رواية صاحب مفتاح الشقة 2 (العهد) الفصل السابع 7 بقلم عمرو راشد

رواية صاحب مفتاح الشقة 2 (العهد) الجزء السابع

رواية صاحب مفتاح الشقة 2 (العهد) البارت السابع

رواية صاحب مفتاح الشقة 2 (العهد) الحلقة السابعة

لما الحالة دي بتجيلك بتكوني حاسة ب ايه ساعتها؟
= مبكونش في الدنيا اصلا،، بحس نفسي في مكان بعيد ومش ببقا حاسة بأي حاجة بتحصل حواليا
امممم طب خلينا نكشف عليكي ونشوف عندك ايه
” كان في صندوق صغير موجود على المكتب اللي في الأوضة وباين عليه هو دا اللي موجود جواه الأدوات اللي هستخدمها،، روحت وفتحته وبدأت اشوف اللي جواه بس ساعتها نور اللمبة اللي في الأوضة بدأ يترعش بعدها سمعت صوت اجش جدا جاي من ورايا
عايز تفهمني انك مش عارفني يا أمجد،، على فكرة منال مراتك بتسلم عليك
” بصيت ورايا وشوفت البنت بس عنيها مش موجودة،، العين سودا بالكامل ووشها مليان تجاعيد،، كانت مبتسمة و باصة ليا،، انا كمان ابتسمت ليها وقولتلها
اهلا
= من اول ما البنت دخلت وانا حاسس بوجودك
المكان دا مش مكانك يا أمجد،، أتمنى انك ترحل دلوقتي
= انا جاي هنا في مهمة ولما اخلصها همشي
لو انت مخرجتش من البلد دي انت هتمو*ت هنا
= وانا معنديش أوامر بكدا
اوامرك هتاخدها مني انا
= اوامري باخدها من عزازيل اللي بالمناسبة لو عرف انك موجود هنا وبتحاول تمنعني هيزعل جدا
وانت عارف اني اتمردت عليه من بدري يعني خلاص الموضوع منتهي بالنسبالي
= انا ممكن اخليه يوافق انك ترجع تاني من تلاميذه بس تمشي دلوقتي
عرض مغري ولكن انا مش موافق،، انت اللي لازم تمشي يا أمجد،، الارض دي ملعونة ليوم الدين ولو انت كملت هنا هتتلعن ومفيش مخلوق هيلحقك
= اسمعني يا داحم،، صدقني انت مضطر توافق وبعدين حتى لو مش هتوافق،، انا مهمتي هنا هتخلص وبعدها همشي وانت ساعتها اعمل اللي انت عايزه لكن دلوقتي انا محتاج اسيطر على البلد
وايه المقابل؟
= عزازيل يرضى عنك
هتعرف تعمل دا؟
= هجرب
وانا منتظر
= انا عايز اسيطر على البلد دي وعشان اعمل كدا لازم تخرج من البنت دي حالا
انا مش لوحدي يا أمجد،، في قبايل كتير موجودة معايا
= انا واثق يا داحم انك هتعرف تقنعهم ولو حتى لفترة مؤقتة لحد ما اخلص مهمتي
” ابتسملي وبعدها لقيت البنت فتحت بوقها وخرج منه دخان اسود و دخل في الحيطة بعدها البنت نامت على السرير بكل هدوء،، خدت نفس عميق قبل ما افتح باب الأوضة و ابتسم ل ابو البنت واقوله
الحمدلله بفضل ربنا عرفنا نسيطر عليها
= وهي الحالة دي من ايه يا دكتور؟
بنتك يا..
= اسمي مسعود يا دكتور
بنتك يا مسعود كان فيها مس شيطاني والعياذ بالله
= يا ساتر يارب،، أعوذ بالله و دا من ايه يا دكتور وازاي انت عرفت؟
انا عرفت بفضل الله يا مسعود،، ربنا اللي ألهمني القدرة اني اعرف حالتها واعالجها
= يعني هي دلوقتي بقت كويسة؟
هي كويسة متقلقش بس ياريت بعد كدا تحصن نفسك وبيتك بالقرآن الكريم وخصوصا سورة البقرة هتفرق معاك جدا
= ربنا يخليك يا دكتور،، ربنا يباركلك،، ربنا يعمر بيتك
متشكرنيش،، اشكر ربنا،، احنا كلنا اسباب بس الشفاء من عنده هو وحده
= ونعم بالله،، طب هي هتفوق امتى؟
حالا،، وبعد ما نطمن عليها هتاخدها وتمشي
” لما دخلنا ابوها كان بيحاول يصحيها لحد ما فاقت معاه وكان باين عليها التعب بشكل كبير وكانت ممتنعة عن الكلام كأنها لسة نايمة،، بعدها هو سندها ومشيو وانا وقفلت وراهم الباب و دخلت اوضتي،، لكن النور قطع فجأه و شوفت نفس الكيان تاني
ما امرك يا ابن العطار؟
= داحم موجود هنا
انسى امره تماما وانا هتولى الأمر معه
= اتمنى ذلك لكي اعرف استغل هذه الدعوة أفضل استغلال
المهمة بسيطة ولكن لا تنخدع بها،، إياك والغرور يا ابن العطار
= الغرور صفة بداخلي بالفعل ولكني أحاول
منتظر النتيجة
” الكيان اختفى والنور رجع تاني وساعتها نمت على السرير لإني كنت تعبان جدا ومحتاج استريح،، صحيت الساعة 10 الصبح على صوت حد بيخبط على باب العيادة،، قومت وفتحت الباب ولقيته شخص من اهل البلد
انت الدكتور الجديد؟
” خدت نفس عميق وابتسمت لان دي انسب طريقة هعرف امنع غضبي بيها من سؤاله الغبي
ايوا انا الدكتور الجديد؟
= انت اللي عالجت بنت مسعود بقا؟
هو حضرتك من الشرطة؟
= لا انا بس بستفسر عادي،، اصل مسعود راح ل اكتر من دكتور ومفيش حد فيهم كان عارف حالتها ايه
و الحل جه من عند ربنا،، ايه اعتراضك؟
= طريقة كلامك بتقول انك من مصر
مظبوط
= انت اسمك أمجد صح؟
صح،، مين حضرتك بقا؟
= انا عمدة البلد هنا وكنت جاي اشوف الدكتور اللي جالنا جديد واطمن عليه بنفسي
اهلا وسهلا،، تشرفنا
= لو احتاجت اي حاجة أنا موجود،، تعالى في اي وقت
ربنا يخليك والله شكرا
= ويخليك يا دكتور أمجد
” طريقة كلامه تبين ان في شك من ناحيته ولكن انا لازم اتعامل معاه بطبيعتي عشان ميحسش بحاجة،، من اكتر الحاجات اللي ممكن تكشفك من خوفك،، لما يكون اللي قدامك بيتكلم معاك بحذر وشك لازم تتصرف عادي جدا وبشكل طبيعي جدا جدا،، خلي بالك حتى طريقة كلامك بتكون واضحة جدا في التوقيت دا،، حتى عنيك بيكون الكدب باين فيها،، اذا ف انت لازم تركز في عين اللي بيكلمك كويس جدا لان لو عينك راحت يمين او شمال هتزود احساسه بالشك من ناحيتك،، بعدها ب ساعتين جالي شخص تاني من البلد ودخل عشان اكشف عليه
قلبي واجعني أوي يا دكتور،، دايما بحس بنغزات فيه واول ما بصحى من النوم مبعرفش اتنفس كويس،، بحس اني بتخنق
= الحالة دي عندك بقالها قد ايه؟
تقريبا أسبوع
= بتشرب سجاير؟
دا اكيد يا دكتور،، هو أنا هعرف اعدي يومي من غير السيجارة
= طيب ايه رأيك لو قولتلك أن السيجارة دي هي اللي هتقضي عليك
ازاي؟
= الأعراض اللي انت بتقولها دي أعراض ضيق في الشريان التاجي،، الشريان الرئيسي المسؤول عن القلب وانت الله اكبر عليك بتشرب سجاير بشكل مفرط وطبعا الاكل بتاعك مفيهوش نظام يعني لو انت كملت بالنظام دا هيبقا قدامك 4 شهور بالظبط وتمو*ت
يا سنة سودا،، طب الحقني يا دكتور ابو*س ايدك،، انا تحت امرك وهعمل اللي هتقول عليه المهم اعيش
= هتمنع السجاير خالص وتاكل اكل صحي،، يعني خضار مع اي نوع بروتين و يستحسن يكون سمك عشان الكوليسترول يعني لو هتاكل لحمة أو فراخ يكون بكمية قليلة جدا
ومفيش علاج همشي عليه؟
= اعمل اللي انا قولت عليه وهتبقا كويس
انا مش دكتور و وممكن يكون كلامي دا كله ولكني بستخدم المنطق في حل مشاكلي دايما،، مفيش واحد يحب يمو*ت،، كل البشر بتحب الحياه وعايزة تعيش أطول وقت ممكن رغم أنهم ممكن يكونو بيعملو حاجات كتير ممكن تنهي حياتهم بسرعة زي ما الشخص دا بيعمل،، انا فعلا معرفوش لكن ريحة السجاير اللي كانت خارجة منه ومن هدومه كانت صعبة جدا و طبعا زي اي راجل بيحب ياكل اي حاجة حتى لو مضره،، ميعرفش يعني ضغط ولا سكر ولا كوليسترول وعشان كدا لازم توهمه بالمرض،، لازم تحسسه ان المو*ت قريب منه وساعتها هو هيبدأ يبعد تلقائي عن الحاجات اللي بتأذ*يه،، ممكن التعب اللي فيه ميكونش لسة خف بس اعراضه هتقل شوية لانها ساعتها هتشتغل بوضعها الطبيعي لكن مع السموم اللي بتدخل جسمك كدا انت بتزود سرعتها في الانتشار،، فضلت مكمل اليوم على هذا الحال لحد ما الساعة بقت 9 بليل وكنت خلاص بدأت اتعب من الناس اللي بتيجي وعشان كدا قررت اني اقفل العيادة لكن قبل ما اقفل لمحت العمدة وهو طالع على السلم ومعاه الحرس،، وقفت على الباب و رحبت بيه و بعدها هو طلب من الحرس انهم يستنوه برا
خير يا عمدة،، بتشتكي من ايه؟
= انا سليم و زي الفل مفيش فيا اي حاجة
طب الحمدلله اومال ايه سر الزيارة دي؟
= الكلام اللي هقوله دا هيكون سر بيني وبينك ليوم الدين،، مينفعش حد يعرف عنه حاجة
طبعا يا عمدة،، مفيش حد هيعرف أي حاجة
” كان باصصلي وهو متوتر وكأنه لسة بيفكر يقولي ولا لا و استمر الوضع على كدا لمدة دقيقتين وبعدها بدأ يتكلم
انا مراتي مش بعرف احس معاها اني متجوز يعني،، زي ما يكون في حاجز بيني وبينها
= مش فاهم،، لو ممكن توضحلي اكتر؟
مراتي باردة يا دكتور،، ساعات بحس انها مش عايزاني اصلا،، الموضوع عادي معاها،، فاهمني
= عندها برود يعني؟
مش برود بس،، انا بحس انها رافضة المسها اصلا،، بحسها بتتهرب مني لما بقربلها
= مش يمكن حضرتك متسرع شوية يعني اكيد انت فاهم انهم بيكونو محتاجين حنية شوية
عملت كل حاجة ومفيش فايدة،، مفيش حاجة بتجيب نتيجة
= طب جربت تاخد دش قبل ما تبدأ في اي حاجة،، تاخد دش حلو كدا و لو عندك برفان استعمله وجرب معاها
برفان ايه بس يا دكتور،، طب لعلمك انا عامل واحدة تركيبة من عند الواد صبحي ب 25 جنيه
= هي دي اللي انت حاططها دلوقتي؟
انت خدت بالك؟
= انا والله افتكرت ان المجاري ضر*بت برا
هي مش عاجباك ولا ايه؟،، دي ب 25 جنيه
= مش المهم تعجبني انا،، المهم تعجبها هي
هي المفروض أنها تقبلني بكل حالاتي،، انا من يوم ما اتجوزتها وانا كدا مفيش حاجة اتغيرت يبقا ايه اللي حصل ولا يكونش دا دلع منها
= هو الاكيد انه قله اهتمام منك،، جرب تاخد دش قبل ما تعمل حاجة واشتري برفان جديد وغالي،، أهم حاجة يكون غالي وشوف النتيجة بنفسك
ولو محصلش حاجة برضو؟
ساعتها هتجيلي و هقولك على حل هيجيب من الاخر
= طب ما تقولي عليه من دلوقتي
خلينا نعالج الاول الحاجات اللي موجودة دي عشان بعدها نتأكد ان العيب مش منك يا عمدة
= يا دكتور انا زي الفل،، الحريم هي اللي بتحب تتدلع زي ما انت عارف
انا عارف اكيد اه،، عموما جرب اللي قولتلك عليه و ان شاء الله خير
= ربنا يخليك يا دكتور
” بعد ما العمدة مشي من عندي قفلت وراه الباب و دخلت اوضتي بس اول ما دخلت حسيت بحركة غريبة في البيت و في نفس الوقت حسيت ب حاجة بتتحرك في ضهري وقبل ما التفت ليها لقيت ضر*بة قوية جدا نزلت على دماغي،، وقعت على الأرض ومحستش بأي حاجة،، معرفش عدا قد ايه بعدها لكني فوقت عشان الاقي نفسي مربوط وقدامي شخص باين عليه انه مجر*م او هربان من شئ،، قبل ما اتكلم نطق هو وقال
لو فتحت بوقك هقت*لك دلوقتي حالا!!