رواية ملجئي الفصل الأول 1 بقلم نانسي محمد
 |
| رواية ملجئي الفصل الأول 1 بقلم نانسي محمد |
رواية ملجئي الفصل الأول 1 بقلم نانسي محمد
-بس دا الشغل اللي موجود دلوقتي عايزاه ولا تتفضلي تروحي؟
=خدامه؟ انا ..انا محتاجه الشغل صدقني مفيش حاجه تانيه؟
-يا انسه والله مفيش خالص
فكرت ف اني لو مشيت يبقا هرجع للمكان المقرف دا تاني من اول وجديد ومعامله الناس دي تاني….
=موافقه
بحر اسمي بحر فتحت عيني لقيت نفسي متربيه وسط اطفال كتير زي في ملجأ لا يصلح للحياه الادميه لكن عايشين فيه وسط مشرفين وحوش مشيت منه بعد ماكملت ال٢٠ سنه علشان ادور علي شغل او بمعني اصح ‘هربت’
=صباح الخير
-صباح الخير يابحر جاهزه؟
خدت نفس عميق بصيت للسما وبصيت للراجل اللي قدامي
=جاهزه
-طيب يلا بينا يابحر
ركبت معاه العربيه وروحنا للفيلا اللي….اللي هخدم فيها نزلت وفتحت لينا ست كبيره بكرسي متحرك ظاهر علي وشها الهدوء واللطف
-صباح الخير يا امينه هانم
-صباح النور ياخيري جبت البنوته؟
-ايوا البنت الخدامه الجديده اهي
-ماقولتلك بلاش خدامه دي اسمها ايه
=بحر
-اسمك جميل يابحر جميل زيك
=ربنا يخليكي ياهانم
-تعالي يابحر ادخلي
-استاذن انا ياهانم
-ماشي ياخيري اتفضل وهبعتلك فلوسك مع السواق
دخلت الفيلا قد الملجأ اللي كنت عايشه فيه مرتين والعفش الانتيكه
-عجبك
=ها…اسفه سرحت
-اسفه ليه بس تعالي يابحر اقعدي نتكلم
قعدت علي الكرسي قصادها بصتلي ب ابتسامه ريحتني
-بصي ياستي انا عايزه اقولك من الاول ان الشغل هنا مش متعب ابدا خفيف جدا لان مش عايش معايا غير سليم حفيدي وشغلك كوم وسليم دا كوم تاني كل الي جم قبلك مشيو بسببه لانه عصبي شويتين فا لو في اي مشكله تقدري تمشي مش همنعك ابدا
=لا لا امشي ايه انا….انا هستحمل اي حاجه تحصل بس بلاش امشي
-طيب اهدي بس انا مقولتش همشيكي يابنتي انا بقول دا اختيارك انتي
=لا لا مش همشي ياست هانم باذن الله
-انتي دخلتي قلبي يابحر وشكلك هتفضلي معايا باذن الله
=الله يكرم اصلك ياهانم
-بلاش هانم دي يابحر قوليلي ياست امينه وبس
=عنيا ياست امينه اعمل حاجه تشربيها؟
-بتعرفي تعملي قهوه؟
=جربيني
-هههه ماشي يابحر يلا المطبخ علي ايدك اليمين اخر الطرقه
روحت المطبخ و وقفت احضر القهوه وكنت مرتاحه لست امينه اوي انسانه طيبه ومش متعاليه عليا وكنت حاسه اني لقيت بيت يلمني اخيرا ببص لقيت حد طويل واقف جمبي بيقلب في الدرج
=هااا بسم الله الرحمن الرحيم انت مين
-انت! اسمها انت! انتي الشغاله الجديده؟
=ايوا
-انا استاذ سليم اعمليلي قهوه وهاتيها علي الاوضه فوق وبسرعه سامعه
=حاضر
ايه الانسان البايظ دا ياختي يوه يشخط وينطر من اول ماشاف وشي ليها حق ست امينه تقولي مش هتستحملي بس علي مين انا ماسكه في هنا ب ايدي وسناني….خلصت القهوه وطلعت اوديها خبط علي الباب محدش رد فتحت الباب بشويش مالقتهوش دخلت احطها عا المكتب اللي في الاوضه لقيته طالع من الحمام ولابس بنطلون بيجامه وفوطه علي رقبته…
=يالهوي يالهوي
-خدي هنا رايحه فين يازفته انتي شوفتي عفريت
=مايصحش يابيه استر نفسك الله لايسيئك
-استر نفسي اي يامتخلفه مانا لابس اهو
=يابيه طب القهوه اهي عا المكتب عن اذنك انا بقا
-استني
قرب من القهوه شرب منها شويه وتفها
-ايه القرف دا
=نعم ياخويا قرف؟ قهوتي انا قرف؟
قرب مني ومسك ايدي جامد
-ازاي تكلميني كدا
=انا..انا اسفه يابيه والله ماقصد
شديت ايدي وجريت نزلت علي تحت يخربيته هو هيفضل يعاملني كدا ولا ايه يالهوي عليا
-ايه يابحر شكلك قابلتي سليم
=اه ياست امينه
-ضايقك؟
=ها..لا ابدا
-وانا هضايقها اعملها ايه ومين اصلا علشان اضايقها
=يالي تنشك انت
-بتقولي حاجه؟
=الغدا…تتغدو ايه؟
ست امينه ضحكت وخدتني من ايدي ورحنا المطبخ
-هو طيب والله وغلبان فوق ماتتخيلي بس موت امه مأثر عليه اتمني ماتزعليش
=العين ماتعلاش علي الحاجب ياست امينه انا مين علشان ازعل علي راي سي الاستاذ سليم انا يادوب حته شغاله جايه تاكل عيش هنا وبس لا ليا حق ازعل ولا اتضايق
-ازاي بس تقولي كدا انتي بتفكريني ببنتي الله يرحمها ام سليم وفيكي شبه منها وارتحتلك ودخلتي قلبي اوعي تقولي الكلام دا تاني سليم دبش وهتاخدي علي دبشه يابحر
=ياست امينه اخد او لا مش هتفرق انا بس عايزه استأذنك في حاجه لو يعني مفيهاش مشاكل
-قولي طبعا
=انا في الملجأ خدت دبلوم تجاره وكان نفسي اكمل تعليم لكن محصلش نصيب وقتها انا حابه اخد كورسات تفيد دراستي وهقدم عليها ومحتاجه من كل اسبوع يومين اخرج فيهم ساعتين بس ممكن؟
-يابحر انا مش هستعبدك انتي ليكي كامل الحريه تخرجي يابنتي في اي وقت بس غريبه خيري مقاليش انك كنتي في ملجأ ابدا
=ربنا بخليكي يارب ياست امينه يارب، اه دي حكايه طويله نحكوها بعدين هقوم احضر انا بقا الغدا
-طيب اسالي سليم يتغدا ايه
=ها ح حاضر
روحت متردده اخبط عليه اللي مسحوب من لسانه دا
-مين
=انا يا سي الاستاذ
-ادخلي
=الست امينه بتقولك تاكل ايه
-اي حاجه
=ايوا زي ايه
-ماقولت اي حاجه يازفته
=زفته؟
-لايكون مش عاجبك
بصتله بقرف وكنت لسه هرد عليه افتكرت اني محتاجه الشغل علشان دراستي
=عاجبني، عن اذنك
قفلت الباب ونزلت ابتديت احضر الاكل وخلصت وروحت اعرف الست امينه
=الاكل جاهز
-بجد؟ اي السرعه دي ماشاء الله طب اندهي لسليم
=حاضر
-انا نزلت يانانا خلاص
نانا؟ شحط زيك بيقول نانا يادي الخيبه
-اكلك حلو بقا ولا زيك
-عيب ياسليم بقا الاسلوب دا بطله
-وانا قولت حاجه
اه يابغل انت يالي هتفقع مرارتي ربنا يصبرني عليك
حطيت الاكل قصادهم ولسه همشي
-اي داااااا قلقاس انا مبحبهوش
خدت نفس كبير ولفتله
=انا جيت خبط علي سيادتك الصبح وسالتك تاكل ايه صح
-اه
=وكان رد حضرتك عليا اي حاجه صح
-اه
=ولما اكدت عليك تاني زعقت فيا وقولتلي اي حاجه تاني صح
-اه
=طب و دي ال اي حاجه اللي انا عملتها بالهنا والشفا
سيبته بيشيط وست امينه بتضحك وجريت علي المطبخ
-البنت دي تمشي فورا
-لا مقدرش امشيها لما الاقي غيرها ابقا امشيها كل وانت ساكت
-بقا كدا…ماشي انا همشيها بمعرفتي
سمعت كلامه قلبي دب فيه الخوف من اللي ممكن يعمله الشراني دا
=صباح الخير ياست امينه
-صباح النور يابحر ها رايحه فين دلوقتي
=هبتدي كورس الانجليزي باذن الله
-ربنا يوفقك يارب خلي بالك من نفسك
=الله يخليكي..انا خلصت الاكل وجاهز وباذن الله مش هتاخر
-ماشي يلا ربنا معاكي
طلعت ركبت العربيه ست امينه قالت للسواق يوصلني كتر خيرها وانا معرفش حاجه تقريبا في البلد انا عشت عمري كله في الملجأ مابخرجش غير كل فين وفين منهم لله اصحاب الملجأ علي اللي بيعملوه فينا
-يازفته انتي يازفته
-بتزعق ليه باسليم
-فين الشغاله
-اسمها بحر
-فين ست هانم الهوانهم بحر
-خرجت عندها كورس هتخلص وترجع
-خرجت! ماشاء الله ماتتبنيها بالمره واديها اوضتي بس حلو حوار الشغاله المثقفه دي
-يابني انت ليه بتعمل كدا؟
-بعمل ايه
-اسلوب معاملتك للناس واسلوب حياتك ليه ياسليم انت ماكنتش كدا؟
-ماتنسيش ان بنتك السبب في كل دا
سابها ومشي وانا كنت داخله من باب الفيلا وسمعت الكلام دا كله ومش عارفه مامته الله يرحمها عملت ايه يوصله انه يبقا بالشكل كدا
=مساء الخير
=مساء الخير يابحر، تعالي احكيلي عملتي ايه
=ولا حاجه قابلت الاستاذ دا اللي بيعلمنا وقعدت خدنا شويه حاجات وبس، اكلتي ياست امينه؟
-لا لسه ممكن تسخني الاكل وتنادي سليم
=حاضر
كل ماقرب عند اوضته بتخنق تلقائي واحس اني ههبد الباب علي دماغه خبط علي الباب وكالعاده ماردش فتحت الباب ودخلت ملقتهوش في الاوضه لكن لقتها متكركبه فا دخلت ارتبها..وانا برتب السرير لقيت دفتر مفتوح وغصب عني عيني وقعت علي الكلام
“اين يذهب المرء عند امتلاء صدره بغصات العالم….اين يذهب حين يمتلئ الكون ولا يكفي لحزنه… عند تلاشي جميع احلامه واحدآ تلو الاخر امام انظاره…عند خذلان الجميع له عند شفقه اعدائه علي حاله الذريع”
-انتي بتعملي ايه عندك
=ها انا انا لا كنت جايه اصل الاكل
-انتي ازاي تسمحي لنفسك تقري حاجه ماتخصكيش
مسك ايدي زقني وقعت دماغي اتخبطت في السرير اغمي عليا……
يتبع..
لقراءة الفصل الثاني : اضغط هنا
لقراءة باقي فصول الرواية : اضغط هنا
نرشح لك أيضاً رواية عشق أولاد القناوي للكاتبة شهد رفعت.
