رواية الحب المر الفصل السابع 7 بقلم سارة جورج

زياد : طب اهدي طيب…. بقولك ايه…. هو شهاب ده يعرف ملك … شافها يعني قبل كده …؟؟!!

ليلي :لا… معتقدش…. شهاب ميعرفش حاجه عن اصحابي…

زياد : تمام…. (ويقوم عشان يمشي… )

ليلي : رايح فين… ؟؟!!!!

زياد : هجيب ملك… استنيني في العربيه …خدي المفتاح اهو واركبي ورا واقفلي الازاز عليكي ومتفتحيش لحد مهما ان كان…. تمام… 

ليلي : حاضر…. (خدت ليلي المفتاح وراحت العربيه….. راح زياد علي الاستقبال بتاع المستشفي بتاع المستشفي وطبعا شهاب كان واقف هناك…. )

زياد : مساء الخير… 

الاستقبال : مساء النور يا فندم  …انا كنت لسه هكلم حضرتك عشان تيجي تاخد الانسه… 

زياد : اه….منا قولت اجي اسأل …. اشوف هتطلع امتي …بعيد عن السامعين اختي لما اتزحلقت في الحمام وقعت علي رجلها اتكسرت…. حكم وقعات الحمام صعبه… خلوا بالكم يا جماعه… 

الاستقبال : ربنا يشفيها يا فندم…. الف سلامه عليها… اتفضل حضرتك اطلع الدور التاني هتلاقيها في الطوارئ…. هي كده حسب كلام الدكتور تقدر تخرج دلوقتي…. 

زياد : متشكر جدا…. (مشي زياد بعيد عن شهاب بخطوات بسيطه… )

شهاب : يا استاذ… يا استاذ ….(لف زياد وشه… )

زياد : حضرتك بتنده عليا ؟!! احنا نعرف بعض ؟!!

شهاب : لا معتقدتش …بس هي اخت حضرتك اسمها ايه…. ؟؟!!(شهاب كان بيشبه علي زياد…كان حاسس انه يعرفه من قبل كده بس مجاش في باله انه يكون هو الي لبسه في العربيه الي كانت قدامه )

زياد : افندم… انت ازاي تستجرا تسأل عن اختي… انت تعرفها… انطق…. قول… (ويمسك زياد شهاب من قميصه وهو بيزعق وبيتخانق…. عارفين المثل الي بيقول خدوهم بالصوت قبل ميغلبوكوا… هو ده بالظبط… )

شهاب : خلاص يا استاذ اهدي… انا مقصدتش حاجه غلط… انا معرفش اختك طبعا…. 

زياد : اومال بتسأل عنها ليه… اتكلم…. (الناس وامن المستشفي بدات تتدخل وتفك الخناقه…..)

شهاب : خلاص …كنت بسأل عادي… اصلي بشبه عليك ..فقولت جايز اختك كانت شغاله في الشركه عندنا… عموما انا متأسف …

زياد :امشي من قدامي (وهو بيسيب قميصه…) خلاص يا جماعه مفيش حاجه… (ويطلع الدور التاني علشان يجيب ملك…. بالرغم من ان حوار الخناقه دي كان بالنسبه لزياد تمثيليه …الا انه كان بيتعامل بجد…. وكمان لما ركز في ملامح شهاب… قعد يشبه عليه كتير بس مكنش عارف هو شافه فين قبل كده… المهم… طلع الدور التاني واخد ملك ونزلوا تحت… وهو تحت شاف شهاب …بص له بصه كأنه بيقوله لو قربت منها ولا مني تاني هيكون اخر يوم في عمرك…. ملك لما شافت شهاب كانت خايفه… هي عارفه شكله بس متعاملتش معاه قبل كده …فحاولت تبص بعيد عنه عشان متلفتش نظره … الي اصلا متشالش من عليها من ساعة ما نزلت وهي في ايد زياد… طلع زياد وملك من المستشفي وركبوا العربيه واتحركوا… ليلي بخوف وقلق… )

ليلي : ها خد باله منك…. ؟!

زياد : خد باله !!! …دنا عملت معاه خناقه جوه…. ظبطه…. (وهو بيعدل لياقه قميصه…. )

ليلي :انت عملت ايه بالظبط… ؟؟!!!! (برعب)

زياد : انتي علطول خايفه كده…اهدي… محصلش حاجه… انا حكيت للانسه ملك… تبقي تحكيلك…. 

ملك : خلاص يا زياد… شيل التكليف …انا بقيت اختك…. (تقوله كده وهما الاتنين بيضحكوا… وليلي مش فاهمه حاجه…. )

ليلي : هو في ايه…. انا مش فاهمه حاجه… 

ملك : هبقي افهمك يا ليلي لما نرجع بس…. هي الساعه كام صحيح ….؟؟!

ليلي : الساعه دلوقتي 1.30Am …

ملك : كويس علي كده هنرجع القاهره علي الساعه 7.00Am كده…. 

زياد : بإذن الله…. 

ليلي : زياد.. 

زياد : نعم يا ليلي… 

ليلي : هو…. مش انت قولت انك مبتحبش تسافر بالليل.. ؟؟!!!!

زياد : لا…. اصل يعني …ايه…. مكنش ينفع تستنوا هنا… (بإرتباك )

ليلي : اه….بس انت عادي صح… كان ممكن تستني… ؟!!!(اتكسف زياد لما ليلي قالت كده وسكت… وليلي سكتت لما حست انها احرجته جامد …. هي اصلا مش عارفه قالت كده ليه اصلا…. زياد بدا تفكيره يروح لشكل شهاب الي هو حاسس انه شافه قبل كده ….)

زياد : ليلي… هو شهاب ابن عمك ده بيشتغل ايه… انا حاسس اني شوفته قبل كده.. بس مش فاكر فين…. 

ليلي : طبيعي تكون شوفته قبل كده يا زياد… مش انت كنت في مطارده عربيات معاه….؟!!!!

زياد : لا يا ليلي انا مشوفتش شكله لما كنا في مطارده العربيات…..اصلا الدنيا كانت ضلمه…. لا انا شوفته قبل كده بس مش في شرم… بس ياتري فين… ؟!(قطعت كلامهم ملك…)

ملك : طيب لما نوصل صحوني… انا تعبانه جدا… 

ليلي : ماشي يا حبيبتي… 

زياد : طيب لو عاوزه تنامي انتي كمان واصحيكي عادي… 

ليلي : مش عاوزه اسيبك لحسن تنعس.. ؟

زياد : لا متخافيش… انا هكلم واحد صاحبي ارغي معاه…. 

ليلي : تمام (نامت ليلي وملك… وزياد بيرن علي سيف …)

زياد : الو… ايوه يا سيف… انا في السكه اهو…. 

سيف : ايوه يا زياد…. انت في السكه ازاي …انت مش قولت انك هت…..!!!!

زياد : خلاص يا سيف انا جي في السكه اهو… 

سيف : هو في ايه…. انا عاوز افهم بقي… هو في ايه الي بيحصل… 

زياد : هفهمك كل حاجه لما ارجع مش وقته… المهم عاوز اقابلك بكره علشان نشوف هنعمل ايه ….هنتقابل امتي وفين ؟؟

سيف : زي متحب…

زياد : بكره في نادي الرمايه الساعه  11.00Am تمام…

سيف : بكره ازاي…. انت اصلا هتوصل القاهره بكره الصبح… هتبقي تعبان اصلا من السفر ..!!

زياد : لا بكره حلو…. مش قادر استني… انت المعاد مناسبك… ؟

سيف : مناسبني… بس انت يعني… مش فاهمك… 

زياد : تمام اشوفك الصبح… وجهز مسدسك علشان هنلعب شويه… 

سيف : حاضر… انا بدات اقلق…. 

زياد : اجمد كده… متقلقش ….بقولك صحيح.. ؟

سيف : قول… 

زياد : عاوزك تبعتلي ميكانيكي علي البيت علي الساعه 7.30Am …

سيف : عربيتك فيها حاجه…. ؟؟!

زياد : لا…. عربيه واحد صاحبي… عمل بيها حادثه…. ابعتلي بس الميكانيكي يجي ياخدها زي مهي كده ويشوف محتاجه ايه ويظبطها…. تمام ….؟؟! 

سيف : تمام 

زياد : يلا عاوز مني حاجه ؟؟

سيف : عاوز سلامتك… خلي بالك من نفسك وتيجي بالسلامه.. 

زياد : الله يسلمك…. سلام…

سيف : سلام… 

(بعد مقفل زياد مع سيف …شغل اغاني وحط الهاند في ودنه… عشان مينمش…. وبعد حوالي 5 ساعات وصلوا بوابات القاهره ….وليلي صحيت لوحدها علي صوت كلاكس عربيه نقل كبيره ….)

ليلي : صباح الخير….. احنا فين كده ؟؟

زياد : صباح الخير… احنا وصلنا خلاص 

ليلي : هي الساعه كام.. ؟! (وهي بتعدل شعرها ….)

زياد : الساعه 6.45Am 

ليلي : اه… طب اصحي ملك بقي… ملك ….ملك… اصحي وصلنا…. 

ملك : وصلنا فين ….انتوا مين اساسا… انا فين 

زياد : انتي فقدتي الذاكره ولا ايه… انتي رجلك هي الي اتكسرت…متخبطيش في دماغك… (هو وليلي بيضحكوا… )

ملك : بس خلاص افتكرت….

زياد : طيب… بيتك فين بقي عشان اوصلك ؟! 

ملك : بيتي في المعادي… 

زياد : انهي حته في المعادي يعني… ؟؟!

ملك : نوصل المعادي بس وأنا هقولك فين عشان مش بعرف العنوان ….

زياد : مش بعرف العنوان…. طيب (بضحكه سخريه ) وانتي يا ليلي… ؟؟!

ليلي : لا انا هنزل مع ملك مش هروح البيت… 

زياد : تمام 

(بعد حوالي نص ساعه وصلوا بيت ملك…. )

ملك : ايوه العماره الي جايه دي…. شكرا جدا… 

ليلي : شكرا يا زياد تعبناك كتير النهارده… 

زياد : علي ايه… مفيش حاجه…. 

(نزل زياد وليلي عشان ينزلوا ملك… )

ليلي : هاتي ايدك… ايوه كده… (بعد مانزلت ملك من العربيه… )

ملك : ايه ده… عربيتي… هو ايه الي حصلها…!!! 

زياد : متقلقيش خالص… دور برد… كلها شريط بنادول وترجع عروسه…. (وهو وليلي بيضحكوا )

ملك : عروسه ايه…. دي مبقتش تنفع حتي عروسه المولد… عربيتي..!!!!! 

زياد : بصي يا انسه ملك ساعتين زمن وهتلاقي عربيتك قدام بيتك زي مهي بالظبط… دي مش عربيتك… (وهو بيضحك.. )

ليلي : فرصه سعيده يا زياد…. مع السلامه (وهي بتسند ملك… )

زياد : انا اسعد… باي… (عملهم باي باي وركب عربيته ومشي… طلع علي بيته وفعلا سيف كان بعتله الميكانيكي الساعه 7.30Am بالظبط…. نزل زياد من عربيته لقي الميكانيكي قدام البيت… )

الميكانيكي : صباح الفل يا بشمهندس زياد 

زياد : ازيك يا حسن عامل ايه يا راجل… معلش رقمك اتمسح من عندي… بشمهندس سيف كلمك… مش كده… ؟؟!

الميكانيكي : اه يا باشا هو كلمني… خير ايه الي حصل في عربيتك (وبيشاور علي عربيه ملك… )

زياد : لا دي مش عربيتي… دي عربيه واحد صاحبي… 

الميكانيكي : دي شكلها حادثه جامده اوي…. منا بقول بردو دي مش عربيتك… اصل انا عارف ان عندك دي بس… طب وصاحب حضرتك طلع منها كويس ؟؟

زياد : اه الحمدلله.. رجله اتكسرت بس

الميكانيكي : كويس الي يجي في الصاج فداه… بس بسيطه كلها ساعتين تلاته بالكتير واكون رجعتهالك جديده…

زياد : خد بقي العربيه دي معاك يا حسن (وراح ناحيه عربيته وفتحها وطلع من التابلوه روزمه فلوس …)وخد دول وظبطها… ولو احتجت حاجه تاني قول… خد الكارت بتاعي اهو… لما تخلص كلمني هاجي اخدها ….تمام 

الميكانيكي : تمام يا باشا ….خيرك سابق… عن اذنك…. 

(مشي الميكانيكي… وطلع زياد عشان ينام شويه لحد مايجي معاده مع سيف…. من بيت ملك….) 

ليلي : حمدلله علي سلامتك يا حبيبتي… 

ملك : الله يسلمك… انتي عارفه… زياد ده طلع شهم اوي… ولا ايه رايك… ؟!

ليلي : ايه… اه…. معاكي حق هو جدع فعلا… (موبايل ملك بيرن … )

ليلي : مين يا ملك… ؟؟!!!!

ملك : ليلي… ده…. ده… اونكل (بتوتر )

ليلي : عايز مني ايه…. طب ردي عليه… بس متعرفيهوش اني عندك…. 

ملك : حاضر…. الو… صباح الخير يا اونكل… كويسه…. حضرتك تحت!!!! ….حاضر… حاضر… سلام…. 

ليلي : في ايه ؟؟!!!(بخوف)

ملك : ليلي… باباكي تحت وقالي انه عارف انك فوق وبيقولك انزلي حالا …. بدل ميطلع هو ….

ليلي : ملك… انا مش عاوزه اروح معاه… انا خايفه منه…. ده ممكن يقتلني (وبدات تعيط)

ملك : طب اهدي طيب…. هتعملي ايه دلوقتي…. 

ليلي : مش عارفه… بس خلاص هنزله… بدل ميطلع هنا ويعمل فضايح بالجاردات بتوعه… ملك ادعيلي… (بيأس )

ملك : حاضر يا حبيبتي… صدقيني لو كان بإيدي حاجه كنت عملتها… 

ليلي : انا عارفه انه مش بإيديكي وغصب عنك…. وكفايا الي حصلك بسببي.. 

ملك : متقوليش كده يا ليلي …ربنا معاكي… وابقي طمنيني عليكي.. 

ليلي : حاضر…. سلام.. (نزلت ليلي وهي بتفكر في المصير المؤلم الي هتشوفه لما تنزل…. ودمعتها علي خدها…. ركبت الاسانسير وبدات تفتكر علي…. يمكن لو كان معاها دلوقتي كان حماها منهم………

وصلت ليلي تحت… وركبت العربيه…)  

رياض : ايه يا حبيبتي…. مكنتيش عاوزه تنزلي ولا ايه…. موحشتكيش ولا ايه …؟؟!!!

ليلي : لا يا بابا…. وايه الي هيخليني مش عاوزه انزل بس… 

رياض : ليلي حبيبتي … انا عرفت الي حصل…ربنا يصبرك… وقلقت عليكي جدا… حتي بعتلك شهاب عشان يطمني عليكي 

ليلي : شكرا… (بفتور )

رياض : ليلي حبيبتي… طبعا انا مش محتاج اقولك ان انا مليش دخل باللي حصل… !!!

ليلي : عارفه يا بابا ….الموضوع كله كان حادثه سرقه… بس خلاص مش فارقه … الله يرحمه… 

رياض : بس اوعدك اني هجيب الي عمل كده لحد عندك… عشان تنتقمي منه… 

ليلي : وحتي لو انتقمت… علي مش هيرجع…. 

(هز رياض راسه معلنا اسفه…. وبعد كده سكتوا هما الاتنين… لحد موصلوا فيلا رياض السباعي….. )