رواية العرافة العجوز الفصل الخامس 5 بقلم عادل عبدالله

رواية العرافة العجوز الجزء الخامس

رواية العرافة العجوز البارت الخامس

رواية العرافة العجوز الحلقة الخامسة

جرت تغريد منه ” تضحك ” وتقول : لو عرفت تمسكني .
فريد ” ضاحكا ” : بقي كده ؟!! طيب ورحمة ابويا ما حد هيخلصك من ايدي الليلة .
بعد مرور عدة أيام من الفرح ….
تغريد : فريد يا حبيبي ، النهاردة صحباتي جايين يباركولي .
فريد: يا مرحب بيهم ، يشرفوا في اي وقت .
تغريد : شوف بقي لو عايز تنزل او تعمل اي مشوار علشان متزهقش من القعدة لوحدك .
فريد : هما هيقعدوا معاكي كتير ؟
تغريد : مش هيقعدوا كتير أوي ، بس انت عارف بقي قعدة البنات كلها رغي وكلام كتير ، وبصراحة هما كمان وحشوني اوي اوي وهنقعد مع بعض شوية .
فريد : خدي راحتك مع أصحابك يا قلبي وانا هتصرف ، او ممكن اقعد معاكم لو مش هتتضايقو ؟؟
تغريد : بتحب انت قاعدة البنات ؟ هااا !!!!!
فريد ” يضحك ” : مش واجب عليا أني ارحب بضيوفك ؟ ( ويضحك ويضمها برفق ) قلبي يا نااااس ، بتغيري عليا يا توتاااا ؟؟
تغريد ” تضحك ” : ايوه طبعا مش أنت حبيبي ولا ايه ؟!
فريد : ربنا يخليكي ليا يا توتا ، وأنا عمري ما عيني هتشوف ولا قلبي يحب غيرك .
تغريد : أنا بتكلم جد بقي ، ممكن تسلم عليهم وتقعد خمس دقايق بس ترحب بيهم وتقوم علشان اكيد هما مش هياخدوا راحتهم وهيتكسفوا وانت موجود يا حبيبي .
فريد ” يضحك اوي ” : طيب تعالي نلحق ناخد شوية عسل قبل ما ييجوا ويعكننوا عليا .
وبعد حوالي ساعة كان فريد خرج من الحمام وقعد في الريسبشن وكانت تغريد في الحمام بتاخد شاور رن جرس الباب ترررن ، تررررن .
تغريد : قوم يا دودي شوف الباب ، أكيد البنات وصلوا .
قام فريد وفتح الباب واستقبل ثلاثة بنات جميلات…..
فريد : اهلا وسهلا ، أتفضلوا .
أحداهن : لو سمحت تغريد موجودة ؟
فريد : ايوة موجودة ، اتفضلوا .
: اومال هي فين ؟
فريد : جوه ، اتفضلوا .
دخلت البنات وظلوا يبحثوا بأعينهم عن تغريد ولم يروها !!
: اومال هي فين تغريد ؟؟!!!
فريد : بتاخد شاور وخارجة حالا .
: احنا اسفين اوي ، الظاهر أننا جينا في وقت مش مناسب .
فريد : لا ابدا ، ده احنا كنا منتظرينكم من بدري .
قام فريد أحضر لهم بعض الحلوي والشيكولاته و المشروبات المثلجة وجلس معهم حتي خرجت تغريد بعد دقائق .
البنات جلسوا مع فريد وشعرن بالخجل منه ، فيما عدا دعاء التي كانت أكثرهن جرأة فقالت له : أنا هعرفك بينا ، علي ما تغريد تيجي أعرفك بينا أنا اسمي دعاء صحبة تغريد من زمان أوي من أيام الطفولة .
فريد : أهلا بيكي .
دعاء : أما دي بقه هاجر صحبتنا بردو من زمان اوي ، بس هي بتتكسف أوي .
فريد : أهلا وسهلا .
دعاء : و دي بقه سمر صحبتنا من أيام ثانوي وأكثر من أختنا .
فريد : أهلا بيكم ، علفكرة تغريد بتحبكم كلكم جدا وكلمتني عنكم كتير .
بعد دقايق خرجت تغريد من الحمام وجرت الي صحباتها وضمتهم اليها ورحبت بهم بلهفة قوية …
تغريد : وحشتوني اوي أوي يا بنات ، كنت هتجنن واشوفكم .
دعاء ” تضحك ” : وحشناكي ازاي بقه .ده انتي تلاقيكي مش افتكرتينا اصلا الا لما اتصلت بيكي !! أكيد يا قلبي طبعا من لقي احبابه نسي اصحابه !!
تغريد : لا والله وحشتوني أوي بجد ، أنتو مش عارفين أنتو ايه بالنسبالي ؟!! ده أنتو أكتر من أخواتي .
” تركهن فريد ودخل الغرفة أثناء ترحيبها بهن ” .
دعاء ” تغمز لتغريد ” : قوليلي بقي يا قلبي اي اخبار الجواز معاكي ؟ حلو ؟؟
تغريد ” تضحك ” : طبعا حلو ، وحلو أوي كمان ، واحلي حاجة لما تكونوا بتحبوا بعض ، بيبقي أحلي حاجة في الدنيا .
دعاء ” تضحك ” : بت يا توتا هو فريد جوزك ده معندوش اخ ولا قريب يكون حلو كده احبه واتجوزه ؟؟
تغريد ” تضحك ” : لا أخواته متجوزين الاتنين ، ولمي نفسك يا دودو علشان اللي هتقرب منه هتزعل مني .
تضحك تغريد ودعاء وباقي صحباتهما ولكن دعاء من داخلها كانت تحسد تغريد علي زوجها فريد وعلي سعادتها الواضحة عليها !!!!!
تغريد : تحبوا تشربوا ايه ؟
دعاء : مش هنشرب حاجة ، خلينا قاعدين مع بعض أحسن .
تغريد : لأ ، لازم تشربوا حاجة .
دعاء : طيب اعمليلنا قهوة ، وحشتني القهوة من ايديكي .
تغريد : وأنا كمان عايزة اشرب قهوة ، دقايق وأرجعلكو بالقهوة .
فريد دخل بدل ملابسه وقال لتغريد : عايزه مني حاجة يا توتا قبل ما انزل ؟
تغريد : رايح فين يا دودي ؟
فريد : نازل اقعد مع اصحابي شوية .
تغريد : يعني هتقعد مع اصحابك وتسيبني ؟!!!
” ضحك فريد ” : اشمعني انتي تقعدي مع صحباتك وأنا لأ ؟؟؟
ضحكت تغريد وقالتله : طيب متتأخرش يا حبيبي .
نزل فريد ووقفت تغريد تعمل القهوة في المطبخ ، بينما أمسكت دعاء بهاتف تغريد وفتحته وظلت تعبث به !!!
هاجر : بتعملي ايه يا دعاء ؟؟
دعاء : بشوف حاجة .
هاجر : عيب كده لما تفتحي موبايل صحبتك وهي مش موجودة !!
دعاء : أنتي قولتي صحبتي ، صح ؟!! علشان هي صحبتي بقي مش عيب أمسك موبايلها ، وعموما أنا مش بعمل حاجة من وراها ، أنا هفضل مسكاه لغاية ما تيجي !!!!
عادت تغريد بعد صنع القهوة فوجدت دعاء تمسك بهاتفها .
قالت لها دعاء : أنتي مش معاكي رقم تليفون ياسمين ؟
تغريد : ياسمين مين ؟؟
دعاء : البت ياسمين اللي كانت معانا في اعدادي ؟
تغريد : اااه ، ياسمين ، وايه اللي فكرك بيها ، دي من زمان مشيت هي واهلها ومعرفش عنها حاجة !!!
دعاء : أفتكرتها من يومين ، وقولت ممكن يكون معاكي رقمها ؟؟
تغريد : لا مش معايا .
دعاء : طيب خلاص ، خلينا بقي في المهم ، احكيلنا بقي .
تغريد : أحكي ايه ؟
دعاء : احكي يا توتا عملتوا ايه بعد الفرح ؟؟
هاجر ب ” خجل ” : بطلي يا بت قلة أدب .
دعاء : علشان خاطري يا توتا احكيلنا .
تغريد ” ضحكت بخجل ” : أحكي ايه يا بنتي ؟؟ أنتي اتجننتي ؟!!
دعاء : عايزة اعرف علشان خاطري ، قولي بقي .
ضحكت تغريد ثم بدأت تحكي لهم وهن يضحكن جميعا في سعادة بالغة !!
نزل فريد وقابل اصدقاؤه وقضي معهم اليوم بأكمله حتي المساء ولم يعود للمنزل الا في وقت متاخر ليلا !!
تغريد : اي يا فريد التأخير ده كله ؟؟ معقول سايبني وقاعد كل ده مع أصحابك !!!
فربد : معلش يا توتا كنت من فترة مش قابلتهم علشان كده الوقت سرقنا وأتأخرت ، وقولت اسيبك براحتك مع صحباتك .
وبعد ايام عاد فريد الي عمله وكان يعود الي منزله سريعا في موعده بكل لهفة لزوجته دون تأخير .
ولكن بعد عدة ايام تغيرت أحواله و أصبح يتأخر في عودته من عمله الي البيت !!!
شعرت تغريد بالضيق بسبب تأخير فريد المتكرر
وقالت له : مش هينفع يا فريد كل يوم ترجع متأخر بالشكل ده !!!
فريد : أوعدك يا قلبي مش هتأخر عليكي تاني أبدااا .
تغريد : نفسي أعرف بتروح فين بعد الشغل ؟
فريد : أحيانا بتأخر في الشغل وأحيانا بقابل أصحابي علي الكافية .
تغريد : بليز يا حبيبي بلاش قعدة الكافية دي ، أنا بصراحة بكون خايفة اوي وأنا لوحدي في الشقة .
فريد : بتخافي من ايه يا حبيبتي ؟ معقول حد يخاف وهو في بيته !!
تغريد : مش عارفة يا فريد بس أنا أحيانا بحس بحاجات غريبة هنا .
فريد : يعني ايه حاجات غرببة ؟؟
تغريد : يعني أحيانا بحس أن فيه حد معايا في الشقة !! وأفضل أدور في الشقة كلها مش بشوف أي حد !!
” ضحك فريد ضحكة عالية جدا طوييييلة !! ”
نظرت له تغريد بتعجب : بتضحك ليه كده ؟؟
فريد لم يستطع أنهاء ضحكاته وظل يضحك بصورة شبه هيستيرية !!
تغريد ” بعصبية ” : فريد بطل رخامة وقولي بتضحك كده ليه ؟ أنا بدأت أخاف منك !!!
فريد يحاول ” يكتم ضحكاته ” : أسف يا قلبي ، أصل انا مش متخيل أنك جبانة أوي للدرجة دي !!!
تغريد : أنا جبانة ؟؟ أنا جبانة يا فريد ؟؟
فريد : يا حبيبتي اللي بيخافوا يقعدوا لوحدهم كده الأطفال الصغيرين مش العرايس الحلوين اللي زيك !! وعموما دي كلها تهيؤات بيهيأهالك عقلك الباطن من أفلام الرعب اللي بتحبي تتفرجي عليها .
تغريد : مش تهيؤات يا فريد ، أنا زي ما أنت بتقول بحب أتفرج علي أفلام رعب يعني قلبي جامد ومش بخاف ، لكن أنا فعلا بحس أن فيه حد معايا في الشقة وأنت مش موجود !!!
فريد : مين يا حبيبتي اللي هيكون معاكي في الشقة غيري ؟!! بقولك دي كلها تهيؤات ، حاولي تلغي الأفكار دي من دماغك هتلاقي نفسك مش بتحسي بأي حاجة من اللي بتقوليها دي .
تغريد : المهم يا حبيبي علشان خاطري حاول متتأخرش تاني عن البيت .
فريد : حاضر يا قلبي خلاص دي أخر مرة أتأخر فيها ، بعد كده هخرج من الشغل علي البيت علطول .
وبدأ فريد ينتظم في رجوعه من عمله الي البيت بدون تأخير .
لكن الغريب أن فريد بدأ يلاحظ وجود دعاء صديقة زوجته تغريد كتيرا حين عودته من عمله كل يوم !!!
حتي بدأ يشعر فريد بالضجر منها فسأل زوجته : أنا نفسي اعرف يا توتا صحبتك دعاء دي كل يوم بتزورك ولا أنا بيتهيألي ؟؟
تغريد : مش مسألة بتزورني ، هي بتيجي كل يوم تقعد معايا عادي .
فريد ” بعصبية ” : يعني ايه عادي ؟؟ لأ مش عادي طبعا !!! لما حد يزور حد كل يوم !!!
تغريد : طيب أهدا بس يا حبيبي انت متعصب ليه ؟!
فريد : متعصب علشان دي مش اصول ، وأنا كمان من حقي لما أرجع بيتي ألاقي مراتي قعدة مستنياني ، مش قعدة مع صحبتها !!!
تغريد : يا حبيبي بعد أنت لما بتنزل الصبح وأنا بخلص ترتيب البيت وعمل الأكل بكون فاضية وبزهق من القعدة لوحدي ، علشان كده أنا اللي طلبت منها تيجي تقعد معايا .
فريد : ودعاء صحبتك دي فاضية للدرجادي علشان تجيلك كل يوم ؟!!
تغريد : أيوه هي مبتشتغلش واغلب اليوم بتكون قعدة فاضية وزهقانة علشان كده قولتاها تيجي كل يوم تقعد معايا شوية .
فريد : لو أنتي بتزهقي بالشكل ده ممكن تنزلي تقعد مع ماما شوية أو مع هند أو سمية .
تغريد ” بعصبية ” : لأ طبعا .
فريد ” بتعجب ” : لأ ليه ؟
تغريد : لأسباب كتير اوي .
فريد : ايه هي الأسباب دي ممكن اعرف ؟؟
تغريد : أولا مامتك وسمية وهند مبيحبونيش .
فريد : مين بس اللي قالك كده ؟؟!
تغريد : بيبان يا حبيبي ، بيبان من عينيهم ومن كلامهم .
فريد : لا يا حبيبتي ، أنتي ظلماهم ، بالعكس هما بس مستنيين أنك تقدمي الخطوة الاولي وتنزلي تقعدي معاهم وهتلاقي معاملتهم معاكي حلوة جدا وهتعرفي أنهم بيحبوكي جدااا .
تغريد : لا لا لا ، أنا عارفة كويس أنهم مبيحبونيش من ايام الخطوبة ، ثانيا بقي أنا لو نزلت لمامتك أكيد هتنتظر مني أني أنضفلها الشقة أو أعملها أكل ، وأنا يا حبيبي مليش في الجو ده .
فريد : مش فاهم يعني ايه ملكيش في الجو ده ؟؟؟
تغريد : يعني جو الحما ومرات الابن اللي تخدمها والجو القديم ده أنا مليش فيه .
فريد : يعني هوه عيب لما تعملي حاجة لحماتك كدليل علي حبك ليها وحبك لابنها ؟! ما عندك هند مرات شريف وسمية مرات أسامة بيعملوا كل حاجة لماما !!!
تغريد : اسمع يا فريد ، انا بقولك اهو من اولها ، لو في دماغك أني انزل اخدم مامتك يبقي اروح أقعد في بيت أهلي أحسن لي ، أنا مش خدامة لحد . بقلم الكاتب عادل عبد الله
فريد : خدامة !!! مين بس اللي قال أنك خدامة يا قلبي ؟!!
تغريد : انا اللي بقولك اهو لو هتفكر أني ممكن أخدم مامتك أو اي حد من أهلك يبقي كل واحد يروح لحاله من دلوقتي قبل ما يحصل حمل ويبقي بينا عيال .
فريد : ياااه للدرجادي ؟؟!!
تغريد : أيوه يا فريد أنا مش خدامة لحد ، أنا في بيت بابا كنت مش بشيل ملعقة من مكانها ، يعني تحمد ربنا اوي اني بخدمك انت .
فريد : كمان ؟؟ لا بجد كتر خيرك اوي !!!
تغريد : ايه ؟؟ كلامي مش عجبك ؟؟
فريد : طيب قومي هاتي أكل علشان راجع من بره جعان .
دخلت تغريد للمطبخ تعد له الطعام ، بينما دخل فريد غرفته يبدل ملابسه .
تغريد في المطبخ اتصلت بأمها وحكيت لها ما حدث مع فريد ….
تغريد : شوفتي يا ماما .
ام تغريد : خير يا حبيبتي فيه ايه ؟
تغريد : الاستاذ فريد النهاردة بيقولي أنتي ليه مش بتنزلي تقعدي مع ماما وهند وسمية ، حسيت من كلامه أنه بيجر رجلي علشان أنزل اخدم أمه !!!
أم تغريد : أوعي تكوني وافقتي ؟!!
تغريد : لأ طبعا موافقتش وقولتله انت مش جايبني خدامه لأمك .
أم تغريد : قولتيله كده ؟؟
تغريد : أيوه .
أم تغريد : برافو عليكي ، عارفة لو كنتي وافقتي ونزلتي عملتلها حاجة كانوا هياخدوا علي كده ويعملوكي خدامة عندهم .
تغريد : أيوه ، أنا فاهمة علشان كده رفضت ، لكن حسيت ان فريد زعل !!
ام تغريد : هيزعل شوية وبعدين يروق بعدها ، لكن مش هيطلب منك حاجة زي كده تاني .
بعد يومين فوجئ فريد بوجود طلب صداقة من دعاء علي الفبس !!!
في البداية فريد لم يعرف من صاحبة طلب الصداقة ، فأرسل لها رسالة ………
فريد : انتي مين ؟
دعاء : انا واحدة معجبة .
فريد : ماشي يا معجبة ، بردو أنتي مين ؟
دعاء : انت تعرف كام واحدة معجبة بيك ؟