة وقالت للمريضة _اتفضلي استني برا ياحجة ربع ساعة وتعالي.
خرجت السيدة وقالت الممرضة _يعني احنا بناخد من الحقنة حوالي نصف سم ونديها تحت الجلد.
هبة بتأكيد _اه وبنديها بزاوية صفر يعني جسم الابرة يكون ملامس للجلد وبعد ما تحقني بنعمل دائرة بالقلم الجاف الازرق في مكان الحقن ونستنى ربع ساعة لو المكان احمر وورم يبقا عندها حساسية وماينفعش نديها.
ابتسمت الممرضة لتقول بأمتنان _شكراً ليك يامس هبة.
هبة _الشكر لله وحده ،ولو في اي حاجة عايزة تعرفيها تعالي اسألي ومتتكسفيش ،عشان دي حياة بني ادم يعني مش لعبة مينفعش فيها استهتار.
هزت رأسها حتى سمعوا صوت احدهم يقول _عايز دكتور بسرعة.
دقتت هبة النظر وجدته مراد ويحمل بين يديه سيدة خمنت انها ربما تكون والدته وثم انتبهت للفتاة معه وهي تبكي ،اقتربت هبة منهم وقالت _حطها هنا.
نظر مراد لها قليلاً وفعل كما قالت.
هبة للممرضة _روحي اندهي للدكتور.
ذهب مراد ناحية ندى واخذها في حضنه ليطمئنها _متخفيش ياحبيبي هتكون كويسة.
ندى ببكاء _كانت واقفة معايا ومعرفش ايه اللي حصل ولقتها وقعت من طولها ،معرفتش اعمل ايه مرضتش ارن على ادهم رنيت على سليم فونه مقفول ،رنيت عليك انت .
مراد وهي مازالت في حضنه _كويس انك مرنتيش على ادهم عشان منقلقهوش.
كل هذا تحت نظرات هبة التي بات على ملامحه الحزن وهي ترى مراد يحضن ندى فقالت بابتسامة تحاول رسمها _ هتبقى كويسة بأذن الله.
اخرج مراد ندى من حضنه وقال _روحي ياحبيبي اغسلي وشك وتعالي ،مش عايزين مرات عمي لما تفوق تشوفك كده.
هزت رأسها موافقة فقالت هبة _الحمام اخر الطرقة على ايدك اليمين.
:::::::::::::::::::::::::::::::
علا وهي تشعر بالحرج لما فعلته قدر _اتفضل يا ادهم.
كان يقف مكانه لم يتحرك وقال _خالتي موجودة؟
علا وبجوارها قدر التي تتحاشى النظر ل ادهم _لأ راحت السوق.
ادهم _طيب ممكن تجبيلي روشتة العلاج عشان اجيب الدوا لانسة قدر.
علا _حاضر ،دقيقة واحدة.
قدر بأحراج بعدما ذهبت علا _اتفضل ادخل.
ادهم بجدية _طالما خالتي مش موجودة مش هينفع ادخل.
اتت علا ومعها ورقة مدت يدها بها اخذها ادهم ثم قال وهو ينظر لقدر _في اختراع في الباب اسمه عين سحرية ممكن تبصي منها تشوفي مين بيخبط عشان مترزعيش الباب في وشي كده تاني.
ثم رحل وتركهم.
:::::::::::::::::::::::::::
مراد بقلق _طمني عليها يادكتور.
هبة وهي تحاول التقليل من قلقه _دكتور رحيم دكتور شاطر.
رحيم وهو يزيل سماعته الطبية بعدما قام بقياس العلامات الحيوية لها _ ضربة شمس ادت للاغماء وتقريباً مكلتش فـ ده ساعد على غيباها عن الوعي ،بس هي مريضة بأي حاجة؟
مراد _اه مرات عمي مريضة ضغط.
رحيم _هي هتخلص المحلول وهتفوق وانا كمان شوية هاجي اطمن عليها.
مراد _يعني مش محتاجة اوديها لدكتور برا؟
ابتسم رحيم وقال _مش عشان احنا في مستشفى حكومي يبقا معندناش ضمير ،انا بعامل ربنا في شغلي ولو حالتها محتاجة هقول لحضرتك يا…
مراد _مراد اسمي مراد المنشاوي.
ابتسم رحيم وقال _انا كتبتلها على شوية حقن هيظبطوا الضغط عندها شوية .
كانت تسير في الممر بعدما فعلت كما قال لها مراد واتجهت للغرفة ومدت يدها لتفتح الباب لكن فُتح الباب وارتطم برأسها لتقول بوجع _ما تحاسب ياحيو”ان.
رحيم بغضب _انتِ تاني ،يابنتي انتِ مكتوبالي في البخت ولا ايه؟
حملقت به ندى وقالت بضيق _هو انت؟! ،انت كمان جاي ورايا لحد هنا؟
رحيم وهو يستشيط غضباً _انا همشي عشان لو وقفت اكتر من كده هرتكب جنا”ية.
خرج رحيم و دلفت ندى سريعاً للداخل لتقول_ مرات عمي عامله ايه؟
هبة وهي تعدل من وضعيه الكانيولا _اطمني المحلول هيخلص وتفوق وتقدر تروح معاكم.
ندى وهي تتذكر شيء فقالت _انا حاسة اني شفتك قبل كده.
هبه بابتسامة _يمكن عشان عايشين في نفس الحاره مثلاً.
ندى بذهول _ ايه ده يعني احنا جيران وما نعرفش بعض؟!!
هبة _عشان الشغل واخد وقتي مش بيخليني اشوف حد او اتعرف على حد.
ندى بفرحة _واحنا فيها انا اسمي ندى وده مراد اخويا.
ابتسمت هبة وظهرت على ملامحها الفرحة وقالت مرددة _اخوك؟!
تنحنحت وقالت _وانا هبة.
ندى بمرح _ايوة المز ده اخويا ،عندك عروسة حلوة زيك كده ليه ؟
احمرت خدودها وقال مراد بخبث_ بس ممكن انسه هبة خطيبها يزعل.
رفعت هبة رأسها ونظرت له ثم قالت _عن اذنكم عندي شغل.
ندى _ياخسارة.
مراد بغيظ _خسارة ايه انتِ كمان ما تتلمي.
ندى بعصبية _مراد مش عشان اخويا الكبير هسكت لك يعني لا انا…
اقترب مراد منها وقال بهدوء _هتعملي ايه؟
ندى بسرعة _هروح انده للدكتور يطمنا على مرات عمي.
_ ما فيش داعي انا جيت بنفسي.
انتبهوا للصوت لم يكن سوى رحيم الذي قال_ حمد لله على سلامتك يا حجة.
ريهام وهي تفتح عينيها بتعب_ الله يسلمك يا ابني، انا فين؟
ذهب مراد اليها وجلس بجوارها على الفراش وخلفه ندى الواقفة بجانب رحيم _انتِ في المستشفى يا خالتي اغمى عليكِ.
ندى والدموع تجمعت بعينيها _كده يامرات عمي تخضينا عليكِ؟
ابتسمت ريهام وقال رحيم بهمس لندى _مكنتش اعرف ان البعيدة عندها دم وبتحس زينا لأ وكمان بتعيط.
ندى بصوت عالي _مراااد.
مراد بخضة _في ايه ياهبلة؟
ندى _مش مرات عمي بقة كويسة يلا نخرج من المستشفى دي.
:::::::::::::::::::::::::::::::::
_يا ابني انت جايبني شقة عمك ليه ما كنا نقعد في شقتكم تحت؟!
عمر وهو ينظر لغرفة سليم _ده على اساس اننا هنذاكر اوي.
ديشا بتعجب _امال جايبني و مشحطط امي معاك ليه؟!
عمر وهو ينظر لديشا _مش انت عايز تنتقم من الواد اللي حط في عينك شطة؟
ديشا بغضب_اشوفه بس وانا انفخ امه.
ضربه على رأسه وقال _ملكش دعوة بأمه ياروح امك.
ديشا وهو يضع يده على رأسه متألماً من ضربة عمر له _هو يقربلك؟
عمر _عارف سليم ابن عمي اللي بيرازيني في الرايحة والجاية اهو هو هو نفس الواد اللي حط شطة في عينك.
ديشا بصدمة _ابن ال…
عمر _المهم جبتلي اللي قلتلك عليه؟
ديشا بخبث _ما كنت تقول كده من الاول كنت جبت سِم فيران احسن .
عمر _لأ ياعم حد الله بيني وبيت القت”ل ،ده هي قرصة ودن صغيرة.
خرجت عايدة من المطبخ تحمل صينية عليها سندوتشات وضعتها امام عمر وديشا وقالت بترحاب _اتفضلوا بالهنا والشفا.
خرج سليم من غرفته وقال _ماما ممكن تعمليلي فنجان قهوة.
عايدة _حاضر.
واتجهت للمطبخ كاد يخطو لغرفته حتى اتسعت عينيه عندما رأه _انت بتعمل ايه هنا؟!
عمر وهو يحاول استفزازه _انه صديقي اتى من اجل الدراسة سوياً.
مسح وجهه بضيق وقال _اهو قناة سبيستون فتحت تاني ،توب عليا يارب.
ديشا _والنبي وانت بتدعي لنفسك كده انا ربنا يهديك ادعيلنا ننجح معاك.
سليم _تنجحوا ايه يا ابو ملحق انت وهو اهي دقني اهي لو فالحتوا .
ثم اكمل ببتسامة وهو يدخل غرفته _سلام يا تيشا قصدي ديچا لأ لأ باين كان فيشا.
وتعالت قهقهته في المكان نهض ديشا بغيظ فـ امسك به عمر وقال _اهدى على الرز لحد ما يستوي.
ديشا _طيب قولي على الخطة.
عمر _دلوقت مرات عمي بتعمله قهوة انا هدخل واحط فيها دوا الاسهال اللي انت جبته من غير ما تشوفني.
ديشا _بس كده؟
عمر _لا انت هتدخل الحمام في صابون سائل شفاف هتدلوقه على الارض اكيد هيدخل الحمام.
ابتسم ديشا وضرب كفه بكف عمر وهو يقول _اشطا عليك.
وبالفعل فعلوا كما خططوا لكن سمعوا صوت احمد وهو يقول _فين سليم؟
خرجت عايدة من المطبخ وبيدها القهوة وقالت _في اوضته انا عملاله القهوة دي يشربها.
اقترب احمد ومد يده ليأخذها وقال _هاتي عنك يامرات عمي انا هدخلهاله.
دخل احمد للغرفة فقال ديشا بصدمة لعمر _هو ممكن احمد يبقا طفس ويشرب القهوة بدل سليم ؟
عمر وهو يتمنى بداخله ان لا يحدث ذلك _ماعتقدش احمد ملوش في القهوة زي سليم.
::::::::::::::::::::::::::::
_ايه ده احمد بنفسه جيبلي القهوة لحد عندي؟!!
احمد بتذمر _انا لو عليا اجبلك سم هاري.
سليم بضحك _ليه بس كده يا ابو حميد؟
احمد _البت من وقت اللي حصل مخصماني.
سليم _ما هي عندها حق بردو يااحمد ،يعني تعرف انك بتعرف عليها بنات ومش عايزها تزعل؟
احمد بعصبية وصوت عالي _ولا انت هتستعبط مش دي مجايبك الهباب انا كنت اعرف شوشو ولا زفت.
ثم مد يده وقال _خد القهوة اطفح.
تذكر سلمى وهي تمد يدها له بتفاحة وتقول لها بأنها مفيدة وليست ضارة كالقهوة ابتسم واردف _لأ خلاص مش هشرب.
اخذ احمد يرتشف منها وهو يقول _عنك ما شربت ياخويا ،اهو اروق دمي اللي حرقته ده.
سليم وهو يبدل ثيابه _بس انت كنت جاي ليه؟
احمد _سيبك مني ،انت لابس كده ورايح فين،انت لسه راجع من الشركة.
سليم _رايح ال gym بشتغل مدرب هناك.
احمد بعدم تصديق _من امته؟!!
سليم وقد بدى على ملامحه الحزن _الفترة ال سبت فيها الشركة.
احمد بتسائل_وليه تشتغل اصلاً في ال gym وانت عندك شركتك انت و ادهم؟
سليم _عشان مكنتش هقدر ارجع اشتغل في الشركة وفي نفس الوقت مقدرش اقعد في البيت واخد مصروفي من ابويا.
واكمل حديثه _امال فاكر الفلوس اللي بجبها دي بجبها منين؟
احمد _بصراحة قلت بتجبهم من البنات اللي تعرفهم.
سليم بحزن _انا مش وحش لدرجادي ياحمد.
شعر احمد ان سليم حزن من كلامه فوضع كوب القهوة فارغاً بعدما شربه وذهب ليقف امامه ثم وصع يده على كتفه _متزعلش حقك عليا.
ابتسم سليم وقال _حصل خير.
احمد _اه.
فقال سليم _ادهم مجاش من الشركة؟
احمد وهو يضع يده على معدته_ااه.
سليم_ومراد تقريبًا لسه مجاش هو كمان؟
احمد بوجع _ااه
شعر سليم بأن هناك خطب ما فقال بقلق _مالك ياحمد انت تعبان؟
احمد _ااه.
سليم _مالك حاسس بأيه؟
احمد بوجع _بطني وعايز ادخل الحمام .
سليم _طيب اسند عليا ادخلك الحمام.
خرج سليم من الغرفة واحمد يستند عليه واتجهوا للمرحاض.
نظر ديشا لعمر وقال _اخوك طلع طفس ياعمر.
عمر _ياعم اتنيل واسكت.
لم يمر دقيقة حتى سمع صوت ارتطام قوي في المرحاض ،خرجت عايدة وهي تشعر بالفزع وقالت _في ايه ايه الصوت ده؟
عمر بخبث _ابداً ده سليم واحمد في الحمام.
عايدة _اه.
وتوسعت اعينها بصدمة وقالت _اييه؟
اتجه ثلاثتهم الي المرحاض وفتحت عايدة الباب على مصرعيه وحلت بها الصدمة عندما رأت احمد أرضاً وفوقه سليم.
عمر بسخرية_طيب كنتم اقفلوا الباب عليكم.
احمد بوجع _اه.
عايدة بعصبية _وبتقولها في وشي يا قليل الادب.
حاول سليم الوقوف ليقول _لأ ما هو اه بتاعته غير اه بتاعتنا.
نظر ديشا لعمر وارتسمت على ملامحه ابتسامة ماكرة وقال _بس مقلتليش ياسليم كنت عايزني اجبلك اختبار حمل ليه؟
عايدة وهي تضرب بيدها على صدرها _كمان اختبار حمل.
انصدم سليم وضيق عينيه ليقول _اه ياابن ال…
…لسه الحكاية مخلصتش…