رواية عشق الصخر الفصل الرابع عشر 14 بقلم شيماء عصمت

صخر بقهر: كفاية كده ياعشق عشان خاطري قومي نروح

قامت من ع الارض وبعصبية شديدة بعدت عنه: انت ملكش خاطر عندي 

قرب منها خطوة فـ رجعت خطوطين

صخر بهدوء مصطنع وهو ملاحظ حالتها: عشق قربي هنا العربيات ماشية وراكي اهدي وتعالي نروح 

بغضب قالت وهي بتبعد عنه اكتر: ملكش دعوة بيا انا مش هرجع معاك اناا

صخر بصراخ وهو بيقرب منها بيحاول يلحقها: عششششق

في ثانية واحدة حست بحاجة قوية خبطتها وطارت في الهواء ومرة واحده اترزعت في الارض بعدها الدنيا اسودت في عيونها وفقدت الوعي 

صخر اتمسمر مكانه وهو شايف جسمها مرمي على الارض والدم بيطلع من كل مكان في جسمها ثواني وكان مقرب منها بجنون ورعب اتملك منه ضمها بين ايديه .. ايديه اللي غرقت دم بمجرد ما لمسها .. الناس اتجمعت حواليه الكل واقف يتفرج .. وهو حاضنها ومش واعي ابدا للي بيحصل حواليه عقله مش مستوعب اللي حصل ولا عارف ازاي يتعامل معاه .. الدموع لمعت في عنيه احساس انه هيخسرها كسره! 

حاول يسمع نبضات قلبها بس مفيش .. قلبها وقف!! صخر بهستريا ورعب: متسبنيش ياعشق متسبنيش خليكي معايا مش هقدر اعيش من غيرك انا اسف ياحبيبتي انا اسف مكنش لازم اكذب عليكي من الاول مكنش لازم ااذيكي انا كمان ، فوقي ياعشق فوقي ياعمري كله وفوقي خليكي معايا 

قربت ست كبيرة في السن من الواقفين وهزته بهدوء صخر بصلها بضياع

الست بشفقة: قوم يابني الحقها ووديها لاي مستشفى اجمد كده ده مش الوقت اللي تنهار فيه قوم يابني ربنا ينجيها 

وكانه كان مستني حد يفوقه من اللي هو فيه قام وشال عشقه بين ايديه وجري بيها على عربيته .. ركبها في الكرسي الخلفي في العربية والست ساعدته وركبت معاه عشان تمسك عشق وركب هو وبمعجزة حاول يسيطر علي اعصابة عشان يقدر يمشي بـ العربية ومشي باقصى سرعة 

_______________

بمرور الوقت كان وصل المستشفى وعشق دخلت العناية المركزة ، صخر شكر الست اللي ساعدته وهي استاذنت ومشت بعد ما دعت لعشق بالشفاء العاجل .. اتصل بـ علي وقاله ع اللي حصل لعشق وطلب منه يجيله .. صخر كان زي المجنون وكل الافكار السوده بتهاجمه ومش سيباه .. كل ما الوقت بيعدي بيقلق ويخاف على عشقه اكتر واكتر .. قعد على الارض بضعف وحط وشه بين ايديه وبيدعي ربنا من كل قلبه انها تكون كويسة

علي وكريمة ومعاهم مريم وصلوا المستشفى واتوجهوا علطول للعناية المركزة اتفاجؤ بمنظر صخر اللي تقريبا هدومه مليانة دم كريمة قلبها مستحملش واغمى عليها

مريم بصريخ: مامااااااااا

علي بسرعة راح يطلب دكتور لـ كريمة

صخر رفع راسه واتفاجئ بـ والدته واقعة على الارض قام بسرعة يروح لعندها .. الممرضين اخدو كريمة لـ اوضة عادية والدكتور دخل يكشف عليها 

مريم بتبكي بندم وغذاب ضميرها ، مكنتش تتخيل ان دا كله يحصل وبسببها معقول اذت امها واختها من غير ماتقصد

علي قلبه كان وجعه عليها واتمنى يقرب ويخدها في حضنه ويطمنها بس لا وقته ولا مكانه ابداا قرب من صخر وبقلق قال: انت كويس

صخر بضعف صدم مريم وعلي: عشق هتروح مني ياعلي

علي اخده فحضنه بـ قوة .. صخر بالنسباله مش صاحب وبس دا اخوه وسنده في الدنيا دي متاكد لو لقدر الله عشق جرلها حاجة هتكون نهاية صخر!!

علي بهدوء بيحاول يطمنه: هتكون كويسة صدقني دلوقتي الدكتور يطلع ويطمنا عليها 

يادوب خلص كلامة والدكتور فعلا كان طالع من العناية

صخر بلهفه جري عليه: طمني يادكتور

الدكتور باسف: البقاء لله

صخر بجنون مسك الدكتور بهمجية : انت مجنون البقاء لله فـ مين بالظبط!! عشق كويسة مفيهاش حاجة انت فاهم عشق عايشة 

علي بيحاول يخلص الدكتور من ايدين صخر اللي بيخنقه لدرجة ان الدكتور مش قادر يتنفس واخير عرف يخلصه من ايدين صخر

الدكتور بيشهق وبيحاول ياخد نفسه وبخوف من هيئة صخر قال: اهدي يااستاذ اانا .. مقصدش .. استاده عشق انا اقصد حاله تانية خالص اهدى لو سمحت اهدى

صخر اخد نفس عميق وبص للدكتور بغصب: ثانية واحده ومش عايز اشوف الخلقه دي تاني عشان لو شوفتك تاني صدقني هزعلك 

الدكتور في ثانية فعلا كان اختفى من قصاد صخر اللي كان واضح انه مبيهددش على الفاضي

علي: ممكن تعقل بقى وكفاية جنان

مريم قربت من صخر ولسه هتتكلم قاطع صخر باشارة من ايديه وقال: مش عايز اسمع صوتك ولا حتى اشوفك لاني لو اتكلمت هزعلك اوي وبطريقة متتخيلهاش

مريم دموعها نزلت زي الشلال وحست انها خسرت صخر .. حست بضياع ووحده عمراها ماحست بيهم .. علي بصلها بأسف ولسه هيكلم صخر بس سكت لان دا مش الوقت اللي يتكلم معاه لازم الاول يطمن على عشق وامه

الدكتور طلع من اوضه كريمة وقال بعملية: هي حاليا كويسة بس عندها انهيار عصبي وكمان ضغطها كان واطي جدا ادتلها حقنة مهدئة وعلقتلها المحاليل اللازمة ساعتين تلاته بالكتير وهتكون فاقت عن اذنكم

الكل اطمن على كريمة وفاضل عشق

مريم دخلت قعدت في اوضة كريمة وعلي وصخر وقفين قدام العناية المركزة

صخر ساند ع الحيطة جنب باب العمليات وبيدعي ربنا بينه وبين نفسه 

همس بخوف: اتاخروا اوي ياعلي

علي:خير ان شاء الله كل تاخيرة وفيها خيرة

مفيش دقايق والدكتور خرج ومعاه الممرضين ساحبين عشق على الترول (سرير متنقل) 

صخر جري يطمن على عشقه دخل مع الممرضين اللي حطوا سرير عشق في اوضة عادية .. صخر مسك ايديها وبص للدكتور وبستفسار قلق قال: حالتها ايه يادكتور

الدكتور بعملية: متقلقوش هي حاليا نايمة من مفعقول البنج ومش هتفوق دلوقتي وللاسف ايديها اليمين انكسرت و دماغها من الخلف اتخيطت اربع غرز دا غير الخدوش والكدمات اللي فـ جسمها غير كده هي كويسة 

صخر ضحك بغلب ووجع من اخر جملة قالها الدكتور

علي اخد الدكتور وطلعوا بره الاوضة وسابوا صخر مع عشق لوحدهم

صخر قعد علي كرسي جنب سرير عشق ومسك ايديها وباسها كتير جدا بيبصلها اووي وكانها مش مصدق انها دلوقتي معاه

صخر بيكلمها بهمس وكانها صاحيه وبتسمعه: 

حمدلله علي سلامتك ياقلب وعمر صخر .. كده ياعشقي تخوفيني عليكي بالشكل ده!! مهما اقول مش هقدر اوصفلك احساسي كان ايه وانا شايفك غرقانة في دمك!! روحي انسحب مني ياعشق!! انا من غيرك هموت .. والله العظيم هموت مش كلام وخلاص لا.. اه لو تعرفي انا بحبك قد ايه!! او حتى من امتى! مش هتصدقي .. كنتي لسه طفله بضفاير قاعدة حزينة في جنينة قصر ناصر عمران وقتها كان عندي بتاع 13 .. 14 سنة وانتي حولي 6 سنين كنت مع والدي الله يرحمه فاكر وقتها مكنتش عايز اجي معاه لما قالي تعال نطمن على بنت ماما كريمة 

بس بعد ماشوفتك اول مره .. بقيت استنى بفارغ الصبر اننا نروح ونشوفك من بعيد لبعيد ومن ساعتها وانا مجنون بيكي ياعشقي .. ياوجع قلبي من بعدك عني وقربك مني .. الاتنين نار بالنسبالي نار بتحرقني كل يوم وكل ساعة وكل دقيقة فتحي عنيكي وارحمي قلبي المتيم بيكي

وكأنها الكلمات السحرية اللي صحت الاميرة النائمة .. عشق فتحت عنيها وهي حاسه بوجع رهيب فكل جسمها 

عشق: انا فين 

صخر بسعادة: حمدلله على سلامتك ياست البنات

عشق بتوهان: هو ايه اللي حصل

صخر بهدوء: حادثة بسيطة وربنا نجاكي منها

ثواني وعشق ابتدات تفتكر اللي حصل 

بصت لصخر بغضب وسحبت ايديها من بين ايديه: اطلع بره

صخر: عشق اسمعيني انتي مش فاهمة حاجة في حاجات كتير منتش عارفاها

عشق بدموع: ومش عايزة اعرفها انتوا كلكم كدبين كلكم ومهما تقول ومهما اعمل عمري ماهصدقك ياصخر عمري انا قولتلها وقولت لكريمة هانم اني اكتر حاجة بكرهها الكذب قولتلها اني مش بسامح اي حد يكدب عليا ورغم كده كدبت بدل المره 100 مرة مش قادرة اصدق قد ايه كنت غبية وحبتها!! بس خلاص دلوقتي بكرهها وبكرهكك ومش عايزة اشوف اي حد فيكم .. طلقني ياصخر

صخر بغضب من طلبها للطلاق: انتي اكيد اتجننتي واضح ان الخبطة اثرت على دماغك طلاق انا مش هطلق ولحد ما اموت هتفضلي على ذمتي ياعشق ودا اخر كلام عندي

قال كلامة وطلع بره الاوضة بل بره المستشفى كلها

عشق بصراخ: هطلقني غصب عنك هخلعك ياصخر سااااامع هخلك خلصت كلامها ودخلت في هستريه عياط 

…………………

اتمني تنضموا في جروبي ع الفيس اللينك على صفحتي الشخصية ❤❤

اسمه “روايات شيماء عصمت” 

…………………

قدام المستشفى 

_صخر صخر انت يابنى استنى

صخر وقف بزهق وبص لـعلي: افندم

علي: رايح فين يابيه وسايب مراتك مرمية في المستشفى اللي يشوفك من ساعة واحده بس مايصدقش انك تمشي وتسيبها بالسهولة دي ايه يعني اتعصبت عليك او حتى طلبت الطلاق؟ علفكره رده فعلها طبيعية جداا

صخر: شششششش ايه لوكلوك لوكلوك افصل شوية وبعدين مين قالك اني هسيبها وامشي

علي بتريقة: اومال انت رايح فين يابيه؟ دا حتي مامتك مسألتش عليها

صخر بنفاذ صبر: اولا انا لسه مطمن علي والدتي من الدكتور قبل مااخرج من المستشفى وبلغني انها فاقت وضغطها اتظبط .. ثانيا انا رايح اجيب هدوم لمراتي وعارف ان دا رد فعلها الطبيعي .. ثالثا ودا الاهم انت مالك ياعلي ابعد عني السعادي عشان مطلعش اللي فيا عليك .. تمام

علي بهدوء: تمام ياباشا متنساش تجبلنا اكل وانت جاي

صخر بغيظ: صبرني يارب .. اطلع يابني خليك معاهم فوق وخلي بالك 

علي بـ ابتسامه: هيصبرك ان شاء الله

صخر مردش عليه وركب عربيته واتجهه ع القصر بتاعه

______________

اما في اوضة كريمة مريم كانت بتبكي بـ انهيار وبتكلم مامتها بس هي مش بترد عليها

مريم بدموع:ردي عليا ياماما انا اسفه والله سامحيني مكنتش اعرف ان دا كله هيحصل والله ياماما انا كنت عايزة عشق تعرف عشان انتي تستريحي وتتطمني متخيلتش للحظه واحده ان كل ده هيحصل .. بردو مش هتردي عليا انتي كرهيني زي صخر ما كرهني

كريمة بصوت مبحوح ودموع مبتقفش: زعلانه منك اوي يامريم بس عمري ما اعرف اكرهك سواء انا او صخر .. شوفتي ايه اللي حصل بسبب تسرعك كنا هنخسر اختك!! تخيلي لو عشق بعد الشر كان حصلها حاجة اكتر من اللي حصلها كنا هنعمل ايه انا كنت هقدر اسامحك!! ولا صخر ولا انتي حتى هتقدري تسامحي نفسك؟ يابنتي لازم قبل ماتعملي اي تصرف تفكري فيه بدل المره اتنين وتلاته مش حاجة خطرك في دماغك تنفذيها واللي يحصل يحصل

مريم قامت حضنتها وبعياط قالت: متزعليش مني ياماما بالله عليكي متزعلي انا اسفه والله مااقصد ازعل اي حد فيكم سامحيني

كريمة ضمتها: مسمحاكي يابنتي مسحاكي بطلي عياط وجعتي قلبي اكتر ماهو موجوع

_____________

في اوضة عشق كانت لسه بتبكي حاولت تقوم عشان تمشي من المستشفى بس اول مااتحركت صرخت من الوجع وعيطها زاد اكتر عشق لنفسها: منك لله ياصخر كل دا بسببك يارتني لا شوفتك ولا عرفتك .. مش مكفية كله اللي عمله فيا لا وايه اول مااقوله مش عايزه اشوف وشك يسيبني ويمشي وانا في الحالة دي! واحد معدوم الاحساس اما وريتك ياصخر مبقاش انا .. هخليك تلف حوالين نفسك بس استني عليا

________________

بمرور الوقت صخر كان وصل للقصر اخد شاور وغير هدومه واخد هدوم لعشق وطلب من سعدية تجهزله اكل عشان ياخده معاه

خلص ولسه هيطلع من القصر بس اتفاجئ من اللي شافه

يتبع..