رواية كحل عرب الحلقة الحادية والعشرون 21 للكاتبة زينب ماجد
رواية كحل عرب الحلقة الحادية والعشرون 21 للكاتبة زينب ماجد
(مس شيطاني )
وذاك من ذاك اللكة النجمة العزيزة
…. بلا سما ودكّلها عينه
وذاك من ذاك اليحط كلبه على جفه
… ويغسل بآخر نزف وجه المدينة
وبينا بينا
شما تعب لفّ المغازل بينا بينا
وبينا بينا
شما ثكل صوت الهلاهل بينا بينا
(عريان السيد خلف )
هدية : فچيت عيني بثكل ، و النعاس مخدرهن .. عاينت سفرة مفروشة و الخاتون كاعدة اعلى كتر ، و ابوي يناوش ايمان ، و هاي تحط بالسفرة
كمت من مجاني بتعب وانا افرك بوجهي، حجه ابوي : ياله بويه شنهي سالفتج حتى فشلتينا جدام الشيخ و ابنة كومي شمالج ذبيتي روحج ع النوب
– اي بويه كايمة ، بعدني جاي امطن بروحي من النعاس ، دش سرحان و هو شايل طاوة توشوش ، حطها و هو يكول ( و هاي المخلمة الزينة من ايدي )
الخاتون : عاشت ايدك حبيبي
كمت اعلى حيلي بساع و انا اعدل بشيلتي، هو مشى للخاتون و يكومها و يكللها : كعدي يمي انا اوكلنج لا تكعدين اوحيدج
– انا انا اكعد اوكلنها ما عدي شي .
قربها للسفرة و كعدها و انا كعدت يمها ، اجا الشيخ دش و هو يحط الخبز و يكول : كوة لكيت مخبز ، ياله اكعدوا.
كعدوا كلهم ، و ابوي يندسني : روحي غسلي وجهج بويه و تعاي ، عيونج متوثات نوم.
كمت من مجاني بساع وطلعت برا ، يااا شني هاذ البيت جا انا متعجبة بقصر الشيخ طلع هاذ البيت احلى من القصر ، احتاريت وين اتغوسل جا مامش حوض مثلنا ؟
عاينيت هيج مچين بيه حنفية وجوا حوض كزاز ، يمكنه هاذ حوضهم ؟! جا منين افتحنه ؟
حاكم : هديوووووووة ياله بويه شنهي
– اي اي بويه
جا هسه انا وين الكه ماي و اتغوسل ، خل افرن هاي
فريتها ولنه ينزل الماي يا رحمتك ربي زعم اهل بغداد يومين ويوصلون للكمر ، جا مثل حضنا يكطعني البرد ليما اوصل للشط واجيبن ماي.
تغوسلت بسع ورجعت فريتها انصكت ، خب شنهاي جا عودينه ليش ما عدنا هيج .
دشيت داخل، سرحان جويعد يا حلات كعدته
كربيت للخاتون وكعدت ، هو مدنج راسه ورفع عيونه يعايني بيهن ، كضني الرجيف .
ردت اساعد الخاتون حجه هو : اكلي يابه انا جاي اساعدها.
جاي يساعدني الي موش يساعد الخاتون من كونه يريدني اكل بهنا بلايه لهوة، سرح عكلي بخياله و انا اتخايل روحي مرته و جويعدة يمه ويوكلني مثل الخاتون .
ما عرفت احط لگمة بحلكي اعلى كثر ما متوهدنه وانا جريبة منه، واخاف لا احد يهيسني و ابوي و ابوه كاعد من كون كلبي ما يخف دكاته ، هيسيت الكل سمعها .
لف ابوي اخبيزه و خله بيها مخلمة مالت لحم وحطها بيدي : همي روحج بويه خاطر نمش ، اكلي.
– اي بويه
رفعت عيني عليه مدنج ياكل بس اعرفنه باله يمي، اكلت وكمت الكط اللحمات من المخلمة و اكلها ، انا كلش احبن اللحم ومن شفته جثير كمت استكي و اكل
حسيته ضحك و منتبه وياي ، عفت ، عيب يكول عني ما شايفة ، انا شابعة لجن احبنه.
كملينا و تغوسلت مرت الأخرى ولبست عباتي و طلعنا لبيت ابو ايمان ، ندستني و انا بالسيارة صاعدة و شايهة عيني اعلى شوارع بغداد : اكولج هدية
– ها
– انتم هم تشوفون مثلي لو بس اني ؟
– شنشوف ؟
– طنطن
– غصدج الطنطل ، لا خايبة جذب ترا هاي جميرة اول عرسج جيف امي بجت و انهظمت اعلى ابوي كامت سوت بيج هيج و خلت الصخام بوجهه وفزعتج.
– لا اني البارحة شفته
– شخص اسود راسه جبير جان بعيد بس بسرعة اتقرب من عندي ونفخ بوجهي وبعدها محسيت بشي ابد منا للصبح
– من طحتي كعدتي وحجيتي ويا ابوي و ضحكتي شني للصبح
– اني ما اتذكر بس الصبح
– تحجين صگد؟
– اي والنبي شبيج
– ما اعرف خلنا نوصل للعزا مالت ابوج ، و عودينه من نرد نحجي لبوي سالفتج
الشيخة جانت كاعدة يمي ، حجت : شتشوف ؟
سولفت الها ، كالت :السالفة مو خالية امونه بيها شي .
وصلنا غاد ، نزلت الخاتون و انا اعاونها و ايمان كاضه بثياب الخاتون ، دشوا الزلم ليكدام و احنا دشينا داخل، استقبلوا الخاتون بحرارة ، ما جان احد موجود غير جم مرية لابسات فساتين سود .
ظليت مسبله اعليهن .. جا شو مثلنا بالفواتح، احنا نصير دوس مالك محط رجل حتى الما يعرف الميت يجي اعلى الطاري ، ونكضيها صياح و نعي .
خافنهم ما يحبونه ؟
اعاين اعلى ايمان كاعدة بكتر الخاتون و عيونها مدمعة ، لجن ما جنهم اهلها ابد محد كرب ليها و حجه وياها .
حمدت الله و شكرته على ستير من كونه حاط كورة وياي لجن عده طلعات زينه و يحبني و گلبه علي، واهلي يحبوني .
استخطيت ايمان كلش
عرفت ليش هي كاضة بذيال ابوي وما ترضى تهده رغم عيشتنا كلش صعبة موش مثل عيشة اهلها ، طلع محد يهتم لامرها ويضحك الها غير ابوي.
جانت طلعتنا تقريبا وره الظهرية ، و الجو شتا ينزل الغروب مبج ، فشوية و صاحوا اعلينا خاطر نمش كبل الليل .
جاي نكوم لن ايمان تصيح بصوت عالي وطك ابنفسها حيل ، البيت كله تعجب اعلى حالتها، هديت ايد الخاتون و هميت اعليها ، اريدن اكضنها مامش
جنها زيبك تموع من ايدي و تصرخ .
دش زلمه يطلع ازغر من ابوي ، وحدة ندهتهله (لؤي) كرب راد وياي و هي تصرخ بكل صوتها ، سوو درب لبوي و دش و يريدون يسيطرون عليها و يكضون تديها ما جن قوة مرة ، بيها حيل ١٠ زلم
ظليت فاكه حلكي متعجبه و كاضه بالخاتون ، وكف الشيخ وهو يكول : طلعوها خل ناخذها للطبيب
كضها الشيخ و اخوها و ابوي ركضوا بيها للمستشفى ، ظل سرحان كال : هدوة جيبي الخاتون و خلنا نرد .
كضته مرت ابو ايمان كالتله : كبران و صاير شحلاتك ، شلونك شخبارك
– الله يسلمج يابه ، تحت رحمته ان شاءالله ، وضعكم احوالكم شلونها
– الحمد لله نسأل عنك .
– تسأل عنج العافية الله يسلمج .
ردنا نطلع ، حجت وياي : هي ايمان مرت ابوج مو ؟
– اي
– وين كاعدين هسه ؟
– بالسماوة
– شلونها ايمان وياكم ، ابوج راح يخليها لو يطلكها
– لا اسم الله عليش يطلها غير مريته
– ليش هو زواج حقيقي لو بس ورق ، حسب ما عرفنا بس ورق و عايشة ابيت الشيخ ابو سرحان
– لا اتزوجها من زمان و ابيتنا عايشة
ظلت تعاين للبصفها ، حجت الخاتون : وهي تكلي يله هدية ماما
كربيت ليها وحجت ويا المرة: خسرتيها بتصرفاتج ، لو كاسبتها جان هي هسه ابيتج و صايرتلج بنية .
– اني دا اريد اخطبها لأبن اخويه معبالي حاكم ماخذها عروس ، بس ليش وهي بكد بنته ؟
الخاتون: امونه هي الرادته بعد ما شافت بيه الوحيد الواكف وياها و مساندها، حاكم خوش رجال وراح يحفظ امانة الحجي الله يرحمه .
– ويمص بفلوسه هماتين مو ؟
– لو جانت ايمان راضيه ، فلوسهم و هم احرار ، يلا هدوة
جريتها و جاي نطلع و هي ظلت تدرم ورانا ويا جنتها ، كعدتها بصدر السيارة مالت سرحان ووكفت اعدل بعباتي ، اجا هو يرتب بيه و يكعدها عدل
وحجه وهو يهمس جريب مني : امشي نلحك بالبيت نكعد النا ساعة زمان تراني ميت اعلى شوفج .
ضحكت وصعدت بسرعة ، ركب هو وحرك المشوافه (المرايا) الصايرة ليجدام وطلعن بيها عيونه و هو يعاين عليّ .
حجه : افرنكم يو نرد ؟.
الخاتون : لا ماما ارجع تعبانة من الصبح كاعدة دا اريد انام.
– ان شاءالله يمة
مشى وهو يگلب بالراديون و عافه اعلى اذاعة وواحد مدري شيحجي ، بالجية من عبن جنت صاعدة ويا الشيخ شاهت اعيوني اعلى الشوارع لجن بصعدت سرحان ما جن كمت اهيس بالسيارة تمشي ، عيوني و عيونه و مامش احد غيرنا .
جا غير يو اكدر اشيل عيوني عنه
انتبهت و هو يردد ويا الاغنية ( بااااليني بلوة ) اعلى اغنية فوك النخل .
ضحكت، فتح عيونه حيل ورد هز راسه و هو يضحك ، دنجت عنه ، هو كام يردد ويا الغنية ، ليما وصلنا ، نزلنا و احنا نوصل الخاتون لحجرتها .
و طلعنا ، كال : كربي اكعدي هنا
كعدت مكابيله : جنت عايش هنانه ؟
– اي
– كلش حلو البيت
– يو عرسينا ناخذ احلى منه
– وقصر الشيخ
– جا غير يو نعرس ، عسمى اعلى الكمر هم اعيشنج هم ترهم.
ضحكت وانا الفن بروحي بعباتي بردت ، كام هو جاب الصوبه وخلها بالنص ، كال : كربي ادفي هنا
كربيت وكعدت يم الصوبه ، و هو اخذ ادية ، سحبتهم : عليش تخافين مني
– امي ما ترضى
-هي وينها امج ؟
– وان كون ما ترضى احد يكضني دوم توصيني
كعد كبال الصوبه وربع رجليه وهو يدفه ويكلي : اي شتوصيج ؟
– تكلي يو كرب احد منج عايني حدرج و شتشوفين جلمودة حجارة طويبيجة ، ناوشيها و هطريها براسها و لا تخلين احد يكربج عيب
ضحك بصوت عالي ، ظليت اعاين عليه : اي والله شمالك هي تكلي البت مثل الوصلة البيضة النظيفة، اليجيسها يوصخها وما ترد مثل الاول ،لا تخلين احد يجيسج .
ابتسم و هو يكول : كلامها صحيح
حجاها و هو يجر مخدة ، حطها تحت ايده و تمدد ، كمت من مكاني رحت جبتله غطه و اجيت ، كال : ايييي رحم الله والديج .
كعدت كباله : شوكت يردون ؟
– ما اعرف ، هم وين خذوها ما ادري
– انت نعسان ؟
– والله جنت متلهف اردن و اكعد وياج لجن شو وصلت و عيوني تعبن ، من كون ما نايم الليل غير ساعتين و تعب الطريج .
: نام
– ما اريدن اهدنج و انت جدام عيني و انا الما عونيت اكعد جدامج و مفردين ، لجن جنها عيوني خانتني .
يحجي و كامت عيونه يفتحن و يغمضن و يثاوب، رد : هي ايمان شبيها ؟
كمت اسولفله شلون امي سوت وياها اول ما اجت، بنص السالفة و غفا ، ظليت اعاين بيه ، شيصير يو كل ايامي اخلصنها و انا مجابلته هيج ، وعلي ما يكضني مرض ولا يمرني هم ولا شو الاذية شلونها من كون بشوفته عافية .
ظليت اوجد بوجهه جن اريد اترس عيوني بشوفهن و اشبع بس ما ما جاي اشبع ، يمتى و صدك اصيرن مرته
ااااااااااخ .
ظليت مكابلته و كاعدة ، ليما انفج الباب مالت البرا ، كمت من مكاني بساع دشيت بالحجرة النايمة بيها الخاتون ، دخلوا هم و اسمع الشيخ يكله : حطها حطها هنا .
طلعت : ها بويه
– تسودنت هاي مدري شمالها
– شجاها
– مدري ، ويا المغربيةو كبت اعلينا تصارخ نريد نعرف شمالها ما ندري ، اخذناها للمستشفى يكولون حالة نفسية و انطوها ابرة مسكنه.
الشيخ : والله يحاكم علة هالبت موش يم الدكاترة
– جا وين
– من كونها تكول جاي اشوفن هيج و هيج يظهر سالفتها عد السادة
– كصدج كاضها طنطل ؟
– جا مامش غيرها ؟ الا البت جانت مثل الورد اعلى ساعة كبت وتصارخ و ياريت يو تنكض ، ثلث زلام و ما نسيطر.
انا اخذتها للسيد غاد وكال اخذها للنجف من كونها ما اعليها مدري شنهي والله شيخ انا هالسوالف ما اعترف بيها ، بس هالبت سودنتني و ما اعرف شعمل الها .
– باجر غبشه و نطلع للكاظمية و نسعل هلبت سيد يطيح اعلى علتها .
ظليت اعاين ليمان فاقدة و نايمة ، والله مكرودة ، شجاها .
حجه الشيخ : جا سرحان يمتى نام
حجيت : من ردينا بسع نامو هو و الشيخة
حجه ابوي و هو يكول : سويلنا جاي بويه .
رحت اسويلهم
وهم ظلوا حايرين بسالفة ايمان
كعدت ثاني يوم مثل الورد و تسولف انو هي تشوف هيج و هيج و الشيخ و ابوي اندارت روسهم .
لبسوا خاطر ياخذونها للكاظمية
عاين الشيخ اعلى سرحان متمدد و كاعد اعلى الكرويته ، حجه : جا بويه انت راح تظل جويعد بالبيت ما تطلع تشوف المعمل
– كلت العصر اروحن
– لا امش هسه كوم
– عليش
خزره و هو يغمزله : كوم ياله بويه
– امرك بويه
كام لبس بنطرون و قميص ، بس شحلاته طلع افندي
… اخ يكلبي التعذب بيه شيلبس ياخذ عكلي بهدمات العرب يا حلاته و بهدمات الافنديه بعد احلى .
طلعوا كلهم فرد طلعة و ظلينا بس انا و الخاتون كاعدة ما تمل من السوالف اعلى ماضيها و شلون جانت حلوة و هيج اني و هيج اهلي و هيج جنت .
واعتقد هالسالفة جاي اسمعها للمرة الالف .
حاكم : افتر راسي بهالبت ما عرفت شنهي علتها ، بالنهار مثل الورد و بالليل مدري شيجرالها و تنرعص .
اخذتها ويا الشيخ للكاظميه و ظلينا ننشد .
ليما دلونا اعلى شيخ يفتهم بهالسوالف ، دشينا اعليه ، قرأ اعليها وظل موجد بديها كامن اديها يتراجفن و هي كاعدة
حجه : البت دايسة
– يعني شنهو
– البنية عدها مس شيطاني و دايسة عليه ، و متأذيه حيل ، كتلي بس المغرب تسوء حالتها مو ؟
– اي والله شيخ
اندار عليها و كال الها : شتشوفين ؟
ظلت تسولف اله ، و هو يكلللها هيج و هيج شكله و هي تكله اي ، ظليت انا متسودن و علي : شنهي معقوله ؟
ردت حجت : مو بس اني دا اشوف
– هااا يعني اكو بالبيت غيرج جاي يشوف
– اي ستار ابن زوجي هم كال اني اسمع ناس يحجون، اني هماتين مرات اسمعهم ، و يسمع صوت شخص يمشي وراه
حاكم :شنهي السالفة ترا ستار يتكشمر هاذ دايح وين شايف وسامع ، جذاب
الشيخ : لا تجذب احد و كلي ان جان اكو غير هالبنية شايفه معناها السبب ابيتك مو بالبنية
– كول يالله شيخ بيتنا راح يقبطلنا ال١٨ سنة و احنا جويعدين بيه لا فد يوم سمعنا ولا شفنا بيه
– مالك غرض شكد عايش بيه ، اتاكد من اهل بيتك ان جانو شايفين صكد معناها البيت مسكون
حاكم : ضحكت مدري اصدك مدري لاله ؤ شنهي بيتي مسكون بالله هالسالفة منين طلعتلي .
هسه كلي شيخنا شنهي الحل
– البنية يحتاج الها اكثر من جلسة ، تكعدها هنا كدامي و اقرأ عليها الرقية وبالممارسة شوية شوية يفك عنها المس
انطاني بخور و صابون ركي قرا عليهن و كال هاي : عاي الصابونه تغسل بيها و البخور تشعله وقت المغرب ، و تحط القران و تكعد تقرأ البقرة و يس و هاذ الدعاء .
انطاني الدعاء و حجه : وكت المغربية راح ترجع عدها الحالة بس سيطر عليها بقراءة القرأن من قبل دخول المغرب كون دخول المغرب هو وقت نزول الشياطين ، الغنا لا تحطه ابيتك يجمع الشياطين ويبعد ملايكة الرحمن دير بالك دير بالك من الصياح و البجي وكت المغرب هاذ اكثر ما يجذب الشياطين ، خفضوا اصواتكم خفضوا حركتكم ، اشغلوا ارواحكم بالقرأن ، ولا تخلي حس القران يفارك البيت وكت المغرب ، هو زين بكل وكت لجن ساعة المغرب اهم شي.
لو انتم ابغداد جان تميت الها الجلسات لكن هاي الوصايا لإن انت دربك بعيد فألتزم بيها .
اخذت الوصايا منا وردينا العصر ، توني جاي اشرب الجاي ولن اعاينها بدت البت ترجف : خايبة راح يكضني الرجيف من وراج
هديت الجاي و كمت اخذت القران ، بس انا ما اقرأ القرأن عدل ، مو كل الكلمات الفظنها عدل ، صعبت اعليه ، كتله : خايب سرحان كرب اقرأ القران بمجاني
اخذ القرأن و هي كامت تصيح : لا تقرأ وخره منيييييييي
سرحان جفل : شمالها
– خايب كاضها ابو عبيد ، اقرأ ومالك غرض
بدا سرحان (الم ذلك الكتاب لا ريب فيه هدى للمتقين ) وكامت ايمان تصرخ و تكض بحاكم : طلعه مني طلع ما ارييييييده ما ارررررررريده
حاكم ” اعوذ بالله من الشيطان الرجيم ، بس معدي بويه
كامت تضرب و توخر عنهم و تصرخ : وخرووووو مني وخروووووا
وتكض بجسمها و تصرخ كأنوا واحد وجاي يضربها و تلفلف بروحها
سرحان كلساع ويجفلومن تحاول تهد عليه : شني بيها شي ابو ستار
– كمل يمعود لا تكطع
الشيخ : كمل كمل
سرحان : حسيت البت مو طبيعية و انا جاي اقرأ القران راسي ثكل ، خفت حسيت السالفة بيها شي ، من كون انا صكد ما اخافن احد لجن السالفة يو صارت بيها جن اكوم ارعد .
استمريت اقرا القران و هي تصرخ و كاضينها عني ، انفلتت منهو وضربت ايدي دفعت القران عني بساع خاطر اشيل كتاب الله و كضتني من راسي حيل و تصيح : اكتلكككككككككككككك
– خايبة شتكتليني دهدي راسي
وتجر براسي عيوني انطن صارن عيون ياباني، غير اريد افكنها ، حاكم و ابوي كاضها و هدوة تبجي بالزاوية
هدية تلت : قلو اعوذ برب الفلق من شر ما خلق
اندارت راسها و هي تصرخ عليها : اسكتييييييييي
وهدت راسي كضها حاكم و هي تصيح : عوووووووووفني
شبكها بأثنين اديه و صرخ : سرحان اقرأ .
كضيت القرأن اريد اقرا حرف، اعضاي كامت تتراجف كملت و مربطها بأديه
ظليت اقرا اقرا اقرا .. بدت تهدأ و تسكن ، الى ان طاحت مغمى عليها : هدية عباااااايبة بساع
شالها حاكم و انا اركض كبله و الشيخ يلبس ، هدية جابت العباية و تكله : بويه لا تعوفني اخافن وعلي .
– دكعدي بووووويه هلني اشوف هالمصيبة الطاحت اعلى راسي
اخذناها وطلعنا للمستشفى .
هدية : كمت ابجي بمكاني و كاضة بالخاتون ، و الخاتون خايفة اكثر مني، و هي تكلي : جيبي القران اقري
– ما اعرف اقرا
– لعد خل نقرا اني وياج الايات اللي حافظيهة
كمنا نردد المعوذات اثنينه ، بس كلبي اهيسنه غده فلين من الخوف
شوية و جابوها و نوموها بالغرفة و شغل البخور يمها و فتح القرأن و هي نامت سكنت .
– بويه هسه شني
– انا ادري يا بويه جا انا امثل الكوة كبالكم لجن انا هم اتضعضع جدام هالامور ، وان جنت ما اصدكها لجن من هيسيتها جدام عيني مدري شصابني
سرحان : انا ثكل راسي و اقرا القران اريد اميز حرف عن حرف ما عدت ، و هي تصارخ توهدنت
الشيخ : البت يو ظلت اعلى هالحالة تموت ، لزوم باجر نرد لهلنا نعوف الاهل غاد و نطلع للنجف ويا ما وصاك السيد
– جا هي بعد ما منها ، لزوم اخذها للنجف
هديه : بويه انا خايفة
– كربي بويه لا تخافين
حضنها و كعد حط عليها القبوط و الشيخ تمدد يسولف و سرحان كاعد ، حجه الشيخ : ما تكوم تسويلنا استكين جاي
– كومي بويه
هديه : بويه و علي اخافن
الشيخ : سرحان بويه انت كوم
– جا احنا اسمنه جايبين نسوان ويانا، اكومن اخيرلي .
كام حاكم ويا سرحان ، و انا ظليت متلتفله بقبوط ابوي و كاعدة بمچانة، و اعاين بزوايه الحجرة وواوجد بيهن هلبت الكف طنطل واكف .
لجن ما شفت .
اندار الشيخ يعاين علي ، لفيت وجهي ضحك : لا تخافين بويه ما بيه شي لجن هيسيتج ترجفين
– شيخ يعني بعد ما اطيب ايمان
– لا يابه ما بيها شي لا تخافين باجر ناخذها و نرد مثل اول.
جابو جاي صينية بيها حميسة و كاسة مالت شكر و استكاين جلي وكعدوا ، كعد الشيخ بعد ما جان مجطول : ايييي زين ما سويتو كطعنا الجوع .
حاكم : تاكلين بويه
-لا ، بس شلون انامن انا نعسانة
سرحان : والله مكرودة شبعت خوف
اندار الشيخ يحجي ويا الخاتون و ابوي ياكل ، و سرحان عين بالكل و عين اعليه ، و انا. اعلى كعدتي ، غفيت ، لكيت ابوي مغطيني و منومني بمجاني
شلت راسي الدنسا ظلمة : يمه دخيلج يالزهرة ، وين ابوي ؟
كمت اعلى حيلي ، توني مشيت عثرت ودست ابطن ابوي : ها ها ياااااااااهو
– شني بويه و انا ادور اعليك
– يمج يابويه دنامي جفلتيتي
– بويه الليل كله اتحلم بالطنطل ما اتهنى بنومتي
– والله تريدين الصدك يابويه جنت احلم بيه و دستي ابطني ، كلت جاني .
ضحكت : جا بويه هسه شلون ؟
– والله يا بويه حيرة وعلي شسوي ما ادري
جاي نحجي ، و تطلع ايمان ، فزيت من مكاني و صرخت : اجت بويه اجت
فز هو من مجانه : ها بويه
– اخاف
– ما دامها تخاف هاي ايمان ، تعاي بويه
طلع سرحان : هااا، فزيت اعلى صريخ هدوة
– لا خافت عدالها ايمان بيها شي، بيش الساعة ؟
– بالأربعة وربع
– هم ياله نهم نفسنا نطلع لأهلنا .
سرحان : خل يكعد الشيخ و الخاتون و اعلى راحتنا نطلع
– والله يا سرحان جن لعبت نفسي
حجاها و هو يكوم يطلع برا ، تبعته ايمان ، عاين علي : اصباح الخير يهدوة
ابتسمت اله : جنت اظنن هالجية مامش احلى منها لجن تاليها بكنا هوى من ورا طنطال ايمان
ضحك : كافي كعدت و نمت و انا وياج تحت سكف واحد ، جن انامن مرتاح و اهيس كل هلي حذاي.
دنجيت و انا مستحية و هو يعاين مبتسم، شاف ابوي كرب ، لف ومشى غاد لحجرته .
– ها بويه
– شوفي بويه كبل لا نرد خلني اكللج شي، ايمان تراها حامل ، امس وكت الحللنا الها تبين بالتحليل حامل ، عينج اعليها لجن لا تكليل لمج اعلى الخبر من كونها أتضايك .
ظليت صافنه بوجهه : جا بويه حبله والطنطل كاضها
– جا حظها هاذ بعد بويه ، هسه نمش نرد غاد و ناخذها انا و الشيخ للنجف و ازورها الامام و طالبها من علي من ابي طالب بجاهه عد الله اليفك هالطلابة هاي.
-ان شالله بويه
– ياله بويه حضريلنا الريوك عيب من ابن الشيخ صارله يومين هو اليطيخ ويجيب جيتجن ضر بلا نفع ، كومي خدري الجاي و حضري صينية الريوك ، ياله ايمان انت وياها
مشت وياي و انا اخافن اتكرب اعليه حجت : اني التهيت ونسيت اسألج انت وسرحان هم حجيتو ؟
– عليج العباس هاي انت تحجين يو الطنطل مالج
– لا عفيه اخاف لتكولين اسمه والله اخاف
– انت التخافين جا يو تشوفين العملتي بحالنا تمس شتكولين
-شسويت ؟
– دكول شسويت ، غير بللنا ارواحنا من الخوف
– لويش
– خايبة ايمان سكتي عني حاطة العباس عليج ، كافي علي رجيف امس، فكي عني .
ضاجت من حجيت وياها هيج ، طلعت و انا ظليت احضر بالريوك ، خاب كوني اكضي عمري هنا ، جا شحلات البيت و المطبخ يهرش يسودن .
– هدوة
جفلت : امش منا لا يشوفك ابوي
– ابوج برا
– اي اي امش منا فدوة لا احد يلكفك
– عليش يلكفوني بايك ناهب؟
تبسمت ، حجه : اخا جا هو انا عليش جاي و علي بس اريدن اشوفن هالضحكة هاي ولج ولا املنها مدري شمالني .
الشيخ : اححم
جفلنا اثنينا ، حجه سرحان : ها ، نحضر ارواحنا مو ؟
اشرله براسه، مشى وياه : ها بويه ؟
– ان جنت تظن امشي الماي من جواي تكون غلطان يسرحان بويه
– عليش
– تفهمني عليش
حجاها و مشى ، ظليت اعاين وراه ، تنهدت ورديت اعاين للمطبخ ومشيت طلعت برا يم حاكم كاعد يشرب جكاير.
– ها ابو ستار
– يمتى نمش ؟
– ساعة و نطلع ان شاءالله ، لا يظل بالك اعلى المرة ان شالله تاخذها للنجف و تلكالها حل.
– ان شاءالله يسرحان ان شاءالله
– بس هي ليش بس وكت المغرب و باكي الساعات ما بيها شي؟
-والله ما ادري الشيخ كال وكت الغروب اقرا القران .
– الله كريم .
كعدنا شوية اكلنالنا لكمة و طلعنا للسماوة ، ٤ ساعات وصلنا اهلنا ، نزلنا هدوة و الخاتون اعلى القصر واخذنا ايمان و طلعنا للنجف .
وصلنا غاد … نزلنا عد الامام علي انا و الشيخ و ايمان صلينا و زرنا و كضيت الشباج مسحته و مسحت اعلى وجه ايمان و ووكف ( ها يا علي دخيلي وحقك تعبت من ساعة الاخذتها و انا معلعل امانة الله وما اكدر افرط بيها ولا بيه حمل اشيلن بعد شافيها و عافيها برايتك احنا )
وخليت ايمان تمسح بالشباج و تعاين داخل الضريح مالت الامام ، شمرت بالشباج فلوس و كلت اله يمك يداحي الباب .
طلعنا سألنا الكيم مالت الأمام اعلى اسم السيد الجايين علي ، وصفه النا بيته يصير جريب من المكبره .
اخذنا البت ومشيناله .
دخلنا عده االيت جنه بيت طين ومعكود اعكادة
دشينا : السلام عليكم
– و عليكم السلام و رحمة الله وبركاته
– والله بويه جيناك عنوة من السماوة و كالو دوا هالبت يمك
عاين الها و كال : هسه تذكرتو وجبتوها ؟
الشيخ : جا ما صارلها اعلى حالتها وكت
– لا صارلها اكثر من شهر ، مو صح
حجه ويا ايمان ، جاوبته : اي
كام يوصفلها .. هيج شايفة انت ، سمعت شفتي
وبقى يحجي وياها و هي تجاوبه
الى ان شويه و البت كامت ترجف ، كال: هدوها و اطلعوا
كام الشيخ و حاكم ظلوا واكفين بالباب : جا شيخ احنا شنعرف عنه و اهد مرتي يمه
– جا شبيدنا البت راح تروح من ادينا
– ويو طلع جذاب
– ما اظن من كون حتى بالامام يعرفون ؤ يو جذاب ما وصونا بيه
سمعت حس ايمان كامت تصرخ ، فتحت الياب وردت ادخل ، صاح : اطللللللع
طلعت بساع وظليت واكف باباب و اتحرمص ، شلون ربي ، ها يا علي بكاعك انا لا تخليني حاير و كلبي موجر دخيلك .
الشيخ : اهدى كول يا الله
– جا ما تسمع صريخها شيخ
– من كون الها علاج كول يا الله
صاح السيد ، دخلنا : ها مولاي
انطاني علكه عكود ، كال : هاذ العلك ما ينفك العكد ماله ، و هاذ الحرز ما ينشال عنها .
– سيد يعني تتشافى ؟
– هسه ما نعرف تتشافى لو لا كل سبت تجيبها نعيد عليها ، بس بيت لا تظل بيه ، شيل بأسرع وكت
– عليش
– مثبتين ابيتك اعلى نجاسة و عضم ميت ، وما يطلعون من بيتك الا اطلع المحفور ابيتك
– محفور شنهي سيد
– اكو عظم مالت ميت معكود اعلى نجاسة و مدفون ابيتك و بيتك صاير مرتع الهم ، لو ظليت بيه مو بس تفقد هاي البت ، عيال بيتك كلهم يتسودنون ، الأساس هو البيت شيل منه .
– سيد و علي سنين عايشين بيه حرام يو شفنا هيج شي
– انا العلي اكللك ، بيتك شيل من عده ، مسكون و ما تكدر تفك من الا تحفره من الأساس و تبني جديد، و البت هاي كل خميس عدي والا ما اضمنلك سلامتها .
ظليت اعاين اعلى الشيخ : شيل جا بعد احسن ما يتسودنون عيالك
– ابوك منين اجيب يا شيخ و انا كاعد من الشغل صارلي فوك الشهر
– خل نطلع و انا احجي وياك .
اخذنا ايمان كوة شلناها جنها جنازة خليناها بالسيارة و طلعنا لسماوة .
الشيخ : خايب انت موش وصي اعلى ورثها ؟
– جا حك باطل امدن ايدي اعليه و اخذ
– ما بيها شي و من يصير عدك سدد و رد دينها لجن انقذ مريتك و اهل بيتك من هاي الطركاعة .
– والله ما ادري يا شيخ، مدري اشوفن
….
هدية نزلنا و سرحان طلع ما نزل ويانا للقصر
مشيت الخاتون لحجرتها ، كعدت و صبيحة تلكتها ، اجت سليمة : هدية
– هااا
– الشيخة رايدتج
– اي
مشيت ليها : امرج شيخة
– وين رحتو غاد
– والله شيخة ابتلينا بمرت ابوي كضها طنطل و وكت الغروب تهد اعلينا
– يااااه ، صكد تحجين يو تشافين
– لا و علي شيخة ما متشاقية لجن رادت توكف كلوبنا ، عاد وصلونا ليجاي ورد ابوي و الشيخ طلعو بيها للنجف
– يا هيج صاير
– اي والله
-سرحان غاد هم حجه ويا الشيخ
– عليش؟
– انا جاي انشدنج
– ما مسمعتهم ادولبنا بمرت ابوي ، حتى تفاشلنا ويا اهلها من وراها
– اييي ، يلا تكدرين تكملين شغلج
مشيت و مشت وياي سليمة : شلونها الروحة
– ما بيها شي
– ترا سرحان كلشي حاجيلي و دومه يسرني و اعرف بكلبه رايدج
– اششش لا تكولين هيج لا تسمعج امي، مامش هيج علوم
– الا اكو ، و انا اعرف بكلبج يحبه
– لا ما عدي شي وياه
– خايبة لا تضيعينه من اديج من كون يو راح الشيخ هو اليصير الشيخ و يورث هالقصر و تصيرين انت بمجان الشيخة ملوك تنهين و تامرين .
– امي اتصيح علي
مشيت عنها و انا افكر بكلامها : يصير الشيخ !!
جا هو هسه و شحلاته ، يو صار الشيخ شيصير
جاي امشي ، و تلكتني راديون سحبتني : هااا
– تعاي خل اكللج
– شنعي
-امش التكيت خنجر
– اي ؟
– وكضيتها وياه
حجتها و دنكت تبجي
– يا شمالج
-نهيت علاكتي وياه و فضيتها لجن كلبي موش راشي يقنع يهدوة نار و شابه بيه
– جا غير افتهم شصار ؟
-هدوة خنجر ما يتوب من شغل الخاوات و انا بت شيخ ويو كطعت روحي اعرف محد يطيني اله عليش اظل موهدنه روحي وياه ، امس شفته و كلت اله انا راح اطي موافكتي لواحد من ولد عمي و انت ظل بشغل الخاوات و ابعد عني ما اريد اشوفنك بعد
– و شسوا ؟
– ظل يترجاني اسمعنه ، لجن ما رضيت هديته و رديت
– عليش هيج استعجلتي
– امي الخلتني اروحن
– امج تدري ؟
– اي تدري و هي الكالتلي هيج تكليله و نهيتها وياه بس كلبي ظال يتكطع يهدوة راح اموتن
حجتها و هي تحضني و تبجي ، بجيت وياها من كونها كسرت خاطري .
سرحان : دشيت للمضيف لكيت ازناد كاعد اعلى راس الديوان
الله بالخير
– الله بالخير و العافية بشر خلص هالعزا العرس ويا عرسي
-خلص ، لجن انت اسمعت مامش عرس الا بعد الاربعين
– جا اهم شي عد ابوي الخاتون
– ابوي راعي اصول موش شيخ دغش و يدور طربكة و نسوان بحجة الدين
– شكصدك يخوي
– الفطنة شمرة ان ما حويتها لا تعد بروحك اعلى المشايخ .
حجيتها و كمت و هو اغتاض حجه انا تجاهلته و طلعت ، طلع حميد بوجهي : هلا بويه
– هلا يابه
– جا خنجر وينه
– ما اعرف شماله من امس وهو ما يهد هالسم من ايده
– يشرب
– الا من امس سكران ومدري شيخربط بالحجي
– شجراله
– والله ما اعرف هالولد مدنس راسي و مفشلني اعلى يوم اكتب بيه سند و اتنازل عنه و عن خوته
– كول يا الله ،انا رايح ادورنه
اخذت حصاني و طلعت اطربك بالديرة ، وصلت الجوا اطراف السلف لكيته كاعد و بطله بيده : ها شنهي ؟
– هدني سرحان بروح اهلك
– خايب شمالك
– بين نار موجرة يو اكبر بحر ما يطفيها
حجها و دمعت عيونه : اها عليش تبجي ؟
– هدني سرحان
– انا اخيك يو موش اخيك
اندار يعايني : من كوني اخيك تكدر تشغلني بشغله شريفة ؟
– الشغل همك
هز راسه و اخذ البطل يشرب بقوة ، جريته منه : دبسك بس ، شچلبت
شلته و ذبيته غاد : لا توني مشتري
– عوينة ابيه ، احجسلي شنهي علتك
– علتي ما تنحجي و يو سكتت عنها يطكني القهر و اموتن
– عليش
– اذا انا صكد اخيك شغلني
– جريب ابدي ابني المعمل ، و اشغلك بيه و اريدنك وياي
كام اعلى حيله : و علي اشتغل شغل المطي بس شغلني سرحان دخيلك اني
– دكعد اكعد ولا تجيب علي اعلى السانك هي سكران ، بس ما اشغلنك يا ما عرفت شنهي علتك ؟ .
حاكم : دشينا كبل المغرب ، و انا حاير حيرة بهالبيت ، جذب يو صكد مسكون ، جا انا موش وياهم عليش ما اشوقن بس ايمان، شنهي السالفة و علي افتر راسي
كعدت ايمان ، و اجت يسرى : ها عمي شلونك
– هلا بويه شنهي ما شنهي
– اعلى حطت ايدك مامش علوم ، لجن بالنا يمكم امونه شلونها
– والله شكلج يابويه كون اصدك خاطر احجي سالفة ما تخش بعكل ابن ادم
– عليش
– عوفي الليل و جيبيلي الرايدون البالغرفة خل اشغلنه .
كامت من مكانها ، وايمان كعدت : راسي يوجعني
– ارتاحي بويه
جابت ايمان الراديون و هي تعاين على ايمان
حط كاسيت سورة البقرة و شغله بالمسجل ، يسرى دشت جوا و ايمان هودت … دش ستار : ها الله يساعدك بويه
– هلا بيك ، ما توج هاذ البخور يرحم اهلك
– شنهي السالفة
حجه حاكم السالفة لستار ، كعد ستار : بويه صكد مسكون موش جذب
– جا بس انت و هاي تشوفون ، احنا شمالنا ما نشوف
ادشت ام حاكم و جمرة وياها جانن مسيرات ، و كعدن سمعن حاكم و هو يصيح من هالسالفة حجت : يمه موس بس ستار ، انا هم جن كمت اهيس اشياء موش بمكانها
– شلون
– ما اريد احجي شنهي شفت لجن يمه صكد البيت موش الاولي، خلنا نشيل منه و نخلص ارواحنا
جمارة : بويه انا شفت جاهل ورا البيت
– والله يا بويه يا جميره كلها منج طلعت هالسالفة
-لا بويه وعلي انا مالي غرض انا ما دخلت الجاهل للبيت هو لكيته وحده .
دشت كواغد و هديه : ها الله يساعدك
-شيساعد مني يكواغد
– ها
سولف الها وكل واحد كام يحجي ، انا هيج شايف و انا هيج شايف ، حتى كواغد كالت انا اهيس اكو شي بالبيت بيتي موش الاولي .
حاكم جا طلعتوا كلكم شايفن ، بس يسرى وين ؟
ستار : بويه الحجي بيني و بينك مرتي انا هم كمت اخافن منها
– عليش
– اشوفن شوفات بيها موش مال الله
– خايب شتشوف
– تجيها حالات ادشن اعليها الاكيها تحجي وحيدها و ما اعرف شتحجي لجن الوجه ساعتها ينطن بلون العباية
من اكضنتها جن تنتفض و اهيس تريد تكب اعليه و ترد لحالتها
عاين على كواغد : ولكم خافنها مثل حالة ايمان ؟
جاي يحجي وصرخت يسرى بكل علو حسها ……
يتبع …
