رواية المتعة الحرام الجزء الثالث الفصل الثامن 8 بقلم عادل عبدالله
رواية المتعة الحرام الجزء الثالث الجزء الثامن
رواية المتعة الحرام الجزء الثالث البارت الثامن
رواية المتعة الحرام الجزء الثالث الحلقة الثامنة
: وازاي كانت حماتي عايشة حياة بسيطة وهي عندها الفلوس دي كلها ؟!
: هي عمرها ما فكرت تبيع الارض ، حتي لما كانت بتمر علينا ظروف صعبة عمرها ما فكرت تبيعها .
: وانتي ناوية تعملي ايه ؟
: هعمل زي ماما طبعا وعمري ما هفكر ابيعها .
: عموما ده ورثك وفلوسك وانتي حرة فيهم .
: ينفع تيجي معايا المشوار ده يا سامي ؟
: ايوه طبعا لازم اروح معاكي .
ذهب معها سامي للمحكمة وقاموا بعمل اجراءات اعلام الوراثة .
وكان ذهابه معها وتغيبه عن العمل السبب في فصله من العمل !!
حين ذهب في اليوم التالي فوجئ سامي بأنه تم فصله من العمل .
حاول سامي تبرير سبب تغيبه عن العمل لمديره ولكن دون جدوي .
عاد سامي مهموم الي منزله وفوجئت سهام بروجعه المبكر !!
سهام : ايه ده ؟ رجعت بدري ليه من الشغل ؟؟
سامي : انفصلت عن العمل .
سهام : بتقول ايه ؟
سامي : بقولك المدير رفدني من الشغل .
سهام : ليه ؟ ايه اللي حصل ؟؟
سامي : علشان غيبت عن الشغل .
سهام : طيب وفيها ايه ؟
سامي : ما انتي عارفة القطاع الخاص مش بيرحم ، و هو الراجل ده كان بيتلكك علشان يمشيني .
سهام : وليه يعمل معاك كده ؟
سامي : من زمان وهو مش بيطيقني واخدها فرصة اني غيبت عن الشغل كذا يوم ورفدني .
سهام : غيبت عن الشغل كذا يوم !!! امتي ده ؟؟؟
سامي ” بارتباك شديد ” : ده من حوالي اسبوعين واحد صاحبي كانت والدته محتاجة تبرع بالدم وروحت اتبرعتلها ومرة تانية بعدها بكام يوم والدته توفيت وروحنا دفناها .
نظرت سهام نظرة شك وارتياب في سامي ثم قالت : طيب وبعدين هتعمل ايه دلوقتي ؟؟
سامي : هدور علي شغل تاني ، هعمل ايه يعني ؟!!
شعرت سهام بأن سامي يكذب عليها ولكنها لا تعلم السبب !!
بدأ سامي في عمل اتصالات ببعض اصدقاؤه للبحث عن عمل جديد .
ولكن طالت المدة وبدأت اعصابه ترهق من التفكير واصبح شديد العصبية .
وذات يوم فوجئوا بشاهي تدق جرس الباب علي عجل !!!
فتحت لها سهام فقالت لهم : ألحقوني !!
سهام : فيه ايه ؟
شاهي : نشأت تعبان اوي ومش عارفة اعمل ايه ؟
سهام : طيب ثواني هقول لسامي جوزي .
دخلت سهام وقالت لسامي : نشأت جارنا تعبان اوي ومراته جت بتستنجد بينا !! هنعمل ايه ؟؟
نشأت : الجيران لبعضها طبعا ، ثواني اتصل بالدكتور .
اتصل سامي بطبيب واعطاه العنوان ثم قال لسهام : روحي اقفي معاها يمكن تكون محتاجة حاجة .
عادت سهام بعد دقائق وقالت له : الدكتور بيقول لازم جوزها يتنقل للمستشفي فورا .
سامي : طيب استني ألبس هدومي بقي علشان اروح معاهم ، وتعالي انتي كمان معانا .
اتصل سامي واحضر سيارة اسعاف وذهب وزوجته مع شاهي للمستشفي .
واثناء وجودهم في الانتظار قالت سهام له : انا حاسة أن شاهي بتمثل .
سامي : بتمثل ازاي مش فاهم ؟؟
سهام : شكلها مش زعلانة علي تعب جوزها وبتمثل انها زعلانة .
سامي : حرام عليكي ، يعني انتي كنتي دخلتي جوه ضميرها علشان تعرفي اذا كانت بتمثل ولا لأ ؟!!
سهام : احنا ستات زي بعض ونفهم بعض كويس .
سامي : بلاش الظن في الناس ، حرام عليكي ، اسكتي بقي علشان هي جاية .
عادت شاهي ووقفت بجوارهم وهي تبكي .
سامي : الدكتور بيقول ايه ؟
شاهي : بيقول انه عنده تسمم .
سهام : طيب يا حبيبتي اهدي كده وان شاء الله هيبقي كويس .
وغمزت سهام لسامي بأن بكاء شاهي ما هو الا تمثيل !!
بعد حوالي ساعتين اخبرهم الطبيب بأن الحالة بدأت في الاستقرار ولكنه يجب أن يوضع تحت الملاحظة الطبية ما لا يقل عن ٤٨ ساعة .
عادت سهام مع سامي الي منزلهم وتركوا شاهي في المستشفي .
واثناء عودتهم كانت تبدو علي ملامح سهام الحيرة والتفكير العميق فسألها سامي : مالك يا حبيبتي بتفكري في ايه ؟
سهام : مندهشة ازاي يكون جوزها تعبان للدرجة دي وتكون شاهي مش زعلانة عليه وبتمثل كده !!!
سامي : انتي بردو لسه مصممة انها بتمثل ؟
سهام : ايوه يا حبيبي ده واضح جدا ، انت ازاي مش واخد بالك ؟!
سامي : لأني مش مشغول بها بالدرجة دي علشان اركز معها .
سهام : ايوه ايوه انا عارفة ، علفكرة واضح ان شاهي مش بتحب جوزها خالص .
سامي : ما تسيبك بقي منها ومن جوزها ، انا مش بحب اجيب سيرة الناس وخصوصا لما يكونوا غايبين ومش موجودين .
سهام : ماشي يا سامي ، هنروح نشوف نشأت في المستشفي الصبح ولا لأ ؟
سامي : انا من رأيي بلاش ، احنا كده عملنا اللي علينا وزيادة كمان ، هما كانوا مقاطعينا ورغم كده لما احتاجولنا وقفنا معاهم .
سهام : انا كمان رأيي من رأيك .
وبعد يومين خرج نشأت من المستشفي وعاد للمنزل وبمجرد رجوعة فوجئت سهام به يأتي ليزورهم !!!
نشأت : انا مش عارف اقولك ايه يا استاذ سامي انت ومدام سهام ؟ لولاكم كان زماني ميت .
سامي : لا شكر علي واجب يا استاذ نشأت ، احنا جيران والجيران لبعضها .
نشأت : انا متأسف ليكي يا مدام سهام .
سهام : ليه بتقول كده ؟
نشأت : علشان مش عزيتك في وفاة والدتك ، حقك عليا انا اسف .
سهام : ولا يهمك يا استاذ نشأت مفيش داعي للأسف .
نشأت : طيب لو فعلا مفيش حاجة ياريت ترجعوا تشرفونا نتعشا مع بعض في اي يوم .
سامي : ااا…..
سهام : لا يا استاذ نشأت متأسفين اوي ، الاولاد بيذاكروا ولما مش بنكون جنبهم بيلعبوا ويسيبوا المذاكرة .
نشأت : يبقي لسه في حاجة في قلبك من ناحيتنا .
سهام : لا ابدا مفيش حاجة ابدا لكن علشان مذاكرة الاولاد .
نشأت : طيب انا مش هغصب عليكم ، شقتي مفتوحة لكم في اي وقت وبيتي هو بيتكم وبردو مش هقدر ارد جميلكم معايا .
انصرف نشأت الي شقته بينما سأل سامي زوجته سهام : انتي رفضتي دعوة الراجل ليه ؟؟
سهام : لاسباب كتير اوي .
سامي : ممكن اعرفها ؟؟
سهام : اولا احنا مش علي قد ايديهم يبعدوا عننا وقت ما يحبوا ويقربوا وقت ما يحبوا ، ثانيا انا قولتلك ان الناس دي اخلاقهم غير اخلاقنا ولازم نبعد عنهم ثالثا متنساش ان معني ان نقبل عزومتهم اننا لازم نرد العزومة وانت عارف طبعا الظروف الايام دي بعد ما قعدت من شغلك مش هنقدر نعزمهم .
نظر اليها سامي بأعجاب وقال لها : مفيش ولا كلمة قولتيها غلط ، برافو عليكي بجد ، بالمناسبة صحيح انا بكره رايح اقدم علي شغل جديد أدعيلي ربنا يكرمني فيه .
سهام : أن شاء الله ربنا هيكرمك .
في اليوم التالي عاد سامي في الظهيرة وواضح عليه معالم الحزن !!
سهام : مالك يا سامي ؟
سامي : مفيش حاجة .
سهام : قدمت في الوظيفة الجديدة ؟
سامي : روحت وياريتني ما روحت .
سهام : ليه كده ؟
سامي : وظيفة تعبانة ومرتبها ضعيف ومش هنعرف نعيش به .
سهام : طيب كنت اشتغلت فيها مؤقتا علي ما تشوف وظيفة احسن .
سامي : ونرجع تاني للمرتب الضعيف والفلوس اللي مش بتكفي وللمشاكل دي !! ولا نسيتي ؟؟
سهام : انت لسه فاكر !!! لا يا سامي بعد اللي حصل ده كله انا تفكيري اتغير كتير اوي عن الاول .
سامي : بردو يا سهام الوظيفة دي مش هتنفعنا .
سهام : طيب ناوي تعمل ايه ؟؟ الفلوس اللي معانا قربت تخلص !!
وقف سامي يفكر قليلا وقال : انا فكرت كتير لقيت فكرة جميلة جدا ممكن تخلينا نعيش عيشة ممتازة لكن عارف انك هترفضي .
سهام : ايه هي الفكرة دي ؟؟
سامي :
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية المتعة الحرام الجزء الثالث)
