رواية شريك حياتي الفصل الرابع 4 بقلم عمرو راشد

رواية شريك حياتي الجزء الرابع

رواية شريك حياتي البارت الرابع

رواية شريك حياتي الحلقة الرابعة

انت بجد موافق على جواز رقية من الواد دا؟
= انتي عبيطة ولا ايه يا نورا؟،، الواد دا انا مش مطمنله،، وشكله بيتكلم كتير وممكن يقلب علينا الدنيا
وهتعمل معاه ايه؟
= الواد دا لازم يختفي
انت ناوي على ايه يا وليد؟
= ناوي اخلص منه بس بالعقل
” مكنتش مصدقة اللي انا بسمعه،، جريت بسرعة على اوضتي قبل ما حد يحس بيا،، قعدت على سريري وأنا مش متخيلة ان وليد ممكن يعمل حاجة زي كدا و أختي كمان موافقة،، واضح ان فارس كان عنده حق،، أنا لازم احذره،، ساعتها جيبت تليفوني وكلمته
كنت عارف انك هتكلميني؟
= فارس ارجوك ابعد عني ومتحاولش تقرب مني تاني
ليه بتقولي كدا؟
= انا سمعت وليد وهو بيقول انه ناويلك على شر،، عشان خاطري ابعد
رقية انا بحبك
= يا فارس انا مش فاهمة انت بتفكر ازاي؟،، وليد مش هيعدي اللي حصل دا واكيد هينفذ كلامه
وانا مبخافش من حد،، أنا ربنا باعتني ليكي يعني مينفعش اسيبك،، دي أمانة يا رقية
= أمانة ايه بس؟،، كل دا وهم
” ساعتها خبيت التليفون تحت المخدة بسرعة لاني سمعت باب اوضتي بيخبط
ادخل
” الباب اتفتح و دخلت نورا اختي
انتي بتعملي ايه؟
= مفيش كنت هنام
انتي عرفتي اللي حصل؟
= لا حصل ايه؟
اللي اسمه فارس دا اتقدملك وعايز يخطبك
= بجد؟
أنتي متعرفيش يعني؟
= لا معرفش والله
هو كان موجود من شوية هنا وطلب ايدك من وليد؟
= ووليد رأيه ايه؟
رأيه انه واد نصاب ومش صريح وشكله داخل على طمع
= بالعكس انا شايفة انه غلبان جدا
ما تبطلي الطيبة الزيادة دي،، بقولك شكله نصاب
= وانتو ناويين معاه على ايه؟
وليد قاله انه عساكر بس انا قولت اجيلك اعرف رأيك؟
= بصراحة مش عارفة
مش انتي بتقولي انه صحبك يعني اكيد عارفاه كويس؟
= الحقيقة انا كنت بكدب،، أنا معرفوش خالص،، انا عرفته بالصدفة في الفرح
هو الواد دا اصلا كان بيعمل في الفرح؟،، لا هو من قرايب العريس ولا من قرايبنا،، الواد دا كان جاي يعمل ايه؟
= معرفش برضو،، ممكن يكون صاحب حد في الفرح
دا محدش يعرفه ولو في واحد بس يعرفه كان هو بنفسه اللي قال انه تبعه عشان يحمي نفسه من الخناقة اللي حصلت في الفرح لكن دا مقالش،، اذا هو مش من اهل العرسان ولا صاحب يبقا دا يثبت ان كلامي صح و هو بيلعب علينا فعلا
= تفتكري؟
انتي لو شوفتيه ولا كلمتيه قوليله يبعد عننا أحسن عشان وليد ميزعلش منك ومنه،، اتفقنا
” حركت راسي على اني موافقة،، بعدها هي قامت ونظرات الشك مبتفارقش عنيها،، الباب اتقفل وهنا انا خرجت تليفوني بسرعة واستغربت لما لقيت المكالمة لسة مفتوحة
انت لسة دا كله مقفلتش؟
= وانا اعرف منين انك هتكلميني تاني ولا لا؟
طب ما تتصل انت ولا مش معاك رصيد يعني؟
= معايا بس خايف انتي اللي مترديش
فارس انتي عايز مني ايه
= انا مش عايز اي حاجة غيرك انتي،، صدقيني يا رقية انا مش كداب،، عايزك تثقي فيا
بس انا معرفكش ولا اعرف حاجة عنك،، اثق فيك ازاي؟
= بلاش تثقي فيا بس الاهم انك متثقيش في وليد او اختك،، الاتنين دول وراهم حوار كبير وأنا لسة هعرفه
انت اتجننت يا فارس!!،، دي اختي انت بتقول ايه؟
= لمرة واحدة بس صدقيني ووالله ما هتندمي
طب انا عايزة اسألك على حاجة وتجاوبني بصراحة
= اسألي اللي أنتي عايزاه
انت كنت جاي الفرح ليه؟
= بصراحة يعني دي حركة بعملها من زمان،، لما بلاقي اي فرح قدامي بدخله
وانت متعرفش صحاب الفرح مين أصلا
= ولا اعرف اي حاجة عنه
متأكد ان دي الحقيقة؟
= والله انا ما بكدب عليكي يا رقية،، كل كلمة قولتها من اول ما قابلتك حقيقة
خلاص مصدقاك بس عشان خاطري ممكن تبعد شوية اليومين دول،، أنا مش مطمنة
= انا في خلال اليومين دول مستني مكالمة من وليد وهاجي اتقدم رسمي
” انا فعلا مكنتش بهزر وعايز اتقدملها،، يمكن انت هتقول انه جنان بس انا شايفه بشكل تاني خالص،، أنا ربنا بعتلي هدية ومش عايز اضيعها،، رقية هي الهدية.،، وصلت البيت لقيت امي قاعدة مستنياني وشكلها متعصبة جدا
مالك يا ماما؟
= ماهو اسمع بقا انت مش كل يوم هترجع نص الليل،، قولي بتروح فين؟
مع صحابي عادي يا ماما في ايه؟
= هتكدب عليا انا؟؟،، يابني صارحني لو بتشرب حاجة؟
بشرب حاجة ايه بس يا ماما؟،، الموضوع مش كدا خالص
= اومال ايه بقا فهمني؟
انا ان شاء الله في الايام الجاية هاخدك معايا مشوار وهتعرفي ساعتها كل حاجة
” امي ابتسمت وغمزتلي
لا متقولش؟
= لا اقول
متقولش؟
= يا ماما اقول
المعاش بتاع ابوك زاد وعايزني ااجي معاك عشان امضي على الورق
= معاش ايه يا ماما؟،، وهو حتى لو زاد هاخدك معايا ليه؟
اومال هتاخدني فين؟
= انتي طول عمرك نفسك ف ايه؟
تتجوز
= وانا هحققلك امنيتك
بتتكلم بجد يا فارس؟
= والله بجد
مين قولي بسرعة
= واحدة صحبتي لسة متعرف عليها جديد
وتسيب اسماء بنت أم حسين؟،، والله ما ليك حق يا فارس
= كفاية بقا يا ماما السيرة دي،، المهم عايزك تجهزي نفسك لاني في خلال يومين هنروحلهم
انا مش مرتاحة يا فارس
= ليه يا ماما؟
قلبي مش مطمن،، فرحتك الزيادة دي قلقتني
= متقلقيش خالص يا ست الكل كل حاجة معمول حسابها ومش ناقص غير وجودك معايا واحنا رايحين نتقدملها
هي اسمها ايه؟
= رقية
” الحقيقة مش امي بس اللي قلقانة،، أنا كمان قلقان والله بس واثق ان ربنا هيوفقني في الخطوة دي،، عدا يوم واتنين وتلاتة ومفيش أي اتصال وعشان كدا قررت انا اللي اكلمه
انا لقيتك اتأخرت قولت اتصل انا واهو بالمرة اعرف سبب التأخير؟
= والله عشان اكون صادق معاك انا مكنتش هكلمك اصلا،، كنت مستنيك انت اللي تكلمني عشان اعرف رقية غالية عندك وعايزها فعلا ولا لا
وانا كلمتك اهو،، معادنا امتا بقا؟
= مستعجل اوي انت
أوي
= طب يا حبيبي أنا مستنيك النهاردة الساعة 8 عندي في البيت
” الساعة كانت لسة 2،، جريت بسرعة على امي وقولتلها
ماما عايزك تجهزي نفسك عشان النهاردة هنروح نتقدم للبنت زي ما قولتلك
= وهو دا ينفع برضو يا فارس؟،، كدا تفاجئني
يا امي انا نفسي متفاجئ
= يا حبيبي هي مش الحاجات بيكون ليها مواعيد ومتفقين عليها من قبلها
لا ماهي الدنيا اتغيرت دلوقتي يا امي،، قومي بس جهزي نفسك عشان نلحق
= هو احنا هنروح امتا؟
معادنا 8
= دا الساعة لسة 2 يابني،، هنقوم نعمل ايه من دلوقتي
عشان نجهز نفسنا،، يلا بس قومي بلاش كسل
” سيبتها ودخلت الحمام خدت دش وظبطت دقني،، بعدها خرجت كانت الساعة لسة 4،، دخلت اوضتي وبدأت اختار الطقم اللي هروح بيه،، كان انسب اختيار وهو قميص ابيض وبنطلون اسود،، جهزتهم ولبست مع برفيوم ريحته مميزة جدا وبكدا انا بقيت جاهز،، خرجت برا والساعة كانت لسة 5،، لقيت امي لسة قاعدة بنفس هدومها
يا ماما أنتي كل دا ملبستيش؟،، هنتأخر على الناس
= انا مش عارفة انت مستعجل اوي كدا ليه،، أصبر شوية يا حبيبي وخليك تقيل عشان ميقولوش انك مدلوق ويرفضو
هبقا تقيل والله،، اتقل حاجة ممكن تشوفيها بس يلا قومي
” بالفعل دخلت تلبس وبعد نص ساعة بالظبط خرجت وبقينا جاهزين واتحركنا،، وصلنا قدام الفيلا والساعة لسة 7 ونص،، امي ساعتها قالتلي
عيب يا ابني نروح عند الناس قبل معادنا،، يقولو علينا ايه؟
= عادي يا امي دا اسمه احترام للمواعيد
دا لما تكون رايح في معادك بالظبط مش رايح قبلها
= طب انا من رأيي اننا ندخل احسن
يابني هيقولو علينا مدلوقين
= ما يقولو اللي يقولوه يا ماما،، ابوس ايدك يلا بقا
” بالعافية عقبال ما وافقت اننا ندخل،، دخلنا بالفعل و وليد رحب بينا وقعدنا،، مكنتش اتوقع انه هيكون مرحب بالشكل دا ولكن انا مش مطمن،، بعدها بشوية نورا اخت رقية جات،، امي قامت من مكانها وقالت
بسم الله ما شاء الله،، ايه الجمال دا،، ذوقك حلو أوي يا فارس،، فعلا مفيهاش غلطة،، تعالي في حضني يا حبيبتي
” نورا ضحكت وحضنتها فعلا و بعدها قعدت جنب وليد،، امي ساعتها اتكلمت وقالت ل وليد
انت بقا أخوهم؟
= لا
عمهم؟
= برضو لا،، أنا جوزها
” امي ساعتها بصت ليا بغضب وقالت
اعوذ بالله جاي تتجوز واحدة متجوزة
= يا ماما استني بس
فين مخك؟،، فين دينك يا فارس؟
= يا ماما افهميني بقا،، دي نورا اخت العروسة التوأم
” امي ساعتها بصت ل نورا وقالت
وبتحضنيني اوي كدا ليه لما أنتي مش العروسة؟
” طبعا في سؤال بيدور دلوقتي وهو أنا عرفت ازاي ان دي نورا،، نورا توأم رقية فعلا وصعب تفرق بينهم ولكن نورا ملامحها حادة على عكس رقية ملامحها هادية جدا،، حتى طريقة كلامها تختلف عن نورا اللي تحس انها بتتكلم بخبث،، وليد ساعتها اتكلم وقال
احنا ندخل في الموضوع علطول،، بص يا فارس،، انت طبعا شايف المستوى اللي رقية عايشة فيه لذلك انا مش هقبل أنها تعيش في مستوى اقل من دا
= طبعا معاك حق بس انا اوعدك اني هعمل كل اللي اقدر عليه عشان اخليها مرتاحة
اللي تقدر عليه دا اللي هو كام بالظبط؟،، مليون مثلا؟
= اكيد لا طبعا،، رقم زي دا كبير اوي عليا حاليا
دي اقل حاجة هتقدمها ولا هو الجواز ببلاش
= اكيد لا بس انا حاليا ظروفي متسمحش بمبلغ زي دا
” امي ساعتها اتكلمت وقالت
وبعدين فارس ما شاء الله محاسب قد الدنيا و ان شاء الله هيكون عنده مستقبل كبير
” رجعت انا اكمل كلامي معاه
وبعدين مفيش حد بيتولد بمستوى عالي يعني انت مثلا عمرك ما كنت هتتكلم بالشكل دا الا اذا اشتغلت في شركة والد رقية
” اتعدل في مكانه وكدا أنا عرفت ان الكلمة ضايقته،، بعدها بص ليا وقالي
انا موافق بس بشروط،، أولهم انا مضمنش الشغل اللي انت فيه،، مش ضامن المرتب،، مش ضامن الشغل دا هيكون ثابت ولا لا وعشان كدا هتيجي تشتغل معايا في الشركة عشان تكون تحت عيني،، تاني شرط بما انك مش هتقدر تعمل حاجة ل رقية ف انا اللي هعمل كل حاجة،، يعني انت مش هتجيب اي حاجة نهائي الا هدومك ولو عايز انا ممكن اجبهالك كمان بس هتمضيلي على وصل امانة ب 2 مليون جنيه
= امضي على ايه!!!،، امضي على وصل برقم كبير زي دا وانا حتى مش معايا ربعه
والله انا قولت اللي عندي وكل واحد حر
” امي ساعتها بصتلي وقالتلي
يلا بينا يا فارس دي ناس متفهمش في الأصول
” وليد رد عليها وقال
يا حجة انا بضمن حق اخت مراتي،، أنا في مقام أخوها دلوقتي لان الوالد والوالدة متوفيين وانا عايز ابقا ضامن حقها و دا مش عيب ولا حرام ثم أنا لازم برضو اكون ضامن ان فارس مش هيزعلها اصلها محتاجة معاملة من نوع خاص
= من نوع خاص ازاي يعني؟
هو فارس مقالش ل حضرتك ولا ايه،، اصل رقية بعد موت والدها حصلها صدمة أدت ل دخولها للمستشفى وفضلت فترة تتعالج هناك لحد ما بقت كويسة بس من وقت للتاني ساعات بيجيلها حالات غريبة كدا بس متقلقوش طول ما هي بتاخد العلاج مش هتأ*ذي حد
” ساعتها امي قامت من مكانها وقالتلي
يلا بينا يا فارس
= يا ماما استني هفهمك
بقولك يلا يإما والله همشي لوحدي
#بقلم : #عمرو راشد
” قومت معاها وانا شايف الفرحة في عيون وليد ونورا ومشينا من الفيلا،، طول الطريق مكنتش بتكلم ولا هي اتكلمت معايا لكن بمجرد ما دخلنا شقتنا
انا عايز اعرف ايه اللي أنتي عملتيه دا؟
= انا اللي عملت!!،، رايح تتجوز واحدة مجنونة،، انت اتهبلت في مخك خلاص،، ملقتش غير دي؟
ايوا ملقتش غيرها ثم انها مش مجنونة ولا حاجة،، أنتي لو شوفتيها عمرك ما هتقولي كدا
= اهلها بذات نفسهم قالو كدا،، عايزني اصدقك انت؟
عشان هما رافضين الموضوع من الاول،، انت مشوفتيش طلباتهم عاملة ازاي؟
= ولما هما رافضين انت رايح تعمل ايه؟
بقولك ايه يا ماما انا هتجوز رقية يعني هتجوزها
= هتتجوز مجنونة؟؟
اه هتجوز مجنونة،، دي حياتي وانا حر فيها
= ياابني أنا خايفة عليك،، الناس دي باين عليهم مش كويسين،، بلاش يا فارس،، بنات الدنيا كلها موجودة وقدام عنيك،، بلاش البنت دي
عشان خاطري يا ماما لو عايزاني فعلا مبسوط سبيني اكمل للاخر وانا هثبتلك اني صح
” الموضوع معقد وصعب جدا بس انا لازم اكمل،، أما امي بتقول كدا عشان هي مش فاهمة،، هي مش هتعرف تفهم اللي انا بقوله،، لازم تشوف عشان تصدق وحاليا انا معنديش فرصة اخليها تشوف حاجة ولكن قريب هي هتعرف الحقيقة كلها وخصوصا بعد ما انا بقيت متأكد ان وليد وراه مصايب كتير أوي،، دخلت اوضتي ومسكت تليفوني كنت عايز اكلمها بس مكنتش عارف هقول ايه،، فتحت الواتساب وبعتلها جملة واحدة بس
انا مش هسيبك مهما حصل
” قفلت التليفون ونمت،، صحيت تاني يوم وانا مقرر اني هكلمه تاني وفعلا كلمته
تصدق والله ما كنت متوقع انك هتكلمني بالسرعة دي
= ما صدقت اني مشيت طبعا
ايه هي الحجة وافقت ولا ايه؟
= ملكش دعوة ب امي،، كلامك معايا
تمام مفيش مشكلة،، نويت على ايه؟
= انا موافق على كل اللي أنت قولته
قرار عظيم برافو
= عايزين نكمل اتفاقنا
ومالو معنديش مانع،، تعالى النهاردة ونكمله،، هستناك الساعة 10
” بالمناسبة انا نسيت اقول اني خدت اجازة تانية من الشغل عشان اكون فاضي تماما للي بيحصل دا،، متكلمتش مع امي خالص طول اليوم لحد ما لبست ونزلت من البيت و روحت الفيلا،، الباب كان مفتوح،، دخلت بس مكنش فيه اي حد لحد ما لقيت وليد جاي من أوضة المكتب اللي كنا فيها وماسك في ايده ازازة خم*را و كاسين،، ساعتها ضحك وقالي
واقف ليه،، اقعد
” مشي وانا مشيت وراه لحد ما قعد على الكنبة وانا قعدت قدامه،، ساعتها فتح الازازة
على فكرة انا مبشربش
= ماهو عشان نكمل الاتفاق لازم تشرب عشان تبقا فايق
انجز يا وليد
= لا براحة كدا انا عايزك هادي النهاردة
” مسك الكاس ب ايده وبدأ يشرب
بص يا سيدي انا حذرتك قبل كدا وقولتلك مينفعش تتجوزها صح؟،، وانت برضو صممت وجيت تتقدملي انت وامك
” شرب للمرة التانية
رفضت وحاولت اقولك طلبات صعبة عليك عشان تعجزك وتمشي وتصرف نظر عن الموضوع وانت برضو وافقت صح،، بعدها قولت ل امك ان رقية مجنونة وبتتعالج يمكن يكون ليها تأثير عليك ع شان اتفاجئ النهاردة والاقيك بتكلمني وموافق وعايز تكمل الاتفاق
” شرب للمرة التالتة وبعدها حط الكاس بعن*ف على الترابيزة اللي قدامه وقال
بس انا مش جايبك عشان نتفق يا فارس
” ساعتها انا حسيت بحد بيتحرك ورايا،، بصيت ورايا بسرعة وشوفت واحد من الاتنين اللي كانو ضر*بوني قبل كدا في الشارع،، قرب مني وبقا واقف في ضهري،، بعدها بصيت قدامي ل وليد اللي كمل كلامه وقال
انت دلوقتي قدامك حل من الاتنين يإما تصرف نظر عن موضوع الجواز و تخرج من هنا على رجلك او تكمل براحتك بس ساعتها انسى انك تطلع من هنا حي!!