رواية صاحب مفتاح الشقة 2 (العهد) الفصل الثامن 8 بقلم عمرو راشد

رواية صاحب مفتاح الشقة 2 (العهد) الجزء الثامن

رواية صاحب مفتاح الشقة 2 (العهد) البارت الثامن

رواية صاحب مفتاح الشقة 2 (العهد) الحلقة الثامنة

لو فتحت بوقك هقت*لك دلوقتي حالا
= انا بقول انك تهدى وتقولي انت عايز ايه؟
عايزك تسكت خالص،، مش عايز اسمع صوتك
= انت هربان من حاجة؟
وانت مال اهلك،، متتكلمش في حاجة متخصكش
= انا ممكن اساعدك على فكرة
هو انا مش قولتلك اسكت،، انت مبتسمعش الكلام ليه؟
= شوية واهل البلد كلهم هيكونو قدام الباب وانت مش هتلحق تتصرف
ساعتها هاخدك رهن وانت اللي هتخرجني من هنا
= لو قولتلي اللي حصل بالظبط هساعدك واقف جنبك وهخليك تخرج من هنا
” كان متوتر و نظراته كلها شك بس من الواضح أنه مكنش عنده حل غير انه يحكيلي
انا نصبت على اهل البلد،، جمعت منهم فلوس على اساس يستثمروها معايا و هما دلوقتي عايزين فلوسهم
= وانت كنت عايز الفلوس تعمل بيها ايه؟
كنت هسافر،، انا اتفقت مع واحد يشوفلي فيزا عشان اسافر برا
= ومسافرتش ليه؟
الواد مكنش عارف يتصرف في الفيزا واتأخر عليا لحد ما الناس بدأت تسأل على فلوسها والارباح كمان
= طب ما ترجعلهم الفلوس وقول ان المشروع خسر
طب ما انا كدا هرجع على الحديدة من تاني ويبقا ولا عرفت اسافر ولا استفدت بالفلوس
= ماهو دلوقتي اهل البلد زمانهم قالبين عليك الدنيا وهيوصلولك في الاخر برضو،، انا من رأيي تسلمهم فلوسهم وتنجي نفسك
الفلوس دي مش هترجع،، انا ما صدقت بقت معايا،، عايزني اسيبها بالساهل كدا دا مستحيل
= وهتعمل ايه؟
مانا لو كنت عارف مكنتش جيت هنا،، انا جاي عشان عارف ان دا اخر مكان هيدورو فيه
= بس الموضوع مش هيطول يا..
سيد
= عاشت الاسامي يا سيد،، الموضوع مش هيطول يا سيد وكلها ساعة وهتلاقيهم هنا
و الحل؟
= تختار نفسك ولا الفلوس؟
اختار نفسي ازاي يعني؟
= يعني ايه الاهم بالنسبالك؟
الفلوس طبعا
= يبقا اسمعني،، انا هخرج برا دلوقتي وهزعق بأعلى صوتي وهقول اني لقيتك،، الناس هتجري عليا و هسلمك ليهم ولما يسألوك عن الفلوس قولهم انك خسرتها كلها في المشروع بتاعك،، طبعا هيعملو معاك الواجب و بعدها هياخدوك على القسم وهتتحبس شوية وهتخرج وتصرف الفلوس براحتك وتتمتع بيها
والمدة دي كلها الفلوس هتبقا فين؟
= معايا،، هتقولي على مكانها عشان احافظلك عليهم لحد ما تخرج
وانا ايه اللي يخليني اثق فيك؟
= عشان معندكش حل تاني
طب مانا ممكن اخرج من هنا و اركب عربية و اروح على اي بلد لحد ما اعرف اسافر
= دا اذا عرفت تسافر لان الناس لما هتبلغ عنك،، اسمك هينتشر في جميع السجلات ولو روحت المطار هتتمسك هناك،، أما لو روحت عن طريق البحر مضمنش انك توصل برا اساسا،، البحر خطر وممكن يبلعك انت والفلوس اللي معاك و ساعتها هتمو*ت على ذنب وذنب كبير كمان،، صدقني يا سيد انت لازم تسمع كلامي وكمان هعملك انا الباسبور عشان تسافر بعد ما تخرج من السجن،، كل حاجة هتكون جاهزة
و دا في مقابل ايه؟
= من غير مقابل خالص،، مش عايز منك حاجة
وهو في حد في الزمن دا هيعمل حاجة ببلاش؟
= انا جاي هنا ب امر من ربنا يا سيد،، انا جاي عشان احل مشاكل القرية دي كلها واللي انت واحد منها وخلي بالك أنا مباخدش فلوس كشف يعني انا مش محتاج من حد حاجة،، انا بقدم المساعدة لوجه الله
اخرج بس من اللي انا فيه وانا مش هنساك
= وانا مستنيك
طب يلا اطلع برا و نادي على الناس زي ما قولت
= طب مش هتفكني الاول؟
” قام وقف وقرب مني وفك الحبل اللي كنت مربوط بيه و بعدها قومت ومشيت ناحية الباب بس قبل ما افتح بصيتله وقولتله
لو حد ضر*بك قول الجملة دي ” العهد باقي ولن يزول “،، بعدها مش هتحس بحاجة
= زي الاسترو*كش كدا
بالظبط،، متنساش تقولها
” خرجت برا وبدأت انادي بأعلى صوتي على الناس لحد ما مجموعة كبيرة اتجمعت قدام الوحدة وكانو شبه الذئاب اللي مستنين الفريسة اللي هتجيلهم،، لكن انا ساعتها بدأت اشاورلهم بإيدي عشان يسكتو و اتكلم انا وفعلا صوتهم سكت
يا جماعة انا عارف ان سيد غلط بس دا مش معناه انكو تعاقبوه العقاب العني*ف دا،، سيد دا واحد منكو،، هو جالي وطلب مني اتدخل في الموضوع وانا هحكم بحق ربنا،، الراجل كانت نيته خير ومكنش يعرف ان مشروعه هيخسر،، عايزكم تسامحوه وانا عارف انه صعب عليكم عشان كل واحد فيكم دفع كل اللي حيلته بس انا عايزكم تتصرفو بالعقل،، انا هسلمكم سيد و بعدها تسلموه انتو للحكومة وهي تتصرف معاه
” بعدها سيد خرج ونزل وسطهم و اخدوه معاهم ومشيو،، وأنا دخلت وقفلت باب العيادة و نمت،، نمت وأنا عارف ايه اللي هيحصل مع سيد،، الرجالة بعد ما خدت سيد مش هيروحو بيه على قسم الشرطة،، هيروحو على الترعة وهناك هيضر*بوه الأول لحد ما يفقدوه وعيه و بعدها يرموه في الترعة و بعدها كل واحد يرجع بيته،، سيد كان يستاهل اللي حصله لانه طمع في اللي مش من حقه وهو استغل جهل اهل البلد وانا استغليت طمعه،، الناس اللي زي سيد دول اسهل ناس ممكن تلعب بيهم،، بشوية عقل و حكمة وكلمتين بالمنطق هتعرف تسيطر عليه وتخليه يعمل اللي انت عايزه بس المهم تبقا واعي وفاهم اللي هتقوله لانه هو طماع فعلا بس ذكي وممكن يكشف لعبتك،، صحيت تاني يوم بس المرادي ملقتش حالات وعشان كدا خرجت اتمشى شوية،، البلد كانت شوارعها شبه فاضية،، كنت مستغرب خصوصا ان الساعة لسة 11 الضهر،، كملت مشي لحد ما وصلت للترعة وهناك لقيت ناس كتير متجمعة،، قربت منهم عشان اشوف سيد وهو على الأرض وعنيه خارجة ل برا وهدومه متقطعة،، منظره كان صعب،، بعد شوية الاسعاف جات واخدته ومشيو،، والبوكس هو كمان اتحرك ومشي بعد ما طلب من العمده انه يعدي عليه مرة تانية عشان يكملو باقي التحقيقات،، انسحبت في هدوء من وسط الناس ولسة همشي سمعت صوت العمده وهو بينادي عليا
استنى يا دكتور
” وقفت وبصيت ورايا وابتسمت
صباح الخير يا عمده
= صباح الفل يا دكتور
البقاء لله
= ونعم بالله،، اهو ريح البلد من همه
انت مش زعلان عليه؟
” رد عليا وهو بيضحك
ازعل على سيد؟،، دا الواحد ما صدق انه خلص منه
= باين عليه كان شقي شوية
دا كان مصيبة،، نصاب وحرامي و شاهد زور،، متعدش يا دكتور
= تفتكر الموت رحمة لييه؟
وهو اللي زي سيد هيشوف رحمة؟،، دا هيولع في نار جهنم
= ربنا يرحمه
المهم انت يا دكتور الله اكبر عليك وعلى كلامك
= كلام ايه؟
كلامك بتاع امبارح،، كل تعليماتك جابت نتيجة
= ايه دا لحقت؟
انا يدوبك خدت دش ولقيت الموضوع اشتغل لوحده
= دا خبر كويس
بصراحة ربنا انا مش عارف اشكرك ازاي يا دكتور أمجد والله
= انا تحت امرك يا عمده
دا انا اللي تحت امرك،، اطلب مني اي طلب،، اطلب اللي انت عايزه
= لما هحتاج حاجة هقولك صدقني
اياك تحتاج حاجة وتروح تقول حد غريب
= لا طبعا مينفعش،، دا انت الكبير بتاعنا يا عمده،، ربنا يخليك لينا
” واحنا ماشيين عدينا على واحد كان قاعد مع مراته قدام باب بيتهم،، الاتنين عنيهم في نفس الاتجاه،، مبيردوش على حد ولا حتى بيلتفتو لأي بني آدم،، استغربت منهم جدا وعشان كدا سألت العمده اللي قالي
دا عم صالح ومراته الست سامية،، ناس غلبانة وعلى قد حالهم بس والله من غير ما اخبي عليك يا دكتور هما تعبانين
= عندهم ايه؟
لا اللي عندهم مش مرض،، ابنهم فاروق سافر من سنة على مركب ولحد دلوقتي مفيش اي اخبار عنه،، حتى انا حاولت اتواصل مع المركز هنا يمكن يكون عندهم معلومات أو يسألو في سفارة البلد اللي كان رايحها بس برضو مفيش نتيجة ومن ساعتها وهما قاعدين كدا قدام البيت مستنين ابنهم يرجع
= بس دا كدا من الواضح أنه ما*ت
الله أعلم بس احتمال كبير يكون اه
= طب سيبني أحاول انا
انت تعرف حد ممكن يوصله؟
= والله هجرب يا عمده و ربنا يسهل
دا انت تبقا رجعتهم للحياه من تاني والله
= هو سافر فين بالظبط؟
ايطاليا باين
= اممممم يبقا نسأل في ايطاليا
” يعني لو عرفو انه عايش ساعتها هقدر اتملك منهم ويبقو تحت سيطرتي،، وفي نفس الوقت لو قولت انه ما*ت هيمو*تو تاني يوم،، بس انا ممكن اعمل الاتنين عادي،، في اليوم رجعت الوحدة واتصلت ب شيرين
شيرين عايزك تساعديني في حالة انسانية،، برنامج تغيير صوت وتتكلمي معايا على اساس ان اسكن فاروق وانك سافرتي ايطاليا من سنة،، ابوكي اسمه صالح وأمك اسمها سامية،، عايز حالة من الحزن والدموع بس في نفس الوقت انا عايزهم يطمنو عليه،، لازم فاروق يبقا عايش كويس جدا ومرتاح
= حاضر كل اللي انت عايزه أنا هعمله بس هو انت مش ناوي تيجي؟
لما اخلص مهمتي هتلاقيني عندك يا شيرين،، اول ما هبعتلك رسالة تجهزي نفسك بسرعة عشان بعدها هفتح المكالمة
” بس هما اكيد هيبقو عارفين صوت فاروق،، بس في اللحظة دي هقولك لا وهما مش هياخدو بالهم ان صوته متغير لان المخ مش حاضر،، مجرد قلب بس هو اللي بيشتغل،، هما عايزين يصدقو انه عايش وبس بغض النظر عن صوته،، فاقد الامل دايما هتلاقيه بيثبت نظريات هو عمره ما اقتنع بيها بس المهم انها هتفيده وهترجعله الامل من تاني،، الساعة دقت 7 بليل وانا اتحركت من الوحده بعد ما كشفت على اخر واحد،، روحت على بيت عم صالح،، خبطت على بابه وبعد دقيقة بالظبط فتح وهو بينهج وبيقول
فاروق
” ابتسمت في وشه
لا انا مش فاروق،، انا دكتور أمجد
= فين فاروق؟
فاروق بيسلم عليك،، هو كويس متقلقش
” نظرة عين الراجل اتغيرت 180 درجة وبقا طاير من الفرحة،، دخل جوا ونادى على مراته
افرحي يا ام فاروق،، ابنك عايش وبخير
= انت بتتكلم بجد يا صالح؟،، فاروق كويس؟،، طب هو فين؟،، هو فين انا نفسي اشوفه
” تدخلت انا في الحوار ساعتها
للاسف مش هينفع تشوفيه إنما ممكن اخليكي تكلميه
= ابو*س ايدك يا ابني،، ابو*س ايدك انا نفسي اشوفه حتى لو دقيقة
والله يا امي مش هينفع اصل لما انا كلمته قالي انه في الشغل ومش هينفع يفتح الكاميرا عشان ميتخصمش منه بس المرة الجاية هخليكي تشوفيه اوعدك
= طب خليني اكلمه حتى
عشان خاطرك أنتي بس
” مسكت تليفوني وبعت رسالة ل شيرين
جاهزة؟
” ردت بعدها بثواني
جاهزة
= مش عايز اي غلط،، ركزي كويس
” و بعدها اتصلت ب شيرين و فتحت الاسبيكر
ازيك يا امي
= فاروق ازيك يا حبيبي،، عامل ايه،، وحشتني اوي يا فاروق،، كدا تغيب عن امك المدة دي كلها حرام عليك والله،، انا استاهل منك كدا يا فاروق
” الست بدأت تنهار من العياط و عم صالح هو اللي اخد مني التليفون وبدأ يتكلم
المهم انت كويس يا حبيبي،، أخبارك ايه؟
= انا الحمدلله يا ابويا كويس،، انا عايزكم تطمنو انا بخير والله
طب انت مش هترجع بقا يا فاروق؟،، انت وحشتنا يا ابني،، ارجع واقعد وسطنا احسن من الغربة اللي انت فيها دي
= في اقرب وقت يا ابويا هجيلك،، وخلي امي متزعلش مني
” الست مسحت دموعها وقامت تتكلم تاني
المهم ترجع بسرعة،، انا مستنياك وهفضل مستنياك لحد ما تيجي يا حبيبي
= في اقرب وقت يا امي
ربنا يرجعك لينا بالسلامة يا حبيبي،، ربنا يحفظك،، خلي بالك من نفسك كويس يا فاروق و اهتم بأكلك وبنفسك
= حاضر يا امي متقلقيش،، انا مضطر اقفل بقا عشان أنا في الشغل وهبقا اكلمك تاني قريب،، مع السلامة
” المكالمة فصلت وهما الاتنين بيعيطو،، ابتسمت ساعتها و خدت منهم التليفون
الحمدلله اننا اتطمنا عليه
” عم صالح رد عليا
ربنا يخليك يا دكتور،، ربنا ما يو*جع قلبك أبدا،، ربنا يجازيك كل خير
= انا تحت امرك يا والدي
” عملت اللي انا عايزه و ضر*بت اول مسمار و صدقو فعلا ان ابنهم عايش لاني لو كنت قولتلهم انه ما*ت كانو مش هيصدقو وهيرفضو كلامي،، وأنا عايزهم يصدقو،، عايزهم يكونو مقتنعين انه لسة عايش،، ولسة بعد فترة هبعتلهم فلوس كمان،، لازم يبقو متأكدين عشان ينفذو كل اللي انا عايزه،، رجعت الوحده من تاني وقررت انام عشان ارتاح بعد اليوم الشاق دا لكن قبل ما انام لقيت مكالمة من فاتن
ازيك يا فاتن
= انا كويسة
مال صوتك؟
= مش عارفة ماله،، قولي انت
اقول ازاي؟ وانا هعرف منين؟
= لا ازاي دا انت لازم تعرف،، هو انت مش مولانا ولا ايه؟
في ايه يا فاتن؟
= هو انت متجوز يا أمجد؟
مين قالك الكلام دا؟
= مش مهم مين قالي،، انا عايزة اعرف دلوقتي الكلام دا صح ولا لا؟
كنت متجوز
= يعني انت حاليا مش متجوز؟
لا،، انا كنت متجوز واحدة كا*فرة،، رفضت تؤمن بيا واخطائها كانت كتيرة جدا،، كنت فاكر اني اقدر اغيرها بعد الجواز بس كنت غلطان
= اومال هي ليه جات هنا و قالتلي انكم متجوزين؟
وهم في دماغها،، انا طلقتها من بدري و لو عايزة القسيمة ممكن اخليكي تشوفيها عادي
= لا انا محتاجة اشوفك انت يا امجد و في اسرع وقت
حاضر،، اول ما هخلص هكون عندك
= ياريت متتأخرش عشان أنا مش هقعد افكر كتير
” قفلت معاها و مفكرتش كتير واتصلت بعدها بسرعة ب غادة
غادة في شخص ميستحقش يعيش،، في شخص غدر بيا،، اظن ان دي حاجة مش هترضيكي،، انا عايزك تروحي للشخص دا و تعاقبيه اشد عقاب،، الموضوع هيكون سهل معاكي،، انتي اول ما هتدخلي هتقولي انك من طرفي،، والموضوع هيكون سهل اكتر أكتر لأنها ست مش راجل،، ست واسمها شيرين!!