رواية ظلام الرعد الحلقة الثانية والعشرون 22 بقلم فاطمة عيد

رواية ظلام الرعد الحلقة الثانية والعشرون 22 بقلم فاطمة عيد

رواية ظلام الرعد الحلقة الثانية والعشرون 22 بقلم فاطمة عيد

رواية ظلام الرعد الحلقة الثانية والعشرون 22 بقلم فاطمة عيد

مر اسبوع كاملا دون حدوث أي شئ جديد ..عز قرر أنه لن يتراجع ..أما مازن فلازال يفكر في عرض الجد واعتبر فتره التفكير هي ايضا فرصه لن تتكرر تمادي باخطاءه في تلك الفتره كثيرا بحجه من يعلم قد لا تعود مره اخري فكانت حياته الفاسده تعني الحياة بالنسبه له والان سيودعها رغما عنه لأجل المال …عاد أدهم وورد من السفر لتكون بجانب صديقتها في يوم زفافها وعاد أيضا رعد برفقه كيان بعد انتهاء أعماله ..أما معتز فكان قريب من يقين بدرجه ليست بقليله لكنها لا تعني الكثير…

في منزل يقين…

الاء:-

بت مالك مش علي بعضك ليه

يقين بحزن:-

مكلمنيش ياالاء ولا بينزل الشركه

الاء:-

طب وانتي عايزاه يكلمك ليه

يقين:-

مش عارفه ليه بطمن وهو موجود وببقي عايزه أكلمه ف اي حاجه ..بزعل أما بدخل الشركه والاقيه مش موجود فيها

الاء:-

يبقي وقعتي ومحدش سمي عليكي …يقين احنا ناس علي اد حالنا وده بوصفك لي بس اقدر اقولك مينفعكيش

يقين بثقه:-

انا متعلمه وجميله وعلي خلق وناجحه ف شغلي هو يهمه مستوي اهلي الاجتماعي ف اي هو انا هصرف عليه يعني وانتي عارفه كويس أن شغلي كويس واحنا مستوانا متوسط مش اد المقام ليه بقا

الاء:-

اديكي قولتي متوسط العالي بيحب العالي ياست يقين

يقين:-

تصدقي انا غلطانه اني بتكلم معاكي روحي كملي مذاكره بدل ماانديلك ماما

الاء:-

يكش يتجوزك عشان اخلص منك

يقين:-

لا مالعالي بيحب العالي بقا

خرجت الاء من غرفتها لتفكر الأخري قليلا بكلامها تذكرت هيئته وملابسه باهظه الثمن وسيارته الفاخره لتقول في نفسها:-

مش يمكن الاء معاها حق ..مش يمكن انا قليله ف نظره …طب انا هروح الشركه ولو لقيته مش هكلمه لازم اوقف كل اللي انا فيه ده

في قصر الجبالي…

اجتمعت العائله في الصالون برفقه معتز وعز أيضا ليقول رعد:-

انت اي خلاك تسافر وترجع

معتز:-

انا مسافر تاني النهارده ده حتي يبخت من زار وغار

رعد:-

سواق توكتوك بصحيح

ضحك الجميع ليقول معتز:-

بقولك اي هروح الشغل اظبط كام حاجه وارجع لبيتي وسريري بقا

رعد:-

روح انت انا ف اجازه

معتز:-

ماشي يا عريسنا

سيد:-

ناويين علي امتي ياكيان

كيان بتوتر:-

اخر الاسبوع

رعد:-

متقلقيش كل حاجه جاهزه..وبالمناسبة انا خلصت الڤيلا الجديده ياجدي

سيد:-

علي البركه

داليا:-

يعني اي هتعيش لوحدك معاها

سيد:-

وفيها اي بس ياداليا

داليا بغضب:-

فيها أن مكنش لي لزوم لمكان تاني المكان هنا كبير واحنا مش مقصرين ف حاجه

رعد:-

ياحبيبتي انا مقولتش انك مأثره بس انا عايز مكان يكون خاص بينا ومن وقت للتاني هنيجي نقعد معاكم

كيان:-

لو ده هيضايقك بلاش انا مكنتش اعرف

داليا:-

انتي انسانه خبيثه ساعه ما اتجوزتو قولتي جت فجأه مكنتش اعرف ودلوقتي بتقولي مكنتش اعرف امال مين اختار العفش والحاجه

سيد:-

ماتقومي تضربيها احسن يا داليا …ساعه كتب الكتاب ابنك قبلها مكنش واضح معاها هتعرف منين ودلوقتي برضو هي فعلا متعرفش انا اللي امرت رعد بكده أنه يجيب مكان خاص بيهم وهو حب الفكره

داليا:-

عايز تحرمني من ابني ليه

سيد:-

ماهو جنبك هتروحي وهيجي بس مش دايما والسبب خوفك عليه من تجربه تانيه هيخليكي تدخلي كتير بينهم سيبيهم مع بعض يتخانقو ويتصالحو ويعيشو حياتهم ويتعلمو منها

داليا:-

قصدك اني حشريه كتر خيرك

سيد بغضب:-

داليا هي كلمه واحده رعد هيعيش فالمكان الجديد ومتختبريش صبري اكتر من كده

دلف في ذلك الوقت أدهم برفقه ورد ليقول:-

اي ياجماعه صوتكم عالي ليه

سيد:-

مفيش اي رجعكم بدري

أدهم:-

حكم القوي بقا

——–

-دلف معتز الي الشركه واتجه مباشرةً الي مكتبها ليجدها تنظر بالملف الموجود أمامها ولكنه مغلق..ابتسم علي هيئتها وقال:-

يقين

يقين باقتضاب:-

مش فاضيه

معتز:-

الفايل مقفول اساسا

يقين:-

اصلي خايفه عليه من الحسد

معتز:-

اي البواخه دي بقا

يقين:-

كلمتك واتس تشوف المسدج ومتردش ليه

معتز:-

مأخدتش بالي عادي يعني

يقين:-

صح وتاخد بالك من مسدجاتي ليه انا يادوب موظفه عند شريكك يعتبر شغاله عندك يعني

معتز:-

اي الكلام ده احنا تيم واحد كلنا شغالين مع بعض مش عند بعض

يقين:-

مش عايزه الشغل ده

-نظر الي عينيها التي تجمعت بها بعض الدموع وقال:-

وياتري اي السبب

يقين:-

ميخصكش

معتز:-

عنيكي بتقول أنه يخصني…اقترب منها بدرجه اكبر وهمس في أذنها:-

عنيكي فضحاكي ياحلوه

-ارتجفت وتسارعت دقات قلبها من شده اقترابه وابتعدت عنه بسرعه لكنها لازالت ترتجف لتقول:-

ايوه حبيتك يامعتز معرفش ليه ولا ازاي بس حبيتك عارفه انك متهور عارفه انك مش مثالي بس حبيتك بفكر فيك طول الوقت وانت معايا بحاول اتجنبك واما بتبعد بتمني قربك انا بحبك اوي بس مينفعش

معتز:-

مين قالك بقا أنه مينفعش

يقين:-

محدش قال

معتز:-

انا كمان حاسس بشعور تجاهك لكن مش عارف أفسر ده اي

يقين:-

هو انت بتحس اساسا

معتز:-

لو تبطلي الدبش ده هتبقي قمر…بالمناسبه حدديلي معاد بقا عايز اشرب عليكي شاي

يقين:-

ليه هو انا طربيزه

معتز:-

لا بوريكي اني ابن بلد اوي علي فكره وعارف انتي قولتي مينفعش ليه

يقين:-

مش تفكيري لكن واقع

معتز:-

لا يايقين مش واقع ولا حاجه هعمل اي بمركز اهلك ومستواهم انا اللي يهمني انتي واخلاقك ودول انا واثق منهم ويكفي انك بتحبيني

ابتسمت بخجل وقالت:-

هو انا ممكن امشي دلوقتي

معتز:-

لا مش ممكن عشان انتي وحشتيني

يقين:-

متشكرين يارجوله علي مكتبك بقا

معتز:-

ركزتي اني رفضت انك تروحي وسبتي كلمه وحشتيني

يقين:-

خلاص وانت كمان

معتز:-

انا كمان اي

يقين :-

معتز

معتز:-

قلب معتز

يقين:-

علي مكتبك

معتز:-

النهارده علي مكتبي بكره يبقي علي بيتنا ياعادل بيه

ابتسمت لمزحته وتنهدت بفرحه ولكنها نفضت تلك المشاعر وانتبهت لعملها

يتبع..

لقراءة الحلقة الثالثة والعشرون : اضغط هنا

لقراءة باقي حلقات الرواية : اضغط هنا