رواية البر التاني الفصل الثامن والخمسون 58 بقلم لولو محمد
رواية البر التاني الجزء الثامن والخمسون
رواية البر التاني البارت الثامن والخمسون
رواية البر التاني الحلقة الثامنة والخمسون
سمر / انتى عاوزه ايه
فيرا/ اصل يا حرام ابنها الكبير اتخطف
سمر تقف و تصرخ و هى بتعيط
سمر / قولى عاوزه منى ايه عاوزه ايه ارحميني و قولى عاوزه ايه
فيرا / انتى بتاعتى فاهمه و لا لا
سمر / فاهمه فاهمه بس ابوس ايدك سبيه دا يتيم ما لوش ذنب ابوس ايدك ارحميه
فيرا / ارحميه انتى و اتعدلى معايا
سمر / قوليلى عوزانى اعمل ايه و انا اعمل والله هعمل هعملك كل اللى انتى عوزاه بس روحى الواد لامه ابوس ايدك
سمر تحاول تبوس ايد فيرا فيرا تسيبها تبوسها و تقف تتفرج عليها و تناولها الحبايه
سمر / خدتها قبل ما رشيد يمشي والله خدتها والله العظيم خدتها
فيرا / رشيد نام معاكى
سمر تهز راسها لا
فيرا / كل الوقت ده مقفول عليكوا باب بتعملوا ايه
سمر / و لا حاجه اقسم بالله ولا حاجه يا بنتكلم يا بتفرج على اليوتيوب يا بيلعب فى الموبايل
فيرا / بيكلم مين
سمر/ ما حدش والله لا بيتصل بحد و لا حد بيكلمه بيلعب بس دا حتى مقطوع من شجره ما لوش حد خالص
فيرا / بتتكلموا فى ايه
سمر / طلب منى الجواز و قالى هياخدنى و يلف بيا الدنيا و اطبخله محشي والله كلها احلام من دى
فيرا / لحق يحبك .. بالسرعه دى وصلت للجواز
سمر / قوليلى عوزانى اعمل ايه و انا اعمل بس سيبى الواد يروح لامه ابوس ايدك
فيرا ا/ وعدك بالجواز و تلفوا الدنيا صح
سمر / انا ما عييش بطاقه اصلا هنتجوز ازاى بس
فيرا / متاكده ان مشكلتك فى البطاقه مش فى حاجه تانيه ؟
سمر تبصلها
فيرا / لما روحتى فيلا الزنايته عملتى ايه
سمر / اقسم بالله حطونى فى اوضه و قفلوا عليا زى الفراخ بيفتحوا يحطولى ميه و اكل و يمشوا والله ما اتكلمت مع حد و لا حد اتكلم معايا اقسم بالله
فيرا / و كنتى بتاخدى الحبوب عادى ؟
سمر / كنت باخدها طبعا امال هعمل ايه
فيرا / مش مرتاحه انتى مش صريحه معايا و انا ما بحبش الشك يدخل فى قلبى انا اسفه مضطره
سمر / انا ببطل الحبوب بالتدريج
فيرا مبتسمه
سمر / بكسر الحبايه و كل يومين اشيل منها جزء
فيرا / و جاب نتيجه
سمر / ايوه وصلت لربع حبايه دلوقت
فيرا / و واقفه قدامى على رجليكي حقيقى برافو
سمر تعيط اكتر
فيرا / زى ما بتلعبى انتى و الكلب اللى اسمه رشيد من ورايا هتلعبى معايا من وراه هو وعدك بالجواز و انا بوعدك بحياه ابن اخوكى و اه اللى وعدك بالجواز كان نايم فى حضنى و انتى فى بيت الزنايته فما تعشميش نفسك اوى
سمر / سيبى الواد يروح لامه و انا هعملك اللى انتى عوزاه
فيرا / بكره هتاخدى الحبايه كامله و بعد بكره هتاخدى الربع حبايه زى ما متعوده انتى و رشيد … هتتوجعى شويه معلش اعتبريه عقاب بسيط على خيانتك ليا
سمر / انا
فيرا / مش هيستحمل تتوجعى هيرجع يزودلك الجرعه و بعدين هتحاولوا تانى و لما توصلى لربع حبايه هتاخدى حبايه كامله و تتوجعى تانى و تالت لحد ما يفقد الامل ان ممكن تبطلى فاهمه و لا لا
سمر تهز راسها و هى بتعيط
سمر / هعملك كل اللى انتى عوزاه بس روحى الواد لامه
فيرا / الواد هيفضل معايا لحد ما تثبتيلى ولائك
سمر / هعمل اللى انتى عوزاه هعمل كل اللى تقوليلى عليه بس بلاش الواد دا عيل و يتيم سبيه
فيرا / انتى فاكره انك هتثبتيلى ولائك بالهبل ده … تؤ دا انتى كدا مجرد بتتعاقبى على خيانتك انما بقى انى اثق فيكي دا حوار تانى خالص
سمر تبص فى الارض و تعيط
فيرا / امسحى دموعك و خدى دوش سخن و ارتاحى عشان لما يجي ما ياخدش باله و اوعى تفتكرى انى هتردد ثانيه انى اقتلكوا انتوا التلاته
سمر تبصلها
فيرا / رشيد بيلعب من ورايا
سمر / هو بس عاوز يساعدنى مش اكتر لكن هو شغال معاكى لكن هو بس
فيرا / انا ما اذنتلوش يلاقى علاج انا قولتله ان اى حد هيدور على العلاج هقتله و هو ما خدش كلامى جد فاختارى تحبى اقتله و لا
سمر / لا لا انا هعمل اللى اتفقنا عليه هقنعه ان الطريقه دى مش جايبه نتيجه انا هعمل اللى انتى عوزاه بس ابوس ايدك ابوس ايدك
سمر تبوس ايد فيرا فيرا تسحب ايدها
فيرا / عاوزه اعرف علاقه رشيد و الزنايته عامله ازاى
سمر / مانعينه يدخل البلد و مسمينه النجس و مش بيحبوه
فيرا / افتحى الحوار تانى كلميه مره و اتنين و تلاته يمكن فى مره يقول كلام تانى
سمر / انتى شوفتى بنفسك عملوا فيه ايه و هم بيسلمونى ليكوا و لا لما هجموا على الفيلا و احنا معاكوا كان ممكن رشيد يتاذى لو كان فى بينهم حاجه
فيرا / الاحتياط واجب برده مفيش مشكله لو عملنا اللى علينا و لا ايه
سمر / حاضر كل اللى انتى عيزاه بس ارجوكى ارجوكى
فيرا تبص فى الساعه
فيرا / زمانه راجع روحى اوضتك و اعملى اللى قولتلك عليه ما ينفعش تجازفى بحياه ابن اخوكى مش بعد اللى عمله عشانك ترديله الجميل بالطريقه دى
سمر تبصلها و تقوم تمسح دموعها و تهز راسها موافقه و تمشى وهى بتقدم رجل و تاخر رجل
فيرا / برن زوس بيكتشرز ( احرق الصور دى )
راجل يلم الصور من على الترابيزه و فيرا تدخل جوه
………………………
فى اوضه مختار
هند / بس دى مجازفه برده يا مختار
مختار / ليه المره اللى فاتت ما كناش عارفين بنلاعب مين لكن المرادى كنت واخد بالى
هند / ما اعرفش بس كان ممكن ما تلاقيش فرصه ما اعرفش كان ممكن ما تمشيش معاك زى ما انت عاوز
مختار / تصدقى لو قولتلك كان نفسى ما تمشيش انا مش حاسس باى متعه فى اللى حصل بالعكس فوز مافيهوش شرف
هند / ما ينفعش تلعب بشرف مع واحد ما عندوش شرف
مختار / كان نفسى يتوجع كان نفسى يحس بالنار اللى جوايا عشان يعرف حجمه كويس
هند / مهو لو فضلت تضرب فيه تلت سنين حتى مش هيتوجع هتعمل ايه يعنى
مختار / تؤ هيتوجع
هند / ازاى بقى ان شاء الله
مختار يبصلها و يبتسم
……………………..
فى شقه فارس
عباده يفتح شقه فارس و يدخل و مغاورى و امين وراه مسندين فارس ياخدوه ينام على كنبه و يدخل اربع رجاله
عباده / مش عاوز بصمه واحده فى المكان كله ياخد باله
راجل / ما تقلقش يا سى عباده
الراجل يرفع ايده بجوانتى
امين / هو البتاع اللى ادتهولك خديجه ده هيشتغل قد ايه ؟
عباده يبص فى الساعه
عباده / قدامنا ساعه الهمه يا رجاله
الرجاله عماله تدور فى الشقه يطلع واحد من جوه شايل علبه فيها دوا يديها لعباده
الراجل / شكلنا مش هنطول كتير يا سي عباده
عباده يفضي شويه من العلبه فى ايده حبوب البى كاى يطلع كيس من جيبه حبوب شبه البى كاى يحطها مكانها فى العلبه
عباده / حطها مكانها
الراجل يخدها و يمشي
عباده / لقيتوا حاجه تانى ؟ حد لقي حاجه تانى ؟
مغاورى يطلع
مغاورى / ركبت الميكرفونات و الكاميرات
عباده / هيفقسها ؟
مغاورى / مش هيبقي فيه دماغ لحاجه
الرجاله تطلع من جوه
امين / كلو تمام
عباده / لسه قدامنا وقت بصوا تانى
راجل / مفيش يا سي عباده والله دورنا كويس
مغاورى / يلا بينا
عباده / يلا .. مرزوق خليك جنبه لحد ما يفوق و ان احتاج اى حاجه اعملهاله و قوله سي مغاورى وصانى عليك
عباده يبص لمغاورى مغاورى يبتسم الراجل يهز راسه الكل يمشي
مغاورى / هى الحبوب اللى انت حطيتهاله دى بتاعه ايه
عباده / هى اختك ما قالتلكش
مغاورى / ما قالتليش غير انها قضت اليوم كله بتحفر الحروف دى على الحبوب بالدبوس المهم طمنى حبوب ايه دى
عباده / ملينات
الكل يضحك
امين / الله يسهلوا
راجل / بس ما تاخذنيش يا عباده ربنا سترها معانا برده كان ممكن تجلى
عباده يفتح باب عربيته
عباده / قصدك على مختار يعني ما يعرفش يوقعه
الراجل / لا اقصد ان الحبوب تكون شرايط مش علبه سايبه
عباده يطلع من جيبه التانى حبوب نفس شكل البى كاى
عباده / و دى تفوتنى برده دا انا دافع فيهم اتناشر باكوا
مغاورى يسيب عربيته و يروح يمسك الشرايط يبص فيها
مغاورى / دا اغلى من تمنهم يا جدع عاملهم فين دول
عباده / فى مصنع اللبان اللى فى اخر البلد صاحبه حبيبي اول ما قصدته ما كسرش بخاطرى
امين / هههههههههههههههه طب يلا يلا ايه ما شافوهمش و هم بيسرقوا هيشوفوهم و هم بيتقاسموا و لا ايه
مغاورى / و احنا مش حراميه و لا مؤاخذه
الرجاله تضحك و يركبوا عربياتهم و يمشوا
……………………
فى اوضه سمر
سمر قاعده على السرير رشيد يفتح الباب و يدخل تقوم تقف و تبصله
رشيد / ناس عاوزه الحرق
رشيد يقفل الباب
سمر / حمد الله على السلامه
رشيد / الله يسلمك … عامله ايه
سمر تهز راسها رشيد يروح يحط ايديه على دراعتها
رشيد / انتى كويسه؟ فى حاجه حصلت و انا بره ؟
سمر / اااام لا انا بس كنت خايفه شويه … فيرا جتلى و قالتلى بدل ما انتى قاعده لوحدك تعالى خفت منها
رشيد / اها
سمر / نزلت قعدت معاها دقيقتين على البول كانوا كتير و انت مش موجود خفت و طلعت قفلت على نفسي الباب
رشيد / اها … اكلتى او شربتى
سمر / لا خالص نهائي
رشيد / تمام خلاص عدى انا جيت
سمر تبصله بحزن
سمر / انت عملت ايه
رشيد / راجل ابن كلب والله الواحد كان نفسه يقتله مش يضربه بس
سمر / بيعمل ايه
رشيد / بيتاجر فى العيال الصغيرة ما سابوش حاجه ولاد الكلب حتى العيال
سمر نفسها يعلا
رشيد / بياخدوهم عيال اللى يتباع على بعضه كام بها اللى ما يتباعش بيتقطع و يتباع حتت
سمر تعيط و تنزل على ركبها و مش عارفه تاخد نفسها رشيد ينزل وراها
رشيد / بس اهدى اهدى
سمر تبصله برجاء
سمر / العيال دى .. مخطوفين ؟
رشيد / البجح بيقول لا بيقول متباعين او لقينهم فى الشوارع… الاهالى بيبعوا عيالهم
سمر / يمكن مش عيالهم
رشيد / ما اكيد مش عيالهم انتى مش شايفه العيال اللى بتتخطف كل يوم
سمر / و هتعمل ايه ؟هتعمل ايه؟ لازم تعمل حاجه لازم نعمل حاجه صح ؟
رشيد / اقدر اعمل ايه ؟
سمر تعيط اكتر
رشيد / سمر
سمر/ العيال دى … دول عيال .. عيال يا رشيد انت كنت زيهم انت عاوزهم يبقوا زيك … يمكن ما يقدروش يبقوا زيك … قدامهم عمر يعيشوه .. احنا خلاص … هم … هم
رشيد يحضنها
سمر / ما لهمش ذنب ما لهمش ذنب يا رشيد
رشيد / اهدى اهدى ان شاء الله تتحل
سمر / فيرا عاوزه ايه من العيال دى هى مش مكفيها الكبار عاوزه من دول ايه كمان
رشيد / اللى فهمته انها عاوزه تسيطر على السوق السودا بكل ما فيها مخدرات دعاره اعضاء كل حاجه
سمر تبصله
رشيد / بس اللى اعرفه حاجه واحده على قد ما هتعلى على قد ما الوقعه هتوجعك
سمر / يعني ايه
رشيد / يعني صاحب بالين كداب و تلاته منافق و قولتلها الكلام ده ضحكت و قالتلى اطلع ارتاح هو اللى يشتغل الشغلانه دى يرتاح … والله الواحد من كتر ما شاف ما عدش بياثر فيه … ما عدش بيتفاجئ .. بايظه من كله
سمر تقوم تدخل الحمام و ترجع رشيد يقوم وراها يسندها
رشيد / سمر
رشيد يغسلها وشها و يسندها للسرير
سمر / انا كويسه انا بس
رشيد / طبيعي … اللى بيحصل حوالينا … طبيعي ما تستحمليهوش
سمر / انا عاوزه اقولك حاجه
رشيد / قولى
سمر / انت احلى حاجه فى حياتى … انت الحاجه الوحيده الحلوه فى حياتى
رشيد يبتسم
سمر / اهرب
رشيد / ما احنا اتفقنا
سمر / انك تخسر تلاته مليون دولار احسن من انك تخسر نفسك
رشيد / هانت خفى و
سمر / مش هقدر اخسرك مش هقدر اشوفك بتتاذى
رشيد / ما حدش بياخد اكتر من نصيبه … اهرب اروح فين ارجع اتوه فى الدنيا لوحدى تانى
سمر / انك تكون لوحدك احسن من انك تعيش وسط شياطين … تعابين و حيات
رشيد / انا واخد عليهم سمهم ما بقاش بياثر فيا
سمر / صدقني … مش هتسيبك
رشيد / مالك يا سمر
سمر / ما مافيش … تعبانه شويه … صداع و مغص
رشيد/ ااااه فهمت … طب مادا كويس .. يعني حاسه بيها.. يعني بداتى تخفى
سمر / لا لا لا … انا بتكلم عن حاجه تانيه … جسمى بيوجعنى
رشيد / انا مديكي الجرعه مظبوطه بايدي و لسه على معاد التانيه … ازاى
سمر / ما اعرفش يمكن اللى حصل الخوف و ال… ما اعرفش … انت فاهم
رشيد / كنتى خايفه عند الزنايته
سمر / دول غير دى انت قولت انهم كويسين
رشيد / حتى لو كانت ادتك حاجه المفروض كان العكس بكره مثلا مش النهرده
سمر / ما ادتنيش ما عملتش حاجه
رشيد / طب انتى قادره تستحملى و لا اديكي مسكن
سمر / قادره استحمل
رشيد / تحبى اطفى النور ترتاحى شويه
سمر / ما تسبنيش خليك جنبي
رشيد / خليني خليني
رشيد ينام جنب سمر تحط راسها فى حضنه و تعيط
رشيد / متاكده مش عايزه مسكن
سمر تهز راسها لا رشيد يعدى ايده على شعرها
رشيد / كل ده هيعدى يا سمر كل ده هيجي يوم و ينتهى
سمر تعيط اكتر
رشيد / عارف انك تعبتى والله العظيم حاسس بيكي والله لو كان بايدى ما كنتش اتاخرت
سمر تبصله
سمر / نام يا رشيد … ارتاح
رشيد يبوس راسها تحط راسها فى حضنه اكتر و هو يبص للسقف و يفكر
……………………
فى الارض
مختار واقف فى وسط الارض بيتكلم مع اتنين فلاحين فارس يدخل يقف بعيد
فارس/ صباح الخير
مختار / صباح النور … ما توسخش رجلك فى الطين انا جايلك
فارس يبتسم مختار يروحله
مختار / احسن دلوقت يا باشا
فارس / احسن الحمد لله
مختار / كان مالك امبارح بالنا انشغل عليك
فارس يبتسم و يبص الناحيه التانيه
مختار / المفروض ما تسكتش على روحك افرض كنت فى مهمه و لا مطارده و لا حاجه من شغلكوا و وقعت كدا
فارس / ما انا ما وقعتش من فراغ برده يا مختار
مختار يبتسم
فارس / انا احلى حاجه فيا انى بشجع اللعبه الحلوه
مختار / الروح الرياضيه مهمه برده تعرف لو كنت مغاورى لا ما لوش فى الكلام ده خلقه ضيق اوى بعيد عنك و عن السامعين
فارس يهز راسه
مختار / خير
فارس / خير
مختار / سايب اللى وراك و اللى قدامك و جايلى … تبقي فى حاجه … قول ما تتكسفش … انت ما عدتش غريب خلاص
فارس يبتسم
فارس / لا دا انا قولت اطمنك عليا
مختار / لا ما انا مطمن هو انا هسيبك … كدا من غير ما اطمن عليك … يا راجل دا انا حتى ما ابقاش صعيدي
فارس يبتسم
مختار / بقولك ايه يا فارس باشا
فارس / قول يا مختار
مختار / ما تيجي تتغدى معانا النهرده فى السرايا
فارس يرفع حاجبه
مختار / و بالمره تتعرف على الكبير و تقرب مننا و تشوف الزنايته على حق دا احنا حتى معروفين فى البر كله بكرمنا لضيوفنا
فارس / خليها مره تانيه
مختار / يا جدع انت وحدانى كلك لقمه طريه تبر بيها بدنك اكل الشارع لا يشفع و لا ينفع ندبحلك دكر بط و فردتين حمام و برام رز معمر و طشه ملوخيه اسمع كلامى دى اللقمه الحلوه ما تتعوضش
فارس / جريت ريقي حرام عليك
مختار / يبقي اتفقنا … معاك عربيتك و لا نطلع بعربيتي … حتى لو معاك خليها و نبقي نبعت نجيبها .. يلا بينا
مختار يروح ناحيه عربيته و يفتح الباب و يبص لفارس فارس يركب مختار يركب الناحيه التانيه و يسوق
………………………
فى الجنينه الورانيه عند الزنايته
سماح قاعده على المرجيحه و بتبص فى الموبايل و مغاورى واقف جنبها
سماح / يعني مش هينفع نحط بانيو فى الحمام
مغاورى / هههههههههههههههه ما انا قايلك من الاول
سماح / يعني اوضه بحجم شقه و حمامها قد الحق
مغاورى / يفرق ايه البانيو من الكبينه يعني
سماح تبصله
سماح / تفرق انا طهقت من الكابينه دا انا كنت بستنى ابويا ينزل و اروح املا البانيو عند امى و اغطس روحى فيه … هاجى املاها هنا و لا هروح فين يعني
مغاورى / هبقي اجبلك واحد من اللى بيتنفخ ده و حطيه فى الصاله
سماح / ازاى يعني
مغاورى / اعمل ايه يعني ما حدش بياخد كل حاجه
سماح / يعني هى الحيطه دى قران كريم ما تهدها و تحركها بره شويه
مغاورى / و الصاله اعمل فيها ايه
سماح / و انا هعمل ايه بالصاله اصلا و لا انت ناوى لما نتخانق تطلع تنام فيها
مغاورى / اعوذ بالله ربنا ما يجيب خناق
سماح / صغرها شويه يا مغاورى
مغاورى / هشوف هقدر اعمل ايه
سماح / ماشي
سماح تبص الناحيه التانيه ببوز
مغاورى / انا تعبت من الوقفه تعالى ندخل نقعد جوه شويه
سماح / و انت ايه اللى جابرك ما تقعد
مغاورى / ما ليش فى المراجيح يا سماح
سماح / هى هتعضك
مغاورى / ايوه بتشكنى قومى يلا ندخل جوه شويه
سماح تضحك و تقوم
سماح / البلكونه عندنا كبيره هجيب واحده و احطها فيها ما تبقاش تقعد جنبى فيها دى كمان
مغاورى / سبيها لله نتكلم فى الحوار ده بعدين
مغاورى و سماح يمشوا ناحيه الجنينه الكبيره ياقبلوا مريم و هند و عبد الله واقفين بيضحكوا
مريم / لا يا شيخ
عبد الله / لتكونى فكرانى عيل سيكى ميكي من اللى بيروح و يجي لا دا احنا كنا رجاله و وقفنا وقفه رجاله
هند / هههههههههههههه خلاص يا مليجي .. مغاورى
عبد الله يبص وراه مغاورى يشاورله ثوانى و عربيه مختار تدخل السرايا هند تبتسم فارس ينزل منها مغاورى و عبد الله الابتسامه تروح من وشهم
فارس / السلام عليكم
مغاورى / و عليكم السلام
مختار / فارس باشا هيتغدى معايا انا و الرجاله فى المضيفه بلغوا الكبير
البنات يتحركوا على جوه
فارس / مين فيهم مراتك ؟
مختار يبتسم
مختار / اتفضل يا فارس باشا … المضيفه يا عبد الله
عبد الله / نضيفه اتفضلوا
الرجاله يروحوا المضيفه امين و عباده بيلعبوا بلايستايشن
مختار / كام كام
عباده / فارس باشا اهلا و سهلا
فارس / مختار اصر انى اجى اتغدى معاكوا النهرده
امين / اقل واجب يا فارس بيه دا المفروض كان عمل كدا من زمان بس معلش ملحوقه
عباده / لو عجبك اكلنا هنبعتهولك كل يوم لحد باب بيتك احنا خلاص عرفنا العنوان
فارس / تنوروا و اهو يبقى عيش و ملح
مغاورى / وسع يا ابو نسب اما اخد بتارك شويه
عباده يقوم و مغاورى يقعد مكانه
مختار / اهو احنا كدا نروح نشتغل الصبح و نروح نتجمع احنا و الحبايب و نسهر و نلعب و نحكى و نعمل لحياتنا معنى اصل الوحده وحشه زى الغرغرينا بتاكل فى العمر
فارس / انت بتعايرنى و لا ايه
امين / لا دا بيلقح عليا بالكلام اكمنى لسه ما لقيتش عروسه
عباده / و لا عمرك هتلاقى هو انت فى واحده عاقله تقبل بيك اصلا
امين / و هعمل ايه بالعاقله ان ما كانتش مجنونه و تجنن امى معاها ما لهاش لزمه
فارس / على رايك خدنا ايه من العقل … ما تجيب دور
ناصر يدخل
ناصر / السلام عليكم
الكل يسيب اللى فى ايده و يقف
ناصر / الباشا اللى منورنا اهلا و سهلا يا الف اهلا يا الف مليون مرحبا
مختار / ناصر الزيني كبيرنا
فارس / غنى عن التعريف … اهلا و سهلا
ناصر / اهلا بيك .. ايه ده يا رجاله فين ضيافه الباشا اخص عليكوا
مختار / خفنا نسد نفسه عن الغدى يا كبير
ناصر / طب ابعت حد يستعجل الحريم فى المطبخ
فارس / مفيش داعى وقت ما يخلصوا عادى
مختار / لا هروح استعجلهم
مختار يمشى و ناصر يقعد و ييتسم لفارس
…………………
فى المطبخ
مختار يدخل
مختار / اخبار الغدى ايه
هند / مش ده الظابط
مختار / ششششششششششش دا ضيف و لازم نكرمه
هند / نكرمه طبعا
هند تتقمص و تروح تشتغل و هى ضاربه بوز
انتصار / روح لضيفك و عشر دقايق و ابعتلكوا الغدى
مختار يهز راسه و يمشى
هند / انا مبفهمش الجدع ده
الكل يبص لبعضه و يضحك
شيرى / اتلمى و خليكي فى اللى فى ايدك
هند / خلتنى
انتصار / الا قوليلى يا دودو
هند / نعم
انتصار / بخصوص الجدع ده
الكل يضحك
انتصار / انتى بتثقى فيه و لا لا ؟
هند / طبعا ايه السؤال ده ؟
انتصار / يبقى سبيه يعمل اللى شايفه صح
هند / افرضى حطلهم حاجه من غير ما ياخدوا بالهم
انتصار / هم مش صغيرين و الجدع لوحده و احنا ما شاء الله اللهم بارك كتير
خديجه تبص فى الارض و تبتسم
هند / بت يا سوسه انتى
خديجه / انا ؟
هند / هو فى سوسه غيرك انتى عارفه حاجه قولى انتى عباده ما بيخبيش عليكي حاجه مش زى بتاعى
فاطمه / ما انتى لو بتلمى لسانك و تبطلى لوكلوك لوكلوك عمال على بطال هيحكيلك
هند / لا والله
انتصار / هههههههههههههههه يعنى مختار ما قالكيش عملوا ايه امبارح
هند / قالى بس ما قاليش انه هيجيبه البيت
خديجه / و انا والله ما كنت اعرف انه هيجي البيت اصلا مختار اللى جايبه
هند / امال كنتى بتضحكى من تحت لتحت من شويه
خديجه / هم مش بدلوله الحبوب
هند / و انتى واثقه انه ما كانش مكمر حاجه هنا و لا هنا
خديجه / لا … هم مش قلبوا بيته
هند / عربيته مكتبه فى القسم مخبيهم فى اى حته بعيد عنه
الكل يبص لبعضه
انتصار / حقه ممكن ؟
خديجه / ما اعرفش
الكل يبصوا لبعض انتصار تطلع بره المطبخ بتجرى شيرى تبص لهند و تتنهد و تطلع بره
هند / عن اذنكوا ثوانى
هند تطلع ورا شيرى
هند / ماما
شيرى تبصلها
هند / على فين
شيرى / هبص على اختك
هند / تمام … كنتى عاوزه تقوليلى حاجه
شيرى / لا .. حاجه زى ايه ؟
هند / اى حاجه … بخصوص اللى بيحصل
شيرى / انا دخلت البيت ده معاكى و عشت نفس اللى عيشتيه بالظبط و كل اللى ليا فى الدنيا جواه
هند تبتسم
شيرى / ان شاء الله خير
هند تهز راسها شيرى تمشى هند ترجع المطبخ
………………….
فى الجنينه
انتصار واقفه مع ناصر و هى متوتره و هى بيضحك
انتصار / انا بتكلم جد
ناصر / فاكره فرح عباده
انتصار / طبعا فكراه
ناصر / حياتنا كلها هتبقى كدا الفتره الجايه
انتصار / يبقى هنقع منك واحد ورا التانى
ناصر / هنسد بعض احنا مش شويه الحمد لله
انتصار/ اللهم زيد و بارك برده قولت احزرك
ناصر / تسلمى و تعيشى يا ست الكل
انتصار / واخدين بالكوا يعنى
ناصر / طبعا
انتصار / تمام
ناصر / اخبار الاكل ايه عصافير بطنى بقت تنانين
انتصار / تنانين !!
ناصر / ههههههههههههه الواد عبد الله لسه قايلها جوه
انتصار / قولت برده الكلام ده ما يطلعش غير من عبد الله بالله عليك يا ناصر عينك عليه
ناصر / خشى على المطبخ يا انتصار
انتصار / انا قولت ايه
ناصر / ما خلصناش من مختار دخلنا فى عبد الله و انا اللى قولت خايفه عليا دورى هيجي امتى يا وليه
انتصار / هههههههههههههههههه يا راجل افتكرتك بتتكلم جد
ناصر / ما انا بتكلم جد انا جوزك انا انا
انتصار / يسعدك ربنا و ما يوريني فيك حاجه وحشه
ناصر / و لا يوريني فيكي يا ام البنات
انتصار / خمس دقايق و اجبلكوا الاكل
ناصر / تسلم الايادى
انتصار تمشى و هى مبسوطه و كل شويه تبص لناصر مبتسم مختار يدخل و ناصر متابع انتصار
مختار/ خير
ناصر / الله اكبر … خضيتنى الله
مختار يبص لناصر
ناصر / عاوز ايه انت
مختار / نادتك ضرورى افتكرت فى حاجه قلقت
ناصر / بتقولكوا خدوا بالكوا ليكون مكمر حبايه و لا اتنين من الاصليه يحطها لحد فيكوا
مختار / بس
ناصر / لا و بتوصيني اخد بالى من عبد الله
مختار/ عبد الله بس .. طب و انا
ناصر / صبرنى يارب على العيله دى
ناصر يسيب مختار و يدخل المضيفه
مختار / انا قولت ايه طيب … يا كبير … ناصر
مختار يقف يضرب كف على كف و هو بيضحك
………………………
فى اوضه رشيد
سمر نايمه فى وضع الجنين فى السرير رشيد يديها كبايه فيها شويه ميه عمال يهز فيهم
رشيد / فركتلك الجرعه فى المايه خدى اشربيها على مره واحده يلا
سمر تقوم تاخد منه الكبايه و تهزها و تشربها
رشيد / هتبقى احسن ان شاء الله
سمر / ان شاء الله
رشيد / انا بس مش فاهم فيكي ايه من امبارح ما كانش المفروض ده يحصل
سمر / ما اعرفش
رشيد يتنهد
سمر / رشيد
رشيد / نعم
سمر / افرض البتاع ده ما نفعش هنعمل ايه
رشيد / ما كان نافع ايه اللى اتغير
سمر / ما اعرفش افرض انا بقول افرض انا بتوجع هنا
رشيد / مش عارف بجد مش عارف بس هنحاول مره و اتنين و تلاته انا مش هياس
سمر / بس انا مش هقدر
رشيد يبصلها
رشيد / انتى مش عاوزه تمشى من هنا مش عاوزه نتجوز و نلف الدنيا زى ما حلمنا سوا
سمر تعيط
رشيد / ما تعيطيش هتخفى … ان شاء الله هتخفى … انا مش هسيبك الا اما تخفى
باب الاوضه يخبط
رشيد / مش هنخلص بقى .. ثوانى
رشيد يقوم يفتح يلاقى بنت
رشيد / نعم
البنت / فيرا
رشيد يبص على سمر و يقفل الباب ويمشى مع البنت سمر تقوم من السرير و تروح تجيب حبايه و تكسرها و هى بتعيط على اخرها تحط نصها فى بقها و هى عماله تعيط
سمر / خدنى بقى يارب انا تعبت
سمر تقوم ترمى النص التانى فى الحمام و تضرب السيفون و هى عماله تعيط
………………………
فى المضيفه
الاكل محطوط اشكال و اللوان و الكل قاعد بياكل ناصر يشيل حمامه كبيره و يحطها قدام فارس
فارس / لا كفايا اوى انا اتلكمت
ناصر / كل يا راجل انتوا بتشقوا و لا عاوز تقع تانى زى امبارح
فارس يبتسم
ناصر / لازم تاخد بالك من روحك بس معزور برده وحدانى و ما لكش اللى تطبخلك على العموم البلد عندنا مليانه شاور انت بس و انا اخطبلك
فارس / ههههههههههههههههه لا جواز ايه و خطوبه ايه مش دلوقت خالص
ناصر / هتستنى لامتى دا اللى قدك فاتحين بيوت بص حواليك
فارس / طبيعه شغلى و كدا
ناصر / كلام فاضى انا اعرف ناس كتير فى الحكومه دا انا المحافظ حبيبى اساله كدا متجوز و هو قد ايه
فارس / علاقتى بالمحافظ مش قويه زى حضرتك
ناصر / هبقى اعرفك عليه و اوصيه عليك كمان
فارس / تسلم يا كبير
ناصر / على العموم من هنا لحد ما نطمن عليك الاكل هيوصلك كل يوم من عندنا اكل بيتي من اللى يرم العضم
فارس / ما لوش لزمه تعبكوا
ناصر / تعب ايه يا راجل عيب الكلام ده ما تزعلنيش منك … ناولنى طبق ورق العنب ده يا عباده
عباده يناول ناصر ورق العنب ناصر يحط كتير فى طبق فارس
فارس / كفايا كفايا مش هقدر
ناصر / كل يا راجل كل دا انت فى سرايا الزنايته كل ما تزعلناش
مختار / كل كل هتلاقى اكل زى ده تانى فين
فارس يبتسم و ياكل
……………………….
فى فيلا فيرا
فيرا قاعده على حمام السباحه رشيد يشد كرسى و يقعد
فيرا / مالك شكلك مش فى المود
رشيد / كنت نايم و صحتونى عوزانى شكلى عامل ازاى
فيرا تحط قدامه شنطه و تفتحها مليانه فلوس
رشيد / ايه ده
فيرا / الراجل وافق و بعتلنا اكتر من اللى اتفقنا عليه قولت افرحك
رشيد يبص الناحيه التانيه
فيرا / الفتره الجايه هرفع الاسعار و ناس كتير مش هيبقى معاها تدفع
رشيد يبصلها
رشيد / هتاخدى عيالهم
فيرا / ما تبصليش كدا دا بيزنيس
رشيد يبص الناحيه التانيه و هو مضايق
فيرا / فهماك على فكره بس انا ما اخترعتش الشغلانه دى و لا انا اللى حطيت قوانينها انا اتولدت و اتربيت فيها
رشيد يبصلها
فيرا / الاب الحقيقى ما يبعش عياله يموت نفسه و لا يفرطش فى عياله فاوعى تتعاطف مع اى اب هيبيع ابنه او بنته عشان شويه حبوب لوجعه
رشيد / انتى عوزاهم يموتوا بقى
فيرا / قانون الطبيعه ناتشيورال سيليكشن لو ( قانون الاصطفاء الطبيعى )
رشيد / احنا مش فى غابه عشان تقولى البقاء للاقوى
فيرا / مش شرط الاقوى الاصلح اللى يستحق يعيش
رشيد / و اللى يستحق يعيش هو اللى هيبيع عياله
فيرا / مش شرط يستحق يعيش ممكن تعتبرها يستحق انه يكمل معانا و يشترى مننا زياده و يبقى ولاءه التام لينا ده اللى يستحق يعيش
رشيد يبص الناحيه التانيه
فيرا / قانونى ايه يا رشيد
رشيد / اللى مش معاكى عليكي فهمت بس انتى كدا بتزودى اعدائك
فيرا / بالعكس بقللهم بقضى على اى حد ممكن فى يوم يقدر يرفع عينه فيا و الباقى هيبقوا شويه كلاب عندى
رشيد / الكلاب لما بتجوع ممكن تاكل صاحبها
فيرا / الكلاب حيوانات مخلصه جدا ما تعملش كدا
رشيد / هنشوف … هتعوزى منى حاجه تانى
فيرا تبتسم رشيد يمشى خطوه و يرجع ياخد الشنطه فيرا تضحك رشيد يمشى
فيرا / مسكين
فيرا تتنهد و تقوم
………………………..
فى المضيفه
فارس / انا مش قادر اوصفلكوا استمتعت قد ايه بوجودى معاكوا النهرده
مختار / الليل لسه فى اوله دا احنا سهرتنا صباحى النهرده
فارس / صباحى ايه لا اعزرونى عندى شغل الصبح و مش هقدر اطول اكتر من كدا
عباده / على فين يا راجل انا لسه ما لاعبتكش … اقولك البلايستايشن و الحاجات دى شكلها مش واكله معاك ما تيجي معايا نلعب لعبه مش هتلاقيها غير عندنا هنا
فارس / لعبه ايه دى
مغاورى / عندهم مران للنشان جايبنه من بره انما ايه اخر تكنولوجيا
فارس يرفع حاجبه
مختار / تحب تجرب ؟
فارس / جدا انا ما كنتش اعرف ان ده ممكن
مختار / و ايه يمنعه … امين … قول للحريم يفضولنا السكه
امين يدخل السرايا
فارس / على قد ما انا عندى فضول كبير اجرب بس هستاذن نخليها مره تانيه
مختار / ولا تانيه و لا تالته يا راجل اللحظه الحلوه ما تتعوضش
فارس / تمام بس هستاذنك ادخل الحمام الاول
عباده / حقك كمواطن بحكم القانون و الدستور
فارس / هههههههههههههههههه
فارس يدخل الحمام و الرجاله يبصوا لبعض
مختار / شكلها هتبقى سهرايه عنب
عباده / هى هتبقى سهرايه بس حكايه عنب دى بقى … فيها كلام تانى
الكل يضحك
………………………..
فى الحمام
فارس يطلع علبه لانسيز عين واحده من جيبه و يفتحها و يطلع منها حبايه و ياخدها و يشرب شويه مايه من الحنفيه و يتصل بالتليفون
فيرا / حسنت علاقتك بيهم
فارس / انا فى بيتهم اكل و شرب و لعب و ماسكين فيا مش راضين يمشونى
فيرا / طب مش هتسمعنى اخبار حلوه بقى
فارس / قريب اوى قريب اوى اوى
فيرا / خد بالك من نفسك
فارس / ما تقلقيش … اخبارها ايه
فيرا / ما تقلقش هتاخد اكتر من اللى اتفقنا عليه
فارس / عرفتى توصلى للواد يعنى
فيرا / هو كان مستخبى و لا حاجه
فارس / ههههههههههههه لا مؤاخذه … انا لازم اقفل هياخدوا بالهم انى اتاخرت
فيرا / تمام
فارس يقفل و يفتح الباب يلاقى مختار فى وشه مبتسم فارس يتفاجئ
مختار / قلقنا عليك خفنا تكون وقعت تانى و لا حاجه
فارس / لا انا تمام … امممم ايه هنلعب و لا ايه
مختار / تعال ورايا كلهم مستنينك هناك
فارس يهز راسه مختار يمشى و فارس وراه
…………………..
فى اوضه رشيد
رشيد واقف باصص من الشباك سمر تروح تقف جنبه
سمر / انت كويس ؟
رشيد / انتى كويسه ؟ احسن دلوقت
سمر / شويه … مالك
رشيد / ما قعدتش فى مكان واحد الفتره دى كلها قبل كدا خصوصا لو المكان مش عاجبنى لا هو و لا اللى فيه
سمر / تقدر تمشى
رشيد / ما اقدرش … طول ما انتى كدا ما اقدرش … طول ما انا ما عييش علاج ما اقدرش
سمر / انت عمرك ما هربت حاجه غصب عنك عمرك هربت حاجه انت مش مقتنع بيها
رشيد / مخدرات سلاح نسوان هربت كل حاجه ممكن تتخيليها عملت كل حاجه ممكن تتخيليها بس مش عاوز اكمل انا حر ناصر كان معاه حق
سمر / ناصر دا كبير الزنايته
رشيد / ايوه قالى هيجي عليك يوم تقرف فيه تبص لروحك زى ما انا قرفان ابصلك
سمر / يعرف عنك ايه هو عشان يقولك كدا فاكر نفسه ايه يطلع مين يعنى
رشيد / مش مهم هو مين المهم انه معاه حق
سمر / هى قالتلك ايه ضايقك اوى كدا
رشيد / هترفع الاسعار … هتجبر الناس يبيعولها عيالهم
سمر / و هتعمل ايه فى العيال دى ؟ ما قالتلكش
رشيد يهز راسه لا و يبصلها
رشيد / انا مش هقدر اساعدها اكتر من كدا مش هقدر اكمل هنا
سمر / قولتلك اهرب امشى
رشيد / بكره هقولها هننزل نشتريلك شويه حاجات و
سمر / انا مش هقدر اجى معاك
رشيد / و انا مش همشى من غيرك
سمر / رشيد اسمعنى
رشيد / اسمعيني انتى
سمر / اشمعن انا هتقابل غيرى احسن و احلى
رشيد / قابلت … قابلت كتير جدا ما لهمش عدد احلى و ارفع و اطخن و اطول و اقصر و كل المواصفات و سبحان الله مش فاكر ولا واحده فيهم ما وقفتش عند واحده منهم حتى … ليه ؟ ما اعرفش اشمعن انتى ؟ ما اعرفش بس ما دام وقفت عندك ما دام اخترتك انتى يبقى مش هسيبك و كفايا زن الحريم ده عشان مش هيجيب همه
سمر / تمام … نستحمل شويه يمكن … يمكن الطريقه دى تجيب نتيجه او يمكن نلاقى طريقه تانيه
رشيد يبصلها
سمر / مهو انا همشى اروح فين ما احنا هنلف نلف و نرجعلها تانى اهدى يا رشيد و فكر بالعقل
رشيد ينفخ و يقفل الشباك و يروح يقعد على السرير و يمسك الكتاب و يقرا فيه
سمر / هو انت ليه بتقرا كتير فى الكتاب ده
رشيد / زهقان
سمر / بس معقول كل ده و ما خلصتوش
رشيد يقفل الكتاب و يحطه جنبه
رشيد / انا مش طايق نفسى يا سمر دلوقت … ممكن
سمر تهز راسها و تدخل الحمام و تقفل عليها و تعيط و رشيد يمسك الكتاب تانى و يبص فيه
………………………
فى المران
الرجاله قاعده على كراسي و فارس قاعد وسطيهم و مختار بيلعب و عباده بيشغله الجهاز و فارس مركز اوى مع مستوى مختار
امين / المكان ده كان فى الاول مخزن عباده وضبه و عمله صاله حديد زى بتوع مصر و حط فيها كل الاجهزه اللى تتخيلها و بعدين جابوا اللعبه دى
فارس / لعبه!
امين / اه كل ما نبقي فاضيين ننزل نتسلى شويه
فارس / لما دى لعبه امال البلايستايشن يبقي ايه
امين / لا التانيه دى لما بنبقي مفيناش حيل نلعب انت عارف فرهده الشغل و كدا يعني
فارس / امال الملعب ده ايه اللى فى البلد
امين / عشان تعرف اننا مدلعين نفسينا على الاخر
الجهاز يقف
عباده / تمانيه و تسعين و تلاته من عشره
مختار / بتحسن
عباده / هو حد بيتمرن قدكوا على البتاع ده
مختار يضحك و يروح لفارس
مختار / تحب تجرب
فارس / اجرب
فارس يقوم و يروح يقف و يعبى مسدسه طلق و هدومه و مكانه متوسخين الرجاله تبص لبعض و يضحكوا فى صمت مختار يبرقلهم و يشاورلهم يطلعوا بره فارس يشوفهم بيطلعوا يستغرب عباده يطلع بره
مختار / شكلك مش واخد على الاكل بتاعنا تعبلك معدتك
فارس يبص لمختار مش فاهم
مختار / اللى مش واخد على الدهن الكتير فى الاكل ساعات بطنه بتسيب بتحصل يعني
فارس يعدى ايده على بنطلونه و يبص فيها و يبص لمختار مختار يشاورله على الحمام فارس يجرى على الحمام مختار يروح وراه و يخبط على الباب
مختار / هجبلك غيار نضيف و اجى
مختار يطلع بره يلاقي الرجاله متجمعه و عباده واقف ماسك غيار
عباده / اقسم بالله صعب عليا
مختار / هو اللى جابه لروحه … مع انى مش هنكر انى اضايقت برده … بس هو يستاهل عشان يبقي يجيب سيره امى
امين/ لا هو يستاهل عشان يتلفح بالحيه فيرا
مختار / صحيح الوجع لسه ما بانش عليه
عباده / شكله لسه واخد الحبايه من قريب
مختار ياخد الغيار و يدخل
مختار / جهز روحك يا امين
امين / انت هتوصيني ؟ دا حبيبي
الكل يضحك مختار يغمزلهم يسكتوا مختار يدخل يخبط على الحمام
مختار / لا مؤاخذه اتاخرت عليك …جبتلك الغيار
فارس يفتح الباب بالراحه مختار يمد ايده فارس ياخدها و يقفل الباب مختار يفضل واقف وقت طويل يخبط على الباب فارس يفتح الباب
مختار / قلقتنى عليك … طولت على الاخر انت كويس؟
فارس يهز راسه
مختار / انا مش عارف اقولك ايه بس انت من امبارح و انت مش مظبوط و بالشكل ده مش هتستحمل فى بلدنا انا لو منك اهتم اكتر بنفسي
فارس / شكرا على النصيحه هستاذن انا
مختار / فارس باشا
فارس يبص لمختار
مختار / انا عارف اننا بدئناها غلط بس احنا ولاد بلد و نفهم فى الاصول و انت فى الاول و الاخر ضيف عندنا خلي امين ياخدك للوحده يطمنوا عليك ممكن تكون لاقط حاجه كدا و لا كدا من اكل الشارع
فارس / ما تقلقش انا فعلا ناوى اعمل كدا و شكرا تانى على حسن ضيافتكوا و اسف على اللى حصل
مختار / هنستناك مره تانيه تجرب اللعبه بتاعتنا
فارس / اكيد هستاذنك
فارس يطلع بره ميلاقيش الا امين و ناصر
ناصر / انا مش مطمن انك تمشي لوحدك و انت تعبان
فارس / انا كويس
ناصر / معلش ريح قلبي و خلى امين معاك و ما تشغلش بالك بيه هيشوف مصالحك و مش هتحس بوجوده خالص
فارس / ما لوش لزوم يا كبير و الله
ناصر / انا قولتها كلمه لو مش امين هيبقي انا لكن مش هنسيبك لوحدك ابدا و انت فى الحاله دى
فارس يبص لمختار و لامين
ناصر / امبارح وقعت من طولك و النهرده بطنك وجعتك افرض حصلك حاجه لا قدر الله و انت لوحدك مين هينفعنا ساعتها ما تاخذنيش يا فارس يا بنى بس انا مش هبقي مطمن عليك باى شكل تانى
امين / و بعدين انت بقيت مننا خلاص و بقي فى بينا عيش و ملح و لا ايه
ناصر / يعني ما ينفعش نسيبك الا اما نطمن عليك
فارس / انا بس مش عاوز اتعبكوا
امين / و لا تعب و لا حاجه يا راجل يلا يلا اروحك تتشطف و تريحلك ساعتين يلا يا راجل يلا يلا
امين يروح يركب العربيه فارس يبص لناصر ناصر يبتسم فارس يبتسم و يروح يركب و عينه فى عين مختار مختار يبتسم فارس يبتسم امين يسوق و يمشي
امين / عباده نبه على الكل ما حدش يجيب سيره عن اللى حصل يعني ما يكونش عندك فكر و لا تشيل فى نفسك الحاجات دى بتحصل
فارس يبص من الشباك
امين / تلاقيك كلت من الواد زيكوا بتاع الكبده دا واد معفن و حاجته كلها معفنه زيه … هى صحيح ريحتها حلوه بس توجع البطن مره ادانيت و كلت من عنده فضلت طول الليل اتلوى
فارس يهز راسه
امين / تعرف الواد عبد التواب الفرارجى اللى فى السوق
فارس / لا
امين / كانت بنته بتعمل رجيم و لقاها بتاخد دوا كدا قبل الاكل بنص ساعه الراجل كان فاكر انه لو اخد منه و اكل اللى هو عاوزه هيخس اصله بعيد عنك و عن السامعين يجيله ميه و سبعين كيلو و زياده بيقف فى المحل ما تعرفش تقف جنبه
فارس / اللهم احفظنا
امين / المهم الراجل ما يعرفش ان الدوا ده بينزل الدهن و لا مؤاخذه فى الحمام يعني الراجل ما حسش بروحه غير و هو متبهدل و لا مؤاخذه روح دور الضرب فى البت و حاشوها من تحت ايده بالعافيه
فارس / و هى ذنبها ايه
امين / اهو بقي ما قدرش على الحمار
فارس يهز راسه
امين / كنا جبنا البلايستايشن معانا اتسلينا … انا هرجع
فارس / لا لا لا خلينا نروح احسن
امين / البيت قريب احنا لسه ما بعدناش
فارس / معلش لو سمحت خلينا نروح من فضلك
امين / دا فى المضيفه حسبه خمس دقايق
فارس / لو مش هتروحنى نزلنى
امين / لا انزلك ايه خلاص خلاص حقك عليا شكلك فعلا تعبان بجد
فارس / شكرا
امين يبص الناحيه التانيه و يدارى ابتسامته و يبص قدامه و يسوق و فارس يبص من الشباك و يكتم جواه
……………………….
فى اوضه هند بالليل
هند / مع انه واطى و ابن كلب بس صعب عليا
مختار / اصبرى عليه لبكره و هو هيصعب عليكي بجد
هند / طب ما هو كدا هيفهم انكوا بدلتوا الحبوب
مختار / ما احنا عاوزينه يفهم عاوزينه يتصرف فى غيرها احنا هنقفل عليه انه يخرج او حد يدخله الطريق الوحيد
هند / انكوا تعرفوا لو فى غيره فى البلد تقصد
مختار / تعجبيني و انتى مركزه
هند / طب ما هو برده ممكن يكون عاين فى المكتب فى القسم
مختار / ممكن هنبدلهاله برده هنلاقي طريقه و نبدلها احنا وراه و فاضينله و هو لوحده و احنا ما شاء الله يعني
هند / بس لو عرف اللى عملتوه
مختار / دكر يثبت هيعمل ايه يعنى ربنا ما يكتب علينا نشوف كسرته اللى انكسرها قدامنا النهرده دى
هند / امين
مختار / كل اللى نفسي فيه انه يجرى على فيرا او يجرى على اى حد يوصلنا ليها
هند / انت مش قولتلى انك عارف عنوانها
مختار / عارف بس لو خدت الرجاله و طلعت عليه دلوقت و عرفت تفلت مننا تانى هبقي حرقت رشيد
هند / رشيد !!
مختار يغطى وشه بايده و يبصلها
مختار / عيني جوه
هند / اللى بتقولوا عليه نجس و جاب سمر هنا و امين كان بيتنطت
مختار / ايوه امين كان مضايق ان سمر هنا وسطيكم
هند / معاك حق … و سمر عامله ايه
مختار / تعبانه هو شاكك انهم ادوها حاجه و هو مش موجود رشيد يعنى مش مصدق اللى جرالها كانت خلاص هتخف هو بيحاول يلاقي علاج للحبوب دى و سمر
هند / مدمنه
مختار / ايوه بيخفف الجرعه بالتدريج كانت جايبه نتيجه و فجاه باظت منه
هند / ما تجيبها هنا تانى تبقي بعيد عنهم و تحت عنينا و نجرب حكايه التدريج دى زى ما كانت ماشيه
مختار / صعبه اوى و كمان خطر ما تنسيش ان فى احتمال كبير تكون بتشتغله
هند / انت مش واثق فيه
مختار / هو واثق فيه هو بس هو وثق فيها انا لا
هند / مع ان اللى سمعته عن رشيد ما يقولش انه اهبل بس
مختار / مهواش اهبل بس حب و مرايه الحب عاميه الاول كان هناك عشانى دلوقت بقي هناك عشانها قولتله يمشي ما رضاش قال مش هيسيبها
هند / غريبه اوى
مختار / الحب بيغير .. بيغير اوى كمان هو مش باين عليا و لا ايه
هند / بيقولوا بس انا بحبك فى كل حالاتك
مختار / و انا كمان بحبك اوى
تليفون مختار يرن مختار يبص فيه
مختار / امين … السلام عليكم
امين / و عليكم السلام … اخبار مش كويسه
مختار يقوم يقف من السرير و هند تنتبه
………………….
قدام عماره اربع ادوار
عربيه تركن و المامور ينزل منها يلاقي مغاورى و عباس و اتنين رجاله قاعدين يشوفوه يقوموا يقفوا
المامور / خير فى حاجه و لا ايه
عباس / ما تاخذناش كنت مخنوق من الرقده نزلنا نتمشي شويه
مغاورى / عمل سبع البرومبه و قال هيتمشي على رجله وصلنا لحد هنا و فيص و ما كانش معانا عربيه فقولنا نقعد يريح شويه لحد ما اى حد يجبلنا عربيه نروحه
شاب / ما احنا مش هنقدر نشيله ما تاخذناش يعني
المامور / ما انا معايا عربيه لو تحبوا
مغاورى / لا مش عاوزين نتعبك فتوح هيجي بالعربيه
المامور / تعب ايه العربيه اهى قوموا قوموا
مغاورى يقوم يقوم عباس اول ما يلمس ايده مغاورى ينط
مغاورى / تصدق انك عيل
عباس / ههههههههههههههه ما تنشف كدا مالك
عباس يمد ايده للمامور ياومه المامور ينط
المامور / الله اكبر
عباس / ههههههههههههههههه ايه يا جدعان دا لعبه عيال
مغاورى/ ما تكبر بقي يا عباس قدك ده تلعب معاه
المامور / هههههههههههههههههه الصين بقت تعمل لعب غريبه
عربيه فتوح توصل
الشاب / فتوح وصل اهو … كفايا تعبنا الراجل معانا اوى
المامور / تعب ايه بس
مغاورى / نفوتك بعافيه تصبح على خير
المامور / و انتوا من اهله
مغاورى و الرجاله يركبوا عباس العربيه و يركبوا معاه و يمشوا و يفضل مغاورى و واحد
المامور / اوصلكوا
مغاورى / لا هنتمشي تعيش و تسلم
المامور يبتسم و مغاورى يمشي
………………….
فى اوضه عباده
عباده بيتكلم فى التليفون يحدف التليفون على اخر دراعه يخبط فى الحيطه جنب باب الحمام فى نفس الوقت إللى خديجه بتفتح فيه باب الحمام
عباده / انتى كويسه؟ ما كانش قصدى
خديجه / انا كويسه … انت بقي فيك ايه ؟ ايه اللى عصبك كدا ؟
عباده يروح يقعد على السرير و يسند راسه على ايديه و يغطى وشه و يتنهد خديجه تروح تقعد تحت رجليه يبصلها
خديجه / اليوم كان ماشي زى الفل ايه اللى جد مين كلمك ضايقك كدا
عباده / مغاورى
خديجه / اخويا !!!
عباده يتنهد
عباده / فارس الكلب لما روح قفل على روحه اوضته خمس ساعات و بعدين المامور راح يطمن عليه و بعدها قام زى القرد الرجاله راحوا للمامور البيت و طلع بيحس
خديجه / و ده اللى مضايقك اوى كدا
عباده / كل اللى عملناه راح على الارض
خديجه / لا ما راحش يا عباده و مش جوزى اللى هيوطى راسه من اولها كدا
عباده يبصلها
خديجه / ممكن كان مخبى حبوب فى القسم احتياطى و المامور جبهاله و دا ما يمنعش ان المامور ممكن يكون برده ملطوط
عباده / بقولك اتكهرب
خديجه / و هو ابو فارس مدمن الزفت ده و لا بنته
عباده يبص الناحيه التانيه و يرجع يبص لخديجه
خديجه / الفتره الجايه هنركز اننا نلاقي طريقه نبدل بيها الحبوب تانى لفارس و كمان نحط عينا على المامور و اهل بيته لحد ما نعرف فيهم و لا ما فيهمش
عباده / الحمد لله انك مراتى
خديجه تبتسم عباده يقوم يبوس راسها و يلبس
خديجه / على فين
عباده / هتكلم مع مختار و الكبير
خديجه / و هم لسه صاحيين
خديجه تقلع الروب لابسه قميص نوم
عباده / هصحيهم لو نايمين هصحيهم ما انا مش هيجيلى نوم
خديجه تنام فى السرير و تستغطى و تبصله عينه عليها
خديجه / سكت ليه … اطفى النور و انت خارج
عباده يطفى النور و يرجعلها
خديجه / ههههههههههههههههه مش هتروح للكبير
عباده / زمانهم ناموا الصباح رباح
خديجه / هههههههههههههههههههه
……………………
على القهوه تانى يوم
حامد قاعد على القهوه و كل شويه يبص فى الساعه يوسف يدخل
يوسف / صباح الخير يا عمى
حامد / صباح النور يا يوسف خير اؤمر
يوسف / انا اتكلمت مع بابا فى حوار القرض
حامد / و اكيد رفض
يوسف / انا قررت اخد القرض بنفسى و روحت للمحامى فعلا بس قالى انى مش هقدر اسحب المبلغ اللى انا محتاجه كله لانى ما عنديش ضمانات دا غير ان الفوايد هتبقى عاليه جدا
حامد / و هتعمل ايه
يوسف / مش عارف انا اتكلمت مع عموا حمدى و قالى المخازن مليانه و الوضع المالى كويس بس بابا بيقول البضاعه على المبيع و انا بصيت فى الدفاتر و ما فهمتش اى حاجه و مش عارف اعمل ايه
حامد / فضها سيره و ركز فى اكل عيشك
يوسف / دا اخر حلم بالنسبالى
حامد / ما كانش موجود من كام يوم شوفلك حلم تانى او احلم على قدك
يوسف / انت بتكلمنى كدا ليه يا عموا
حامد / عشان ما فيش فى ايدي حاجه اعملهالك
يوسف / انا لو كان ليا غيرك كنت كلمته بس خيلانى زى ابويا بالظبط و يمكن اسوء و عموا حمدى مفيش منه رجا باع الحديده و صحابى حضرتك عارفهم مش عارف اروح لمين غيرك
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات