رواية قهر الفصل السابع 7 بقلم رويدا القاضي

رواية قهر الجزء السابع

رواية قهر البارت السابع

رواية قهر الحلقة السابعة

بعد مرور أربعة سنوات منال مقمعزة في الصالة
خالد خالد وين أحمد شوفه بالك تلقاه برا…
خالد:خليه علاش تخنقي فيه الولد بيلعب كيف باقي الصغار
منال: نخاف تصيرله حاجة
خالد:الحافظ ربي
امباركة:مكلوب كيف بوه بسلامته
خديجة:اسم الله عليه من الكلب عيل كيف باقي الصغار..
منال: الساعة واحد نمشي نحط الغذاء هالة شويه وتوصل من الجامعة أكيد فارطة من التعب…
خالد: الحمد لله لولا وجودهم معانا في الحوش الباين كنتي ناويه تقتليني من الجوع..
قصة يوسف وحليمة انتهت بموت حليمة بعد تمت تعيش معاه شبه محبوسة في الحوش لاطلعة ولا خشة وبعد سنتين منعها فيها من شوفت اهلها جاء يوم وهو مروح من العمل لاقاها شانقة روحها ….
الحاضر
بشير:مازال مش ناوي نفرحوا بيك ولا كيف …
يوسف:اتعودت نكون بورحي حظي وجربته مرة مش ناوي ايصير فيا كيف زمان…
خالد:لعند امتى العمر يجري وكلنا بصغارنا حتى الفاشل بشير اقريب ايتم بابا..
يوسف:في وحدة عاجبتني الحق لكن خايف ترفضني شخص كيف نا مش وحدة ترضى بيه .
بشير: شن انت ع اساس مطلقة وعندك عشرة صغار انت راجل غار ع شرفه وماارضاش ايعيش مدلول وكان ع موت مرتك هضا كاتب ومقدر من ربي .
خالد: من سعيدة الحظ للي عاجباتك
يوسف: هالة اخت مرتك يعلم الله انها شاغلة بالي وتفكيري وكل ماترجع من الجامعة نتم نرجا فيها بيش نحقها…
بشير: بلهجة مصرية ياضناي شايل في ألبك ليه🤣🤣.
يوسف: نا نكره نتكلم ع خاطر النفاخ هضا حتى بيتم أب مازال عقله كيف العصفور…
بشير: مانسمحلكش صحح معلومتك كيف النملة قصدك.
خالد: والله ماني عارف شن نقولك لكن نشوف مرتي تكلمها وبعدها ساهل.
يوسف:بارك الله فيك
رجعه:محمد تم مايعلم ايش صاير برا الحوش بعد موت حليمة ونا نقول لازم نرحلوا من هنا.
مريم: وهضا راي حتى نا غير خفت تضايقي لوقتلك الكلام هضا.
وجعه: اولادي كلهن طارن من بين ايديا تميت وحيدة خايفة يلف الوقت ويبرم ونموت بروحي كيف قاسم.
مريم:بعد عمر طويل نا معاك ديما واهو منها نتريحوا من وجه امباركة وخديجة للي تميت نتصبح فيها ونتمسى فيها …
رجعه: يعلم الله انه هما للي مكرهيني في المكان كله.
محمد: مريم نوضي حليمة جايه في الطريق هي ويوسف جهزيلها ضايفة رايفت ع شوفتها …
مريم : بنظرة حزن …. الله يرحمها خلاص قطعتلي قلبي.
منال:كنك من بكري وانت ساكت
خالد:اسمعي بنقولك شئ مانبيش تعصبي مني بكل افهمي وبعدها تكلمي.
منال: مدامه فيها المقدمة هذي كلها ربي يستر تكلم.
خالد:احنا جايبنا بيبي ثاني في الطريق والحوش تم ضيق واجد ونا مش قادر ناخد راحتي معاك.
منال:من أي ناحية مش واخد راحتك.
خالد:مهما كان الحوش يحفضلنا خصوصياتنا 24ساعة وانت لابسة قفطان تقول واخد وحدة من مسلسل باب الحارة.
منال:مانقدرش نسيب امي وامك واخواتي.
خالد:وهضا كله يمشي من عمري وعمرك وحياتنا نا وانت نا راجل من حقي لما نرجع للحوش نشوف مرتي لابسه مش تقول عايش مع اختي عليش متزوج نا باش انفيق ع صوت امباركة وامك وهما ايعيطوا.
منال:الحوش للي تحكي عليه يلزمه فلوس ومنين لك انت الفلوس وانت تحق في كل شئ بعيونك الطايح مرفوع…
خالد:في مشروع ناجح ولو شدت معانا معاش نحتاجوا حد لكن يلزمه راس مال اقل شئ 30 ألف.
منال: نا بناخد جمعية مع الابلات في المدرسة الشهر الجاي 20 ألف ماتغلاش عليك …
خالد:نا لما قتلك مش قصدي تعطيني فلوسك هذين حقك .
منال:نا وأنت واحد ياخالد انت قبلتني بكل شئ في حياتي معقولة نكون قليلة أصل ونرخي بيك توا.
خالد:يعلم الله انك نعمة المرأة كيف ماكنت نتمناك وأكثر لكن لو صار منه المشروع رح نعوضك ع كل شئ وأولها صبرك هضا.
منال:أكيد بتعوضني ياخوفي بعد يجري في يدك القرش أول حاجة اديرها تتزوج علي…
خالد: نا مش رايد نموت مدبوح ولامقطع ع يد المافيا امباركة والمساعد أول خديجة..
منال:صار كان مافيش هما كنت راح اديرها ياولد فرج.
خالد:قربت منها ومسكت يدها وبست جبينها وراسك مانبدلك بصبايا ليبيا كلها.
منال:ياسلام هضا الكلام للي ينسمع
خالد: ها نسيت نقولك كلمني صاحبي يوسف ع هالة اختك .
منال:يوسف هضا مش كاين راجل حليمة بنت عمي محمد.
خالد: ها هو نفسه.
منال: مش تحس فيها ثقيلة شوي ياخالد.
خالد: لاثقيلة ولاشئ للي صار كان ماضي وعدى في حاله والراحل فتح صفحة جديدة في حياته…
هالة:معقولة نانتزوج واخد قاتل كيف ترضيلي واحد كيف هضا.
منال:اكبر خطأ لما نحكموا ع الشخص بدون مانعرفو ا أسبابه للي خلاته وصل للي وصله.
هالة:مانيش عارفه لكن نحس فيها ثقيلة ماقدرتش نتقبل الفكرة أصلا.
منال:ناعندي ليك حل كويس تلاقي انت وياه يوم في الجامعة وهدرزوا في كل شئ وكان ماعجبك خلاص فوتيه بدون مايعلم حد.
هالة:توا هكي حل كويس يمكن انديره ها حق نسيت نبي نقولك ع شئ.
منال: ها حدني داهشة مش قادرة نوقف شن عندك .
هالة: اسمعي خالد مش مسؤول ع مرام لايروح بيها من المدرسة ولاغيره.
منال:كنك شن في أمي مضايقة.
هالة:لا.لكن نا كل يوم نحق في مرام تتعلق بخالد اكثر من اليوم للي قبله. وكأنه بوها وهضا غلط لازم تعرف انه مش باتي.
منال:فزعتيني ايش فيها هذي اسمعي نا بنعدي انكلم امباركة وخديجة ع الموضوع..
هالة:تمام
منال:فكري في كلامي زين ها.
خديجة:قمعزي بشويش عليك امتا تاخدي اجازة من المدرسة مش حلك تريحي.
منال: مازال خلي نوصل الشهر التاسع وبعدها ناخدها.
امباركة: عليك تسكير رأس ألبسي الوطا الله يهديك لنقعدوا واحلين فيك.
منال:نانبي منكم خدمة بلا علم خالد.
خديجة:ها شن فيه.
منال:نبي ادبرولي في 10آلاف ضروري.
امباركة: شن الولد خش ع الحشيش ونا غافلة ولاكيف عليش لا ليه وقت معاش حاسبته.
خديجة:هاذي اخرتهاولدي متربي ولدي نضمنه توا تقولي حشيش ينا علي ياحظك الخايب يابنيتي.
منال:كملتوا الدرما متعكم ولا نمشي ونرجع شوي اخرى.
…../هانت شن رأيك فيا نعرف نمثل ولا.لا
……/اكيد لكن سلملك العقل للي دبر عليك في هضا كله.
رجعه:مريم تعالي هنا حصلت من يشري منا الحيشان كلهن.
مريم:تمام لازم نطلعوا فلوس سالم وحسن قبل مانشروا حوش اخر.
رجعه:تمام توا خودي معاك للي يلزم بس والباقي كله خليه.
مريم : حاضر ربي يحفظك ويخليك تاج فوق رؤوسنا .
رجعه: كيف بنعدي تفكرت كيف حال محمد اليوم.
مريم:قاعد كيف امس يسكت شوي ويرد يقولي حليمة عدت لمدرستها…
رجعه:خلي نستلم الفلوس وبعدها نطلعه برا نعالجه مستخيل نخليه هكي.
مريم:والله قطعلي قلبي .
رجعه: الله غالب الفقد واعر …
يوسف:ها بشر شن صار معاك.
خالد:مازال مرتي ماردت عليا.
بشير:شن المعاملة هذي لازم اديرله واسطة صاحبك عاد.
خالد: مااضايقش روحك صدقني مااتصير كان للي كاتبها ربي .
محمد:ها امتا الراجل بيجئ بكره ولا للي بعده.
مريم :هانت عدى الواجد مازال الشويه.
محمد: بعدها نطلعوا من البلاد كلها نعيشوا حياة جديدة احنا وأولادنا الاثنين.
مريم:تعبت السنين هذي كانت كيف الغيمة السودا للي مش راضية تزيح بكل.
محمد:خلاص اطلعي جنبها قبل ماتفطنلك.
عدت الايام الثلاثة ورجعه باعث كل شئ كان بإسمها من ورث قاسم الحيشان كلهن ماخلت ولاعقبت شئ.
اليوم للي بعد استلام الفلوس.
رجعه:ها يامريم خلاص توا خلي انضموا الامور ونشوفوا حوش في مدينة ….
مريم :حاضر شن رأيك ناخدهم وندسهم نا لعند مانحصلوا حوش ونشوفوا مشروع نحطوا فيه الفلوس.
رجعه:خلاص خلي الفلوس عندك لعند مانحصلو الحوش .
مريم:تم في الحفظ والصون.
ثاني يوم فاقت رجعه ولقت مريم مجهزة دبشهم كله هيا ياامي اركبي السيارة خل نطلعوا طولنا.
وطلعوا من الحوش لعند ماوصلوا للمبنى وقفت فيه السيارة.
محمد:ها انزلي ياامي بتلقي بنت ترجى فيك بيش اتم معاك شوية ورق باش تحفظلك الفلوس متعك هنا.
رجعه:خلاص شويه وانجيكن ان شاء الله مانطولش عليكم.
وفعلا صدقت المقولة …
مارأيت أعدل من الايام ،تدور دوائرها؛كالرحى تنصف المظلوم ولو بعد حين وتصيب الظالم في أعز مايملك.
خشت رجعه للمبنى للي حطها قدامه محمد ومريم وصلت الاستعلامات
الموظفة:تفضلي ياامي بيش نقدر نخدمك.
رجعه:نا يابنتي حطني ولدي هنا وقلي خشي جوا للبنت تمي معاها الأوراق.
الموظفة:استريحي ياامي لاحول ولا قوة إلا بالله راك بين هلك وناسك.
رجعه: استغربت من كلامها وشفت شيابين وعزايز
نا وين يابنتي.
الموظفة:دار الرعاية
رجعه: ها اكيد خطأ ولدي محمد مستحيل يعزق امه هنا للي باعث كل شئ ع شانه.
الموظفة: ماتخافيش ياامي كلنا بناتك.
رجعه:قعدت نفكر ونفكر لين صدقت كلام الموظفة لعند الفجر وبعدها قررت نطلع ونامش عارفه رجليا وين يحملوني..
…../الباب ايطق من ايجينا توا ربي يستر وقت فتحت الباب كانت الصدمة…