رواية السر القديم الفصل الأول 1 بقلم علاء جمال
رواية السر القديم البارت الأول
رواية السر القديم الجزء الأول
رواية السر القديم الحلقة الأولى
السلام عليكم. عندي مشكلة وكنت حابة اعرضها عليكم علشان تستفادوا من تجربتي دي ومتتخدعوش زي منا اتخدعت.
انا ابتهال” عندي 26 سنة متجوزة بقالي أربع سنين من شاب اسمه نبيل شافني صدفة واتقدملي واهلي شافوا إن هو مناسب وانا مكنش عندي اعتراض واتجوزنا وبقالنا دلوقتى اربع سنين عايشين مع بعض.
وفي الأربع سنين دول عشت في عذاب ميتوصفش من حماتي اللي بتكرهني بدون سبب وبتعاملني اسوأ معاملة في الدنيا، ودايما بتقلل مني وبتحقد عليا معرفش ليه. مع إني عمري ما زعلتها ودايما بعاملها كويس وبراعيها في كل حاجه.
هي صحيح عايشة في شقة تانية غير شقتنا في الدور اللي تحت مننا علي طول. لكنها طول اليوم بتطلع عندي في الشقة وتقعد تدخل في حاجات ملهاش فيها، حتى لبسي بتقعد تعترض عليها وتقولي البسي ده ومتلبسيش ده، وانا كنت بحاول اعدي علي قد ما اقدر واقول دي ست كبير والوحدة ممكن تكون تعباها وعشان كده بتدور علي اي حاجه تشغل وقتها بيها حتى لو الحاجة دي إنها تدخل في حياتي وتضايقني.. وجوزي بقي ده عايش مع نفسه خالص مش بيهمه غير راحته وبس. ومهما شكيت او حكيت ولا بيهتم ولا بيعمل حاجه.
كل ده يعتبر عادي وممكن الواحدة مننا تعيش معاه يعني وتتحمله. لكن الموضوع تطور اوي ودخل في طريق تاني.
والطريق ده كان سبب أن حياتي تدمر والقصة بدأت في السنة التالتة من جوازي .
في يوم كان جوزي لسة مرجعش من الشغل وانا جهزت الأكل ورتبت البيت وقولت ادخل أريح شوية علي ما نبيل ييجي‘ دخلت اوضة النوم وتمددت على السرير وغرقت في النوم ‘ بس مكنتش نايمة مرتاحة حاسه بحاجات غريبة بتتحرك علي السرير وعلي جسمي.
اتقلبت وحاولت أنام لكن مفيش فايدة جسمي ابتدأ ينمل ولسه مازالت الحركة الغريبة علي السرير موجودة. مديت ايدي وحسيت بملمس حاجات كده غريبة بتتحرك.
قومت نص قومه كده ونورت الاباجورة اللي جنب السرير.
وبصيت على السرير انتفضت من مكاني مفجوعه وخايفه وجسمي كله مقشعر من الخوف. السرير كان مليان حشرات سوداء شكلها مقرف ويخوف شبه الدبابير اللي بتقرص دي .
جريت وأنا بصوت عشان حد يلحقني وانا بجري لبره ، اتخبطت فى جوزى مسكني من ايدي ووقفني وهو بيسالني.
” في ايه !مالك بتجرى كده ليه؟
قلت له اللي حصل. وقرر يدخل يشوف في إيه.
دخل الاوضة وانا وراه ماسكة في هدومه وميتة في جلدي من الخوف.
وفجأة بصلي بقرف وقال.
-فين الحشرات اللي بتقولي عليها ؟
بصيت علي السرير لكن مكنش في حاجة موجودة
-والله يانبيل السرير كان مليان حشرات وطلعو علي جسمي كمان‘ انت ليه مش مصدقني؟
-طلعو على جسمك! ياريتهم موتوكي و كنا ارتحنا يعني مرة تقوليلي حشرات ومرة تقوليلي الحنفية كانت بتنزل دم وانتي بتغسلي وشك ومرة تقوليلي بتسمعي أصوات صراخ بالليل‘ يا بنتي بطلي كدب بقي تعبتيني معاكي. والله لها حق أمي تكرهك.
سبني ونزل تاني‘ وأنا صعبت عليا نفسي في اللحظة دي وقعدت أبكي لوحدي‘ وافتكر كلام أهلي وكلام حماتي وحتى الجيران .كلهم بيتريقو عليا وبيقولو عني مجنونة ومحدش بيصدق إني فعلا بتحصلي حاجات غريبة. بس اعمل ايه الحاجات دي بتحصل معايا انا بس وبتحصل لما بكون لوحدي. ولا بعرف اخلي حد يشوف انا بيحصلي ايه. ولا بعرف اثبت ان انا فعلاً بيحصلى حاجات غريبة. وكنت دايما اقول إن العيب في الشقة هنا. لان الحاجات دي عمرها ما حصلتلي وانا في بيت أهلي. وحتى أول سنين جواز كنت عايشة طبيعية ومفيش اي حاجه خالص.
وأنا قاعدة بتكلم مع نفسي حسيت بحركة بتحصل في الصالة وفي صوت جاي من هناك
قولت لنفسي ‘ اكيد نبيل رجع ‘ طلعت عشان اشوفه واجهز له الأكل بالمرة . لكني ملقتهوش في الصالة‘
سمعت صوت خبط في المطبخ‘ أكيد دخل يحضر لنفسه الأكل ‘ لانه متعود لما يكون مضايق او زعلان مني يا اما يروح ياكل عند مامته يااما يدخل يعمل اكل لنفسه .
دخلت المطبخ واول ما دخلت
وشوفت أبشع منظر ممكن يشوفه إنسان‘
نبيل كان واقف قدامي وفي ايده سكين كبير أوي عليه دم ورأسه مقطوعة ومرمية على الأرض وجسمه واقف عادي كأن مفيش حاجة حصلت له. وفي نافورة دم بتخرج من رقبته والمكان اللي كانت الرأس موجودة فيه قبل ما تتقطع..
فجاة الرأس أتكلمت بصوت غريب وعالي بشكل لا يمكن إنسان يتحمله.
“هدمرك يا ابتهال هدمرك وهيكون موتك على إيدي..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية السر القديم)
تعليق واحد