رواية المبروكة الفصل الحادي والعشرون 21 بقلم رشا منصور

رواية المبروكة الجزء الحادي والعشرون

رواية المبروكة البارت الحادي والعشرون

رواية المبروكة الحلقة الحادية والعشرون

نهي…. أول ما وصلت البيت حكيت لهم ع كل حاجه ما انتوا عارفين إني صريحة احم احم 😕
وتاني يوم روحت شغلي عادي جدا وخلصت وطلعت أقعد في كافيه أشرب قهوة واقعد أفكر في كل حاجه بالترتيب وافتكرت أنى بقالي فتره مروحتش ل مها بنت أخت الست لواحظ ع الرغم أنى مخصصه لها مبلغ شهري والجن بيبلغني الاخبار بس ده ميمنعش أني ازورها ما هى زي حالاتي لأ أم ولا أب ولا أخوات
خلصت قهوتى ومجرد ما خرجت من الكافيه في لحظه كنت عند مها والبركه في صرماط
واطمنت عليها وقولتلها إني هجيب لها شقه في منطقة كويسه بعيد عن الحارة بس قالت ليا بلاش علشان مدرسة الاولاد قولت لها بسيطه أنقل الاولاد وادخلهم مدارس لغات كمان وجوزها أول ما شافني اتخض كأنه شاف عفريت معرفش ليه 😏
قولت له متخافش أنا رشا منصور لو ناويه لك ع حاجه هعملها وأنا قاعدة في بيتي وبشرب قهوتى مش محتاجه اجيلك مخصوص اقعد واسمعني
وعرفتهم أنهم يجهزوا أهم حاجه بالنسبة لهم وأنا هجيب لهم شقه بأسمها طبعاً وافرشها كمان بس عند نهاية السنه الدراسيه بعد شهرين علشان مضيعيش ع أولادها سنه في المدرسه
وبمجرد خروجى قولت ل صرماط عاوزة اتفرج على محلات الملابس أنا هبقي نجمه في التليفزيون ولفيت واشتريت حاجات كتير أوى وطبعاً منسيتش اللى فى البيت وعزيز أولهم حبيب قلب ماما
ووصلت البيت وكلهم فرحوا بالحاجات الجديدة وخصوصاً عزازيل اللى أول ما اتقفل باب الاوضة فضل يطير بالهدوم واللعب بتاعته كأنه بيلعب ماتش تنس يحدف اللعبه ويطير يمسكها الناحية التانية 😂😂
اة يا قلب ماما أنا بعمل كل ده علشانك أنت لازم زى ما لك مكانه في عالم الجن لازم يبقي لك مكانه في عالم البشر والكل يعملك حساب ده أنت إبن المبروكة
وعدت الأيام وجه يوم البرنامج اللى كان الساعه 5 مساااء
بس كان المطلوب اروح قبلها بساعتين ع الأقل علشان مراجعه الأسئلة وتظبيط الصوت والاضاءة المناسبة ليا
منكرش أنى كنت متوترة جدا خصوصا إني لوحدى ومعرفش حد لكن لقيت صرماط قدامي قالي أنا معاكي اطمني…. الاهتمام حلو مافيش كلام
وابتدي البرنامج وفي الأول المذيع اتكلم عن اكتشافي للمقبرة وازاى حسيت بها ومرة واحدة لقيته بيقول
المذيع….. مدام نهي المخرج كان قال لنا أن أول مرة شافك فيها أنك اختفيتي فجأة من قدامه يا تري ده حقيقة ولا تهيؤات ولا لكي في شغل السحر 🤨
نهي….
بصيت له وأنا متغاظه وقولتله أنا من صغري كنت أوقات بلاقي نفسي في مكان غير مكاني لمجرد التفكير فيه بس مكنتش بقول لحد كنت بخاف زمايلي يخافوا مني بس لما كبرت فضلت ابحث عن الموضوع ده عرفت أن أسمه الاسقاط النجمي
المذيع….
نعم اللى هو إزاى يعني قصدك زى الافلام الاجنبيه بصيتي للنجمه وحققت لكي امنيه 😏
نهي…
طريقه كلامك فيها سخرية بس هقولك ع حاجه تانيه كمان أنا بقدر أعمل أى حاجة عوزاها وأنا قاعدة في مكانى
تحب تجرب حركت ايدي اتجاهه راحت كوبايه الميه بووووم غرقت وشه
قولت له يمكن الميه تفوقك وتخليك تكلم معايا بأسلوب محترم عن كدا وشاورت بأيدي راح اتحرك هو والكرسي واتخبط في الحيطه ووقع على الأرض
وطبعاً كل ده ع الهواء قدام كل الناس وسيبت الاستوديو وروحت ل مدير الانتاج قولت له لو سمحت عاوزة اقطع العقد اللى مضيته معاكم أنا جيت ع أساس أن البرنامج لمساعدة الناس مش علشان تجيبولى واحد يسخر مني
مدير الانتاج….
أنسي المذيع خالص ده أنتي لقطه ده أنا اغير اصطف البرنامج كله لكن أنتي تفضلي والعقد هنعمل واحد جديد بمبلغ أعلي أقعدي بس وروقي واتصل بالمساعد وقاله هاتلي المخرج والمذيع حالا هنا دلوقتي وهات كوبايه ليمون للأستاذة
نهي….
قعدت بكبرياء وخصوصاً لما دخل المذيع بصيت له من فوق لتحت بقرف راح قالي
المذيع ….
انتي إزاى تحركي الكرسي وتخليني اتخبط في الحيطه ع الهواء قدام الناس شكلي ايه دلوقتي
نهي….
حطيت رجل ع رجل وقولت له زى ما كلمتني بسخرية قدام الناس كان لازم افوقك لنفسك بردو قدام الناس
كونك متعرفش أنا مين أو قدراتي ايه ده ميديش لك الحق أنك تتكلم معايا بتريقه أنا في الأول والآخر ضيفه في البرنامج يعني أقل حاجه المفروض تكلمني بأحترام ولا محدش علمك تكلم الناس بأدب
المذيع….
انتي زودتيها أوى وأنا سكتلك بس علشان أنتي واحدة ست لولا كدا كان بقي ليا تصرف تاني معاكي
نهي …..
تصرف تاني 🤔🤨بصيت له وخليت صرماط يرفعه من الأرض وثبته في السقف حبيبي يا صرماط
وقولت له أقسم بالله لو ما اتكلمت بأدب أنا بقي اللى هعلمه لك أنت واللى يشددلك
المخرج….
اهدي بس يا مدام نهي هو معرفش حضرتك كويس نزليه بس واعتبريه مش موجود في البرنامج خالص ومتزعليش نفسك ابداااا
مدير الانتاج…..
بص للمذيع وهو في السقف وقاله أنا لما جبتكم هنا كان علشان تعتذر للأستاذة مش علشان تغلط فيها حلال اللى اتعمل فيك المفروض أنك مذيع يعني أسلوبك دبلوماسي
مدام نهي إحنا آسفين جدآ لحضرتك ونبدأ صفحه جديده مع بعض واختاري المذيع اللي يعجبك
نهي….
شاورت بأيدي وقع المذيع ع وشه وسنانه جابت د-م بصيت لهم وقولت يطلع على الهواء ويعتذر ليا الأول
مدير الانتاج…..
بصيت للمذيع وقولت له سمعت المدام قالت ايه اتفضل نفذ ولازم تفهم وجودك في البرنامج متوقف عليها هى
المخرج….
أنا طلعت فاصل اعلاني تسمحي نرجع نكمل البرنامج اتفضلي معايا يا مدام نهي وأحنا هنفذلك كل طلباتك
بصيت للمذيع وقولت له روح اغسل وشك بسرعه
نهي….
بصيت ل مدير الانتاج وللمخرج قولت لهم أنا بعتذر ع اللى حصل بس أنا متعودتش أنى اتهان ومكنش ينفع أسكت أنا هرجع أكمل الحلقه وخرجت مع المخرج
المخرج…..
يلا هنبدأ ع الهواء 3,2,1 هوااااااء
المذيع….
رجعنا تاني أعزائي المشاهدين ومعانا ضيفتنا الأستاذة نهي وأنا بعتذر لها قدام الجميع أنا طبعاً مقصدتش ابدأ أنى اشكك في قدراتها بس حبيت أن كل السادة المشاهدين يشوفوا بنفسهم اننا معانا ضيفه مميزة جدا
نهي…..
أنا سعيدة جدا بوجودى في البرنامج واتمني لو أقدر اساعد الناس بقدراتي دى أنا ولله الحمد عندى القدرة على حاجات كتير ودى يمكن حاجه ربنا اصطفاني بها عن باقي الناس وأن شاء الله قريب جدا هفتح مكتب لخدمة الناس
وحل مشاكلهم
المذيع…..
ده خبر كويس جدا وبكدا تقدري تساعدى أكبر عدد ممكن
نهي ….
بخصوص إني بتنقل من مكان ل مكان أنا بصراحة نفسي اكون مكان الاستاذ اللى واقف على الكاميرا فوق ده وفي لحظه كنت واقفه مكانه وهو قاعد على الكرسي بتاعي
وباقي الكاميرات والإضاءة كانت متسلطه عليا
ورجعت تاني ع الكرسي والاستاذ رجع مكانه ع الكاميرا
المذيع….
فضلت ابصلها 👀وابص للراجل وخايف انطق أحسن اتعلق في السقف تاني بس منكرش أن علامات الدهشة كانت واضحة على وشي
نهي….
بصيت للمذيع وأنا عارفه بكل اللى بيدور في دماغه وقولت له أنا حبيت قبل نهايه البرنامج اعرف المشاهدين قدرتي على التنقل وأنها حقيقة مش تهيؤات
وخلص البرنامج ولقيت كل اللى فى الاستوديو بيسقفولى واللى يقولى بركاتك يا ست الشيخه
والمخرج ومدير الإنتاج قالولى اتفضلي معانا لكتابه العقد الجديد بالمبلغ اللي يعجبك
قولت لهم مافيش مانع بس ياريت تكتبوا إسم الشهرة بتاعي “المبروكة” ده الإسم اللى معروفه به وسط الناس
وياريت يكون ده إسم البرنامج
ورجعت البيت بعد ما مضيت العقد واخدت صورة منه معايا وأول ما دخلت لقيتهم جايبين تورته كبيرة ومشغلين أغاني وبيحتفلوا بيا ومرات عمي زغرطت وقالتلي الله أكبر عليكي كنتى قمر خايفه عليكي تتحسدي
ولقيت سعيد جايب ليا سلسله مكتوب عليها المبروكة
كنت مبسوطه أوى وأخدت عزيز في حضني وفضلت الف به واقوله كله علشانك يا قلب ماما علشان تبقي فخور بيا
وسمعته بيقولى
افتخر بكوني أبنك وخادمك المطيع يا مولاتي
وقضينا كلنا سهرة جميله واخدت عزيز وطلعت اوضتي بصراحه كنت مجهدة جدا بس أول ما قفلت باب الاوضة لقيت 😲