رواية البر التاني الفصل الثالث والعشرون 23 بقلم لولو محمد

رواية البر التاني الجزء الثالث والعشرون

رواية البر التاني البارت الثالث والعشرون

رواية البر التاني الحلقة الثالثة والعشرون

عبد الله / والله ما هرحمهم والله ما
شيرى / نطمن على اختك اوعى تعمل حاجه لحد ما نطمن على اختك
شيري توصل لكوريدور الاوضه تلاقي محمود واقف هو و اخواته
شيري / بنتى فين
محمود / بيكشفوا عليها جوه
الدكتوره تطلع من جوه شيري تجري عليها
شيري / بنتى يا دكتوره بنتى عامله ايه
الدكتوره / البنت لسه بكر بيتهيالي كدا حضرتك تهدى بنت اخوك اشرف من الشرف و اى محاوله تانيه منك انا هطلبلك الامن
شيري تبص للدكتوره و مش فاهمه
شيري / انتى بتقولى ايه
عبد الله / ابنك هيدفع تمن اللى عمله المرادى ابنك لازم يتحاسب كلكوا هتتحاسبوا
محمود / انتوا هتلبسوها فى ابنى روحوا شوفوا الصايع اللى كانت مرفقاه
عبد الله يحاول يضرب محمود عمامه و ولاد عمامه يحوشوا شيري تمسك محمود من هدومه
شيري / انت خلتهم يكشفوا على بنتى يا ابن الكلب يا واطى انت بتشكك فى شرف بنتى يا عديم الشرف
اسراء و باقي العمام يحوشوا و يشدوا شيري بعيد
شيري / حسبي الله و نعم الوكيل فيكوا سيبونى حسبي الله و نعم الوكيل فيكوا
الدكتوره / انتوا فى مستشفي مش فى زريبه لو سمحتوا يا تقعدوا بادبكوا يا اما هناديلكوا الامن
شيري تفلت من ايديهم و تدخل تجرى على جوه تلاقي هند بتعيط و بتتوجع و بتبصلها بقهره تروح تحضنها يسيبوا عبد الله يدخل يبص على اخته و حمدى يبص على محمود و اسراء بتبص لهند بتشفي
حمدى / ليه يا محمود كلنا عارفين ان هند ما تغلطش الغلطه دى
محمود / بكسر شوكتهم ما عدش حد عارف يكلمهم
حمدى / مش بالطريقه دى
حمدى يبص لابنه و يمشوا
حامد / اطمنا على هند نستاذن احنا بقي عشان ورايا مشوار مهم
حامد يبص لابنه و يمشوا و محمود عينه على هند بتعيط و اهلها حضنينها
اسراء / انت هتفضل واقف تبص عليها و تسيب ابنك مرمى فى الحجز بسببهم و طبعا دفعت مصاريف المستشفي دا انا حساب التاكس انا اللى دفعتهولهم
محمود / يلا نروح نبص على يوسف
محمود و اسراء يمشوا عبد الله عينه تيجي على الباب ما فيش حد بره يبص على امه و اخواته بيعيطوا فى حضن بعض يبعد عنهم خطوه و يفضل باصصلهم و يطلع بره يجرى شيري تجرى وراه ما تحصلوش
شيري / عبد الله ارجع يا عبد الله ارجع عشان خاطرى و خاطر اخواتك ترجع
شيري ما تحصلش عبد الله تقعد تعيط على اقرب كرسي
………………..
فى عربيه مختار
مختار سايق العربيه زى المجنون يركن قدام محل محمود و ينزل زى الطور الهايج يدخل المحل يبص بعينه مفيش حد من اهل هند
مختار / فين اصحاب المخروبه دى
شاب / خير يا استاذ اؤمر
مختار / فين محمود الجمل و اخواته
الشاب / والله يا استاذ جالهم تليفون و طلعوا كلهم يجروا و ما جوش من ساعتها لو
مختار يسيبه و يمشي يركب العربيه و يسوق تليفونه يرن
مختار / افندم
فاروق / عبد الله رجع البيت
مختار / انا فى الطريق
فاروق/ حالته صعبه يا سي مختار و عمال يكسر فى البيت و يصرخ و مش قادرين نهديه
مختار / ما تخليهوش ياذى نفسه و انا جاى فى الطريق
مختار يزود السرعه
……………………..
فى السرايا
ناصر / احنا مش هنخلص بقي من الهم ده
عباده / انا قولت من الاول سكوتنا للكلاب دول فكرونا لقمه سهله والله المرادى ما ارتجع الا بالد
ناصر / مش هتروح اصلا
عباده / مش هتقدر تمنعنى يتهجموا على حريمنا فى بيتهم و يخطفوا البت و عاوزنى اسكت
انتصار تدخل
انتصار / لقوها يا ناصر
ناصر / لا لسه بس ان شاء الله خير
انتصار / و هيجي الخير منين بس بعد اللى حصل
امين يدخل
امين / الرجاله جاهزه فى العربيات
عباده / تاذن ما تاذنش انا رايح معاهم
ناصر / تطلعوا كاملين و ترجعوا زايدين
عباده يمشي و وراه امين
انتصار / انا لسه قافله مع مختار سايق زى المجنون يا كبدى بيدور عليها فى المستشفيات
ناصر / عبد الله روح و مختار رايحله فى الطريق
انتصار / روح لوحده طب امه و اخواته
ناصر يبصلها و يبص فى الارض
انتصار / يا مرك يا إنتصار يا مرك كان جابهم معاه ما كانش سابهم حسبي الله و نعم الوكيل حسبي الله و نعم الوكيل
ناصر / انتى هتعددى و لا ايه هيرجعوا بيهم و مش عاوز اسمع صوت فى السرايا لحد ما نعرف راسنا من رجلينا
………………….
على السلم من فوق
سماح و مريم واقفين يتفرجوا
سماح / بيقولوا عمك هيولع فى مصر باللى فيها
مريم / مراته يا سماح
سماح / لسه ما بقتش مرته
مريم تبصلها و تسكت
سماح / ابن عمها بيحبها و مش قادر تكون غير ليه خطفها ما حدش عارف ايه اللى ممكن يحصل انتى ما بتشوفيش افلام و لا ايه
مريم / قصدك ايه
سماح / يا خبر النهرده بفلوس بكره يبقي ببلاش
مريم / هترجع ان شاء الله و هترجع سليمه كمان
سماح / بتحبيها اوى على ايه بكره تيجي تقلب البيت عليه واطيه و تعمل مصراويه و تتكبر علينا و نبقي كلنا خدامين تحت رجليها
مريم / كنت فكراكى بتحبيها
سماح / لا بحبها و لا بكرهها
مريم / انا بقي بحبها و ان شالله اخدمها صبح و مسا بس ترجع بالسلامه
مريم تسيب المكان و تمشي و سماح لسه بتبص على انتصار و هى قاعده بتعيط على كرسي
سماح / لو انا ما كانوش بكوا عليا كدا
……………………..
فى القسم
محمود واقف مع محامى
المحامى / لا طبعا موقفه صعب جدا و مستحيل يخرج النهرده و بعدين دول كانوا خمسه يعني تجمهر و عصبه يعني عقوبات مشدده
محمود / يعنى خلاص نروح نجبله عيش و حلاوه امال احنا جايبينك ليه
المحامى / احنا نقدر نلعب فى التقرير الطبى الخارج من المستشفي و نخلي العلاج اقل من واحد و عشرين يوم و لو حصل تصالح هنقدر نلم الموضوع غير كدا
اسراء / هتتنازل والله افتح دماغى و محضر قدام محضر و ابهدلهم واحد واحد
محمود / اهدى يا اسراء
خلينا نشوف هنخرج من المصيبه دى ازاى مش نفتح علينا واحده تانيه
ظابط رتبه معدى محمود يشوفه
محمود / مصطفي بيه مصطفي بيه
مصطفى / الله حج محمود ازيك عاش من شافك يا راجل فى ايه خير فى حاجه و لا ايه
محمود / يوسف ابنى محجوز جوه
مصطفى / ازاى ايه اللى حصل
محمود / بالله عليك يا مصطفي بيه لو تقدر تساعده
مصطفى / احكيلى بس اللى حصل و انت عارف لو اقدر اساعدك مش هتاخر ابدا
…………………
فى شقه عبد الله
عبد الله قاعد فى الارض بيعيط
فاروق / طب هى بخير … طب قولى بس هى فين … والله لنجبلك حقك بس طمنا عليهم
عبد الله يبص لفاروق
فاروق / احنا مش هنسكت على اللى حصل والله ما هنسكت
عبد الله يمسح دموعه و يدخل يفتح درج فى المطبخ و يطلع سكينه و هو فى حاله صدمه
فاروق / بتعمل ايه يا سي عبد الله
عبد الله يحطها مكانها و يطلع واحده تانيه اكبر و يبص عليها من قدام و ورا و يجى يطلع فاروق يمنعه
فاروق / على فين يا سي عبد الله السلاح يطول
عبد الله/ ابعد عنى بقولك ابعد
فاروق / انا مش هسيبك تاذى روحك
عبد الله / هقتلهم كلهم والله لاقتلهم كلهم
فاروق / قولى هم مين و مكانهم و احنا
عبد الله / ابعد عنى يا فاروق ابعد مش عاوز اذيك
فاروق ينيم عبد الله فى الارض و ياخد منه السكينه عبد الله يعيط جامد
فاروق / سامحنى يا سى عبد الله انا خايف عليك
عبد الله ياخد وضع الجنين و فاروق حاضنه مختار يدخل
عبد الله / قتلوها قدام عيني و ما قدرتش اعملها حاجه دمروا كل حاجه حلوه فى حياتي و انا عاجز كنت سامع صريخها و مش قادر احوش عنها
مختار الدموع تملا عنيه و ينزل على ركبه قدام عبد الله عبد الله / سبتهم يقتلوها يا مختار سبتها و ما حاميتهاش ما عرفتش احمى اختى يا مختار صريخها لسه فى ودانى يا مختار لسه بتصرخ يا مختار
عبد الله يضرب على ودانه مختار و فاروق يمنعوه و يتملكوا منه
مختار / اهدى اهدى
عبد الله / مفيش حاجه هترجع زى الاول كل حاجه راحت هحط عينى فى عينها ازاى بعد كدا هقولها ايه
مختار / اهدى حقها راجع
عبد الله / لو شوفت كانت بتبصلى ازاى فى المستشفي كانت بتدارى منى فى حضن ماما مش عوزانى اشوفها مكسوره مش عاوزه تشوفني و انا عاجز مش قادر احميها
فاروق / طب هم فى انهى مستشفي
عبد الله / انا مش هرجعلها الا اما اجيب حقها مش هعرف ابص فى عينها الا ما اجيب حقها انتوا سامعيني
مختار يبص لفاروق و يمسك عبد الله من كتافه و عبد الله بيعيط
مختار / هى فين يا عبد الله هند فين يا عبد الله
عبد الله يبص لمختار و الاتنين الدموع مغرقه وشهم
مختار / هند عايشه صح
…………………..
فى القسم
مصطفى / الجدع اللى انت حكيتلى عنه ده اسمه مختار ايه الزيني
اسراء / عمران
مصطفى / مختار عمران الزيني اخو ناصر عمران الزيني
محمود / عليك نور هم دول
مصطفى / انتوا ايه اللى وقعكوا مع الناس دول
محمود / النصيب و القدر نعمل ايه
مصطفى / دول من اشهر تجار السلاح فى الصعيد
محمود / اتاري الفلوس معاهم زى الرز انا قولت برده الزراعه ما تجبش كل ده
مصطفى / الناس دى مش ناس عاديه دول ليهم سمعتهم فى الصعيد و الكل عارفهم
محمود / و الحكومه ازاى سيباهم
مصطفى / الحكومه ما لهاش بالكلام المرسل لازم تلبس و اجراءات و هم ناس عارفه شغلهم كويس دا حتى مخالفه عربيه مش هتلاقى عليهم
محمود / على يدى ضربت الارض انى الاقى ضدهم حاجه ما فيش
اسراء / شوفت يوسف كان معاه حق و ما حدش صدقه ادى اخره مجايب بنت اخوك
محمود / مهو كلام من غير دليل ما حدش هيصدقه
اسراء / ليه هى هتكدب مصطفى بيه
محمود / هتقول تبعنا و زى ما مصطفى بيه قال الناس دى بتعرف تدارى نفسها كويس
مصطفى / و اللى يجبلك حد بنت اخوك ما تقدرش تكدبه
محمود و اسراء يبصوا لمصطفى
………………………….
فى المستشفي
هند نايمه فى حضن شيري و بتعيط باب الاوضه يتفتح شيري تبص تلاقي مختار
مختار / ممكن ادخل
هند تدارى نفسها اكتر فى حضن مامتها
شيري / دا مختار يا هند رجع يطمن عليكي
عبد الله يدخل
شيري / الحمد لله كنت هموت من القلق عليك اوعى تكون عملت حاجه
مختار / هند
هند تدارى فى حضن مامتها و صوت عياطها باين
مختار / انتى زعلانه منى … حقك تزعلى … انا موفتش بوعدى
مختار يقرب من هند
مختار / حقك هيرجع كل اللى اذوكى هيدفعوا التمن
شيري / بلاش يا مختار بلاش مشاكل خدنا البلد خلينا نمشي من هنا
مختار / هنمشي حاضر بس هند تشد حيلها هتستحمل الطريق
شيري / ممكن تسافر فى عربيه اسعاف هتستحمل مش كدا يا هند
هند بتعيط و وشها مش باين منه حاجه شيري تبص لمختار الدموع تنزل من عنيها مختار يتنهد و يمشي عبد الله يحصله
عبد الله / انت رايح فين
مختار/ خليك جنبهم اوعى تسبهم
عبد الله / انا هاجى معاك
مختار / مش هتاخر هم محتاجينك اكتر امك قلقانه عليك
عبد الله / انا مش عيل صغير و حق اختى لازم اخده
مختار / هيحصل بس لما اختك تقوم بالسلامه .. فاروق و عيسي تحت هبعتلهم يقعدوا على الباب هنا لو احتاجتوا اى حاجه لحد ما ارجع اطلب منهم عادى
عبد الله الدموع بتنزل من عنيه مختار يروح يمسحهاله و عنيه مليانه دموع
مختار / انشف ياله الرجاله ما بتعيطش انت فاهم
مختار يسيب عبد الله و يمشي و يمسح دموعه اول ما تنزل و الغضب مالى عنيه
…………………
فى القسم
يوسف يدخل مكتب الظابط يلاقى وسام قاعده يشوفها يبص الناحيه التانيه
وسام / دى اخرتها اشوفك فى الاقسام
يوسف / انا مش فايقلك
وسام / و لا تفوقلى و لا افوقلك انا مش هربط نفسى بسوابق زيك خليك انت بقى اجرى وراها و اتبهدل براحتك
يوسف / خلصتى الحمد لله
وسام / انا هعتبر الشبكه تعويض عن الفتره القذره اللى قضيناها سوا
يوسف / خدى اللى انتى عوزاه
وسام / تمام يا يوسف تمام
وسام تسيب يوسف و تمشى العسكرى يرجعه الحجز
……………..
قدام القسم
خناقه كبيره و رجاله كتير بيضربوا فى بعض من ضمنهم مختار يدخلوا القسم يكملوا خناق
راجل / انت فاكر انى هسكتلك دا انا هردلك الضربه عشره
مختار / راجل وريني نفسك
امين شرطه / فى ايه منك ليه هى سويقه لمهم يا ابنى على الحجز اما نشوف هيهدوا و لا ايه
العساكر يحركوا مختار ناحيه الحجز هو و الرجاله يدخل يوسف قاعد وسط صحابه
يوسف / ليه و انا اللى قولتلك امسك السكينه و هددهم
الشاب / و هى السكينه هى اللى رقدت هند فى المستشفي
يس يشوف مختار باصصلهم يقوم يقف الكل ينتبه مختار و اللى معاه فى ثوانى ينزلوا فيهم ضرب العساكر تفتح الزنزانه و تطلع مختار و اللى معاه بره مختار يدى للعسكرى فلوس و هو بينهج و بيبص على ايده متعاصه دم
………………….
فى المستشفي
باب الاوضه يتفتح و ام عبد الرحمن و جوزها يدخلوا شيري و عبد الله يبصولها
الست / السلام عليكم
شيري / و عليكم السلام حضرتك
الست / هند صح ؟
هند تتعدل و تبصلها
الست / انا اسفه ما عرفتكوش بنفسي انا ميرفت مجاهد انا والده عبد الرحمن زكريا الزيني
شيري / اهلا و سهلا اتفضلى
ميرفت تقعد جنب هند
ميرفت / انا حاولت بكل الطرق اقطع علاقتى بالعيله دى حتى سفرت ابنى بره مصر لانى مش قادره ابعده عن مختار انا هختصر و اخش فى الموضوع لانك شكلك تعبان اوى و كمان اكيد كلاب السكك اللى مختار موقفهم بره زمانهم اتصلوا بيه و قالوله انى هنا و هقولك الحقيقه
شيري / حقيقه ايه
ميرفت / من حاجه و عشرين سنه قابلت شاب طويل عريض فيه كل صفات احلام اى بنت حبينا بعض و اتجوزنا و عكس رغبه اهلى سافرت عشت معاه فى الصعيد عشنا اجمل شهر عسل فى الدنيا و اكتشفت انى حامل فى عبد الرحمن فى نفس الوقت اللى اكتشفت فيه حقيقه جوزى و عيلته مهربين و تجار سلاح
شيري / انتى بتقولى ايه
ميرفت / كل الصعايده اساتذه فى استخدام السلاح مش كدا بيمشوا بحراسات وراهم لياقتهم البدنيه عاليه جدا عيله كامله رجالتها كانهم ابطال فيلم اكشن اجنبي و انا متاكده انك لاحظتى حاجات غريبه لكن حبك لمختار عماكى زى ما حبى لزكريا الله يرحمه عمانى انا هربت خدت ابنى فى بطنى و قعدت شهور بتنقل من بلد لبلد كل يوم عند حد من اهلى عشان ما يلاقينيش مش متخيله الرعب اللى عشته لما شوفته داخل اوضتى و بيشيل ابني اللى لسه لحمه حمره من جنبي و حتى لما طلقنى و سابني اربى ابني و حتى لما مات انا لحد النهرده لسه عايشه نفس الرعب فى كل لحظه لمجرد ان ابنى شايل اسم الزيني
الدموع تنزل من عين هند
ميرفت / انا ماليش مصلحه انى اخرب عليكي بس اهلك قالولى انك ما تعرفيش ما ينفعش تعيشي اللى عيشته ما ينفعش يغشك ما ينفعش طفل تانى يتظلم
عبد الله / هم اللى بعتوكى صح محمود و اخواته
ميرفت تطلع ورق من شنطتها
ميرفت / دى شهاده ميلاد عبد الرحمن اسمى و اسم ابوه فيها و دى بطاقتى اسمى فيها برده و دى صوره من قسيمه جوازى من زكريا و دى قسيمه الطلاق انا مش عارفه اقدر اقدملك اثبات اكتر من كدا ايه
عبد الله يبص بره فاروق بيتكلم فى التليفون يبص لمامته
ميرفت / واجهيه و اساليه بنفسك لو مش مصدقانى
الراجل / لو عاوزين نصيحتى بلاش المواجهه مش فى صفكوا خصوصا دلوقت حاله هند مش هتسمح بحاجه زى دى
محمود يدخل هو و اهل هند
محمود / عرفتى الحقيقه يا مراه اخويا فهمتى كنت ليه ببعدكوا عنهم مختار لم بلطجيته و دخلوا ضربوا يوسف و صحابه فى الحجز و خرجوا و زمانه جاى على هنا
شيري تبص لهند و عبد الله
عبد الله / لازم تسمعى لمختار الاول يمكن يكونوا كدابين
هند تفتكر
///////////////////
مختار يشاور على بلكونه فى البيت اللى قدامه و واحده تالته فى اخر الشارع
مختار / و دى و دى انا ما سكنتش فى الشقه دى بالصدفه اه انى ابقى جارك صدفه و انى ابقى معاكى فى نفس الكليه و نفس الدفعه دا نصيب عشان نعرف بعض و نحب بعض و نتجوز بس انى اسكن هنا ما كانش صدفه دا الشارع الوحيد اللى لقينا فيه اربع شقق فى التوزيعه دى
هند/ مش فاهمه
مختار / مهو اهلى مش هيبعتونى مصر لوحدى يعنى من غير حراسه
………………………….
هند / الحكومه بتشرف على جرايم صغيره عشان تحافظ عليها صغيره مش كدا
مختار / مش بالظبط خلينا نتكلم بالتحديد مثلا عن تجاره السلاح ما ينفعش تتمنع بس لو اتسابت على الغارب السلاح هيبقي فى ايد كل من هب و دب و مش بس كدا دا هيبقي فى ايد الناس اللى ما ينفعش يوصلها السلاح زى الارهابين مثلا
//////////////////////
محمود / احنا لازم نتحرك من هنا باسرع وقت كل العيله اتحركت انا مش هجازف بحد منكوا يجراله حاجه
شيري / هنروح فين … هند
الراجل / لو فى حاجه اقدر اقدمها
شاهيناز / نسيت اعرفكوا عقيد متقاعد شهاب الشاذلى جوزى
شهاب / احنا ممكن نعمله محضر عدم تعرض و
محمود / لا يا سياده العقيد مش هتجيب نتيجه بس لو حضرتك عاوز تساعدنا تبعد اللى على الباب دول لحد ما نخرج الجماعه من المستشفي و الباقي عندى
شهاب / محلوله ان شاء الله
شيري تحضن هند فى حاله صدمه و الدموع بتنزل من عنيها
……………………….
فى الاستقبال
مختار بيزعق
مختار / خرجت امتى و ازاى تسيبوها تخرج و هى فى الحاله دى
الموظفه / حضرتك هى خرجت على مسؤليتها و انا وريت حضرتك توقيع والدتها و
مختار يخبط على الكاونتر و يلف حوالين نفسه يبص لفاروق و عيسي واقفين باصين فى الارض
مختار / ادعوا ربنا انى الاقيها بدل ما افش غلى فيكوا
عيسي / والله يا سي مختار كلمناك اول ما ست ميرفت دخلتلها الاوضه اكتر من مره لحد ما رديت و بعدين شهاب بيه زعقلنا و قال هيطلب الامن و طلعنا من الدور فنزلنا وقفنا على البوابه
مختار / و اذكيه زيكوا ما فكروش ان مستشفي كبير زى دى هيكون ليها اكتر من بابا
تليفون مختار يرن مختار يطلع بره المستشفي
مختار / افندم
صوت راجل / ست ام عبد الله جت اتنازلت و طلعت يوسف من القسم و احنا وراهم
مختار / عفارم عليك راجل من ضهر راجل اوعى يزوغوا منك انا جايلك فى الطريق
مختار يقفل السكه
مختار / عاوز رجاله فى كل حته محل محمود المخزن بيته بيت اخواته و عيالهم مش عاوز مكان يخصهم الا و عينا عليه مهو هيروحوا بيهم فين يعني
فاروق / اعتبره حصل يا مختار بيه
مختار يمشي و هو بيبرطم
مختار / ما انت حمار ما بتتعلمش سبتها تانى و مشيت سبتها لوحدها تانى و مشيت اديك ضيعتها تانى
مختار يركب عربيته و يسوق بسرعه
……………………
فى فيلا فى الساحل
شيري بتسند هند تنيمها فى السرير
عبد الله / و احنا هنستخبى هنا العمر كله حكمتوا على الراجل من غير ما تسمعوه
شيري / اعمل ايه يعني اعمل ايه تعبت
عبد الله / ماشي مختار وحش مختار مجرم ده هيخلى عمامى حلوين هيخلى يوسف ملاك يعني
شيري / حس بيا حس باختك مره فى حياتك حس
عبد الله / سمحيني ان كنت مش قادر احس من كتر النار اللى جوايا موت ابويا و صريخ اختى ماثرين عليا
شيري / مين هيحمينا من عمامك غير مختار و مين هيحمينا من مختار غير عمامك لو عادينا الاتنين هنروح فين و لمين
عبد الله / ارض الله واسعه
شيري / هنصرف منين و نعيش فين بص لاختك محتاجه علاج و انت محتاج فلوس لدراستك
عبد الله / خلاص بعيها ليوسف … اذا كانوا عملوا فيها كدا و هى فى بيتنا هيعملوا فيها ايه و هى فى بيته يا امى .. فكرى فيها مش هتستحمل هتستنى اما تموت نفسها تانى و لا المرادى مش هتحتاج تموت نفسها هى هتموت لوحدها بصيلها
هند نايمه بتعيط و مش بترد
شيري / مش لازم تتجوز يوسف مش لازم تتجوز خالص بس نعدى المرحله دى مختار يرجع بلده و احنا نشوفلنا شقه هنا و ناجر شقتنا و لا نبيعها و لا اى حاجه … هند انتى لسه عاوزه مختار بعد اللى عرفتيه
هند بتعيط و مش بترد
شيري / انا عارفه ان مش سهل تنسيه بس دا مجرم
هند تغمض عنيها باب الاوضه يخبط عبد الله يروح يفتح يلاقى يوسف متخرشم
يوسف / انا جاى اعتزر على اللى حصل منى
عبد الله يسيب المكان و يمشى يوسف يبص على شيري بتبص الناحيه التانيه
يوسف / هند … انا عارف انك زعلانه منى و ليكي حق انا شخصيا زعلان جدا و مش عارف الموضوع ازاى وصل للمرحله دى بس انتى دلوقت عرفتى الحقيقه و اكيد مقدره انا ليه عملت كدا و ليه كنت عصبى هند انا طول الوقت اللى فات كان همى بس مصلحتك حتى خطوبتى من وسام والله العظيم انا ما عارف عرفت تدحك عليا ازاى
شيري / خلاص يا يوسف
يوسف / لو سمحتى يا طنط خلينى اتكلم انا بقالى كتير كاتم جوايا كلام كتير اوى و مش عارف هلاقى فرصه تانيه اقوله و لا لا … وسام يا هند ضحكت عليا فهمتنى انك لما هتشوفينا سوا هتغيرى و تعرفى انتى رفضتى ايه و توافقى عليا لكن كل ما كنت احاول افسخ تطلع بحجه شكل شكلها قدام الناس مامتها و عياها بس خلاص يا هند خلاص انا فسخت خطوبتى و انتى كمان فسختى خطوبتك يعنى
شيرى / مش وقته يا يوسف هند تعبانه و مش قادره انت مش شايف حالتها
يوسف / انا عارف والله عارف ان اللى شافته مش سهل بس انا حاولت احذرها حاولت احذركوا كلكوا بس على العموم احنا مش هنسكت هم لازم يتحاسبوا على اللى عملوه
شيري / وقت تانى يا يوسف سبها ترتاح لو سمحت
يوسف / حاضر حاضر
يوسف يبص على هند نايمه بتعيط شيرى تبص على ياسمينا قاعده جنبها و حزينه
شيرى / كل ده هيعدى يا ياسو كل حاجه هتبقى كويسه
ياسمينا / هو ابيه مختار طلع وحش
شيرى / خدى الموبايل اللعبى بيه
ياسمينا / مش لاقيه موبايلات
شيرى تبص حواليها
شيرى / صحيح ما حدش فينا معاه موبايل .. روحى خدى بتاع ابيه يوسف
ياسمينا / لا يضربنى
شيرى / طب نامى احكيلك حدوته
ياسمينا تروح تنام فى حضن مامتها
شيرى / صلى على النبى
ياسمينا / عليه افضل الصلاه و السلام
…………………..
فى شقه مختار
مختار قاعد و باصص فى اللا شئ و الرجاله حواليه باصين فى الارض عباده يدخل
عباده / هنلاقيها
مختار ما يردش
عباده / مش ذنبك و لا غلطتك
مختار / عرفت من بره
عباده / ياما قولنالك قولها
مختار / كل حاجه كانت اسرع منى و فى كل مره كنت بحاول اقولها كانت تحصل حاجه او ترفض تسمع
عباده / هنلاقيها
مختار / ما انا لقيتها قبل كدا بس لقيتها ازاى و ضيعتها تانى يا ترى بقى لما هلاقيها تانى هتبقى عامله ازاى
عباده / رجالتنا فى كل حته فى البلد هيداروا لحد امتى اكيد هيطلعوا
مختار / و انت فاكر انى هستناهم يطلعوا انا عارف ازاى هطلع الفيران دى من جحورها
عباده / الكبير موصينى ما خليكش تعمل حاجه نندم عليها
مختار / ندمت عملت و ندمت و جه وقتهم يندموا هم كمان خليهم يشوفوا نتيجه اللى يجي على رجاله الزيني
مختار يقوم عباده يشاور للرجاله يروحوا وراه و فاروق واقف
فاروق / انت مش هتروح معاه يا سى عباده
عباده / لا هو مش محتاجنى
فاروق / بس انت الوحيد اللى تقدر توقفه و تعقله لحسن يعمل حاجه هيسمعلك مش هيسمعلنا
عباده / مختار اللى قدامك ده ما فيش حاجه هتقدر توقفه غير انه يلاقى هند اى واحد فينا مكانه كان عمل اكتر من كدا كمان
عباده يقوم و يجى يمشى فاروق يناديه
فاروق / الله امال على فين يا سى عباده
عباده / مشوار مهم لازم اعمله اتاخر بزياده خليك هنا يمكن حد يرجع و المرادى تفتح عنيك كويس
فاروق يبص فى الارض و عباده يمشى
…………………….
قدام محل محمود
المحل بيولع و مختار واقف يبص عليه و الناس بتحاول تطفى و هو هادى و بيتفرج يروح يركب عربيته و يتمشى يوصل لمحل خيلان يوسف يلاقيها بتولع و بيطفوها
مختار / احط ايدى عليكوا بس و الله ما هعتق كلب فيكوا
…………………
فى شقه عبد الرحمن
جرس الباب بيضرب ميرفت تروح تفتح تلاقى عباده
ميرفت / افندم عاوزين ايه
عباده / ليه كدا
ميرفت / ليه ايه
عباده / انتى عارفه يا ام عبد الرحمن عارفه عملتى ايه
ميرفت / قصدك على هند كنت مستنى ايه اضحك عليها معاكوا البنت ما كانتش عارفه هى داخله على ايه ابن عمك ضحك عليها و غشها
عباده / كان هيقولها
ميرفت / الفرح بعد يومين انت بتضحك على مين
عباده / و انتى عملتى ايه انقذتيها لا برافو عليكى نجيتي البت طب سالتى نفسك يا ست الكل مين اللى دخل هند المستشفى مين اللى عمل فيها كدا تعرفى عنها ايه هند قطعت شراينها عشان رافضه تتجوز ابن عمها غصب اللى حضرتك و جوزك الباشا ساعدتوهم يخطفوها من المستشفى
ميرفت / مامتها اللى طلبت مننا نخرجها
عباده / عشان حضرتك رعبتيها مننا اخدتى منها الامان الوحيد اللى كان باقيلهم حضرتك مشكوره عاوزه تخدمى اسالى الاول هتخدمى ازاى و مين عشان ذنب هند فى رقبتك لو جرالها حاجه
ميرفت / ذنبها فى رقبه اللى ضحكوا عليها وخبوا عنها الحقيق قبل ما ابن عمك يعلقها بيه و يرسملها بر الامان الوهمى ده كان صارحها و خيرها لكن ابن عمك استغلها و استغل ظروفها و مشاكلها مع اهلها و كسب عليها بونط و اهى البنت المسكينه دى هى اللى بتدفع التمن دلوقت و اى كان مصيرها كان هيبقى اهون مليون مره من انها تتجوز مجرم و قتال قتله
عباده / كانت على الاقل هتتجوز راجل
عباده يمشى و ميرفت واقفه بتغلى ترزع الباب وراه
……………………
فى فيلا الساحل
الرجاله كلهم متجمعين
محمود / يا جدعان يا جدعان اهدوا كل حاجه متامن عليها حتى شققكوا متامن عليها خليه يحرق و يعمل اللى بكيفه و بفلوس التامين نصلح و نبنى من اول و جديد و بكره هكلم المحامى يعمل محضر فيه و يتهمه ان هو اللى ولع
حامد / طب انت المحل مكان اكل عيشك انا هروح شغلى ازاى حمدى هيروح شغله ازاى هنستخبى هنا لحد امتى
م حامد / مش احسن ما يولعوا فينا احنا كمان خد اجازه و لا حتى قدم استقالتك بلا هم بيطلعلنا من وراها ايه يعنى غير شويه ملاليم
حمدى / يا سيدى كلم حد من صحابك و قوله انك عندك ظروف و خليه يقدملك طلب الاجازه و يخلصهولك هو
حامد / ما حدش بيخدم حد
خال يوسف 1/ ما انت لو بتخدم كنت لقيت اللى يخدمك
حامد / قصدك ايه يعنى
محمود / ما قصدوش احنا مش جايين نتخانق احنا جايين نحط ايدينا فى ايد بعض عشان نعرف نقف فوش اللى ما يتساموش دول
اسراء / حقه كلهم ايد واحده تكلم ده التانى يرد تكلم ده التانى يرد مش زينا مش فالحين غير اننا ناكل فى بعض
شيرى تدخل
محمود / عامله ايه يا مرات اخويا احسن دلوقت
شيرى / نامت … خير عاوزينى فى ايه
محمود / اهو بنتكلم نشوف هنعمل ايه مختار ولع المحلات بتاعتنا و خلاها على البلاطه و يا عالم هيعمل ايه لما يلاقينا
شيري / العقيد و لا العميد معرفتك ده ما يقدرش يخدمك فى الموضوع
محمود / احنا مش فينا دلوقت احنا كدا كدا ملهمش عندنا حاجه و ان جت فى الفلوس فالفلوس تتعوض المهم عندنا البت الغلبانه اللى راقده جوه دى
شيرى / خير
محمود / هند لازم تتجوز و بسرعه
شيري / هند تعبانه هند لا حمل جواز و لا حمل اى حاجه
محمود / يا ستى هو انا قولت تتجوز تتجوز يتكتب كتابها و ان شالله حتى تدخل كدا و كدا لحد ما تخف
شيري / و العريس طبعا يوسف
اسراء / ماله يوسف بقى ان شاء الله مش هو اللى نجاكوا من الورطه الهباب اللى كنتوا هتقعوا فيها
م حامد / و بعدين هو انتى عندك غيره و احنا قولنا لا عاوزين نحل الموقف
م حمدى / دا حتى يا عينى هو اللى هيقف فى وش المدفع قدام مختار دا مش بعيد يقتله
اسراء / بعد الشر ان شالله هو و اهله … محمود ايه الحكايه دى
محمود / اهدى يا اسراء الامور ما بتتاخدش كدا و بعدين احنا عاشرنا الناس دول و عارفين انهم صعايده و ليهم اصولهم و البت ما دام اتجوزت خلاص
شيري / يوسف لا على الاقل مش دلوقت لا هند و لا عبد الله
محمود / هند و عبد الله قرارتهم عمرها ما هتكون صح مختار كان مسيطر عليهم و غاسلهم دماغهم لكن لما يهدوا و يشوفوا الاحداث على حقيقتها هيعرفوا ان يوسف طول الوقت ده كان بيحاول يدافع عن هند و مختار اللى كان واقفله
شيري / البت جسمها كله ازرق يا ناس
يوسف / والله ما كان قصدى هى اللى كانت بتهاجمنى و عماله تزق دى كانت بتحاول تفتح الشباك و عاوزه تنط
شيرى / من رعبها يا كبدى خافت تعمل فيها حاجه
يوسف / انا عمرى ما كنت هاذيها
محمود / خلاصه الكلام هند مش هينجيها من مختار غير جوازها عندك عريس غير يوسف هاتيه الجواز مش بالغصب
يوسف / بابا
محمود / خلينا نستنى بقى لحد ما نجيبلها عريس يوافق عليها بوضعها ده اللى زى اللى هربانه من حكم الاعدام
اسراء / و يمكن اللى ما جاش بالرضا يجي بالغصب و يطلع مختار اسرع من الكل و نلاقيه بيخبط على الباب
جرس الباب يضرب الكل يتخض يوسف يروح يفتح يلاقى عبد الله يبصلهم و يبص لمامته و يدخل اوضه اخته و يرزع الباب
……………………..
فى السرايا
انتصار / يا كبدى يا ابنى دا تلاقيه هيتجنن منك لله يا ميرفت مش كفايا موتى زكريا بقهرته مش هتعتقى مختار كمان
ناصر / مختار اللى غلطان ياما قولتله ياما كلمها
انتصار / مهو حاول على يدك بدل المره ميه
ناصر / مش هيفيد بحاجه الكلام ده دلوقت
انتصار / معاك حق هنعمل ايه
ناصر / ما اعرفش اديهم بيدوروا سالوا فى كل المستشفيات يمكن يكونوا نقلوها مستشفى تانيه البت تعبانه و محتاجه علاج
انتصار / سالتوا فى الفنادق مهو كل دول هيباتوا فين
ناصر / ما سبناش حته ما سالناش فيها حتى الاقسام و برده ما فيش فايده
انتصار / ما يمكن مش فى مصر يمكن راحوا اى بلد تانيه ما تعرفوش ان كان ليهم قرايب فى اى حته تانيه
ناصر / ما نعرفش مهو على يدك من يوم ما عرفناهم ما شوفنالهمش حد بس احنا مش ساكتين الرجاله بتسال فى كل حته حتى فى شغل حامد و حمدى هيسالوا و ان شاء الله خير
انتصار / جيب العواقب سليمه يارب
…………………………………..
فى اوضه هند تانى يوم الصبح
ياسمينا نايمه جنب هند فى السرير و عبدالله و شيري واقفين قصاد بعض
عبد الله / كنت عارف والله كنت عارف
شيري / ما تتخلقش عليا انا اللى فيا مكفيني
عبد الله / يا ماما لو محتارين تموتوها ازاى اديني سكينه اقتلها انا و اهو يعدمونى و نخلص احنا الاتنين من العيشه دى
شيري / لا دبها فى قلبي انا يا عبد الله اقتلنى انا يا عبد الله يمكن ترتاحوا
شيري تسيب الاوضه و تطلع بره و هند متابعه اللى بيحصل فى صمت و عنيها فيها دموع عبد الله يقعد قدامها و يمسك ايدها
عبد الله/ هاين عليا اكلم مختار يجي ينجيكى من ايد الديابه دول بس خايف عليكي برده … انا عارف انه مش هياذيكي بس … انا مش عارف اعمل ايه … ياريت بابا كان عايش يمكن الحال كان اتغير
الدموع تنزل من عين هند عبد الله يقرب و يمسحهالها
عبد الله / كفايا يا هند حرام عليكي عنيكي هتروح ما فيش حاجه تستاهل … امبارح كنت بفكر انزل مصر صد رد فى فلوس كنت محوشها مبلغ على جنب هاخدهم وارجع اخدك انتى و ماما و ياسمينا و نهرب فى اى حته بعيد … بس انا عارف انى لو عتبت الشارع بس مش هرجع غير بمختار فى ايدي … انا لو منك اكلمه والله … يمكن يبطل … مختار بيحبك و ما يستغناش عنك … سمعتهم بيقولوا انه ولع محلات الهدوم بتاعه عمك و نسايبه … طبعا معزور هيتجنن عليكي … يا ترى هو عامل ايه دلوقت
شيري تدخل شايله صينيه عليها فرخه و طبق رز كبير و طبق بطاطس و طبق شوربه
شيري / انا جبتلك الغدى و قولت ناكل معاكى نفتح نفسك
شيرى تحط الاكل على ترابيزه و عبد الله يساعدها يحطها لزق فى السرير
شيري / لازم تاكلى حاجه انتى كدا هتقعى مننا
عبد الله / انا هاكلها بنفسي هند بتحبنى و هتاكل من ايدي مش كدا يا هند
عبد الله يحط لهند معلقه الشوربه على بقها قفلاه
عبد الله / افتحى بقك بدل ما اغرقك يلا
شيري / يلا يا بنتي معلقتين بس اى لقمه تصلب طولك
هند تعيط شيري تبص لعبد الله و تبص فى الارض
…………………………
بعد اسبوعين فى شقه مختار
مختار واقف فى البلكونه قرب الفجر بيبص على بلكونه هند و عنيه مليانه دموع و يتنهد البلكونه تتفتح و عباده يدخل
عباده / انت لسه صاحي يا مختار
مختار يبص بعيد و يدعك عنيه عباده يروح يقف جنبه
عباده/ لو كانت قله النوم و الاكل هترجعها ما كانش حد فينا نام و لا اكل بس مش هترجعها
مختار يبصله
عباده / قلبنا عليها الدنيا و كلمنا كل اللى نعرفهم و اللى ما نعرفهمش
مختار / بتقولى انساها يعني
عباده / لا يا ابن عمى و ان قولتلك مش هتقدر و لا احنا هنقدر بس على الاقل ارتاح عشان تعرف تفكر يمكن تفتكر مكان هنا و لا هنا يكونوا مخبينها فيه
مختار / ما فيش ما سبتش مكان ما دورتش فيه هم مش فى مصر اصلا
عباده / ما احنا سالنا فى الجوازات ما لهمش
مختار / لا لا مصر القاهره يعني
عباده / اه صح فهمت ما احنا برده كلمنا كل اللى لينا فى باقي المحافظات لا سبنا مستشفي و لا قسم و لا فندق الا لما سالنا فيه
مختار / عيله كامله تختفى ازاى عيله بحالها برجالتها و حريمها و عيالها تختفى فى ساعه زمن ازاى
عباده / هنلاقيهم
مختار / امتى و بانهى وش هقولها ايه لما اشوفها
عباده / ما تقولش فى حاجات الكلام ما يفدش فيها كفايا فرحتكوا ببعض زمانها هى كمان يا عيني
مختار / اخر صوره ليها فى خيالى لو كنت شفتها
مختار عنيه تتملى بالدموع و يمنعها تنزل
مختار / ما كانش المفروض اسيبها ما كانش المفروض اغلط نفس الغلطه مرتين
عباده / و انت كنت هتعرف منين منهم لله اللى كانوا السبب
مختار يسيب المكان و يدخل فى رجاله كتير نايمين فى الارض يعدي ياخد مفتاحه
عباده / على فين السعادى
مختار / هشم هوا مخنوق و الحيطان كاتمه نفسي
عباده يهز راسه مختار يمشي و يقفل باب الشقه وراه ناصر يفتح باب الاوضه
ناصر / فى ايه يا عباده مين جه
عباده / مختار نزل
ناصر / و سبته ينزل لوحده
عباده / هو محتاج يبقي لوحده و الا ما كانش نزل سيبه يفك عن روحه
عباده يدخل اوضه تانيه و يقفل الباب ناصر يتنهد و يبص فى الارض
……………………..
فى فيلا الساحل
م حامد / كنا هنموت و نطلع يومين مصيف ادينا اسبوعين قاعدين لا شغله و لا مشغله و يا عالم الحال هيطول لامتى
اسراء / ادينا مستنين الست هانم تخف يمكن حججهم تخلص
م حمدى / كدا مش هينفع حمدى اجازته هتخلص و مش هيعرف يجددها و لازم هينزل
م حامد / خليه يقدم استقالته
م حمدى / و ناكل منين
م حامد / يا بت دا احنا دفنينه سوا
م حمدى / ششششش لسه ما يعرفش
م حامد / يا جبروتك يا شيخه
م حمدى / مش فى الظروف دى لما كل حاجه تتظبط والله هقوله كل حاجه و افرحه و احط الفلوس فى حجره
اسراء / والله عاوزين نكلم الراجل نشوف اخبار الفلوس ايه صحيح
م حامد / الا صحيح مفيش اخبار من شركه التامين
اسراء / التحقيقات شغاله و الحاجات دى بتاخد وقت بس فى اتنين من اللى عملوا كدا وشهم واضح فى الكاميرات و ان شاء الله يقبضوا عليهم و يعترفوا على مختار الكلب ده و نخلص منه
م حمدى / ما تعشميش نفسك بشوفهم فى التليفزيون يموتوا و لا يعترفوش
اسراء / خليكي ورا التليفزيون بتاعك اما نشوف هيوصلنا لفين هقوم اشوف ست شريهان اللى دخلت نامت جنب بنتها دى هنعمل الغدى فى يومنا و لا هتقضيها نوم
اسراء تقوم تفتح الباب تلاقي شريهان بتدهن لهند جنبها ازرق
اسراء / ما شاء الله اتحسنا خالص قربت تروح اهى
شيري تغطى هند
شيري / فى حاجه يا اسراء
اسراء / بطمن عليكوا ايه ما اطمنش
شيري تبص لهند هند باصه فى الارض اسراء تدخل تقعد على كرسي قدامها
اسراء / اجازه حمدى هتخلص و هينزل و هيلاقوه و هيوصلولنا و هيبقي كل اللى عملناه راح فى الارض لازم تشدى حيلك و لا انتى عاوزه ترجعى لمختار ؟ لو عاوزه قولى من دلوقت و وفرى علينا المصاريف دى كلها ما الفلوس دى مش بنلاقيها فى الشارع عشان نبعزقها و احنا بنلم وراكى
شيري / ما لوش لزمه الكلام ده يا اسراء البت ما لهاش دعوه
اسراء / امال مين اللى ليه انتى مش شايفه حياتنا كلنا عامله ازاى مش ده بسبب بنتك كام مره عمامها كلموها كام مره يوسف كلمها كام مره اتبهدلنا من ساعه ما الكلب ده دخل حياتنا و نقول بلطجى و مجرم و ما حدش بيصدقنا عاجبك حالنا يا ست هند عاجبك اللى وصلناه من تحت راسك
شيري / انتى جايه تتخانقى و خلاص لزمته ايه الكلام ده
اسراء / نيمالى فى السرير و عامله عيانه و الكل طالع عينه عشانك و انتى و لا حاسه باي حاجه
شيري / الرجاله على البحر و الستات قاعده بتتفرج على التليفزيون و انا اللى شايله البيت و تقوليلى طالع عينكوا ما ترحمونا بقي
يوسف يدخل شيري و هند يعدلوا طرحهم
يوسف / فى ايه يا ماما ايه اللى دخلك هنا هو كل شويه نفس الموال
اسراء / زهقت من حبسه البيت بيتي وحشني بقولها نخلص بقي و بلاش مماطله
يوسف / و هو حد حبسك ما تخرجى و تتفسحى زى ما الكل بيعمل اعتبريه مصيف و لا اجازه فى ايه
اسراء / فى ان اكل عيشنا واقف في مصر بسببها و احنا بنبعتر الفلوس هنا يمين و شمال و بكره و لا بعده الكلب بتاعها اكيد هيوصلها
يوسف يبص على هند بتعيط و شيري بتطبطب عليها
يوسف / لو سمحتى يا ماما اطلعى بره الاوضه و نتكلم بعدين
اسراء / خليك انت حابيلها كدا اما نشوف اخرتها
اسراء تطلع بره يوسف يقرب من هند
يوسف / ما تسمعيلهاش هى خايفه عليكي كلنا خايفين عليكي كل ده عشانك عشان تعرفى احنا بنحبك قد ايه
عبد الله يدخل
عبد الله / ما تحبوهاش كل ده عشانك انت
شيري / عبد الله اسكت
عبد الله / لحد امتى
يوسف / هتفضل شايفنا وحشين لحد امتى ما تفوق بقي و تشوف الحقيقه
عبد الله / الحقيقه الوحيده اللى شايفها انك كنت هتموتها و من يوم ما اتهجمت علينا و هى قاطعه الاكل و الكلام بصلها يمكن تحس بعمايلك
شيري تعيط
شيري / اسكت يا عبد الله اسكت
عبد الله / هترتاحى لما تدفنيها يعني هترتاحى لما تموت
شيري / اسكت بقي اسكت
عبد الله / سكت اطلعى يلا اعمليلهم الغدى و اغسليلهم هدومهم و اشتغلى خدامه ليهم اطلعى ذلى نفسك و كلهم قاعدين ملوك و احنا هنا العبيد
يوسف / عيب الكلام ده يا عبد الله مش عشان طلبوا منك تجيب شويه حاجات يعني
عبد الله / و انت يا ديك البرابر ما تجبهاش ليه
شيري / اطب ساكته اموت عشان ترتاح و تسكت
عبد الله / سكت سكت سكت
عبد الله يسيب المكان و يمشي و صوت رزع الباب شيري تمسح دموعها و تبص على هند
يوسف / انا هخليهم ما يبعتوهوش يجيب حاجه بعد كدا و النهرده ما تعمليش غدى هنجيب جاهز ارتاحى و خليكي جنب هند انتوا الاتنين شكلكوا تعبان محتاجين ترتاحوا و انا هنبه عليهم ما حدش يزعجكوا
يوسف يطلع بره شيري تقعد على اقرب كرسي و تعيط تبص على هند تلاقيها بصالها و الدموع مغرقه خدها تقوم تقف و تمسح دموعها
شيري / هروح ابص على ياسمينا فى حمام السباحه مع بنات عمامك لحسن يسهوا عنها و لا حاجه
شيري تروح تبوس راس هند و تطلع بره هند تعيط بحرقه
………………………..
فى السرايا
انتصار قاعده رابطه دماغها و الهم باين عليها فاطمه تدخل معاها كبايه لمون
فاطمه / اشربي و روقي دمك
انتصار / ما ليش نفس
فاطمه / دى لو بنتك مش هتتقهرى عليها كدا
انتصار / مهى بنتى يا فاطمه بنتى و مراه ابنى
فاطمه / ما كانتش لسه بقت مراته و بعديه هى يعني ماتت بكره و لا بعده يلاقوها بس السؤال هيحصل ايه لما يلاقوها
انتصار / قصدك ايه
فاطمه / انتى فاهمه قصدى ان كانت هند تعبانه فاخوها و امها سلام و رقم مختار مش صعب كانوا كلموه انتى بس اللى نسيتي
انتصار / نسيت ايه
فاطمه/ نسيتي زكريا و الحربايه مراته لما قلبنا الارض عليها واطيها و قعدنا نفس قعدتك و فى الاخر طلعت مداريه منه
انتصار / يحصل بس نطمن عليها
فاطمه/ يبقي تاكلى و تشربي ما تقهريش روحك على الفاضي
انتصار / انتى ما عندكيش قلب
فاطمه / لا عندى و قلبي اللى جابنى لعندك اكلمك و اسقيكي اللمون بس مهما فاطمه تعمل مش هتشوفوا بالاذن
فاطمه تقوم و انتصار متبعاها
……………………
فى فيلا الساحل
محمود / خلاص يا حمدى كفايا زن
حمدى/ يا جماعه هنزل لوحدى و خليكوا انتوا
حامد / ما انت مع اول قلم هتقول على مكانا
حمدى / و اضيع عيالي يعني
حامد / احنا خايفين عليك
اسراء / انتوا بتماطلوا ليه ما تقطعوا عرق و تسيحوا دم البت جوه زى القرده و ان كان على الكام كدمه اللى فى جسمها ما يمنعوش الجوازه فى حاجه
محمود / اسراء
اسراء / مهو مش هنعيش هنا طول عمرنا يا تتجوز يوسف يا تشوفلها عريس يا تنزل لسى مختار بتاعها انما كدا مش عيشه كل ما الباب يخبط نتفزع
حمدى / مش بالطريقه دى يا اسراء اهدى
اسراء / اخرها يوم الخميس بعد كدا انا بنفسي هكلم مختار يجي ياخدها انا مش ناقصه شلل
اسراء تقوم و الرجاله يبصوا لبعض اسراء تروح تفتح باب اوضه هند تلاقيها ممده فى السرير و واخده ياسمينا فى حضنها و بيتفرجوا على الكارتون على الموبايل و مبتسمين
اسراء / مبروك يا هند دخلتك الخميس الجاى من هنا للخميس نقيلك عريس
هند تبصلها اسراء تقفل الباب
حمدى / بقي دا اسمه كلام يا ناس
اسراء / مش انت اللى عاوز تنزل ننزل كلنا الجمعه بلا هم و نسبهم هنا يكملوا شهر العسل
م حامد / طب خليها اسبوع كمان هو الجواز ده مش محتاج ترتيبات
اسراء / احنا ما شاء الله كتير كل واحده لو عملت حاجه هنلم الليله و بعدين هو يعني فرح السفيره عزيزه مش شايفين الظروف اللى احنا فيها انا رايحه انام
اسراء تسبهم و تطلع فوق
…………………..
عند حمام السباحه
شيري قاعده لوحدها بتعيط يوسف يدخل يقعد جنبها
يوسف / انا عارف ان حضرتك زعلانه منى بس انا اوعدك انى اتغير هبقي احسن هشيلها فى عنيا هفسحها و الف بيها الدنيا و مش هستخسر فيها حاجه ابدا
شيري تمسح دموعها و ساكته
يوسف / كلميها قوليلها قد ايه بحبها قد ايه استحملت و حاولت عشان انجيها من اللى كانت فيه عصبيتي كانت من خوفى و غيرتى عليها و ان كان على الشبكه اللى مختار كان جايبها هجيلها احسن منها هكتبلها كل ما املك بس هى ترضي
شيري / ما تخافش هى اصلا مش هتقدر ترفض زى ما انت شايف بقالنا فوق الاسبوعين ما سمعناش حسها و لا شوفنا خيالها اخرها تروح الحمام و ترجع مكانها
يوسف يبص فى الارض
يوسف / انا هنسيها كل ده اوعدك هعيشها احسن عيشه و ان كان على ماما اوعدك مش هتدايقها و لو عوزانى اخدلها شقه بعيد هاخدلها لو عوزانى اسكن جنبك هسكن لو عاوزانى اخد لحضرتك شقه جنبي هاخدلكوا كفايا بس تؤمرى
شيري / انا مش عاوزه حاجه كفايا ترجع تضحك تانى كفايا اسمع صوتها
شيري تعيط
يوسف / اوعدك ان كل ده هيتغير صدقيني
شيري تهز راسها يوسف يقوم شيري تبص الناحيه التانيه تلاقي عبد الله واقف بيبص عليها و الدموع ماليه عنيه يروح اوضه اخته يلاقيها نايمه واخده وضع الجنين و ياسمينا حضناها و بتطبطب عليها عبد الله يدخل و يقفل الباب هند تغطى راسها بالمخده عبد الله يقعد على الارض جنبها و يشيل المخده تبصله
عبد الله / قومى نهرب
ياسمينا / اجى معاكوا
عبد الله ياخد ياسمينا فى حضنه تتعلق فى رقبته
عبد الله / انتى عاوزه ايه ناخد اوضه فى اى حته و انا اشوف شغل و ان شالله ناكلها بدقه قومى
هند تبصله عبد الله يقومها تقعد شيري تدخل هند تبص عليها
شيري / كتب الكتاب الخميس الجاى
عبد الله / مبروك و الفستان هيبقي لونه احمر كدا زى بدله الاعدام و لا اسود عشان العزا
شيري تمسح دموعها و تروح تاخد هند فى حضنها
شيري / عندك كلمه حلوه قولها كل واحد فيه اللى مكفيه انا مش نقصاك
عبد الله / هند قومى تعالى معايا زى ما اتفقنا
شيري / لسه هتقولها نهرب و اشتغل و الكلام ده اهرب يا عبد الله روح لقيلها مكان تنام فيه و لا هتنيمها فى الشارع لحد ما تدور هتاكلها طوب لحد ما تلاقي شغل
عبد الله يزعق
عبد الله / مش ارحم من اللى هتعملوه فيها على الاقل انا بحاول
عبد الله يبصلهم الكل باصصله و هو نفسه عالي و الدموع ماليه عنيه يسيب المكان و يمشي شيري تطلع تجرى وراه ما تحصلوش تبص تلاقي الكل بيبص عليها
محمود / فى حاجه و لا ايه
شيري تبصله و تدخل الاوضه و تقفل الباب و تقعد وراه على الارض
شيري / ضيعت عيالي انا ضيعت عيالي
هند تقوم و تروح ناحيه شيري شيري تبصلها هند تقعد جنبها و تاخد امها فى حضنها و تطبطب عليها
شيري / ضيعت اخوكى يا هند ضيعتك و ضيعت اخوكى
هند تطبطب علي شيري ياسمينا تروح تحضن شيري شيري تاخدها فى حضنها
……………………..
فى شقه مختار
عباده يفتح الباب و يدخل
سليمان / لقيتوا حاجه
عباده يهز راسه لا
ناصر / امال مختار فين
عباده / زى كل مره عاوز يبقي لوحده
امين / انا بقول نعمل محضر سرقه اى حاجه فى اى حد فيهم و نخلى البوليس يساعدنا نلاقيهم
سليمان / ما البوليس بيدور معانا يا اذكى اخواتك امال المحافظ بيعمل ايه
عباده / اول الشهر قرب و اكيد هينزلوا يقبضوا المرتبات
سليمان / لسه قايل كدا لمختار امبارح بيقول بيقبضوا بالكارت ده يعني مش هينزلوا
عباده / احسن و احسن الكارت هيخلينا نعرف هم سحبوا من انهى ماكنه فى انهى محافظه
امين / صح يا عباده معاك حق
عباده / لينا مين شغال فى البنوك
سليمان / لينا كتير اكلمهم و اعرف هما سحبوا اخر مره من انهى محافظه
عباده / كانت فايته عن بالنا ازاى دى
ناصر / المهم تيجي بفايده اى حاجه تيجي بفايده