رواية اكتشفت زوجي في الاتوبيس الفصل الرابع والعشرون 24 بقلم دعاء عبد الرحمن

رواية اكتشفت زوجي في الاتوبيس الجزء الرابع والعشرون

رواية اكتشفت زوجي في الاتوبيس البارت الرابع والعشرون

رواية اكتشفت زوجي في الاتوبيس الحلقة الرابعة والعشرون

أرجوكى متقوليش لاء
ولو سمحتى ارفعى وشك وانتى بتكلمينى عاوز اشوفك وانتى بتردى عليا
:ممكن أجاوب عليك بسؤال…لو منى جات قالتلك انها عرفت أن علاقتكم من الاول كانت غلط وانها تابت وبقت حاجه تانية
هتصدقها وتجوزها؟
سامح :قصدك ايه من السؤال ده؟
:رد الاول
سامح:بصراحة يمكن أصدقها بس هخاف اتجوزها
…..انا عارف انتى سألتى السؤال ده ليه …بس انا حاجه ومنى حاجه
:تقصد يعنى أنك راجل وهى بنت؟
سامح: مش كده وبس…دى واحده هديها اسمى وشرفى يعنى لازم ابقى متأكد انها هتصونهم
:اه بس انت متأكد انك اول واحد فى حياتها
سامح:بس مش هبقى متأكد انى اخر واحد ولا لاء
…الراجل مختلف عن البنت..مفيش مقارنه علشان تسألينى السؤال ده
:غريبة أوى يعنى البنت اللى تغلط مره واحده فى حياتها مع الراجل اللى بتحبه حقيقى تبقى منبوذه والراجل ده نفسه هو اللى يبقى مش واثق فيها ..لكن الراجل اللى هو اصلا كان السبب واللى ياما غلط يبقى عادى لازم نصدقه ونوافق عليه..المنطق ده غريب اوى فى بلدنا
انفعل وقام وقف فجأة :انتى بتتلككى علشان ترفضى ده مش كلام ده انتى اصلا مش قادره تبصيلى وانتى بطلعى اسباب مش منطقيه للرفض
أحمد ونهلة وشويه ناس الله يكرمهم بصوا وركزوا معاه الحمد لله والا كنت هاخد قلمين ..أتكسف وقعد لما شاف الناس بتبصله
بس الغريب انى ابتسمت غصب عنى مش عارفه حسيته طفل جدا فى تصرفاته
سامح:انا اسف ..خرجت عن شعورى…بس انا عاوز اقولك ان منى مكنتش صغيرة ولا انا ضربتها على ايديها وانا مكنش قصدى ولا كنت مقرر انى اضحك عليها ولا حاجه هى جات كده ..اسمعينى شاب زيى لما بنت تقعد تضحك وتهزر معاه من غير مناسبه هيعمل ايه..لما توافق تركب معاه عربيه بعد عرفت اسمه بساعتين هيعمل ايه غير انه هيفتكرها سهله …وبما انها بقى حكتلك كل التفاصيل وحضرتك حفظتى كل كلامى أفتكرى لما قعدت معاها فى البلكونه لوحدنا ومسكت ايديها وقربت منها
كل اللى عملته انها اتكسفت بس حتى لما حاولت تقوم ومنعتها قعدت بسهوله ….انا كنت مستنى منها تصرف شديد لكن محصلش..انا لو كنت عاوزاقرب اكتر كنت هقدر وهى مكانتش هتصدنى يمكن هو ده اللى نرفزنى لما سماح دخلت علينا
بدليل انها لما تعبت وفاقت بعد كده وبوستها على شعرها ما قالتش لاء …انا عارف انك هتغلطينى عارفه ليه علشان انتى مش راجل لو حسيتى بمشاعر الراجل فى الوقت ده مش ممكن تقولى غير ان البنت دى سهله ومينفعش أئتمنها على بيتى
:وانا كمان يا سامح عاوزة راجل أئتمنه عليا وعلى ولادى
عاوزه راجل زى ماهو واثق فيا وانا فى بيته ابقى انا كمان واثقه فيه وهو بره البيت يعنى بيغض البصر وبيتقى الله فيا
عاوزه راجل لو شاف ابنه بيبص لبنت بقوله عيب يا أبنى غض البصر ربنا شايفك مش يقوله والله نمس يا واد طالع لابوك
عاوزه راجل حبنى وعاوز يتجوزنى علشان بيدور على واحدة ملتزمه تكمله ويكملها حلمها هو حلمه ..الجنه
مش راجل عاوز واحده محترمه صدته ورخمت عليه فقال بس هى دى
انت حلمك غير حلمى انا عاوزه راجل كل هدفه ان ولاده يبقى منهم صلاح الدين ومحمد الفاتح انت كل حلمك انك تحب وتتحب وتعيش فى تبات ونبات وتخلف صبيان وبنات
الموضوع مش موضوع انى مصدقاك ولا لاء ولا بحبك ولا لاء
الموضوع أكبرمن كده بكتير مثلا انا أتمنى جوزى يبقى ملتحى والبس فى بيته النقاب اللى مش عارفه البسه بسبب رفض ابويا
منى كانت شايفاك وسيم وجذاب وانا منكرش بصراحة لكن زوجى ان شاء الله اللحيه هتخاليه اكتر وسامه لانه بيربيها سنة عن النبى اللى هو بيحبه وبيحب يقلدة
لكن انت هتقولى الدين مش مظهر ..لكن المظهر هو اللى بيحافظ على الجوهر..زى الموزة لما تشيل قشرتها بتبوظ وتسود ومينفعش تاكلها مظهرها هو اللى بيحافظ عليها
فهمتنى
سامح وهو يفرك كفيه بعصبيه:كده وصلتينا لطريق مسدود انا عادى خاليكى عاديه زي وانا اوعدك احاول ابقى كده
:بس انا مش عاوزه العادى ده انا عاوزه فرح اسلامى لافيه رقص ولا سلو ولا اختلاط عاوزه اقيم الليل مع زوجى عاوزاه يجى من بره يقولى حفظتى ايه جديد النهارده يسألنى صليتى الظهر ولا لاء بدل ما يسألنى عملتى الاكل ولالاء
ولما نقعد نتناقش مش هيبقى كلامنا على الافلام والمسلسلات ولو فى يوم اختلفنا وده وارد مش هيظلمنى لانه بيراقب ربنا قبل ما يكون بيحبنى ولا مش طايقنى ولما اقوله أتقى الله يقولى اللهم اجعلنا من المتقين مش هيقولى يعنى ايه هو انا كافر يعنى….هى دى الحياة اللى فى طاعة الله يا سامح ده اللى بتمناه واللى مش موجود فيك مع الاسف
انت رفضت منى علشان خرجت معاك كام مرة ..لكن انا برفضك علشان كل حياتى اللى جايه اعيشها صح اربى ولادى صح علشان ربنا لما يسألنى أخترتى ابوهم على اى اساس اقول على اساس الدين مش الحب والاعجاب والكلام الجميل اللى هيختفوا بعد فترة لما تشبع مني
عاوزه راجل ملتزم يا سامح عارف يعنى ايه ملتزم
هو ده اللى مخالينى لسه ما ارطبتش لحد دلوقتى لو كنت عاوزه العادى بتاعك ده كان زمانى اتجوزت من زماااااان
سامح:خلصتى
:حاولت اختصر
سامح :بس انتى كده بتظلمينى
:مش احسن ما اظلم نفسى دنيا وآخره
سامح:متنكريش ان مشاعرك اتحركت ناحيتى ومش هتعرفى تنسينى ومش هتلاقى حد يحبك أدى
:غلطان علشان النبى عليه الصلاة والسلام قال من ترك شيئا لله عوضه الله خيرا منه
وانا رفضتك لله يا سامح ومتأكدة ان ربنا هيعوضنى الاحسن واللى هيحبنى اكتر منك مليون مرة وفى الحلال
سامح :انتى عارفه لما قلت لسماح انى عاوز اتجوز
وافتكرت انى هتجوز منى ولا ياسمين جارتنا
قولتلها لاء واحده تانيه خالص ومش عارف هتوافق ولا لاء
قالتلى مين دى اللى متتمناش تتجوز اخويا
قولتلها دى بقى متتمناش تشوف اخوكى اصلا
مكنتش أعرف ان احلامك كبيرة اوى كده مكنتش اعرف ان دماغك فيها كل ده للمستقبل كنت فاكرك مجرد بنت محترمه وخلاص كنت فاكر انى هقدر اعملك اللى انتى عاوزاه
خدينى واحده واحده علمينى اوعدك انى مبصش لواحده غيرك اوعدك انى احققلك رغباتك ولو ياستى حكاية الفرح الاسلامى ده مهمه اوى كده ممكن نعمل فرحين واحد لاهلك وواحد لاهلى
والبسى النقاب براحتك مش هقولك لاء وربى ولادك زى ما انتى عايزة مش همنعك
:يبقى انت لسه مفهمتنيش..انت حتى لو بصيت لكلامك هتلاقى كلمات كتير متنفعش بتقولى رغباتك وربى ولادك وفرح عندكوا وفرح عندنا
لا دى لازم تبقى رغباتنا احنا الاتنين ولازم دماغ الاب تبقى زى دماغ الام وطريقتهم واحده ومينفعش امنع الموسيقى من فرحى فى بيتنا واروح اسمعها فى بيتكوا ده كده يبقى عندى انفصال فى الدين
سامح:ما انتى برضه لازم تراعى احلامى اللى هتنازل عنها فى سبيل رغباتك دى مالهاش قيمه يعنى
:مش قولتلك يا سامح أحلامك غير أحلامى وهدفك غير هدفى
علشان كده احنا مش ممكن نتقابل فى سكه واحدة
سامح:بترفضى حبى علشان الحياة الناشفه دى
: ناشفه ..طب أقرأ كده ابيات الغزل بتاعة سيدنا علي فى حب السيدة فاطمة وانت تتعلم من الصحابة ازاى تكتب ابيات حب وغزل
انا خلصت كلامى ويارب تكون اقتنعت ..وياريت توفى بوعدك
وتختفى فعلا وبالمناسبة ياسمين لايقة عليك فعلا وعلى حسب حكايات منى انها بتحبك ياريت تداوى قلبها على الاقل عارفها وعارف اخلاقها ومتأكد انها بتحبك
سامح:شوفى انتى رفضتينى وخلاص عاوزه تختاريلى مراتى كمان
:ده مجرد اقتراح….نسيت اقولك منى خلاص اتجوزت فياريت تختفى من حياتها هى كمان لو ليها عندك اى حاجه رقم ايميل صورة اى حاجه ياريت تحرقها
سامح:من غير ما تقولى بمجرد ما سبتها عملت كده……. علشان تعرفى اننا راجل مش واحد صايع زى ما انتى فاكرة
:انا متأكده انك كويس ولو مكنتش واثقه من كده مكنتش جيت
انت كويس يا سامح بس محتاج تغير حياتك …الراجل اللى قتل 99 نفس وكملهم مائه العالم نصحه انه يسيب ارضه اللى هى فيها لانها ارض فسق
فلو انت حسيت ان مش عارف تتغير فى مكانك غيره شوف مكان تانى فيه صحبه صالحه تعينك وتقويك على نفسك
سامح :وطبعا مينفعش انتى تبقى الصحبه الصالحه دى مش كده
ولا ممكن
:بالتأكيد لاء.. انا كمان محتاجه زوجى يرفعنى يعالينى يبقى شيخى مش العكس
أنتهى الموقف البايخ ده اخيرا وانهيت المقابلة ومشيت مع نهلة وزوجها لكن فضل ضميرى يأنبنى فترة طويلة وحسيت انى كنت قاسيه عليه اوى وخفت يحصله انتكاسه وابقى انا السبب
فضلت فتره طويلة مضايقة من نفسى اوى وبقول كنت كلمته بطريقه لينه اكتر من كده لكن انا من عادتى ان اقطع عرق واسيح الدم زى ما بيقولوا… وفى نفس اليوم غيرت رقمى وغيرت مواعيدى فى الجامعه مع نهلة ووصتها انها تقفل الموضوع مع جوزها وانى مش عاوزه اسمع عنه حاجه تانى
بس الحمد لله جه معاد فرح منى خرجنى من الحالة دى
خلصت مشاكل سامح ومنى وابتدت مشاكل أدهم مع منىمصرة
يووووه مش هنخلصبا اشد ف شعري