رواية مكاني في قلبك الفصل الثالث 3 بقلم سولييه نصار
رواية مكاني في قلبك الجزء الثالث
رواية مكاني في قلبك البارت الثالث
رواية مكاني في قلبك الحلقة الثالثة
-بجد …بجد هتعمل كده يا رائد ؟!
قالتها نيرمين بلهفة والدموع بتلمع في عينيها وبدأت تنزل …ابتسم ليها رائد وهو بيمسح دموعها وقال:
-ايوة بجد هعمل كده …حقك أن أكون ليكي زي ما أنتِ ليا …
اتنهد وهو بيلمس خصلة من شعرها وكمل كلامه ؛
-انا مش مستعد ا.خسرك يا نيرمين …مش مستعد ابدا …أنا محتاجك في حياتي وهعمل المستحيل عشان احافظ عليكي حتي لو هضطر اروح لدكتور غيرك يكون د.مه تقيل …
اتعصبت نيرمين لأستاذها وقالت؛
-اتلم يا رائد متتكلمش كده علي الاستاذ بتاعي …ثم انت ازاي عرفت ان د.مه تقيل …انت شوفته قبل مدن ولا اتعاملت معاه !!!
هز رائد كتفه وقال:
-اسمه عادل…وحده اسم كفيل يعرفني انه فعلا د.مه تقيل …
ضر.بته نيرمين علي كتفه وقالت :
-طيب اتلم طيب …
ابتسم بيها وقال:
-حاضر يا برينسس …
بعدين فضل يبصلها بحزن غريب وكأنه هيتحرم من اهم حاجة في حياته …
-لازم امشي دلوقتي صح ؟!
قالها رائد وهو بيبص لنيرمين بنفس النظرة الحزينة …اتنهدت نيرمين وهي بتحاول تكتم دموعها وتسيطر علي ملامحها وردت:
-ايوة بصراحة لازم تروح.دلوقتي دكتور عادل هيبلغك بميعاد الجلسة بتاعتك أنا بعتله الملف بتاعك وصدقني هتحب التعامل معاه اووي اضمنلك كده..
-انا واثق في اختيارك …
اتنهدت نيرمين براحة …كانت خايفة رائد ميتقبلش قرارها الجديد بس موافقته دي خلتها تتأمل انه ممكن يجي يوم ويحبها…ادالها أمل كبير جدا …
كافئته بإبتسامة حب وقالت:
-لازم تروح دلوقتي أنا مش فاضيلك ..
ضحك وقال:
-حاضر يا سيادة الدكتورة
بعدين كان هيمشي بس وقف فجأة وهو بيبصلها وبعدين بيقرب منها تاني …
اتوترت نيرمين وقالت:
-ولا ولا …هتعمل ايه …انت بتقرب ليه…لو حاولت تقل أدبك هصرخ ..انت فاهم …
متغيرتش ابتسامة وهو بيميل شوية وبيبوس رأسها وبيقول بصوت مخنوق:
-هتوحشيني يا برينسس …
عضت نيرمين علي شفايفها بتمنع نفسها من انها تعيط …كانت بتمنع نفسها انها تمسكه وتقول انها هترجعله ومش مهم يحبها ولا لا بس كرامتها كانت مانعاها …هي تستاهل تتحب لانها مش قليلة عشان ترضي بالبواقي …
بعد رائد وخرج بسرعة من العيادة قبل ما يتهور ويجبرها بأي طريقة عشان تتجوزه ..بس كلام عمار اثر فيه نيرمين فعلا تستاهل الحب …تستاهل قلبه كله !!
….
بعد ما مشي رائد قعدت نيرمين علي الكرسي وبدأت دموعها تنزل علي وشها…كان قلبها بيتعـ.صر من الأ.لم …هي بتحبه مش هتقدر تبعد عنه …
رفعت راسها لفوق وقالت:
-يارب اديني الصبر ..يارب ..
……………
بعد أربع ايام ..
كانت أول جلسة لرائد مع دكتور عادل واللي نيرمين قالتله كل حالته بالتفصيل وبعتتله ملفه وطبعا لانه استاذها وبتعتبره والدها قالتله علي العلاقة اللي كانت بينهم واللي هز.قها بسبب ارتباطها بمريضها لان ممنوع الدكتور يرتبط عاطفيا بمريضه وخاصة انه متعالجش بالكامل وللاسف نيرمين وقعت في الغلطة دي واللي بيعتبرها عادل جر.يمة مفروض نيرمين تتحاسب عليها …وعشان كده كان الاسلم انها تحول رائد لدكتور تاني يفهم حالته ويقدر يساعده بموضوعية من غير ما تتدخل المشاعر في الموضوع …
كان عادل بيراقب رائد اللي قاعد متوتر شوية بس بيحاول يداري توتره …
ابتسم عادل ببساطة وقال:
-تحب تقعد علي الشازلونج هيريحك اكتر عشان تقدر تتكلم …
ابتسم رائد وهز راسه وقال:
-لا شكرا انا مرتاح اووي كده ومستعد اتكلم …
-طيب يا سيدي وانا مستعد اسمعك…تحب نتكلم عن ايه ؟!
هز رائد كتفه وقال:
-صدقني معرفش …
-طيب تحب اسألك أنا ؟!
-ماشي…
قالها رائد ببساطة فقال الدكتور ..:
-حور بتمثلك ايه يا رائد ؟!
ابتسم رائد بحنين وهو بيحط أيده علي قلبه وقال:
-حور هي أول ست قلبي دق عشانها حبيتها لدرجة الهوس..حاولت كتير أن اسيطر علي الظلام اللي جوايا ومأ.ذيهاش بس للاسف الظلام كان اقوي من الحب وأذ.يتها…كـ.سرتها ود.مرتها وانا كل يوم بندم علي اللي عملته معاها…مش لأني خسرتها بس ..كمان لاني اذ.يتها ..عشان حور متستاهلش مني كده …هي عملت المستحيل عشان تفرحني وانا معملتش حاجة غير اني دمرت حياتها …بس يمكن عقا.بي اني اتحرم منها وانا مبسوط أنها لقيت اللي يقدرها لاني اقتنعت اني مش مناسب بالنسبالها…الحب مش كفاية …
بصله الدكتور عادل وقاله؛
-طيب عرفنا حور بتمثلك ايه …ممكن اعرف نيرمين بتمثلك ايه ؟!ايه أهمية نيرمين في حياتك ؟!
ابتسم رائد ابتسامة خاصة جدا وهو سرحان بيفتكر ملامحها الجميلة وبيقول بصوت دافي:
-نيرمين هي الآمان اللي أنا مقدرش اخسره ومش هخسره!
-والامان بالنسبالك كفاية …الأمان اهم من الحب يا رائد …
بلع رائد ريقه وقال:
-صدقني معرفش …بس أنا أول مرة احس بالامان ..نيرمين هي اللي حسستني بالامان ..
غير عادل الموضوع وقال:
-طيب ممكن نتكلم علي والدتك …والدتك.كان…..
قاطعه رائد بصوت جامد وقال:
-مش عايز اتكلم في الموضوع ده لو سمحت د..ممكن ..
ابتسم عادل وقال وهو بيخلع نضارته :
-مفيش مشكلة ابدا ….معادنا الأسبوع اللي جاي بإذن الله …
قرر عادل انه ميضغطش عليه ابدا …بس عادل واثق انه حط أيده علي جر.ح رائد وهيعرف يعالجه من هنا ….المعضلة كلها في أمه !
……….
بالليل …
قدام عيادة نيرمين …وقفت نيرمين وهي بتبص علي عربيتها كان الاربعة كوتشات نايمين …رفعت حواجبها وهي مش مصدقة …ازاي أربع كوتشات يناموا مرة واحدة …..
-واقفة ليه كده ؟!
شهقت نيرمين لما سمعت الصوت القوي وراها بصت فلقت رائد …نسيت كل حاجة وهي بتبصله …كان واحشها اوووي …أربع ايام لا شافته ولا سمعت صوته حتي !!
-نيرمين فيه ايه ليه واقفة قدام العيادة كده ؟!
سألها رائد ببراءة مرة تانية وكمل :
-الساعة دلوقتي 10بالليل لازم تروحي …
-العجل كله نام …
قالتها بيأس بس كانت لسه عينيها عليه ..مش عايزة تشيلها من عليه …
-غريبة ازاي كله نام مرة واحدة …مش مشكلة أنا هوصلك يالا .
مناقشتهوش حتي …كان واحشها لدرجة انها هتستغل كل ثانية عشان تبقي معاه …
..
ركبت نيرمين العربية وركب رائد جمبها وانطلق بيها …
اتكلم رائد وهو مبتسم بخـ.بث :
-بالنسبة لدكتورة شاطرة زيك الIQ بتاعك في الارض …
بصتله نيرمين بصدمة وقالت بغضب:
-وليه الاها.نة يعني ؟!
ضحك رائد وقال بتسلية:
-عشان أنا اللي خليت العجل ينام …
اتصدمت نيرمين وقالت:
-انت !!طيب ليه ؟!
بصلها وقال؛
-حجة عشان ابقي معاكي شوية …وحشتيني يا برينسس …
اتوترت وبصت من الناحية التانية لحد ما يوصلها البيت …
بس فجأة لقيته بيغير الطريق وبيروح لمكان هادي وبيوقف العربية فيه …
-انت وقفت العربية هنا ليه ؟!
قالتها بتوتر فرد وهو بيضحك:
-متخافيش يا برينسس بس هنقعد مع بعض شوية مش مستعد اسيبك دلوقتي …
ولا هي كانت مستعدة تبعد وتسيبه عشان كده مجادلتش واتنهدت وهي بتحط راسها علي مسند الكرسي …
-بتحبي أمير عيد صح .؟!
قالها رائد وهو بيمد ايده ناحية الكاست وبيفتحه علي اغنية لأمير عيد (جيمس دين) وكمل:
-الاغنية دي أنا هغنيهالك في فرحنا بإذن الله ….
بعدين بدأت الأغنية ورائد مسك ايد نيرمين وباسها وبعدين حط ايدها علي قلبه وهو بيستمتع بسحر الأغنية …
أنا وهي عايشين في فيلم سيما
الصورة ريترو والألوان جميلة
متمردين ع الفاضي بدون قضية
بندوس بنزين جامد، جامد، جامد
عشان نهرب من الدنيا ديه
أنا وهي جينا في وقت غير الوقت
وعشان كده مقضينها سوى شد وخبط
بنهرب من نفسنا بنجري ولسه بنخاف
وفي حياة جوانا لسه معشنهاش
معاكي بنسى أنا مين
بحس إن أنا جيمس دين
عربية كابريوليه موديل ستين
وإيديكي مرفوعة في الهواء
وشعرك بيطير
معاكي بنسى أنا مين
بحس إن أنا جيمس دين
عربية كابريوليه موديل ستين
وإيديكي مرفوعة في الهواء
وشعرك بيطير
-وشعرك بيطير…
كانت نيرمين بتغني بصوت هادي وبعدين بصت علي رائد اللي لقيته نايم …ابتسمت بحب وقربت منه وهي بتلمس وشه …هي بتعشقه …بتعشق تفاصيله كلها …فجأة بعدت لما حست انه بيزوم في نومه كأنه بيحلم بكابوس …كان بيتنفس بصعوبة …وده خلاها تخاف عليه …
-رائد ..رائد فوق …
قالتها نيرمين بخوف …بس كابوس رائد مكانش سامح ليه يفوق ..
……..
كان رائد الصغير واقف قدام الباب وهو بيترعش وشايف ابوه بيضر.ب امه…كان بيعيط عليها …نفسه يعمل أي حاجة عشان ينقذها …
قرب رائد اكتر ودخل الاوضة ومشي ناحيتهم وهو بيعيط … فجأة وقف ووشه شحب لما بص علي ابوه وملقاش ابوه …اللي كان بيضر.ب الست مكانش ابوه كان هو …كان رائد !!!
بص رائد بفزع علي الست اللي مغطية وشها وبتبكي …بس فجأة رفعت وشها فرجع هو بصدمة لما لقي ان الست دي مش أمه …دي نيرمين !!!!
…
-رائد فوق !
زعقت نيرمين وهي بتضربه بشويش علي وشه ففتح رائد عينيه وفجأة زق نيرمين بعنـ.ف وقال:
-ابعدي عني!!!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية مكاني في قلبك)
