رواية زوجة محرمة الفصل الأول 1 بقلم حنان حسن

رواية زوجة محرمة الجزء الأول

رواية زوجة محرمة البارت الأول

رواية زوجة محرمة الحلقة الأولى

كنا شغالين وواقف علي السقالة انا واخويا نور بعيد عني شوية ، وفجأة سمعت صوته بيناديني : الحقني يا امير انا هقع انا هقع انا هقاااااااع…..
لفيت علشان الحقه وشوفته وهو بيقع وجسمه بيتخبط في السقالات لحد ما وصل الارض !!!
كنت عاوز ارمي نفسي علشان الحقه واشوفه حصله ايه ،لكن زمايلي مسكوني ونزلوني من السقالة .
نزلت جري وانا مرعوب من المنظر اللي شوفته ، وبمجرد ما وصلت لنور كان بقي جثة هامدة !!!
منظره وهو بيقع من الدور ال١١ ومنظر جثته علي الارض عمري ما هقدرانساه ابدا ولو عيشت فوق عمري الف عمر .
اصيبت بانهيار عصبي واتنقلت للمستشفي وتمت اجراءات الجنازة والدفن في غيابي حتي العزاء اعمامي اخدوه وانا في المستشفي !!
خرجت من المستشفي بعد اكتر من اسبوع وكانت حالتي النفسية صعبة جدا .
كنت حاسس بالذنب تجاه اخويا اللي استنجد بيا ومقدرتش الحقه !!
قعدت في البيت فترة مش بخرج ولا بتكلم مع حد ابدا !!
امي واخواتي البتات كان الحزن مخيم عليهم لكن قادرين يتكلموا ويعيشوا ، امي كانت تدخل تكلمني وتصبرني وتحاول تخرجني من حالتي وكملن اخواتي حاولوا معايا كتير !!
اخواتي كانوا عارفين حبي للاطفال فكانوا بيدخلوا اولادهم عندي علشان اتكلم والعب معاهم يمكن اخرج من حالتي .
اول لما شوفت وحيد ابن نور جريت عليه وحضنته وقعدت ابكي .
وحيد كان لسه عمره سنتين وكان لسه مش عنده اخوات . قولت لأمي : زي ما يكون نور الله يرحمه كان قلبه حاسس لما سماه وحيد انه مش هيخلف غيره !!!
وحيد فضل معايا ايام كتيره كنت بفضل حضنه واشم في ريحته و افتكر اخويا .
انا اصغر اخواتي وعمري ٢٤ سنة و لسه مش اتجوزت لدلوقتي ، ونور الله يرحمه كان الاكبر مني علطول وكان اقرب اخواتي ليا مات عنده ٢٦ سنة ولينا ٤ اخوات بنات اكبر مننا كلهم متجوزين .
كل بيوت اعمامي كانت جنب بيتنا لأن دي عوايد القرية عندنا بيوت الاخوات كلها بتكون جنب بعض .
واخواتي البنات في منهم اتنين عبير وسماح عايشين في اسكندرية مع اجوازهم و سماح متجوزة في قرية جنبنا و رباب ودي اصغرهم معانا في نفس القرية .
كل يوم كنت لما انام اقوم مفزوع لما اشوف نور في الحلم !!
حلمت بنوركتير ، مرة حلمت بيه بنفس الصورة اللي شوفته بيها وهو علي الارض غرقان في دمه !! ومرة حلمت به بيناديني اني الحقه قبل وقوعه زي ما حصل يوم الحادث !! ومرة حلمت به وهو بيقع وبيتخبط في السقالات زي ما شوفته بالظبط !!!
كان بالنسبالي لما ييجي وقت النوم كان وقت العذاب لأني عارف اني هشوف نفس الكابوس واقوم مفزوع !!
فضلت علي نفس الحال لحد ما في يوم شوفته في الحلم وكان كأنه واقف في جنينة واسعه كلها اشجار وورود وبيناديني وبيضحك وبيقولي كفاية بقي حزن يا امير انا كويس اهو ومبسوط !!
يومها قومت من النوم مبسوط اني شوفته كويس وبيضحك .
زمايلنا في الشغل كانوا بييجوا يزوروني في البيت باستمرار ويطمنوا عليا وعلي امي .
وبعد مرور اكتر من شهر زمايلي بلغوني ان اصحاب الشركة بينذروني لو مش رجعت الشغل هيفصلوني !!
اضطريت اني ارجع الشغل وفي اول يوم روحت موقع الشغل وشوفت مكان الحادث وقعت واغمي عليا !!
اتنقلت بعدها لموقع عمل تاني بعيد عن موقع الحادث .
عدت ذكري الاربعين و في يوم بعد ما اتغديت لقيت امي قعدت جنبي وبتقولي : عايزاك في موضوع مهم يا ابني .
قولتلها : خير يا امي ؟
قالتلي : انا يا بني كبرت والمرض والحزن هدني وخلاص يلا حسن الختام .
: ربنا يديكي الصحة وطول العمر يا امي .
: تعيش يا بني ، المهم انا عاوزة افرح بيك قبل ما اموت يا بني .
: ربنا يطولنا في عمرك يا امي بس انا يحرم عليا الفرح بعد نور اخويا .
: ليه يا بني بتقول كده وتكسر قلبي ؟
: ما عاش اللي يكسر قلبك يا امي بس انا بعد نور اخويا مش هعرف افرح تاني ابدا .
: لا يا ابني كل شئ في الدنيا بيتولد صغير وبيكبر الا الحزن بيتولد كبير وبيصغر مع مرور الزمن ، و الايام مسيرها تنسيك حزنك .
: عمري ما هقدر انسي نور ابدا .
: مش هتنساه يا ابني لكن هتنسي حزنك عليه .
: مش هقدر يا امي .
: اسمع كلامي يا بني انا عيشت كتير في الدنيا واعرف فيها اكتر منك .
: حاضر يا امي هفرحك لكن مش دلوقتي ، سبيني شوية لما نفسيتي تروق واعصابي تهدا .
: لكن انا عاوزه اجوزك قبل ما اموت والعمر مش مضمون . والعروسة كمان عاوزين نلحقها قبل ما غيرك يخطفها .
: ياااه دا انتي كمان اختارتي العروسة !!! ومين قالك اني هتجوز دلوقتي ؟
: مش انا اللي اخترتهالك يا ابني القدر هو اللي اخترهالك .
: مش فاهمك يا امي !! تقصدي ايه ؟
: اقصد يا ابني لم لحم اخوك وحافظ عليه .
: لحم اخويا !!!
: ايوه مراته وابنه .
قومت من مكاني مفزوع ومش مصدق اللي امي بتقوله .
: انتي عاوزاني اتجوز مرات نور ؟
: ايوه يا بني انت اوله من الغريب .
: ولا انا ولا الغريب ، مفيش حد هياخد مكان اخويا في فرشته ابدا .
: دي سنة الحياة يا ابني سارة مرات اخوك حلوة وصغيرة وفيها الطمع ومستحيل تعيش عذبة باقي عمرها .
: يتقصف عمرها علي عمر اللي يفكر يلمسها بعد نور .
: انت هتحكم عليها بالموت وهي عايشة يا ابني ؟؟!!!
: علي جثتي يامه ان سارة تتجوز بعد نور ولا انا ولا غيري .
: متقولش كده انا هغضب عليك يا ابني .
: ليه يا امي ؟
: علشان كده انت ظالم .
: ظلمت مين انا ؟؟
: عاوز تظلم سارة وهي لسه في عز شبابها .
مش بظلمها يامه بس هو نصيبها كده ، اتجوزت وخلفت وجوزها مات ، خلاص خلصنا ، تعيش تربي ابنها زيها زي اي ست بتعيش علشان عيالها .
: عاوز ارملة اخوك تبقي مطمع للي يسوي واللي ميسواش !!!
: هتعيش في حمايتي واللي يفكر بس يبصلها همحيه من علي وش الارض .
: انت لسه صغير يا امير ومدخلتش دنيا علشان كده مش فاهم .
: لأ يامه انا فاهم كويس واللي بقولك عليه هو اللي هيحصل .
: بتخالف امري يا امير !!!
: ما عاش اللي يخالف اوامرك يامه بس في الموضوع ده بالذات سامحيني مستحيل مرات نور حد يلمسها بعده .
: طيب ايه رأيك يا أمير سارة هتتجوز وانت اللي هتتجوزها و هتخلف منها وتجيب اخوات لابن اخوك منها .
: انتي بتعملي كده ليه يامه ؟؟
: علشان اللي انا شايفاه هو الصح والأصول .
: بعد اذنك يامه متتكلميش في الموضوع ده تاني .
مشيت وخرجت من البيت وانا في قمة غضبي من كلام امي وروحت قعدت علي الترعة لوحدي في الضلمة وولعت سيجارة وبفكر في كلام امي وانا مش مصدق انها تقول كده !!
وانا قاعد افتكر صورة اخويا نور لما كان فرحان يوم ما راح وخطب سارة ، كان بيحبها اوي وهي كمان كانت بتحبه اوي .
افتكرت يوم فرحه وقد ايه كان فرحان اوي لدرجة ان كل الناس كانت بتحسده من فرحته.
افتكرت اليوم اللي عرف فيه ان مراته حامل و حضني وقالي اخوك هيبقي اب يا امير .
ويوم لما مراته ولدت وشال ابنه وكان هيطير من الفرح ولما سماه وحيد وسألته عن سبب الاسم قالي انه شاف الاسم في المنام .
افتكرت حبه لسارة وحبها له ولما كانت بتستناه كل يوم وهو راجع من شغله ، وقد ايه كان بيكون ملهوف علي رجوعه بيته بعد الشغل من حبه لها .
وفجأة حسيت بايد علي كتفي اتفزعت التفت لقيت خالي بيقولي : قاعد لوحدك ليه في الضلمة يا امير ؟
: مفيش يا خال .
: شكلك متضايق من كلام الحاجة امك ؟؟
: وانت عرفت ؟؟
: ايوه يا ابني ما انت عارف امك بتشورني في كل حاجة من بعد المرحوم ابوك .
: يعني انت موافق يا خال علي المصيبة دي ؟؟!!
: وانت لم تصون لحم اخوك تبقي مصيبة ؟!! اومال عايز ابن اخوك يتربي في حضن رجل غريب ولا ايه ؟
: وهي تتجوز ليه يا خال من اصله ؟ هي اتحوزت وخلفت وجوزها مات ، نصيبها كده تعيش تربي ابنها .
: يا بني دي لسه صغيرة عندها عشرين سنة عاوزها تكمل عمرها كله عذبة !!! ده كلام يدخل عقل حد يابني ؟؟!!!
: يا خال انا مش هقبل اني اشوف رجل تاني واخد مكان نور ولو اخر يوم في عمري فاهم يا خال ؟
: انت اللي هتتجوزها و تربي ابن اخوك .
: لأ يا خال مش هيحصل .
: انت بتقولي في وشي لأ كده من غير كسوف ولا خجل !!!
: يا خال اصل انت متعرفش نور كان بيحبها ازاي ده كان بيعشقها ، ازاي عاوزني اخد مكانه وانيمه في قبره بيتعذب ؟!!!