رواية صوت من المجهول الفصل الثاني والعشرون 22 بقلم زينب ماجد

رواية صوت من المجهول الفصل الثاني والعشرون 22 بقلم زينب ماجد

رواية صوت من المجهول البارت الثاني والعشرون

رواية صوت من المجهول الجزء الثاني والعشرون

رواية صوت من المجهول الحلقة الثانية والعشرون

يا الله فزيت فرة على غفلة الكلاص صار بنص وجهي على عظمة خشمي شاغت روحي من الألم .. وكع بالكاع انكسر وايوب كام من مكانه لزم عكازته وصاحلها : تعالي لج الظاهر انت مو مال عيني واغاااتي
لزم عكازته هي مشت تصيح مشى وراها وهو يكللها : تعاي اعلمج منو التصيحين بوجه تعااااي
خالتي جانت نايمة وهو كمشها من راسها وهي كامت تصرخ
اني بالمطبخ خشمي كام ينفر دم ، حطيت ايدي عليه واريد اروح للحمام اغسل بس من قوة الوجع البخشمي احس عيني طفت كامت تدمع من الوجع
خالتي جرت نجلاء من ايده وكام يتصايح ايوب ونجلاء
وكفت ع المغسلة اغسل بخشمي … اغسل والدم ينزل ..
اسمع خالتي وهي تكله : حقها مرة فاكدة ظناها وتشوفك نايم على شليل مرتك صايرلها خادم انت وحراسك
هو سمع كام يصيح وبعكازه يضرب بالغراض ويكللها : اطلكها حتى ترتاحن اهجم بيتي حتى ترتاحووووووون من عمري كله مشتغل الكم خادم ما تحجيييين ولو اجيت ارتاح ويا مرتي دقيقتين سممتيني انت وبناااااتج من ساعة السودة الشفتكم بيهااااا انعل ابو الدنيا المخليتني مكابل هالشكولاااااااات
اني طلعت من الحمام والخارلي على خشمي وكمت اجر بيه حتى يهدا
كام يدفع بيه ويغلط عليه .. خالتي شردت من صياحه وطبت بغرفة البنات واني واكفة ولازمة خشمي وهو يصيح
اندكت الباب مشيت لباب المطبخ شفته علي اخوية
فتحتله انطاني علاكة الاكل وشاف وضعي وهو يسمع صياح ايوب حجه : شكو ؟
– اخته ضربتني بخشمي كام ينزف
صدمني رده وهو يكول : حيل عساج بابو زايد
ضليت اباوع عليه عافني ومشى حجيت : لا حول ولا قوة الا بالله
حطيت العلاكة ع الطاولة ورحت غسلت وجهي وغسلت ادية الدم انقطع بس الوجع مال خشمي موجود ، طلعت لكيته كاعد ع التخم وبعده يحجي ويسمعهم ، حجيت : ما تسوى كل هالمشكلة والصياح يا عيوني لتروح تأذي نفسك كوم اتعوذ الشيطان واتغدا
كام يغلط عليه ويصيح : ولي مني
تركته ورحت للمطبخ كعدت .. البيت صار هدوء بس هو يحجي ويرجع يسكت ويهددهم ويكلها : فلا ارجعلها بتها والله والا العب بيها طوبة واعلمها ويا منو تلعب بنت الاوادم كافي حاط موس وساكت على سوالفج ..
دك الباب بلال لبست حجابي وفتحتله :حاول تسحبه تهدي
-هو شصار
-نجلاء يعني اكو غيرها
دخل بلال وهو يصيح : يا الله وينهم
دخل لايوب : شني خوية كول يا الله مريض عليمن تتعب روحك دكوم يضلن نسوان
– لك جزعني سالفة ما اكدر احجي ويا مرتي لازم ابقى وياها عرك واهاين يلا يرضن لو تصافينا ساعة كلبن الدنيا صايرلها خادم تكلي انعل عشيرتج ولي لرجلج وخلي يصيرلج خادم كاعدة مزهكتني بعيشتي
-ميخالف يا خوي غيرة نسوان ما تسوى صلي على محمد وكوم
كومه وجرجره للمطبخ كعده ع الكرسي بس بعده ايوب اعصابه فايرة
اني حطيت الاكل ووخرت الجيس منه حجه عليه : من الصبح بومة ما تتحاجى طنكرت هاي لحد ما طلعت روحي طايحة الحظ
حجه بالال : رجعت على هالمكرودة هي هاي تهش تنش شو ضالة منك لاهلك اقوى ما عدها اتطنكر وتكلب وجهه دكعد اكعد .
حجيت : بالعافية
ردت اصعد حجه بلال ؛ انوب انت دتعاي يمعودة رجال عصبي دعوفي جوعان بالله شلون .. غفران
عفتهم ردت اطلع تبعني : تعاي اكلج
– بلال والله تعبانة خلي اصعد
غمزلي : ميخالف اكعد اتغدي
رجعني كعدت ع الطاولة هو باوع على ايوب مطنكر رد باوعلي مدلغمة حجه : ااااالله هذا الوضع الزين من انت جوعان ويضل الاكل بس الك
ابتسمت : عابتلك
– اوووي يمعودة مزقتي شعوري لك خطية ويالله دباوع الفاهية هاي اقوى شي عدها عابتلك دكل يا خوية اكل .. اكلي ام عابتلك
اندار : هو انت مكتولة ؟
– لا هيج اجت بوجهي
ضل يباوع عليه مديت ايدي للخبز حجه : انت فلا عندج كرامة مو زعلانة شلون تاكلين
ضحكت : بلال معليك جوعانة
– انت من جماعة بطني اهم من شعوري مثلي مو
– صدك انت منو عزمك
– اني ؟
– لعد طلعت مثلي هم بايع كرامتك غير تنتظر اعزمك
حجه : جا تعادلنا خل ناكل لعد .. تاكل حجينا لو بعدهن سوادينك
ما ود عليه حجه : خلي نشبع بطنا وطزززز بالراح
واشر على ايوب .. لابو الاجا .. واشر على اهله
كمنا تاكل وايوب ساكت
حجه بلال : صدك شصاير بينج وبين علي متزاعلين !؟
حجه ايوب : اكل يمعود
بلال : لا مو شفته متضايق ترا حقه ايوب يعني هو صحيح الهيئة فرغته الك للشغل بس ما يشتغل عد اخته سايق صعبة بحقه
– غير اخوها وامنه عليها
– اني هم اخوها مرت اللخ اذا تحتاج اني اروح اجيبها لتخلي علي
– انت احتاج وياي بالهيئة تعرف اكثر من علي علي بعده ما يعرف شغلي .
جروها يحجون بسوالف شغل ..
خلص بلال بسرعة واترخص وكام .. بقى ايوب كاعد ما ياكل
كمت غسلت وردت اطلع كتله : تاكل لو المه؟
مجاوبني .. حجيت .. تصعد ؟ … مارد
ردت اتركه وامشي .. انداريت اباوعله رجعتي وهو كاعد حضنت راسه لصدري ودنكت بسته براسه : لتضوج
هز راسه ووخرني واشر ع الهول .. عود اهلي منا
حجيت : اصعد
حجه : لمي الاكل
مشيت المه .. هو صعد قبلي اني غسلت اللي استخدمناهم ولحكته
هو متمدد ع الجرباية بدلت ثوبي ولبست شلحة تصير مثل الحرير ويا الركبة ومدلعة .. وجريت القراصة من شعري واتوجهت للجرباية .. فتحلي غطاه هوا .. دخلت بحضنه رفع راسي : اتأذى خشمج
– شوية عادي
– ما اعرف هالبنية شتصرف وياها عجزتني بالعباس
– رجعلها بتها
– واتحملها هنا شبيج مخبلة !
– دشوفها مر شهر واكثر على غياب بتها وما اتنازلت ولا رجعت بس دا اتطلع حركتها بينا اقلها اتفق وياها ترجع بتها بس اذا تصرفاتها نعادت تخابر يوسف ترجعها غصب عنها وحذرها حتى تعقل وتهدأ شوية
حجه : والله ما ادري تعبت منها وما اريد اوصل وياها مواصيل اجرجرها واذيها اشوف امي وابوي بيهن وما ينطيني كلبي اذيهن بس جزعتني لك حسرة تشوفني متصافي ويا مرتي شلون بالله وين اهج
– اني اشوف تصرفاتها مو مال انسانة صاحية صدكني نجلاء مريضة بيها حالة نفسية ماكو انسان صاحي يسوي اللي تسوي انعزالية تحقد تنتحر تنتقم هذه تصرفات المرضى النفسيين
– عايزة بعد بس افتر بيها الاطباء النفسيين
– لا خليها تشتغل يمكن الشغل يغير من نفسيتها وتلتهي بروحها وتكف تحط عينها ع الناس
– والله ما امن اطلعها منا لهنا
– لازم تنطيها الثقة ايوب عالج مشكلتها لان حبسها دا اشوفه يزيد من مشكلتها مديحل شي ما تكدر تحكم عليها وانت ما منطيها الثقة انطيها مجال تشوف نفسها وتعالج روحها .. لا تتصرف وياها كانما هي عندك خطار يوم يومين ولا احنا خطار وكم يوم ونطلع هي واقع واحنا واقع لازم نتعايش ويا وضعها وتتعايش ويا وضعنا ، لإن الوضع اللي احنا بيه ديأذيها ويأذينا كلنا .
– انت لو تعرفين اللي اني اعرفه ما تحجين هيج نجلاء طايحة حظ واني ما بيه حيل حجي وكلام يعرك كصتي .. صعب انطيها الثقة
– كل انسان يغلط خو لو معصوبين الله ما فتحلنا باب التوبة والاستغفار بس الله خالق الانسان هيج يغلط وينجرف ويتغير وينصلح ويهتدي .. يمكن لو انطيتها الثقة وخليتها تطلع وتشتغل وهددتها اذا غلطت اي غلط .. راح تخاف على وضعها وتصون نفسها ويمكن الله يهديها شمدريك.
احجي واني على صدره حاضنته ومتغطين وهو يلعب بشعر راسي
تنهد وكال : الله كريم
رفعتله وجهي باوعتله باسني بكصتي : حيل احب عقلج وتفكيرج انت اصغر مني بهواي بس هواي تفاجئيني بامور احكم بيها مني رغم اكبر منج
– هالموضوع ماله علاقة بالعمر الحكمة نعمة او رزق الله ينعمها على بعض من عباده يعرفون يحكمون امرهم .. اني اثنين اسأل ربي بكل دعاء اكوله ربي اوهبني انو احكم عقلي وكلبي .. لا اضيع بعقلي ولا اتيه بعاطفتي .
– اذكى دعاء الناس تطلب مال تطلب رزق تطلب صحة انت اتطلبين من الله تحكمين عقلج وكلبح
– كل اللي اتكولهم يصيرون لما تحكم عقلك وكلبك وبعدين مو بس رزق يمكن هم ورث بابا الله يرحمه جان ميمشي منا لهنا اذا ما ياخذ رأي ماما ويشاورها ودائما يكللها انت حكيمة ويثق بحكمتها
– اووو امج معدلة
– غير امي
ضحك : انت عاقلة بس مرات تزوديها بعنادج
– ما اعاند بس من اضوج اني احب انعزل واطنكر وما احب احجي لان اذا احجي الوص وكثر الضغط طلع الواحد عن طوره انت زوجي بس اخوي من جهة يرزل وانت ترزل وامك تصيح وترزل غير الدوام والهوسة يعني احنا النسوان مو مثلكم تطلعون ترجعون عادي احنا اذا السيارة مشت بينا ساعة نرجع مكسرين وتعبانين حتى لو ممسوين شي
– زين واذا تسوين شي هم اتعبين ؟
باوعتله ضحك : ها حجي
ضحك بصوت عالي وحضني واخذني اله .
بقينا نايمين لحد ما اذن المغرب هو كعد من وخر راسي من ايده حسيت
اخذ العكازة مشى شغل الضوا وطلع .. اني هم كعدت انتظرته لما اجا رحت غسلت .. رجعت لكيته نازل
مشطت شعري ولبست دشداشة عريضة وفضفاضة لان سمعت صوت عم ايوب فاحتمال عمامه اجو .. نزلت حجت خالتي : نزلتي يالعروس. ؟
ما جاوبتها .. مشيت للمطبخ لكيت الكاونتر والكاع كلها مسواك بالعلاليك
تركته ورحت لغرفة البنات نجلاء كاعدة ولازمة الريموت تباوع بالتلفزيون وسرى على موبايلها حجيت ؛ سرى منو جاي ؟
-عمي ابو نور
-بس ام نور مرته مو وياه ؟
-لا بس هو
حجت مجلاء : اطلعي وسدي الباب وراج
لزمت الباب وكلتلها : نبأ راح تجيج باجر
صاحت : شنو كلتي ؟
بأستهزاء
سديت الباب وطلعت لبست حجابي ودخلت على عمه سلمت
رحب بيه وحجيت ويا خالتي ع العشا كالتلي : سوي جلفراي بلال جاب كيلوين لحم اخذي نص كيلو وسوي
باوعت بوجه ايوب يسولف ويا عمه حجيت : مشتهي شي ابالك
– والله يا عيني ما اعرف اني ما مشتهي اي بيه لحوم او دسومة
– اسويلك كباب خضروات
– لا ما اريد بيه لحم
– لا بس خضروات ما بيه دسومة
– ديلا بكيفج ووياه جاي
– ادلل
نحجي وعمه يباوع علينا : ايوب صدك شسالفة السيارة ؟ صدك جاي تنطي سيارتك لمرتك
اشرلي اروح .. طلعت من الاستقبال وكعدت ع التخم بيدي التليفون دزيت للمسؤلة الموافقة على السفر وكعدت اكتب وياها واسمع ايوب يكله : مو احسن ما صاعدة من تكسي ونازلة من كيا اني ما يرتاح كلبي تصعد ويا الغريب علمتها هي تسوق احسن
– وينها وين السياقة انت كاعد اجيبلها العين يا عمي فوكاها سيارتك مو مال عمرها
– ميخالف تتعلم وتتقوى
– اليسمعك ولا يكول ايوب ذاك عمي شو من اتزوجت صرتلها دخن يبو عرب
– ها عمي هم انت شني دازيك عليّ ؟
– لا والله عمي بس البنية صغيرة بعدين تطلع عينها
– الله كريم
حجت خالتي : عود يخليك تحجي ماكو اي شي يخصها ما مسموح لاحد يفتح حلكه
رد عمه : اي حقه مرته لا مسموحلج ولا غيرج بس اني كالولي مرت ايوب كاعد تصعد جمسي وحجي ما يعجب سكتتهم بس كاعد انصحه لا يجيبلها العين
– بس مو على خواته شديد العقاب ويمها غفور رحيم
ايوب : ويكلك ليش تصير عصبية يمه ترا مالها داعي هذا الحجي عيب والله عيب غفران لو مسوية نص اللي يسوو خواتي مو اكتلها اعلكها والله .. كافي اللي جارعه وساكتتتت لعبن لعب ما خلن شي ما سونه بيها تمالخت ويا وحدة منهن سمعتيلها عركة بنص البيت حتى اكتلها اني اذا سمعتها تجاوبج اطيح حظها وانت مركبة البيت براسها وترزلين لو حاسبتها حالها حال بناتج وتصافين البنات وما تفرقين كل هذا ما يصير بس خليني جارعها وساكت
حجه عمه : ميخالف ابني خواتك خواتك .. خطار يوم يومين تجي قسمتهن ويروحن لا تخلون المشاكل بيناتكم تكبر
-عمي ذبحوني حسرة احجيلي كلمة ويا مرتي سووها مشكلة ما طلعت هاي
– لا حقك شني شلون بالله الواحد ما ياخذ راحته ومو كدامك البنية اصيلة اني حيل تعجبني وموقفها مال عمليتك منكبة وتربة وكاعدة ابابك ما طول انت طايح هم احد سمعلها حس ثغيب صريخ لا والله اصيلة
حجت امه : لا يغرك دينها ومدينتها وعبايتها السانها لو طلع زلمة اليكدرله ها طوله
حجه : هن ذني امهات العبي .. ما اقصد كل وحدة لابسة عباية عن فرض او عادات لا على التلبس عباية عن دين وقناعة ما تنكدر .. ما وصلت الهالقناعة لا ما قرت واتعقلت وعرفت دينها شيسمحلها وشيرضالها .. والله متعامل وياهن من تحجي وحدتهن فنك تكدر ترد عليها تسكت زلم .. غيرهن يسكتن يخجلن هن لا اذا يحسن انت غبنت حقهن بشوية ينطنك طينتك بكصتك كويات عمي .. عفتهن وخجلهن بلبسهن باخلاقهن بممشاهن بصوتهن بس مو بحقهن ما يستحن بحقهن ياخذنه من عينك مكابل
ضحك ايوب : صدك متعامل ويا منظمات نسوية لبسهن عباية احاذر بالحجي وياهن اعرفهن حديات
– جديات والله اخذها عادة وشوف كل صاحبة عباية لابسة العباية بقناعتها ومتمسكة بيها وتشوف ايمانها وصبرها وهدوئها ددوسلها على طرف وشوف اذا ما تلكى السانها احد من السيف .
ابتسمت من مكاني وكمت
الحمدلله اكو اليدافعلي بظهري هذه هم من نعم ربي .. حاضر حتى بغيابي وجافيني شر وسواسهم .. الحمدلله رب العالمين على منه وكرمه .
كعدت اعزل بالمواد اتصلت بيه امي حطيت هيتفون وكمت احجي وياها سوت اتصال جماعي بيني وبين خواتي وخلصت العشا والتعزيل كله واني اسولف وياهم بالمطبخ واحنا نحجي بسالفة احمد
دزتلي رسالة المسؤلة بتاريخ السفرة يوم الأحد
باوعت اليوم اربعاء يعني بعد ٣ ايام ..
كملت شغلي وسويت كباب مال خضروات وقسمته قسمين قسم خليت عليه لحم والثاني لايوب .. رحت حطيت العشا عمهم رايح حجت خالتي : جا مو كتلج سوي جليفراي
– خلي على غير يوم
– تتعاجزين للدياحة والسربته ما تتعاجزين .. بس الشغل بسرعة بسرعة
– طلعتي لو جامعة لو شغل واثنينهن مستفادة بيهم بس الشغل هنا لا حمدا ولا شكورا بس كسران ظهر
ايوب : غفران
ابتسمت : اتشاقى والله
اخذتلي لفة من الاكل وكلاص جاي وصعدت فتحت اللابتوب وطلعت حلقة مسلسل الكارتون فلونا .. احس بشي من الهدوء والراحة من اشوف هيج افلام كارتون كأنما ارجع الطفولتي لما جان بيتنا عامر بوجود بابا ومليان حنية وكلوبنا مليانا امان .
دخل ايوب كتله على السفرة
كال : اني اخذ الجوازات واتفق وياهم ونطلع بنفس اليوم
– باجر راح اروح من الجامعة لبيت اهلي .. وراح اخذ جنطة ملابسي ويايا ما محتاج السيارة
– باجر عندي شغل بالهيئة
– بعد ما ترجع للساتر !
– الحرب تقريبا خلصت حتى مشطنا المناطق الأرض تحررت الحمدلله بقت بيانات ودرج معلومات التاخير من رئاسة الوزراء اعلان بيان النصر .. كاعد ارتب الزم وحدة على اطراف بغداد ويكون شغلي المباشر من الهيئة .
تنهدت وانقهرت باوعلي ، حجيت : شكد كلمة سهلة ! الحرب خلصت شنو الثمن وشكد انطينا عزاز لحد ما خلصت ؟ ما انسى الحرب هاي اخذت اعز شي على كلبي ابويه وضيعت احلامنا وسعادتنا وحولت بيض ايامنا سود .. كلمات سهلة ع الما ضاك الوجع منها .
: جا شتكولين على ابوي اللي لا هو عايش ولا هو ميت واني هذا حالي ما نكول غير الحمدلله نسوانه مستورات ومقدساتنا محفوظة وكاعنا بخير .
بقينا نسولف شوية
وثاني يوم كعدت للجامعة من الصبح ايوب كعد ويايا حضرتله ملابسه
نزلت سويتله ريوك وحطيته ع الطاولة وصعدت بدلت بسرعة ونزلت اتريك ع السريع كتله : راح تاخذ السيارة الحوثية لو الجمسي
– اخذي السيارة راح اطلع بالحوثية لو عندي وقت جا وصلتج وياي بس اليوم خميس تقفل للستار اتأخر لحد ما اوصلج وارجع
– لا ما عندي شي اني اروح
– بس ديري بالج وسوقي على راحتج لا تسرعين
سلمت عليه وطلعت علي وبلال واكفين برا منتظرين كلت الهم : صباح الخير
ردوا علية … واني انداريت للسيارة هستوني صعدت دا اشغلها شفت نادية من بعيد صارت كبالنا .. دك الجامة ايوب .. نزلتها حجه : خابريني الظهر من تخلصين حتى اذا هاي امرلج اوديج لاهلج واخذ السيارة خوما تاخذيها وياج
– تمام
حجاها وياي .. وابتعد رفعت الجامات
شفته باوع النادية عكد حاجبه واندار راح صعد بالسيارة الثانية
مشيت على كيف واني اباوع عليها .. وعليهم بالمرايات
مرت مني ومشت للسيارة .. خففت .. ايوب صاعد وكفت تحجي .. بقت تحجي ايوب .. مدري شحجه وياها وصعد بسرعة وداس … مر من عندي خفف وحجه : ليش واكفة
دست بانزين وطلعت بطريقي .. بس ضجت شنو رادت منه وليش نزل وانطاها مجال وحجه جان يكدر يتجاهل ويمشي .. وصلت الجامعة .. حسيت فعلا كلام عمه صحيح اكو نظرات انتباه لما اجي بسيارة ايوب بينما لما اجي بتكسي لو يوصلوني ما اشوف هاي النظرات ..
صفيتها بالكراج ورحت اخذت كوب كهوة ومشيت للمحاضرة
اليوم كله هم زين ما شفت الشيطان اللي اسمه ساري الحمدلله ما طلع بوجهي
كملت دوامي وخابرت ايوب كال؛ بعدني بالهيئة ارجعي واني امرلكم بس اكمل هم اسوف الوالدة مشتاقلها
تمام ..
طلعت بس واجعت صعوبة بالطريق ما اعرف الطريق من الجامعة لبيت اهلي بقيت كل شوية اسال احد من وين اطلع لهذه المنطقة لحد ما وصلت منطقتي اندليت وصلت لباب بيت اهلي .. احمد اخوية صف وراي قفلت ونزلت ، نزل سلمت عليه كال : جا الحجي وينه وحدج
-راح يجي وراي
– وشمصعدج بالسيارة هاي ؟
– ليش ؟
– مو مال عمرج ضربتيها احد ضربج ولد الحرام هواي يتصيدون
– اني هم كارهتها دا افكر اشتري سيارة صغيرة
-عندج فلوس ؟
ابتسمت : بس فلوس ذهبي اقل ال١٥ مليون
– اي يجيبن سيارة صغيرة
نحجي واحنا ندخل للبيت سلمت على امي طارت بيه من الفرح
وجهال احمد بس هيفاء مثكلة بسلامها .. كملنا غدا كتلها : هيفاء ايوب راح يجي وراي احتمال يتغدا هنا احسبي حسابج بالغدا
حجه احمد : غير تحجين نسويله شي
– ايوب بسيط بأكله ما يحب الفخفخة.. من جدركم عادي
كلمنا وسويت جاي اني وامي وكعدت وياها نسولف احمد اجل سالفة الشيلة لان صارت مشاكل بس بعدها اباله ، اجا زيد ابن اخوية كال : عمه الحجي اجا
كمتله وامي كامت لبست ربطتها وعبايتها لكيت احمد مستقبله وعلي جاي وياه كتله : ها الله يساعدك
– هلا بيج ابويه
– متغدي
– لا ارجع واتغدا ان شاءالله اجيت بس اشوف الوالدة
صاحت امي : هلا ومية هلا بهالجية هلا يبعد كلبي هسه فتشن عيوني من شفتك على طولك
كاملها باس راسها وهي تكله : الله يرضى عنك وليدي شلونك يمه شلونها ارجيلتك ؟
– الحمد لله احس ع العكازة وبعد الله المشافي
– خير خير يوليدي كله خير
عفته ويا امي واحمد ورحت حميتله مركة الفاصولية وسويتله زلاطة وخضرة ووديتله غداه وحطيته كباله كالي : الله لا يصغرج ابويه
كعد يسولف وياهم شوية وطلب مني السويج انطيته اله
حجه احمد : حجي ولو تدخل بس السيارة هاي مو مال عمر غفران .
التفتله : ليش
– جبيرة عليها وتجيبلها عين
دك على جتفه وكاله : اختك شاطرة وبالف زلمة لا تخاف عليها
طلع ودعوه ورجع يهز ايده يكول : بالف زلمة والله بمطي ما اسرحج
حجه علي : لو ع السيارة زين لك ذالتني حاسبتني اشتغل سايق عدها والقران ذاك اليوم لو ما الحجي جان لزمتها خبزتها خبز
حجت امي : خير جا هم نزل وهم اندبچ ع السطح شمالك ؟
ضل يسولفلها ومطلعني اني كلش اني ما احب اتجادل واحجي وياه لان ميحترم تركتهم ورحت تمددت بفراش امي وغفيت .. امي ما كعدتني لحد ما اجت هديل اختي قبل المغرب وبعدين اسيل ونورة والتمينا جهال وهوسة وكلنا ملتمين بس هيفاء مكشرة وضايجة من عدنا لان احمد اجل الشيلة
بقينا كبنات نسولف بيناتنا كلشي يصير ويانا ابيت عيالنا
وسولفتلهن ع الجامعة وع الحادث والضرب سيارتي امي حذرتني ارجع اسوق سيارة ايوب خاف تجيبلي مشاكل كتلها : اريد اشتري سيارة شكد عندج تجمليني
حجت اسيل اختي : يا سيارة غفران دكعدي حطي رجليج بالكاع هسه مو زين رضالج تخلصين جامعة
– وشدخل هاي بهاي اني اريد سيارة اروح وارجع بيها احسن من دوخة الكراوي والتكاسي
– دكعدي يمعودة تريد شغل وتريد سيارة وتريد جامعة
حجت امي : ووين العيب لو رادت شنهي حرام لو ما يصير
– رجلها زين وياها خل تكعد وتسكت روحي جامعة وتعاي واسكتي
نوره : كلام اسيل صحيح غفران انت جاي تتفرعنين حتى علي جاي يشكي منج
– يحقله يشكي !؟ وهو منو طلب منه يجي يعرض خدماته لايوب بس حتى يكعده من الشغل !؟ كافي ذلني وغلط عليه كدام عيالي
نوره : غير اخوج ويريدلج الزين
– هاي شبيج يا زين ايوب وكتها صار عصبي وطردني ويكلي ولي ويجي هو يغلط ويهين وتريديني اعديها وياه كأنما ما صاير شي !
هديل : لا حقج حبيبتي خل يولي
اسيل : لا هديل لا تقويها انت همين علي منو غير اخوها
– اخوية خل يحترمني واحطه على راسي
– عيالج ما محترميج وحاطتهم على راسج توصل لاخوج تلزمج الكرامة
استغربت ردة فعل خواتي ..
حجت هديل : يعني راح تتركين الشغل
– لا صدك يوم احتمال هذا الأحد نسافر اني وايوب للبنان عندي دورة هناك
حجت نوره : وين يكدر يسافر ايوب مو رجلة
– هالدورة مهمة تفيدني وخطية هو كال اني اخذج
اسيل : والله راح يهج منج ومن طلباتج حيل جاي تتكبرين جامعة وسيارة وشغل و سفر دكعدي رجال مريض اكعدي هسه المفروض والله حتى جامعة ما تروحين تكابلي وتكعدين
– ممقصرة وياه باي شي احضرله كلشي قبل لا اروح وهو راضي بكلشي اسوي وبعدين على منو جاي اتكبر وين الغلط لو ردت اشتري سيارة لو ردت اشتغل وين التكبر وعلى منو متكبرة !
امي : كافي يمه سدن هالموضوع
هديل : ديلا هسه عوفن هالمواضيع خل نفض العشا
رجعت اسيل حجت : تكبرج بطموحج رجال زين وياج وما مقصر بمصرفج اكعدي شنو شغل وشنو والله اريد اشتري سيارة
صفنت بيها : اكتبيلي ضمان ايوب لبعد سنة راح يبقى زين مراح يتغير .. واذا تغير شنو الممكن يصير بعدها !؟ دفعلي قسط الجامعة هاي السنة لو تغير وكال اني ما ادفع السنة الجاي لو شوف شصار ارجع من الصفر .. صح زين بس يبقى رجال وديتأثر بكلام امه السوم منعني من شغل باجر تكثر قيوده
– اي غير رجلج
– على عيني وعلى راسي اني ما ممكن اكسر كلامه لو اطلع عن طوعه بس لا بأس بالمحاولة ما طول دا اشوف بيه مجال يقبل ممكن اشتغل مراح استسلم وراح ابقى ازن واقنع لحد ما يقبل
– اي واشتغلتي وشيصير بعدين
– اقلها اضمن نفسي .. اني اللي صار مو هين عليه لما اخواني جبروني وبطلوني وكسروني لمصلحتهم .. ايام الضعف العشتها بين اديهم ذيج الايام ما اريد ارجعلها وما اريد اعيش بشخصية اللي لا حول ولا قوة الها .. الشارع يقوي والشغل يعلم والفلوس ما تخليج محتاج لأي بشر واني هذا طموحي .. ما اريد اكون محتاجة لأحد …
نوره : والله اشوف طموحج هذا راح يوكعج الصراحة
– وما توفيقي الا بالله .. ربي هو اللي حطلي ايوب بطريقي واصراري هو اللي حطني على طريق طموحي اني لو مستسلمة للأمر الواقع واقتنعت اخواني بطلوني ويوم اللي كالي ماكو جامعة وممنوع وساكتة وراضية وما لاحة مجان قبل بس اني ابقى احاول وياه لكلشي يخصني لحد ما يقبل واطلع واسوي اللي اريده برضاه .. برأي اني مني الأصرار ومن الله التوفيق .
امي : الله يسهل طريقج ويهدي رجلج ويضل ساندج بجاه هو الحسين
ابتسمتلها : ما طول دعواتج ويايا اني بأمان
ضحكت : يم غير سباح كلبي شلون ما ادعيلج
كمت فزيت يمها وحضنتها وضليت اضحك واعيب على خواتي وبقينا نضحك
كملنا اكل وسوالف ولليل ردنا نفرش ردت اصعد شفت امي لحكتني
حجت : لا تضوجين من خواتج يمه ولا تحجين كلشي يخصج رجلج كدامهن
– محاجية شي خصوصي بس حياتي العادية
– ادري ييمه مرات حتى الاخو المن امج وابوج يتنغص من يشوفج تكبرين
– خواتي هم يعني ما يتمنولي الخير بحجيهم حسيتهم متضايقين كانما يريدون بس يكعدوني من كلشي
– لا هم يفرحولج ويحبوج بس انت وياهن يمه نفس الواقع بيت وعيال ورجال من تطلعين عنهن وتسوين الامور اللي هن يتمنن يسونها وما يكدرن راح يتضايقن .. مو منج من واقعهن من يشوفن انت مثل واقعهن بس ما استسلمتي قنعتي يدخلج جامعة وقنعتي يركبج سيارة وقنعتي شغل وهو ساندج ورجولتهن مو سند .. الناس ييمه تحب تشوف اللي يعاني وتشكي حاله وتدعيله بس تكره تشوف اليعلى ويكبر وهم يبقون على وضعهم ما يتغيرون ..
– بس هاي غيرة يعني معقولة خواتي يغارن مني بالعكس احنا كلش نحب بعض
– الغيرة ييمه موجود بكلب كل انسان اكو اللي اتحفزه وتخليه يغير واقعه ويصير براسه خير واكو اللي يهبط بسها الناس ويحاول يقلل من اللي يسووه لان هو ما يكدر يسوي اللي انت جاي تسوي
اسمعيها نصيحة من امج ييمه
الله من بعد شوط عذاب فتحلج ابوابه واني اعرف ميسرلج امرج وواكفلج طول ما انت برايته وناخيته وحاطة امورج بيده والحاط اموره بيد ربه ربحان بس يمه لا تحجين بتوفيقج كدام احد حتى كدام خواتج
تعاي بتكسي ابد لا تجين بسيارة ما طول هنا ما عدهن سيارات واشكي مثل ما هن حالهن بالضيم انت هم اشكي عيالج اشكي عصبية رجلج اشكي مساوى الجامعة وكأنما انت ما مرتاحة ولو بدج بس تبطلين .. ترا عين الاخو امضى من العدو تصيب وتأذي يغفران يمه .
– ان شاءالله يمه
– واسمعي اكلج لو صارت سفرة لينان لا تحجين روحي وتعاي بلا ما تعلمين احد
– يعني حتى خواتي ما اكولهم !؟
– حتى خواتج .. مشغولة وما رديت .. عندي جامعة وعيال وما الحك ارد .. شني كاعدات ابيتج لو يدرن عنج لا تفكين عين عليج .. عين بنادم تكتل ييمه روحي وتعاي بلا ما يدري احد ..
واني عندي ٥ ملايين يمتى ما اتعازيتيهن كدامج اخذيهن اني افرح ييمه من اشوفج تكبرين واحس ربي استجاب كل دعواتي وفرح كلبي بيج وما خلى اخوتج هالنذلان يكسرونج .. راح اكلج يمكن ما تصدكيني والله .. غير عدي اثنين ولد و٣ بنات غيرج بس ما ارتاح ييمه غير من انتجي عليج امنيتي من هالدنيا ييمه انت التصيريلي تجوه بهالزمان وما تخليني وحيدتي
حجتها ودمعت حضنتها : ماما اني بروحي افديج والله لو اعرف اعوف الدنيا كلها واكابلج ما اعوفج ابد
– الله يقويج ييمه ويزيد بخيرج اكثر واكثر بحق هو علي ابن ابي طالب
باستني واجت هديل : ها شو لابدات
حجت امي : لا سويلفه هيج بيني وبينها
هديل : اي خير ان شاءالله
كاعد ديحجون دك تليفوني جابه زيد اخذته .. ايوب
رديت عليه كال : ها شلونه الوضع ؟
– زين متونسين انت شكو ماكو ؟
– اخذت جوازي وجوازج وفيزتهم وحجزت الاحد بالليل سفرنا من مطار بغداد لبيروت
– هم راح يسافرون الصبح
– اي شلنا علاقة بيهم الدورة تبدي يوم الاثنين
– ماشي اكولك كون خالتي حجت ؟
– ما حجيت لامي بعدنيولا اكول دورة لغفران ولا هالامور وصفولي دكتور زين على رجلي ببيرون ورايح وماخذ مرتي تساعدني هناك وهذا الينكال غير كلام ما ينكال غفران .
– هاهية
– ديلا ابويه شوكت ترجعين باجر
– بكيفك وكت اللي تكدر تعالي
– اخذي راحتج يمهم اشبعي من امج اني بالليل امرلج
– ماشي .. ااا بس ايوب
– كولي
– بس اليوم الصبح يعني شفتك نزلت من السيارة وما اعرف شنو حجيت
– على شنو نزلت
– انت تفهم المهم ياريت بعد مينعاد الموضوع
سكت لثواني وحجه : ديلا .. اخذي راحتج مع السلامة
سد التليفون .. تنهدت
وكعدت خواتي يحجون وواكفين ويصيحون صاحت هديل : ها غفورة شو ضجتي اكو شي
– لا بس .. نادية
– شبيها
– اليوم شفتها تقربت من سيارة ايوب وهو نزل وحجه وياها
– شرادت منه ؟
– ما اعرف
اسيل : وهاي بعدها تفتر ورا رجلج شلون عرامة شلون صلافة رجال اتزوج واستقر ودودتها بعدها ما مستقرة
– اني اللي ضوجني ليش نزل وليش رضى يحجي وياها !؟
حجت امي : اخذيها بالزين يمه وكولي رزلها ومشى
– ما هو اذا رزلها يعني اهتملها ! ايوب مجان يرد عليها ولا يوكفلها ابد
هديل : لا تفكرين زايد يمعودة ختولي
نوره : وليش ما سالتي شعندك نزلت
– اني ما احب احجي بموضوعها وياه اني اريده ينساها وينسى طاريها بس ما ادري شلون طلعت مني كتله التصوف هذا ما اتمنى ينعاد مجاوبني سلم وسد الخط بوجهي !
حجت امي : الرياجيل ما يحبون احد يتحكم بيهم لو يكللهم شتسوون ماطوله مبتعد منها اسكتي يمه ولا تحجين خلي الزلمة ناسيها.
بقيت اسمع لنصايح امي وساكتة
نار غيرة تفور بكلبي بس عقلي يكلي اسكتي وعدي الموضوع
ثاني يوم للعصر خواتي كلهن راحن اني سويت حملة على غرفة امي نظفتها كلها وعزلت بوفياتها ورتبت كلشي .. لحد ما اجا ايوب سلمنا على اهلي وصعدت وياه .. حجه : متعشية ؟
-لا والله التهيت انظف غرفة امي ونسيت اكل
-جوعانة كلش لو نلحك نروح نجيب نبأ ونجي
-راح تجيبها صدك ؟
-اي والله خابرت ابوها وجنه ما صدك كال اخذها
-ما يريدها عيني سودة عليه تلكاها كوة تحملت هاي الكم شهر البعدت بيهن عن امها
– بعد شسوي ما فاد الحبس و العقاب خلي نجرب الثواب والمجال على كولتج ننطيها فرصة بلكت الله تتعدل
– الله يحفظك الهم واليه اهم شي
ضحك وكرص خدي : ويحفظج ابويه
– جاي تكدر تسوق لو صعب
– على رجلي اليمنى اليسرى ما جاي اضغط عليها بس جاي تأذيني وكل ما جالها دا تصل .. بس لا ابقى اعرج طول عمري من وراها
– لا اسم الله تطيب ، على كولتك رايح للبنان كشف صدك خلي نكشف هناك بلكي اكو دكاترة احسن
– الله كريم
مشينا واني افكر .. دا اثر بايوب اكثر من اي شخص ثاني
دا اكدر اقنعه بامور مستحيل يقنع من احد يسويها .. شكد حجوا وياه بسالفة نبأ قفل صارله فوك الشهرين مدري ٣ .. وهو رافض يجيبها وبمجرد ما حجيت سمعلي ونفذ .. الحمدلله رب العالمين ياربي اكدر اقنعه بموضوع الشغل وابقى اشتغل .
وصلنا للفرع مال بيت اهل يوسف خابر ايوب
طلع يوسف شايل جنطة بته ونبأ طويلة وعود لابسة حجاب وتطفر وتصيح : هلااااا خالووووووو
والحجاب طاير طاير .. ضحكت على منظرها ونزل ايوب استقبلها وباسها براسها
واني نزلت اجت سلمت عليه وكلت الها : بس حطي الحجاب عدل شهرتينا انت منو طالب منج تلبسين حجاب
ضحكت وصعدت ورا سديت الباب وراها .. وهي خبصتنا خبص بالسوالف كل سوالف بيت جدها حجتلنياهن قاطعها ايوب كاللها : خالو جا انت على كيفج ذبيتي السوالف ذب ضميلج سالفة سالفتين للبيت خوما نضل نصفن هناك
– لا خالو اعيدهن لامي وبيبي
– رايتك بيضة يربي يا خالي وانت تحجيهن صرعتينا انوب نسمع الأعادة
– اييي خالو غير مشتاقتلكم
حجيت : دعوفها البنية فرحانة احجي يعمري احجي اني اسمعج
هنوب كلت الها اني اسمعج لو استرسلت بالزايد .. صف بينا يم مطعم وجبات سريعة نزل جابلنا لفات همبركر ولخواته هم .. وشغل السيارة واحنا ناكل ..
وصلنا البيت ونزلنا اني وياها ..
وهي راحت تركض وتصيح : بيبييييييييييييي ماما وينج
دخلت للاستقبال كامتلها خالتي فزت : يا ولج منو جابج
ركضت نجلاء طبت فتحت اديها تحضنها وهي تكلهم : خالو ومرته جابوني
حضنتها نجلاء ومدمعت عيونها وهي تحضن بيها
طبت سرى هم حضنتها كلهم فرحوا بيها دخل ايوب راحت نجلاء باست راسه وشكرته : مشكور والله فرحت كلبي الله يحفظك ان شاءالله
– الله يخليج ابويه بس اكعدي نحجي
غفران انت حضريلي هدومي يابه حتى اسبح
عرفته كاعد يمشيني حتى يحجي وياهم
طلعت ووكفت يم الدرج وهو كاللها : اسمعي نجلاء خوية وهاي امي شاهدة وابوي وان جان عاجز بس هم يشهد من مكانه والله وسماه يا خوية ما اكرهج وما بودي اذيج ولا اذي بتج كل الرايدة اني نعيش بدون مشاكل ..
مرتي انا متزوجتها لراحتي لا لخدمة البيت ولا حتى لخدمتي انا رجال كبرت عمي حتى شيبت رايد استقر تصير عدي عائلة اطفال ما جايبها حتى كلام مرتك ومرتك .. واجبها تنظف وياكم وتغسل حالها حال كل واحد بهذا البيت بس مشاكل وتفرقة ودسس والشغل براسها وهي تشكي وامي تحجي اني مالي حيلها .. ثقي بالله العظيم اني جنت ناوي ما اجيبها وعازم على رجعتج لبيت رجلج وهي الرفضت كالت حرام عليك مرة ما تريد ترجع وهذا بيت ابوها مو من حقك تطلعها من بيت ابوها وتخذلها .. رجعلها بتها وانطيها فرصة ثانية كل انسان يغلط .. رغم غلطج وياها وهي كعدت التبررلي غلطج حتى ما اعاقبج ..
والله خوية هي تحبكم والله شاهد ما مرة حرضتني عليكم يوم الطكت روحي وردت اهج منكم ما رضت وكالتلي الما بيه خير لاهله مابيه خير للناس واني ما ارضى تترك اهلك وابوك عاجز حتى تكابلني اني كل الاريده يحسبوني مثل اختهم ويعاملوني بما يرضي الله .. تفتحين صفحة وياها خوية لو تضل المشاكل تجر وتعر !؟
حجت نجلاء : ما عندي شي وياها هي هم مثل اختي
– حجي السان خوية لو اشوفه واقع ؟
– لا ان شاءالله واقع
– الحمدلله اني هذا الاريده البيت بيت ابوج خوية وهاي بنيتج اعدلي نفسج واصلحيها وعيشي تكولين خوية اريد رجل خلي البنية ترجع لابوها ومن عين باجر ازوجج
حجت خالتي : بره تهد ضناها على مود رجال شلها بيه
سكتت نجلاء وهو حجه : بعد هي بكيفها وان شاءالله باقرب وقت بس الكالج شغل يناسبج راح اشغلج بيه بس هاي كدام امي توعديني نجلاء ما تسودين وجهي ومشاكل ماكو ؟
نجلاء : لا والله وداعت ابويه واذا تلكالي شغل خو بعد فضلك فوك راسي ما انسالكياه طول عمري
– خادم اني بس خل ارجع من لبنان بخير وسلامة وتأمريني امر اخابرلج واشوفلج شغل يناسبج بس كل الاريدج تريحيني خوية من المشاكل مفهوم
– صار
حجت امه : جا لبنان شنو راح تسافر
– يمه رجلي ما جاي انام الليل من وراها حيل اذتني
– سودة بوجهي يا يمه الوجع بيه ولا بيك
– لا اسم الله عليج وصفولي دكتور زين بلبنان وهالحجزت ع الاحد وراح اخذ غفران هناك وياي حتى تساعدني
-لو ما ابوك جا اني رحت وياك بس ابوك منا ما اكدر اهده
-عساج سالمة يالغالية ديلا هاجن هذا عشاجن جبتلجن همبركر وبيبسي واني خلي اصعد انام .. ياله تصبحون على خير
وانت من اهله
عافهم وطلع شافني واكفة يم الدرج سد الباب ورا و اجا : ام راس جا مو كتلج اصعدي
– الفضول قاتل
ابتسمت
ضحك وكام يصعد
صعدته صعبة يلزم بالعكازة وبالدرج ويطفر على رجل وحدة
اني وكفت وراه لحد ما صعد
ثاني يوم داومت صباحي حضرت ٣ محاضرات ورحت قدمت اجازة لسفر ويا زوجي لإن جريح حرب .. وانطوني ١٠ ايام اجازة .. اخذتها ورجعت
ثاني يوم كعدت حضرت ملابسي وملابس ايوب بجنطة سفر وحدة
كال : خاف ما تكفينا بس هاي الجنطة
– ليش
– غراضج وغراضي وين تكفي
– اي هم حقك خاصة الميكب مالي لازمله جنطة الوحدة
ضحك وهو يكلي : واني من يوم شفتج وشفتيني غير هالحمرة السحرية مال امي بشبابها ما تحطين
ضحكت بصوت عالي : ما اسمحلك تتجاوز على الميكب مالتي
– حلوة بلا مكياج ابويه اصلا الله يعرفني واطاني وحدة مثلج لو انت مثل سرى لو باقي البنات تحبين تزورقين بوجهج وحق هو علي الباب ما اخليج اتشوفي بس غير الله يحبج مدري يحبني وخلاج هيج
– لا تدوخني يمعود خليني اختار الاوتفت مالتي على راحتي
ضل يضحك طلعت بنطرونين و٣ قمصان و٤ ربطات وحذاء كعب ناصي وحدة وباتة .. صفطتهن ورجعت حطيت ملابسه.
سلمنا على اهله وبلال وعلي وصلونا لحد المطار
اني اسحب بالجنطة وهو على عكازته يمشي انتظرنا ساعتين لحد ما صعدنا الطيارة … اني راكبة طيارة من قبل ويا امي لايران مو غريبة بس هالمرة اريد راسي يرتاح .. بطني تهدا .. خلصتها بالحمام اتقيى رغم بطني فارغة مماكلة شي ثكيل عصارة بطني كلها ذبيتها وبعدني روحي تطلع اريد اتقيئ وما يطلع ويايا شي
ارجع اكعد شوية .. وارجع
الوقت يمكن يطلع ساعة اقل بس روحي طلعت بالساعة
اخذت جاي وشربت بس هم رجعت اتقيئه لحد ما وصلنا هناك .. جان الجو ببيروت يختلف عن بغداد .. بغداد بردها يمشي بفانيلة وبلوزة .. بيروت ثلج تصل بالعظم
بالموت لما وصلنا للفندق الحاجزين بيه ويا الافراد اللي موجودين بالدورة
ذبيت روحي مثل الميت نمت ما دريت بروحي ..
ثاني يوم كعدت طلعت ويا الكروب الخاص بالدورة
وايوب راح التقى ويا ناس يعرفون ابوه من جان يجاهد بسوريا
اني اخذت دورة ٣ ساعات يوميا .. ع الحاسوب تعليم رصد وبحث مواقع واستكشاف .. ورجعت للفندق .. طلبت اكل اكلت بس ما اشتهيت اكل
مدري شصارلي من سافرت نفسيتي كلها كلبت
عود كلت الله راح اشوف لبنان وافتره واتونس
تالي من كد ما لعبانة نفسي ودايخة يا دوب اكمل الدورة وارجع انام تكول بالعراق عمري ما شفت النوم
بقيت كم يوم هذا الروتين
اكعد اتقيىء لحد ما امل واروح بالبلكون بالبرد ارتاح شوية وارجع ابدل واروح للدورة ..
صارولي هواي صديقات ومعارف بالدورة كل البنات الويايا نفس النمط مالتي عباية وعقيدة مشابهة .. الضيافة يجيبولنا مناقيش وجاي .. لو كيك .. لو كهوة كل شوية ضيافة شكل ..
من بعدها ايوب كال صديق لبناني بالمقاومة عازمني اني وياج عنده بالبيت
بدلت اني وياه ورحنالهم زيارة الرجال اسمه محمد وزوجته زينب واطفاله ٣ حسن وحسين وفاطمة لبنانيين بس هلكد محبوبين اثار الدنيا تلتمسها من اول ما تحط رجلك بعتبة دارهم سيف الإمام علي بلوحة كبال عينك
دخلونا للصالة وزوجته بالعباية سلمت على ايوي واجت بوستني
هلكد حلوة وترفة وهم ولا قطرة مكياج بس حلوة حيل واطفالها تكول لعبات على جمالهم ونظافتهم
رغم لبنانين ولهجتهم مختلفة عنه بس هلكد تونسنا يمهم وضحكنا ووعدونا لما يجون للعراق بالاربعينية راح يجونا للبيتنا نستضيفهم .
كمنا حتى نطلع دنكت البس حذائي
ورفعت راسي وكمت بسرعة ما احس الا الدنيا افترت بيه وعيوني صارن سواد وتوازني اختل لزمت بعكازة ايوب بدون ما ادري ووكعت راد يوكع هو الرجال لزم ايوب واني وكعت بالكاع ..
كلهم تراكضولي .. احس عليهم بس احس اكو طنة باذاني كاعد يرجع الشعور شوية شوية فتحت عيني هم ديذبون مي على وجهي ويضربون على خدي خفيف حتى اصحى
حاولت اكعد بس بعده توازني ما مضبوط احس الكاع من احط ايدي مثل التغوص او تتحرك واسمع ايوب يكللهم : من لما احينا للبنان ولهسه هي مدري شبيها ابد ما صحت تغيير الحو هنا ما ناسبها
وكفوني على حيلي واخذوني لمستشفى ..
اخذولي فحص ضغط .. ضغطي زين ما بيه شي
سوولي تحليل دم .. وكعدنا اني وايوب وصديقه اللبناني
شوية وطلعت الممرضة صاحت :غفران عصام
وكف ايوب كالتله : المدام زوجتك
كاللها :نعم زوجتي
اخذ منها التحليل وهي تكوله : مبروك يا استاز المدام حامل
ايوب رفع حواجبه بفرحه وكاللها : صدك .. الله يبارك بيج ههههههه
كامله صديقه وهو يكله : شكلا لبنان خير اعليك يا رفيئي وهي ربنا رزئك على وشا ..
سلم عليه واجاني اني مبتسمة
باس راسي وكال : مبروك والله يتمملنا على خير
-ان شاءالله
رجعنا فرحانين للفندق وايوب طاير من الفرحة بالحمل ويكول
اذا ولد اسمي علي واذا بنية زهراء
-خلي ربنا يتمم خلقته ويجي سالم ولد بنية وشتسمي سمي
-الف الحمدلله والشكر الله عوضنا
نمنا الليل متحاضنين وفرحانين بالحمل
ثاني يوم صديقه محمد اخذ ايوب على حكيم شاطر على كولته علىمود رجل ايوب .. واني رحت للدورة كملتها ورجعتله .. كال : الدكتور ما بشرني بخير يكلي رجلك يحتاجلها عملية ثانية
– لا والله
– اي والله والا يكلي تبقى اعرج طول عمرك
– اسم الله ربي ايوب لعد سويها
– من كل عقلج عل الالم الشفته بالعملية واعيدها لا والله لو اموت اني ما احب جو العمليات والمستشفيات اتخبل منها
-وتضل هيج
-ربج موجود يجي الاربعين واروح لابو عبدالله مشي واطيب وربج ما عليها شي .
– والنعم بالله بس لازم طبيب ايوب
– هو طبيبي يمعودة خليها على الله
اخر يوم قبل رجعتنا لبغداد ..
جان اكو مهرجان بلبنان قدموا لايوب دعوة لحضور هذا المهرجان لما عرفوا بيه قائد بالحشد وجريح .. حضرنا المهرجان اني وياه ودعوه للستيج بأسم المجاهد العراقي الحاج ابو عرب
ساعدوه وهو يصعد للاستيج ولدقايق شرح اللي صار وياه من استشهاد اصدقائه وجرح والده ومعاناته بتحرير ارض العراق من فلول د١عش والسيطرة على اراضيهم
حيوه ورحبوا بيه وانطوه تكريم بأسم زعيم المقاومة اللبنانية
وكتاب شكر لجهوده في حفظ المقدسات الإسلامية في العراق .
ومن بعيد وجهولي الشكر لمساندتي وصبري على زوجي في الجهاد
وصاروا يقصون قصص الايثار والتضحية من رجال و شهداء العراق وتضحيتهم في سبيل وطنهم وصاروا ياخذونا كقصة مثالية للوقوف بوجه اسرائيل وردعها عن الاقتراب للبنان وشعبه .
رجعنا للعراق ..
وايوب من الباب صاح وبشر امه بالحمل مالتي طارت من الفرح من درت بيه حامل وتصيح : هيج ربي واسوف جهال ايوب ينرادلي بخت.
من رجعت من الدورة حاولت اقنع ايوب ما يبطلني وانو هالشغل راح يفتحلي ابواب هواي بالحياة بس قفل وما قبل اصلا ما رضى افتح الموضوع وكال ..
– اكتفي بجامعتج وانت حامل لا تضغطين على نفسج
انقهرت حيل بنفسي اشتغل واعتمد على نفسي وما ابقى بحاجة احد بس ايوب رفض تماما وما اكدر اخالفه واذا عاندت ايوب راس يابس اليعاند وياه يكوم يطغى فكستت اقلها كاسبته .
رجعت داومت بالكلية اول ما دخلت الكلية
اللي اسمه شاري جان واكف هو وصديقه كدام باب الدخول للجامعة ..
لما شافني ابتسم ورفع ايده سلم .. اتحاهلته ومشيت للنادي اخذت كلاص كهوة .. ورحت لمحاضرتي
كعدت على اول مدرج وحطيت التليفون مالتي والكهوة وكعدت اتصفح لحد ما يجي الاستاذ .. ويا ما دخل الاستاذ دخل ساري وياه .. استغربت هو مو بقسمنا ولا مرحلة اولى شعنده !
اتجاهلت ودرت وجهي واني حاطة جنطتي ع الكرسي اليمي
هيج عادتي تجي بنية اشيل جنطتي وارحب بيها واذا ولد اكوله منتظره صديقتي
شال جنطتي وكال : العفو بس اكعد
حجيت : بس هذا المكان محجوز !
– اي مو مشكلة القاعة فارغة ويكدر يكعد بغير مكان
حجه الأستاذ : هدوء رجائا وخفض ضوا القاعة ا وشغل الحاسبة ع الشاشة وبدا يشرحلنا
اتوترت وهو كاعد ولعبت نفسي
ينتجي ع الكرسي هيج حتى يطخ عباتي
انتجيت على يمنتي وبقيت حاطة ايدي على خدي علمود ابتعد من عنده وما انطخ بيه ..
همس : اذا تصعبيها اني احب الصعب ….

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية صوت من المجهول)