رواية حب اخر الفصل الأول 1 بقلم رنا سليمان

رواية حب اخر الجزء الأول

رواية حب اخر البارت الأول

رواية حب اخر الحلقة الأولى

قاعده ب فستان الفرح علي السرير وهو قاعد قدامي على الكنبه وهو باصص في الارض
بصلي وبدا يتكلم
_بصي يا رنا انا عُمري ما حبيتك انا لما قولتلك اني بحبك كُنت بكدب عليكي علشان بس توافقي تتجوزيني بس…….بس انا مكنش عندي حل غير دا علشان اضمن وجودك جمب فريدة لانها اتعلقت بيكي وقدرت تتخطي وفاة والدتها بوجودك جمبها……اناعارف اني غلطت لما اتجوزتك بالطريقة دي……بس مكنش عندي حل غير دا علشان فريدة تكون سعيدة
_كان لازم تقولي من الاول يا اياد……وساعتها انا اقرر اذا كُنت اوافق او لا
_كُنتي هترفضي يا رنا……..انا كُنت واثق من رفضك دا بس ……..بس انا كان لازم اعمل اي حاجة علشان خاطر فريدة…….انا عارف ان فريدة بتحبك علشان كدة طلبت ايدك
_وانا كمان بحب فريدة يا اياد……وبعتبرها زي بنتي قمر الله يرحمها وكان ممكن اعمل اي حاجة علشانها بس دا مش معناه انك توهمني ب حُبك ليا وتفهمني انك بتحبني علشان تتجوزني……..او فاكر اني كُنت هرفض اي حاجة في مصلحة فريدة تبقي غلطان يا اياد…….انا كان عندي استعداد اني اموت نفسي علشان خاطرها……..بس اللي انت عملته دا كان غلط يا اياد
_عارف والله يا رنا…….وندمان علي اللي عملته دا……..بس ارجوكي حاولي انك تسامحيني وتنسي…….علشان خاطر فريدة مش علشاني ……..بلاش تاخدي قرارك دلوقتي يا رنا…….اقعدي وخدي وقتك في التفكير……..يمكن لما تفكري تغيري رايك وتعرفي ان قرارك هيأثر علي فريدة اوي…….عن اذنك
سابني وخرج من الاوضة ……..فضلت قاعدة في مكاني بفستان الفرح …….اول ما خرج من الاوضة بدات اعيط وانا مش مصدقة نفسي……..انا كُنت فاكرة انه كان بيحبني بجد……..طول السنة اللي فاتت دي وانا فاكرة انه بيحبني وانه هيعوضني علي كل اللي فات……..فتحت قلبي ليه بعد اكتر من ٧ سنين قافلة علي نفسي ومانعة انه احب حد ولا اني ادي فرصة لحد انه يدخل حياتي بعد اللي حصلي زمان وفتحتله هو قلبي و…….وحبيبته وانا فاكرة انه علشان عاش اللي انا عيشت فيه……..هو خسر مراته زي ما انا خسرت فارس جوزي وقمر بنتي لما عرفت انه حصله نفس اللي حصلي اتعاطفت معاه وحسيت ان وجعه زي وجعي ……..اعتبرت ان فريدة بنته زي بنتي وجبيتها واتعلقت بيها وهي كمان اتعلقت بيها……..حبيته وافتكرت انه هو كمان حبني بس عمري ما كُنت اتخيل انه يوهمني بحبه ليا علشان خاطر بنته ومصلحة بنته…….ازاي قدر يخدعني ويكذب عليا كدة……..بصيت حواليا بتعب وانا بحاول افتكر فارس وقد ايه كان بيحبني واني عُمري ما هلاقي حد زيه
_يعني بردو يا فارس مش هتاخدني معاكم…….علشان خاطري يا فارس خدني معاك
_ان شاء الله يا حبيبتي اول ما تولدي هاخدك مرة تانية انتي وقمر والبيبي ونروح مع بعض لكن المرة دي لا
_طيب لية بس ……..انا نفسي اروح الملاهي يا فارس بقي علشان خاطري
_يا سلام …….عايزاني اخدك الملاهي والجنان بتاعك يشتغل وتطلب معاكي تركبي لعبة صعبة ويحصل حاجة ل ابننا …….ساعتها هكسب اني فرحتك شوية بس خسرنا ابننا او بنتنا……..انتي عارفة كويس اوي اني بحبك ومش هقدر اني ارفضلك طلب ف بلاش تضغطي عليا اكتر من كدة…….ان شاء الله يا حبيتي بعد ما تقومي بالسلامة هاخدك وهوديكي كل الاماكن اللي انتي عايزاها
_يلا يا بابا انا جاهزة
_يلا يا حبيبة بابا……..مريم خلي بالك منها و
_عارفة عارفة……..خلي بالك منها وخليها تاكل علشان الدوا واوعي تخليها تقرب من الحاجات اللي الدكتور مانعها عنه علشان ميحصلهاش حاجة ولو في اي حاجة اتصلي بيا علطول…….حفظت خلاص
_يا رب تعرفي تنفذيه زي ما انتي حافظة كدة
_عيب عليك…….يلا بقي روحوا شوفوا انتو رايحين فين…….عايزة اتكلم مع البنت في مواضيع مهمة
_والله انا ما خايف من قعدتكم سوا دي…….يلا يا قمر
قربت مني وحضنتني……..نزلت لما مستواها وحضنتها
_مش هنتاخر يا ماما………هنروح الملاهي نلعب شوية ونرجع علطول اوعي تنامي لحد ما نرجع علشان نحكيلك كل حاجة حصلت في الملاهي
_حاضر يا حبيبتي مش هنام لحد ما تيجوا بس اوعي تتاخروا ماشي
_حاضر
وصلتهم لحد الباب وبعدين قفلت الباب وفضلت واقفة في مكاني…….قربت مني وبدات تتكلم
_هتفضلي واقفة مكانك هنا ولا اية
_مريم…….انا خايفة
_خايفة من اية
_مش عارفة……..خايفة وحاسة ان في حاجة هتحصل
_هيكون اية اللي هيحصل يعني يا رنا…….دي تلاقيها هرمونات الحمل …….متقلقيش مفيش حاجة هتحصل ان شاء الله………تعالي نقعد نتفرج علي فيلم ونتكلم شوية علشان عايزة اتكلم معاكي شوية
دخلنا وبدانا نتفرج علي التلفزيون وانا قلبي مقبوض وحاسة ان في حاجة هتحصل ومش عارفة لية حاسة بالاحساس دا…….قاعدنا نتفرج علي التلفزيون ونتكلم شوية……..الساعة جات ٢ بليل وهما لسة مرجعوش ……..حاولت اكلم فارس كتير بس مكنش في رد……..قربت من مريم اللي كانت نايمة علي الكنبة وحاولت اصحيها
_مريم…….مريم
_يبنتي سبيني عايزة انام بقي
_مريم انا قلقانة عليهم اوي…… الساعة ٢ ولسة موصلوش ولا حتي اخوكي بيرد علي التلفون
_يعني هو عيل صغير يا رنا………تلاقيهم شوية وجايين………قلقك دا ملهوش لازمة بصراحة……..اقعدي كدة واهدي وكلها نص ساعة بالكتير وتلاقيهم داخلين علينا وهيقولك ان تلفونه كان فاصل علشان معرفش يكلمك
_لا لا……..انا قلبي مش مطمن انا هلبس وانزل ادور عليهم
_تلبسي وتروحي فين يا رنا……..انتي واعية للي بتقوله دا……..وبعدين هتنزلي تدوري عليهم فين وعلي اساس اي…….هتنزلي تقولي في الشارع جوزي وبنتي تايهين يا ولاد الحلال……اهدي يا رنا واقعدي وان شاء الله خير
_لا يا مريم……..انا قلبي حاسس ان في حاج غلط…….فارس وقمر مش بخير انا لازم انزل واحاول اعرف اي حاجة
قبل ما اسمع ردها كُنت رايحة ناحية اوضتي علشان اغير هدومي وانا مش بفكر في اي حاجة غير فيهم وكُنت خايفة وقلقانة يكون حصل فيهم اي حاجة………حسيت بوجع جامد في بطني خلاني اقف مكاني
_ااه…….الحقيني يا مريم
جريت عليا وهي مش فاهمة حاجة
_في اية مالك
_معرفش يا مريم………وجع جامد اوي……..مش قادرة يا مريم الحقيني
الوجع كان بيزيد وانا مكنتش قادرة استحمل……..كُنت اول مرة احس بالوجع الغريب دا ومكنتش قادرة افهم ايه سببه ……..من كُتر الوجع اغمي عليا ومحستش ب اي حاجة
بدات افتح عيني……….لقيتهم كلهم حواليا وكانوا لابسين اسود …….بدات اتكلم بتعب وحاولت اقوم……..قربت مني وبدات تساندني وهي ساكته ومش بتتكلم
_هو اي اللي حصل…….انا كل اللي فاكراه ان تعبت و……..ابني…….ابني كويس يا مريم مش كدة
_الحمدلله انها جات علي قد كدة يا رنا يا بنتي……..كان فيه خطر علي حياتك انتي
_يعني اية…….يعني مات…….لا لا انتو اكيد بتكدبوا عليا ……..دي قمر كان نفسها في بيبي تلعب معاه…….مينفعش والله ابني يحصله حاجة……..قمر هتزعل والله…….انتو …….انتو اكيد فهمتوا الدكتور غلط…….روحي يا مريم اندهي الدكتور خلي يجي ويسمعنا ان البيبي كويس…….ولا لا اكيد اكيد فارس واقف معاه دلوقتي وهيجي يقولنا هو قاله اية
قعدت جمبي ومسكت ايدي…….اتنهدت وبدات تتكلم بحُزن وهي بتحاول تداري دموعها
_رنا…….انا عارفة انك انسانة مؤمنة بقضاء ربنا وهتتحملي الاختبار اللي ربنا حطك فيه وهتعديه انا عارفة ان كل دا صعب انه يحصل مرة واحدة بس انا واثقة انك هتقدري تعدي الفترة دي
_يا مريم صدقيني انتو فهمتوا غلط…….البيبي عايش هو شوية وجع وراح لحاله وخلاص دلوقتي فارس هيدخل ويفهم الكل انه عايش
_رنا……..انا مش بتكلم علي البيبي بس في حاجة تانية انتي لازم تعرفيها
_حاجة اية
_فارس وقمر وهما راجعين من الملاهي عملوا حادثة
_حادثة…….طيب هما كويسين دلوقتي صح………هما فين خليني اقوم اشوفهم لو محتاجين حاجة
_فارس وقمر بقوا في مكان احسن يا رنا……..للاسف الدكاترة مقدروش ينقذوا حياتهم…….ادعيلهم ربنا يرحمهم ويكونوا في مكان احسن يا رنا
كُنت سامعة كلامها بصدمة وانا مش مصدقة نفسي……..كُنت بحاول اكدب نفسي في اللي سمعته ومكنتش قادرة اصدق ولا عايزة اصدق…….فضلت ساكتة ومش بتكلم…….اخدتني في حضنها…….دموعي بدات تنزل وانا مش مصدقة اي حاجة