رواية حمل ملعون الفصل الثاني 2 بقلم علاء جمال

قربت منها وبصيت تحت السرير ملقتش اي حاجة.دورت في الاوضة كلها مكنش فيه حاجة. البنت دي بيحصل معاها حاجات غريبة أوي وأنا كنت ملاحظة ده من فترة كبيرة. يعني بقت تقعد وحدها كتير مبقتش تهتم بنفسها زي الأول تحت عنيها دائما أسود وضوافيرها طويلة بشكل مقرف وترفض كل العرسان اللي بيتقدم لها حتى من غير ما تشوفهم.

كنت ملاحظة ده كله بس كنت بكدب نفسي بس خلاص مبقاش ينفع لازم أفهم إيه اللي بيحصل معاها ده.

الصبح بعد ما كلهم خرجوا دخلت لها الاوضة وطلبت منها تفهمني كل حاجة بصراحة ومن غير خوف.

بدأت تتكلم وتحكي اللي بيحصل معاها.

-ياماما انا عايشة في عذاب وكنت عايز اتكلم بس مقدرتش أنا بحس بحاجات غريبة .

دايما حاسة إن في حد معايا في الاوضة حد بيلمسني دائما وأنا نايمة وبعد ما بصحى الصبح . بلاقي علامات زرقاء وحمرا موجودة في حتت كتير علي جسمي. وآخر حاجة حسيت بيها ودي كانت أكبر مصيبة هي إني حسيت إني حامل ..

أنا-لالا الموضوع ده ميتسكتش عليه خالص ولازم نشوف حد من اللي بيفهموا في الحاجات دي ونروح له.

دورت والموضوع كان سهل لقيت شخص بالمواصفات دي بسهولة . الشيخ حسان ناس كتير بتشكر فيه وتقول إنه راجل مبروك.

حجزت معاه معاد واخدت البنت ورحتله.

لقيت في ناس كتير عنده . دخلت ومعايا البنت. قلت له اللي بيحصل. ورده خوفني أوي

-ده جن عاشق يامدام ومش هيسيب البنت أبدا

-لا والنبي يا شيخ شوفلنا حل البنت كده هتضيع منى.

-متخافيش كل مشكلة وليها حل احنا هنحاول نطفشة.

-ازاي ياشيخنا.

-بصي إحنا هنديها برفان ريحته وحشة جداً والنوع ده معمول مخصوص للجن هما مش بيستحملوا الريحة دي ابدا. وفي بودرة برضه مخصوصة للجن . هتحط البرقان ده بعد ما تستحمي على طول والبودرة قبل النوم . 

كل يوم تعمل الحاجتين دول وهي هتبقي كويسة وادعيلي .. 

سألته عن موضوع الحمل.

قال إن ده جني مش طفل عادي  ومش هينفع يتولد زي البشر العاديين يعني لازم نعمله إجهاض..

-إجهاض إزاي ياشيخ؟

 بطريقة معينة إحنا بس اللي نعرفها. طقوس مخصصة للحالات دي ومش كل الشيوخ حتى تعرفها ناس قليلين جداً اللي يعرفوا الطريقة دي.

البنت خافت أوي  من الموضوع وبدأت تعرق وتترعش 

وقعدت تحلف لي والنبي يا ماما متخليهوش يعمل كده فيا . أنا هبقى كويسة والله هبقى كويسة بس بلاش موضوع الإجهاض ده أنا خايفة أوي منه. 

 البنت كانت خايفة أوي حتى أنا حسيت بالخوف وقلقت من الموضوع ده.

عشان كده طلبت منه ناخد شوية وقت عشان نستعد للموضوع  وهو وافق بس قال لازم تتعمل العملية دي في أسرع وقت قبل ما يكون في خطورة على حياتها ومحدش يعرف الجن اللي في بطنها ده ممكن يعمل فيها إيه..

اخدنا الحاجات ودفعنا الفلوس ومشينا.

بدأت البنت تنفذ اللي الشيخ قالها عليه دخلت استحمت وحطت من البرقان اللي ادهولنا الشيخ. وخرجت من الحمام والريحة كانت لا تطاق كل اللي في البيت مكانوش طايقين ريحة البنت .

قبل ما تنام كانت بتحط من البودرة بس كانت بتصحى كل يوم جسمها وارم ومليان حبوب من البودرة دي.

الموضوع زاد عن حده جداً وبقي لا يطاق . وفي البيت محدش بقي يطيق يقعد جنب البنت ونفسيتها اتدمرت على الآخر وبقت تحبس نفسها فى اوضتها علي طول..

 رجت للشيخ تاني وحكتله اللي حصل. 

-قالي الطريقة كده مش نافعة . يبقي لازم نجرب طريقة تانية بس لازم تتحملوها عشان صعبة. 

-ايه هي الطريقة دي يا عم حسان؟

-انا هنزلها في مغطس بنستخدمه في الحالات المستعصية دي .بس إنتي مش هتدخلي معاها..

فكرت شوية بس مغطس يعني مياه يعني البنت هتقلع هدومها.. والله أعلم الراجل ده ممكن يعمل فيها إيه..