رواية هو مين دا الفصل الخامس والعشرون 25 بقلم أسماء الطبلاوي

رواية هو مين دا الجزء الخامس والعشرون

رواية هو مين دا البارت الخامس والعشرون

رواية هو مين دا الحلقة الخامسة والعشرون

(راكان بعد ما اتكلم مع نسمه وعرف منها انها بتحبه و اتاكد من مشاعرها ناحيته اخدها وراح عند سمير علشان تشوف ناويه تعمل ايه معاه في الوقت ده كان هادي وصل ودخل يدور على هيام.
هادي: هيام انتى فين يا حبيبتي
هيام: تعالى يا حبيبي انا هنا بظبط اوضه الاطفال.
هادي: يا رب يبقى فيها اطفال.
هيام: هههههه قريب ان شاء الله المهم تعالى اقعد علشان انا عاوزه اقولك حاجه مهمه جدا.
هادي: اديني قعدت يا ستي ايه الحاجه المهمه جدا دي.
هيام: انا بحبك قوي يا هادي ومش عاوزاك تبعد عني ولا تسيبني لاي سبب ولا نزعل من بعض لاي سبب.
هادي: هو ايه اللي حصل ليه بتقولي كده انا عمري ما هسيبك ابدا.
هيام: اصل نسمه كانت عندي هي والامير راكان من شويه كانت زعلانه منه علشان غاب عنها كثير وما كانتش عاوزه تسامحه بس انا اتدخلت وساعدته علشان هي تسامحه وعرف انها بتحبه اخذها ومشي.
هادي: طيب دي حاجه حلوه ايه اللي يزعلك ويخليكى خايفه وقلقانه كده.
هيام: ما اعرفش بس حسيت ان الفراق ما بين اتنين بيحبوا بعض حاجه وحشه قوي علشان كده مش عاوزه اجربها ولا احس بيها اوعدني انك ما تخلينيش احس بالفراق ده ابدا مهما حصل.
هادي: اوعدك انى عمري ما هبعد عنك ولا هسيبك ابدا واننا هنعيش ونعجز ونموت مع بعض.
هيام: ربنا يخليك ليا يا حبيبي.
هادي: ويخليك ليا يا حبيبتي المهم الفرح المره دي الجمعه الجايه مش هاجل ثاني علشان خاطر اي حد كفايه التاجيل بتاع الجمعه اللي فاتت.
هيام: لا ما تقلقش المره دي مفيش اي تاجيل.
( في الوقت ده كان راكان وصل بنسمه عند سمير بصت نسمه شافت سمير محجوز جوه اوضه حواليها قضبان كثير زي الحديد بتاع السجن وعمال يصرخ لكن صوته مش طالع وهي مش سامعاه شايفه بقه بيتحرك بس.
نسمه: انتوا بتعملوا فيه ايه يا راكان.
راكان: ما بنعملش فيه حاجه هو اللي عمال يصرخ كده من ساعه ما اخذناه.
نسمه: بس انا مش عاوزه اتكلم معاه خليه يرجع من مطرح ما جه وخلاص.
راكان: لازم تقولي هنعمل فيه ايه طالما الموضوع اتدخل فيه ملك من الجان لازم يتحكم عليه فهماني ده قانون.
نسمه: يعني لازم يموت انا مش عاوزه كده.
راكان: لا طبعا مش لازم يموت ولو انه يستاهل على اللي عمله فيكي ولو الموضوع في ايدي كنت خلصت منه من بدري الحكم اللي انتى عاوزاه يتنفذ اين يكن هو ايه تعالي خشي يلا.
( دخلت نسمه مع راكان الاوضه اللي فيها سمير وراكان بص للحراس انهم يخرجوا سمير وفعلا خرجوه ووقفوا وهم ماسكينه.
راكان: تعرف لو الموضوع في ايدي انت ما كانش زمانك واقف دلوقتي على الارض كان زمانك تحت الارض لكن للاسف صدر القرار ان هي اللي تحكم عليك علشان كده سبتلها هي المهمه دي.
سمير برعب: انا اسف يا نسمه علشان خاطري سيبوني امشي وانا مش هقربلك ثاني ولا هتعرضلك متموتونيش.
نسمه: امال انت كنت عاوز تموتني ليه يا سمير وكنت عاوز تسرق فلوسي وشقى عمري انا وبابا ليه..!! ليه اديت لنفسك الحق انك تعمل فيا كده ودلوقتي بتسحب الحق ده مني.
سمير: كنت غبي ايوه بعترف انا كنت غبي وطماع كمان رانيا هي اللي قالتلي اعمل كده علشان اسدد ديوني هناك انتى عارفه ان انا اغبى من اني افكر في حاجه زي دي.
راكان: حتى لو الكلام ده مش كلامك واللي عملته ده كان حد ثاني قايلك عليه المفروض ان عندك عقل وتقدر تميز ما بين الصح والغلط وتعرف انك كان لازم تخلي بالك من بنت عمك مش تاذيها.
سمير: والله ما هاذيها ولا هتعرضلها ثاني ولا هقرب منها وهمشي ومش هتشوفني تاني في حياتها بس بلاش تموتوني.
راكان& عارف انا لسه ما اعرفش هي ناويه تعمل معاك ايه لكن انا متاكد انها مش هتموتك وهتدور على اقل حاجه تعاقبك بيها علشان هي اطيب واجدع منك مليون مره
سمير: طول عمرها اطيب واجدع مني علشان خاطري يا نسمه سامحيني.
نسمه: اللي بيسامح ربنا يا سمير انا هكتفي بانك تتعلم الادب من اللي حصلك علشان تبطل تغلط وتمشي في الطريق الصح راكان لو انت هتنفذ حكمي زي ما انت بتقول انا حكمي ديونه كلها تتسد بس من غير ما يمسك ولا مليم في ايده ويرجع ثاني من مطرح ما جه ويبدا حياته من الصفر من غير ما حد يسنده ولا يساعده.
راكان: اعتبريه تم ولعلمك يا سمير انا سامحتك بس علشان نسمه انما لو احنا في وضع ثاني انا كنت خلصت منك بابشع طريقه ممكن تتخيلها نسمه هتبقى مراتي وهي تخصني من زمان وانا اللي يخصني مبحبش حد غيري يقربله.
( خلص راكان كلامه مع سمير وخد نسمه في ايده وخرج وبص للحراس قبل ما يمشي وقال.
راكان: اللي امرت بيه الانسيه نسمه يتنفذ وحالا وبلغوا الملك شهبير ان الامر تم حسب ما هو طلب.
الحراس: امرك يا امير.
( اخذ راكان نسمه ورجعها البيت وطلب منها انها تبلغ كل حبايبها انه هيجي بكره يتقدملها علشان يتجوزوا.
راكان: خلاص بكره هاجي اتقدملك وهتبقي بتاعتي للابد مش حاسه ان انتى اتسرعتى في قرارك.
نسمه: بالعكس ده انا مبسوطه ان انا قررت كده هستناك ما تتاخرش عني المره دي لانك لو المره دي ما جيتش مش هتعرفني تاني.
راكان: يا ساتر يا رب ده انتى هتبقي زوجه صعبه قوي بس على قلبي زي العسل.
نسمه: طيب انت دلوقتي هتمشي تروح فين وليه ما تطلبنيش دلوقتي بدل بكره.
راكان: الصبر… الصبر يا هانم انا هروح ارتب كل حاجه والمكان اللي هنعيش فيه واجراءات كتب الكتاب والفرح وكل الكلام ده وبعدين هبعتلك اللي هتحتاجيه على هنا علشان بكره اخذك من هنا عروسه في عندك مشكله في الكلام ده.
نسمه: ابدا ما عنديش اي مشاكل هيبقى عندي مشكله في ايه يعني المهم ما تتاخرش عليا وخلاص.
راكان: حاضر يا قلبي بحبك يا نسمه.
نسمه: وانا بموت فيك يا قلب نسمه.. يلا بقى روح عشان ما تتاخرش.
( خرج راكان من عند نسمه وهو مبسوط جدا انه اخيرا هيتجوزها وهتبقى ملكه في الوقت ده كانت ام فاروق قاعده هي وابنها تحت في الشقه بيتفقوا هيعملوا ايه علشان الجواز.
فاروق: كده ياما بتدبسيني وانتى عارفه البير و غطاه.
ام فاروق: انا مش بدبسك ولا حاجه ما تقلقش كل حاجه مترتبه
فاروق: يعني ايه مش فاهم.
ام فاروق: نسمه يا حبيبي هتتجوز الراجل اللي انت شفته معاها في المستشفى وده راجل غني قوي هي قالتلي انه هيشوفلك شغل وكمان قالتلي ان مفيش حد احق بالبيت ده مني.
فاروق: مش فاهم ياما يعني ايه.
ام فاروق: نسمه هتكتبلي البيت ده باسمي والدكان كمان وقالتلي الشقه بتاعتها تظبطها وتتجوز فيها انت وناديه.
(فاروق مكنش مصدق ان نسمه عملت كل ده علشانه وعلشان امه وانها ممكن تتنازل عن البيت اللي رفضت تسيبه لابن عمها ليهم هم
فاروق: يعني هي رفضت انها تكتبه لابن عمها علشان يفك زنقته وكتبته لينا احنا ياما.
ام فاروق: علشان تصدقني لما اقولك ان نسمه بنت حلال وقلبها ابيض.
فاروق: انا مش عارف ياما كان عقلي فين لما فكرت انها ممكن تكون هي اللي سمتك انا ندمان ان انا جبت سيرتها بحاجه وحشه ولازم اتاسفلها.
ام فاروق: عموما شويه وانا طالعالها وهشوف هتبقى فاضيه امتى وبعدين قولها اللي انت عاوز تقوله.
(كانت نسمه مبسوطه لدرجه انها كلمت المعلم شعبان والمعلم جابر وشفشق وفاروق وامه وقالتلهم كلهم على خبر جوازها وطلبت منهم يجوا عندها ثاني يوم علشان يبقوا موجودين وراكان جاي يتقدملها وقالتلهم انهم اهلها ومفيش عندها اغلى منهم يبقى موجود جنبها في يوم زي ده ثاني يوم كان الكل موجود في الشقه عند نسمه حتى هيام وهادي كانت هيام وام فاروق مع نسمه في الاوضه والرجاله بره في الصاله وراكان لسه ما وصلش.
هيام: يا خرابي على القمر فستان الفرح هياكل منك حته تعرفي ان ذوقه حلو قوي في الفستان.
نسمه: يا رب بس يبقى عنده ذوق ويجي في ميعاده وما يتاخرش الناس بره مستنيينه لو اتاخر المره دي مش هسامحه ابدا.
هيام: بطلي عصبيه بقى زمانه جاي.
ام فاروق: اهي يا بنتي كده من الصبح لا على حامي ولا على بارد وعماله تقول جاي لا مش جاي.
نسمه: ما انا خايفه يا خالتي.
هيام: والله العظيم انا جايبه هادي غصب عنه انا واحده فرحي بكره جايه اعمل ايه هنا.
نسمه: طيب والنبي يا هيام اكتبي كتابك معايا دلوقتي وفاروق كمان يكتب كتابه على ناديه و اهو الماذون هيبقى موجود وبعدين كل واحد يعمل الفرح اللي على مزاجه بقى.
ام فاروق: تصدقي فكره انا هخرج اقولهم.
هيام: وانا هروح اقول لهادي.
( خرجت هيام و ام فاروق علشان يرتبوا كل حاجه وكانت نسمه قاعده على السرير بفستانها فرحانه ومدت ايديها تحت المخده وجابت صوره امها وابوها وعينيها دمعت.
نسمه: وحشتوني قوي وكان نفسي تبقوا موجودين معايا في اليوم ده كنت هتتبسطي قوي يا ماما وانتى شايفاني بفستان الفرح وانت يا بابا كنت هتخبطني على وشي بالقلم وتقولي طالعه زي القمر لابوكة يا بنت الايه…. اليوم كان هيبقى احلى لو انتم موجودين بجد وجودكم ناقصني قوي.
(اتفاجئت نسمه بايدين راكان بتحضنها من ضهرها واتخضت.
نسمه: مش هتبطل حركاتك دي لا بقولك ايه انت لازم تعمل حس وانت جاي بعد كده بالشكل ده مش هعمر معاك سنه واحده.
راكان: ما تغيريش الموضوع ايه اللي مخلي عروسه جميله زيك في يوم زي ده بتعيط.
نسمه: ولا حاجه يا حبيبي انا بس افتكرت ماما وبابا وزعلت انهم مش معايا كان نفسي يبقوا موجودين النهارده كانوا هيفرحوا قوي وانا كمان كنت هفرح.
راكان: ربنا يرحمها دلوقتي المفروض بدل ما تعيطي المفروض تفرحي علشان هم يفرحوا لفرحتك.
نسمه: الحمد لله على كل حال المهم انت اتاخرت ليه.
راكان: انا ما اتاخرتش ولا حاجه انتى بس اللي مستعجله على الفاضي.
نسمه: هنبتديها من اولها كده.
راكان: لا ولا هنبتديها ولا حاجه يلا بينا عشان نخرج هاتي ايدك.
( اخذ راكان ايد نسمه ولسه هيخرج نسمه وقفته.
نسمه: ايه ده انت رايح فين على فكره دي اوضتي هقولهم ان انت دخلت منين ده كلهم في الصاله بره اتفضل روح انت بقى وتعالى من باب الشقه وانا اخرج من باب الاوضه.
راكان: تصدقي نسيت هاخذ وقت بردو لحد ما انسى ان انا جن وكده
نسمه: هههههه معلش هبقى افكرك كل شويه كنت هتودينا في داهيه روح يلا.
( اختفى راكان من قدام نسمه وبعدين سمعت صوت خبط على باب الشقه وعرفت ان هو لما سمعت صوته فرحت قوي وخرجت ام فاروق زغرطت بفرحه
ام فاروق: لولولولولولولي الف مبروك يا نسمه يا حبيبتي ربنا يفرح قلبك يا رب ويتمم بخير مبروك يا استاذ زين.
زين: الله يبارك فيك يا حاجه طبعا يا جماعه انتم عارفين ان انا جاي اطلب ايد نسمه ونكتب كتابنا على طول الماذون موجود وهي بلغتني انكم موافقين عشان كده رتبت كل حاجه بعد اذنكم طبعا.
شعبان: ده احنا يزيدنا شرف يا باشا ربنا يتمم بخير يا رب.
جابر: ربنا يسعدكم نسمه بنت حلال وتستاهل كل خير.
شفشق: هتخليني اشوفها تاني ولا هتاخدها وما عدتش هشوفها.
زين: لا هخليك تشوفها ما تقلقش.
الماذون: فين الشهود.
شعبان: انا والمعلم جابر هنشهد على كتب كتاب نسمه وزين والست هيام وخطيبها وبعدين زين والمعلم جابر يشهدوا على كتب كتاب فاروق وناديه بنتي.
زين: ههههه حلوه التقسيمه دي يا معلم شعبان على خير ان شاء الله الف مبروك يا جماعه.
( تم كتب الكتاب وسط فرحه كبيره من الكل وزين اخذهم كلهم في عربيه كبيره وراح بيهم على المكان اللي كان مرتب فيه الفرح واتفاجئوا انه مجهز فرح جماعي يضم الثلاث عرايس والثلاث عرسان كان يوم جميل والكل كان فرحان..
وبعد مرور خمس سنين كانت نسمه قاعده في الفيلا الخاصه بيها وبطنها قدامها والحمل باين عليها جدا ودخل عليها راكان يضحك.
راكان: بذمتك ده منظر واحده زعلانه المفروض انك زعلانه مني وعماله تاكلي تاكلي تاكلي لما هتضربي.
نسمه: اعمل ايه يعني انا اكلت بنتك وابنك لسه لحد دلوقتي ما شبعش مش ذنبي وبعدين هو اللي خلاني شبه البطيخه كده.
راكان: الله ما انتى بتردي عليا اهو يعني مش زعلانه.
نسمه: اه صحيح انا نسيت ان انا زعلانه منك اتفضل روح بره وما تكلمنيش.
راكان: يادي الزعل اللي مش هنخلص منه تعالي يا كوكي شوفي ماما بتعمل ايه في بابا.
( جات كارما بنتهم وقفت قدام نسمه ومسكت ايد راكان.
كارما بطفوله: وبعدين يا مامي مش تزعلي بابا تاني بقى اكبري واعقلي.
نسمه: عاجبك اللي بنتك بتقوله.
راكان: بنتي وبتدافع عني ازعل ليه.
نسمه: مفيش حد بيدافع عنك زيي علشان مفيش حد بيحبك قدي.
كارما: لا يا مامي انا بحب بابي اكتر منك.
راكان: شفتي عندها لكل سؤال رد
( راح راكان قعد جنب نسمه واخذها في حضنه وبس راسها وطلعت كارما قعدت جنبهم.
نسمه: انا بحبك قوي يا راكان واليوم اللي شفتك فيه كان احلى يوم في حياتي عمري ما هنساه ولو ربنا رجع بيا الزمن تاني عمري ما هفكر اني اغير اي حاجه ثاني من اللي حصلت في حياتي من يوم ما شفتك.
راكان: وانا بموت فيك يا قلبي وعمري ما اتخيلت اعيش حياتي من غيرك ابدا من اول يوم شفتك فيه وانا حبيتك وهفضل احبك حتى وانتى بكرش وحتى لو جبنا 100 عيل.
نسمه: الملافظ سعد يا حبيبي.
راكان: حبيبي بقى وحقه يدلع.
( وفي النهايه بعد كل اللي حصل وعدى في حياه نسمه وراكان اخيرا قدروا انهم يعيشوا في سعاده مع بعض في حياه هاديه ما فيهاش اي مشاكل