رواية البر التاني الفصل التاسع والخمسون 59 بقلم لولو محمد
رواية البر التاني الجزء التاسع والخمسون
رواية البر التاني البارت التاسع والخمسون
رواية البر التاني الحلقة التاسعة والخمسون
يوسف / انا اتكلمت مع بابا فى حوار القرض
حامد / و اكيد رفض
يوسف / انا قررت اخد القرض بنفسى و روحت للمحامى فعلا بس قالى انى مش هقدر اسحب المبلغ اللى انا محتاجه كله لانى ما عنديش ضمانات دا غير ان الفوايد هتبقى عاليه جدا
حامد / و هتعمل ايه
يوسف / مش عارف انا اتكلمت مع عموا حمدى و قالى المخازن مليانه و الوضع المالى كويس بس بابا بيقول البضاعه على المبيع و انا بصيت فى الدفاتر و ما فهمتش اى حاجه و مش عارف اعمل ايه
حامد / فضها سيره و ركز فى اكل عيشك
يوسف / دا اخر حلم بالنسبالى
حامد / ما كانش موجود من كام يوم شوفلك حلم تانى او احلم على قدك
يوسف / انت بتكلمنى كدا ليه يا عموا
حامد / عشان ما فيش فى ايدي حاجه اعملهالك
يوسف / انا لو كان ليا غيرك كنت كلمته بس خيلانى زى ابويا بالظبط و يمكن اسوء و عموا حمدى مفيش منه رجا باع الحديده و صحابى حضرتك عارفهم مش عارف اروح لمين غيرك
حامد / انا بعت شقتى و عايش فى ايجار و سويت معاشى و كل ده عشان اسد ديونى يعنى حتى انا مش هقدر اساعدك
يوسف يبص الناحيه التانيه
حامد / اسمع يا يوسف فى شخص واحد يقدر يساعدك و هو ابوك يديك نصيبك تبنى مستقبلك ما دام انت واثق اوى فى نجاحك
يوسف / واثق و قولتله ادينى نصيبى قالى انا ماموتش عشان تورثنى
حامد / و هو الاب لازم يموت عشان يتورث
يوسف يبص لحامد
حامد / ما تبصليش انا ما ليش دعوه
يوسف / امال قولت كدا ليه
حامد / كلمه و طلعت منى بالغلط انساها و بعدين ابوك مش حارمك من حاجه و ما بيفرقش بينك و بين اخواتك البنات … هو صحيح اللى اداهولك باليمين خده بالشمال … بس ان شاء الله هيعوضك … ادعى انت بس يعوضك قبل ما يموت
يوسف / ربنا يديله طوله العمر
حامد / انا لو منك ادخل تحت جناحه و اقرب منه و تبلفه تعمل زى ما اجواز اخواتك البنات بيعملوا و انت ابنه و ما بيحبش حد قدك
يوسف / جربت
حامد / جربت يومين و فاتحته فى موضوع الكافتريا فى التالت
يوسف / الله
حامد / يا ابنى الحاجات دى ما بتجيش كدا بتحتاج صبر
السواق يدخل حامد يقوم
حامد / اخيرا .. انت فين يا عم كل ده تاخير
الراجل يدى لحامد المفاتيح و الفلوس حامد يركب العربيه و يمشى القهوجى يدخل
القهوجى / هتحاسب يا سى يوسف
يوسف / لا لما يجي بكره ابقى خد منه هو انا كنت شربت حاجه عشان احاسبله
يوسف يمشى و القهوجى بيضرب كف على كف
…………………….
فى محل وسام فى اسكندريه
وسام قاعده مع صاحب المحل اللى جنبها
وسام / و الموضوع ده بيكسب
الشاب / هو محل زى مول بحاله كل محل بيسوق لنفسه و الزبون بيدخل يلف عليكوا كلكوا و بشطرتك بقى و اسعارك الحلوه تكسبى زبونك و زبون غيرك
وسام / اه و الرجل على المولات اكيد اكبر بكتير من المحلات العاديه بس دا مش مول دا حياله عماره و مقسمينها بارتيشنات و كل واحد ياخدله حته و الدنيا سايحه على بعض
الشاب / ما هو ده يعنى مساحه قليله و مفيش فلوس فى التشطيبات و ايجار قليل هتبقى يادوب بضاعتك و استنداتك و خلاص
وسام / انت داخل فى الحكايه دى
الشاب / طبعا امال انا بقولك ليه زى ما احنا جيران هنا نبقى هناك و نكبر سوا
وسام / اه بس البارتيشن ده مفتوح و البضاعه ممكن تضيع
الشاب / ازاى كل حاجه داخله فى السيستيم و كلو مكتوب فى العقد كل مليلم هتحطيه معروف و اخر الشهر السيستم هيطلعلك ارباحك اوتومايتك
وسام / هفكر فى الموضوع و اشور ماما بس انا مبدئيا موافقه
الشاب / يبقى على بركه الله
…………………………….
فى سرايا فيرا بعد اسبوع
فيرا / يعنى ايه مش عارف الحبوب المضروبه دى جايه منين
شاب / اقسم بالله يا ست الكل روحت للديلر بتاعه بنفسى اللى موصله الحبوب دى و سالت كل زمايله بالحسنى و غيرها ما حدش اشتكى و بعدين يا ست الكل الموضوع مش خافى عليكي الحكايه ما فيهاش تحوير دا الحبايه لو اتكسرت و وقع منها تنتوفه بتفرق فى الجرعه و لا مؤاخذه و صاحبها بيعملنا اللالى يبقى كل الحبوب دى تنضرب
فيرا / تمام روح شوف شغلك
الشاب يطلع و ادواردو يدخل شايل ورقه يديها لفيرا تبص فيها
فيرا / سم وان … نو داوت وى كان جيس هو … اتشانجد اور بيلز فور لاكيستيفز ( شخص ما نقدر نتوقع هيكون مين بدل الحبوب بملينات )
ادواردو / زى هاف دون افيرى جود جوب ريبليكاتينج ايت ( عملوا شغل هايل فى تقليدها )
فيرا / ذات ايز نوت جود فور ذا بيزنيس ( دا مش كويس للشغل )
ادواردوا / اكشولى زى جيفد مى افيرى جود ايديا اى ثينك يو ويل ليك ايت ( فى الحقيقه ادونى فكره حلوه جدا بيتهيالى هتعجبك )
فيرا تبصله
ادوردوا / ترست مى ( ثقى فى )
فيرا / يو نو اى دو ( انت عارف انى بثق فيك )
ادواردوا يبتسم فيرا تطلع فوق تخبط على باب اوضه رشيد يفتح الباب
فيرا / جهز نفسك عندك طلعه بالليل
رشيد يهز راسه و يقفل الباب و يدخل و هو بيتنهد
سمر / خير
رشيد / العادى بتاعها
سمر / هتسبنى لوحدى و تمشى برده
رشيد / غصب عنى و انتى عارفه لحد ما نلاقى علاج لازم اسمع كلامها
سمر / و دا لحد امتى بقى ان شاء الله مسيرك فى مره هتروح مش هترجع
رشيد / قولتلك ساعتها غيرى هيجي ياخدك
سمر / و انت فاكر انها هترضى تخلينى اروح معاهم بالساهل كدا
رشيد / اجلى القلق فى الموضوع ده لما ابقى اموت .. و بعدين يا سمر انتى مش عماله تزنى عشان امشى و اسيبك اهو ساعتها هبقى مشيت و سبتك هتفرق فى ايه بقى
سمر / ساعتها هبقى مطمنه عليك مش هبقى مقهوره عليك و على روحى
رشيد يبتسم و يبص الناحيه التانيه
رشيد / مش هيحصلى حاجه تمام و بعدين لتكونى فاكره نفسك هاتجوزى دكتور
سمر / بس انت قولتلى هتتغير
رشيد / هتغير و هبطل كل ده بس مش هقدر اعمل ده من غيرك مش هقدر امشي من غيرك
سمر / انت ما بتياسش
رشيد / لا و مش هياس هنحاول تانى و تالت
سمر / ما عدتش قادره استحمل يا رشيد تعبت
رشيد يبصلها و يبص الناحيه التانيه و يسكت و يبصلها تانى و يقوم يفتح الدولاب و ياخد غيار
سمر / رايح فين
رشيد / هدخل اتشطف
رشيد يدخل الحمام و يقفل عليه الباب سمر تقوم تفتح الشباك و تاخد نفسها بصعوبة
………………….
فى سرايا الزنايته
الرجاله متجمعه فى المكتب
ناصر / لا مش هتدخلوا بيته تانى عشان المره اللى فاتت كان ليها ظروفها
مختار / نقدر نكررها
ناصر / و هو اهبل هيقع فى نفس الملعوب مرتين
مختار / نجرب
ناصر / عشان نيجي نستلمك من المستشفي انت و اخواتك تانى
عباده / يا كبير يوميها
ناصر / المامور و اولاده فى الامان و نعرفه من زمان مش بتاع فلوس و لا شمال و فتشنا القسم نضيف يبقي ايه جاب الحبوب منين
امين / من المامور قبل ما يقابله حكايه و بعد ما قابله حكايه تانيه خالص دا كان قدام عيني طول الوقت
مغاورى / حريمه
الكل يبص لمغاورى
مغاورى / لا المامور و لا عياله بياخدوا بس بنته و مراته
شاكر / دى وسعت قوى
عباده / مغاورى بيتكلم صح هو ابو فارس وقع ازاى مش من بنته
ناصر / بيوقعوا الحريم الصغيره دى ازاى
مختار / ليها مليون سكه صاحبتها جايه تشرب شاى او تزورها ديتها مره و الدنيا باظت
شاكر / الواحد اتخنق
ناصر / و مين سمعك كانك فى مركب مخروم فى بحر مردوم قروش ما انتش عارف هتموت غرقان و لا متاكل اهى كلها موته
شاهين/ انت اللى بتقول كدا على كدا ناخد الحبوب و نروح نبوس الايادى من سكات و ما نخاطرش بعيالنا بقي
مغاورى / دا الموت اهون انا بتقول ايه يابا
مختار / ما بيقولش افهم الكلام و بعدين اتعصب
مغاورى / و انا ما بفهمش و لا ايه يا خويا
ناصر يضرب على المكتب و يقف
ناصر / انتوا هتمسكوا فى بعض و احنا قاعدين و لا ايه
مغاورى و مختار يبصوا فى الارض
ناصر / سبوها عليا انا هحلها
مختار / ازاى
ناصر / زى الناس يلا كل واحد على اشغاله يلا
الشباب يتوزع و هم بيبصوا لبعض و يبصوا للكبير
شاهين / انا عارف انه مش وقته بس بخصوص سماح
شاكر / خير يا سيد الناس فى حاجه
شاهين / هى كانت طلبت من مغاورى يعدل حاجات فى السرايا و كنت جاى اخد اذنك تيجي تبص عليها يعني مش بعد ما العمال يخلصوا اخاف الحاجه ما تعجبهاش
ناصر / تغير ايه فى السرايا
شاهين / حاجات بسيطه مش حوار يعني كانت عاوزه توسع الحمام و تركب بانيو حاجات من دى يعني
شاكر يبص لناصر
شاكر / والله انا ما عنديش مانع تاخد امها و تروح هى دى محتاجه كلام يعني
ناصر / والله و انا اتوترت افتكرت حاجه كبيره
شاهين / مهو مش هيشوفوا حوار الحيطه بس … عاوزين ينزلوا يشوفوا العفش و البياض و الحاجات دى كلها و مغاورى محرج يعني من الدخول و الخروج … دى خطوبه و انتوا عارفين
ناصر / هههههههههههههههههه قول كدا بقي طب ما تقول من الاول يا راجل
شاهين / يعني نقرا الفاتحة
شاكر / على ايه
ناصر / هههههههههههههه جرا ايه يا عمى دا انت تفهمها و هى طايره عاوزين يكتبوا الكتاب عشان يخرجوا و يدخلوا براحتهم بالمفتشر عاوزين يوزعوا ام عباده فى النقاوه
شاكر / ما احنا اتكلمنا فى الموضوع ده قبل كدا و كنا اتفقنا
شاهين / لا مش السيره الفكره انهم يبقوا واخدين راحتهم فى الخروج و النقاوه لحد ما ربنا يتملهم على خير و نعمل الليله الكبيره
شاكر / هتفرق فى ايه النهرده من بكره يعنى مش فاهم
شاهين / جرا ايه يا حج شاكر … لا اله الا الله … بالمفتشر كدا و من غير زعل هم مش عاوزين حد تالت يدخل فى حياتهم من اولها لاخرها فلما يكتبوا الكتاب مش هيبقى فيها حرج لو راحوا نقوا حاجه لوحدهم من غير ما حد تالت يدخل فى قرارهم … اوعى تكون زعلت من كلامى
ناصر / كلامك ما يزعلش حد جيل النهرده غير جيل امبارح
شاكر / ما تاخذنيش يا سيد الناس بس ام عباده … ليها ظروف تانيه … حسابات تانيه … مش كتب كتاب و لا حتى دخله
ناصر و شاهين يبصوا لشاكر
شاكر / انتوا عارفين انها اتجوزت صغيره و فرحتها كانت مكسوره … سماح بالنسبالها ما تاخذونيش يعني كانها بتتجوز من اول و جديد … و سماح بيتهيالي فاهمه ده
ناصر / مش يمكن سماح مش قادره تتكلم بسبب الكلام ده
شاكر / انا هتكلم مع ام عباده الاول و هتكلم مع سماح كمان … ان كان على كتب الكتاب فانا موافق و الليله قبل بكره الاتنين عيالي و عاوز افرح بيهم سماح و لا مغاورى الكلام هيبقي على حكايه الجهاز و الفرش و ان كانت ام عباده هتروح معاهم و لا لا
شاهين / عداك العيب
ناصر / بس تعمل حسابك يا عمى الكلام ده ما يوصلش لام فاتن ما تبقاش انت و عبد الله علينا ههههههههههههههه
شاهين / قال و انت اللى بتتكلم امال لو ما كانوش بناتك متجوزين معاك فى نفس السرايا تحت عنيك
ناصر / و مين قالك ان مريم هتتجوز فى السرايا
شاهين / امال هتتجوز فين هو مش عبد الله و اهله قاعدين هنا
ناصر / دا وضع مؤقت لحد عشان اطمن عليهم خصوصا بعد اللى حصل لام عبد الله و اخته يسلم مغاورى لولاه ربنا وحده العالم باللى كان هيحصل انما غير كدا عبد الله له شقته اللى فى نص البلد و ربنا يستر و ما ياخدهاش و ينزلوا مصر
شاهين / و انت هتقبل بالكلام ده يا كبير
ناصر / رجلها على رجل جوزها ان شالله يروح المريخ انت اللى بتتكلم فى الحاجات دى يا حج شاهين لو جاله تكليف هنا و لا هنا و قال اروح معاه هقولها لا ازاى انا افرق بين الراجل و مراته ليه …بس طبعا لو قبل يقعد معانا فى السرايا خير و بركه نشيله على الراس دا الغالى ابن الغوالى دا ابوه الله يرحمه كان راجل بلسم يتحط على الجرح يطيب
شاكر / الله يرحمه
ناصر / والله ما زعلت و اتاثرت بموت حد قده يلا الله يرحمه
شاهين / الله يرحمه … على العموم اتفقنا … اتكلم مع ام عباده و رد عليا
شاكر يهز راسه
………………
فى اوضه فاطمه
فاطمه / و انت قولتلهم هاخد راي فاطمه الاول !!!
شاكر / الله مش حقك ؟
فاطمه تبتسم و تقعد جنبه
فاطمه / قولت للكبير و للحج شاهين هشور فاطمه الاول!!!
شاكر / لا ما قولتش فاطمه يعني قولت ام عباده فى ايه مالك ؟
فاطمه / ما ليش .. تسلملى و يسلملى عزك
شاكر / المهم قولتى ايه ؟
فاطمه / هو فى قول بعد قولك اللى تشوفه طبعا
شاكر / يعني نكتب الكتاب و نسيبهم يختاروا بروحهم
فاطمه / يا خويا مش بيتهم يفرشوه على كيفهم و انا مالى هو انا كنت ادخلت فى عباده و خديجه
شاكر / بس كله كان تحت عنيكي
فاطمه / و انا عنيا دلوقت مش فاضيه ماليها حد تانى
فاطمه تلف ايديها حوالين رقبه شاكر يبتسم
شاكر / قولى والله
فاطمه/ و انا ليا غيرك الواد اتجوز و ادى البت اهى كمان هتمشي و هفضالك انا بقي
شاكر / يا وعدى يا وعدى
فاطمه / تعرف يا سيد الناس انت
شاكر / قولى
فاطمه / فى ظروف تانيه كنت حملت فى عيل تالت
شاكر / يا فاطمه
فاطمه / قولت فى ظروف تانيه انما انا لا عاد فيا خلق لا لعيل و لا لتربيه نتلهى فى عيالهم بقي
شاكر / انا عارف انك صغيره و ان اللى قدك لسه عيالهم صغيرين بس انا
فاطمه / انت سيد الناس كلها … طب قسما بالله انت خليك قدامى كدا و انا مش عاوزه حاجه تانيه من الدنيا دى و ربنا شاهد على كلامى
شاكر / خليكى انتى بس قدامى و انا اللى والله ما هعوز حاجه
فاطمه تتكسف و تبص فى الارض شاكر يخليها تبصله تترمى فى حضنه يبتسم
…………………..
فى اوضه مغاورى بعد كام يوم
فى عمال شغالين مغاورى يدخل و سماح وراه
مغاورى / الله ينور يا رجاله
الرجاله / بنورك يا سيد الناس
سماح تدخل و تبص
مغاورى / القاعه صغرت شويه بس لسه الحيطه دى حلوه نحط عليها كنبه بطولها و ترابيزه صغيره و الناحيه التانيه يادوب التليفزيون
سماح / ممكن حيطه الحمام دى تتعمل مكتبه صغيره او نيش نحط فيها حاجات لزوق القاعده و كدا
مغاورى / و ماله اللى تشوفيه حاضر … تعالى شوفي الحمام بس حاسبي على رجلك
سماح تعدى بين الرجاله و هم باصين فى شغلهم تدخل الحمام
مغاورى / هنا هيركب البانيو هيخلصوا الحيطه و يركبوه
سماح / وسع اهو
مغاورى / و لسه لما السيراميك و النور هيوسع اكتر الباشمهندس اكدلى
سماح / على البركه
مغاورى / تعالى اوريكي الاوضه و الفرنده
سماح تبتسم مغاورى يطلع و يفتح باب تانى فيه اوضه واسعه و بلكونه
مغاورى / شوفى تحبي تدهنيها ايه و لا تفرشيها ازاى بكيفك يعني
سماح تبصله و تبتسم
مغاورى / هى جاهزه مش محتاجه تستني يخلصوا بره ممكن النقاش يدخل يبدا فيها من بكره لو حبيتي
سماح / احب اوى
سماح تفتح باب البلكونه تلاقيها واسعه
سماح / دى كبيره اكبر من ما اتخليلتها
مغاورى / ايوه
سماح / معاك حق هواها بحرى و يرد الروح و لا منظر الجنينه من هنا على قولك تلاقيها احلى حته فى السرايا
مغاورى / و لسه انتى هتحليها
سماح تبصله
مغاورى / لما تفرشيها يعني … اااا.. شوفى هتحبي تحطى هنا ايه و لا هتسبيها فاضيه و لا … يعني … بكيفك طبعا
سماح تبتسم
سماح / ممكن نحط ترابيزه و كرسيين من اللى هم الخوص دول عارفهم
مغاورى / عيني حاضر
سماح / و كام قصريه زرع هنا و هناك هتبقي حلوه
مغاورى / تمام
سماح / مش محتاجه دهان و لا حاجه هى بس تتفرش
مغاورى / حاضر و الاوضه
سماح / لو هتعملها عازله للصوت زى عباده و مختار
مغاورى / احنا كدا كدا فى ركن لوحدينا … بس لو انتى عاوزه
سماح / ما يفرقش معايا هو انا لو متجوزه فى شقه قد دى فى عماره و حوليا سكان هعمل ايه يعني
مغاورى / تمام طب بالنسبه للنقاشه
سماح / لون هادى كدا ما ليش فى البهرجه انا يادوب وش بياض باى لون فاتح و خلاص ساده و انا هبقى اجيب كام تابلوه كدا من الموديرن دول على ساعه حلوه انطورهم فى المكان
مغاورى / تمام
سماح تروح تمسك فى السور مغاورى يروح يقف جنبها
مغاورى / فى حاجه و لا ايه
سماح / هههه لا اصل هواها حلو تعرف الواحد كدا لو كان فى حته تانيه كان حط فطار و فنجانين قهوه الصبح و لا كبايتين شاى بالليل مع حته كيكه
مغاورى / و ليه لا
سماح / انتوا ما بتاكلوش سوا و لا ايه
مغاورى / بناكل بس ما يمنعش نخصص لينا وقت لوحدنا يعني
سماح تبتسم عباده يدخل
عباده / خلصتوا و لا ايه
سماح / ايوه خلصنا
مغاورى / ان شاء الله هظبط كل اللى اتفقنا عليه تيجي المره الجايه تلاقيه كله جاهز
سماح تبتسم و تبص لعباده
عباده/ يلا بالسلامه احنا بقي
عباده و سماح ينزلوا و مغاورى وراها عباده يركب سماح تروح تفتح الباب و تركب مغاورى يشاورلهم عباده يحيه و يسوق و يمشي
عباده / يعني احنا قولنا تاخدوا قراركوا بروحكوا ما قولناش تنسي انكوا حيالله مخطوبين
سماح تبصله
عباده / بصيتي على الحاجه لزمتها ايه التطويله دى كلها قدام العمال يعني
سماح / كنا بنقى دهان الاوضه
عباده / فى الفرنده يا سماح
سماح / لا كنا بنقول نحط فيها فرش ايه و نتفق على الحاجات دى والله و بعدين انا والله ما لحقت يادوب بصيا على الحمام و شوفت الحاجه و انت دخلت والله و بعدين احنا ما كناش لوحدينا يعني
عباده / لا انتى كنتى لوحدك
سماح / سبتنى اطلع ليه لوحدى ما دام بعمل حاجه غلط
عباده / قولت هتبصى و تنزلى
سماح / و دا اللى حصل و لو كنت استنيت كنت نزلت من نفسي
عباده / انا بكلمك عشان مش هستحمل حد يقول عنك حرف واحد مش كلمه
سماح / قولت ناجلها لما نكتب الكتاب
عباده / و لا بعد كتب الكتاب هتفرق فى ايه يعني هو انتى فاكره لما تكتبى كتابك هيتقفل عليكوا باب و لا ايه
سماح / انت بتكلمنى كدا ليه هو انا كتير عليا افرح يعني لازم تغلتوا عليا هى مريم و عبد الله اللى طول النهار و الليل بيتمشوا فى جنينه السرايا قدام الغفر حد بيكلمهم و لا مغاورى لما بيجي عندنا مش بقعد معاه لوحدى
عباده / انتى عاوزه ايه دلوقت
سماح / انت اللى عاوز انت اللى بتتكلم
عباده / بتكلم عشان خايف عليكي … عشان غيرت عليكي انتى اختى الوحيده يا بت
سماح / قول والله
عباده/ امسكى فى الكلمه بقي و اعملى فيلم من غير فيلم
سماح / لا بالله غيرت عليا
عباده / مش اختى يا جموسه انتى
سماح / ما انت واخد أخته يبقي خالصين
عباده/ بس انا مش زيه
سماح / بدئها بدرى يا ابن الزيني مش هاخد صف حد فيكوا انا يكون فى معلومك لا النهرده و لا بكره و لا بعد مليون سنه
عباده / خليه ينفعك
سماح / الله ما قولت هبقي محايده و بعدين هينفعنى مش هيبقي جوزى … هينفعنى
عباده / ربنا يهنيكوا مش هعوز اكتر من كدا
سماح / تسلم
………………….
فى شقه محمود
محمود / انت ما بتزهقش من السيره دى بقي
يوسف/ انا زهقت من وقفه المحل و زن الستات هات دى و ريني دى و فى الاخر تفاصل فى الجنيه و الربع و تسيب الحاجه و تمشي
محمود / امال لو كنت من الصبيان اللى بيفرجوا و يلموا دا انت حياله بتكتب الفواتير
يوسف / بس زن و صداع برده هو انا بعيد يعني
محمود / دا على اساس الكافيه ده هيسمعك همس الصمت
يوسف / لا بس موسيقي هاديه و اضاءه حلوه جو تانى خالص على الاقل فى سيستم يطلب يدفع يمشي و بعدين الكافيه ده هيبقي كلاس مش اى حد هيخشه يعني
محمود / أوعدك لما ربنا يكرمنى بقرشين هفتحولك
يوسف / ما انت كل مره بتقول كدا
محمود / مهو لسه ما كرمش اعمل ايه يعني
يوسف / يا بابا يعني عاوز تقنعنى ان كل الوقت ده ما كسرتلكش قرشين
محمود / كل فلوسي اول باول بحطها فى المحل عشان اوقفه على رجله
يوسف / طب امشي فى اجراءات القرض
محمود / قرض لا
يوسف / انت ليه بتسدها فى وشي كدا هو انا مش ابنك و كل ده هيبقي بتاعى
محمود / لما اموت هيبقي بتاعك
يوسف / و هو انا كنت مت لما خدت شقتى و عربيتى
محمود / كفايا يا يوسف انا زهقت من زنك عاوز تفتح مشروع اشتغل و حوش
يوسف / هو اللى بتدهونى مرتب احوش منه
محمود / لو عندك اللى يديك اكتر روح اشتغل عنده
محمود يسيب المكان و يمشي يوسف يدخل المطبخ
يوسف / و انتى مش ناويه تقفى معايا مره
اسراء / مش معاه كلمته مليون مره قالى مش معاه كلمت خيلانك وضعهم اسوء من ابوك اعملك ايه
يوسف يبصلها و يمشي و هى تكمل الطبخ
……………………..
فى سرايا الزنايته بعد كام يوم
سماح قاعده و حواليها البنات بيتفرجوا على صور عفش على اللاب و هم بياكلوا لب
هند / رجعى الصوره اللى فاتت
سماح / دى
هند / التبلوه حلو اوى
مريم / شوفى احنا فى ايه و احنا فى ايه
هند / طب والله حلو و ملفت شدنى
سماح / هو حلو فعلا
هند / شفتوا
سماح / بس انا كنت بفكر فى اللى هو كذا حته بيكملوا بعض دول
فاتن / ايوه شوفت صور كتير حلو برده بس انتى ما شاء الله عندك كذا حيطه جوه و بره يعني اختياراتك كتير
سماح / خالص انا بره عندى حيطه اللى فيها الباب و التليفزيون و حيطه فيها النيش بالتقفيله و حيطه الكنبه و حيطه واحده
هند / ممكن تحطى فوق الكنبه ساعه او تابلوه عادى
انتصار تدخل و فى ايدها طبق كبير مليان فشار
انتصار / ايه قرانيه احسن الساعه فوق راسهم مش هتريحهم
مريم / و بعدين هو فى حد بيحتاج ساعات حيطه دلوقت ما البركه فى الموبايلات
سماح / لا دا انا عامله ساعه اونلاين بالحروف باسمى و اسمه بتتلزق بالدبل فايل و فراشات و حركات
هند / يا عم يا عم دى تتحط فى الحيطه الفاضيه تملاها بقي و حطى تابلوه خفيف فوق الكنبه و حطى جوه التبلوهات اللى بتكمل بعض
انتصار / بصي صوره الفلق كدا هى اللى فوق الكنبه حاجه كدا هاند ميد مدهب تشد العين
هند / انتى بتقولى ايه يا ام فاتن
انتصار / اسكتى انتى و لو فى من اللى بيكملوا بعض دى تبقي الفلق و الناس الاتنين جنب بعض كدا
سماح / هبقي اشوف ممكن ايه مش لازم السوره كامله
انتصار / يا بت اسمعى الكلام
سماح / مش يمكن شكلها ما يمشيش مع العفش
فاطمه / ورى عمتك قصارى الزرع اللى بتتعلق فى البلكونه
سماح تقلب فى الصور
فاطمه / حلوه اوى ما تيجي نعملها عندنا فى الفرنده
انتصار / نعمل يا اختى ما نعملش ليه
الرجاله تدخل
ناصر / الله الله لب و سدانى و فشار
مريم / بنقى جهاز لسماح
ناصر / طب دور شاى على المكتب لو ما عندكوش مانع يعني
هند / هعملهولك بايديا
مختار / لو من ايديكى يبقي قهوه
ناصر / لا ابوس ايدك انا مش حمل طلبات الاسياد
هند / كدا يا كبير
ناصر / ههههههههههههه بهزر معاكى
عباده/ امال خديجه فين
فاطمه / فى اوضتها قالت همدانه قولنا نسيبها ترتاح
عباده / طب هستاذنكوا هطلع اطل عليها
شاكر / ابقي طمنا
عباده يطلع فوق
هند / ارتاحوا و انا ثوانى و اجبلكوا القهوه
الرجاله تبتسم و يدخلوا المكتب و هند تروح المطبخ و مريم تروح تساعدها
………………..
فى اوضه رشيد
رشيد قاعد على طرف السرير و سمر ممدده و بتبص عليه
سمر / رشيد
رشيد يبصلها
سمر / مالك
رشيد / بفكر ابعتك مكان تانى احسن
سمر تقوم تقعد
سمر / هترجعنى للزنايته
رشيد / لا هشوفلك شقه لوحدك فى حته امان و هظبطلك طقم حراسه و هبقي اطل عليكي من وقت للتانى
سمر تقرب من رشيد
سمر / هتسيبني يا رشيد
رشيد / اكيد لا بس انا مش مطمن عليكي هنا و الست دى طلعاتها كترت
سمر / تقوم تبعدنى عنك خالص
رشيد / عنها مش عنى
سمر / و هى مش هتقدر توصلى هناك … انا مش عارفه اقولهالك ازاى بس بيتهيالى المكان الوحيد البعيد عن ايديها فعلا هو سرايا الزنايته
رشيد / مش هقدر اشوفك هناك
سمر / هكلمك فيديو كول
رشيد / ما اقدرش اطلب منهم حاجه زى دى
سمر / ما تطلبش سبنى على اول البلد زى المره اللى فاتت
رشيد / المره اللى فاتت كانوا يومين انما المرادى … هيحطوكى فى شقه و يقفلوا عليكي و لا هقدر اوقف عليكي حراسه و لا اطل عليكي جنبي اضمن
سمر / اجرب
رشيد / دخول الحمام مش زى خروجه
سمر / فيرا بتعملهم حساب دا احسن مكان بالنسبالى
رشيد يبصلها
رشيد / انتى متاكده ان فيرا مش بتسقيكي اى حاجه او تاكلك و انا بره
سمر / ااا لا ما انا قولتلك مليون مره لا
رشيد / امال هتفرق ايه هنا عن عند الزنايته
سمر / الله مش انت اللى عاوز تمشيني مدام مصمم يبقي توديني مكان امان
رشيد / مهو ده نفس المكان اللى كنتى مرعوبه فيه بالعكس المرادى اسوء لان المده اطول
سمر / يووووه بقي انا مش عارفه اريحك ما قولتلك خليني جنبك اقولك انا داخله الحمام
رشيد / تمام
سمر تقوم تدخل الحمام و رشيد متابعها يبص الناحيه التانيه و يتنهد
………………….
فى اوضه عباده
عباده / انتى بتتكلمى جد يا خديجه
خديجه / امانه عليك ما تقول لحد اما اتاكد و هاتلى شريط من اى صيدليه
عباده / ايوه يا بنتى بس احنا ما لحقناش
خديجه / هو انا هعيد من الاول يا عباده مش لسه قيلالك
عباده / طب انزل اجيبه دلوقت و لا الصباح رباح
خديجه / اللى تشوفه
عباده / ما انا لو نزلت دلوقت هيسالونى رايح فيه و اخاف اقول اسم اى دوا يطلع عند حد فيهم طب ما اقول الحقيقه و خلاص
خديجه / ما احنا هنقول هى الحاجات دى بتستخبى الاول نتاكد و لا نعمل بوليكا على الفاضي
عباده / والله عندك حق طب انا هنزل قال يعني بجيبلك … يادى النيله انا ما بعرفش اكدب … هيقفشونى و هيبقي شكلى زباله
خديجه / خلاص خليها بكره بقي فى طريقك و انت رايح و لا و انت جاى
عباده / دا على اساس انى هعرف اقعد على بعضى لبكره … انا هنزل و اللى يحصل يحصل
خديجه / ما تتاخرش
عباده / ما نفسكيش فى اى حاجه اجيبها و انا جاى جوافه رنجه حاجات من دى
خديجه / يلا يا عباده وقتك ده
عباده / هى مش الحاجات دى من الأعراض و لا الوحم ما ينفعش الا اما انزله مخصوص فى عز الليل
خديجه/ اه هو كدا يلا انجز بقي
عباده/ و ماله ننزله فى عز الليل بس تقوميلنا بالسلامه
خديجه / يلاهوى اشق الجلبيه يقولوا البت اتجننت مش لما نتاكد الاول نبقي نشوف الوحم و المواحمش
عباده / نازل نازل … و لما ارجع نبقي نشوف حوار الجلبيه دى نبقي نشقها سوا
خديجه / يارب
عباده / قولت نازل الله مش فاضل غير تدالجيني على السلم يوه
عباده ينزل يقابل الستات قاعدين
انتصار / مالها خديجه
عباده / كويسه الحمد لله
فاطمه / امال مالها ما نزلتش معاك ليه
عباده / هاه .. اصلها تعبانه
انتصار / انت مش قولت انها كويسه يا ابنى
عباده/ مهى كويسه بس تعبانه بس هى كويسه يعني
فاطمه / هو ايه اللى كويسه و تعبانه بس كويسه بس تعبانه هى فزوره يا ابنى
عباده / لا مش القصه بس هى محتاجه دوا كدا من الصيدليه و انا هجيبهولها علاطول كدا و اجى علاطول ان شاء الله
انتصار / دوا ايه
عباده / مش عارف كتبته فى الورقه و انا هجيبه و اجى علاطول عن اذنكوا عن اذنكو
عباده يسيبهم و يطلع يجرى
فاطمه / هو الواد ده ماله مسروع كدا ليه
فاتن / تلاقيها عاوزه حاجه حريمي و انحرج يقول
انتصار / و احنا غرب ما كانت طلبت مننا
فاطمه / قال يا خبر بفلوس سيبك سيبك
انتصار / الله مش بعاده يعني
فاطمه/ ياختى ديتها ربعايه و يرجع من الصيدليه و نشوف جاب ايه مش مستاهله هريه و نكته يعني
فاتن / والله يا عمتى انا رايي ما نحرجوش لما يرجع و المهم نطمن عليها و خلاص
سماح / ما لو كانت عاوزه حاجه ضرورى ما كانت كلمته و هو بره ايه لزمتها المشوره بعد ما يرجع
فاطمه/ اللى تلاقي دلع و ما تدلعش تبقي هبله قلبي قلبي هاتى اللى بعده
سماح تقلب فى الصور
………………..
فى اوضه عباس
ماجده تدخل الاوضه تلاقى عباس قاعد على المكتب بيبص فى ورق يشوفها يقفل الملف
ماجده / انا مش هعمل صوت هاخد غيار و ادخل الحمام
عباس / كفايا كدا النهرده تعبت اساسا
ماجده / ماشى
ماجده تفتح الدولاب عباس يقوم يحضنها من ضهرها تبصله
عباس / لسه زعلانه منى
ماجده / لا
عباس / امال مش بتبصى فى عيني ليه
ماجده تبص فى عنيه و ترجع تدارى عنيها
عباس / زعلانه … حقك تزعلى … بس انا والله اتغيرت هاخد بالى من شغلى و منك و من العيال … كنت واعدك اخدكوا نقضى كام يوم فى اسكندريه قبل الدراسه ما تبدا
ماجده / انت تعبان خليها مره تانيه مش هيحصل حاجه
عباس / بصى فى عيني يا ماجده
ماجده تبص فى عينه
عباس / قسما بالله بحبك انا عارف انى جيت عليكي كتير
ماجده / خلاص يا عباس ما تتكلمش فى اللى فات و انا والله ما زعلانه كفايا وجودك فى بيتك وسط عيالك كفايا دخلتك علينا بالسلامه مش عاوزه حاجه تانى
عباس / بس انا عاوز
ماجده / و انا ما ممنعتش نفسى عنك
عباس / مش عاوز ده … عاوز بس مش ده يعنى اللى اقصده
ماجده و عباس يضحكوا
عباس / عاوز ماجده بتاعه زمان البت اللى ما بتبطلش ضحك ايه بطلتى تاكلى زغازيغ و لا ايه
ماجده تبصله و تبتسم و تهز راسها
عباس / حقك عليا
ماجده / خلاص يا عباس
ماجده تتنهد و الغيار فى ايدها
ماجده / ريحتى عرق هتشطف و اجيلك
عباس / هو انا مش شامم عرق و لا حاجه بس و ماله بس خليها بميه دافيه عشان خدودك الحلوه دى تحمر
ماجده تبتسم
ماجده / وسع يا عباس وسع
عباس يوسع ماجده تدخل الحمام و هو متابعها و مبتسم
……………………
فى اوضه خديجه
خديجه و عباده قاعدين على السرير و التيست فى ايد خديجه عمالين يبصوا فيه شرطه واحده خديجه تاخد نفس و تقوم ترميه فى الزباله
عباده / الله
خديجه / مفيش
خديجه تتنهد
خديجه / تلاقيه تاخير عادى … يلا مش مهم
عباده / ما تصطبرى شويه
خديجه / خلاص شرطه واحده يبقى ما فيش حاجه … انا هدخل استحمى و الحمد لله اننا ما قولناش لحد و لا شوشرنا على روحنا من غير داعى
خديجه تفتح الدولاب و تاخد غيار و هى زعلانه عباده باصص على باسكت الزباله يتنهد و يقوم يقف قدامه و يبص على التيست خديجه تقفل الدولاب و تعدى من جنب عباده تلاقيه بيوطى يجيب التيست و الورقه بتاعته
خديجه / بتعمل ايه
عباده / البتاع ده منور يا خديجه
خديجه تاخده منه و تبص
عباده / فى هنا شرطه خفيفه بس منور الورقه هنا بتقول ويكلى بوزيتيف يعنى ايه البتاع ده
خديجه / يعنى فى حمل بس ضعيف
عباده / الحمل ضعيف ؟
خديجه / لا الهرمون بتاع الحمل هو اللى ضعيف ممكن عشان الحمل فى اوله
عباده / طب نجرب واحد تانى انا جايب كتير شوفى واحد تانى
خديجه / ما انا دمى ما اتغيرش يا عباده
عباده / بالله عليكي ريحينى مره واحده ريحينى خديني على قد عقلى و جربى واحد تانى
خديجه تفتح الدرج و تطلع تيست تانى
خديجه / اجرب حاضر
عباده / جربى بالله عليكي
خديجه و عباده يبصوا لبعض و عباده ماسك التيست القديم فى ايده و قافل عليه جامد
………………….
تانى يوم الصبح
انتصار واقفه تزغرط فاطمه جنبها و خديجه واقفه قدامها مكسوفه
فاطمه / قولتلك يا خبر بفلوس
هند و فاتن و مريم يطلعوا من المطبخ
مريم / فى ايه فى ايه
فاطمه / خديجه حامل
فاتن / بجد الف مليون مبروك
مريم / لحقتى
انتصار / قل اعوذ برب الفلق ما تلمى لسانك يا بت
مريم / مش قصدى والله
خديجه / هو لسه فى اوله فعلا حتى الهرمون ضعيف و باين بالعافيه فى التيست انا حتى عملاه دم مش يورين
فاتن / يورين
خديجه / بول يعنى الحمام
فاتن / اااااه
خديجه / لو كنت عملته فى الحمام ما كانش بان خالص مش قبل عشر ايام من النهرده على الاقل
فاطمه / سيبك من كل الكلام اللى لا بيقدم و لا ياخر ده هتروحى للدكتوره امتى تطمنى
خديجه / والله عباده وراه كام مشوار كدا و بعدها
فاطمه / كام مشوار ايه هو فى اهم من اللى انتى فيه اما اشوفه بس على العموم مش مشكله اطلعى اللبسى و انا هاخدك و نروح
انتصار / اصبرى يا فاطمه انتى عارفه الظروف بره
فاطمه / ما تشغليش انتى بالك انا هتصرف مش هنطلع لوحدينا
انتصار / يا فاطمه اعقلى جوزها ادرى
فاطمه / انا ما استناش على حفيدى يا اختى
مريم / والله و هتبقى تيته يا بطوط
فاطمه / تيته فى عينك يا بت لمى لسانك دا انا اللى يشوفنى يقول اختك الصغيره
مريم / بنتى كمان يا بطوط بس دى الحقيقه اللى انتى مستعجله عليها
فاطمه / ما حد يلم البت دى يا جدعان
انتصار / ههههههههههههههههه الله يرحم اما كنتى فى الرايحه و الجايه تقوليلى بقيتى ستو يا انتصار كبرتى و عجزتى يا انتصار
فاطمه / مش هنخلص منكوا احنا اطلعى يا خديجه اللبسى خلينى ننجز فى يومنا ده
خديجه تبص لانتصار
فاطمه / جرا ايه يا بت هو انا هقول الكلمه خمسين مره
خديجه / حاضر حاضر طالعه اهو
فاطمه / على مهلك و انتى طالعه اطلعى معاها يا مريم
مريم تطلع مع خديجه فاطمه تروح تخبط على كتف هند
فاطمه / عقبالك
هند تبتسم فاطمه تدخل المطبخ هو و فاتن هند تبص لانتصار
هند / هطلع ابص على ماما تكون محتاجه مساعده و لا حاجه
انتصار تهز راسها هند تطلع و هى بتمسح دموعها و انتصار بتبص عليها
انتصار / ربنا يجبرك يا بنتى
انتصار تروح المطبخ
……………………………
فى الجنينه الورانيه
عبد الله و مريم قاعدين على المرجيحه و عبد الله بيهزها برجله
عبد الله / مش فاضل غير انزل اشتريلى طقمين جداد و انتى
مريم / مش هروح
عبد الله/ خالص ؟
مريم / لما يبقي فى حاجه مهمه هيكلمونى من المدرسه بس انت عارف الثانوى ما بيوحوش و خصوصا انا
عبد الله / تمام
مريم / فكرت هتوفق الدنيا ازاى
عبد الله يهز راسه و هو باصص فى الارض
عبد الله / ما بتظبطش بالطول و العرض ما بتظبطش ابدا مفيش غير انى اسيب الشغل فى الشونه
مريم / كلم عباده يشوفلك حاجه بالليل
عبد الله / زى ايه ابقي غفير مثلا
مريم / ما اعرفش بس عباده احسن واحد ممكن يتصرف و يمكن احسن من عمى بعده امين
عبد الله / لا امين خلقى ما اطلبش منه حاجه … هو جدع و عشرى بس خلقى … الاول كان فرفوش عن كدا
مريم / كلنا اتغيرنا الفتره اللى فاتت ما تنساش ان اللى شوفناه الكام شهر اللى فاتوا ما كانش شويه دا اليوم كان بيعدى كانه سنه يا عبد الله شوف انت روحت المستشفي كام مره فى الكام شهر اللى فاتوا
عبد الله / الحمد لله
مريم / الحمد لله … اتكلم معاه شوف يمكن زعلان منك فى حاجه
عبد الله / انا ما عملتلوش حاجه
مريم / يمكن ما اخدتش بالك
عبد الله / اتكلم معاه … و ماله
مريم / عبد الله
عبد الله يبصلها
مريم / اتكلم انا معاك ؟
عبد الله يستغرب
عبد الله / انتى بتستاذنى اتكلمى طبعا
مريم / انت دلوقت هتروح الكليه و هناك هتشوف بنات غيرى
عبد الله / ههههههههههههههههه و هو انا ما بشوفش يا مريومتى طب دا انا من يومى و البنات حواليا اكوام اكوام
مريم / لا يا شيخ
عبد الله/ بس انا عيني ما بتشوفش غيرك انت يا قمر
مريم / كل بعقلى حلاوه كل
عبد الله / حلاوه بالقشطه يا قشطه انتى يا عسل
مريم / ما تتلم يا عبد الله الله
عبد الله / بكره الكبير يحدد معاد كتب الكتاب و ساعتها اقسم بالله شوفى اقسم بالله لن ارحم احدا
مريم تبتسم و تبص الناحيه التانيه و كلها سنه و الترم يخلص و النتيجه تبان و اعملك احسن فرح
مريم / قول ان شاء الله
عبد الله / ان شاء الله … من هنا لوقتها هحوش كل قرش يجيلى هعمل كل اللى اقدر عليه عشان الليق بيكي
مريم / ما انت لايق اهو
عبد الله / اوعى تفتكرى انى مش واخد بالى اوعى تفتكرى انى مش عارف انتى بتسمعى ايه و لا الناس بتبصلك ازاى
مريم / بيبصولى صح .. بيقولوا يا بختها بنت الكبير خدت الدكتور عبد الله سيد الرجاله
عبد الله يبتسم
مريم / انت اللى بتفرض على الناس مقامك باخلاقك و سيرتك الحلوه كفايا حنيتك و قلبك الابيض
عبد الله / كفايا انك جنبى
مريم / بكره ربنا يكرمنى و ادخل معاك الطب و نروح و نيجي سوا
عبد الله يبتسم
مريم / هبقي معاك فى البيت و الكليه و لما نتخرج نشتغل سوا بس على الله انت ما تزهقش منى
عبد الله / على الله انتى بس العيال ما ياخدوكيش منى
مريم / عيال ايه ؟
عبد الله / عيالنا
مريم وشها يحمر و تبص فى الارض
عبد الله / افهم بس الكبير مستنى ايه عشان يكتب كتابى على الفرولايه دى
مريم تقوم و تمشي ناحيه السرايا عبد الله يقوم وراها
عبد الله / انتى يا بنتى … يا فراوله انتى يا بت
مريم تدخل السرايا عبد الله يبص حواليه يلاقي خليفه باصصله
عبد الله / فى حاجه يا خليفه
خليفه/ تسلم يا سي عبد الله تؤمرش انت بحاجه
عبد الله/ تسلم
عبد الله يدخل المضيفه
…………………….
فى اوضه مختار
هند ممدده فى السرير و مختار نايم جنبها و مديها ضهره هند تمد ايدها و تجيب الموبايل و تكتب رساله
هند / انا مش عارفه انام بفكر هو انا قولتلك مبروك و لا لا
هند توصلها رساله
خديجه / بيتهيالى قولتى
توصل رساله تانيه
خديجه / على العموم الله يبارك فيكي
توصل رساله تالته
خديجه / عقبالك
هند تكتب
هند / انا كنت فكراكى نايمه اوعى اكون صحيتك
هند توصلها رساله
خديجه / لا صاحين
مختار يتقلب
مختار / بتكلمى مين السعادى
هند تحط الموبايل
هند / خديجه
مختار يقوم يقعد بفزع و يبص فى الموبايل
مختار / فى حاجه و لا ايه
هند / بباركلها عادى
مختار يسيب الموبايل و يفرد ضهره تانى
هند / مختار
مختار يبصلها
هند / تفتكر المفروض نروح لدكتور
مختار / لو عاوزه نروح
هند / النهرده خديجه حامل و مع كدا الكل كان بيبصلى انا
مختار / هو بغض النظر انها ممكن تكون تهيات منك بس مين عارف مش يمكن فى مليون سبب تانى
هند/ يمكن
مختار / بقولك ايه ما دام مش جايلك نوم ما تيجي نخرج
هند / دلوقت ؟
مختار / كل ما الوقت اتاخر كل ما الرجل خفت و خدنا راحتنا
هند / انت بتتكلم جد و لا بتهزر
مختار / بتكلم جد
مختار يقوم من السرير و يبصلها
مختار / بالنسبالى اى مكان معاكى انا راضى المهم نبقى سوا لو مش عوزانا نخرج خلينا
هند / انت عارف امتى اخر مره خرجت من البيت طبعا لو حسبنا ان مرواحى المستشفى بجرى ورا واحد منكوا خروجه يعنى
مختار / و احنا فيها قومى اللبسى نتمشى بالعربيه شويه نروح نقعد على النيل نشم هوا نضيف ايه رايك
هند / متاكد انه ينفع … اقصد فى الوقت ده يعنى
مختار / هتخافى و انتى معايا و لا ايه … طب دا حتى عيب على المستوى اللى وصلتيله
هند تضحك و تبص الناحيه التانيه مختار يقرب و يقعد قدامها بالظبط و هو مبتسم
مختار / ها هتعملى ايه ؟
هند / هقوم اللبس
مختار يغمزلها و هند تقوم تلبس
……………………..
على مدخل البلد
غفر واقفين فارس يعدى بعربيته يركن و ينزل منها
فارس / مساء الخير يا رجاله
غفير ١ / مساء النور يا فارس باشا
فارس / انا لسه جديد هنا و مش واخد على الجو ده انتوا عارفين ان دا شارع عمومى يعني مش من حقكوا انكوا تنصبوا كمين هنا
غفير ٢ / كمين ايه يا باشا احنا حيالله بنشرب شاى اصبلك كبايه
غفير ١ / و بعدين احنا لا منعنا حد يطلع و لا حد يدخل و زى ما سعاتك قولت قاعدين فى ملك الحكومه و مفيش قانون يمنع اننا نقعد نشرب شاى
غفير ٢ / سكرك ايه يا فارس بيه
فارس / مره تانيه عشان مستعجل
فارس يسوق و يطلع بره البلد غفير ٢ يطلع موبايله
الغفير / ايوه يا سي مغاورى … فارس باشا خرج بره البلد
………………..
على النيل
مختار و هند قاعدين فى العربيه مختار بيشرب سفن و هند بتاكل شيبسي
هند / المنظر من هنا تحفه
مختار / اجمل حته فى البلد
هند / لا و انت عامل حسابك و شارى حلويات و مظبط الدنيا كنت عارف اننا هنيجي النهرده و لا ايه و لا يكونش البيه بيجي هنا من ورايا
مختار / باجى هنا من وراكى
هند / افندم !!!
مختار / لما بكون مضايق و عاوز ابعد عن الناس باجى هنا و الحاجات دى مش حاجتى اصلا
هند / بتهزر
مختار / والله ما بتاعتى … بتاعه عبد الله كان شاريها لمريم و نسيها قولت رزقنا بقى انا اساسا كنت ناسيها لولاكش انتى لما ركبتى شوفيتها … هبقى اجبله بدالها بقى
هند تبتسم و تبص الناحيه التانيه و ترجع تبصله
هند / بطلت تطلع على السطوح انت
مختار / متراقب
هند / ههههههههههههههههههه
مختار / هتسبيني اطلع يعنى
هند / هطلع معاك
مختار / يبقى سريرنا اولى بينا
هند / اتلم
مختار / الله !!!
هند / بقالى ياما اوى ما خرجتش بجد مش عارفه اشكرك ازاى
مختار / احنا بس ننول الرضا
هند تبتسم و تبص الناحيه التانيه مختار يمد ايده و ياخد شيبسيايه الناحيه التانيه بعيد فارس يركن العربيه و يبتسم
فارس / من يومى مرزق
فارس يرجع بالعربيه و يركن بعيد و ينزل و يفتح شنطه العربيه فيها واحد نايم
فارس / اتز يور لكى داى ذا تارجت ايذ هير ( النهرده يوم سعدك الهدف هنا )
شاب ينزل من العربيه
فارس / دونت فورجيت وى نيد زيم اللايف ( ما تنساش احنا عاوزينهم عايشين )
الشاب / زيم ( هم )
فارس يبص على عربيه مختار مختار نزل منها و راح سند على الكابوت و هند راحت سندت معاه و بصوا على النيل الشاب يبص لفارس و يهز راسه و يبتسم فارس يروح يفتح الباب الورانى و يرفع الكنبه تحتها اسلحه الشاب ياخد مسدسين و خزنتين و يحطهم فى جيبه فارس يقفل الكنبه
فارس / دونت مايك هير انجرى ( ما تزعلهاش منك )
الشاب يهز راسه فارس يركب العربيه و يبعد اكتر و الشاب يدارى و يتحرك و مختار و هند قاعدين بيضحكوا فجاه الشاب يضرب طلقه على العجله اليمين الورانيه مختار يزق هند من راسها لتحت و ينزل معاها و يحط ايده على ضهره ما يلاقيش المسدس يبص لهند بنظره صدمه الطلقه التانيه فى العجله الشمال ورا هند تبص لمختار يبتسم
مختار / مهما حصل ما تتحركيش من هنا تمام
مختار يجى يقوم تمسكه من هدومه كذا طلقه فى شنطه العربيه واحده منهم تيجي فى الازاز الورانى تكسره و هند تصرخ فى مختار
هند / هتروح فين و انت من غير سلاح
مختار / هجيب سلاحى من العربيه
هند / هيقتلوك
مختار / هستناهم يعنى
صوت ضرب نار كتير و فجاه سكوت
مغاورى / مختار
مختار / مغاورى
مختار يبص لهند و يبتسم و يقوم يقف يبص يلاقى مغاورى و الشاب نايم فى الارض
مغاورى / انت كويس ؟ هى كويسه ؟ فيكوا حاجه ؟
مختار يوصل لمغاورى
مختار / الحمد لله جت سليمه
مغاورى يديله بالبوكس يوقعه فى الارض
مغاورى / انت غبى ياله خارج بيها من غير حراسه
هند تجرى على مختار
هند / مختار … انت اتجننت
هند تقوم مختار من الارض
مغاورى / و انتوا ما شاء الله على عقلكوا ان كنتى انتى و لا جوزك
هند / و انت مالك
مختار / هند
هند / انت كويس
مختار يهز راسه و يبص لمغاورى
مختار / شكرا
مغاورى يبص لهند هند تبص الناحيه التانيه
مغاورى / عرفت ان فارس خارج بره البلد
نور جاى من بعيد التلاته يبصوا عربيه فارس جايه عليهم
مغاورى / جبنا فى سيره الكلب
فارس يفرمل و ينزل من العربيه و يطلع مسدسه مختار يجيب هند ورا ضهره
فارس / ايه اللى بيحصل هنا
مختار / زى ما انت شايف الحيوان ده كان بيحاول يقتلنى و يسلم مغاورى
فارس يبص على هند مداريه فى ضهر مختار و يبص على العربيه
فارس / و انت ايه اللى خرجكوا السعادى
مختار / هو فى حظر تجوال و انا ما عنديش خبر بيه و لا ايه … يا باشا
فارس / انت قولى … غفر متنطورين فى كل حته .. مش انت اللى كنت لابس واقى ضد الرصاص اول ما اتقابلنا و مستهدف … على العموم زى ما كلنا شايفين فى جريمه قتل حصلت و القانون
مغاورى / ياخد مجراه … على راسنا … بس زى ما الباشا شايف معانا حريم نروحها و احنا تحت امرك
فارس / دا على اساس انها ما حضرتش اللى حصل و لازم تشهد و لا ايه يا مغاورى بيه
مختار يبص لهند و يبص لفارس
مختار / و ماله يا باشا حقك و حق الحكومه
فارس يهز راسه و يبص على هند
…………………..
فى سرايا الزنايته
كل الرجاله بتخرج من السرايا و تركب العربيات بسرعه و انتصار تطلع تقف و الفزع باين عليها عبد الله يفتح المضيفه و مش فاهم حاجه العربيات تجرى برا السرايا عبد الله يجرى على انتصار
عبد الله / هو فى ايه يا ام فاتن
انتصار تبص لعبد الله
عبد الله / حاجه حصلت هم رايحين فين كلهم كدا السعادى
انتصار / ما فيش حاجه يا ضنايا ادخل ارتاح زمانهم راجعين
عبد الله يبص على البوابه و يبص لانتصار و يهز راسه لا
عبد الله / فى حاجه حصلت فى حاجه كبيره حصلت
عبد الله يجرى على المضيفه يفتح الدرج و يطلع مسدسه انتصار تدخل المضيفه
انتصار / ما فيش حاجه يا عبد الله قولتلك ما فيش حاجه
عبد الله يبصلها
عبد الله / الرجاله كلهم خرجوا هروح اقعد على البوابه مع الغفر
انتصار تبتسم و تهز راسها عبد الله يبصلها
عبد الله / بس انا عارف ان فى حاجه حصلت
انتصار / مختار و هند خرجوا من غير ما يقولوا لحد و انضرب عليهم نار
عبد الله عنيه توسع انتصار تلحقه
انتصار / بس هم بخير ما اتخدشوش مغاورى لحقهم بس فارس الكلب خدهم على القسم يقفلوا المحضر
عبد الله يبص فى الارض
انتصار / ما تخافش والله بخير هم لو فيهم حاجه انا كنت هقف قدامك كدا
عبد الله يهز راسه و يطلع بره و انتصار تطلع وراه تشوفه بيقعد جنب الغفير و بيبص فى الكاميرات و يبص على انتصار تبتسمله يبص فى الكاميرات تانى تتنهد و تدخل السرايا
…………………………..
فى القسم
فارس قاعد على المكتب و هند قاعده قدامه و فى واحد بيكتب المحضر
فارس / و انتوا متعودين تروحوا المكان ده كتير
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
تعليق واحد