رواية يوميات زوجة كوميدية الفصل الثاني 2 بقلم لمياء علاء
 |
| رواية يوميات زوجة كوميدية الفصل الثاني 2 بقلم لمياء علاء |
رواية يوميات زوجة كوميدية الفصل الثاني 2 بقلم لمياء علاء
خُد…!!
يزن /فيه حاجة اسمها خُد، اسمها اتفضل يا ورد، اتفضل
ورد بتأفف/ يوووه بقى، ماشي، اتفضل
يزن / أيه ده..؟!
ورد / مش بتعرف تقرأ، عموما دي لوازم للمطبخ محتاجاها
يزن / يباااي على طولة لسانك، وريني يا أخرة صبري
نظر يزن باستغراب لقايمة المشتريات/ أيه ده…؟!
ورد بدهشة/ أيه، مش بتعرف تقرأ، أقرألك، أومال رايحة جاية عمالة أقول بش مهندس، بش مهندس، هات الورقة هات..؟!
يزن بدهشة/ لا والله، أنا أقصد انتِ كاتبة لوازم للمطبخ، ومش شايف أي لزمة لأي حاجة من اللي انتِ كاتباها.
ورد بلهجة غريبة/ ازاي يا جدع، هات بس وانا أقرألك، عندك مثلًا شوكولاتة، لوازم ولا مش لوازم
يزن/ لا
ورد بتفسير/ طب لما بتكون عايز حاجة مسكرة بتاكل أيه؟!
يزن بتفكير/ ممكن شوكولاتة
ورد بابتسامة/ شوف بقى، يبقى لوازم ولا مش
يزن متفهمًا/ تصدقي صح، طب والفشار، والتسالي، والكنزي
ورد بتأفف/ هكسب فيك ثواب وهفهمك
يزن باستغراب/ ثواب، هو انتِ لاقياني على باب جامع
ورد / خلااص خلااص، بص يا سيدي بليل وانت بتسمع الماتش مش بتكون عايز تسالي، صح ولا لا..؟!
يزن / لا صح فعلا
ورد مكملة/ والكنزي عشان تشربه وإنت بتسمع الماتش
يزن/ ما ممكن أشرب شاي أو قهوة عادي.
ورد / بس أنا بحب الكنزي
يزن/ بت إنتِ بتحوري عليا وعايزة الحاجات دي كلها ليكِ، قولي متتكسفيش، قولي.
ورد بابتسامة/ بصراحة أه
يزن / عالمطبخ جهزي الغدا، واسمعيلك فيديوهين عن الطبخ يمكن تستفيدي بدل ما كل يوم بطاطس بطاطس لحد ما قربت أزرّع.
ورد / مش عاجبك البطاطس المطبخ على ايدك اليمين، روح اعمل الاكل لنفسك يا مان
يزن/ انا ماشي عالشغل، ومش فاضي للخناق النهاردة بس لو جيت لاقيتك لسه قاعدة عاليوتيوب بتسمعي المسلسل هكسر أم التابلت على دماغك و هعملك بوفتيك عالغدا.
ورد بتأفف/ طب طرقنا عشان عايزين نسمع المسلسل.
يزن/ ماشي هطرقك يا اختي .
الساعة ٢ الضهر
ورد بتكلم نفسها أنا حاولت أعمل حاجة مفيدة بس هو اللي فقر ومفيش أكلة راضية تظبط، يالا بقى حلوة الفراخ المحروقة دي عشان يبقى يقولي أطبخ تاني…
بتكلمي نفسك…/ قالها يزن
ورد بخضة/ يا عم قولنا مرة خبط قبل ما تدخل البيوت لها حرمة يا جدع، الله
يزن باستغراب/ يا بت اعدلي كلامك، اللي يشوفك يقول جايبك من الشارع، بقولك أيه انتِ متأكدة إنك خريجة صيدلة ؟!
ورد بتلقائية وابتسامة/ طبعا خريجة صيدلة، باين عليا صح…؟!
يزن بسخرية وضحك/ عليا النعمة ما باين خالص
ورد بزعل/ طب يالا اتكل على الله مفيش وكل النهاردة.
يزن بضحك/ خلاص خلاص، وريني عكيتي أيه؟!، قصدي طبختِ أيه يا روح قلبي..
ورد باستغراب/ روح قلبك…!!
يزن بابتسامة/ ونن عيني، وروحي وحياتي
ورد وهي تحدق النظر في يزن/ دا كله…
يزن / إنتِ حياتي كلها يا ورد
ورد بدهشة/ كمان
يزن / طبعا
ورد / قولي إنك اتجوزت عليا…؟!، قول متخافش مش هزعل
يزن وقد انفجر في الضحك/ أه يا بنت المجنونة، اتجوزت عليكِ ازاي وامتى؟!، إذا كنت انا لسه متجوزك من شهرين
ورد/ أنا مش هبلة، إنت كل شوية تتريق عليا والنهاردة جاي تقولي إنك قلبي واونصتي وكبدتي
يزن وهو ما زال يضحك/ مش قادر، إنتِ عقلك ده فيه يوستفندي صح…؟!
ورد / انجز قولي إتجوزت مين؟!، طب أحلى مني..؟!، طب أنا قصرت في أيه…؟!، هو أينعم طبخ مش بطبخ وهدوم وحرقاها، بس إنت عارف إن بعملك أندومي حلو ومحدش يعرف يعمله، قصرت في ايه بقى…؟!
يزن بضحك/ الشهادة لله إنك مش مقصرة في حاجة خالص مالص، سامحني يارب
ورد بعصبية/ طب طلقني حالا بالا فالا…
يزن / قولي إنك عكيتي في الاكل متتكسفيش فبتعملي حجتك بالطلاق…؟!
ورد / أنا، أنا، أنا تقول عليا كدة دا أنا قاعدة من الصبح بتفرج عالمسل…قصدي برنامج الطبخ، أنا اللي طول النهار عمالة باك….، قصدي مكلتش وقاعدة مستنياك عشان ناكل سوى، تتهمني الاتهام الباطل ده..، أنا بستقيل ( وراحت جاية ماشية)
يزن ممسكًا بقفا ورد/ خدي تعالي، رايحة فين وريني هببتي أيه؟!
ورد/ أبدًا يا حبيبي دا أنا عملالك فرخة محروقة، قصدي مشوية
يزن وقد فتح الفرن واتخض من منظر الفرخة/ يا نهار شبه لون الفرخة، دي مش خارجة من الفرن لا، دي خارجة من جهنم، انتِ عملتيها ازاي.
ورد بتبرير/ والله أبدًا دا انا حتى جبت الكرسي والتابلت وكنت بسمع انا وهي مسلسل مرعشلي؟!، الحق عليا إن بدلعها.
يزن بدهشة من أسلوبها / بدلعيها، وبتسمعيها مسلسل، ليه هي الفرخة قالتلك عايزة اسمع الزفت بتاعك، عموما هاتي التاب ؟!
ورد/ عايزه ليه…؟!
يزن بعصبية/ بقولك هاتي التاب؟!
ورد بتهتهة/ طب اخرج من المطبخ وانا أجيبه
يزن باستغراب/ ليه…؟!
ورد /هتخرج ولا لا؟!
يزن/ لا واطلعي بالتاب؟!
ورد/ طب هجيبه بس متتعصبش عليا.
يزن/ ورد…!!التابلت فين؟!
ورد وقد همت بفتح التلاجة وسط اندهاش يزن
ورد / اتفضل
يزن/ لا بريئة يا اخواتي، حاطة التابلت في التلاجة دا انتِ ليلتك مش ظاهر لها لون.
ورد مبررة/ أصل كان سخن فحطيته في التلاجة يبرد؟!
يزن/ ما كنتِ عملتي له كمادات تنزل السخنية؟!
ورد/ نسيت والله
يزن/ برة وممنوع نت النهاردة وتابلت
ورد / طب بلاش النهاردة والنبي، هسمع الحلقة بتاعت النهاردة وابقى اقفل النت
يزن باستغراب/ لا وبرة
ورد / بالله، بالله، دا هيقولها النهاردة بحبك يا سيدتي.
يزن باستغراب/ بحبك يا سيدتي، هو هيقولها كدة
ورد / أه والله
يزن بصوت عالٍ/ برة يا ورد بدل ما والله أكسّر التابلت على دماغ اليوستفندي ده
ورد وهي بتشوح بإيديها/ خلاص يا عم خارجة، يعني هخرج من الجنة.
يتبع ……
لقراءة الفصل الثالث : اضغط هنا
لقراءة باقي فصول الرواية : اضغط هنا
نرشح لك أيضاً رواية العودة إلى الوراء للكاتبة روان ريحان
