رواية الملك النمر الفصل الخامس عشر 15 بقلم بيتر نيدفيد

رواية الملك النمر الجزء الخامس عشر

رواية الملك النمر البارت الخامس عشر

رواية الملك النمر الحلقة الخامسة عشر

شوفت كائن أسود ضخم يشبه النمور بانياب حادة طويلة وبعيون غاضبة بلونها الاحمر الناري
وليه ديل غريب يشبه ذيول التماسيح مهما قولت عن مواصفاته مش هقدر اوصفه زي ماشوفته بعيني
..
الكائن اللي يشبه النمور ده دخل في معركة مع الافعى ذات الثلاث رؤوس وقدر يسيطر عليها بقوة وثقة وقطع رؤوسها التلاته وحولها جثة هامدة ..
ايه اللي ممكن يقدر يعمله شخص غلبان زيي قدام كائن بالقوة المهولة دي ، مخي وقف عن التفكير واعصابي كانت بتترعش من الخوف ماكنتش قادر اسيطر على نفسي ، لكن استغليت انشغاله بالافعى اللي كان ابتدا ياكل من لحمها وقومت من مكاني وجريت ..
جريت بكل قوتي وبقدر استطاعتي ويمكن فوق استطاعتي كنت بجري وبس بدون توقف ، لكن حسيت بزلزلة الارض تحت مني ، واصوات جايه من ورايا واكتشفت لما بصيت انه الجامون ، بيجري ناحيتي ، وسبقني ووقف قدامي ودب برجليه على الارض فوقعت تحت منه ،قرب بوشه ناحيتي وفحصني بعينيه بشكل مرعب ، انكمشت في جسمي وغطيت وشى بايدي وكنت منتظر انه يبلعني في اي لحظة ، وكنت بتمنى ماحسش باي الم واموت بسرعة ، لكن سمعت صوت بيقولي :-
” أنت مين ، وبتعمل ايه في مملكتي ؟ ”
اتصدمت لما سمعت صوته وانه قادر يتكلم زيي وبقيت مستغرب هو ده حيوان ولا شيطان ولا انسان ماكنتش قادر استوعب انه بيكلمني فمردتش عليه فدب برجليه ع الارض بغضب مرة تانية والارض اهتزت من غضبه ، فنطقت بسرعة وقولت
” انا ليبو تاجر غلبان جيت في مهمة من اجل الحب والعشق ”
رد الجامون بنبرة اقل حدة وقال :
– احكيلي قصتك وحذاري تكدب في حرف ، ايه مهمتك هنا وايه علاقة الوادي بالحب والعشق ”
= حظي وقعني في حب اميرة بنت ملك جبار ، اتسجنت بعد محاولات كتير اني اشوفها او اسمع صوتها وكان الملك هيقطع رقبتي لما طلبت اتجوزها ، ولما فهم ان بنته موافقه على الجواز طلب مني اجي لهنا واقطع راسك واسلمها ليه وساعتها هيوافق ع الجواز من بنته الأميرة فاريا
ضحك الجامون وقال :
– يعني انت جي تقطع رقبتي انا ؟
= كنت فاكر اني ممكن اقدر اقتلك ، لكن بعد ماشوفتك عرفت ان ده استحاله يحصل ومصيري دلوقت يا مقتول يا اما هرجع للاميرة مكسور
– وانا مش هقتلك عشان صارحتني بالحقيقة بدون الاعيب البشر لكن هتخرج من هنا بجسم نمر وعليك تنفذ مهمة جديدة ليا ووقتها هترجع تاني بجسم انسان لو نجحت فى تنفيذها ، وهرجعك منصور للملك وتتجوز من الاميرة
= وايه المهمة المطلوبة
– زهرة الجحيم موجودة على قمة جبل الحياة زهرة وحيدة واوراقها مزيج بين اللون الاحمر والاسود هتجبها لعندي وهتكون خدمة قصاد خدمة حققلي طلبي واحققلك مهمتك
= انا مش فاهم ازاي هتحقق مهمتي ، هتسبني اقطع رقبتك ؟
– ده مش جسمي ، انا ابن ملك من ملوك الجن واتحبست في الجسم ده بلعنة من الملك واتمنعت أني اخرج من الوادي من مئات السنين ومافيش حاجة هتحررني من اللعنة والعقاب غير زهرة الجحيم ساعتها هسلمك الجسم تقطع رقبته وتسلمها للملك
كانت فرصة بالنسبالي اني انفذ طلبه واجيبله زهرة الجحيم وساعتها بس هرجع للملك منتصر واستحق الجواز من بنته فاريا ..
وفي خلال لحظات انتبهت ان جسمي اتحول لشكل النمر وودعت الجامون الى لقاء لما ارجعله بالمطلوب ، وجريت من الوادي بسرعة وقوة عجيبة ، جسم النمر خلاني اسرع واقوى ومرعب للكائنات التانية ، ولكن وقعت في فخ صيد قبل وصولي جبل الحياة واتحطيت هنا فى قفص السجن واتقفل عليا ، ولا قدرت ارجع لجسم أنسان زي ماكنت ولا قدرت انفذ طلب الملك عشان اتجوز من الاميرة ولا نفذت مهمة الجامون فكرت كتير انطق واتكلم مع الحراس لكن خوفت يقتلوني لما يعرفوا اني مسحور ومش نمر طبيعي ، ودلوقت ياهرماس وبرغم ان سنك لسه صغير لكن اوعدني تفضل فاكر قصتي وترددها على نفسك كل يوم ، ووقت ماتخرج من هنا تربي نمر وتسميه ليبو على اسمي عشان ماتنسانيش ابداً ، وتنفذ المهمة مكاني وتسلم الجامون زهرة الجحيم وتحرره وتحررني من سحره ، ولو بقيت الملك تخرجني من سجني
وهنا انهى النمر ليبو حكايته من وقت ماسمعت قصته وبقيت ارددها في نفسي كل يوم واصريت اربي نمر برغم اعتراضات الملكة صوفيا وسميته ليبو عشان افضل فاكره ، وبقيت مرتبط بالنمور كأني واحد منهم بفهمهم ويفهموني ومستني الوقت اللي انفذ فيه مهمة زهرة الجحيم ومن بعدها الوادي المسحور
استغربت لوسيا من حكاية هرماس عن النمر ليبو المسحور وبعد دقايق من الصمت ردت وقالت :
– بس ده يامولاي معناه انك هتجازف بروحك عشان تنقذ ليبو ويمكن يكون مات لان القصة دي بقالها سنين ، ثم انه حتى لو لسه عايش واتحول لإنسان وهو لسه في قفص السجن ممكن الحراس تقتله ، لما يشوفوا قدامهم أن النمر اتحول لإنسان
= دي مهمتي التالته اولا زهرة الجحيم من جبل الحياة ومن بعدها تحرير الجامون من الوادي المسحور والمهمة التالته تحرير ليبو من السجن
– مستقبلك يامولاي يمنعك انك تخاطر بحياتك في مهمات بالشكل ده ، والملكة صوفيا لا يمكن هتقبل تخاطر بنفسك وتهدد ملكك
= انا وعدته ، وعشت سنين منتظر اللحظة دي وجه الوقت اللي هحقق فيه وعدي بانقاذه ، بعد الحرب اللي هتكون خلال ايام واذا خرجت منها منتصر هبدأ رحلتي لجبل الحياة وللوادي
– خدني معاك وقتها أرجوك ، لان قلبي مش هيتحمل يعيش قلق الانتظار ولا هيتحمل شدة خوفه عليك
= لو خدتك معايا هفشل ، لاني هبقى خايف عليكي في كل خطوة ، وده هيأثر على تحركاتي وممكن يعجزني انتي هتنتظري هنا واوعدك أني هرجعلك بخير
*************
“فى قصر نيبرو ”
وقف هيرون قدام الملك الحارق وقال :
– الحمله العسكرية جاهزة وفى انتظار اوامر جلالتك بالتحرك
= هنتحرك عند الفجر وهقود الجيش واستراحتنا الاولى هتكون عند جبل الحياة
– جلالتك لسة مصمم تقود الجيش ؟
= ضربة واحدة من سيفى هتنهي الحرب وهتخضع مملكة صوفيا ليا
– الأمير هواش هيستلم امانة العرش ؟
= لاء ، الملكة ماجدوليا هتدير شؤون المملكة نيابة عن الأمير دراجو
– أختيار موفق يامولاي ، الملكة ماجدوليا قوية وتستحق أمانة العرش لحين عودة جلالتك بخير وسلام
= لو على الاستحقاق فالأمير هواش هو الاحق بده ، لكن عشان امانهم هبعدهم عن العرش
– ومين ممكن يأذي ابن الملك او زوجته ، أستحالة حد هيجرؤ على المساس بيهم
= اوقات بنكون شايفين وفاهمين ولكن بنتظاهر بالعكس
– تقصد ايه جلالتك ؟
= مش مهم ، خلينا دلوقت في خط سير الحرب ، ، هتتحرك انت اولا بمجموعة من جنود الماشا هتاخد معاك 50 جندي ومن بعدها انا بالجيش كامل وهنتقابل عند جبل الحياة
– جنود الماشا؟!
= مالك ياهيرون مستغرب ليه ؟
– جنود الماشا مهمتهم تأمين الملك فقط
= وده من ضمن التأمين هتاخد 50 منهم وتمهدوا الطريق قدامي
– وليه مانتحركش مع بعض ونمهد الطريق قدام جلالتك
= عشان انا شايف إن ده المناسب ، مفهوم ؟
– مفهوم جلالتك ، اوامرك ، عند الفجر هتحرك بجنود الماشا وهنتظرك عند جبل الحياة
= بالنسبالك انت ، هتتحرك عند منتصف الليل
– امرك يامولاي
اشار الملك لهيرون بالانصراف ، فانحنى وخرج من جناح العرش وهو مرتبك وفي حيرة من ترتيبات الملك وبعت مرسال للملكة ماجدوليا عن طريق احدى جواريها بيطلب منها مقابلتها فوراً عند حصانها الخاص في اسطبل الخيول الملكية وبعد مرور اقل من ساعة وصلت ماجدوليا لعنده وقالت بقلق :
– في ايه ياهيرون ؟ ايه سبب طلبك ليا بسرعة كده؟
= الملك قرر تتولي مسؤولية العرش نيابة عن ابنك دراجو
– ماهو ده معروف ايه الجديد ؟
= نبرته ونظراته النهارده كانوا مختلفين وقال انه اوقات بيكون فاهم وشايف ولكن بيظهر العكس ، ثم انه عدل في خط سير الحملة والاغرب انه هيخليني اتحرك قبله بـ50 فرد من جنود الماشا
– الماشا ! الجنود دي مهمتها تتحرك مع الملك بس
= وده اللي انا مستغربه ليه هيتحركوا معايا انا ، وليه مانتحركش مع بعض كلنا
– وده معناه ايه بالنسبالك ؟
= ممكن يكون الملك شاكك فيا ؟
– مستحيل ، لان انا التهمة الوحيدة اللي بسببها يشك فيك علاقتك بيا وهي دى المشكلة الوحيدة اللي هتقابلك لو اكتشفها الملك ، ولو كان اكتشفها فعلاً ماكنش هيقرر يخليني مسؤولة عن العرش في غيابه كان هيأمر باعدامنا فوراً
= معاكي حق ، اظن فى خطة فى دماغ الملك وهتظهر ملامحها فى الساعات اللى جاية ، المهم ياماجدوليا ، وقفى اى خطط ضد الملكة لوفي والأمير هواش ، حافظى على حياتهم لحين مانتخلص من الملك
– حاضر ياهيرون ، بس انا كنت محتاجه اقضي وقت فى حضنك قبل ماتسافر
= بعدين ياحبيبتى ، هيجى وقت ومش هتبعدى عن حضني ابداً ، ارجعى دلوقت جناحك قبل ماحد ياخد باله مننا ..
*****************
“مملكة صوفيا ”
” مولاتي الملكة ، جاتلنا رسالة زاجلة من احد رجالنا فى مملكة نيبرو ان الملك الحارق هيتحرك باتجاهنا بأعداد كبيرة من الجيش ..
قالها لامك للملكة صوفيا اللى استقبلت الخبر بارتباك وقلق وقالت :
– مش هنعرف هرماس بتوقيت الحرب لازم مايعرفش
= بس يامولاتى
ازاي الملك مايعرفش بتوقيت الحرب ، دي خيانة لجلالته
– هرماس هيبقى فاهم ان دي مش خيانه لكنها حماية ، انا عايزه احميه من فكرته بمواجهة الحارق ملك ضد ملك
= مش من حقنا نفرض عليه شكل الحرب ، هو الوحيد اللي يأمر وعلينا السمع والطاعة
– لامك ، ده من ضمن وعودك بحماية أبني من الموت ، عايزني اسلمه للحارق يقتله ؟
= … حاضر يامولاتي ، هنخلي الملك يتفاجئ بالحرب وهنقدم ملحمة قتالية ضد جيش الحارق وهننتصر ، اوعدك
– لاء مافيش قتال بين الجيوش كمان
= يعني ايه جلالتك ؟ مش فاهم !
– هرماس حالياً في فترة عزلة ، كعادته كل فترة بيقعد كام يوم بعيد عن الناس مع ليبو اعتقد قدامه ٣ ايام لانهاء عزلته ، ودي فرصة ممتازة هيكون الحارق وصل بجيشه وهنفذ كلام هرماس ملك ضد ملك لكن هيكون انا ضد الحارق
= مستحيل ، عايزه تقاتلي الحارق نيابة عن الملك والمملكة انا امنعك حتى لو اضطريت امنعك بالقوة
– لامك انت بتكلم الملكة صوفيا الزم حدك وتمالك اعصابك قدامي
= مستحيل يامولاتي اسيبك تنتحري مستحيل اوافق بتسليمك للموت ، خليني انا اواجه الحارق وهنتصر عليه لاجلك
– لو كلفتك انت بالمواجهة وقتها الحارق هيكلف اي حد من جيشة يواجهك نيابة عنه ، انما انا هتحداه كملكة ضد ملك ، ثق فيا يا لامك انا ههزمه وهقطع رقبته وهكون كملت مهمتي فى استرداد عرش نيبرو لابني هرماس
= لا يمكن هسمح بده جلالتك خليها حرب تقليدية جيش ضد جيش واوعدك يامولاتي هسلمك رقبة الحارق بايدي
– هرماس اراد الحرب تنتهي بدون سفك دم من الجيشين والحقيقة كان عنده حق هنحمي ارواح الالاف بالطريقة دي وانا اتمنيت كتير اقتل الحارق بايدي انتقاماً لدم حام وللي عمله فينا من بعدها ، واظن مافيش فرصة افضل من كده
= لكن يامولاتي ..
– ده أمر يا لامك وعليك تنفذ وبس ، وممنوع النقاش فيه ..
وقف لامك في حالة من الحزن والانكسار ولمعت عينه بالدموع وانحنى قدام صوفيا وخرج من قدامها بسرعه وقلبه مليان بالالم والكأبة ودخل في دوامة من الحيرة بين عقله وقلبه بين تنفيذ امر الملكة وبين عشقه ليها ، كان بين نارين أنه يفسد خطة صوفيا ويعرف هرماس ويتحول لخاين في نظرها او بين انه يكون خاين في نظر هرماس وفى نظر نفسه اذا التزم الصمت وتمت المواجهة بينها وبين والحارق ..
لكنه قرر يعرف هرماس بتوقيت الحرب وشاف ان فرصة انتصار هرماس على الحارق اقوى من فرصة صوفيا ، بعد ساعتين من التفكير ركب حصانه واتحرك لمكان عزلة هرماس ولكن بعد امتار قليلة من طريقة اتفاجأ بمجموعة من الحرس الملكي بتقبض عليه وبتقوده للسجن بأمر من الملكة صوفيا اللي كانت مكلفة قائد الحرس بمراقبته ..
********