رواية المكيدة الفصل الثالث 3 بقلم أمل عبدالرازق
رواية المكيدة الجزء الثالث
رواية المكيدة البارت الثالث
رواية المكيدة الحلقة الثالثة
– نوال: اهلا اهلا بعروستنا الحلوه، مالك واقفه بعيد ومكسوفه كدا ليه يا حبيبتي
– هناء: شكلنا جينا في وقت غير مرحب بينا فيه يا ماما، تقريبًا كان لازم نستأذن قبل ما نطلع شقة اخويا
– ريم: لأ طبعا انتو تيجوا وتنورونا في اي وقت البيت بيتكم
– نوال: طبعا يا حبيبتي البيت بيتي فعلا مجبتيش حاجه جديده
– عز: احم احم، ادخلي يا ريم جيبي جاتوه وعصير لماما وهناء وبناتها
– ريم: حاضر يا عز
– ريم دخلت المطبخ واول ما عز اطمن انها مش موجوده قال : ليه داخلين حامين كدا على البت، غلط اللي بتعملوه دا يا ماما وهتخربوا الدنيا، المفروض تكسبيها في صفك عشان تقدري تعملي اللي انتِ عايزاه وتغيري القايمه براحتك، بلاش تعقدوها منكم، هتروح تشكي ل ابوها ومش هنسلك معاه وقتها
– نوال: البت وشها موردن وشكلها حلو، لا عينيها وارمه ولا دمعتها على خدها زي ما قولت، انت بتسرح بيا انا يا عز، دا انا اوديك البحر واجيب عطشان يا ابني
– هناء: لا ولا شعرها وهو مفروض يهبل بصراحه، دِ واخده حريتها على الآخر، ابنك اكيد مدلعها وبيلعب بينا
– عز: تعرفي تقعدي ساكته شويه انتِ التانيه، اصلا زمان طاهر جوزك متجوز عليكي وقاعد هناك بيصبرك بالفلوس اللي بيبعتها، دا انتِ مطلعه عين امه ولا راحمه حد، اتلهي في خيبتك احسن ومتدخليش بيني وبين امي يا خرابة البيوت
– هناء ردت بعصبيه: سامعه ابنك بيقول ايه يا ماما، يعني انا خرابة بيوت وجوزي متجوز عليا يا ماما
– نوال: لا يا حبيبتي انتِ جميلة، طاهر بيحبك ومستحيل يتجوز عليكي، دا كفايه بس الفلوس اللي بيبعتها ليكي ولبناتك غير فلوس البيت اللي بتبنيه عشان لما يرجع تعيشي بعيد عن أهله خالص ودماغك ترتاح من زنهم، اوعى تقول ل اختك كلمة تزعلها، شايف لما سمعت كلامي جوزها بقى زي الخاتم في صوباعها ازاي
– لسه عز كان هيرد على نوال سمع صوت رقيق بينادي عليه وبيقوله: تعالى يا حبيبي محتاجه مساعدتك
– هناء: إلحقي يا ماما بتقوله يا حبيبي، سامعه بنفسك أصله ممكن يكذبني، ولما نكلمه كله تحت السيطرة يا ماما، دا هي اللي طعلت مسيطرة
– نوال مسكت عز من دراعه وقالتله: تعالى هنا انت رايح فين، مش هتدخل عندها ولا هتساعدها، ايه مش عارفه تشيل كام كوباية عصير
– عز: سبحان الله البني آدم دا مش مفهوم، اللي نرضاه على الناس منرضاهوش على نفسنا أبدًا، وعايزين نطلع عين ريم عشان بس ابوها قال القايمه بمليون جنيه، و انتِ خليتي طاهر يمضي على شيك ابيض عشان تجوزيه بنتك
– نوال: مالك يا عز انت لحقت اتسحرت يا حبيبي ولا ايه، ما تفوق وتظبط نفسك كدا بدل ما اظبطك بطريقتي، انت هتبقى جوز الست ولا ايه
– عز: اصل بصراحة يا ماما اسمع كلامك اصدقك، اشوف أفعالك استغرب، دلوقتي بس لاحظت انك عملتي مع طاهر أصعب من اللي والد ريم عملوا معايا، اه كنتي سيباهم على حريتهم يخرجوا عادي ويزورنا عادي و انا ابويا مش موجدين وكل دا مش صح وبتعملي ليه الواجب وزياده، لكن ايام كتب الكتاب انذل حرفيًا وبنتك رمت في وشه الدبله عشان ينفذ شروطك
– نوال: طالما الحلوه اللي جوا لعبت في عقلك هقولك على الخلاصه يا عز من غير لف ودوران، انا مش هسكت الا لما اعمل اللي دماغي، لا انت ولا عشره زيك يقدروا يقفوا في وشي، وهغير القايمه واقولك حاجه كمان انت لوحدك هتزهد في البت دِ وهتطلقها، وبكرا تقول امي قالتلي، شايف اختك بتسمع كلامي ازاي عشان كدا هكتبلها كل ورثي
– عز: طب طالما الموضوع كدا بقى يا هناء، اختي هناء الجميلة اتسحبت مره و انتِ نايمه وخدت الشيكات اللي جوزها ماضي عليها وراحت وديتها لطاهر عشان ترضيه
– نوال: انت مجنون ولا بتستعبط، ورق ايه اللي هناء خدته من ورايا، انت حصل لدماغك حاجه ولا ايه
– عز: بنتك قاعده جنبك اهي، لو كنت بكذب تقولي انت كذاب، و انا وابويا عارفين ومقولناش ليكي عشان متزعليش منها وهي وقتها قالتلنا لو معملتش كدا بيتها هيتخرب وطاهر هيتجوز عليها بسبب كلام حماتها فقررت تبين ليه انها بتحبه وواثقه فيه، بس الشهاده لله هي سابت الشيك اللي ب ٦٠٠ الف كضمان حق بردو ودا سعر جهازها الحقيقي
– نوال: الكلام دا حصل بجد يا هناء
– هناء:………
– نوال: ساكته ليه ما تنطقي
– هناء ردت وقالت بنبرة صوت مرتجفة من خوفها : ك.. كان.. كان غصب عني يا ماما، طاهر كان مخاصمني وخوفت يتجوز عليا، انا مش عارفه عملت كدا ازاي
– نوال مسكت هناء جامد من شعرها وقالتلها: تقومي تسرقيني وتفتحي الخازنه من ورايا، العيب عليا انا اللي وثقت في واحده فاشله وخايبه زيك، ما كان يخاصمك مسيره كان هينعدل لوحده، كنتي تعالي عرفيني وشوفي كنت هعملك فيه ايه، إنما تخليني مغفله
– هناء: ااه سيبي شعري يا ماما وجعتيني، الكلام دا من ٦ سنين وكل حاجه كويسه وطاهر بيعملي كل اللي نفسي فيه على يدك و انتِ عارفه انه بيحبني وبيصدقني انا ومستحيل يصدق كلام امه، اول ما بيشوف دموعي بيضعف بالرغم اني بكون غلطانه بس بيسمع ليا وبعرف اعيش دور المسكينة زي ما علمتيني، كل فلوسه معايا يا ماما، سيبي شعري عز بيحاول يوقع بينا
– نوال: حسابك معايا بعدين يا هناء، كل دا مراتك بتجيب العصير يا عز
– عز: تسمحيلي اقوم اشوفها وارجع تاني نكمل خناق يا ماما
______
لو عايزين تعرفوا هيحصل ايه في الفصل الرابع انضموا لجروب الكتابة الخاص بيا هتلاقوا رابط الجروب مثبت في حسابي الخاص كل القصص بتنزل فيه اول ما انتهي من كتابتها، هتنوروا الجروب و ان شاء الله تستفادوا من القصص اللي بقدمها.
_____
عز: كل دا يا ريم بتجيبي العصير والجاتوه
– ريم: بصراحه يا عز جيت اشيل الصينية بالحاجات اللي عليها دوخت ومقدرتش أقف على رجلي
– عز: يا حبيبتي انت من غير اكل بقالك يومين وكمان منمتيش كويس ، لا حقك عليا يا عيوني، تعالي اسندي عليا و انا هشيلهم عنك
– ريم: عز
– عز: عيونه وقلبه
– ريم: انت اتجوزتني ليه
– عز: دا وقت السؤال دا يعني يا ريم
– ريم: ارجوك يا عز رد عليا وريحني
– عز: عشان بحبك يا ريم، بحبك ومحبتش ولا هحب غيرك
______
– هناء اتسحبت ووقفت جنب باب المطبخ وسمعت كلام عز وريم واول ما سمتعه بيقول بحبك راحت تجري على امها وقالتلها: إلحقي يا ماما دا بيقولها بحبك ومحبتش ولا هحب غيرك، بيقولها كمان عيون عز وقلبه، ابنك واقع يا ماما وااااقع، كسبته في صفها خلاص، بزمتك دا وقت حب امه واخته برا والست قاعده تحب فيه جوا
– نوال ضغطت على سنانها بغيظ وقالت: سيبي عز يفرح يومين واتفرجي على اللي هيحصل، عز مش هيخرج من تحت طوعي، يا بنتي دا مبيعرفش يشتري حاجه الا برأيي، روح يا عز بيروح تعالى يا عز بيجي، الكلمة كلمتي انا وهتفضل كلمتي انا، انتِ ناسيه اني انا اللي فضلت ازن عليه عشان يروح يشوف ريم واول ما شافها وافق وخطبتها ليه، كل حاجه بتحصل زي ما انا بخطط ليها، زي ما جوزته ريم ممكن أطلقه منها الصبح بس لسه شويه، الصبر حلو والتقيل جاي
– هناء: ماما انتِ بتتكلمي كدا ليه وعينك وسعت فجأة، انا خوفت منك
– نوال رمت هناء بالمفاتيح اللي في ايديها وقالتلها: انتِ حسابك معايا بعدين، قال عيوني وسعت فجأة قال، ايه شايفاني عفريته، بت قليلة تربية صحيح
______
– ريم: طب طالما بتحبني وأهلك كانوا مرحبين بيا طول فترة الخطوبة، ايه الكلام اللي دار بينكم برا دا يا عز
– عز:……..
– ريم: متفاجئ ليه يا عز، علفكره انا معاكم في نفس الشقة والمطبخ بيطلع على الصاله، ليه امك بتكرهني، ليه عايزاك تطلقني وانا لسه مكملتش يومين في بيتكم، انا مبقتش مستحمله مفاجأت اكتر من كدا
– عز: اهدي يا حبيبتي، شوفتي ابوكي بيغير عليكي ازاي، امي هي كمان بتغير عليا اوي، مافيش حاجه من الكلام دا هتحصل، هي بس متعصبه شويه، لكن انا جنبك متخافيش
– ريم: طب امك وغيرانه عليك، اختك كمان غيرانه عليك! دِ بقى انا عمري ما دوست ليها على طرف و كانت بتكلمني كويس طول فترة الخطوبة وكل شويه تقولي انتِ اختي دا انتِ هتبقي مرات الغالي
– عز: خايفين انك تاخديني منهم يا ريم، لكن لما يتعاملوا معاكي اكيد هيحبوكي زي ما انا بحبك، وبعدين بلاش نتكلم في الكلام دا دلوقتي، عيب كدا احنا سايبينهم برا لوحدهم بقالنا كتير، يلا اطلعي بالميه و انا جاي وراكي
– ريم: كل الأحداث اللي انا عيشتها والكلام اللي سمعته وانا لسه مكملتش يومين معاكم، يا ترى لسه هيحصل معايا ايه
– عز: كل خير يا حبيبتي، اطلعي بس و انا جاي وراكي
_______
– عز: ايوه يا حاج انت فين
– مسعود: ألوو مين معايا
– عز: هيكون مين يعني يا بابا، ابنك اللي مش عارف يفرح في البيت دا وقريب هيمشي ويسيب البيت خالص
– مسعود: اهدى يا ابني وكل مشكله وليها حل، قولي امك عملت ايه تاني
– عز: امي هتجنني، طالعه غاويه مشاكل، مش صابره اسبوع يا بابا، طالعه تقل من مراتي قدام عيني وعايزاني اسكت
– مسعود: طب ما انت كنت راضي بكدا، وانت بنفسك اللي مكنت امك منك اعملك ايه انا دلوقتي
– عز: كانت ساعة غضب ومش هتتكرر، انا بحب مراتي ومش هلاقي زيها، ابوس ايدك يا بابا تعالى انقذني من بين إيد مراتك وخلي اليوم يعدي على خير، انا مش عايز ازعلها مني
– مسعود: هي دِ حد بيعرف يزعلها، دا انا بنفسي قافل الباب عليها هي واختك قبل ما اخرج، بس امك معاها من كل مفتاح نسخة
– عز: انت فين يا بابا، سايب امي عليا لوحدي ليه
– مسعود: كنت قاعد مع حماك شويه عشان افض الخلاف اللي بينكم يا عز، لأن ريم بنت محترمه ومتعلمه وبنت أصول وغاليه عندي، انا مشوفتش منها حاجه وحشه عشان تتظلم في بيتي
– عز: دا اللي هو ازاي بقى، قولي حصل ايه يا بابا بالحرف
– مسعود: اقولك حصل ايه ولا اجي انقذك من امك
– عز: اللي حصل حصل تعالى انقذني من امي ارجوك
– مسعود: خلاص انا على وصول اهو
______
– ريم: اجيبلك طبق تحطي فيه قشر اللب يا ماما
– نوال: لا انا مرتاحه كدا بحب اكل اللب وارمي القشر على الأرض، مش هتخسري حاجه لما تكنسيه، ولو هيزعلك يا حبيبتي اكنسه قبل ما انزل
– ريم: لا يا ماما خدي راحتك
– نوال: من غير ما تقولي واخده راحتي في بيتي، قوليلي صحيح هو عز قالك ان البيت ب اسمي ولا لا
– ريم: لأ مقالش ليا بس حضرتك وعز واحد
– نوال: لأ اتنين يا ريم، هو انتِ قاعده سايبه شعرك كدا قدامنا ومش مكسوفه ولا بتعرفينا ان هو حلو
– ريم: اتكسف ليه ومن ايه يا ماما، انا قاعده في شقتي وأهلي لسه ماشيين يا دوبك شيلت الطرحة ولسه هغير العبايه حضرتك زورتونا فجأة من غير حتى رنة موبايل فطبيعي ملحقش ألبس الطرحة وكمان احنا كلنا ستات زي بعض
– هناء: وعز كمان معتبراه ست زينا
– ريم: عز مين اللي اعتبره ست، عز دا راجل وسيد الرجاله كلهم، بس عز دا جوزي يا نونو لو مش واخده بالك
– هناء: واخده بالي كويس اوي، قوليلي يا ريم شعرك دا عاملاه بروتين ولا فيلر
– ريم ضحكت وقالتلها: لا دا طبيعي وحياتك، مستحيل ألعب في شعري، عز اول ما شاف شعري كان مبهور بجماله وفرح اوي اني معملتش فيه حاجه
– نوال مسكت شعر ريم وهي متعمده توجعها وقالتلها: يعني انتِ عايزه تفهمينا ان دا شعرك مش بروكه
– ريم: اااااه شعري، بالراحه يا ماما مش كدا
– نوال: معلش يا حبيبتي بس حبيت اتأكد، هو انتو بتسلموا بعض ولا ايه، واحد يطلع من المطبخ والتاني يدخله، هو في حاجه ولا ايه
– عز: انا جيت اهو، اصل ريم كانت مش طايله تجيب الأطباق فأنا كنت بساعدها وبجيب باقي الحاجات
– نوال: راجل يا حبيب امك
– عز ابتسم من غير نفس وقال: تسلميلي يا ماما
– نوال: ما تقومي تفرجيني على الصباحية اللي امك جابتها ليكي ولا انتو متعرفوش في الأصول
– ريم: لأ ازاي دا احنا نعرف الأصول اوي يا ماما، ماما قالتلي انها جايبه لحضرتك من كل حاجه ودخلت الحاجات عندك تحت، لكن لو على الحاجات اللي عندي مستحيل تغلى عليكي، دا انا اقضيها عيش وجبنه بس حضرتك ترضي عني وتفرحي، الحاجات في المطبخ اتفضلي شوفيها
– نوال: طب قومي يا هناء انزلي هاتي غيرات بناتك و اي لبس مش نضيف تحت وتعالي اغسليه في غسالة ريم عشان نشوفها من الأصلية ولا لأ، اصل انا يا ريم مجهزة هناء بأحدث الأجهزة و اكيد انتِ مش هتعرفي تتعاملي مع الحاجات اللي زي دِ خلي هناء تعلمك
– هناء: حاضر يا ماما ثواني وهكون عندك
– عز: مش مستاهله يا ماما، ريم شاطره جدًا وبتعرف تستخدم كل الأجهزة
نوال بصت لعز بصه رجعته لحالة الصمت اللي كان فيها وبدأ يشاهد وهو ساكت، الباب خبط وعز ما صدق وراح فتح بسرعه
– مسعود: ايه يا جماعه البيت فاضي ومافيش حد تحت قلقتوني
– عز: تعالى يا بابا اتفضل، اصل ماما حبت تقضي معانا اليوم هي وهناء
______
– رحمه: طب والله يا عماد والد عز راجل محترم، انا عمري ما ارتحت ل امه وحساها مش سهله، بس ابوه ونعم الأب حقيقي
– عماد: بالرغم اني عمري ما شوفت وش نوال دِ بس من كلامك عنها انا مش مرتاح ليها انا كمان، بس صوتها مش غريب عني أبدًا، حاسس اني سامعه في مكان قبل كدا
– رحمه: طيب يا عماد بما ان مسعود والد عز صاحبك زي ما بتقول وتعرفوا بعض من زمان ليه عاملت ابنه كدا
– عماد: مسعود صاحبي من زمان، بس كل واحد فينا عاش في بلده بعد ما اتخرجنا ومبقاش في اتصال بينا، وفي الاخر بعد زمن جه عاش جنبنا اهو وكل واحد فينا عنده اسره وبيت
– رحمه: سبحان الله فعلا، بس انت مجاوبتش على سؤالي بردو
– عماد: كنت بختبر عز وبشوف هيستحمل اللي هعمله معاه ولا نظامه ايه؛ عشان اعرف ريم غاليه عنده فعلا وهيحافظ عليها ولا لأ
– رحمه: تقوم تقلل منه وتكرهه في عيشته
– عماد: بصراحه دا كان غصب عني؛ كنت غيران على بنتي اوي، كنت مش عايزها تبعد عني، مسعود كان دايما بيعاتبني بيني وبينه وكان بيزعل على ابنه، كنت بحاول اهدى لما اشوفه بس بمجرد ما ألمحه كنت بتعصب
– رحمه: لا حول ولا قوة الا بالله، انا عارفه انك بتحب بناتك اوي بس بردو لازم تعرف ان دِ سنة الحياة، لازم تحترم عز واللي هيتقدموا لميرنا ويارا ويمنى بعد كدا، وبعدين يا حبيبي الجواز ستره للبنت بردو
– عماد: تاني هتقوليلي اتسترت وسترة الكلمة اللي بتعصني، بنتي كانت عايشه ملكة في بيت ابوها واتعلمت ومخلصة كلية تربية انجليزي، كانت مستوره في بيت ابوها بردو علفكره وربنا هو اللي بيسترنا جميعا، كل شويه تحسسيني ان عز عمل فينا جميل لما اتجوز ريم، يا حبيبتي بنتك مستوره بيه او من غيره الحمد لله، ربنا هو اللي بيستر عباده، في بنات كتير مش متجوزين عادي ومستورين الحمد لله
– رحمه: اهدى يا اخويا مش قصدي، انا كنت بسمعهم بيقولوا كدا لما البنت تتجوز، خلاص مش هقولها تاني متزعلش نفسك، بس قولي مسعود قالك ايه بردو
_____
– مسعود: يلا يا نوال نروح شقتنا واللبس اللي عايزه تغسليه اغسليه على إيدك او في غسالتك ريم مطلبتش مساعده من حد، وبعدين يلا عشان تجهزي العشا ليا، انا على فطاري من الصبح
– نوال: عز ماسك فيا عشان اتعشى معاه مش هزعل ابني، خد هناء تجهزلك الأكل
– عز رد بسرعه وقال: لأ يا ماما انا مش زعلان خالص، ان شاء الله تتعوض يا حبيبتي، اهم حاجه رضا بابا
– مسعود: يلا قدامي يا نوال انتِ وبنتك
– نوال: حاضر يا مسعود
نوال خرجت وهي زهقانه ومش طايقه نفسها واول ما خرجت مسعود قال لريم: ألف مبروك يا بنتي وحقك عليا انا نيابةً عنهم كلهم، اعرفي ان ليكي اب تاني اسمه مسعود مستحيل حد يدوسلك على طرف طول ما هو عايش، حماتك هبله شويه ومسيرها تعقل، لكن اوعي تسمحي لحد يخرب بيتك، و انت يا عز معاك جوهرة اوعى تخسرها وإلا هتندم، ريم مش بنت صاحبي ريم بنتي زي ما انت ابني بالظبط، البيوت أسرار اوعوا حد يعرف عنكم حاجه، افرحوا بحياتكم وربنا يسعدكم
______
– عماد: بس كدا يا ستي كان كل كلام مسعود بيدور حوالين نقطه واحده وهي ان عز زي ابني ولازم أطيب خاطره بكلمتين؛ لأني جرحته وكسرت بخاطره وخايف ريم تستقل بيه
– رحمه: طب راضي صاحبك وخد حاجه حلوه في ايدك وروح لبنتك واحضنها وسلم عليها وخد جوزها بالحضن وقوله انت من النهارده ابني وريم امانه عندك، وعايز اسمع عنكم كل خير وافرحوا بحياتكم
– عماد: هو انا وحش يا رحمه
– رحمه: انا عمري ما شوفتك وحش يا عماد، انت احن راجل شوفته في حياتي، انت ابويا واخويا وجوزي وابو بناتي وسندي في الدنيا، بس عيبك الوحيد غيرك وتهورك، يا راجل دا انت مدير مدرسة يعني كبرت على الحاجات دِ بقى
– عماد: هتفضلي حلوه في عيني العمر كله يا رحمه، تعرفي انا بحب فيكِ انك بترشديني للصح بإسلوب كويس وبتختاري الوقت المناسب عشان تتكلمي معايا فيه، يعني قدام الناس بتحترميني وأي قرار باخده مش بتعارضيه بس لوحدنا بتدليني على الصح وبتنوري بصيرتي، ربنا ما يحرمني منك يا زينة الستات
_____
– مسعود: ايه انتِ مش هتتهدي بقى، بجد انا تعبت وجبت اخري، طالعه ل ابنك تاني يوم فرحه تاكلي لب وترمي على السجاد اللي لسه عروسته مفرحتش بيه، دا لو عيل صغير هيقعد مؤدب
– نوال: و انت مالك محموق عليها اوي كدا ليه، ولا عشان هي بنت صاحبك
– مسمعود: فاكره يا نوال زمان لما فضلتي تزِني عليا وتعملي مشاكل في بيت العيلة ومع امي ومرتات اخواتي لحد ما جينا نعيش هنا، وعملت اللي انتِ عايزاه عشان بحبك وشاريكي وقولت خلاص مافيش نكد، لكن ازاي بدأت في الزن تاني عشان تجوزي ابنك لريم وقولتي في بنت جميلة ومؤدبة وبنت ناس، طلعت بنت صاحبي وفرحنا وجوزناهم، بردو عملتي اللي في دماغك، في ايه جوزتي ابنك وفرحتي بيه زي ما كنتي عايز وفي ايه عايزه تخربي بيته وتفرقي بينه وبين مراته، عيب يا بنت الناس للصبر حدود و انا ليا طاقة، المره دِ انا اللي هقف في وشك، عشان ابنك خايب وبحالات وكلمة بتوديه وكلمه بتجيبه
– نوال: ايه هتطلقني بعد العُمر دا كله يا مسعود
– مسعود: يا نوال سيبي ابنك يعيش ويفرح بقى، خلينا نعيش مرتاحين البال وعاملي ريم زي بنتك، والله شكلها بنت طيبة اوي، دِ بنت ناس مش واحده جايبنها بيتنا نقلل منها ونهين فيها، اللي مش هرضاه لولادي مستحيل ارضاه لغيرهم، ريم هتتشال جوا عنينا عشان احنا نعرف في الأصول كويس، مش كدا ولا ايه يا نوال
– نوال: حاضر يا مسعود، نام بدري عشان وراك سفر بكرا للبلد عشان تبيع المحصول، هروح انام في اوضة هناء.
– مسعود: ربنا يهديكي يا نوال
______
– هناء: انتِ بجد هتسمعي كلام بابا يا ماما
– نوال: مش هتبطلي داء التصنيت دا يا بقى يا هناء، ابوكي لو ظبطك بتسترقي السمع على رأيه مش هيسكتلك
– هناء: انجزي يا ماما ناويه تعملي ايه، انا عارفه ان في بدل الخطة ألف
– نوال: ابوكي مسافر بكرا وهيفضل هناك شهر، و اخوكي كمان هيسافر وريم هتبقى معايا انا و انتِ لوحدنا، هيرجعوا يلاقوا ريم حالها اتبدل وعملت حاجات محدش يستوعبها و اكيد انتِ فاهمه قصدي كويس، وقتها بقى عشان استر عليها لازم اساوم ابوها على حاجات فكر انها راحت مع الايام، بس للأسف كل يوم حسابه بيقرب، مستنيه اليوم دا بفارغ الصبر يا عماد، خلاص هانت وكل حاجه هتبقى على المكشوف، متخيله شكلك دلوقتي و انت مصدوم لما تعرف مين حماة بنتك المصونه
– هناء: انا مش فاهمه حاجه، ابوها ماله دلوقتي وتساوميه على ايه، ما تفهميني يا ماما
– نوال: نامي يا هناء وسكتي بنتك دِ عشان مش عارفه انام منها، ولا انا ماليش مكان في بيتي ارتاح فيه، انا هلاقيها منك ولا من بناتك، مش كفايه مستحمله غبائك
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية المكيدة)
